Thilmak Titu Chu En Rawh U!
“Beng sikin Pathian thiltih makte chu ngaihtuah teh.”—JOBA 37:14.
1, 2. Kum 1922-ah eng thilmak tak nge an hmuh chhuah a, eng nge a rah chhuah?
HMASANG chanchin zir mi pakhat leh English mi ropui pakhat chu rohlu zawngin kum tam tak an lo thawk dûn tawh a. A tâwpah, kum 1922, November ni 26 khân Aigupta lal pharaoa-te thlânmual hmingthang tak, Lalho Phairuam an tihah chuan hmasâng chanchin zir mi Howard Carter-a leh mi ropui Lord Carnarvon-a te chuan an thawh rim rah sengin, Pharaoa Tutankhamen-a thlân an hmu chhuak ta a ni. Kawngka inchâr tlat an thlen chuan an verh kua a. Carter-a chuan mombati rawlh lûtin a chhûng chu a han bih ta a.
2 A hnua Carter-a sawi leh dânin: “Lord Carcarvon-a’n nghâkhlel tak maia, ‘Engemaw tal i hmu thei em?’ tia min zawh chuan, ‘Aw, thilmak tak tak ka hmu,’ tiin ka ṭawng chhuak thei ṭâwk a ni,” a ti. Thlân in chhûnga rohlu sâng tam tak zîngah chuan rangkachak hlang hlaka siam kuang pakhat a awm a. Chûng “thilmak tak tak” zînga ṭhenkhat chu thlalâkah emaw, museum-ah emaw i hmu tawh mai thei. Chûng museum-a thil awmte chu mak hle mah se, i nun nên a inkûngkaih kher lo vang. Chuvângin, nangmah nêna inkûngkaih ngei, leh i tâna hlutna nei ngei thilmakte chu i lo ngaihtuah ang u.
3. Kan tâna hlutna nei thei tûr thilmak chanchin khawiah nge kan hmuh theih ang?
3 Entîr nân, kum zabi tam tak kal tawha awm mi pakhat, film star emaw, sports thiam emaw, lal chhûngkaw zînga mi emaw rêng rêng aia hriat tlâk zâwk hi lo ngaihtuah teh. Ani chu Khaw chhak fate zîngah chuan mi ropui ber tia sawi a ni a. A hming pawh i hre ngei ang—Joba a ni. Bible bu pakhat tawp chu a chanchin ziah nân hman a ni bawk. Mahse, Joba dam rualpuite zînga pakhat, tlangvâl Elihua chuan ani chu zilh ngaiin a hre tlat mai a ni. A chhan chu Elihua chuan, Joba’n amah leh a kiang hnaia awmte a hleihluakin a ngaihsak a ni, a ti a. Joba bung 37-ah chuan thurâwn fiah leh fing tak tak dang, kan tâna hlutna nei thei tûr kan hmu a ni.—Joba 1:1-3; 32:1–33:12.
4. Joba 37:14-a chhinchhiah fuihna thu hi engvângin nge Elihua’n a sawi?
4 Joba ṭhian nia ngaih pathumte chuan Joba ngaituahna emaw, thiltih emaw dik lo nia an hriatte chu thui tak tak an sawi chhuak a. (Joba 15:1-6, 16; 22:5-10) Elihua chuan dawhthei takin an sawi zawh hun chu a lo nghâk a. Chu mi zawhah hriatthiamna leh finna nei takin a ṭawng ve ta a ni. Thu ṭha tam tak a sawi a, mahse he thu pawimawh tak hi lo chhinchhiah rawh: “Joba, hei hi ngaichâng teh, beng sikin Pathian thiltih makte chu ngaihtuah teh,” tih hi.—Joba 37:14.
Thil Titu Chu
5. Elihua’n “Pathian thiltih makte” a tih khân eng nge a huam tel?
5 Elihua chuan Joba chu mahni inngaihsak tûrin emaw, amah Elihua emaw, a nih loh leh mihring dang rêng rêng emaw pawh ngaihsak tûrin thurâwn a pe lo tih chhinchhiah la. Fing takin Elihua chuan Joba—leh keini—chu Pathian Jehova thilmak tihte ngaihtuah tûrin min fuih zâwk a ni. “Pathian thiltih makte” tih thu hian eng nge huam tela i rin? Chu bâkah, hrisêlna te, sum leh pai te, hma lam hun te, i chhûngkua te, hnathawhpuite, leh ṭhenawmte i ngaihtuah tho si a, engvângin nge Pathian hnathawhte chu i ngaihtuah tel kher ang? Pathian Jehova thilmak tihte chuan a finna leh kan chheh vêla thilsiam zawng zawng chunga a thuneihna te hi a huam tel a. (Nehemia 9:6; Sâm 24:1; 104:24; 136:5, 6) Chu chu chiang taka hre tûrin, Josua bu-a thu pawimawh pakhat hi lo chhinchhiah teh.
6, 7. (a) Jehova’n Mosia leh Josua hun laiin eng thil makte nge a tih? (b) Chûng Mosia leh Joshua hun laia thil mak thleng lai chu hmu ve ni ta ang la, engtin nge i awm ang?
6 Hmân lai Israel mite chu Mosia’n zalênnaa a hruai theih nân, Jehova chuan hmân lai Aigupta chungah khân hri a lêntîr a, chu mi hnuah Tuipui Sen a inṭhentîr bawk a. (Exodus 7:1–14:31; Sâm 106:7, 21, 22) Hetiang deuh bawk thil thleng hi Josua bung 3-ah târ lan a ni a. Mosia thlâktu Josua chuan Pathian mite chu tuipui dang kânpui a, Thutiam Rama a hruai luh a ngai a ni. Josua chuan: “Intithianghlim rawh u: naktûkah LALPAN in zîngah thil mak takte a ti dâwn e,” a ti a. (Josua 3:5) Eng thil makte nge ni ang?
7 Aw le, Jehova chuan Jordan Luipuia tui chu a tiṭhen leh a, puitling leh naupang sâng tam takte chu lei chârah an kal kai a ni tih thuziak chuan a târ lang. (Josua 3:7-17) Chu lai hmunah chuan awm ve-in, luipui inṭhen lai leh chûng mipui zozaiin him taka lui an kal kai lai chu hmu ni ta ila chuan, mak kan tiin kan rilru a khawih êm êm ang! Chu chuan thilsiamte chunga Jehova thiltihtheihna a lantîr a ni. Tûn lai—kan dam chhûng—ngeiah pawh hian chutiang tluk thova mak chu thil a awm ve a. Chûng zînga ṭhenkhat chu engte nge tih leh, engvângin nge kan ngaihsak ang tih hre tûrin Joba 37:5-7 hi i lo ngaihtuah ang u.
8, 9. Joba 37:5-7 hian eng thilmakte nge a kawh ber a, engvângin nge chûng chu kan ngaihtuah ang?
8 Elihua’n: “Pathian chuan mak takin a aw a tiri dur dur a, thil ropui tak, kan hriat phâk loh a ti a ni,” tiin a sawi a. Pathianin “mak takin” thil a ti, a han tih hian, Elihua rilruah eng nge awm? Aw le, vûr leh ruahpui chungchâng te a sawi a. Hêng thilte hian loneitu chu a lovah hna a thawhtîr thei lo va. Chu chuan Pathian hnathawhte ngaihtuahna hun leh chhûtna hun a siamsak zâwk a ni. Loneitu kan ni lo mai thei a, mahse ruah leh vûr chuan min nghawng thei vek a ni. Kan chênna hmun azirin vûr leh ruah chuan kan hnathawhte a tikhaihlak ve thei bawk. Chutiang thilmak titu chu tunge ni a, eng nge a awmzia tih te ngaihtuah nân hun kan insiam em? Chutiang chuan i ti tawh ngai rêng rêng em?
9 Chhinchhiah tlâk takin, Joba bung 38kan chhiar chuan, Pathian Jehova ngeiin Joba hnênah zawhna awmze nei tak tak zâwtin, hetiang zâwng hian ngaihtuahna a rawn hmang ve a. Min Siamtu chuan hêng zawhnate hi Joba hnêna a zawh ni mah sela, kan rilru puthmangah te, kan nunah te, leh kan hma lam hunah te pawimawhna an nei chiang hle a ni. Chuvângin, Pathianin engte nge a zawh tih lo en ila, a awmziate lo ngaihtuah ila, ni e, Joba 37:14-in ti tûra min fuih ang hian i lo ti ang u.
10. Joba bung 38 hian eng angin nge min nghawng ang a, eng zawhnate nge a rawn hrin chhuah?
10 Bung 38-na chu heti hian a inṭan a: “Tin, LALPA chuan ṭhâwngaleivir aṭangin Joba chu a chhâng a, heti hian a ti a: ‘Hriatna tel lo thua thurâwn tithimtu hi tunge ni? Mipa takin i puan veng la, thu ka zâwt ang chia, mi hrilh ang che,’” tiin. (Joba 38:1-3) Hei hian rilru puthmang dik a rawn siam a. Joba pawh a ngaihtuahna siam dik tûrin a ṭanpui a, lei leh vân Siamtu hmaa ding a ni tih leh, a hnênah chuan chanchin la sawi tûr a ni zâwk tih te a lo hre thiam ta a ni. Chu chu keimahni leh kan dam rualpuite tân pawha tih tûr ṭha tak a ni. Chu mi zawhah Pathian chuan Elihua thil sawi ang chite chu a rawn sawi chhuak ve a. “Leilung nghahchhan ka phûm lai khân khawiah nge i awm? I hriat thiam chuan sawi rawh. A len lam bîte tunge thliah, i hre meuh maw? A nih leh, a chung zâwl tehna tunge zam? A nghahchhan chu khawiah nge a din ngheha, tunge a kil lung phûm ni?”—Joba 38:4-6.
11. Joba 38:4-6 hian eng nge min hriat thiamtîr ang?
11 Leilung awm ṭantirh lai khân—Joba khawiah nge a awm—kan zînga mi rêng rêng pawh hi khawiah nge kan awm? Mihringte hi kan leilung duang chhuaktu, leh chu thil duan anga a lenzâwng te teha bithliah vektu in sa thiam chu kan ni em ni? Ni lul lo mai! Chutih lai chuan mihringte chu awm pawh an la awm lo rêng rêng. Kan leilung hi insak ang maia sawiin, Pathian chuan: “Tunge a kil lung phûm ni?” tiin a zâwt a ni. Kan chên theih nân leh ṭhan theih nân lei hi kan nî aṭanga a hlat dân a dik tâwk chiah chiah tih kan hria a. A lenzâwng pawh hi a dik tâwk chiah a ni. Lei hi tûn aiin lian deuh sela chuan, hydrogen boruak hian kan lei hualtu boruak hi a kal pêl thei lo vang a, kan leilung hi nun theih lohna hmun a ni mai dâwn a ni. Chuvângin, tuemaw chuan “a kil lung phûm” chu a hmun dik takah a lo phûm tih a chiang hle. Hmingṭhatna chu Joba dawn tûr em ni? Keini dawn tûr em ni? Nge Pathian Jehova dawn tûr zâwk?—Thufingte 3:19; Jeremia 10:12.
Tuin Nge A Chhânna Hria?
12. Joba 38:6-a zawhna awm hian eng nge min ngaihtuahtîr?
12 Pathian chuan: “A nghahchhan chu khawiah nge a din ngheh?” tiin a zâwt bawk a. Zawhna ngaihtuah tham tak a ni lo maw? Joba hriat loh thu mal pakhat keini chuan kan hre chiang mai thei—hîpna, tih hi. Kan zînga a tam zâwkin ni hlâwm lian tak aṭanga hîpna tha lo kal chuan lei chu a awmna tûrah tak a awmtîr tih kan hre thiam a, a nghahchhan a din nghet tiin kan sawi thei a ni. Chuti chung pawhin, tuin nge hîpna awmzia chu hre thiam tak tak thei ang?
13, 14. (a) Hîpna chungchângah eng thu dik nge kan pawm tûr? (b) Joba 38:6-in a rawn sawi chhuah dinhmun hi engtin nge kan ngaih ang?
13 Tûn hnai lawka chhuak The Universe Explained tih lehkhabu chuan ‘hîpna chu leilung pianpui chaknate zînga kan hriat lâr ber, kan hriat thiam loh ber si a ni’ tiin a sawi a. “Hîpna tha hi boruakah, a kalna kawng hmuh mai theih si lohvin, a kal tlang nghâl ṭhîn niin a lang. Mahse, tûn hnai maiah physics thiamte chuan hîpna kal dân chu thil tê tak tê tê, gravitons tia vuahte fâwn che vêl niin an chhût ta a . . . Mahse tuma’n gravitons chu a awm ngei tih an hre chiang chuang lo,” a ti bawk. Chu thuin a kawh chu han ngaihtuah teh.
14 Jehova’n Joba hnêna chûng zawhnate chu a zawh hnuah kum 3,000 lai chu science thiamna pawhin hma a sâwn tawh a. Chuti chung pawh chuan, keini emaw, physics thiamte emaw pawhin kan lei hi a herna tûr dik taka awmtîr theitu, he lai hmuna nun min chêntîr thei tûra a awmna tûr dik chiaha awmtîr theitu hîpna chu kan hrilhfiah chiang thei tak tak lo. (Joba 26:7; Isaia 45:18) Hei hi thil mak tak hîpna chungchâng chipchiar taka zir kan vaiin kan mamawh tia rawtna a ni lo. Pathian thilmak tihte zînga he thil pakhat chauh kan ngaihtuah rîkngawt pawh hian amah kan thlîr dân a khawih zâwk tûr a ni. A finna leh hriatna chu mak-râpthlâk i tiin, a duhzâwng chungchâng hriat tam lehzual kan mamawh nachhan chu i hre thiam em?
15-17. (a) Joba 38:8-11 hian eng nge a kawh ber a, eng zawhnate nge a hrin chhuah? (b) Tuifinriatte leh lei chunga an insem darh dânte hriatna chungchângah eng thu dik nge pawm tûr awm?
15 Siamtu chuan a zawhna chu a chhunzawm zêl a: “Tuipui chu chhûla a lo chhuah lai khân tuin nge kawng lo khâr hnan? A silhfên atân chhûm ka siam a, a tuam puanah thim chhah tak; a chîm chin tûr te ka siam a, a danna leh khârna tûr te; heti thleng chauh hian lo kal la, pêl hauh suh, tah hian i fâwn vêl tâwp rawh se, ka ti a ni,” tiin.—Joba 38:8-11.
16 Tuipui kawng lo khâr hnan tih chuan khawmualpuite, tuifinriatte, leh tui fâwnte a huam tel a. Hêng thilte hi engtia rei nge mihringten an lo zir tawh? Kum sâng tam tak chhûng an zir tawh a—kum zabi tâwpah phei chuan nasa lehzualin an zir a ni. An chanchin hriat tûr tam zâwkte chu tûnah chuan nemngheh vek a ni tawhin i lo ngai mai thei. Mahse, tûn kum 2001-ah hian, he mi chungchâng hi library lian tak takah emaw, Internet hmangin emaw thu thar ber ber hriat tumin chhui ta la, eng nge i hmuh chhuah ang?
17 Lehkhabu râwn hlawh tak pakhatah chuan he thu inziak hi i hmu thei ang: “Lei chunga khawmual inpharh duai leh tuifinriat insem darh dân te, leilung pianhmang lian leh pawimawh insem darh dân te hi science lama chhuina leh rindân siamna kawngah pawh harsatna mak berte zînga mi a ni,” tih hi. Chu mi hnuah, kan sawi tâk encyclopedia chuan hrilhfiahna awm thei pali a târ lang a, mahse chûng chu “rindân tam tak zînga mi” a ni a ti. I lo hre tawh mai thei a, rindân tih chuan “finfiahna tam tâwk awm loh vânga hrilhfiahna mumal lo a kâwk a ni.”
18. Joba 38:8-11 hian eng thu tlûkna nge a neihtîr che?
18 Chu chuan Joba 38:8-11-a zawhna kan chhiarte hi a hun dik taka chhiar kan nihzia a tichiang a ni lo’m ni? Hêng kan lei nihphung zawng zawng ruahman dânah hian, keini hi hmingṭhatna dawng tûr chu kan ni lo chiang hle. Thla khi a hîpna tha-in tuifâwn rawn siam tûr leh, tuifâwn chuan keimahni leh kan chênna te emaw, kan tuipui kamte emaw a khawih buai lêm lohna tûr tâwka hlaa dahtu kan ni lo. A dahtu chu i hria alâwm, thil mak takte Titu chu.—Sâm 33:7; 89:9; Thufingte 8:29; Tirhkohte 4:24; Thu Puan 14:7.
Jehova Chu A Phu Tâwkin Chawimawi Rawh
19. Joba 38:12-14-a hla thu hian khawvêl nihphung eng nge min ngaihtuahtîr?
19 Joba 38:12-14-a sawi thawi angin, mihringte hian lei vir dânah hmingṭhatna an dawng thei lo. Hetia a vir avâng hian zîng kâr, mawi lutuk a lo awm ṭhîn. Ni a lo chhuak a, kan leilung pianhmang a lang chiang tial tial a; thil nemnaa hlum kan nem a, a hmêl a danglam zêl ang hi a ni. Lei chêt dân tlêm tê tala kan ngaihtuah ringawt pawhin, a vir chak lutuk lo chu mak kan ti zâwk ngei ang, vir chak lutuk sela chuan thil pawi tak a thleng dâwn tih chu kan hre thiam thei mai a ni. A vir muang lutuk hek lo; vir muang lutuk sela chuan chhûn leh zân a rei lutuk ang a, mihring nun theih loh nân a lum lutukin a vâwt lutuk bawk ang. Zêp lohvah chuan, mihringte ni lova Pathian zâwkin lei vir chak zâwng a lo bithliah fel chu lâwm êm êm tûr kan ni.—Sâm 148:1-5.
20. Joba 38:16, 18-a zawhnate hi engtin nge i chhân ang?
20 Tûnah, hêng zawhnate hi Pathianin a zâwt che angah han inngai la: “Tuipui hnârahte i lût tawh ngai em? A thûkzia te i fang chhuak tawh em ni?” tih hi. Tuipui chanchin zir mi pawhin a chhâng hlei thei lo vang! “Lei zauzia te hi i hre phâk em ni? I hriat vek chuan sawi rawh,” tih te hi. (Joba 38:16, 18) Lei hmun zawng zawng emaw, a tam zâwk emaw hi i tlawhin i fang vêl tawh em? Lei chunga hmun mawi leh mak tak tak ngaihsakna chuan damchhûng hun engzât tak daih thei ang maw? Chûng chu hun mak tak a va ni dâwn êm!
21. (a) Joba 38:20-a zawhnate hian science lamah eng thlîr dân nge a rawn hrin chhuah? (b) Êng chungchânga thu dik tak chuan eng ti tûrin nge min chêttîr ang?
21 Joba 38:20-a zawhna thûk tak hi lo en bawk teh: “Êng chênna kawng chu khawiah nge? Thim pawh chu khawiah nge a hmun?” tih hi. Hun rei tak chhûng chu, dîla tuifâwn kal ang maiin êng hi boruakah a fâwn ve nia ngaih a ni tih i hre mai thei. Chu mi hnuah, kum 1905 khân Albert Einstein-a chuan êng hi thahrui siamtu thil tê tak tê tê ang a ni tiin a hrilhfiah a. Chu chuan thil a chingfel ta em? Aw le, tûn hnai lawka chhuak encyclopedia chuan: “Êng hi thil tê tak tê tê nge fâwn thei chi zâwk?” tiin zawhna a siam a. A zawhna chu chhâng nghâlin: “[Êng] hi a pahnih chuan a ni kawp thei lo niin a lang, a chhan chu nih phung pahnihte [fâwn thei chi leh thil tê tak tê tê] hi a inan loh êm avângin. A chhânna ṭha ber chu, êng chu a enga mah a ni chiah lo ve ve tih hi a ni,” tiin. Mihringte’n êng chungchânga Pathian hnathawh hi la hrilhfiah kim thei rih lo mah se, (ni êng leh ni zung chakna hmanga thil siamte aṭangin) lumna chu kan la dawng reng tho a ni. Êng chakna hmanga thlaite chaw siam leh oxygen boruak siam chhuah chu kan lo hmang ṭangkai êm êm a. Êng avângin kan chhiar thei a, kan hmangaih takte hmêl pawh kan hmu thei a, ni tla tûrte pawh kan thlîr vawng vawng thei a, thil dang tam tak pawh kan tihtheih phah a ni. Chutiang thil kan tih laite chuan, Pathian thilmak tihte chu kan pawm tûr a ni dâwn lo’m ni?—Sâm 104:1, 2; 145:5; Isaia 45:7; Jeremia 31:35.
22. Hmân laia Davida khân Pathian thilmak tihte chu engtin nge a sawi?
22 Jehova thilmak tihte chhûta kan ngaihtuahna chuan, kan thil ngaihtuah zawng zawngte avânga mak ti leh hlauva min awmtîr ringawt chu a tum ber em ni ang? Ni hauh lo mai. Hmân laia hla phuahtu pakhat Davida chuan, Pathian thiltih zawng zawng chu sawi sên rual loh leh hriat thiam phâk loh a nihzia a lo sawi a. Heti hian a ziak a ni: “Aw LALPA, ka Pathian, nangin thilmak i tihte . . . hi a tam êm êm mai a, . . . hriattîrin hril dâwn ila, chhiar sên rual a ni lo vang,” tiin. (Sâm 40:5) Mahse, hêng thiltih ropui tak takte hi a ngawih bopui mai dâwn a tihna erawh a ni hauh lo. Chu chu finfiahin Davida chuan a tum ruhna chu Sâm 9:1-ah hian a târ lang a ni: “LALPA hnênah chuan ka thinlung zawng zawngin lâwmthu ka sawi ang a; i thilmak tih zawng zawng chu ka hriattîr ang,” tiin.
23. Pathian thilmak tihte chu eng angin nge i ngaih a, mi dangte engtin nge i ṭanpui theih ang?
23 Keini pawh chutiang bawk chuan kan rilru a khawih ve tûr a ni dâwn lo’m ni? Pathian thil tih ropuite mak kan tihna chuan a chanchin sawi tûr te, a thil lo tih tawh chanchin sawi tûr te, leh a thil la tih leh tûr chanchin sawi tûr tein min chêttîr tûr a ni dâwn lo’m ni? A chhânna chu a lang sa reng mai—‘hnam tin zîngah a ropuizia kan hril tûr a ni a, mi tinrêngte zîngah a thilmak tihte chu kan hril tûr a ni.’ (Sâm 96:3-5) Ni e, Pathian thilmak tihte inngaitlâwm taka kan ngaihhlutna chu a chanchin kan hriatte mi dangte hnênah hrilhin kan lantîr thei a ni. Siamtu awm ring lo hnam kâra seilian ni mah sela, a ṭha lam zâwng leh hriatna tipung zâwnga kan thusawite chuan Pathian a awm tih pawm tûrin a kai harh thei a. Chu mai ni lovin, ‘engkim siamtu,’ thilmak takte Titu, Jehova chanchin chu zir châk tûr leh a rawngbâwl châk tûrin a chêttîr thei bawk a ni.—Thu Puan 4:11. (w01 4/15)
Engtin Nge I Chhân Ang?
• Joba 37:14-a fuihna thu hian Pathian thiltih eng nge a ngaihtuahtîr che?
• Joba bung 37 leh 38-a sawi lan, science thiamna pawhin a hrilhfiah theih loh thil ṭhenkhat kha engte nge ni?
• Pathian thilmak tihte chu eng angin nge i ngaih a, chu chuan eng ti tûrin nge a chêttîr che?
[Phêk 7-naa milem]
A awmna hmuna awm reng tûrin, tuipui chu tuin nge kawng lo khâr hnan?
[Phêk 7-naa milem]
Pathian siam leilunga hmun mawi zawng zawng hi tuin nge tlawh kim vek tawh?