Krista Rilru Put Hmang Lantîr Rawh!
‘Chhelna leh thlamuanna Pathian chuan Krista Isua neih ang rilru pe che u rawh se.’—ROMANS 15:5.
1. Mi a rilru put hmangin engtin nge a nun a nghawng theih?
RILRU PUT HMANG hian nun kawng a khawih dang lam thei hle a. Dawngdahna leh taihmâkna rilru put hmang te; rilru put hmang dik leh dik lo te; inlâk hranna leh thawhho duhna rilru put hmang te; sawisêl hrâtna leh lâwm nachâng hriatna rilru put hmang te chuan, miin dinhmun a hmachhawn dân leh mi dangin a chhânlêt dân chu nasa takin a nghawng thei a ni. Miin rilru put hmang ṭha a neih chuan, dinhmun harsa takah pawh a hlim thei ṭhîn a. Rilru put hmang ṭha lo nei mi tân erawh, nun a tluan lai takngialah pawh ṭha-in a lang ṭhîn lo.
2. Engtin nge miin rilru put hmang a zir?
2 Rilru put hmang—a chhia emaw, a ṭha emaw—chu zir chawp theih a ni a, zir a ngai a ni. Nausên piangtîr chungchâng sawiin, Collier Encyclopedia chuan: “Ṭawng emaw, thiam thil dang emaw a zir a ngaih rêng ang hian, nakina a la rawn neih tûr rilru put hmang pawh chu a zir a ngai a ni,” a ti a. A nih leh rilru put hmang chu engtin nge kan zir theih? Thil tam tak aṭanga zir theih ni mah se, chhehvêl leh ṭhian kawmten kawng ro an su hle. A tîra kan sawi tâk encyclopedia khân: “Mi kan kawm ngeih takte rilru put hmang chu kan zir ṭhîn,” tiin a sawi bawk. Chutiang ang deuh bawk chu kum sâng tam tak kalta khân Bible-in a lo sawi tawh a: “Mi fing pâwl la, i lo fing ang a, mi â pâwl erawh chu hrehawm tuar phahna a ni,” tiin.—Thufingte 13:20; 1 Korinth 15:33.
Rilru Put Hmang Dik Entawn Tlâk
3. A rilru put hmang chungchânga entawn tlâk chu tunge ni a, engtin nge kan entawn theih ang?
3 Thil danga entîr ṭha a siam ang bawkin, rilru put hmang chungchângah pawh Isua Krista chuan entawn tûr ṭha ber a siam a. Ani chuan: “In chunga ka tih ang hian nangni pawhin in tih vena tûrin ka tihhmuh che u a ni si a,” a tia. (Johana 13:15) Isua tih ang ti ve tûr chuan a chanchin kan zir hmasa tûr a ni.a Tirhkoh Petera chuan: “Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha,” tiin a sawi a. He thu zawm tum rân chungin Isua nun kan zir a ni. (1 Petera 2:21) A theih ang tâwka Isua an chu kan tum ber a ni a. Chutah chuan a rilru put hmang neih chu a tel a ni.
4, 5. Rom 15:1-3-ah Isua rilru put hmang eng nge sawi a nih a, engting nge Kristiante’n an entawn theih?
4 Isua Krista rilru put hmang neihnaah eng nge tel? Rom mite hnêna Paula lehkha thawn bung 15-nain chu zawhna chu chhâng thiam tûrin min ṭanpui a ni. A châng tîr lamah chuan Paula chuan hetiang hian Isua mize ṭha chungchuang tak chu a târ lang a: “Chutichuan keini mi chakte hian mahni lâwmna zawng lovin, mi chak lote chak lohnate chu kan tuarpui zâwk tûr a ni. Mahni vêngte tihsâwt nân an ṭhatna tûrin tihlâwm i tum ṭheuh ang u; Krista pawh chuan mahni lâwmna a zawng si lo; ‘Nangmah hautute hauna chu keima chungah a tla ta a,’ tih ziak ang khân a ni zâwk” tiin.—Rom 15:1-3.
5 Kristiante chu Krista rilru put hmang entawnin, mahni lâwmna mai ngaihtuah lo va, inngaihtlâwmna nêna mi dangte rawngbâwlsak peih tûra fuih kan ni. Chutianga mi dangte rawngbâwlsak peihna chu “mi chakte” mize chi khat a ni. Mi nungdam tawh zawng zawng zînga thlarau lama chak ber mai Isua chuan: “Mihring Fapa hi rawngbâwlsaka awm tûrin a lo kal lo va, rawngbâwl tûr leh mi tam tak tlan nâna a nun pe tûr zâwka a lo kal ang khân,” tiin ama chungchâng a sawi a ni. (Matthaia 20:28) Kristian kan nih angin, chutiang ang bawka mi dangte rawngbâwlsak chu kan duh a ni—“mi chak lote” rawngbâwlsakna pawh tiam vekin.
6. Engkawngin nge Isua’n tihduhdahna leh mualphona a chhân lêt dân kan entawn theih?
6 Isua lantîr mize ṭha tak dang pakhat chu a thil ngaihtuah dân leh tih dân ṭha chu a ni. Mi dang rilru put hmang ṭha lote’n Pathian rawng a bâwlna kawnga a rilru put hmang ṭha chu a thunun ngai lo va; keini pawhin kan thununtîr ngai tûr a ni lo. Rinawm taka Pathian chibai a bûk avânga tihduhdah leh mualphona a tawh hunah pawh, phunnâwi lovin dawhthei takin a tuar chhuak a ni. An vêngte ‘tihsâwt nâna an ṭhatna tûra’ tihlâwm tumtu chuan rinna nei lo leh mi hriatthiamna nei lo khawvêl ata dodâlna an beisei thei a ni tih a hre reng a ni.
7. Engtin nge Isua’n a dawhtheihzia a lantîr a, engvângin nge chutiang bawk chuan kan tih ve ang?
7 Isua chuan kawng dangin rilru put hmang dik a lantîr bawk a. Jehova chungah dawhtheih lohna a lantîr ngai lo va, A thiltumte a tih famkim hun tûr chu dawhthei takin a nghâk zâwk a ni. (Sâm 110:1; Matthaia 24:36; Tirhkohte 2:32-36; Hebrai 10:12, 13) Chu bâkah, a hnungzuitute chungah pawh Isua chu a dawhthei lo ngai lo. “Ka hnênah zîr rawh u,” tiin anni chu a hrilh a; “thuhnuairawlh” tak a nih avângin, a zirtîrnate chu mi tichak thei tak leh tihahdam thei tak a ni. Tin, “rilrua inngaitlâwm tak” a nih avângin, a chapo ngai lo bawk. (Matthaia 11:29) Paula’n: “He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlâkhlelh hleih theihah a ruat lo va, mihringte anga lo piangin, bâwih angah a insiam a, amah leh amah a intitlâwm ta zâwk a,” tia a sawi hian Isua rilru put hmang entawn tûrin min fuih a ni.—Philippi 2:5-7.
8, 9. (a) Engvângin nge mahni hma sial lo rilru put hmang nei tûra kan thawh rim a ngaih? (b) Isua entawn tûr min hnutchhiah chu kan zawm thap theih loh pawhin engvângin nge kan lunghnual loh vang a, he mi chungchângah hian engtin nge Paula chu entawn tûr ṭha tak a nih?
8 Mi dangte rawngbâwlsak leh an mamawhte mahni mamawh aia dah hmasak kan duh tih sawi chu thil awlsam tak a ni a. Mahse, kan rilru put hmang dik tak endikna chuan chutianga tih duhna tak tak kan nei lo tih a phawrhchhuak mai thei. Engvângin maw? Pakhatnaah chuan, Adama leh Evi aṭanga mahni hma sial duhna kan rochun vâng a ni a; a pahnihnaah chuan mahni hmasialna khawvêla awm kan nih vâng a ni. (Ephesi 4:17, 18) Mahni hma sial lo rilru put hmang nei tûr chuan kan pianpui mize famkim lo nêna inpersan ngaihtuahna kan insiam a ngai fo va. Chu mi ti tûr chuan tumruhna leh beihna a ngai a ni.
9 Isua’n entawn tûr ṭha famkim min hnutchhiah nêna inpersan tak kan famkimlohna langsâr tak hian min tihbeidawn châng a awm thei. Chuvângin, Isua neih ang rilru put hmang neih chu a theih tih kan ring hlel mai thei a ni. Nimahsela Paula fuihna thu hi vawng reng ang che: “Keimahah (chu chu ka tisaah tihna a ni) thil ṭha rêng a awm lo tih ka hria; thil ṭha tih duhna chu keimahah a awm na a, thil ṭha tihna erawh chu a awm si lo. Ṭhatna tih ka duh hi ka ti lo va; sualna tih ka duh loh hi ka ti zâwk si ṭhîn a. Ka rilru tak takin Pathian dân chungah ka lâwm si ṭhîn a; nimahsela ka taksa pêngahte hian dân danglam a awm tih ka hria, chu chuan ka rilru dân a do va, ka taksa pêngtea sualna dân awm hnênah chuan salah mi hruai ṭhîn a,” tih hi. (Rom 7:18, 19, 22, 23) Ni e, Paula famkim lohna chuan Pathian duhzâwng chu a duhthusâmin a thawhtîr thei lo fo tih chu a dik a; mahse, a rilru put hmang—Jehova leh A dân chungchânga a rilru put hmang—chu entawn tlâk tak a ni. Kan rilru put hmang pawh entawn tlâk tak a ni thei bawk.
Rilru Put Hmang Dik Lo Tihdikna
10. Eng rilru put hmang nei tûrin nge Paula’n Philippi mite a fuih?
10 Mi ṭhenkhatte’n an rilru put hmang dik lo tihdik an mamawh thei em? Thei e. Kum zabi pakhatnaa Kristian ṭhenkhatte chungah pawh a dik a ni. Philippi mite hnêna a lehkha thawnah pawh Paula chuan rilru put hmang dik neih chungchâng hetiang hian a sawi a: “Hmu tawh reng inti ka ni lo va, famkim tawh reng inti pawh ka ni hek lo; ‘Krista mi man chhan chu ka man thei dah law maw,’ tiin a ûmin ka ûm zâwk a ni. Unaute u, manah ka inngai lo. Amaherawhchu he thil pakhat hi ka ti ṭhîn—hnung lama thil awmte chu theihnghilha, hma lama thil awmte chu banin, Krista Isuaa Pathian chung lam koh chhan lâwmman hmu tûrin, tiam chin lam chu ka pan ṭâlh ṭâlh a ni. Chutichuan puitling apiang chutiang rilru puin i awm ang u,” tiin.—Philippi 3:12-15.
11, 12. Eng kawngin nge Jehova’n rilru put hmang dik kan hnênah a târ lan?
11 Kristian tupawh hmasâwn mamawh lo nia inngai chuan rilru put hmang dik lo a nei a ni tih Paula thu chuan a târ lang a. Chutiang mi chuan Krista rilru put hmang a nei lo a ni. (Hebrai 4:11; 2 Petera 1:10; 3:14) Chutiang mite dinhmun chu beisei bo a ni em? Ni teh suh e. Kan duh tak zet a nih chuan kan rilru put hmang thlâk tûrin Pathianin min ṭanpui thei a ni. Paula chuan tihian a sawi zawm a: “Eng kawngah pawh rilru danglam pu in lo nih chuan, chu pawh chu Pathianin a la hriattîr ang che u,” tiin.—Philippi 3:15.
12 Amaherawhchu, rilru put hmang dik min hriattîr tûra Jehova kan duh chuan, kan lam aṭanga tih tûr awm chu kan ti ve ngei tûr a ni. “Bawi rinawm, fing tak” buatsaih Kristian thu leh hla chhuahte ṭanpuina nêna Pathian Thu tih tak zeta zirna chuan ‘rilru danglam pute’ chu rilru put hmang dik a neihtîr thei ang. (Matthaia 24:45) ‘Pathian kohhranho châwm tûra’ thlarau thianghlimin a thlan upate chuan chutiang mite ṭanpui chu an châk hle ang. (Tirhkohte 20:28) Jehova’n kan famkim lohnate a ngaihtuah a, hmangaih taka ṭanpuina min pêk avâng hian a va lâwmawm êm! Chu Jehova ruahmanna chu kan zain i pawm ṭheuh vang u.
Mi Dangte Hnên Aṭanga Zir
13. Bible-a Joba chungchâng aṭangin rilru put hmang dik chungchâng eng nge kan zir?
13 Rom bung 15-ah Paula chuan tûn hma entîrna thil thlengte ngaihtuahna chuan kan rilru put hmang siam ṭha tûrin min ṭanpui thei tih a târ lang a. Heti hian a ziak a ni: “Pathian Lehkha Thua chhelna leh thlamuanna hmua beiseina kan neih thiehna tûrin, hmân laia ziak apiangte chu keimahni min zirtîrna tûrin ziak a ni si a,” tiin. (Rom 15:4) Hun kaltaa Jehova chhiahhlawh rinawm ṭhenkhatte tân pawh an rilru put hmang siam ṭhat a ngaih hun a awm ṭhîn a. Entîr nân, Joba chuan a tlângpui thuin rilru put hmang ṭha tak a nei a ni. Jehova a sawi chhe ngai lo va, hrehawmna chuan Pathiana a rinnghehna chu a tinghîng ngai bawk lo. (Joba 1:8, 21, 22) Mahse, thiam inchantîr duhna rilru a nei a. Chuvângin, Jehova chuan a ngaihtuahnate tidik tûra ṭanpui tûrin Elihua chu a kaihruai a ni. Joba chuan thinrim nâna hmang lovin, a rilru put hmang thlâkthleng ngaite chu inngaitlâwm takin a pawm a, a thlâkthleng nghâl ta zâwk a ni.—Joba 42:1-6.
14. Kan rilru put hmang chungchânga fuihna kan dawnin engtin nge Joba ang kan nih theih ang?
14 Rilru put hmang dik lo kan neih thu kan Kristian puiin zaidam takin min hrilh ta se, Joba ang bawkin kan chhânglêt ang em? Joba angin, ‘Pathian chu i mawhchhiat’ ngai lo vang u. (Joba 1:22) Dik lo taka kan tuar a nih pawhin, kan harsatna chu Jehova mawhphuhin i dem ngai lo vang u. Jehova rawngbâwlnaa chanvo kan neih chu engpawh ni se, “Bawi ṭhahnem lo” kan ni reng tho tih hria-in, mahni thiam inchanchawptîr chu i pumpelh ang u.—Luka 17:10.
15. (a) Eng rilru put hmang dik lovin nge Isua hnungzuitu ṭhenkhatte hruai sual? (b) Engtin nge Petera’n rilru put hmang ṭha a lantîr?
15 Kum zabi pakhatnaa Isua thu ngaithlatute zînga ṭhenkhat chuan rilru put hmang dik lo an lantîr a. Ṭum khat chu Isua’n thu hriatthiam harsa tak mai engemaw a sawi a. Tichuan, “a zirtîrte a ṭhen tam takin chu chu an hriatin, ‘Hei hi thu khirh tak a ni, tunge dawngsawng thei ang?’ an ti a.” Chutianga sawitute chuan rilru put hmang dik lo an nei tih a chiang hle. An rilru put hmang dik lo chuan Isua thu ngaihthlâk a bântîr a ni. Thu ziak chuan: “Chu veleh chuan a zirtîrte a ṭhen tam tak an kal bo va, amah an pâwl leh ta lo va,” tiin a sawi. Anih leh an zain rilru put hmang dik lo an nei vek ta em ni? Nei vek lo ve. Thu ziak chuan tihian a sawizawm a: “Chutichuan Isuan sâwm leh pahnihte hnênah chuan, ‘Nangni pawhin kal bo in duh ve em?’ a ti a. Tin, Simon Peteran a hnênah, ‘Lalpa, tu hnênah nge kan kal ang?’” a ti a. Amah vêkin a zawhna siam chu a chhâng a ni: “Nangin chatuana nunna thu i nei alâwm,” tiin. (Johana 6:60, 66-68) Rilru put hmang ṭha a va ni êm! Pathian Lehkha Thu hrilhfiahna leh tihdikna te pawm harsa kan tih chuan, Petera anga rilru put hmang ṭha lantîr chu a ṭha hle dâwn lâwm ni? Atîra thil hriatthiam a harsat deuh avâng maia Jehova rawng bâwl tâwp san emaw, “thu dik dân” kalh zâwnga ṭawng emaw chu a va âtthlâk dâwn tehrêng êm!—2 Timothea 1:13.
16. Isua hun laia Juda sakhaw hruaitute khân eng rilru put hmang hlauhawm tak nge an lantîr?
16 Kum zabi pakhatnaa Juda sakhaw hruaitute pawh khân Isua rilru put hmang an lantîr lo va. Isua thu ngaihtla lo tûra an intiamna chu Lazara thi tawh a kaihthawh aṭang khân a lang a ni. Rilru put hmang dik nei apiangte tân chuan, kha thilmak kha Isua chu Pathian tirh a nihzia fiahna chiang tak a ni ngei ang le. Nimahsela, tihian kan chhiar a ni: “Chutichuan puithiam lalte leh Pharisaite chuan rorêltuho an ko khâwm a, ‘Engtin nge kan tih ang? He mi hian thilmak tam tak a ti si a. Hetianga kan thlahthlam chuan mi zawng zawngin amah an ring ang a, tin, Roma mite an lo kal ang a, kan hmun leh kan chite hi min lâksak ang’ an ti a,” tiin. An thu tlûkna chu eng nge ni? “Chu mi nî achin chu, amah tihlum tûrin an inrâwn ṭhîn,” a ni. Amah thah an tum mai bâkah, thil mak titu a nihzia tichiang theitu chu tihhlum ve an tum a. “Puithiam lalte chu Lazara pawh tihlum tîrin an inrâwn,” a ni. (Johana 11:47, 48, 53; 12:9-11) Kan hlimna êm êm tûr thil kan nin a, chutiang bawk rilru put hmang chu kan lantîr chuan a va râpthlâkin, a va hlauhawm âwm êm!
Krista Rilru Put Hmang Ṭha Entawnin
17. (a) Daniela’n eng dinhmun hnuaiah nge huaisenna rilru an lantîr? (b) Isua’n a huaisenzia engtin nge a lantîr?
17 Jehovah chhiahhlawhte chuan rilru put hmang an chhawmnung reng a. Daniela hmêlmaten ni 30 chhûnga lal hnênah chauh lo chuan, pathian dang rêng rêng emaw, mihring dang rêng rêng emaw hnêna ṭawngṭai khapna dân neih an tum khân, Daniela chuan Pathian Jehova nêna a inlaichînna a nghawng ang tih a hre reng a. Ni 30 chhûng Pathian hnêna ṭawngṭai chu a thlahthlam ang em? Teuh lo mai. A tih ṭhin dânin, ni khatah vawi thum hauisen takin a ṭawngṭai chhunzawm zêl a ni. (Daniela 6:6-17) Isua pawhin a hmêlmate a hlau ngai lo. Ni khat chu Sabbath ni hian kut zeng a hmu a. Sabbath nia mi a tihdam chuan chuta awm Juda mite chu an lâwm dâwn lo tih Isua chuan a hre reng a. Chu mi chungchâng thua an ngaihdân sawi tûrin an ni chu a zâwt a. Kam khat maha an chhân tâk lovah chuan, Isua chuan chu pa chu a tidam ta a ni. (Marka 3:1-6) A dik nia a hriat phawt chuan a hna thawh tûr chu tifamkim lovin a hnung tawlh ngai lo.
18. Engvângin nge mi ṭhenkhatin min dodâl a, engtin nge an rilru put hmang dik lote chu kan chhânlêt ang?
18 Tûn laia Jehova Thuhretute pawh hian anmahni dodâltute chhânlêtna ṭha lo tak tak chu an hlau tûr a ni lo tih an hria a. Chuti a nih loh chuan Isua rilru put hmang chu an lantîr thei lo vang. Mi tam takin Jehova Thuhretute an dodâl a, ṭhenkhat chuan hriatna dik an tlâkchham vâng a ni a, ṭhenkhatte erawh chuan Thuhretute emaw an thuchah ken emaw chu an huat hrim hrim vâng a ni. Nimahsela, an rilru put hmang ṭha lo takin kan rilru put hmang ṭha chu i nghawngtîr phal ngai suh ang u. Kan biakna chungah hian mi dangte chu thu i neihtîr lo vang u.
19. Engtin nge Isua Krista rilru put hmang ang kan lantîr theih ang?
19 Isua chuan a hnungzuitute chungah leh Pathian remruatnaah rilru put hmang ṭha a lantîr reng a; mahse, chutianga tih ve chu a harsa a ni. (Matthaia 23:2, 3) A entîr siam chu kan entawn tûr a ni. Kan unaute chu an ṭha famkim lo ngei a, keini lah chutiang bawk kan ni. Khawvêl pum huap kan inunauna tluka ṭhian dik leh rinawm leh ṭha khawiah nge kan hmuh theih ang? Jehova chuan a Thu ziak zawng zawngte hriatthiamna famkim min la pe lo na a, eng sakhuanain nge keini aia hre tam zâwk? Rilru put hmang ṭha, Isua Krista rilru put hmang ang chu i vawng reng ang u. Thuziak dawt leha kan zir tûr angin, hei hian thil dang tam tak zîngah Jehova nghah dân hriat pawh a huam tel a ni.
[Footnote-te]
a Watchtower Bible and Tract Society chhuah The Greatest Man Who Ever Lived tih chuan Isua nun leh a rawngbâwlna chungchâng a sawifiah a ni.
I Hrilhfiah Thei Em?
• Engtin nge kan rilru put hmangin kan nun a nghawng?
• Isua Krista rilru put hmang hrilhfiah rawh.
• Joba rilru put hmang aṭangin eng nge kan zir theih?
• Dodâlna tawn huna rilru put hmang dik neih tûr chu eng nge ni?
[Phêk 7-naa milemte]
Rilru put hmang dik nei Kristian chuan mi dangte an ṭanpui ṭhîn
[Phêk 9-naa milem]
Pathian Thu tih tak zeta zirna chuan Krista rilru put hmang nei tûrin min ṭanpui