August

Mi a tam thei ang berin vaukhânna chhâng lêt a, kan ruala Jehova be ve tûrin kan ṭawngṭai a. A nih leh, tûn thlenga chu vaukhânna ngaihsak lotute chungchâng chu engtin nge ni ang? Babulon Khaw Ropui tihchhiatna an hmuh huna inthlâk danglamtute chhandam chu Jehova duh zâwng a ni thei a. Chutiang a nih chuan, vaukhânna kan puanchhuah chu tûn hma zawng aiin a hmanhmawhthlâk lehzual a ni. Tûna kan thu hrilhte hi nakinah an hre chhuak mai thei a ni. (Ezekiela 33:33 nên khaikhin rawh.) Kan hnên aṭanga an hriat vaukhânnate chu hre rengin chu chuan a tlai lutuk hmaa kan ruala Jehova be tûrin a chêttîr thei a. ‘Lîr nasa tak a nghîn’ hnuah chauh a thu hriatte avânga inthlâk danglamtu Philippi khuaa tân in vêngtu angin, mi ṭhenkhat chu Babulon Khaw Ropui tihchhiatna avânga khawvêl tihnghîn a nih hnuah an inthlâk danglam mai thei a ni.—Tirh. 16:25-34. w24.05 17 ¶9-10

Hebrai Kristiante hnêna tirhkoh Paula lehkhathawn aṭangin thil pawimawh tak dang kan zir thei a. Mi ṭhenkhat chu thlarau lama puitlin lam pan zawm zêl lovin, “[thlarau lama] chaw rum ni lova hnute la ngai mi” an ni a. (Heb. 5:12) Anni chuan Jehova’n kohhran kal tlanga thil thar a zirtîrte chu an pawm lo va. (Thuf. 4:18) Entîr nân, Krista inthawina ṭanchhanin Mosia Dân zawm a ngaih tawh lohna chu kum 30 lai ni tawh mah se, Juda ringtu tam tak chuan chu chu zawm an la tum reng a ni. (Tit. 1:10) Paula chuan thlarau lam chaw rum, thutak ril tak chu pawm tûrin ṭanpui a tum a ni. Chu chu Kristiante tân Kristian biakna ruahmanna chungnung zâwk chunga an rinna tinghet tûrin huaisen taka thu hril zawm zêl tûra an mamawh tak a ni.—Heb. 10:19-23. w24.04 6 ¶15

Evi leh Adama chu Setana lamah ṭangin Pathian laka an hel aṭang khân, mihring tlûklehdingâwn tam tak an thi tawh a. Chûng mite tân eng beiseina nge awm? Krista hnungzuitu mi rinawm tlêm tê, mi 1,44,000 te chu vânah thih theih lohna nun changin an tho leh ang a. (Thup. 14:1) Jehova hmangaihtu mi rinawm a hmei a pate chu “mi fel” niin an “ tho” leh ang a, Krista Kum Sâng Rorêl chhûng leh fiahna hnuhnûng ber hnua mi fel an nih reng chuan leiah hian chatuanin an nung ang. (Dan. 12:13; Heb. 12:1) Chu bâkah, Kum Sâng Rorêl chhûng chuan Jehova rawng la bâwl ngai lotute, a nih loh leh “thil sual titute” pawh tiamin mi fel lote chu an nun kawng thlâk danglama mi rinawm nih theihna hun remchâng pêk an ni ang. (Joh. 5:29; Lk. 23:42, 43) Mahse, mi ṭhenkhat chu suaksual tak an nih avângin, anni chu kaihthawh an ni tawh lo vang.—Lk. 12:4, 5. w24.05 2 ¶3; 5 ¶15; 6 ¶17

Jehova puan ina mikhual nih duhtu chuan ‘a rilrua awm thutak’ a sawi tûr a ni. (Sâm 15:2) Chutah chuan dâwt sawi loh aia tam a tel a. Pathian Jehova chuan kan thusawiahte leh kan thiltih zawng zawngahte rinawm tlat tûrin min duh a ni. (Heb. 13:18) “Mi kawhmawh chu LALPA ngaihin tenawm an ni si a; mi ṭha famkim erawh chu a ṭhian” an nih avângin chu chu thil pawimawh tak a ni. (Thuf. 3:32) An ‘rilrua awm thutak sawitute’ chuan mi hmuhah chauh ni lovin, mi hmuh lohvah pawh Pathian dân an zâwm tlat a. Rinawm lo takin thil an ti ngai lo. Mahse, mi rinawm lo chuan Pathian dânte chu engtik lai pawhin a ṭha ber tih a ringhlel ṭhîn a. (Jak. 1:5-8) Ani chuan thil lian tham lo anga lang dinhmunahte Pathian thu a âwih lo thei a ni. A thuawih lohna sawhkhâwk chu a tawrh nghâl mai loh avângin Pathian dân bawhchhiat chu a pawisa lo telh telh a. Pathian rawngbâwlah inngai mah se, a biakna chu pawm a ni lo. (Thur. 8:11) Chuvângin, kawng engkimah rinawm taka thil tih kan duh a ni. w24.06 10 ¶7-8

Jehova mite chuan Pathian Thua thutak chu an ngaina hle a. Chu thutakah chuan kan rinna kan nghat a ni. (Rom 10:17) Jehova chuan Kristian kohhran chu “thutak ban leh innghahna” angin a din tih kan ring a. (1 Tim. 3:15) Setana chuan Bible leh Pathian inawpna pâwl aṭanga kan dawn kaihhruainate kan rinna chu hloh tûrin min duh a ni. (Eph. 4:14) Nakin lawkah Setana chuan hnam zawng zawngte’n Jehova an dona tûrin inbumna thiltithei tak a hmang dâwn a. (Thup. 16:13, 14) Jehova mite chu bum a tum nasa lehzual dâwn tih kan beisei thei bawk a. (Thup. 12:9) Chuvângin, thutak leh dâwt thu thliar hrang thei tûra kan inzir a pawimawh tak zet a ni. (Rom 6:17; 1 Pet. 1:22) Chu chu hrehawm nasa taka kan dam khawchhuah theih dân kawng awm chhun a ni si a! w24.07 8 ¶1-3

Jehova’n Israel mite chu hnam anga a rêlbâwl khân, thu a thlunpui a. A dânte an zawm chuan a vênghimin, mal a sâwm dâwn a ni. Chûng dânte chungchângah chuan: “He thupêk, tûna pêk che u hi in tân a har lutuk lo va, a hlat lo bawk che u a ni,” tiin a hrilh a ni. (Deut. 30:16) Mahse, pathian dangte biakna ang chi thiltih hmanga a laka an hel chuan malsâwmna chu a la kîr leh ang a, hrehawm an tuar dâwn a ni. Chutiang hunah pawh Pathian duhsakna chu an dawng leh thei a. ‘Jehova, an Pathian lama hawiin a thupêkte chu an zâwm leh thei a ni.’ (Deut. 30:1-3, 17-20) Thu danga sawi chuan, an sualte an sim thei a. An sim chuan, Jehova’n a hnaihin mal a sâwm leh dâwn a ni. Jehova hnam thlan chu a lakah an hel nawn fo va. Milem an biak bâkah, thil tenawm dang tam tak an ti a. Chuvângin, hrehawm an tawrh phah a ni. Mahse, Jehova chu a mi thuawih lote chungah chuan a beidawng lo va. Sima, a hnêna kîr leh tûrin zâwlneite a tîr nawn fo a ni.—2 Lal. 17:13, 14. w24.08 9 ¶4-5

Isua thih aṭanga kum eng emaw zât chhûng chu Jerusalem leh Judai rama chêng Kristiante chuan harsatnate an tâwk a. Kristian kohhran din a nih aṭanga hun rei lo têah Kristiante chuan tihduhdahna an tâwk leh a ni. Chumi hnu kum 20 vêlah, ṭâm a tlâk avângin Krista hnungzuitute chuan sum leh pai lamah harsatna nasa tak an tâwk a. (Tirh. 11:27-30) Mahse, C.E. 61-ah Kristiante chuan hun muanawm tak an chên lailâwk a. Chutih hun lai chuan tirhkoh Paula lehkhathawn, a hnua an tâna ṭangkai êm êm tûr thlarauva thâwk khum chu an dawng a ni. Kristiante’n hun muanawm tak an chen chhûng chu a rei dâwn loh avângin, chu lehkhathawn chu a hun taka thawn a ni a. An hmachhawn mai tûr hrehawmna chu chhel taka an tawrh theih nân Paula chuan fuihna ṭangkai tak a pe a ni. w24.09 8 ¶1-2

Harsatna kan tawh hian kan unaute chu min “thlamuantute” an ni thei a. Unaute chuan hriatthiamna nei taka min ngaihthlâksakin, hunte min hmanpuiin min thlamuan thei a; mi thlamuan thei tak Bible chângte min chhiarsakin min ṭawngṭaipui pawh a ni thei. (Rom 15:4) A châng chuan, unau tu emawin Jehova ngaihtuah dân chu min hriat nawntîrin, chhel taka awm zêl tûrin min ṭanpui thei a. Kan Kristian unaute chuan kan mangan hunah kan rilru chhâwk zângkhai tûrin ei tûrte min siamsakin, ṭanpuina ṭangkai tak min pe pawh a ni thei a ni. Keimahni lam aṭanga ṭanpuina kan dîl hmasak a ngaih châng a awm thei a. (Thuf. 17:17) Mahse, kan rilru awm dân emaw, kan mamawh emaw chu an hre lo pawh a ni thei a. (Thuf. 14:10) Rilru na taka i awm a nih chuan i rilru awm dân chu i ṭhian ṭhate hnênah hrilh hreh lo la. I mamawhte chu hriattîr ang che. Chu bâkah, kohhran upa i nêl tak pahnih khat hnênah i hrilh thei bawk. Unaunu ṭhenkhat chuan unaunu puitling takte nêna inkawmna aṭang pawhin thlamuanna an hmu a ni. w24.10 10 ¶15-16

Mi tam tak chuan hrisêlna ṭha tak an neih theih nân, chaw ṭhate eiin a hun takah insawizawina an nei ṭhîn a. Chuti chung pawhin, chatuana nun an inbeisei lo. Chutianga beisei chu kum upatnain a ken tel lungngaihnate avângin thil theih loh leh châkawm lo angin a lang thei a. Mahse, Johana 3:16 leh 5:24-a târ lan angin, Isua chuan “chatuana nunna” kan neih theih thu a sawi a ni. Ni khat chu, Isua’n mipui tam tak chu thil mak tihna hmangin chhang leh sanghain a hrai a. Chu chu thil mak tak a ni. Mahse, a tûka Galili dîl kama awm Kapernaum khuaa a thusawite chu a mak lehzual a. Chutah chuan, mitthite chu kaihthawh an nih theih thu leh chatuana nunna an neih theih thu a sawi a ni. (Joh. 6:39) Chu chuan i ṭhiante leh i hmangaih thi tawhte tâna awmzia a neih dân tûr chu han ngaihtuah teh. Isua thusawite chuan mitthi tawh tam tak chu kaihthawhin an awm thei tih a târ lang a ni. w24.12 8 ¶1-2

Tûn hnaia World Health Organization (WHO) report pakhatin pasalte chuan an nupuite chu kut an thlâk a, na tak taka ṭawng khumin, an rilru tinatu thilte an ti ṭhîn tih a târ lang a ni. Chutiang thil ti ṭhîntu pasalte chuan mi hmuhah chauh an nupuite chu zahthiam takin an cheibâwl ṭhîn a. Engvângin nge pasal ṭhenkhat chuan an nupuite chungah hmangaihna nei lo taka thil an tih ṭhin? Pa hmangaihna nei lo tak kut hnuaia seiliante chuan chutianga tih chu thil pângngai takah an ngai thei a. Mi ṭhenkhat chuan an seilenna hmuna mite ngaih dân dik lo tak avângin nupui hneh chu “mipa dik tak” nihna angin an thlîr a ni. A dangte chu an thinrimna pawh tiamin, an rilru awm dânte thunun tûra zirtîr an ni lo va. Mipa dang lehte chuan saruak lem leh thuziakte an en ṭhin avângin hmeichhiate leh mipat hmeichhiatna chungchângah thlîr dân veiherh tak an nei a. Report ṭhenkhat chuan COVID-19 hripui lên chhûngin chûng harsatnate chu a pun belh thu a târ lang bawk a ni. Mahse, chûngte chu pasalte tân an nupuite chunga hmangaihna nei lo taka thil ti tûra chhuanlam a tling lo. w25.01 8 ¶2-3

“I Pathian Jehova chu i thinlung zawng zawngin, i thlarau zawng zawngin, i chakna zawng zawngin, i rilru zawng zawngin i hmangaih tûr a ni.” (Lk. 10:27, NWT) Hei hi Mosia Dâna thupêk pawimawh ber a ni tih Isua’n a sawi a. Jehova kan hmangaihnaah chuan kan thinlung—kan châkna, kan rilru awm dân leh, kan vei zâwngte—a tel a ni. Thlarau zawng zawnga inpêkna leh kan chakna zawng zawnga inpêkna a tel bawk a. Chu bâkah, Jehova kan hmangaihnaah chuan kan rilru—kan thil ngaihtuah dânte pawh a tel a ni. Pathian Jehova ngaihtuah dân chu engtikah mah a kimin kan hre thiam thei dâwn lo va. Mahse, a Pa ngaihtuah dânte ṭha famkima lantîrtu “Krista rilru” kan zir chianna aṭangin, Jehova ngaihtuah dân chu chiang lehzualin kan hre thiam thei a ni.—1 Kor. 2:16. w25.03 8 ¶1

Isua chu mi ṭha famkim a nih angin, a nun chu mihring hmasa ber Adama’n thil a tihsual hma nên a intluk chiah a. (1 Kor. 15:45) Kan tân a nun hlânin, Adama chân tâk neih lêt leh theih nâna a man zât chu a pe thei a ni. (Rom 5:19) Chutiang chuan, Isua chu “Adama hnuhnung zâwk” a lo ni ta a. Mi ṭha famkim dangin a man a rawn pêk nawn a ngai tawh lo. Ani chuan “vawi khatah a tlingtla ta nghâl” a ni. (Heb. 7:27; 10:12) A nih leh, sual thawina ruahmanna leh tlanna chu engtin nge a danglam? Sual thawina ruahmanna chu Pathianin amah leh mihringte inkâra inlaichînna ṭha a awm theih nâna a hmalâkna a ni a. Tlanna chu mihringte sual thawi a nih theihna tûra a man pêk hi a ni. Kan tâna Isua thisen hlu tak leih buakna chuan chumi man chu a pe tla a ni.—Heb. 9:14. w25.02 5 ¶12-13

Jehova chu mi awm tak tak anga hmuhna chuan kan fiahna tawhte chunga thlîr dân dik nei tûrin min ṭanpui thei a ni. Engtin nge? Kan fiahna tawhte chu Jehova leh Setana inkâra awm thu buai lian zâwk nêna inkûngkaih niin kan hre ṭan a. Diabola chuan harsatna kan tawh hunah Jehova kan kalsan ang tiin a sawi a ni. (Job. 1:10, 11; Thuf. 27:11) Mahse, kan fiahna tawhte hlawhtling taka kan tawrh chhuah hian, Jehova kan hmangaih tih kan târ lang a, Diabola chu dâwt pa a ni tih kan finfiah bawk. Sawrkâr aṭanga dodâlnate, sum leh pai lama harsatnate, thu hrilhnaa chhân lêtna ṭha lote, a nih loh leh fiahna dang eng emaw i tâwk mêk em? I tâwk mêk a nih chuan, Jehova thinlung tihlâwm theihna hun remchâng i nei tih hre reng la; chu bâkah, i tawrh theih tâwk bâk fiahna i tawh a phal ngai lo vang tih hre reng bawk ang che. Ani chuan tuar chhuak tûra i mamawh chakna a pe dâwn che a ni. w24.06 22 ¶9

Thlêm awlsam tak i nihna dinhmun chu i hria em? Kan chak lohna lai pawm duh lohna leh suala tlu lût thei lo tûra inngaihnate chu thil hlauhawm tak a ni a. (1 Joh. 1:8) A chhan chu, Paula ngei pawhin “thlarau mite” pawh an invên ṭhat loh chuan thlêmna an tâwk thei tih a sawi a. (Gal. 6:1) Ṭha taka mahni kan inenfiah a, kan chak lohna laite kan hriat a ngai a ni. (2 Kor. 13:5) Thlêm awlsam tak kan nihna dinhmunte kan hriat chuan eng nge kan tih ang? Theih tâwp chhuahin kan do vang! Entîr nân, Bible hun laia khawpui beih awlsamna lai ber chu kulh kawngkhârte a ni a. Chuvângin, kulh kawngkhâr awmnaahte chuan vêngtu tam tak dah an ni ṭhîn. Chutiang bawkin, keini pawh thlêm kan awlsam lehzualna dinhmunte kan hriat chuan, a bîk taka kan fîmkhur lehzual a ngai a ni.—1 Kor. 9:27. w24.07 15 ¶5-7

Vawiin ni chânga târ lan angin, hnathawh ṭhaah chuan chanchin ṭha hrilh pawh a tel a. Chuvângin, Pathian Thu kan chhiar a, kan chhût ngun hian Jehova kan rinna a nghet lehzualin, Lalram thuchah hrilh a pawimawhzia kan hre thiam lehzual a ni. Pathian Thu hlâwkpui tak zet tûr chuan, hmanhmawh taka chhiar te, zir te leh, chhût ngunte chu kan pumpelh tûr a ni. Hun pêk a ngai a. Bible i chhiar hunah, hriatthiam harsa i tih laite chu kân mai suh. Chu aiin, chu Bible châng hrilhfiahna hre tûrin Watch Tower Publications Index, a nih loh leh Jehova Thuhretute Tâna Zir Bingna Hmanrua chu hmang ang che. Hun pea i zir chuan Pathian Thu dikzia i rinna a nghet lehzual ang a. (1 Thes. 5:21) I rinna a ngheh poh leh mi dangte hnêna i thu zirte hrilh chu nuam i ti lehzual ang. w24.04 15 ¶4-5

Davida chuan: “Lalpa, nang chu i ṭha a, ngaihdam i peih a,” tiin a ziak a. (Sâm 86:5) Mika chuan: “Nang anga khawlohna ngaidamtu leh . . . bawhchhiatna kal pêltu Pathian tu nge awm?” tiin a ziak bawk a. (Mik. 7: 18) Tichuan, Isaia pawhin: “Mi suaksual chuan a awm dân chu bânsan sela, mi fel lo chuan a ngaihtuahte chu bânsan bawk rawh se: LALPA hnênah kîr leh rawh se; tichuan, anin a lo khawngaih ang; kan Pathian hnênah kîr leh rawh se, anin a ngaidam nasa khawp dâwn si a,” tiin a ziak a ni. (Is. 55:7) Korinth kohhran chuan Jehova entawnin thil sual titu a sim hnuah ṭha taka lo lâwmin, a chungah hmangaihna an lantîr a. Kohhrana lâwm lût leh tûra Paula kaihhruaina chu zâwmin ‘kawng tinrênga thu an âwihzia’ an lantîr a ni. Ni e, kohhran aṭanga chhuahtîr a nihna chu thla rei lo tê chauh ni mah se, zilhna chuan sim tûrin a chêttîr a. Chuvângin, kohhrana lâk luh leh a nihna tûr tihkhawtlai chhan tûr a awm lo a ni. w24.08 17-18 ¶12-13

Hun pawimawh takah kan nung a! Nakin lawkah, Isua’n leia mi tinte chungah ro a rêl ang. Isua’n a hnungzuitute hnênah a lo kal lehna leh “khawvêl tâwpna chhinchhiahna” lo awm tûrte chu pein, chu rorêlna a lo thlen hun tûr chu a hrilhfiah a ni. (Mt. 24:3) Chu hrilh lâwkna chu Matthaia bung 24 leh 25, Marka bung 13 leh Luka bung 21-ah a chuang a ni. Isua’n tehkhin thu pathum hmangin vaukhânna ṭangkai tak min pe a. Chûngte chu kêl leh berâm, nula thianghlim fing leh â te leh, talent tehkhin thute a ni. Tehkhin thu tinte chuan mi chu a thiltih azira a chungthu rêl a nih dân tûr hre thiam tûrin min ṭanpui a ni. w24.09 20 ¶1-2

Kan entawn tûr ṭha ber chu Isua Krista a ni a—a Pa leh mihringte a hmangaihna chuan mi dangte tâna thawk rim tûr leh hna hnuaihnung takte thawk tûrin a chêttîr a. (Mt. 20:28; Joh. 13:5, 14, 15) Nang pawh, hmangaihna avânga hma la i nih chuan, Pathian Jehova’n kohhranho rawngbâwltu ni thei tûrin i thlarau lam thiltumte hlen thei tûrin mal a sâwm ang che. (1 Pet. 5:5) Khawvêlah chuan mahni inchawi lârtute chuan mite ngaihsân an hlawh fo va. Jehova inawpna pâwlah chuan chutiang chu a ni lo va. Isua anga hmangaihna vânga chêttîra awm unaupa chuan mi dangte chunga thuneih emaw, mahni inchawi lâr emaw chu a duh lo vang. Thiltum sâng tak nei tu emaw chu kohhranah chanvo nei ta se, Jehova berâmte enkawl tûra hna hnuaihnung takte thawh a ngaih hunah a thawh duh loh a rinawm a ni. Chûng hnate chu a thawh atâna hniam lutuk angin a thlîr thei a ni.—Joh. 10:12. w24.11 15 ¶6-7

Khawvêl pumah ‘mihringte hnêna thilpêkte’ anga rawngbâwltu unaupate chu tam lehzuala mamawh an ni a. (Eph. 4:8) Baptisma chang tawh unaupa i nih chuan, chutianga rawngbâwl thei tûrin ‘i kutah tih theihna a awm em?” (Thuf. 3:27) Kohhranho rawngbâwltu nih duhna i nei em? I ni tawh a nih chuan, upa anga rawngbâwl duhna i nei em? Lalram Chanchin Ṭha Puangtute School kal tûra dîlna theh lût tûrin i dinhmunte i siamrem thei ang em? Chu school chuan Isua tâna tam lehzuala inhmang thei tûrin a zirtîr ang che. Chutianga ti tûra tling lo nia i inhriat chuan Jehova hnênah ṭawngṭai la, i chanvo dawn eng pawh ṭha taka i hlen chhuah theih nân thlarau thianghlim dîl bawk ang che. (Lk. 11:13) Isua’n ‘mihringte hnêna thilpêkte’ ni tûra unaupate a ruatna chuan hêng ni hnuhnûng chhûng hian min kaihruai a ni tih a nemnghet a. (Mt. 28:20) Hmangaihna nei tak, thilphal tak, mi ngaihsak tak leh, kan mamawhte min ṭanpui tûra unaupa tling takte min petu kan Lal chungah i lâwm hle ngei ang. w24.10 23 ¶16-17

Pathian mite chunga natna leh hrehawm tawrhna thlentu thilte chu engtin nge ni ang? A tâwpah, chûng thilte chu ‘theihnghilh niin [Pathian] mit laka thupin a awm tawh ang.’ (Is. 65:16) Jehova chuan kan buainate chu a tibo tawh ang a, chûng buainate avânga kan tawrhna zawng zawngte pawh hriat reng a ni tawh lo vang. Tûnah ngei pawh, kan Kristian inkhâwmahte kan tel hian he khawvêl suaksual tak avânga kan hrehawmnate theihnghilhin, hahdam takin kan awm thei a ni. Hmangaihna te, hlimna te, remna te, ngilneihna te leh, thuhnuairawlhnate ang chi Pathian thlarau rah hmêlhmangte kan lantîr hian kan thlarau lam dinhmun chu boruak muanawm takah kan awmtîr a ni. (Gal. 5:22, 23) Pathian inawpna pâwla kan awm thei hi malsâwmna a va ni tak êm! Thlarau lam paradis-a awm tlattute chuan Pathian thutiam “vân tharte leh lei thar” thlen famkim hun chu an hmu ang. w24.04 22 ¶9-10

Inngaihzâwnna chu thil hlimawm tak a nih rualin, inneihna thlen thei rahbi pawimawh tak a ni bawk a. An inneih nîah, nupate chuan an dam chhûnga inhmangaiha inzah tawn tûrin Jehova hmaah thu an tiam a. Thu eng pawh kan tiam hmain ngun takin kan ngaihtuah hmasa tûr a ni. Chu chu inneihna thutiam atân pawh a dik hle a. Inngaihzâwnna chuan inkawpte chu inhre chiang tawn tûr leh thu tlûkna fing tak siam tûrin a ṭanpui a. Chu thu tlûkna chu inneih emaw, inṭhen emaw a ni thei a ni. Inngaizâwngte an inṭhen hian an inngaihzâwnna a hlawhchham tihna a ni lo va. Chu aiin, inngaihzâwnnain a tum angin an inneih dâwn leh dâwn loh chungchângah thu tlûkna an siam thei tihna a ni. Inngaihzâwnna chungchânga thlîr dân dik neih chu engvângin nge a pawimawh? Kawppui nei lote’n thlîr dân dik an neih chuan nupui pasal atâna an duh loh tu emaw chu an ngaizâwng lo vang. w24.05 26-27 ¶3-4

Kristian ṭhalaite chuan an rinna humhim tûra inrintâwkna neih loh châng an nei thei a. School-a chanchhâwnna chungchâng an zir hian an zâm pawh a ni thei a ni. Engvângin nge? An zirtîrtute chuan chanchhâwnna chu thil awm tak tak anga an zirtîr vâng a ni thei a. Nu leh pa i nih chuan, engtin nge i fate chu an rinnaa ding nghet a, inrintâwkna nei tûra i ṭanpui theih? I fate chuan thil siam chungchânga thutak an hriat avângin an zâm a ngai lo. Engvângin nge? A chhan chu, scientist tam takte pawhin nunna hi amaha lo awm a ni lo tih an hre thiam a. Anni chuan nunna nei thil zawng zawngin Siamtu fing tak a awm tih an finfiah dân chu an hmu a. Chuvângin, khawvêl hmun hrang hranga school-tea an zirtîr chanchhâwnna chu an pawm lo a ni. Unau dangte’n nunna hi siam a ni tih an rinna chhan chu zir chiangin, i fate pawhin an rinna chu an tinghet thei a ni. w24.12 18 ¶14-15

Isua chuan thu hrilhna chu a êng zâwngin a thlîr tlat a. Chu chuan phûr taka rawngbâwl zêl tûrin a ṭanpui a ni. Entîr nân, C.E. 30 tâwp lamah chuan mi tam takin a thu hrilhna chu an chhâng lêt tih a hria a, anni chu buh hmin tawh nên a tehkhin a ni. (Joh. 4:35) Kum khat hnu vêlah a zirtîrte chu: “Buh seng tûr a tam hle,” tiin a hrilh a. (Mt. 9:37, 38, NWT) A hnuah pawh: “Buh seng tûr a tam hle a . . . Buh Neitupa hnênah chuan buh sengtu tûrte tîr chhuak tûrin ngên rawh u,” tiin a sawi nawn leh bawk. (Lk. 10:2, NWT) Isua’n chanchin ṭha chu mite’n an chhâng lêt thei tih a hria a, an chhân lêt chuan a hlim hle a. Isua’n a zirtîrte chu an thuchah ken chungchânga a êng zâwnga thlîr tlat tûra zirtîrin ṭhahnemngaihna nei zêl tûrin a ṭanpui a ni. w25.03 18-19 ¶15-16

Jehova chu inhumhimna a ni. Lungpui lian tak chu thlipui na tak laka inhumhimna a nih angin, Jehova chuan dinhmun hlauhawm takte lak ata min humhim a. Ani chuan min vênghimin chhiat hlenna min thlen thei thil lakah min humhim bawk. Chu bâkah, chu aia nasa pawh min tiam bawk a ni: Kan muanna leh himna tiderthâwng thei apiang a tiboral ang. (Ezek. 34:25, 26) Jehova chu lungpui ang kan Inhumhimna kan nihtîr theih dân kawng khat chu a hnêna ṭawngṭai hi a ni. A hnêna kan ṭawngṭai hian, kan rilru leh kan thinlung min vênhimsak tûrin a “thlamuanna” min pe a. (Phil. 4:6, 7) Jehova chu kan tân lungpui nghet tak ang mai a ni a. Ani chu “kum khaw Lungpui” a nih avângin kan rinchhan thei a ni. (Is. 26:3, 4) A thutiam vawng tûr te, kan ṭawngṭaina ngaithla tûr te leh, kan mamawh ṭanpuina min pe tûrtein a nung reng ang. A rawngbâwltute chunga a rinawm tlat avângin kan rinchhan thei bawk. (2 Sam. 22:26) Ani chuan kan thiltihte chu a theihnghilh ngai lova, mal min sâwm zêl ang.—Heb. 6:10; 11:6. w24.06 27 ¶4-6

Intihhlimna ṭha lote, ṭhian ṭha lote leh, sum ngainatnate chuan kan thinlung a hruai pêng thei a. Eng emawin Jehova kan hmangaihna a tidai nia kan hriat chuan, chumi paih bo tûr chuan rang takin hma i la vat ang u. (Mt. 5:29, 30) Kan thinlung chu hruai pên kan phal tûr a ni lo. Kan fîmkhur loh chuan, thlarau lam thiltiha tam lehzuala kan inhman hian thununna ṭha lote chu kan do a ngai lo tih ngaih dân neiin kan inbum thei a. Thlasik tûk, khaw vâwt tak kâra pâwna awm angin han inmitthla teh. In i thlen hnu chuan mei lum i ai a; mahse, kawngkapui chu inhawng rengin dah ta la, eng thil nge thleng ang? Pâwn boruak vâwt tak chuan i in chhûng chu a rawn tivâwt thuai ang. Chutiang bawkin, Jehova min hnaihtîrtu thilte tih mai chu a tâwk lo va, pâwn boruak vâwt tak in chhûnga a lo luh kan duh loh ang bawkin, he khawvêlin a chawi lâr thil eng pawh lakah kan invên a ngai a. Chuvângin, he khawvêl “boruak” vâwt tak, a nih loh leh Pathian ngaihsak lohna chu kan thinlung chhûnga a luh a, min hruai pên lohna tûrin thununnna ṭha lote chu kan pumpelh a ngai a ni.—Eph. 2:2. w24.07 21 ¶6-7

Rom sipaite’n nghaisakna bana an khenbeh laia Isua’n nâ a tawrh nasat tûrzia chu kan ngaihtuah thei a. Isua chuan rorêl dik lohna a tawhte chu a inthununtîr lo va. A Pa hnênah Rom sipaite hrem tûra ngen aiin: “Ka Pa, anni hi ngaidam rawh, an thiltih hi an hre lo a ni,” tiin a ṭawngṭaisak zâwk a. (Lk. 23:34) Dik lo taka min cheibâwltute ṭawngṭaisakna chuan an laka kan lungnih lohna leh thinrimnate chu a thawi dam theiin, anmahni kan thlîr dân pawh a thlâk danglam hial thei a ni. Setana khawvêl a tâwp hma chuan eng ang rorêl dik lohnate nge kan hmachhawn ang tih kan sawi lâwk thei lo va. Eng pawh tâwk mah ila, Jehova ṭanpuina i dîl zawm zêl ang u. Isua’n dik lo taka cheibâwlnate a hmachhawn dân chu entawnin, Bible thu bulte chu i nunpui zawm zêl bawk ang u. Chutianga kan tih chuan Pathian Jehova malsâwmna kan dawng ang tih kan chiang thei a ni.—1 Pet. 3:8, 9. w24.11 6 ¶16; 7 ¶17, 19

Pathian Jehova chuan nungchang ṭha lo chu a ngaihzam loh bâkah, sual chu a hua a. (Sâm 5:4-6) Chuvângin, a Thu hmanga tehna fel min pêkte chu zâwm tûrin min beisei a ni. Chutih rualin, ṭha famkim lo kan nih angin a thupêkte chu famkim takin kan zâwm thei dâwn lo tih a hria a. (Sâm 130:3, 4) Mahse, ‘Pathian ngaihsak lo mi, a khawngaihna hurnaa chantîrtute’ chu a dawh reng lo vang. (Jud. 4) Bible chuan Pathian indona nî, Armageddonah ‘Pathian ngaihsak lo mite chu tihboral’ an ni ang tih a sawi a ni. (2 Pet. 3:7; Thup. 16:16) Mahse, Jehova chuan tu ma boral a duh lo va. He thuziak inzawma kan lo sawiho tawh angin, ‘mi zawng zawng sim tûrin’ a duh a ni. (2 Pet. 3:9) Kohhran upate chuan Jehova entawnin thil sual titute chu an nun kawng thlâk danglam a, Pathian duhsakna dawng leh thei tûrin dawhthei takin an ṭanpui a ni. w24.08 26 ¶1-2

Jehova angin, keini pawhin mi dangte tisa lam mamawh chu kan ṭanpui ve thei a. Entîr nân, unau tu emaw ei leh in tûr, a nih loh leh thawmhnaw hâk tûr mamawh hriat i nei em? Jehova chuan chu a mamawhna phuhru tûrin a hmang thei che a ni. A bîk takin, Jehova mite chu leilung chhiatna a thlen huna thilphalna an lantîr avânga hriat hlawh an ni a. Entîr nân, COVID-19 hripui a lên chhûng khân, unaute chuan ei tûrte, thawmhnawte leh, thil dangte chu a mamawhte hnênah an pe a. Mi dangte chuan khawvêl pumhuap rawngbâwlna atân thawhlâwmte an thawh bawk. Chu chuan, khawvêl puma chhawmdâwlna hna thawh a nih theih nân a ṭanpui a ni. Chûng unaute chuan, Hebrai 13:16-a: “Thiltih ṭhat leh thilphal hi theihnghilh suh u; chutiang inthawina chungah chuan Pathian a lungni êm êm si a,” tih thu hi an nunpui a ni. w24.09 27 ¶6-7

He dinhmun hi han ngaihtuah teh. I chhûngkaw châwm nân hna i zawng a. Hna ruak pahnih a awm a. A hna chungchâng te, hun duan te, hna kal nâna hun i hman zât tûr te leh, thil dangte chu i ngaihtuah a. A pahnih chuan, Bible thu bulte nên a inkalh lo ve ve a. Hna pakhat zâwk chu i hna thawh duh zâwng a nih vâng emaw, a hlawh a sân zâwk vângin emaw i duh zâwk a. Mahse, thu tlûkna i siam hmain, thil dang i ngaihtuah tûr a la awm a ni. Entîr nân, chûng hnate chuan i inkhâwm hun a tibuai thei ang em? I chhûngte rilru lam leh thlarau lam mamawh ngaihsak nâna i mamawh hunte chu a la pêng ang em? Chûng zawhnate inzawhna chuan “thil pawimawh zâwkte [NWT]”—i thlarau lam thilte leh i chhûngte mamawh—chu tisa lam thilte aia dah hmasa zâwk tûrin a ṭanpui thei che a. Tichuan, Jehova malsâwmna thlentu thu tlûkna ṭha tak i siam thei ang. w25.01 17 ¶11-13

Mi dangte’n ṭha lo takin cheibâwl che mah se, Jehova erawh chuan a hmangaih chein, a ngaihlu che tih i chiang thei a ni. “Thinlunga lungchhiate chu a hnaih ṭhîn” si a. Hlutna nei lo nia inhriatna i nei a nih chuan, Jehova’n i mize ṭhate chu hmuin a lamah a hîp che tih hre reng ang che. (Joh. 6:44) A tâna i hlut êm avângin ṭanpui tûr chein a inpeih reng a ni. Isua chungchâng ngaihtuahna hmangin Jehova rilru put hmangte chu kan hre thei a. Leia rawng a bâwl chhûng khân, mi dangte hmuhsita awmte chu lainatna nei takin a cheibâwl a ni. (Mt. 9:9-12) Natna hrehawm tak tuar hmeichhe pakhatin tihdam beiseia Isua puan a deh khân, Isua chuan lo thlamuanin a rinna avângin a fak zâwk a. (Mk. 5:25-34) Isua’n a Pa miziate chu famkim takin a lantîr a ni. (Joh. 14:9) Chuvângin, Jehova’n a ngaihlu chein, i rinna leh amah i hmangaihna pawh tiamin, i mize ṭhate chu a hmu tih i chiang thei a ni. w24.10 7 ¶4-5

Davida chuan a nunah a mittui tlâkna thlentu dinhmun harsa takte a hmachhawn a. Hawtu tam tak a neih bâkah, a mi rin takte pawhin an phatsan bawk a ni. (1 Sam. 19:10, 11; 2 Sam. 15:10-14, 30) “Ka rûmna lamah ka chau ta; zan tin ka mutna chu mittuiin a huh a; ka khum chu ka mittuiin ka tihuh ṭhîn,” tiin a sawi hial a ni (Sâm 6:6) Davida chuan harsatna tam tak tâwk mah se, Jehova’n a hmangaih tih a ring nghet tlat a. “LALPAN ka ṭap thâwm a hre tawh si a,” tiin a ziak a ni. (Sâm 6:8) Ṭum dangah chuan Sâm 56:8-a kan hmuh thu ngaihvenawm takte chu a ziak bawk a. Chûng thu-ahte chuan Jehova ngaihsakna duhawm takte chu târ lan a ni. Davida chuan Pathianin a mittui chu savun pengah a khâwl khâwm, a nih loh leh lehkhabuah a chhinchhiah ang maiin a hria a. A Pa duh tak vâna mi chuan a thil tawhte bâkah, chûngte’n a chunga nghawng an neih dân chu a hriatpui tih a ring nghet tlat a ni. w24.12 22 ¶11-12