June

Krista tlanna inthawina chu kan hlâwkpui reng tawh a. Entîr nân, tlanna ṭanchhanin Pathian Jehova chuan kan sualte a ngaidam a ni. Min ngaidam tûrin mawhphurhna a nei lo. Mahse, min ngaihdam a duh a ni. (Sâm 103:3, 10-13) Mi ṭhenkhat chuan Pathian ngaihdamna dawng tlâk lo niin an inngai thei a. Dik tak chuan, ngaihdamna dawng tlâk tu mah kan awm lo. Tirhkoh Paula chuan “tirhkohva vuah tlâk loh” a ni tih a inhria a. Mahse, “Pathian khawngaihna nasa tak avângin tirhkohva vuah ka ni,” tiin a sawi a ni. (1 Kor. 15:9, 10) Kan sualte kan sim hian Pathianin min ngaidam a ni. Engvângin nge? Kan phû rêng vâng ni lovin, min hmangaih vâng zâwk a ni a. Ngaihdam tlâk loh nia inhriatnain a tibuai che a nih chuan, Jehova’n tlanna chu sualna nei lote tân ni lovin, simna lantîrtu sual fate tân a buatsaih tih hre reng ang che.—Lk. 5:32; 1 Tim. 1:15. w25.01 26-27 ¶3-4

Mi dangte thusawi leh thiltihte chu thunun thei lo mah ila, chûngte kan chhân lêt dân erawh chu thunun kan tum thei a. Ngaihdam chu chhân lêt dân ṭha ber a ni fo a ni. Engvângin nge? A chhan chu Jehova kan hmangaih a, ani chuan ngaihdamna lantîr tûrin min duh a ni. Chu bâkah, thinrim renga kan awm a, kan ngaihdam loh chuan âtthlâk taka thil tiin kan hrisêlna hial pawhin a tuar thei a ni. (Thuf. 14:17, 29, 30) Lungnih lohna kan paih bo hian kan thinlung chu khâkna lakah kan vêng thei a. Chu bâkah, chutianga tihna chu nasa takin kan hlâwkpui bâwk a ni; thil ṭha lote ngaihtuah reng tawh lovin, nun hlimawm tak kan chên leh thei a ni. Thinrim reng lo tûrin engin nge ṭanpui ang che? Kawng khat chu, thinrimna a daih thlenga hun pêk hi a ni. Hliam na tak tuar, tu emaw chuan damdawi lama inenkawlna a dawn hnuah pawh a hliamte dam tûrin hun a mamawh a. Chutiang bawkin, tu emaw thinlung taka ngaidam tûra kan inpeih hmain, rilru dam nân hun kan mamawh thei a ni. (Thur. 3:3; 1 Pet. 1:22) I ngaihdam theih nân ṭawngṭaiin Jehova hnênah ṭanpuina dîl ang che. w25.02 16-17 ¶8-11

Zirtîrna bulpui ṭhenkhatah chuan sual simna, rinna, baptisma leh, thawhlehna chungchânga zirtîrnate a tel a ni. (Heb. 6:1, 2) Chûngte chu Kristiante thurin nghahchhan a ni a. Chuvângin, tirhkoh Petera chuan Pentikost nîa mipui hnêna thu a hrilh khân chumi chungchâng chu a sawi a ni. (Tirh. 2:32-35, 38) Krista zirtîr ni tûr chuan chûng zirtîrna bulpuite chu kan pawm a ngai a. Entîr nân, Paula chuan thawhlehna chungchâng zirtîrna pawm lotute’n Kristian thurin zawng zawng an hnâwl a ni tih a vaukhân a. (1 Kor. 15:12-14) Mahse, thutak hriatna bulpui maiah chuan kan lungawi tûr a ni lo. Zirtîrna bulpuite ang lo takin, thlarau lam chaw rumah chuan Jehova dânte chauh ni lovin a ngaihtuahnate hre thiam tûra min ṭanpuitu thu bulte a tel bawk. Chu chaw rum chu hlâwkpui tûrin Pathian Thu kan zir a, kan chhût ngun a, fîmkhur taka kan zawm a ngai a. Chutianga kan tih lai chuan, Jehova tilâwmtu thu tlûknate siam tûrin kan inzir a ni. w24.04 5 ¶12-13

Pathianin Jona chu chûng Ninevi khuaa mite chu “an ding leh vei pawh thliar thei lote” an ni tia a hriatnawntîr a ngai a. (Jon. 1:1, 2; 3:10; 4:9-11) A hnuah, Isua chuan chu entîrna chu Jehova rorêl dikna leh zahngaihna chungchâng zirtîr nân a hmang a. Ninevi khuaa mite chu “rorêlna nîah chuan . . . kaihthawh an ni ang,” tih a sawi awmzia chu eng nge ni? Isua chuan nakina ‘thiam loh changa thawhlehna’ chungchâng a zirtîr a. (Joh. 5:29) Ani chuan “mi felte leh fel lote” thawhleh hun tûr a Kum Sâng Rorêlna chungchâng a sawi a ni. (Tirh. 24:15) Chu chu mi fel lote tân ‘thiam loh changa thawhlehna’ a awm ngei ang a tihna a ni a. Jehova leh Isua’n an nungchang leh Pathian zirtîrnate an chhân lêt dân chu ngun taka thlîr rengin an enfiah ang. Ninevi khuaa tho lehte chuan biakna dik an hnâwl a nih chuan Pathianin anni chu nun chhunzawm a phal lo vang. (Is. 65:20) Mahse, rinawm taka Jehova biak thlangtu zawng zawngte chuan rorêlnaah duhsakna an dawng ang a. Anni chuan chatuana nun beiseina an nei ang!—Dan. 12:2. w24.05 5 ¶13-14

Isua chuan a Pa ngilneihna chu hmuh theihin famkim takin a lantîr a ni. (Joh. 14:9) A thusawi leh thiltihte hmangin khawngaihna leh ngilneihna ngah tak a Pa chuan mihringte chu a hmangaihin, sual an donaah hnehna an chan theih nâna ṭanpui a duhzia a lantîr a. Isua chuan thil sual titute chu inthlâk danglama amah zui duhna nei tûrin a ṭanpui bawk a ni. (Lk. 5:27, 28) Isua’n a hmachhawn tûr chu a hria a. A hnungzuitute hnênah phatsan a ni anga, banah tihhlum a ni dâwn tih vawi tam tak a hrilh a ni. (Mt. 17:22; 20:18, 19) Johana sawi leh zawlneite hrilh lâwk angin a inthawina chuan khawvêl aṭangin sual a la bo dâwn tih a hria a. A nun a hlan hnuah ‘mi zawng zawng a lamah a hîp’ dâwn tih a sawi bawk a ni. (Joh. 12:32) Sual fate chuan Isua chu an Lal anga pawm a, a hniakhnung zuiin Jehova an tilâwm thei a ni. Chutianga an tih chuan a tâwpah “sual laka chhuah zalen an ni ang.” (Rom 6:14, 18, 22, NWT; Joh. 8:32) Chuvângin, Isua chuan inhuam tak leh huaisen takin râpthlâk taka thihna chu a hmachhawn a ni.—Joh. 10:17, 18. w24.08 5 ¶11-12

Pathian Thu aṭanga thutak i hriat ṭan tirh laia i awm dân kha han ngaihtuah lêt teh. I Pa vâna mi chuan a hmangaih che a, amah betu chhûngkaw zînga tel tûrin a duh che tih te, natna leh hrehawm tawrhna tihtâwp a tiam te, leh khawvêl thara i hmangaih thi tawhte lo tho leh hmuh beiseina i neih mai bâkah, thil dang tam tak i hriat belh a. (Mk. 10:29, 30; Joh. 5:28, 29; Rom 8:38, 39; Thup. 21:3, 4) Chûng thutak i hriatte chuan i thinlung a khawih hle a ni. (Lk. 24:32) I thu hriatte chu i ngainain, chumi chungchâng chu mi dangte hnêna hrilh i duh tak zet a ni! (Jeremia 20:9 nên khaikhin rawh.) Kan thinlunga Bible thutakin zung a kaih tawh chuan mite hnêna sawi lovin kan awm thei lo. (Lk. 6:45) Kum zabi khatnaa: “Keini zawng thil kan hmuh leh kan hriatte kha sawi lovin kan awm thei lo,” tia sawitu Isua zirtîrte angin kan awm a. (Tirh. 4:20) Thutak kan hmangaih êm avângin mi a tam thei ang berte hnêna hrilh kan duh a ni. w24.05 15 ¶5; 16 ¶7

Jehova mite kan nih angin, kan Pa vâna mi kan hmangaih avâng leh kan vêngte chu amah hre tûra ṭanpui kan duh avângin thu kan hril a. Mahse, ṭhenkhat chuan rawngbâwlna chu nuam an ti lo a ni. Engvângin nge? Mi ṭhenkhat chu mi zakzum tak niin, inrintâwkna an nei lo va. Mi ṭhenkhat chuan sâwm lohva mi ina kal chu nuam an ti lovin, an lo duh loh an hlau a ni. Ṭhenkhat dang leh chu an naupan têt aṭangin mi dangte nêna inhnial buai lo tûra zirtîr an ni mai thei a. Chûng unaute chuan hmêl hriat loh hnêna chanchin ṭha hrilh chu harsa an ti a ni. Chutianga i awm avângin rawngbâwlnaah nuam tih loh châng i nei em? I nei a nih chuan, lunghnual suh. Inrintâwkna i tlâkchhamna chuan inngaitlâwm takin mite ngaihsakna lâk i duh lohzia leh mite nêna inhnial i duh lohzia a lantîr thei a ni. Tu ma hnâwl nih kan duh lo va, mi dangte tâna thil ṭha tih kan tum hian a ni lehzual a ni. I Pa vâna mi chuan i hmachhawn harsatnate chu a hria a, i mamawh anga ṭanpui che a duh a ni.—Is. 41:13. w24.04 14 ¶1-2

Vawilehkhata i thu chhiarte nunpui tum vek ai chuan, thiltum inâwm takte insiam zâwk ang che. Heti hian i ti chhin thei a ni. Hmasâwn i ngaihna laite chu ziak chhuak la; tichuan, chûng zînga pakhat emaw, pahnih emaw chu ti ṭan la, a dangte chu nakina tih atân dah ang che. Khawi aṭangin nge bul i ṭan ang? I tâna hlen awlsam tûr thiltumte aṭangin bul i ṭan thei a. A nih loh leh, hmasâwn i ngaihna lai ber nia i hriat aṭangin i ṭan thei bawk. Thiltum i insiam hnuah kan thu leh hla chhuahte aṭangin zir bingna nei ang che. I thiltum i hlen theih nân, Jehova hnênah “tih tum tûr leh bei tûra” chakna pe tûr chein ṭawngṭaiin dîl la. (Phil. 2:13) Tichuan, i thil zir tawhte chu nunpui ang che. I thiltum hmasaah hmasâwnna i hmu a nih chuan, thiltum dangte ti tûrin phûrna i neih lehzual a rinawm. A nihna takah chuan i Kristian mizia emaw, Kristian nun kawngahte emaw hma i sâwn a nih chuan chutianga hmasâwnna neih zêl chu awlsam i ti lehzual ang. w24.09 6 ¶13-14

Tûn hmaa tu emaw i tihnat avângin rilru hrehawm takin i la awm pawh a ni thei a. Engin nge ṭanpui thei che? Tih tak zeta ngaihdam dîlna pawh tiamin, dinhmun siam ṭha leh tûrin i tih theih apiang ti ang che. Jehova hnênah i lo tihnat tawhte ṭanpui tûrin dîl la. Ani chuan nangmah leh i tihnat, tu emaw chu chhelna nei tûr leh thlamuanna nei leh tûrin a ṭanpui thei che u a ni. Tûn hmaa i thil tihsualte aṭangin inzir la, Jehova’n ṭha a tih ang apianga hman che inhuam rawh. Zâwlnei Jona chungchâng hi lo chhinchhiah ang che. Jehova thupêk anga Ninevi khuaa kal aiin, khaw dang daihah a tlânchhia a. Jehova zilh a tâwk a, a thil tihsual aṭangin a inzir a ni. (Jon. 1:1-4, 15-17; 2:7-10) Jehova chu Jona chungah a beidawng lo. Chuvângin, Ninevi khuaah chuan a tîr nawn leh a, tûn ṭumah chuan thuawih takin a kal vat a ni. A thil lo tihsual tawh avânga a inchhîrna chu Jehova mawhphurhna pêk hnâwl phah nân a hmang lo.—Jon. 3:1-3. w24.10 8-9 ¶10-11

Jehova’n kan bâte, a nih loh leh kan sualte chu a ngaidam mai ni lovin, a thai bo a ni. Bâ ngaihdam a ni kan tih hian, ba bu-a lian taka X inthai chu kan mitthlaah a rawn lang mai thei a. Mahse, leibat zât chu a la lang thei tho dâwn a. Chutih rualin, thai bo tih chuan awmze dang a nei a ni. He entîr nei ṭawngkam hre thiam tûr chuan, hmân laia lehkhatui an siam dân kan hriat phawt a ngai a. Lehkhatui chu meihawl, thing hnai ban leh, tui inchawhpawlh aṭanga siam a ni ṭhîn. Tu emaw chuan, nawhfê tihnâwngin lehkha ziak chu a nâwt reh thei a ni. Chuvângin, bâ “thai bo” a nih hian nawh reh hmak a ni a. A hmaa lehkha ziak chu hmuh theih a ni tawh lo. Chhinchhiahna chu a bo hmak a ni. Jehova’n kan sualte chu a ngaidam mai ni lovin, a thai bo hmak tih hriatna chuan rilru a va tihahdam tak êm!—Sâm 51:9. w25.02 10 ¶11

Mite’n dik lo taka min puh hunah emaw, ṭha lo taka min cheibâwl hunah emaw Jehova’n thu dik a hria tih kan ring thei a. Jehova’n dik takin ro a rêl ang tih hriatna chuan rorêl dik lohnate chu chhel taka tuar chhuak tûrin min ṭanpui thei a ni. Jehova kuta engkim kan nghat a nih chuan thinrim leh lungni lovin kan awm reng lo vang. Mi dangte chunga thinrimna pai rengna chuan thil ṭha lote min tihtîrin, hlimna min hlohtîr thei a, Jehova nêna kan inlaichînna pawh a tichhe thei bawk a ni. Isua chu famkim takin kan entawn thei lo ngei mai. Kan inchhîr lehna tûr thute sawiin thilte tih châng kan nei ṭhîn a. (Jak. 3:2) Chu bâkah, rorêl dik lohna kan tawh ṭhenkhat chuan rilru lamah leh taksa lamah ser reh thei lo a siam thei a ni. Chutiang dinhmuna i awm a nih chuan, Jehova’n a hriatpui che tih i ring nghet tlat thei a. Rorêl dik lohna lo tuar tawhtu Isua pawhin i rilru awm dânte chu a hriatthiampui che a ni. (Heb. 4:15, 16) Pathian Jehova chuan rorêl dik lohna hmachhawn thei tûra fuihna ṭangkai takte min pe bawk a ni. w24.11 6 ¶12-13

‘Chatuana nunna nei’ tûr chuan Isua chunga rinna lantîr a ngai a. (Joh. 3:16-18, 36; 17:3) Juda mi tam tak chuan Isua zirtîr “Pathian hna” thar chungchâng chu an pawm lo va. Isua hnênah: “Kan hmuha kan rin theih nân che eng thil mak nge i tih ang?” tiin an zâwt a. (Joh. 6:30, NWT) Chu bâkah, Mosia hun laia an pi leh pute khân nî tin chaw atân manna an dawn thu an sawi a ni. (Neh. 9:15; Sâm 78:24, 25) Chuvângin, chaw tak tak dawn chauh an ngaihtuah tih a chiang hle. Chu bâkah, nunna pe thei vâna mi manna anga sawi theih, “vâna chhang dik tak” chungchâng Isua’n a sawi khân, hre thiam tûra zawh fiah an tum lo. (Joh. 6:32) An tisa lam mamawhte chauh an ngaihtuah avângin, Isua’n an hnêna zirtîr a tum thlarau lam thutakte chu an hnâwl a ni. w24.12 5-6 ¶10-11

I fate’n school-a science subject an zir tam poh leh thil siamte thununtu dân a awm tih an hre chiang lehzual ang a. Entîr nân, thingkûng tam zâwk chuan pianzia inang an nei a. A kûng aṭangin a zâr pui a lo chhuak a, a zâr pui aṭangin a zâr tê; tichuan, a ṭangte a lo awm leh a. Chu chu fractals (pian hmang inang zêla awm) tiha koh a ni. Chûng pianziate chu thil siam dangahte pawh hmuh theih a ni a. Mahse, chûng pianzia mawi tak thununtu dân siamtu chu tu nge ni? I fate’n chûng zawhnate an ngaihtuah tam poh leh Pathianin engkim a siam tih rinna nghet tak an neih chhoh theih a rinawm. An rawn len deuh hnu chuan, “Pathianin min siam a nih chuan, kan hlim theihna tûrin nungchang lama kaihhruaina min pêk i ring em?” tiin i zâwt thei a. Tichuan, chûng kaihhruaina hlu takte chu Bible-a hmuh theih a ni tih i hrilh thei a ni. w24.12 16 ¶8

Jehova kaihhruainain Paula chuan kohhran hnênah sim duhna nei lo thil sual titu chu kohhran aṭanga chhuahtîr tûrin lehkha a thawn a. (1 Kor. 5:13) Kohhrana mite chuan ani chu engtin nge an cheibâwl ang? Paula chuan thil sual titu chu “pâwl lo tûrin” a hrilh a. Chutah chuan ‘a hnêna ei lo tûra’ thupêk pawh a tel tih a sawi a ni. (1 Kor. 5: 11) A sawi awmzia chu eng nge ni? Tu emaw nêna thil kan ei tlân hian awlsam takin kan inkâwm ṭan thei a. Chuvângin, chu mi chu kâwm lo tûrin Paula’n a hrilh tih a chiang hle. Chutianga an kawm lohna chuan kohhran chu a thununna ṭha lo lak ata a vênghim dâwn a. (1 Kor. 5:5-7) Chu bâkah, thil sual titu chu Jehova chungah sual lian tak a ti tih inhria a, inchhîr a, sim tûrin a chêttîr thei a ni. w24.08 15 ¶4-5

Israel ramah chuan Inthawina Nî chu kum tin neih a ni ṭhîn a. Chumi nî chuan puithiam lalin mipuite sual thawi nân ran a hlân a. Mahse, ramsate chu mihringte aia an hnuaihnun zâwk avângin ran hmanga inthawina chuan tu sual mah a la bo hlen thei lo. Mahse, Israel mi inlamlêtte’n Jehova phût anga hâlral thilhlan an hlan chhûng chu, an sualte a ngaihdamsak a ni. (Heb. 10:1-4) Chu bâkah, chu ruahmanna leh sual inthawi ziahna chuan Israelte rilruah sual nei an nihzia leh sual tlenfai pumhlûmna an mamawhzia a hriatchhuahtîr ṭhîn a ni. Jehova chuan kan sual ngaihdam hlen a nih theihna tûrin ruahmanna a siam a. A fapa duhtak chu “mi tam tak sualte kalpui tûra vawi khat hlana awm” tûrin ruahmanna a siam a. (Heb. 9:28) Tichuan, Isua chuan ‘mi tam tak tlan nân a nun’ a pe a ni.—Mt. 20:28, NWT. w25.02 4 ¶9-10

“Thlarau zawngin a peih ngei mai; nimahsela, tisa erawh a chak lo a ni.” (Mt. 26:41b) Chûng a thusawite aṭang chuan, Isua’n ṭha famkim lo kan ni a, thil kan tisual thei tih a hriatthiamzia a târ lang a ni. Mahse, a thusawiah chuan a lutuka inrintâwkna laka fîmkhur tûra vaukhânna pawh a tel a. Chumi zâna chûng thute a sawi hma lawkin, a zirtîrte chuan an Pu an kal bosan loh tûr thu inring tâwk takin an sawi a ni. (Mt. 26:35) Rilru puthmang ṭha tak an nei ngei a. Mahse, nêksâwrna hnuaia awlsam taka an chak loh theih dân an hre lo. Chuvângin, Isua chuan vawiin ni chânga thu hian a vaukhân a ni. Lungchhiatthlâk takin, zirtîrte chu inring rengin an awm lo va. Isua man a nih khân, a bulah an awm tlat nge ni a, hlauh avângin an tlân chhiatsan zâwk? Inring renga an awm loh avângin, zirtîrte chuan an sawi ang lo takin Isua chu an thlahthlam ta a ni.—Mt. 26:56. w24.07 14 ¶1-2

Evi leh Adama chuan an Pa Jehova nêna an inlaichînna hlu tak chu an chân bâkah, thil an tihsual hma chuan anni chu Pathian chhûngkaw zînga mi an ni a. (Lk. 3:38) Mahse, fate an neih hmaa Pathian Jehova thu an âwih loh khân a chhûngkua aṭanga hnawhchhuah an ni a. (Gen. 3:23, 24; 4:1) Chuvângin, an thlahte kan nih angin Jehova nêna inremna siam kan mamawh a ni. (Rom 5:11) Thu danga sawi chuan, amah nêna inlaichînna ṭha kan siam a ngai a. Hrilhfiahna pakhat sawi dân chuan, heta Grik thu mal “inremna” tih hian “hmêlma tu emaw ṭhiana siamna” tih a kâwk a. Thil lâwmawm tak chu, chutiang a nih theih nân Jehova’n hma a la hmasa a ni. Engtin nge? Sual thawina chu Jehova’n amah leh sual fate inkâra inlaichînna ṭha a awm theih nâna a ruahmanna siam a ni a. Chutah chuan hlutna intluk thil pahnih inthlengna a tel a ni. Chutiang chuan thil hloh tawh emaw, tihchhiat tawh emaw chu neih leh theih emaw, siamṭhat leh theih emaw a ni. w25.02 3-4 ¶7-8

Tirhkoh Paula chuan “mi tam takin an hrem chu a tâwk tawh,” tih a sawi a.” (2 Kor. 2:5-8) A awmzia chu tûn hmaa thil sual titu chuan kohhran aṭanga chhuahtîr a nih hnuah sim a ngai tih a rawn hre thiam a. (1 Kor. 5:1) Chuvângin, a sim hnuah chuan hrem chhunzawm a ngai tawh lo tihna a ni. (Heb. 12:11) Paula chuan kohhran hnênah thil sual titu chu ‘ngaidam a, thlamuan tûr’ leh ‘amah an hmangaihna chu tinghet tûrin’ a hrilh a. Jehova mite zînga lâk luh leh mai aia tam ti tûrin a duh tih chhinchhiah ang che. Paula chuan ani chu an ngaidamin, an hmangaih tih an thusawi leh thiltihte hmanga lantîr tûrin a duh a. Chutianga tihna hmangin, kohhrana a lo kîr leh avânga an lâwmzia chu an lantîr thei dâwn a ni. w24.08 15 ¶4; 16-17 ¶6-8

Tirhkoh Paula chuan tuar chhuak thei tûra an mamawh chu rinnghehna nei takin a hrilh thei a. Fiahna an tawh hunah mahni inrinchhan lo va, Jehova rinchhan tûrin a hriat nawntîr a. Ani chuan: “Lalpa chu mi ṭanpuitu a ni, ka hlau lo vang,” tiin huaisen takin a sawi thei a ni (Heb. 13:6) Kan unau ṭhenkhatte chuan tihduhdahna an tâwk mêk a. An tâna ṭawngṭaisak a, a theih huna ṭanpuina ṭangkai tak pêkna hmangin rinawm takin kan thlâwp thei a ni. Chutih rualin, Bible chuan “tu pawh Krista Isuaa Pathian ngaihsaka awm tum apiang chuan tihduhdahnate an tuar bawk ang,” tiin chiang takin a sawi a. (2 Tim. 3:12) Chuvângin, kan zavai hian hun khirh tak lo thleng tûr atâna kan inbuatsaih a ngai a. Jehova chu rinchhan chhunzawm zêlin, fiahna eng pawh tuar chhuak tûrin min ṭanpui ang tih i ring nghet tlat ang u. Ani chuan a hun tiamah, amah betu rinawm zawng zawngte chu chawlh hahdamna a pe dâwn a ni.—2 Thes. 1:7, 8. w24.09 13 ¶17-18

Korinth khuaa mite chu baptisma chang tûrin engin nge ṭanpui? (2 Kor. 10:4, 5) Pathian Thu leh a thlarau thianghlim thiltithei tak chuan an nuna inthlâk danglamna lian tak siam tûrin a ṭanpui a. (Heb. 4:12) Krista chungchânga chanchin ṭha pawmtu chûng Korinth khaw mite chuan zu ruih te, rûk rûk te leh, mawngkawhurnate ang chi chîn dân ṭha lote chu an paih bo thei a ni. (1 Kor. 6:9-11) Korinth khuaa mite chu baptisma chang tûrin engin nge ṭanpui? (2 Kor. 10:4, 5) Pathian Thu leh a thlarau thianghlim thiltithei tak chuan an nuna inthlâk danglamna lian tak siam tûrin a ṭanpui a. (Heb. 4:12) Krista chungchânga chanchin ṭha pawmtu chûng Korinth khaw mite chuan zu ruih te, rûk rûk te leh, mawngkawhurnate ang chi chîn dân ṭha lote chu an paih bo thei a ni. w25.03 6 ¶15-17

Jehova chuan kan thu tlûkna siamin amah a tihlâwm dâwn leh dâwn loh hre thiam tûrin finna pêk min tiam a. Chutiang finna chu ‘mi zawng zawng hnênah hau lo leh ui lovin a pe’ a ni. Jehova hnêna kaihhruaina dîla i ṭawngṭai tawh chuan, chhânna a pêk dân che chu ngaihven ang che. Entîr nân: khawi emaw i zinnaa kawng i bo a nih chuan, tualchhûng mi tu emaw hnênah ṭanpuina i dîl ngei ang a. Mahse, kawng a kawhhmuh hma chein i kalsan mai ang em? Kalsan mai lo vang. Kal dân tûr a hrilh che chu ṭha takin i ngaithla dâwn a ni. Chutiang bawkin, Jehova hnêna finna i dîl hnuah, i dinhmun nêna inkûngkaih Bible dânte leh thu bulte chu zawngin, a chhânna hriat tum ang che. Entîr nân, intihhlimnaa i tel dâwn leh dâwn loh chungchânga thu tlûkna i siam hunah, zu hmun hlimna, ṭhian sualte leh, i mi mal duh dân aia Lalram dah hmasak a pawimawhna chungchânga Bible sawite chu i ngaihtuah thei a ni.—Mt. 6:33; Rom 13:13; 1 Kor. 15:33. w25.01 16 ¶6-7

Isaia hrilh lâwkna chuan thlarau lam paradis chhûnga awmte leh awm lote nun danglamna chu chiang takin a târ lang a. Jehova chuan amah betute chu an thlarau lam mamawhte hnianghnâr takin a pe a. A thlarau thianghlim, a Thu ziak leh, thlarau lam chaw tam tak kan dawn avângin kan ‘eiin, kan inin, kan hlim’ thei a ni. (Thu Puan 22:17 nên khaikhin rawh.) Chumi nêna inkalh takin, thlarau lam paradis chhûnga awm ve lote chu ‘ril ṭam, tui hâl leh, zakin,’ an awm a. An thlarau lam mamawhte chu phuhhrûksak an ni lo a ni. (Amos. 8:11) Jehova chuan a mite chu thlarau lam chaw pawh telin, an mamawhte chu phal takin a pe a. (Joel. 2:21-24) Ani chuan Bible leh Bible ṭanchhan kan thu leh hla chhuahte, kan website-te, inkhâwmte leh, inkhâwmpuite hmangin kan mamawhte chu min pe a. Chûng thlarau lam chawte chu nî tina kan ei theih avângin hrisêl tak leh harhvâng takin kan awm a ni. w24.04 21 ¶5-6

Tu emaw chu ngaihzâwng atân i duh a nih chuan, amah nêna vântlâng hmuna inhmu tûrin ruahmanna i siam thei a, a nih loh leh phone hmangin i be thei a ni. I rilru put hmang chu tlang takin hrilh ang che. (1 Kor. 14:9) A ṭûl chuan inngaihtuah nân hun pe la. (Thuf. 15:28) Inlaichînna neihpui che a duh lo a nih chuan a duh dân chu zahsak ang che. Tu emawin a ngaihven che tih hrilh ta che se la, engtin nge ni ang? Chutianga ti tûr chuan huaisenna a neih a ngai ngei ang; chuvângin, ngilnei tak leh zahthiam takin chhâng lêt ang che. Inngaihtuah nân hun i mamawh a nih chuan ani chu hrilh la; mahse, a rang thei ang bera chhânna pêk tum ang che. (Thuf. 13:12) I ngaizâwng thei lo a nih chuan ngilnei tak leh tlang takin hriattîr ang che. Inlaichînna neihpui i duh chuan i rilru put hmang chu hrilh la, a lak aṭanga i beiseite chu sawipui ang che. In thil beiseite chu a inang lo thei a ni. w24.05 23-24 ¶12-13

A hnuah tleirâwl a la nih lai thovin, Davida chuan Israel mite sipai riahhmun a va tlawh a. Philistia mi hrawl tak, Goliatha an tih chu ‘Israel sipaite cho va’ a lo chhuah avângin anni chuan an hlau hle tih a hmu a ni. (1 Sam. 17:10, 11) Chûng sipaite chuan Goliatha hrawl dân leh a thusawi an hriatte an ngaihven tlat avângin an hlau hle a. (1 Sam. 17:24, 25) Mahse, Davida thlîr dân leh chûng sipaite thlîr dân chu a inang lo hle. Ani chuan chûng thilthlengte chu Israel sipaite chona anga thlîr lovin, ‘Pathian nung sipaite’ chona angin a thlîr a ni. (1 Sam. 17:26) Davida chuan Jehova chu a rilruah a dah hmasa ber a. Chu dinhmunah pawh berâm a vên laia amah ṭanpuitu Jehova chuan a ṭanpui leh ang tih a ring tlat a ni. Ani chuan Pathian rinchhan tlat chungin Goliatha chu a bei a, a hneh ta rêng a!—1 Sam. 17:45-51. w24.06 21 ¶7

Jehova rawng kan bâwl loh avânga kan nun awm dân tûr chu han mitthla teh. Chutianga tihna chuan rinawm taka awm tûr leh fakna hla phuahtu angin: “Kei atân erawh zawng Pathian hnaih hi a ṭha a ni,” tia thu tâwp siam tûrin min ṭanpui ang. (Sâm 73:28) He ni hnuhnûng chhûng hian “Pathian nung leh dik tak” rawng kan bâwl avângin fiahna eng pawh chhel takin kan hmachhawn thei a. (1 Thes. 1:9) Kan Pathian chu amah betute ṭanpuitu mi tak tak a ni. Hmân laia a chhiahhlawhte a awmpui angin, tûn laiah pawh min awmpui ang. He leia la awm ngai lo hrehawm nasa tak kan hmachhawn thuai dâwn a. Mahse, mahni chauhvin kan hmachawn lo vang. (Is. 41:10) Chuvângin, “Huai takin, Lalpa chu mi ṭanpuitu a ni, ka hlau lo vang,” tiin i sawi ṭheuh vang u.—Heb. 13:5, 6. w24.06 25 ¶17-18

Bible chuan Israel lal 40 aia tam chungchâng a târ lang a. An zînga ṭhenkhatte thiltih chu dik takin a târ lang bawk a ni. Entir nân, lal ṭha ṭhenkhatte pawhin thil ṭha lo an ti a. Lal ṭha Davida chungchâng hi lo ngaihtuah ta ila, a chungchângah Jehova chuan: “Ka chhiahhlawh Davida . . . zawngin ka thupêkte a pawm a, ka mit hmuha thil ṭha chauh tih tumin a thinlung zawng zawngin mi zui ṭhîn,” tiin a sawi a. (1 Lal. 14:8) Mahse, ani chuan mi nupui a uire bâkah, a pasal chu indonaa tihlum tûrin a phiarru bawk a ni. (2 Sam. 11:4, 14, 15) Kawng leh lamah chuan, lal rinawm lo tam takte pawhin thil ṭha ṭhenkhat an ti a. Rehoboama chungchâng hi han ngaihtuah teh. Jehova mithmuhah “thil ṭha lo” a ti a. (2 Chro. 12:14) Mahse, ani chuan Pathian thu zâwmin, hnam sâwmte chu a lalram aṭangin an inlâk hran a phal a. Chu bâkah, khuate chu din nghetin a mite tân thil ṭha a ti bawk a ni. (1 Lal. 12:21-24; 2 Chro. 11:5-12) Eng ṭanchhanin nge Jehova’n lal tu emaw chu a mithmuha rinawm tak nia a thlîr? Dik tak chuan, a thinlung te, a inchhîrna te leh, biakna dik a belh tlatnate chu a en a ni. w24.07 20 ¶1-3

Kum tling lo Baptisma chang tawh Kristianin sual pawi tak ti ta se, engtin nge ni ang? Upate chuan amah leh a Kristian nu leh pate chu kâwm tûrin upa pahnih an ruat ang. Tichuan, upate chuan chu ṭhalaiin inchhîrna a neih theihna tûra ṭanpui nâna hma an lâk tawh dânte chu an zâwt ang a. A nu leh pate thu âwiha a insiam ṭha a nih chuan, upate chuan hma lâk zawm zêl ngai tawh lo niin an rêl thlu thei a. Pathianin nu leh pate chu hmangaihna nei taka an fate zilhhau tûrin mawhphurhna a pe tih an hriat vâng a ni. (Deut. 6:6, 7; Thuf. 6:20; 22:6; Eph. 6:2-4) Chuti chung chuan, chu ṭhalai chuan a mamawh ṭanpuina a dawn leh dawn loh hre tûrin nu leh pate chu a khât tâwkin an bia ang. Mahse, baptisma chang tawh kum tlinglo chuan sim duhna nei lo ta se, engtin nge ni ang? Chutiang hunah chuan, kohhran upa committee chuan amah leh a nu leh pate, a nih loh leh amah enkawltu chu an kâwm ang. w24.08 24 ¶18

Kan zavaiin thilpêk kan dawn hian kan hlim a. Chutih rualin, a petu kan nih hian kan hlim lehzual a ni. Chutianga awm tûra Jehova’n min siam chu thil ṭha tak a ni. Chutianga Jehova’n min siam avâng chuan kan hlimna chu kan tipung thei a. Thil pêk theihna tûr hun remchângte zawngin chutiang chuan kan ti thei a ni. Chu chu Jehova min siam dân kawng ropui tak a ni lâwm ni? (Sâm 139:14) Bible chuan thil pêknain hlimna min thlen tih min tiam avângin Jehova chu “Pathian hlim” tia a ko hi thil mak a ni lo. (1 Tim. 1:10, 11, NWT) Ani chu mi dangte hnêna thil Pe hmasa bertu leh pe nasa bertu a ni a. Tirhkoh Paula sawi angin, “amah avângin kan nung, kan che, kan awm a ni si a.” (Tirh. 17:28) Dik takin, “thilpêk ṭha leh thilpêk famkim zawng zawng chu” Jehova hnên aṭanga lo chhuak a ni. (Jak. 1:17) Kan zavai hian thil pêkna aṭanga lo awm hlimna chu nasa lehzuala neih kan duh ngei ang a. Jehova thilphalna entawnin chutiang chuan kan ti thei a ni.—Eph. 5:1. w24.09 26 ¶1-4

Upa ni tûra tlin ngai miziate an ngaihtuah hian, kohhranho rawngbâwltu ṭhenkhat chuan tlin thei ngai lo tûrin an inhre mai thei. Mahse, Jehova leh a inawpna pâwlin chûng miziate chu famkim taka lantîr tûrin an beisei lo che tih hre reng ang che. (1 Pet. 2:21) Chûng miziate nei chho tûra ṭanpuitu che chu Pathian thlarau thianghlim thiltithei tak a ni. (Phil. 2:13) I miziaah hmasâwn duhna lai i nei em? Chumi chungchâng chu zir chiangin Jehova hnênah ṭawngṭai la. Upa tu emaw hnên aṭangin i hmasâwn theih dân tûr thurâwnte la ang che. Hma la rawh! Jehova hnênah a rawng i bâwlna leh kohhran rawng i bâwlnaa mi ṭangkai lehzual ni tûra zirtîra, kaihruai tûr chein a ṭanpuina dîl ang che. (Is. 64:8) Upa ni tûra ṭan i lâknaah Jehova’n nasa takin malsâwm che rawh se. w24.11 25 ¶17-18

Pathian rawngbâwlnaah kum tam tak kan inhman tawh avâng maiin Jehova zahngaihna dawng tlâk niin kan inngai tûr a ni lo. Jehova’n rinawm taka a rawng kan bâwlna chu a ngaihlu teh meuh mai. Mahse, tlanna chu a tâna kan thil tih tawhte vâng ni lovin a thlâwna min pêk a ni. Chuvângin, a zahngaihna chu kan hlawh chhuah nia kan hria emaw, dawng tlâk nia inhriatna kan nei emaw a nih chuan tlanna chu a lo thlâwn anga ngai kan ni dâwn a ni. (Galatia 2:21 nên khaikhin rawh) Tirhkoh Paula chuan Pathian duhsakna chu a hlawh chhuak thei lo tih a hria a ni. A nih leh, engvângin nge Pathian rawngbâwlnaah rim taka a thawh? Pathian khawngaihna dawng tlâk a nihzia lantîr tûr ni lovin, chumi avânga a lâwmzia lantîr tûr zâwkin a ni. (Eph. 3:7) Paula angin, Jehova zahngaihna hlawh chhuak tûr ni lovin, chumi avânga kan lâwmzia lantîr tûr zâwkin ṭhahnemngai takin a rawng kan bâwl chhunzawm zêl a ni. w25.01 27 ¶5-6