“Pathianin Mihringte Hi Hell-a Hâl Tûrin Thiam Loh A Chantîr Tak Zet Em?”
“Pathian thu zirlai em ni in nih?”
He zawhna an hriat hian Joel-a leh Carl-a te chuan mak an ti hle a. Hêng mi pahnihte—Jehova Thuhretute hmunpui Brooklyn, New York-a volunteer thawkte —hian an awmna bul hnai lehkhabu dâwra lehkhabute chu an en kual vêl a. Joela’n Bible thu mal hrilhfiahna bu a en lai chuan, Carl-a chuan rawngbâwla a chhuahnaa mi a kawmte nêna an titite chu a hrilh chhâwng mêk a. Chu an titi chu an bula ding pa chuan lo hre thawiin anmahni chu a rawn pan ta a.
Nimahsela, chu tlangvâl pahnihte chu Pathian thu zirlai an nih leh nih loh ai mah chuan ama chungchâng chuan chu pa rilru chu a kam zâwk mah a. Heti hian a sawi a: “Juda mi ka ni a, Judate’n Isua an hnâwl avângin keipawh hell-a hâl tûr ka ni tih ka Kristian ṭhian ṭhenkhatte’n min hrilh a. Chu thu chuan ka rilru a tibuai tak zet a ni. Chutiang hremna chu hmangaihna Pathian hnên aṭanga lo kala mawi lo a ni si. Pathianin mihringte hi hell-a hâl tûrin thiam loh a chantîr tak zet em?” tiin.
Joela leh Carl-a te chuan tih tak zeta Bible zirlai an nih thu chu pa chu an hrilh a. Mitthite chu nikhaw hre lo, thawhlehna nghâka muhîl mai an ni a. Chuvângin mitthite chuan nghaisak emaw, meidîla hrem emaw an ni lo tih Bible aṭangin an kawhhmuh a. (Sâm 146:3, 4; Thuhriltu 9:5, 10; Daniela 12:13; Johana 11:11-14, 23-26) Minute 45 lai an titi hnu chuan, chu pa chuan Joel-a leh Carl-a chu a address a pe a, chu mi chungchâng chu sawipui leh tûrin a ngên bawk a ni.
Hell chu meia innghaisakna hmun a nih chuan, miin chuta kaltîr tûrin an ngên duh ang em? Joba chuan a hrehawm tawrhna chu pumpelh a duh êm avângin hetiang hian a ngên asin: “Tuin nge hell-ah chuan min thukru ang a, a thinur reh hma loh chu chutah chuan mi thukru ang?” tiin. (Joba 14:13, Douay Version) Joba chuan hell chu innghaisakna hmun a nih a ring lo chiang hle a, chutihahnêkin, chutah chuan inhumhimna a zawng zâwk a ni. Thihna chu awm tawh lohna a ni a, Bible-a hell chu mihringte thlânmual pângngai mai hi a ni. Kan thih hnua kan chunga thil lo thleng chungchâng leh chu mi hnua beiseina awm chungchâng i hre belh duh a nih chuan, a hnuaia sâwmna hi chhânglêt tûrin kan sâwm a che. (w01 7/15)