Nghah Peihna Lantîr Rawh!
“Ka chhandamna Pathian chu ka nghâk ang: ka Pathian chuan mi ngaithla dâwn a ni.”—MIKA 7:7.
1, 2. (a) Engtin nge rilru put hmang dik lo hian Israel mite kha thlalêrah a tihchhiat? (b) Rilru put hmang dik nei lo Kristian te chungah eng nge thleng thei?
NUNA thil tam tak hi rilru put hmang azirin a ṭha zâwng emaw, a chhe zâwng emawin a thlîr theih a. Israelte thlalêra an awm lai pawh khân, mak tak maiin manna-a châwm an ni a. An chhehvêl ram khawro tak mai chu thlîrin, Jehova’n an mamawh a pêkte avânga lâwm ngawih ngawih tûr an ni. Chutianga an tih chuan rilru put hmang dik lantîr an ni mai tûr. Chu ai mahin, Aigupta rama an chaw chi hrang hrangte chu hre chhuakin, manna chu a tui lo tiin an phunnâwi zâwk a. Rilru put hmang dik lo chu a va ni êm!—Number 11:4-6.
2 Chutiang bawkin, tûn lai Kristiante rilru put hmang pawhin, thilte chu a lâwmawm zâwng emaw, a lungngaihthlâk zâwng emawin a lantîr thei a ni. Rilru put hmang dik tel lo chuan, Kristianin awlsamtêin a hlimna a hlauh thei a, chu chu thil pawi tak a ni dâwn a ni. A chhan chu Nehemia lo sawi ang hian: “LALPA chunga lâwmna chu [kan] chakna a ni si a.” (Nehemia 8:10) Rilru put hmang dik, leh hlimawm tak chuan min tichak a, kohhranah remna leh inpumkhatna a awmtîr a ni.—Rom 15:13; Philippi 1:25.
3. Jeremia chu hun khirh tak kâra khawsa ni mah se, engtin nge rilru put hmang dik hian a ṭanpui?
3 Hun harsa tak hnuia awm ni mah se, Jeremia chuan rilru put hmang dik a lantîr a. B.C.E 607-a Jerusalem chhiatna râpthlâk tak a hmuh lai ngei pawhin, thil thlengte chu a ṭha zâwngin a hmu thiam a ni. Jehova chuan Israelte chu a theihnghilh lo vang a, chuvângin an dam khawchhuak ang. Jeremia Ṭah Hla lehkhabu-ah ani chuan hetiang hian a ziak a: “Tihborala ka awm lo hi LALPA zahngaihna a lo ni, a lainatnate chu a kang ngai loh avângin. A thar zêl ṭhîn tûk tinin, i rinawmna a ropui e,” tiin. (Jeremia Ṭah Hla 3:22, 23) Khawvêl chanchin tluan chhuakah, dinhmun harsa ber hnuaiah pawh Pathian chhiahhlawhte chuan rilru put hmang dik leh hlim chu neih hrâm hrâm an tum ṭhîn a ni.—2 Korinth 7:4; 1 Thessalonika 1:6; Jakoba 1:2.
4. Isua’n eng rilru put hmang nge a neih a, chu chuan engtin nge a ṭanpui?
4 Jeremia hnu kum zaruk laiah, Isua chu a rilru put hmang dik hian chhel tûrin a ṭanpui a. Heti hian kan chhiar a ni: “Ani [Isua] chuan a hmaa hlimna awm avâng chuan mualphona chu ngainêpin [“nghaisakna ban,” NW] chu a tuar a, Pathian lalṭhutphah ding lamah khian a han ṭhu ta a,” tiin. (Hebrai 12:1, 2) A tuar tûr dodâlna emaw, tihduhdauhna emaw—nghaisakna bana hrehawmna emaw—chu eng anga nasa pawh ni se, Isua chuan “a hmaa hlimna awm” chu a ngaihtuah reng a ni. Chu hlimna chu Jehova lalchungnunna thiamchantîrna leh a hming tihthianghlimna, leh nakina thuâwi fate malsâwmtu nih theihna chanvo hlute a ni.
Nghah Peihna Insiam Rawh
5. Nghah peihnain thil thlîr dân dik tak nei tûra min ṭanpui theihna dinhmun chu eng nge ni?
5 Isua neih ang rilru put hmang kan neih chuan, kan beisei ang leh beisei hunah thil lo thleng lo mah se, Jehova hlimna kan hlauh lo vang. Zâwlnei Mika chuan: “Kei erawh chuan LALPA lam ka en ang a; ka chhandamna Pathian chu ka nghâk ang,” a ti a. (Mika 7:7; Jeremia Ṭah Hla 3:21) Keini pawhin nghah peihna kan lantîr thei a ni. Engtin maw? Kawng tam takin a ni thei. Kawng khatnaah chuan, thuneitu unaupa pakhat chuan kan ngaiha thil dik lo tiin, siam ṭhat vat ngaiah kan ruat a ni thei. Nghah peihna chuan, ‘thil dik lo a ti tak zet nge ka hre sual zâwk? Thil a lo tisual a nih chuan, na taka zilhhauh ngai lo tûra a insiam ṭhat theih a rin avângin, chûng thilte thlen chu Jehova’n a remti a ni thei ang em?’ tihte min ngaihtuahtîr ang.
6. Engtin nge nghah peihnain mahni harsatna buaipuitu chu a ṭanpui ang?
6 Mahni harsatna emaw, chaklohna emaw tihbuaia kan awm chuan nghah peihna a ngai ang. Entir nân, Jehova ṭanpuina kan dîl reng chung pawhin harsatna chu la awm reng tho sela engtin nge ni ang le? Chu buaina tikiang tûra kan tih theih apiang ti reng chungin Isua thusawi: “Dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u,” tih chu kan ring tûr a ni. (Luka 11:9) Ṭawngṭai reng la, Jehova nghâk rawh. A hun takah leh a duh dân kawngin Jehova chuan i ṭawngṭaina chu a chhâng ngei ang.—1 Thessalonika 5:17.
7. Zawi zawia Bible hriatthiam dân sâwidanglamna kan thîr dân chu nghah peihnain engtin nge a ṭanpui ang?
7 Bible hrilh lâwknate a lo thlen famkim ang zêlin, Pathian Lehkha Thu kan hriatthiamna pawh a chiang ve zêl a. Mahse, engemaw châng chuan thil engemaw hrilhfiahna chu tlai kan ti mai thei. Kan duh huna a lo thlen loh chuan kan nghâk peih ang em? Jehova chuan “Krista thurûk” chu zâwi zâwia kum 4,000 vêl chhûnga puanchhuah chu ṭha a ti tih hre reng ang che. (Ephesi 3:3-6) Chuti a nih si chuan nghah peih lohna chhan tûr kan nei em? “Bawi rinawm, fing tak” chu Jehova mite hnênah ‘a hun apianga chaw’ semsak tûra thlan a nih chu kan ringhlel em? (Matthaia 24:45) Thil awmzia kan hriat vek loh mai avângin Pathian lama kan hlimna chu engah nge kan hlauh vang? Jehova chuan a ‘thil inthupte’ laihlan dân leh laihlan hun a ruat tih hre reng ang che.—Amosa 3:7.
8. Engtin nge Jehova dawhtheihna chu mi tam tak tân hlâwkna a nih?
8 Mi ṭhenkhatte chu rinawm taka kum tam tak rawng an bâwl hnuah “LALPA ni ropui tak leh râpthlâk tak” an hmu phâk dâwn lova an inrin avângin an lunghnual mai thei. (Joela 2:30, 31) Mahse, a ṭha lam zâwng an thlîr chuan an ni pawh tihchak an ni thei tho a ni. Petera chuan: “Kan Lalpa dawhtheihzia chu chhandamnaah ruat rawh u,” tiin min fuih a. (2 Petera 3:15) Jehova dawhtheihna chuan mi ṭha maktaduai tam takte tân thutak hriatna hun a hawng a ni. A ropui a ni lâwm ni? Chu bâkah, Jehova’n dawhtheihna a lantîr rei poh leh, ‘hlau leh khûr chunga mahni chhandamna thawh chhuahna’ tûr hun kan ngah a ni mai a ni.—Philippi 2:12; 2 Petera 3:11, 12.
9. Jehova rawngbâwlnaah kan duh ang tâwkin kan thawk thei lo a nih chuan, engtin nge nghah peihna chuan tuar chhuak tûrin min ṭanpui ang?
9 Nghah peihna chuan dodâlna te, natna te, tarna te, leh buaina dang te’n Lalram rawngbâwlnaa tel thei lo tûra min siam hunah pawh lunghnual lo tûrin min ṭanpui a ni. Jehova chuan thinlung zawng zawnga a rawng bâwl tûrin min beisei a. (Rom 12:1) Mahse, ‘mi rethei leh pachhiate khawngaihtu’ Pathian Fapa chuan kan theih tâwk bâk min phût ngai lo va, Jehova pawhin min phût ngai bawk hek lo. (Sâm 72:13) Chuvângin, kan tihtheih apiang ti chung a, hun a inher danglam hun chu dawhthei taka nghâk tûra fuih kan ni—he kalhmangah a inher danglam emaw, hun lo la awm tûrah a inher danglam emaw pawh ni se. “In hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu theihnghilh tûrin Pathian chu mi fel lo a ni si lo va,” tih hi hre reng ang che.—Hebrai 6:10.
10. Miin nghah peihna hmangin Pathian ngaihsak lo eng mizia nge a pumpelh theih? Hrilhfiah rawh.
10 Nghah peihna chuan chapona pumpelh tûr pawhin min ṭanpui bawk a. Kalpêng ṭhenkhatte chu an nghah peih loh vânga kalpêng an ni a. Bible hriatthiam dân emaw, inawpna pâwl kalphung emaw chu siam ṭhat ngai an ti pawh a ni mai thei. Mahse, anni chuan ṭûl kan tih hunah ni lovin, A hun ruatah bawi rinawm fing tak chu siam ṭha tûrin Pathian Jehova thlarau chuan a chêttîr a ni tih an hmuhhmaih a ni. Tin, siam ṭhatna engpawh chu kan ngaihdân nên ni lovin, Jehova duhzâwng mil a ni tûr a ni. Kalpêngte chuan an chapona rilru put hmangin an ngaihtuahna fîm a khuhbo an phal a, chu mi tihtlûkin an awm a ni. Mahse, Krista rilru an neih phawt chuan, an hlimna chu an vawng tlat thei ang a, Jehova mite zîngah an awm reng thei ang.—Philippi 2:5-8.
11. Nghah nâna hun kan khawralte hi engtin nge hlâwk takin kan hman theih ang a, tu entîr siam nge kan zui ang?
11 Nghah peihna neih tih hian that chhiat emaw, zawmthaw emaw tihna a ni lo rêng rêng a. Nghah peih nân tih tûr kan nei a ni. Entîr nân, Zâwlnei rinawmte leh vântirhkohte anga thlarualam thil kan ngaih pawimawh theih nân mahnia Bible zirna kan neih reng a ngai a ni. Chutiang ngaih pawimawhna chungchâng chu sawiin, Petera chuan: “Zâwlneiten, . . . chu chhandamna chanchin chu an zawng a, ngun takin an chhui ṭhîn. . . . Chûng thil chu vântirhkohten bih an duh ṭhîn a ni,” tiin a sawi a ni. (1 Petera 1:10-12) Mahnia zirna chauh hi a pawimawh ber awm chhun a ni lova, inkhâwm zat zat leh ṭawngṭai pawh hi a pawimawh hle bawk a ni. (Jakoba 4:8) Tupawh, an Kristian puite nêna inkawmna leh thlarau lam chaw ei zat zatna hmanga an thlarau lam mamawh an hriatzia lantîrtute chuan Krista rilru an nei a ni.—Matthaia 5:3.
A Ṭha Zâwngin Thlîr Rawh
12. (a) Adama leh Evi khân eng inlâk hranna nge an ûm? (b) Mihringte’n Adama leh Evi nun kawng an zawhna rah chhuah chu eng nge ni?
12 Pathianin mihring tuak hmasa ber a siam khân, a chhia leh a ṭha tehna chu a pêk atân a dah tlat a. (Genesis 2:16, 17) Adama leh Evi chuan Pathian kaihhruaina ata inlâkhran an duh a, a rah chhuah chu tûn lai khawvêlah kan hmu thei a ni. Tirhkoh Paula chuan tihian a ziak a ni: “Chutichuan mi pakhat avângin sual khawvêlah a lût a, sual avângin thihna a lût bâwk a, chutiang bawkin mi zawng zawngin thil an lo tihsual avângin thihnain mi zawng zawng a fan chhuak ta a,” tiin. (Rom 5:12) Adama hun lai aṭanga inṭan kum sângruk chhûnga mihring chanchin chuan Jeremia thu: “Aw LALPA, mihring awm dân chu, mahni thu mai a ni lo tih ka hre ta: tungchhova kal mihringah hian, a pheikhai hruai tûr a awm lo,” tih hi a dik tih a tichiang hle a ni. (Jeremia 10:23) Jeremia thute a dik a ni tia pawmtu hi mi beidawng hma a ni hauh lo. Chu chu thil awm dân dik tak a ni. Chu chuan Pathian laka inlâk hran avânga ‘mi, mi dang chunga pawi khawpa a intihlal’ lai, kum zabi tam tak chhûnga thil awm dân a hrilhfiah a ni.—Thuhriltu 8:9.
13. Mihringte tihtheih chungchângah eng ngaih dân dik tak nge Jehova Thuhretute’n an neih?
13 Mihringte dinhmun avângin, Jehova Thuhretute chuan he kalhmanga an thil tihtheihnain chin tâwk a neihzia an hria a ni. Rilru put hmang dik chuan kan hlimna vawnghim tûrin min ṭanpui thei a; mahse, chu chu thil zawng zawng tihfelna a ni lo. Kum 1950 chho bâwr vêl khân, America rama sakhaw hruaitu pakhat chuan The Power of Positive Thinking tih lehkhabu a chhuah a, chu chu America rama lehkhabu hralh tla ber a ni. Chu lehkhabu chuan rilru put hmang dik nêna tih a nih chuan harsatna tam zâwk hi chu hneh theih a ni tiin a râwn a ni. Ngaihtuahna dik chu a chhuanawm tak zet nâ a, hriatna te, thiamna te, neihnunna te, leh thil dang tam takten kan thiltih theihah chin tâwk a siam zêl tih thiltawn chuan a târ lang a ni. Rilru put hmang dik eng ang pawh nei mah se, khawvêl pum puia harsatnate hlawhtling taka sut kian chu mihringte tân a turu lutuk a ni!
14. Jehova Thuhretute’n rilru put hmang dik lo an nei em? Hrilhfiah rawh.
14 Chu mi chungchânga an thlîr dân dik tak avâng chuan Jehova Thuhretute chu a châng chuan rilru put hmang dik lo anga puh châng an nei ṭhîn. Mahse, anni chuan mihringte dinhmun tichangkâng tluantling theitu awm chhun chungchâng mite hrilh chu an phûr êm êm zâwk a ni. He mi kawngah pawh hian Krista rilru an entawn bawk a ni. (Rom 15:2) Tin, mi dangte’n Pathian nêna inlaichînna ṭha an neih theih nâna ṭanpuiin an buai hle bawk. Hei hian nakinah chuan thil ṭha ber mai a rahchhuak dâwn tih an hre kar a ni.—Matthaia 28:19, 20; 1 Timothea 4:16.
15. Engtin nge Jehova Thuhretute rawngbâwlna chuan mite a tihchangkân?
15 Jehova Thuhretute chuan an chhehvêla awm vântlâng harsatnate an ngaihthah mai lo—a bîk takin mi tibawlhhlawh thei Pathian lehkha thu nêna inkalh thil chînte chu an ngaihthah lo a ni. Tuina neitu chu Jehova Thuhretu a lo nih hmain, a inthlâkthleng phawt a, Pathian tilâwm lo a ngawlvei theih thil rêng rêng a bânsan a ngai a ni. (1 Korinth 6:9-11) Chuvângin, Jehova Thuhretute chuan an thu lo dawngsâwng duhtute chu zu ruihna te, damdawi ngawlveina te, nungchang bawlhhlawhna te, leh pawisa khelhna te bânsan tûrin an ṭanpui ṭhîn. Chûng mite chuan rinawm tak leh mawhphurhna la thei tûra an chhûngkaw mamawh phuhrûk dân an zir a ni. (1 Timothea 5:8) Hetianga chhûngkuate leh mi malte ṭanpui an nih hian, khawtlânga harsatna a tlêm phah a ni—damdawi ngawlvei te, inchhûngkhura tharum thawhna te, leh a dang dang te chu. Dân zâwmtu khua leh tui an nih mai bâkah, mi dangte nun kawng ṭha zâwka nung tûra ṭanpuina hmangin, Jehova Thuhretute chuan chutiang vântlâng buaina sutkian tum pâwlte hna chu an tihtlêmsak a ni.
16. Engvângin nge Jehova Thuhretute chu sual do pâwlahte an tel loh?
16 A nih leh, Jehova Thuhretute chuan khawvêl nungchang kalphung chu an thlâk thleng em? Aw le, kum sâwmbi kalta khân Thuhretute chu 3,800,000 dâwn lai aṭangin 6,000,000 an tling chho ṭhelh a ni. Chu chu mi 2,200,000 vêlin an pung tihna a ni a, an zînga tam takte chuan Kristian an lo nihin an thil chîn ṭha lote an bânsan a ni. Mi tam tak nun chu tihchangkân a va ni êm! Chuti chung pawhin, chumi hun chhûnga khawvêl mihring pung zât—875,000,000-te—nêna khaikhin chuan an punna chu a tlêm tham hle! Jehova Thuhretute chuan mi tlêm tê chauhvin nunna kawng an zawh ang tih hre mah se, an thu ngaithla duhtute ṭanpui chu an hlimpui hle a ni. (Matthaia 7:13, 14) Thuhretute chuan Pathian chuahvin a pêk theih, khawvêl siam ṭhatna chu an nghah reng laiin, tum ṭha tak neia inṭan si a, beidawnna leh tharum thawhnaa tâwp ṭhîn sual do pâwlahte an tel lo.—2 Petera 3:13.
17. Isua’n a bula awmte ṭanpui nân eng nge a tih a, eng nge a tih loh?
17 Hetiang kawng an zawhnaah, Jehova Thuhretute chuan Isua leia a awm laia a neih ang, Jehova laka rin nghehna an lantîr a ni. Kum zabi pakhatnaah khân, Isua chuan tihdam theihna thilmak a ti a. (Luka 6:17-19) Mitthi pawh a kaitho hial a ni. (Luka 7:11-15; 8:49-56) Nimahsela, natna a paihbo lo va, thihna a tibo hek lo. Chu mi tih nân Pathian hun ruat a la thleng lo tih a hriat vâng a ni. Mihring ṭha famkim thiltihtheihna nasa tak nei Isua chuan ram leh khawtlâng buaina khirhkhân tak takte tihkiang thei tûr a ni a. A hun laia mi ṭhenkhatte pawhin chutianga ti tûrin an duh a ni; mahse, Isua’n chu chu a hnial a ni. “Mite chuan chhinchhiahna a tih chu an hmuh veleh, ‘he mi hi zâwlnei, khawvêla lo kal tûr kha a lo nih ngei hi,’ an ti a. Chutichuan amah chu lala siam tûra man luih tumin an lo kal dâwn tih Isuan a hria a, tlângah amah chauhvin a kal hrang leh ta a,” tih kan chhiar si a.—Johana 6:14, 15.
18. (a) Isua’n engtin nge nghah peihna a lantîr reng ṭhin? (b) Kum 1914 aṭangin Isua thiltih chu engtin nge a inthlâk?
18 Isua chuan mi zawng zawngte tidam tûra a lal thiltihtheihna a hman hun chu a la thleng lo tih a hriat avângin, politics-ah emaw, khawtlâng thilah emaw a inrawlh duh lo rêng rêng a ni. Thlarau thi thei lo nia vâna a lâwn hnuah pawh, thiltihtheihna a hman hun tûra Jehova hun ruat chu a nghâk peih a ni. (Sâm 110:1; Tirhkohte 2:34, 35) Mahse, 1914-a Pathian Lalrama Lalber a nih aṭang chuan, “hneh chung leh hneh zêl tûrin,” a chhuak tawh a ni. (Thu Puan 6:2; 12:10) Kristiana inchhâl dangten Lalram chungchânga Bible zirtîrnate an ngaihthah laia a lalnaa kan intulût hi kan va nihlawh êm!
Nghah—Beidawnna Hnâr Nge Hlimna Hnâr?
19. Thil nghah neih hian eng hunah nge ‘thinlung a tihnat’ a, eng hunah nge hlimna a thlen?
19 Solomona chuan thil nghah neih a beidawnthlâkzia a hriat avângin hetiang hian a lo ziak a: “Beiseina tihkhawtlai hian thinlung a tinâ a,” tiin. (Thufingte 13:12) Dik tak chuan, miin bul bâl nei lo thil a beisei tlat chuan, nasa takin a beidawng thei a ni. Mahse, hun hlimawm tak—inneih hun emaw, nau pian hun emaw, hmangaihte nêna intawhleh hun emawte—chuan a lo thlenfamkim hma fê aṭangin hlimnain min tikhat thei a ni. I nghah hun chhûng hi fing taka thil lo thleng tûr atâna inbuatsaih nâna kan hman chuan hlimna a pung zêl ang.
20. (a) Eng thil thleng ropui tak nge ngaihngam taka kan nghah? (b) Jehova thiltumte thlen famkim hun kan nghah laiin engtin nge hlimna kan neih theih?
20 Kan thil beisei chu a thleng famkim ngei dâwn tih rinnghehna kan neih chuan—a hun tûr chu hre lo mah ila—chu mi nghah hun chuan ‘thinlung a tina’ ngai lo. Pathian chibai bûktu rinawmte chuan Krista Kum Sâng Rorêlna chu a hnai tawh tih an hria a. Thihna leh natna tâwp hun tûr chu an hmu dâwn tih an chiang a ni. Mitthi tlûklehdingâwn tam tak, an hmangaihte pawh tiama an lo nun leh hun tûr chu nghâkhlel leh hlim êm êm chungin an nghâk a ni. (Thu Puan 20:1-3, 6; 21:3, 4) He khawvêl thil kalphung buaina hunah hian he leia Paradis hmuh tûr beiseinaah hian an innghat nghet tlat a ni. (Isaia 35:1, 2, 7) Chuvângin, nghah hun chhûng chuan ‘Lalpa hna ṭhahnemngai taka thawk fova awm’ chu a va finthlâk êm! (1 Korinth 15:58) Thlarau lam chaw chu ei reng la, Jehova nêna i inlaichînna chu tinghet sauh sauh ang che. Jehova rawng bâwl duhna rilru neite zawng chhuak la, i rinpuite fuih ang che. Jehova’n hun a la awmtîr tûr apiang chu hmang ṭangkai rawh. Tichuan, Jehova i nghahna chuan ‘thinlung natna’ ni lovin, hlimna a thlen ngei ngei ang che!
I Hrilhfiah Thei Em?
• Engtin nge Isua’n nghah peihna a lantîr?
• Eng dinhmunah nge Kristiante’n nghah peihna an mamawh?
• Engvângin nge Jehova Thuhretute chuan lungawi taka Jehova an nghah?
• Engtin nge Jehova nghah chu hlimna hnâr a nih theih?
[Phêk 12-naa milem]
Isua chuan a hmaa hlimna awm avângin a tuar chhuak
[Phêk 13-naa milem]
Kum tam tak rawng kan bâwl hnuah pawh hlimna kan nei reng thei
[Phêk 15-naa milemte]
Jehova Thuhretute lo niin, mi maktaduai tam takte chuan an nun an tichangkâng