July

Jehova chhiahhlawh ṭhenkhat chuan kum upatna avâng te, dam lohna avâng te leh, taksa chak lohna chi hrang hrang avângtein tûn hma angin thil an ti thei tawh lo va. Chu chuan Jehova tâna hlu tawh lo nia inhriatna a neihtîr thei a ni. Chuvângin, ‘Jehova tân ka la ṭangkai em?’ tih ngaihtuahna an nei pawh a ni thei. Sâm 71-na ziaktu pawhin chutiang ngaihtuahna chu a nei a. “Ka tha a ṭhum hunin mi kalsan suh ang che,” tiin a ṭawngṭai a ni. (Sâm 71:9, 18) Chuti chung chuan, Jehova rawng rinawm taka a bâwl chuan, a kaihruaiin a ṭanpui dâwn tih a ring nghet tlat a. Fakna hla phuahtu sawi angin, Jehova chuan an tih theihte a tlêm chung pawha theih tâwp chhuaha a rawngbâwltute chungah lâwmna a nei a ni. (Sâm 37:23-24) Kum upate u, Jehova thlîrna aṭangin in dinhmun chu thlîr ang che u. Tisa lamah harsatna nei mah ula, thlarau lamah ṭhang duang zêl tûrin a ṭanpui thei che u a ni. (Sâm 92:12-15) In thil tih theih tawh lote ni lovin, in thil tih theihte chauh ngaihtuah ang che u. w24.10 28 ¶14-16

Kristian mi puitling lo chuan Bible thu bulte ngun taka ngaihtuah a, nunpui a ngaihna dinhmunte an hma chhawn hunah harsatna an tâwk ṭhîn a. Mi ṭhenkhat chuan Bible-a chiang taka dân pêk a awm loh chuan an duh apiang an ti thei niin an ngai a. Mi dangte chuan dân zam an phût thung. Entîr nân, Korinth khuaa Kristiante chuan milem biak nâna hman tawh chu ei theih a nih leh nih loh chungchângah dân zam tûrin an phût a. Mahse, tirhkoh Paula chuan an tih tûrte hrilh aiin, mi tinte chu an chhia leh ṭha hriatna ṭanchhana ‘duhthlan theihna’ an neih chu a târ lang a. Mi dangte titlu lova, chhia leh ṭha hriatna thiang tak nei tûra ṭanpuitu Bible thu bul ṭhenkhat chu a chhûtpui a ni. (1 Kor. 8:7-9) Chutiang chuan Paula’n Korinth khuaa mite chu mi dangte rinchhan emaw, dân zam mai emaw aiin an hriat thiam theihna hmang thei tûra thlarau lama puitlin lam pan tûrin a ṭanpui a ni. w24.04 5 ¶14

Jona hun lai khân, Ninevi khuaa mite chuan inchhîrna hun remchâng an nei a ni. Chuvângin, Isua’n ‘thiam loh changa tho lehte’ chungchâng a sawi kha hre reng ang che.Chutah chuan “thil sual titute” pawh an tel ang. (Joh. 5:29) Chuvângin, Sodom leh Gomorra khuaa mite tân pawh beisei tûr a awm niin a lang. Chûng mite zînga ṭhenkhat chu rawn tho lehin, Jehova leh Isua Krista chungchâng zirtîr theihna hun remchâng kan nei thei a ni. Jehova chu engtik lai pawhin, “rilru en chhuaktu, thinlung fiahtu” a ni a. Ani chuan tho leh tûrte chungchâng a ngaihtuah hunah ‘mi tin an awm dân ang zêlin’ ro a rêl ang. Jehova chuan a ṭûl hunah khauh takin rorêl mah se, a theih phawt chuan zahngaihna a lantîr ang. Chuvângin, Bible-in chiang taka a târ lanna kan hriat loh chuan tu emaw tân thawhleh beiseina a awm lo tiin kan sawi tûr a ni lo! w24.05 5-6 ¶15-16

Hmân lai aṭang tawhin Pathian chhiahhlawh rinawmte chuan an chanvo khirh tak hlen tûrin, Pathian thuchahte aṭangin chakna an hmu a. Entîr nân, zâwlnei Jeremia chungchâng hi lo ngaihtuah ta ila. Jehova’n thu hril tûra chanvo a pêk khân a hreh hle a. Jeremia chuan: “Thu ka sawi thiam lo, ka naupang si,” a ti a ni. (Jer. 1:6) Engtin nge inrintâwkna a tlâkchhamna chu a hneh theih? Ani chuan Pathian thu aṭangin chakna a hmu a. “Ka ruh chhûnga mei kâng inkhung ta ang mai hian . . . , Ka pai hle hle zo lo,” tiin a sawi a ni. (Jer. 20:8, 9) A thu hrilhna biala mite chu tawh khirh tak tak ni mah se, a puan tûr thuchah chuan chu hna chu thawk tûra a mamawh chakna a pe a ni. Kristiante pawhin Pathian Thua thuchahte aṭangin chakna an hmu a. Tirhkoh Paula chuan a unaute chu hriatna dik tak chuan an ‘hnathawh tinrênga lo rah’ chhunzawm zêla, ‘Lalpa zui tlâka awm’ tûrin a chêttîr ang tih a hrilh a ni.—Kol. 1:9, 10. w24.04 14-15 ¶2-4

Puithiam lalber Abiathara chuan Jehova chu phatsan mah se, Zadoka chu Jehova chungah a rinawm reng a. Davida chuan Zadoka rinawmna chu a ringhlel ngai lo a ni. Adonija ruahmannate chu a lan chhuah tâkah chuan, Davida chuan Zadoka, Nathana leh, Benaia te chu lal atâna Solomona siam tûrin thu a pe a. (1 Lal. 1:32-34) Jehova betu rinawmte—Nathana leh Lal Davida thlâwptu dangte ang chi—an awm chu Zadoka tân chakna leh huaisenna a ni ngei ang. Solomona chu lal a nih chuan, “puithiam Zadoka chu lalin Abiathara ai a awhtîr” a ni. (1 Lal. 2:35) Engtin nge Zadoka i entawn theih? I hmangaih tak tu emawin Jehova kalsan a thlan chuan, Pathian Jehova chunga rinawm i duhna chu lantîr ang che. (Jos. 24:15) Ani chuan i mamawh chakna leh huaisenna a pe ang che. Ṭawngṭaiin amah rinchhan la, betu rinawmte chu hnaih tlat ang che. Ani chuan i rinawmna chu a ngaihluin, mal a sâwm ngei dâwn che a ni.—2 Sam. 22:26. w24.07 6-7 ¶16-17

Sâm 15:2-na chuan Pathian ṭhian chu “dik taka awma, fel taka” titu angin a târ lang a. Chutiang chuan kan awm zawm zêl tûr a ni. Mahse, ‘dik takin’ kan awm tak tak thei ang em? Thei e. Mihring ṭha famkim lo ni mah ila, Jehova chuan theih tâwp chhuaha a thu kan âwih chuan ‘dik taka awm’ angin min thlîr ang. Pathian hnêna inpumpêka baptisma kan chan hian a ṭhian ni thei tûrin hma kan la ṭan chauh a ni a. Bible hun lai khân, mi chu Israel hnam a nih avâng maiin Pathian Jehova mikhual a ni nghâl thei lo tih chhinchhiah ang che. Mi ṭhenkhat chu a hnênah ṭawngṭai mah se, “thutakah” leh “felnaah” an awm lo va. (Is. 48:1) A nihna takah chuan Israel mi chuan Jehova thil phûtte a zir a, a zawm a ngai a ni. Chutiang bawkin, tûn laiah pawh Pathian Jehova nêna inṭhianna nghet tak nei tûr chuan baptisma chan a, kohhrana Kristian unaute nêna inkawmhona neih mai bâkah, ‘dik taka kan awm tlat’ a ngai a ni. w24.06 9 ¶4; 10 ¶6

Pathian Jehova’n thilphalna a lantîr dân kawng ṭhenkhat chu engte nge ni? Entîrna ṭhenkhat lo ngaihtuah ta ila. Ani chuan kan tisa lam mamawhte min pe a. Thil ṭha ber berte chu nei kher lo mah ila, Jehova zârah kan mamawhte kan nei thei a. Entîr nân, ei leh in, thawmhnaw leh, chênna tûr inte kan neih theih nân min ṭanpui a ni. (Sâm 4:8; Mt. 6:31-33; 1 Tim. 6:6-8) Jehova’n kan tisa lam mamawhte min pêk chhan chu a tih tûr nia a ngaih vâng chauh a ni em? Ni lo ve! Matthaia 6:25, 26-a Isua thusawite hi han ngaihtuah teh. Ani chuan thilsiamte aṭangin entîrna a pe a. Savate chungchângah: “Buh an tuh lo va, an ât hek lo, buh inah an seng lût hek lo,” tiin a sawi a ni. Mahse, a dawta a thusawi hi lo chhinchhiah ang che: “In Pa vâna mi chuan a châwm si a,” tiin a sawi a. Chumi hnuah Isua chuan: “Nangni chu anni ai chuan nasa takin in hlu zâwk lo vem ni?” tiin a zâwt a ni. Min zirtîr a duh chu eng nge ni? Jehova’n ramsate aiin amah betute chu a ngaihlu zâwk a ni. Ramsate mamawh a pêk chuan, kan mamawhte min pe ang tih kan chiang thei a! A chhûngte ngaihsaktu pa angin, Jehova chuan a chhûngkua chu a hmangaih avângin an mamawhte a pe a ni.—Sâm 145:16; Mt. 6:32. w24.09 26-27 ¶4-6

Kohhranho rawngbâwltute chu kohhrana thil pawimawh tak tak tihnaa upate ṭanpui tûra thlarau thianghlim hmanga ruat baptisma chang tawh unaupate an ni a. A pawimawh ber chu kohhranho rawngbâwltute chu Pathian Jehova hmangaih a, a tehna mila nung thlarau mi takte an ni tih hi a ni a. An Kristian unaute chu an hmangaih hle bawk a ni. (Mt. 22:37-39) A nih chuan, engtin nge baptisma chang tawh unaupa chuan kohhranho rawngbâwltu ni tûra hma a lâk theih? Bible chuan kohhranho rawngbâwltu ni tûrte tâna tlin ngai miziate a târ lang a. (1 Tim. 3:8-10, 12) Bible-a târ lan chûng miziate zir chianna leh chûngte nei chho tûra ṭan lâkna hmangin he chanvo hlu tak chelh thei tûrin hma i la thei a ni. Mahse, a hmasain, chutianga hma i lâk duh chhan chu i chian a ngai a ni. w24.11 15 ¶4-5

Mi ṭhenkhat chuan Bible chu vawi tam tak chhiar chhuak tawh niin an inchhâl a. Mahse, Bible chu an ring tak zet em? Bible tehnate chu zâwmin an nunah inthlâk thlengnate chu an siam em? Lungchhiatthlâk takin, chutiang chuan mi tam takin an ti lo. Jehova mite nên an va inang lo tak êm! Kum zabi khatnaa Kristiante angin, Bible chu ‘Pathian thu pawmin kan pawm a.’ Chu bâkah, Bible kaihhruainate chu theih tâwpa zawm kan tum a ni. Bible chhiar nân hun kan nei lo pawh a ni thei a. A nih loh leh, hmanhmawh taka chhiarin kan thu chhiarte kan chhût ngun lo pawh a ni thei. Hma sâwn kan ngaihna laite ngaihtuahin kan huphurh hle pawh a ni thei bawk. I harsatna chu eng pawh ni se, hneh theih loh a ni lo. Jehova ṭanpuinain i hneh thei a ni. Chuvângin, a ṭanpuina pawmin, ngaithlaa theihnghilhtu ni mai lovin, a Thu zâwmtute nih i tum ṭheuh vang u. Pathian Thu kan chhiara kan nunpui tam poh leh hlimna min thlen lehzual ang tih chu rinhlelh rual a ni lo.—Jak. 1:25. w24.09 7 ¶15-16

Thil râpthlâk tak kan tawh hunah pawh Jehova chuan a thlarau thianghlim hmangin min thlamuan a. Lungchhiatna thlentu harsatna i hmachhawn mêk a nih chuan, i duh anga zingin leh i duh anga reiin i thinlung leih buain Jehova hnênah i ṭawngṭai thei a. (Sâm 86:3; 88:1) Jehova hnênah thlarau thianghlim dîl nawn fo vang che. I dîlnate chu a ngaihthlâksak reng dâwn si che a. Dinhmun harsa tak i tawhte chuan chau takin a siam che em? Thlarau thianghlim chuan rinawm taka Jehova be chhunzawm zêl tûrin a tichak thei che a ni. (Eph. 3:14-19) Thlarau thianghlim dîla i ṭawngṭaina milin engtin nge hma i lâk theih? Nangmaha Pathian thlarau hnathawhtîr theitu thiltihnaahte tel ang che. Chûngahte chuan inkhâwmte leh mi dangte hnêna thu hrilhte a tel a ni. Nî tin Jehova Thu chhiarin, a ngaihtuahnatein i rilru tikhat la. (Phil. 4:8, 9) Chutianga i chhiar hunah, Bible-a târ lan harsatna tâwkte chanchin chu chhinchhiahin, Jehova’n tuar chhuak tûra a ṭanpui dân chu chhût ngun ang che. w24.10 9 ¶12-14

Jehova leh a Fapa angin, mite kan hmangaih a. (Thuf. 8:31) ‘Beiseina rêng nei lo leh Pathian lova awmte’ chu kan khawngaih tak zet a ni. (Eph. 2:12) Anni chu nuna harsatna khûr thûk takah an tla lût a, an mamawh—Pathian Ram chanchin ṭha—nun chhanhimna kawr kan nei a ni. Chutiang mite kan hmangaihna leh khawngaihna chuan theih tâwp chhuaha chanchin ṭha hril tûrin min chêttîr a. Chu thuchah hlu tak chuan an thinlungah beiseina a neihtîr a, chu chuan tûnah pawh nun ṭha ber a neihtîr bâkah, “nuna tak tak”—Pathian khawvêl thara chatuana nun beisei theihna pawh a pe a ni. (1 Tim. 6:19) Mite kan hmangaihna chuan khawvêl suaksual tak tâwpna kan hnaih tawhzia an hnêna vaukhân tûrin min chêttîr bawk. (Ezek. 33:7, 8) Chuvângin, anni chuan hrehawm nasa taka thil lo theng tûrte—sakhaw dik lo tih boral a nih tûr chungchângte leh a hnua Armageddon-ah he khawvêl suaksual tak tihboral a nih tûr chungchângte chu hria se kan duh a ni.—Thup. 16:14, 16; 17:16, 17; 19:11, 19, 20. w24.05 16-17 ¶8-9

Tirhkoh Paula chuan Kristiante chu “thinurna kian zâwk” tûrin a fuih a. Tu thinurna a sawina nge ni? A thu hnu leh thu hma en chuan Jehova thinurna a ni. Jehova’n a hun taka ṭha a tih dân kawnga rorêlna dik a thlen hun tûr chu nghâkin a thinurna kan kian thei a ni. Unau John-a chuan dik lo taka cheibâwl a nih hnuah: “Mahni thua beih lêt duhna chu ka do a ngai a. Rom 12:19-na chuan: “Jehova nghâk tlat tûrin min ṭanpui a ni,” tiin a sawi. Jehova hma lâk hun tûr ngaihchân chu kan hlâwkpui thei a. Chutianga kan tih chuan, dinhmunte mahnia chinfel tumna aṭanga lo awm thei phurritte leh mangannate chu kan pumpelh thei ang. Jehova’n min ṭanpui a duh avângin, ‘Rorêl dik lohna chu ka kutah dah rawh; keima’n ka chingfel vek mai ang,’ tia sawi ang a ni a. “Keiman ka thungrûl ang,” tih a thutiam chu kan rin chuan rorêl dik lohna kan tawh chu a ṭha thei ang berin min chinfelsak ang tih rinnghehna nei chungin dinhmun chu a kutah kan nghat thei dâwn a ni. w24.11 6 ¶14-15

Tisa lam thilte chu kan dah pawimawh ber tûr a ni lo. Chu chu Kristiante hnêna tirhkoh Paula lehkhathawn aṭangin kan hre thei a ni. Sinai Tlâng bula thilthlengte pawh tiamin, tûn hmaa Israel mite chunga thilthlengte chu sawi langin, ‘[Israel mite’n] thil sual tih an châk anga châk ve lo tûrin’ a vaukhân a ni. (1 Kor. 10:6, 7, 11) Jehova chuan chûng Israel mite chu thil mak tihna hmangin ei tûr a pe a; mahse, an duhâm avângin chûngte chu an tân ‘thil sualah’ a lo chang ta a ni. (Num. 11:4-6, 31-34) Chu bâkah, rangkachak bâwng no lem an biak lai khân, Jehova thuawih aiin ei leh in leh intihhlimna an ngaih pawimawh zâwkzia an lantîr a ni. (Ex. 32:4-6) Paula’n chûng thilthlengte hmang chuan C.E. 70-a Juda kalhmang tâwp dâwn hnaiha nung Kristiante chu a vaukhân a. Keini pawh khawvêl tâwpna a hnaih tawh êm avângin, Paula vaukhânna chu fîmkhur taka kan zawm a ngai a ni. w24.12 6 ¶13

Jehova chu “Pathian hlim” a ni a, keini pawh hlim tûrin min duh a ni. (1 Tim. 1:11, NWT) Nun hlimawm tak kan neih theih nân thilpêk tam tak min pe a. (Jak. 1:17) Chûng zînga pakhat chu inneihna thilpêk hi a ni. Mipa leh hmeichhia an inneih hian inhmangaih a, inzah tawn a, inngai hlu tawn tûrin thu an tiam a. An inlaichînna nghet taka an vawn rengna chuan hlimna dik tak a neihtîr thei a ni. Lungchhiatthlâk takin, tûn laia nupa tam takte chuan an inneih nîa an thutiam chu an theihnghilh ṭhîn a. Jehova’n pasalte chu an nupuite eng anga cheibâwl tûrin nge a beisei? Pathianin pasalte chu an nupuite chawimawi tûrin thu a pe a. Chawimawi tih hian kan mi zah takte kan cheibâwl dân a kâwk a. Nupui chawimawitu pasal chuan a nupui chu ngilnei tak leh hmangaihna nei takin a chawimawi dâwn a ni.—1 Pet. 3:7. w25.01 8 ¶1-2; 9 ¶4-5

Hebrai mite hnêna Paula lehkhathawn chuan kum zabi khatnaa Kristiante chu an hmachhawn tûr hrehawmna atân a buatsaih ang tih a chiang hle a. A unaute chu Pathian Thu ngun taka zir a, hriatna thûk lehzual nei tûrin a fuih a. Chutianga tihna chuan an rinna tichhe thei zirtîrnate chu hria a, hnâwl tûrin a ṭanpui dâwn a ni. Isua leh kohhrana hmahruaitute kaihhruaina pêk zâwm vat thei tûra an rinna tichak tûrin a fuih bawk a. An fiahna tawhte chunga thlîr dân dik neiin, chûngte chu hmangaihna ngah tak an Pa hnên aṭanga zirtîrna anga thlîr a, chhelna nei chho tûrin Kristiante chu a ṭanpui bawk a ni. Keini pawhin hêng thâwk khuma pêk fuihnate hi i zâwm ang u. Chutianga kan tih chuan a tâwp thlengin chhel takin kan awm thei dâwn a ni.—Heb. 3:14. w24.09 13 ¶17, 19

Bible sawi dânin, tlanna chu sual thawina leh inremna a awm theih nâna man pêk a ni a. Jehova thlîrna aṭangin chu chu thil chân tâk neih lêt leh theihna a ni. Eng kawngin nge? Evi leh Adama’n an nun ṭha famkim leh chatuana nun theihna an chân tih hre reng ang che. Chuvângin, tlanna chu an thil hloh tâk hlutna nêna intluk chiah a ni tûr a ni. (1 Tim. 2:6) Chu chu puitling tu emaw (1) ṭha famkim; (2) leia chatuana nun theihna nei; (3) kan tâna a nun inthawi nâna hlan inhuamtu chauhvin a pe thei a. Isua’n tlanna man a pêk theih chhan pathum lo ngaihtuah ta ila. (1) “Ani chuan thil rêng a tisual lo,” mi ṭha famkim a ni. (1 Pet. 2:22) (2) Chuvângin, leia chatuana nun theihna a nei a. (3) Ani chuan kan tân a nun hlâna thih a inhuam a ni.—Heb. 10:9. w25.02 4-5 ¶11-12

Jehova’n a hmangaih chein a chhûngkaw zînga mi ni tûrin a duh che a. Baptisma chang tûra dâltu che i nei a nih pawhin a hmangaih tho che a ni. Isua chuan kum zabi khatnaa a zirtîrte hnênah chuan: “Anṭam mu fang khat tiat rinna in neih chuan, he tlâng hnênah hian, ‘Heta ṭang hian sawtah sâwn va insawn rawh,’ in ti ang a, a insawn mai ang,” tiin a hrilh a ni. (Mt. 17:20, NWT) Chu a thusawi ngaithlatute chuan Isua chu kum rei lo te chhûng chauh an la zui avângin, an rinna a ṭhan chhoh zêl a la ngai a. Mahse, Isua chuan rinna chak tak an neih chuan tlâng anga lian harsatnate chu sawn thei tûrin a ṭanpui ang tih a tiam a ni. Nang pawh chutianga ti tûr chuan a ṭanpui ang che! Baptisma i channa tûr dâltu harsatnate i neih chuan, paih bo tûrin vuaicha lovin hma la la. Kum zabi khatna leh tûn laia Kristian-te entawn tûr siam aṭangin thlamuanna leh chakna hmu ang che. An entawn tûr siam chuan tichak chein, Jehova hnêna inpumpêka baptisma chang tûrin chêttîr che rawh se. Chu chu i thu tlûkna siam theih azawnga ṭha ber a ni dâwn si a! w25.03 7 ¶18-20

Pathian nung chu min ṭanpui tûrin a inpeih reng tih kan hriat chuan keini pawhin fiahnate chu hlawhtling takin kan hmachhawn thei a. Hun kal tawha a thiltihte ngaihtuahna hmangin Pathian Jehova chunga kan rinna chu kan tinghet thei a ni. (Is. 37:17, 33-37) Tûn laia Jehova’n kan unaute a ṭanpui dân kan website jw.org-a târ lante chu en bawk la. Chu bâkah, Jehova’n a lo ṭanpui tawh dân che chu ngaihtuah bawk ang che. Savawm emaw, sakeibaknei emaw beihna ang chi thiltawn danglam tak i nei lo a nih pawhin pawi ti suh. Engvângin nge? Dik tak chuan, Jehova’n i nunah thil tam tak a tihsak tawh che a. Amah nêna inlaichînna nei tûrin a lamah a hîp tawh che a ni. (Joh. 6:44) Tûnah pawh, a ṭanpuina azârah thutakah i la awm reng a ni. I ṭawngṭaina a chhân laite, i mamawh hun taka a ṭanpuina i dawnte leh, dinhmun khirh taka i awm laia a ṭanpuina i dawnte hriat chhuahtîr tûr chein engvângin nge a hnênah i dîl loh vang? Chûng thiltawnte ngaihtuah lêtna chuan Jehova’n a ṭanpui zawm zêl ang che tih i rinna chu a tinghet ngei ang. w24.06 21 ¶8

Jehova min hawisantîr thei thil engmah tih kan tum lo ngei mai. Mahse, ṭha famkim lo kan nih avângin, thil dik lo ti tûra thlêm awlsam tak kan ni thei a ni. (Rom 7:21-23) Rin loh takin, thil dik lo ṭhenkhat ti tûra thlêm kan ni thei a. Pathian Jehova leh a Fapa chunga rinawm reng tûr chuan fîmkhur reng tûra Isua min fuihna chu kan zawm a ngai a ni. Kan vai hian thil sual ti tûra thlêmna kan hmachhawn a. Mahse, thil sual lian tak tihnaah emaw, nungchang bawlhhlawhna ṭhenkhata inhnamhnawihnaah emaw, a nih loh leh khawvêl ngaihtuahna thanga awhnaahte hian chak lohna lai kan nei ṭheuh va ni. Entîr nân, tu emaw chuan mipat hmeichhiatna ang chi, sual lian tak chu a do mai thei a. Mi dangte chuan mahnia châkna inhrîkthlâkna ang chi thil chîn ṭha lo emaw, saruak lem leh thuziak en te emaw chu an do a ngai reng thei a ni. Mi dang lehte chuan mihring hlauhna te, mahni thu thua awm duhna te, thin chhiatna te leh, thil dangte an do a ngai reng thei bawk a ni. w24.07 14 ¶3; 15 ¶5

Upate’n a thil sual tih sim tak zettu chu kohhrana a lo kîr leh an phal lo emaw, a lo kîr leh hnua kohhranin a chunga hmangaihna an lantîr loh emaw huna thilthleng thei hi han mitthla teh. “A lungngaih lutuknain” ei ralin a dinhmun chu beisei bo niin a thlîr thei a. Pathian nêna inlaichînna ṭha siam leh tûrin hma lâk a duh tawh lo pawh a ni hial thei. Chu bâkah, kohhrana unaute chuan ani chu an ngaidam duh lo a nih chuan, Jehova duhsakna an chân phah thei a ni. Engvângin nge? Simna lantîrtute ngaidamtu Jehova ni lovin, nunrâwng leh ngilneihna nei lo Setana rilru put hmang lantîrna ang a nih dâwn vâng a ni a. Chutianga an tih chuan, a thlarau lam tichhe tûra Setana hmanrua an ni thei a ni.—2 Kor. 2:10, 11; Eph. 4:27. w24.08 17 ¶7, 10-11

Isua Krista chuan kawng danga rawngbâwltu ‘mihringte hnêna thilpêkte’ kohhranah min pe bawk a. A kaihhruaina hnuaiah, Jerusalema kohhran upate chuan Paula, Barnaba leh, mi dangte chu bial kantute nia rawngbâwl tûrin an tîr chhuak a ni. (Tirh. 11:22) Engvângin nge? Kohhranho rawngbâwltute leh kohhran upate ang bawkin, kohhran tinghet tûrin a ni. (Tirh. 15:40, 41) Bial kantute chu hmun hrang hranga an zin a ngai a. Ṭhenkhat chu kohhran pakhat aṭanga a danga kal tûrin kilometer za têl an zin a ngai a ni. Chawlhkâr tin hian, bial kantute chuan thusawi chi hrang hrangte pein, berâm tlawhnate an nei a, pioneer inkhâwm te, upa inkhâwm te leh, thlawhhma rawngbâwlna atâna inkhâwmte an kaihruai a ni. Thusawite inbuatsaihin inkhâwmpuinate an huaihawt a, pioneer school-ahte zirtîrin, bial chhûnga pioneer-te tâna a bîk taka buatsaih inkhâwmte an kaihruai a; chu bâkah, branch office-in mawhphurhna a pêk dang—a chânga hmanhmawh taka tih ngaite—an hlen bawk a ni. w24.10 21 ¶12-13

Zâwlnei Jeremia’n vawiin ni chânga thute chu Jehova sawi angin a târ lang a. Chûng thute chu tirhkoh Paula’n la chhâwngin: “An sualte pawh ka hre reng dâwn tawh si lo,” tiin a ziak a ni. (Heb. 8:12) Mahse, a sawi tum dik tak chu eng nge ni? Bible-a “hre reng” tih ṭawngkam hian thil eng emaw ngaihtuah nawn, a nih loh leh hriat chhuah leh chu a kâwk reng lo va. Chu aiin, thiltih eng emaw a kâwk zâwk a. Isua bula khenbeh mi sual khân, “Isu, i ram i thlen hunah mi hre reng ang che,” tiin a ngên a. (Lk. 23:42, 43, NWT) Isua chhânnaah chuan a thil tih tûr, a kaihthawh leh tûr thu târ lanna a awm avângin, chu a thusawi chu amah hre reng tûr maia ngenna a ni lo. Chuvângin, Jehova’n kan sualte a hre reng lo a tih hian min ngaidamin, chûng sualte avâng chuan min hrem dâwn lo a tihna a ni. w25.02 10-11 ¶14-15

Hriatthiamna dik tak chu Jehova mizia te, a thiltum te leh, a duh zâwng leh huat zâwngte hriatnaah a innghat a ni. Chuvângin, ‘Jehova chungchânga ka thu hriat tawhte ṭanchhanin, amah tilâwmtu eng thu tlûkna nge ka siam ang?’ tiin inzâwt ang che. (Eph. 5:17) Jehova tilâwm tûr chuan kan hmangaih takte kan tihlung nih loh a ngaih châng a awm ngei dâwn a. Entîr nân, nu leh pate chuan an fanu hmakhua an ngaih avângin, thlarau lama chak lo, sum leh pai lama nei nung tak—man leh mual pe tam thei—tu emaw chu neihtîr an tum mai thei a. Ni e, an fanu chu sum leh pai lama lungkhamna nei lova awmtîr an duh ngei mai; mahse, tuin nge thlarau lama hmasâwn chho zêl tûrin pui ta ang? Hemi chungchânga Jehova thlîr dân chu eng nge ni? A chhânna chu Matthaia 6:33-ah kan hmu thei a. Chutah chuan Kristiante chu “a ram . . . dah hmasa zêl” tûra fuih an ni a. Kan nu leh pate chu kan chawimawiin, khawtlânga mite chunga zahna nei mah ila, kan ngaih pawimawh ber tûr chu Jehova tihlâwm a ni. w25.01 17 ¶9-10

Tûn laiah pawh, tihduhdahna kâra ṭhahnemngai taka thu hril zawm zêl thei tûrin Jehova ṭanpuina kan mamawh a. (Thup. 12:17) A ṭanpui ang che tih engvângin nge i chian theih? Johana 17-a chhinchhiah Isua ṭawngṭaina hi lo ngaihtuah ta ila. Isua’n ṭawngṭainaa a dîl angin Jehova chuan tirhkohte chu a vênghim a. Tirhkohte bu chuan tihduhdahna kârah pawh ṭhahnemngai taka thu hril tûra Pathianin a ṭanpui dân chu a târ lang a ni. Chu bâkah, Isua’n a ṭawngṭainaah chuan tirhkohte thu hrilh lo pawmtute pawh vênghim tûrin a dîl bawk. An zîngah chuan nang pawh i tel a ni. Jehova chuan Isua ṭawngṭaina chu a chhâng zêl a, tirhkohte a ṭanpui angin nang pawh a ṭanpui ang che. (Joh. 17:11, 15, 20) Tâwpna a hnaih zêl rual hian chanchin ṭha hril tûra ṭhahnemngaihna neih chu a harsa lehzual a nih pawhin, kan mamawh ṭanpuina zawng zawng chu kan dawng ang.—Lk. 21:12-15. w25.03 18 ¶13-14

Pathian mite chu thinlunga an lâwm avângin “hlim takin an zai” thei a. Rinna tichak thei tak thutak thu te, Pathian Thu aṭanga thutiam thlamuanthlâk tak te, leh Krista tlanna inthawina avânga kan beiseina nghet takte chuan ‘thinlunga lâwmna’ min pe a ni. Chutiang thute sawihona chuan min va tihlim tak êm! (Sâm 34:8; 133:1-3) Jehova mite zînga hmangaihna leh inlungrualna chu thlarau lam paradis hmêlhmang lang sâr tak pahnih a ni a. Chu chuan Jehova chhiahhlawhte’n tûn laia hmangaihna leh inlungrualna an neih aia nasa zâwk an neihna tûr hmun, khawvêl thara nun awm dân tûr chu a târ lang a ni. (Kol. 3:14) Hlimna leh lungawina dik tak nei duh apiangte chu thlarau lam paradis chhûnga an awm a ngai a. Jehova chhiahhlawhte chu khawvêl mite’n eng ang pawhin ngai mah se, anni chuan lei leh vâna Jehova betu zawng zawngte rualin, a mithmuhah hming ṭha an nei a ni.—Is. 65:15. w24.04 21 ¶7-8

Engtin nge nupui pasal neih duh Kristiante chu kan zavaia kan ṭanpui theih? Kawng khatah chuan fîmkhur taka thu sawina hmangin a ni. (Eph. 4:29) Heti hian kan inzâwt thei a ni: ‘Nupui pasal neih duh kristiante chu ka fiam ṭhîn em? Nupui pasal la nei lo inbia ka hmuh hian, an inngaizâwng niin ka ngai nghâl mai em?’ tiin. (1 Tim. 5:13) Chu bâkah, kawppui nei lo Kristiante chu nupui pasal an la neih loh avâng maiin kim lo nia inhriatna nei tûrin kan siam tûr a ni lo. Kawppui nei lo Kristiante fak theihna hun remchâng zawn chu a va ṭha zâwk dâwn êm! Unaute zîngah nupa tûr atâna inâwm tak hre ta la, engtin nge ni ang? Bible chuan mi dangte rilru vei zâwng ngaihtuah tûrin min hrilh a. (Rom 15:2) Kawppui nei lo tam tak chuan kawppui tûr zawnsak an duh lova; chuvângin, an duhna chu kan zahsak a ngai a ni. (2 Thes. 3:11) Mi dangte chuan kan puihna chu an duh mai thei a; mahse, zâwt hmasa lovin kan inrawlh tûr a ni lo.—Thuf. 3:27. w24.05 24-25 ¶14-15

Beisei loh taka kan nun phung tibuaia thlâk danglam thawk theitu thilte thlen theihna khawvêlah kan chêng a. Pathian Jehova ṭanpuina kan dîl theih avângin kan va lâwm tak êm! A ṭanpuina kan dawn hian, chu thiltawn chuan “LALPA chu a nung reng,” tih kan rinna a tinghet lehzual a ni. (Sâm 18:46) Davida’n chutianga Pathian chungchâng a sawi hnuah ani chu “ka Lungpui” tiin a ko va. Engvângin nge Pathian nung Jehova chu nunna nei lo—lungpui—nêna a tehkhin? Bible chuan Jehova miziate kan mitthla thiam theih nân “lungpui” tih thu mal chu a hmang a. Chu thu mal chu tlukpui nei lo nia Pathian fakna Bible chângahte târ lan a ni ṭhîn. Pathian Jehova ‘Lungpui’ anga târ lanna hmasa ber chu Deuteronomy 32:4-ah a ni a. Hani chuan a ṭawngṭainaah “kan Pathian ang lungpui rêng a awm hek lo,” tiin a sawi a ni. (1 Sam. 2:2) Habakkuka’n Jehova chu “Lungpui” tiin a ko va. (Hab. 1:12) Sâm 73-na ziaktu chuan Pathian chu “lungpui nghet tak” tiin a ko bawk. (Sam 73:26, C.L. Re-edited) Chu bâkah, Jehova chuan amah leh amah lungpui angin a insawi a ni.—Is. 44:8. w24.06 26 ¶1, 3

Jehova tilâwmtu lalte chuan an thinlung zawng zawngin a rawng an bâwl a. Bible chuan Josia chungchângah: “Thinlung . . . zawng zawnga LALPA pawm, amah ang reng reng a hmaa lal tu mah an awm lo,” tiin a sawi a ni. (2 Lal. 23:25) A upat hnua thil sual titu Solomona chungchâng hi eng nge ni ve? “A thinlung chu a lo ṭha famkim ta lo va.” (1 Lal. 11:4) Lal rinawm lo dang Abijama chungchângah Bible chuan: “A thinlung chu LALPA a Pathian lamah a ṭha famkim ve lo,” tiin a sawi bawk a ni (1 Lal. 15:3) Bible-a “thinlung” tih thu mal hian kan châkna te, ngaihtuahna te, rilru put hmang te, theihna te, chêttîrtu te leh, thiltumte pawh tiamin, kan chhûng lam nihna a kâwk ṭhîn a. A nih chuan, thinlung zawng zawnga Jehova rawngbâwl tih awmzia chu eng nge ni? Thinlung zawng zawnga Jehova rawngbâwltu chuan tih tûr a nih avâng maia amah chu be lovin, Jehova a hmangaih avâng leh a zah avângin a rawng a bâwl a. Chu bâkah, chu a hmangaihna leh zahna chu a dam chhûngin a vawng reng a ni. w24.07 21 ¶4-5

Jehova’n sual a thai bo dân sawifiah nân chutiang entîr nei ṭawngkam dang chu a hmang a. “In bawhchhiatnate chu chhûm chhah mup tihbo angin ka tibo ta a, in sualnate chu chhûm tihbo angin ka tibo ta bawk a,” a ti a ni. (Is. 44:22) Jehova’n min ngaihdam hian, kan sualte chu hmuh theih a nih tawh loh nân chhûm chhah mupa min hliah khuhsak ang a ni. Chu entîrna chuan kan tân eng awmzia nge a neih? Jehova’n kan sualte a ngaihdam tawh chuan kan dam chhûngin chu sual avânga inthiam lohna neih a ngai tawh lo a ni. Isua Krista thisen hmangin kan bâte chu min ngaihdamsak hmak a. Chhinchhiahnaah pawh a awm tawh lo. Hei hi kan inlamlêt huna Jehova hnên aṭanga kan dawn ngaihdamna dik tak chu a ni. Jehova zahngaihna chuan amah nêna inlaichînna ṭha neih leh theihna hun remchâng min pêk bâkah, inthiam lohna nei reng lo tûrin min ṭanpui bawk a ni. w25.02 10 ¶11-14

Kohhran upa committee-a telte chuan kohhran vawng thianghlim tûrin mawhphurhna an nei a. (1 Kor. 5:7) A theih phawt chuan thil sual titu chu sim tûra ṭanpui an duh a ni. Chutianga ti tûr chuan a êng zâwnga thil thlîrin, a chungah an beidawng mai tûr a ni lo. Engvângin nge? ‘Khawngaihna leh zahngaihnaa khat’ Jehova chu entawn an duh vâng a ni. (Jak. 5:11) Tirhkoh upa tawh tak Johana’n chutiang rilru put hmang chu lantîrin: “Ka naute u, thil in tihsual loh nân hêng thu hi in hnênah ka ziak a nih hi. Pathian hnêna min sawipuitu Isua Krista, mi fel chu kan nei e,” tia a ziah chu hre reng ang che. (1 Joh. 2:1) Lungchhiatthlâk takin, thil sual titute chuan sim duhna an neih loh châng a awm a. Chutiang hunah chuan, kohhran aṭanga chhuahtîr an ni ang. w24.08 25 ¶19-20

Mi dangte nêna inkhaikhin duhna i nei mai thei a. Mahse, chutiang chuan ti suh! Engvângin nge? Jehova’n chutianga mi a khaikhin ngai loh vâng a ni. (Gal. 6:4) Entîr nân, Mari chuan Isua chu hriak rimtui man to tak a chulh a. (Joh. 12:3-5) Chutih rualin, hmeithai rethei chuan biak inah dâr tangka dere pahnih a thlâk a ni. (Lk. 21:1-4) Mahse, Isua’n chûng thiltihte chu rinna târ lanna angin a thlîr ve ve a. A Pa, Jehova chuan thil tê tham tê anga i ngaih atâna i inpêkna leh, amah i hmangaihna avânga i thiltih eng pawh chu a ngaihlu tak zet a ni. Rinhlelhna neih châng kan nei ṭheuh va. Mahse, Pathian Thu, thutak rinchhan tlâk Bible chuan chumi paih bo tûr chuan min ṭanpui thei a ni. Chuvângin, rinhlelhna i neihte paih bo tûrin hma la la, inrintâwkna nei takin awm ang che. Jehova chuan mi mal takin a ngaihven che a. A tâna i thiltihte chu a ngaihluin lâwmman a pe ngei dâwn che a ni. Jehova’n a chhiahhlawh rinawm zawng zawngte chu a hmangaihna leh ngaihsakna dawn phû angin a thlîr tih ring tlat ang che. w24.10 25 ¶3; 29 ¶17-18