Lalram Thu Puangchhuaktute Report

India​—“Hnam Chi Tin Inpumkhatna” Ram

“Hnam chi tin inpumkhatna” tih hi India rama hnam inpumkhatna sawifiah nâna hman auh hla lâr tak a ni. He ram zau tak, hnam zia te, ṭawng te, sakhuana te, chi te, silhfên inbeldân te, leh ei in chi hrang tam tak inpawlh nuaihna kâra inpumkhatna neih chu thil awlai a ni lo. Mahse, chutiang inpumkhatna chu India rama Jehova Thuhretute office-ah chuan a awm tlat a ni; chuta mahni duhthua inpê a, hna thawka chêngte state leh union territory tam tak aṭanga kal khâwm, ṭawng chi hrang hmangte ni mah se, an inpumkhat ṭha êm êm a ni.

• Chûng zînga nula pakhat, Rajrani-i hi i lo hmêlhriat ang u​—Ani hi India hmâr thlang tâwp Punjab rama awm a ni a. School-a a kal laiin a pâwl rualpuite zînga pakhat chuan Jehova Thuhretute nên Bible an zir ṭan a. Chu hmeichhe tleirâwl chuan Rajrani chu Bible ngaihven tûrin a ti a. A pâwlpuinu chuan English a thiam vak loh avâng leh, chutih lai chuan Punjabi ṭawnga Vênnainsâng hmuh tûr a la awm si loh avângin, magazine chu lehlinsak tûrin Rajrani chu a ngên ṭhîn a. Chuta Vênnainsâng a chhiar chuan Rajrani chu a hneh ṭan ta êm êm mai a, a nu leh pate’n an dodal chung pawhin hma a sâwn chho zêl a, a tâwpah chuan Pathian Jehova hnênah a inpumpêk ta a ni. Tûnah chuan India Bethel-ah rawng bâwlin, Kristian thu leh hla te chu Punjabi ṭawngin a lehtling a. Thutak hmuh tîrtu hna ngei mai chu!

• India ram hmun dang, Kerala chhim thlang lam aṭanga lo kal Bijoe-a chungchâng pawh hi lo ngaihtuah ila. Hnam chawimawina hunserh neihnaa tel duh lo va, a tualdawih avânga school aṭanga hnawhchhuah a ni a. An thubuai chu court-ah thlenin, atâwpah court chuan biakna thianghlim chu hnehna a pe ta a, Bijoe-a pawh sikulah a kal leh ta a.a College-ah pawh a kal a. Mahse, an college-a nunchang bawlhhlawh tak takte chuan a chhia leh ṭha hriatna chu a tibuai hle a; chuvângin, a kum khatnaah chuan a chawlhsan ta a ni. Tûnah chuan Bethel-ah kum sawm chuang a awm tawh a, zirna sâng um ai chuan Bethel chhûngkua, hnam chitin ni chung pawha inpumkhat tlat thote zînga tel ve chu a hlâwkpui nasa zâwk hle a ni.

• Norma-i leh Lily-i te pahnih hi kum 70 chuang tawh ve ve, kum tam tak chhûng hmeithai tawh an ni a. Kum 40 chuang ve ve hun bi kimin rawng an bâwl tawh a ni. Lily-i branch-ah kum 20 vêl zet Tamil ṭawng letlingin a awm tawh a, Norma kum 13 kaltaa a pasal a sûn hnu aṭangin Bethel-ah a rawn kal a. Hnathawktu taima, uluk an nih mai bâkah, Bethel pum puia mite an hokhâwm ṭha êm êm a. Mikhual an lâwm thiam êm êm a; tin, Bethel chhûngkaw zînga naupang zâwkte nêna inkawmho va, kum rei tak chhûng Kristian an nih avânga hlimna an tawnte sawipui chu nuam an ti hle a ni. Tin, ṭhalaite pawhin an inkawmho theih nân an room-ahte sâwmin, an mamawh chângin an ṭanpui bawk ṭhîn. An va entawn tlâk êm!

Hmun tam takah innghirnghona leh inrem lohna chi hrang hranga a khah laiin, hêng mahnia inpête hi chuan India rama Bethel chhûngkaw inpumkhat tak zîngah telin, hlim takin mi dang rawng an bâwlho dial dial a ni.​—Sâm 133:1. (w01 4/1)

[Footnote-te]

[Phêk 14-naa Milem Hawhtîrtu]

Background: Mountain High Maps® Copyright © 1997 Digital Wisdom, Inc.