Pathian Thilmak Tihte Chu Ngaihtuah Rawh
“Aw LALPA, ka Pathian, nangin thilmak i tihte leh, keimahni lam i ngaihtuahnate hi a tam êm êm mai a, chûng chu i hmâa tihlan sên rual a ni lo.”—SAM 40:5.
1, 2. Pathian thilmak tihte finfiahna eng nge awm a, chu chuan eng ti thuai tûrin nge min nawr ang?
BIBLE i han chhiar a, Pathianin hmân laia a mi Israel-te tân thilmak tak tak a ti ṭhîn tih i hmu thei mai a. (Josua 3:5; Sâm 106:7, 21, 22) Chutiang zâwng chuan tûnah hian Jehova chu mihringte chungchângah inrawlh tawh lo mah se, kan vêlah hian a thilmak tihte chu tam tak kan hmu a ni. Chuvângin, fakna hla phuahtu thusawi: “Aw LALPA, i thiltihte chu a va tam êm! Finnain i siam vek a ni: Leilung hi i hausaknain a khat a nih hi,” tih hi ṭâwmpuina tûr chhan kan nei a ni.—Sâm 104:24; 148:1-5.
2 Tûn laiah mi tam tak chuan Siamtu thiltihte finfiahna chiang tak awm chu an haider emaw, an hnâwl emaw ṭhîn. (Rom 1:20) Amaherawhchu, keini tân chuan ngun taka ngaihtuah leh, min Siamtu hmaa kan dinhmun leh mawhphurhna azira thu tlûkna lo siam chu a ṭhain a inâwm a ni. Joba bung 38 aṭanga 41-te hi he mi atân hian ṭanpuitu ṭha elkhên an ni a, a chhan chu hetah hian Jehova’n A thilmak tih ṭhenkhatte Joba ngaihtuah atân a rawn sawi chhuah vâng a ni. Pathian rawn sawi chhuah thu pawimawh ṭhenkhat lo ngaihtuah la.
Hna Thiltithei Tak leh Mak Tak
3. Joba 38:22, 23, 25-29-a ziak angin, Pathianin eng thute nge a zawh?
3 Ṭum khat chu Pathianin heti hian Joba a zâwt bawk a: “Vûr dah khâwlna hmunah i lût tawhin, rial dah khâwlna hmunah pawh i lût tawh em ni? Buai hun atân te leh Indo leh inbeih nî atâna ka khêk chu a ni?” tiin. Lei hmun tam takah chuan vûr leh rial te chu nun phung pangngaia tel ve an ni. Pathian chuan a sawi zawm zêl a: “Tuin nge ruahpui tâna luan kawr leh ṭêk tâna kawng siam? Tuma awm lohna leh mihring chên lohna thlalêra ruah sûrtîr tûrte, ram ro leh pilril tihnâwng tûr te, hlobet hring ṭotîr tûr tein? Ruahin pa a nei em ni? Daifîmte hi tu hrin nge? Tu chhûl aṭangin nge tui khal hi a lo chhuah? Vâna vûr lo tla ṭhîn hi tu hrin nge?” tiin.—Joba 38:22, 23, 25-29.
4-6. Mihringte’n vûr chanchin an hriatna hi eng kawngin nge kimchang lo tak a nih?
4 Hun âwl nei hman lêk lova khawsa mi ṭhenkhatte leh zin mite chuan vûr chu thil hnawksak tak ang lekin an ngai mai thei a. Mahse, mi dang tam tak chuan vûr chu thil duhawm, thlasik khaw mawi tak, thil engemaw bîk tihna tûr hun remchâng siamtu angin an ngai thung. Pathian zawhna hi rilrua ngaihtuah reng chungin, vûr chanchin kimchang i hriain, a lan dân takngial pawh i hre chiang em ni? A, vûr hlâwm a tak ngeia kan hmuh avângin emaw, a thlalâk kan hmuh vângin emaw vûr tam tak awm khâwm chu eng ang nge a nih tih chu kan hre ngei alâwm. Mahse, eng nge vûr them mal tê tê chanchin ni ve thung le? An lo chhuahna hmunah te i enfiah tawhin, eng nge an lan dân tih te i hria em ni?
5 Mi ṭhenkhat chuan vûr them tê tê chanchin zir nân leh a thlâ lâk nân kum sâwm engemaw zât an hmang ral a ni. Vûr them pakhat hi vûr nawi tê tê, pianzia chi hrang hrang nei za vêl awmkhâwm aṭanga insiam a ni ṭhîn. Atmosphere tih lehkhabu chuan heti hian a sawi: “Vûr themin pianzia chi hrang a neih tamzia chu a lâr hle a ni; scientist-te’n vûr them inang chiah chiah a awm theih lohna tûr chhan eng dân mah a awm lo an ti nachungin, vûr them inang chiah chiah hi hmuh a la ni ngai lo. Zir dân pangngai aia rei daih zirtu chu . . . Wilson A. Bentley-a a ni a, ani chuan kum 40 aia rei vûr them thlâte la-in enlenna hmangin an chanchin a zir a; mahse, inang chiah chiah a hmu ngai lo a ni,” tiin. Engemaw châng tê-in inang chiah chiah nia lang chu lo awm pawh ni sela, chu chuan vûr them chi hrang tam êm êmzia chu a tidanglam chuang dâwn em ni?
6 Pathian zawhna: “Vûr dah khâwlna hmunah i lût tawh em ni?” tih kha han ngaihtuah lêt leh teh. Mi tam tak chuan chhûm khi vûr dah khâwlna hmunah an ngai a. Hêng dah khâwlna hmuna han kala, vûr nawi pianzia chi hrang hrang ziak chhuak veka, an lo insiam dân chanchin han zir chu i suangtuah phâk em? Science encyclopedia pakhat chuan: “Vûr laimute hi chhûm far tê tak têtê, -40°F (-40°C)-a vâwta lo tikhaltu ber an ni a; mahse, an nih phung leh lo awm ṭan dân tûn thlengin hriat chian a la ni lo,” tiin a sawi.—Sâm 147:16, 17; Isaia 55:9, 10.
7. Mihringte’n ruah chanchin hi eng anga tam nge an hriat?
7 A nih loh leh, eng nge ruah chanchin ve hi le? Pathian chuan Joba chu: “Ruahin pa a nei em ni? Daifîmte hi tu hrin nge?” tiin a zâwt a. He science encyclopedia tho hian: “Boruak chêt vêl dân chipchiar lutuk leh, boruakin tuihu leh thil tê tak tê tê a pai zât inthlâk danglam nasa ṭhîn lutuk avângin, chhûm leh ruah lo insiam dânah ngaihdân vântlâng tak pawh a siam theih loh a ni,” tiin a sawi. Ṭawngkam mâwl zâwka sawi chuan, scientist-te hian rin dân kimchang tak tak an siam ṭhîn a, mahse ruah hi an hrilhfiah thei tak tak lo a ni. Chuti chung chuan, ruah pawimawh tak chu a lo sûr a, lei chu tui a rawn pe a, thlaite a châwm a, nunna awm theiin a rawn siam a, nun a tinuam bawk a ni tih i hria e.
8. Tirhkohte 14:17-a ziak Paula thusawi hi engvângin nge inâwm tak a nih?
8 Tirhkoh Paula thu tlûkna siam hi i pawm ve thei mai lo’ng maw? Ani chuan hêng thilmak tak takte aṭang hian a Titu chanchin zuk hmu thiam tûrin mi dangte a fuih a ni. Paula chuan Pathian Jehova chanchin chu heti hian a sawi: “Nimahsela amah hriattîrna awm lovin a insiam lo, chutin thil a ti ṭha ṭhîn a, vân ata ruahte leh kum ṭhat kumte a pe che u a, in rilru ei tûr leh lâwmnain a tihkhah ṭhin che u kha,” tiin.—Tirhkohte 14:17; Sâm 147:8.
9. Pathian thilmak tihte chuan a thiltihtheihna ropui tak chu engtin nge an lantîr?
9 Chutiang thilmak leh ṭangkai bawk si Titu chuan finna chhiar sên loh leh thiltihtheihna nasa tak a nei ngei ang tih chu rinhlelh rual a ni lo. A thiltihtheihna chungchângah chuan hei hi han ngaihtuah teh: ni tin vawi 45,000 vêl ṭêk tla anga chhût a ni a, chu chu kum khatah chuan vawi maktaduai 6 aiin a tam. Chu mi awmzia chu tûnah tak hian vawi 2,000 vêl ṭêk a tla tihna a nih chu. Vawikhat ṭêk tla lo chhuahna chhûm hlâwm khâwmah hian chakna a vir mup mup a, chu chu Khawvêl Indopui II-naa nuclear bomb an thlâk ang sâwm emaw, a aia tam emaw tluka chak a ni a. Chu chakna ṭhenkhat chu kâwlphê angin kan lo hmu a ni. Kâwlphê chu a râpthlâk mai bâkah nitrogen chi dang dang lei chhûnga lût thei chi siam tûra puitu a ni a, chu chu thlaiin chaw ṭha atân an lo hîp lût a. Chuvângin, kâwlphê chu chakna târ langtu ni mah sela, hlâwkna tak tak pawh a thlen tho a ni.—Sâm 104:14, 15.
Eng Nge I Thu Tlûkna?
10. Joba 38:33-38-a zawhna awmte hi engtin nge i chhân ang?
10 Joba angah inchanin Pathian Engkimtitheia’n zawhna a zâwt che angah han inchan la. Mi tam zâwk chuan Pathian thilmak tihte chu an ngaihtuah vak lo tih i pawm ngeiin a rinawm. Jehova chuan Joba 38:33-38-a zawhna kan hmuhte hi min zâwt a ni: “Vân thil ruatte chu i hriain leiah hian thu i neihtîr thei em? A nan tûr chein chhûm ata ruahpui vânawn i au thla thei em ni? Kâwlphête chu i hnêna lo kala, heta hi kan awm ti tûrin i tîr chhuak thei em ni? Tunge chhûm dumahte khian finna daha, tunge arsi thlâwkte hriat thiamna pe? Tunge finnaa chhûmte hi chhiar theia, vân tuithâwl tunge leih baw thei? Vaivutte a inhlâwm khâwm a, lei tlangte a inbelhbawm hi,” tiin.
11, 12. Pathian hi thilmak tak takte Titu a nihzia finfiahna ṭhenkhat chu engte nge ni?
11 Elihua’n Joba hnialna thu a sawite zînga tlêm tê chauh kan la ngaihtuah a, Jehova’n Joba chu ‘mipa taka’ chhâng tûra a tih zawhna ṭhenkhatte kan hmu bawk a. (Joba 38:3) “Ṭhenkhat” tia kan sawi nachhan chu, bung 38 leh 39-ah hian Pathianin thilsiam dang hriat tlâk tak tak a sawi chhuah bîk vâng a ni. Entîr nân, vâna arsi awm khâwmte khi. Tuin nge an dânte emaw, an thil ruatte emaw hre vek? (Joba 38:31-33) Jehova chuan Joba chu ramsa ṭhenkhat, sakeibaknei leh choâk te, lung bang sathâr leh ram sabengtung te, selepa leh ostrich te, sakawr chak tak leh mupui te chu a han sawi hmuh leh a. A nihna takah chuan, Pathianin Joba chu hêng ramsa chi hrang hrangte hi an nun theih nân leh an inthlah pun theih nân, an nih phung ṭheuhte hi a pêk an nih leh nih loh a zâwt a ni. Hêng bungte hi zir nuam i ti hle mai thei a ni, a bîkin sakawr emaw, ramsa dang emaw i lo ngainat viau phei chuan.—Sâm 50:10, 11.
12 Joba bung 40 leh 41-te hi i enfiah leh thei bawk a, hetah hian Jehova’n Joba chu thilsiam pahnih chungchânga a zawhnate chhâng tûrin a ti leh a ni. Chûngte chu taksa hrawl leh chak tak tuivawk (Behemoth), leh Nile luipuia awle hlauhawm tak (Leviathan) te an ni. Anmahni kawng kawngah chuan thilsiam mak tak, ngaihtuah phû an ni ve ve a. Eng thu tlûkna nge siam tûr kan nih tih tûnah chuan i lo en ang u.
13. Pathian zawhnain Joba kha engtin nge a nghawng a, hêng thil hian engtin nge keini min nghawng ve ang?
13 Joba bung 42 chuan Pathian zawhnain Joba a nghawng dân min kawh hmuh a. A hmain Joba chuan amah leh mi dangte a lo ngaihtuah lutuk ṭhîn a. Mahse, Pathian zawhnain zilhna a ken telte chu pawmin Joba chuan a ngaihtuahna chu a thlâk ta a ni. Heti hian a inpuang a: “[Jehova] engkim i ti thei tih ka hria e, i tum dâl rual engmah a awm lo. Tu a ni nge, hriatna lova thurâwn thup botu hi? Chuvâng alâwm ka hriat thiam lohte, ka tâna mak lutuk, ka hriat loh thilte ka sawi ni,” tiin. (Joba 42:2, 3) Ni e, Pathian thil tihte a ngaihtuah hnuah, Joba chuan hêng thilte hi a tân a mak lutuk a ni tih a sawi a ni. Hêng thilsiam mak tak takte hi kan ngaihtuah hnuah, keini pawh Pathian finna leh thiltihtheihna chuan kan rilru a khawih ve tûr a ni. Chutah chuan eng nge kan tum ber tûr ni ang? Jehova thiltihtheihna leh chakna nasa tak chuan kan rilru a khawih satliah ringawt tûr em ni? Nge chu mi aia nasa chuan chêttîr kan ni tûr zâwk?
14. Pathian thilmak tihte chu engtin nge Davida’n a tih?
14 Aw le, Sâm 86-ah hetiang lam hawia Davida thusawi kan hmu a, ani chuan a hmain fakna hlaah heti hian a sawi a ni: “Vânte khian Pathian ropuizia chu a hriattîr a; boruak zau tak khian a kut chhuak chu a lantîr ṭhîn a. Chhûn hian chhûn hnênah thu a sawi chhâwng zêl a, zân hian zân hnênah hriatna a lan chhâwntîr zêl a,” tiin. (Sâm 19:1, 2) Mahse Davida chuan a han sawi thui leh deuh a. Sâm 86:10, 11-ah heti hian a ziak a ni: “Nang chu i ropui si a, thilmakte i ti bawk ṭhîn a: Nangmah chauh hi Pathian i ni. Aw LALPA, i kawng chu mi entîr ang che; i thutakah ka awm ang: i hming ṭih tûrin thinlung sakhat mi puttîr ang che,” tiin. A thilmak tih zozaite avânga Davida’n Siamtu a ṭihnaah hian Pathian ṭihna âwm tâwk a tel a. A chhan chu i hre thei mai ang. Davida chuan hêng thilmak zawng zawngte Titheitu chu tihlâwm loh a duh lo a ni. Keini pawhin kan duh bîk tûr a ni lo.
15. Davida’n Pathian a ṭihna chu engvângin nge inâwm tak a nih?
15 Pathianin thiltihtheihna nasa tak a neih leh a thunun tlat avângin, a duhsakna dawng tlâk lo apiangte do zâwngin a hmang thei a ni tih a hria a ni ngei ang. Anni tân chu chu thil hlauhawm tak a ni. Pathianin Joba chu heti hian a zâwt a: “Vûr dah khâwlna hmunah i lût tawhin, rial dah khâwlna hmunah pawh i lût tawh em ni? Buai hun atân te leh Indo leh inbeih nî atâna ka khêk chu a ni?” tiin. Vûr te, rial te, ruahpui te, thli te, leh kâwlphê te chu a indona râlthuam vek an ni a. Hêngte hi leilung pianpui chakna nasa tak leh mak tak a va ni êm!—Joba 38:22, 23.
16, 17. Pathianin thiltihtheihna mak-râpthlâk tak a neih chu engin nge lantîr a, hmân laiin chu a thiltihtheihna chu engtin nge a lo hman tawh?
16 Thlipui vir chi emaw, cyclone emaw, ruahpui leh rial sûr emaw, tuilian emaw vânga tualchhûnga chhiatna nasa tak lo thleng i hre chhuak leh mai thei a. A hrilhfiah nân, kum 2000 tîr lamah khân, thlipui na takin Europe chhim-thlang a nuai a. Khaw chin hretute pawhin mak an ti hle a ni. Thlipui chu dârkâr khata kilometer 200-a chak a ni a, in chung sâng tam tak a la a, thîrhrui bante a chhêm tlu a, truck-te a chhêm let pheng phung bawk a. Hei hi i mitthlain hmuh han tum teh: Chu thlipui tleh chhûng ringawt chuan thingkûng maktaduai 270 a chhêm phawng a, a ṭhen chu a laiah a bung hmawk bawk a; Paris khaw pâwn, Versailles park-ah chauh pawh thingkûng 10,000 a tichhia a ni. Chhûngkaw maktaduai engemaw zâtin kâwlphetha an hmang thei lo va. Mi 100 dâwn lai an thi bawk. Chûng zawng zawng chu hun rei lo tê chhûng leka thleng a ni a. A va chak tehrêng êm!
17 Ṭhenkhat chuan thlipuite chu danglam thut thut, hawi zâwng lam pawh nei lo, awm hun mumal pawh nei lo, tiin an sawi mai thei a. A nih leh, Engkimtitheia chuan chutiang chakna chu thunun tak leh hawi zâwng neia hmangin thilmak ti ta sela, eng nge thleng thei ang? Chutiang deuh chu hmân laiin Abrahama hunah a lo ti tawh a, ani chuan lei zawng zawng chunga Rorêltuin Sodom leh Gomorra khaw pahnihte sualna chu a chhût a ni tih a hriat phah a ni. An sualna nasa tak thâwm chu Pathian hnênah a thleng chho va, ani chuan ânchhe dawng khua chu chhuahsan tûrin mi felte chu a ṭanpui ta a ni. Hmân lai chanchin chuan heti hian a sawi: Hêng khuate chungah hian “LALPA chuan. . . , vâna LALPA hnên aṭang chuan kât leh mei a sûrtîr a,” tiin. Chu chu thiltih mak tak a ni, misualte tihboral a, mi felte humhim chu.—Genesis 19:24.
18. Isaia bung 25 hian eng thilmakte nge a kawh?
18 A hnuah, Pathianin hmân laia Babulon khawpui chu thiam loh a chantîr a, chu chu Isaia bung 25-a khawpui a sawi hi a ni mai thei. Pathianin khawpui pakhat chu a ram vek dâwn tih a sawi lâwk a ni: “Khawpui pawh lei pâwngah i chantîr a; khua kulhpui nei pawh khaw chhiaah i chantîr a; ram dang mite lal in pawh khua lovah i chantîr si a; eng tikah mah sakin a awm leh tawh lo vang,” tiin. (Isaia 25:2) Babulon khaw awmna ṭhîn tûn laia tlawhtute chuan chu chu a dikzia an nemnghet thei a ni. Babulon chhiatna chu thil thleng fuh palh ve mai mai a ni em? Ni lo ve. Isaia chhûtna hi kan pawm ve thei zâwk a ni: “Aw LALPA, nang chu ka Pathian i ni a; ka chawimawi ang chia, i hming ka fak ang; thil mak tak, hmasânga remruatte chu, rinawm tak leh thutakin i ti si a,” tih hi.—Isaia 25:1.
Hma Lam Huna Thilmakte
19, 20. Isaia 25:6-8 thlen famkimna eng nge kan lo rin lâwksa theih?
19 Pathianin hun kal tawhah hrilhlâwkna a lo tifamkim tawh a, hma lam hunah pawh mak takin thil a ti leh dâwn a ni. Isaia’n Pathian “thil mak tak” a sawi chungchângah hian, hrilhlâwkna rin tlâk tak, la famkim tûr chu kan hmu a ni, Babulon chungchânga hrilhlâwkna a famkim tawh ang chiah khân. Eng ‘thil mak tak’ nge tiam a nih? Isaia 25:6 chuan heti hian a sawi: “He tlângah hian sipaihote LALPA chuan mi tinrêngte tân thil thautein ruai a ṭheh ang, uainte a fê nêna inchiah reng, thil thau takte thlînga khat, uainte a fê nêna inchiah reng ṭha taka thlit fai chu,” tiin.
20 Kan hma lawka lo thleng tûr Pathian tiam khawvêl tharah chu hrilhlâwkna chu a famkim ngei dâwn a ni. Chu mi hunah chuan, tûn laia mi tam takte tihrehawmtu harsatna zawng zawng hi mihring zîng ata lâk bo a ni tawh ang. Dik takin, Isaia 25:7, 8 chuan Pathianin a thiltihtheihna chu thilmak tih tawh zawng zawnga la mak berte zînga pakhat tih nân a hmang dâwn tih min tiam a ni: “Tin, mi tinrêng an vawm khuhna pâwn lam leh, hnam tinrêng an khuhna chu he tlângah hian a tichhia ang. Thihna chu a lem hlen ta; Lalpa PATHIAN chuan mi zawng zawng hmai ata chu mittuite a hru fai ang a; a mite hmingchhiatna chu leilung luah zawng zawng ata a la bo vang: LALPAN chu chu a sawi tawh si a,” tiin. A hnuah tirhkoh Paula’n he lai châng hi la chhuakin, Pathianin mitthite chu tinung lehin, a kaitho dâwn tih a sawi a ni. Chu chu thil mak tak a va ni dâwn êm!—1 Korinth 15:51-54.
21. Mitthite tân Pathianin eng thilmakte nge a tih dâwn?
21 Lungngaih mittui a bona tûr chhan dang leh chu mihringte taksa natna zawng zawng tihbo a nih dâwn vâng a ni. Isua leia a awm lai khân mitdelte mit a tivâr a, bengngawngte beng a tivâr a, chak lote tichakin mi tam tak a tidam a. Johana 5:5-9 chuan kum 38 chhûng zeng tawh mi pakhat a tihdam thu a sawi. A hmutute chuan chu chu thil mak tak niin an ngai a. A ni rêng bawk a ni! Amaherawhchu, Isua’n mitthite a kaihthawh lehna chu a mak lehzual dâwn tih heti hian a hrilh a: “Hêng hi mak ti suh u, a hun a thleng dâwn ta, chutih hunah chuan thlâna awm zawng zawngin a aw an hria ang a, an chhuak vek ang; thil ṭha titute chu nunna changin an tho leh ang,” tiin.—Johana 5:28, 29.
22. Pachhia leh mi retheite’n engvângin nge beiseina nên hma lam hun an thlîr theih?
22 A tiamtu chu Jehova a nih avângin chu chu a thleng ngei ngei dâwn a ni. A tihnun leh theihna ropui tak chu fîmkhur taka a hman hunah chuan, a rah chhuah chu a mak hle ang tih hi chiang ngam ang che. Sâm 72 chuan a Fapa, Lalber hmanga a tih tûr a sawi lang a ni. Chu mi zawhah chuan mi fel chu a duah hluah hluah ang a. Thlamuanna chu a duah hluah hluah bawk ang. Pathianin mi rethei leh pachhiate chu a chhanhim dâwn a ni. Heti hian a tiam a: “Leiah, tlâng chungahte hian, buh tam tak a awm ang a; a vui chu [hmân laia] Lebanon angin a nghîng suau suau ang a, khuaa mite chu lei hlobet angin an duah hluah hluah ang,” tiin.—Sâm 72:16.
23. Pathian thilmak tihte chuan eng ti tûrin nge min chêttîr ang?
23 Jehova thilmak tih zawng zawng, hun kal tawha a tihte, tûna a tih mêkte, leh nakin lawka a la tih tûrte chu ngaihtuahna tûr chhan kan nei chiang hle a ni. “LALPA Pathian, Israel-ho Pathian chu, fakin awm rawh se, amah chauh hian thilmak a ti ṭhîn. A hming ropui tak hi kumkhuain fakin awm bawk sela; lei pum pui pawh hi a ropuinaa tihkhahin awm rawh se. Amen, Amen.” (Sâm 72:18, 19) Chu chu kan chhûngkhat lainate leh mi dangte nêna kan inkawmna thupui ber a ni ṭhîn tûr a ni. Ni e, ‘hnam tin zîngah a ropuizia hril ila, mi tinrêngte zîngah a thilmak tihte chu i hril ang u.’—Sâm 78:3, 4; 96:3, 4. (w01 4/15)
Engtin Nge I Chhân Ang?
• Joba hnêna zawhna zawhte khân mihringte hriatnain chin tâwk a neihzia engtin nge a lan chiantîr?
• Joba bung 37-40 inkâra Pathian thilmak tih târ lanah hian i rilru khawihtu engte nge ni?
• Pathian thilmak tih ṭhenkhatte kan ngaihtuah hnuah engtin nge kan tih ang?
[Phêk 10-naa milemte]
Vûr them chi hrang tam takte leh kâwlphe thiltihtheihna nasa takte chungchânga i ngaih dân eng nge?
[Milem Hawhtîrtu]
snowcrystals.net
[Phêk 13-naa milemte]
Pathian thilmak tihte chu i titi-na thupui ber nihtîr ṭhîn rawh