May

A mite chu Aigupta bâwih aṭanga an zalen hnuah Jehova chuan biak bûka rawngbâwl tûrin puithiamte a ruat a. Levi-hote chu biak bûk nêna inkûngkaih rawngbâwlna dang thawk tûra ruat an ni. Ani chuan biak bûka rawngbâwltute, a nih loh leh biak bûk hnaiha rawngbâwltute chu mi dangte aiin a ngaihsak bîk em? Ngaihsak bîk lo ve! Ani chuan duhsak bîk a nei lo. Biak bûka rawngbâwltute emaw, a bul hnaia rawngbâwltute emaw pawh ni se, Israel mi tu pawhin Jehova ṭhian nih theihna hun remchâng an nei ṭheuh va. Entîr nân, Pathianin chu hnam pumpui chu biak bûk chunga mak tak maia chhûm lo ding ṭhîn leh mei lo awm ṭhîn chu a hmuhtîr a. (Ex. 40:38) Chu chhûm ding a insawn chuan biak bûk aṭanga hla taka awmte pawhin an hmu thei a; chuvângin, an thil neihte chu la khâwmin, an puan inte chu an hlîp a, an hnampuite rualin an chhuak ṭhîn a ni. (Num. 9:15-23) Chutiang bawkin, tûn laiah pawh khawvêl khawi hmunah pawh awm mah ila, Jehova hmangaihnate, ngaihsaknate leh, vênhimnate chu kan dawng thei a ni. w24.06 4 ¶10-12

Davida nun chu dinhmun hlauhawm takah a awm a. A fapa Absaloma chuan a lalram chu chhuhsak a tum a. (2 Sam. 15:12, 13) Ani chu Jerusalem aṭanga a tlân chhuah vat a ngai ta! Chûng chhiahhlawhte chu Davida rualin an tlân chhuak a; mahse, Davida chuan Absaloma ruahmanna siamte a hnêna hriattîrtu tûr mi ṭhenkhat Jerusalema an châmbân a ngai tih a hre chhuak a. Chuvângin, Zadoka leh mi dangte chu enthlatu anga a rawngbâwl tûrin khawpuiah kîrtîr leh an ni. (2 Sam. 15:27-29) Anni chu fîmkhur taka an awm a ngai ngei ang. Davida chuan Zadoka leh a ṭhian rinawm dang, Husaia telna ruahmanna pakhat a ngaihtuah chhuak a. (2 Sam. 15:32-37) Chu ruahmanna ang chuan Husaia chu Absaloma mi rin tak a rawn ni a, râldona atân thurâwn a pe ṭhîn a, chu chuan Davida tân tlân chhuahna hun a siamsak ṭhîn a ni. A thurâwn pêk chu Absaloma’n a pawm hnuah, Husaia chuan Zadoka leh Abiathara a hriattîr a. (2 Sam. 17:8-16) Anni chuan chu thuchah chu Davida hnênah an thawn ṭhîn a ni.—2 Sam. 17:21, 22. w24.07 4-5 ¶9-10

Jehova chhiahhlawh ṭhenkhat chu an baptisma chan hma, a nih loh leh chan hnua an thil tihsualte avângin, rilru hrehawm takin an awm a. Mahse, Pathian Jehova’n min hmangaih êm avângin tlanna a pe tih chu kan hre reng tûr a ni. Chuvângin, a thilpêk chu pawm tûrin min duh tih a chiang a. Jehova chuan amah nêna ‘kan ngaihtuah tlân’ hnuah chuan kan sualnate chu a hre reng tawh lo tih min tiam a ni. Jehova’n tûn hmaa kan thil tihsualte a chhinchhiah reng lo chu hmangaihna a va ni tak êm! Chutih rualin, kan thiltih ṭhatte chu a theihnghilh ngai lo a ni. (Sâm 103:9, 12; Heb. 6:10) Tûn hmaa i thil tihsualin i rilru a la tihrehawm reng a nih chuan, hun kal tawh ni lovin, tûn hun leh hma lam hun chu theih tâwp chhuaha ngaihven tum tlat zâwk ang che. Hun kal tawh chu i thlâk danglam thei lo va. Mahse, tûna i dinhmun aṭangin Jehova i chawimawi thei a, hma lam hun atâna a thutiam ropui takte chu i thlîr tlat thei a ni. w24.10 8 ¶8-9

Bible i chhiar a, a kaihhruainate nunpui dân tûr kawng i zawn hian tih tûr tam tak nei angin i inhre thei a. He entîrna hi han ngaihtuah teh: Vawiina i Bible chhiarah thlei bîk neihna chungchânga vaukhânna a tel a. (Jak. 2:1-8) Mi dangte i cheibâwl dân chungchângah hma i sâwn theih dân tûr i hmu a ni. Chutianga tih chu i tum ta a. Tichuan, a tûkah kan thusawia kan fîmkhur a pawimawhzia târ langtu Bible châng i chhiar a. (Jak. 3:1-12) A chângin mi dangte tilunghnual thei thu i sawi ṭhîn tih i hre chhuak ta a. Chuvângin, a ṭha zâwng leh mi dangte tichak zâwnga thusawi tam lehzual chu i tum ta a ni. Tichuan, a tûk leha i Bible chhiarah chuan khawvêl ṭhian ni lo tûra vaukhânna a tel a. (Jak. 4:4-12) Intihhlimna thlan dân chungchângah i fîmkhur a ngai tih chu i hre leh a. A ni linaah chuan i tih tûr zawng zawngte ngaihtuahin i huphurh hle pawh a ni thei a ni. Lunghnual mai lo la. Chutih rualin, ‘mihring thara’ inthuam chu thil tihchhunzawm zêl tûr a ni tih hre reng ang che. w24.09 5-6 ¶11-12

Isua chuan Jehova thil thlîr dân chu a pawimawh ber tih a hria a. A thil hmachhawnte chu Jehova’n a hriatpui tih a hre bawk. A hun takah a chinfelsak dâwn tih a ring tlat a ni. Dik lo taka cheibâwl kan nih huna kan thusawiahte fîmkhurin Isua kan entawn thei a. Thil fel lo ṭhenkhat chu ho têa ngaiin kan en liam mai pawh a ni thei a. Kan thusawite avânga dinhmun a so sân loh nân, ngawih kan chuh pawh a ni thei. (Thur. 3:7; Jak. 1:19, 20) Mahse, dinhmun dangah chuan, dik lo taka cheibâwlna tâwktu humhim nân leh thutak humhim nân kan ṭawng chhuah a ngai thei a. (Tirh. 6:1, 2) Chutianga kan ṭawng chhuak a nih pawhin, dam tak leh zah thiam tak nih kan tum tûr a ni. Keini pawhin “fel taka ngaihtuah ṭhîntua” chu rinchhanin Isua kan entawn thei a ni.—1 Pet. 2:23. w24.11 5-6 ¶10-12

Thil sual titu a sim hian kan lâwm hle! (Lk. 15:7, 10) Chumi avâng chuan tu nge kan chawimawi ang? Upate em ni? Thil sual titute chungchânga Paula’n: “Pathianin an rilru a lamlêttîr,” tia a sawi chu hre reng ang che. (2 Tim. 2:25, C.L. Re-edited.) Chuvângin, thil sual tituin a ngaihtuah dân leh a thiltihte thlâk danglam tûra ṭanpuitu chu mihringte ni lovin Jehova a ni. A simnain rah chhuah ṭha a neih theihte chu Paula’n a târ lang a: Thutak hriatna dik tak a rawn nei lehzual ang a, thilte chu dik taka thlîr thiamin Setana thang aṭangin a tâl chhuak thei dâwn a ni. (2 Tim. 2:26) Thil sual tituin simna a lantîr hnuah pawh, Setana thlêmna dova felna kawng a zawh zawm zêl theih nân committee chuan berâm tlawhna a ruahmansak ang.—Heb. 12:12, 13. w24.08 23 ¶14-15

Isua hrai mipuite chuan an tisa lam mamawhte leh duh zâwngte phuhrûk chauh an ngaihtuah a ni. Engtin nge? A tûkah Isua leh a tirhkohte chu an awm tawh lo tih an hria a. Tichuan, Tiberia aṭanga lo thleng lawngahte chuangin, Isua zawng tûrin Kapernaum lam an pan ta a ni. (Joh. 6:22-24) Chutianga an tih chhan ber chu Pathian Ram chungchâng hriat belh an duh vâng a ni em? Ni lo. An tisa lam mamawhte phuhrûk an duh vâng a ni ber a ni. Chu chu engtin nge kan hriat? Mipuite’n Kapernaum khaw bula Isua an va hmuh laia thilthleng hi lo ngaihtuah ta ila. An ngaih pawimawh ber chu an tisa lam mamawhte phuhrûk a nih thu Isua’n tlang takin a sawi a. Mipuite chuan ‘chhangpêr chu puar takin ei’ mah se, chu chhangpêr chu “chaw chhe thei” a nih thu a sawi a ni. Chuvângin, mipuite chu “chatuan nun neih theihna chaw” zawng zâwk tûrin a fuih a. (Joh. 6:27) Chu chaw chu mite hnêna a Pain a pêk tûr thu a sawi a ni. w24.12 5 ¶8-9

Zirtîrtu thiam lehzual ni tûr chuan vântlâng hmaa i thusawite leh mi dangte thurâwn i pêkte chuan Pathian Thu a ṭanchhan tûr a ni a. Chutianga ti thei tûr chuan Bible leh Bible ṭanchhan kan thu leh hla chhuahte ngun taka i zir chian a ngai a ni. (Thuf. 15:28) Chutianga i zir hunah Bible thute dik taka i hman ṭangkai theih dân chu hriat tum la. Chu bâkah, i zirtîr hunah ngaithlatute thinlung thlen tum ang che. Thiltawn ngah upate hnên aṭanga thurâwnte la a, nunpuina hmangin zirtîrtu thiam lehzual i ni chho thei a ni. (1 Tim. 5:17) Upate chuan unaute chu ‘an fuih thei tûr’ a ni a; chutih rualin, zilhna an pêk, a nih loh leh ‘thiam loh an chantîr’ a ngaih châng a awm thei bawk. Mahse, eng dinhmun hnuaiah pawh upate chuan ngilnei takin an ti tûr a ni. Zaidam leh hmangaihna ngah tak i nih a, i zirtîrnate chuan Pathian Thu a ṭanchhan a nih chuan, Zirtîrtu Ropui Isua i entawn avângin zirtîrtu thiam tak i ni dâwn a ni.—Mt. 11:28-30; 2 Tim. 2:24. w24.11 24 ¶16

A chungchânga kan thusawite hmangin Jehova kan chawimawi. Jehova mite chu ‘amah chawimawia zai’ tûr te, “a hming fak” tûr te, “a chhandamna thu chu hriattîr” tûr te leh, “a thilmak tihte chu hril” tûrtea sâwm an ni a. Chûngte chu kan Pa vâna mi kan chawimawi theih dân kawngte a ni a. Kan thil hlu neihtein Jehova kan chawimawi thei bawk. Chutiang kawng chuan betu dikte chuan Pathian an chawimawi ṭhîn a. (Thuf. 3:9) Entîr nân, Israel mite chuan biak in sakna leh vawn ṭhatna atân thawhlâwmte an thawh a. (2 Lal. 12:4, 5; 1 Chro. 29:3-9) Zirtîrte chuan Krista leh a tirhkohte chu ‘an thil neihte’ hmangin rawng an bâwlsak a. (Lk. 8:1-3) Kum zabi khatna hun laia Kristiante pawhin an unaute tân chhawmdâwlnate an thawn bawk. (Tirh. 11:27-29) Tûn laiah pawh phal taka thawhlâwmte thawhin Pathian Jehova chu kan chawimawi ve thei a ni. w25.01 4 ¶8; 5 ¶11

Kornelia chu baptisma chang tûrin engin nge ṭanpui? ‘An chhûngkuain Pathian an ṭih,’ tih kan chhiar a. Pathian hnênah a ṭawngṭai fo ṭhîn bawk a ni. (Tirh. 10:2, NWT) Petera’n a hnêna chanchin ṭha a hrilh khân an chhûngkuain an pawm a, baptisma an chang nghâl a ni. (Tirh. 10:48) Kornelia chuan a chhûngte ruala Jehova be tûrin eng inthlâk danglamna pawh siam a inhuam tih a chiang hle. (Jos. 24:15; Tirh. 10:24, 33) Kornelia chuan a nihna chelh chu Kristian a nihna tûr a indâltîr thei a. Mahse, a indâltîr lo. Thutak pawm tûrin i nunah inthlâk danglamna lian takte i siam a ngai em? A ngai a nih chuan Jehova’n a ṭanpui ang che. Bible thu bulte nêna inmila a rawngbâwl i tumna chu mal a sâwm dâwn a ni. w25.03 5 ¶12-13

Inawpna pâwl emaw, hmahruaitu unaute emaw chungchâng thu dik lo i hria a nih chuan Pathian hmêlmate’n kum zabi khatnaa Isua leh a hnungzuitute an cheibâwl dân kha hre reng ang che. Tûn laiah pawh, Jehova mite chu Bible-in a hrilh lâwk angin tihduhdah a, dik lo taka sawichhiat an ni a. (Mt. 5:11, 12) Chanchin dik lote lo chhuahna hnâr kan hriat a, kan hnâwl vat a nih chuan chûngte hruai sualin kan awm lo vang. Eng nge kan tih ngai? Chanchin dik lote chu hnâwl rawh. Tirhkoh Paula chuan chanchin dik lote kan hriat huna chhân lêt dân tûr chungchângah kaihhruaina chiang tak min pe a. Ani chuan Timothea hnênah ‘mi ṭhenkhat chu thawnthu lam,’ a nih loh leh chanchin dik lote sawi bânsan tûra hrilh tûr leh “Pathian pawisa lo . . . thawnthu mai mai chu hnar” tûrin a hrilh a ni. (1 Tim. 1:3, 4, Mizo King James Bible) Keini pawhin chanchin dik lote chu a lo chhuahna hnâr kan hriat avângin kan hnâwl a. Thutak, “thu dik dân” chu kan vawng tlat a ni.—2 Tim. 1:13. w24.04 11 ¶16; 13 ¶17

Jehova chunga rinawmte nên inpumkhat tlat rawh. Pathian chuan amah kan biaknaa inpumkhat tûrin min duh a. Thutak kan vawn tlat chhûng chuan inpumkhatin kan awm thei ang. Thutak pênsantute chuan kohhrana inṭhen darhna an awmtîr avângin Pathianin anni chu “hawisan” tûrin min duh a. Chutianga kan tih loh chuan keimahni ngei pawhin thutak kan pênsan ve thei a ni. (Rom 16:17)) Thutak chu kan thliar hran theiha kan vawn ngheh tlat chuan, rinnaah kan nghet tlat ang. (Eph. 4:15, 16) Setana zirtîrna dik lo leh a bumna lak aṭanga humhim kan ni ang a, hrehawm nasa tak chhûngin Jehova ngaihsakna hnuaiah him takin kan awm reng ang. Chuvângin thutak chu vuan tlat rawh; tichuan, “thlamuanna Pathian chuan a awmpui ang che.”—Phil. 4:8, 9. w24.07 13 ¶16-17

Isua chuan an thiltih sualte avânga rilru hrehawm taka awmte chu a ngaihsak lehzualin, a hnungzuitute ni tûrin a sâwm a. Sual chu mihringte hrehawmna zawng zawng lo chhuahna bulpui a ni tih a hria a ni. Chuvângin, mite’n mi sual nia an hriatte chu a ṭanpui a. Entîrna pein: “Dam lote’n doctor an mamawh a, mi hrisêlte erawh chuan an mamawh lo,” tiin a sawi a. “Mi felte tâna lo kal ka ni lo va, mi sualte simtîr tûr zâwka lo kal ka ni,” tiin a sawi belh bawk. (Mt. 9:12, 13, NWT.) Chûng a thusawite mil chuan thil a ti a ni. A mittui nêna a kê hrutu hmeichhe sualna chu zahngaihna nei takin a ngaihdamsak a. (Lk. 7:37-50) Tuichhunchhuah bula a tawh Samari hmeichhia chu nungchang bawlhhlawh takin a nung tih hre mah se, thutak pawimawh tak a zirtîr a. (Joh. 4:7, 17-19, 25, 26) Chu bâkah, Pathianin Isua chu sual man, thihna hial pawh sût lêt tûrin thiltihtheihna a pe a ni. Engtin nge? Isua chuan a hmei a pa, a pui a pangte chu a kaitho a ni.—Mt. 11:5. w24.08 4 ¶9-10

Engtin nge Pathianin nakin lawkah a hming a chawimawi ang? A rorêlna hmangin a ni. A hming thianghlim tibawrhbângtu Babulon Khaw Ropui chu a tichhe thuai ang a. (Thup. 17:5, 16; 19:1, 2) Babulon Khaw Ropui tihchhiatna mita hmutu mi ṭhenkhat chu biakna dikah an rawn tel pawh a ni thei a ni. A tâwpah, Armageddon-ah Setana kalhmang zawng zawng chu tichhiain amah dodâltute leh a hming sawichhetute chu a tiboral ang. Chutih rualin, amah hmangaih a, a thu âwih a, chawimawi duhtu zawng zawngte chu a chhandam dâwn a ni. (Mk. 8:38; 2 Thes. 1:6-10) Krista Kum Sâng Rorêl tâwpa awm tûr fiahna hnuhnûng ber zawhah chuan Jehova’n a hming chu a tithianghlim pumhlûm tawh ang. (Thup. 20:7-10) Chutih hunah chuan “tuifinriat chu tuiin a khat vek angin LALPA ropuizia hriatnain lei hi a khat vek dâwn” a ni. (Hab. 2:14) Mi zawng zawngin Jehova an chawimawi hun tûr chu a va nghahhlelhawm tak êm! w25.01 7 ¶15-16

Engin nge Hebrai Kristiante chu chhel taka dodâlna hmachhawn tûra ṭanpui? Paula chuan an fiahna tawhte chungah thlîr dân dik an neih a ngai tih a hria a. Kristiante’n fiahna an hmachhawn hian Pathianin anmahni zirtîrna atân chûngte chu a hmang thei tih a hrilhfiah a ni. Chutiang zirtîrna chuan Kristian mize ṭhate nei chho va, vawng reng tûrin a ṭanpui a. Chûng fiahnate’n rah chhuah ṭha a neih tûrte ngaihven tlatna chuan Hebrai Kristiante chu chhel tûrin a ṭanpui dâwn a ni. (Heb. 12:11) Paula chuan Hebrai Kristiante chu beidawng lova fiahnate tuar chhuak tûrin a fuih a. Ani chu chumi chungchânga fuihna ṭha tak pe thei dinhmunah a ding a ni. Kristiante tiduhdahtu a lo nih ṭhin avângin an thil hmachhawn tûr chu a hria a. Tihduhdahna chhel taka tawrh chhuah dân pawh a hre bawk. Kristian a nih hnuah, amah ngei pawhin dodâlna chi hrang hrang a tâwk a ni.—2 Kor. 11:23-25. w24.09 12-13 ¶16-17

A ni têl hian, kan rawngbâwlna chu a hmanhmawhthlâk lehzual a ni. Engvângin nge? Hun a tam tawh loh vâng a ni. Marka 13:10-a chhinchhiah angin, Isua’n ni hnuhnûnga thu hrilh rawngbâwlna chungchâng a sawi lâwk kha han ngaihtuah teh. Matthaia ziakah, Isua’n “tâwpna” a lo thlen hmain chanchin ṭha chu khawvêl zawng zawngah hrilh a nih tûr thu a sawi a. (Mt. 24:14) Chu chu Setana khawvêl tâwp hlenna tûr sawina a ni. Jehova chuan lo thleng mai tûr tâwpna atân “a nî leh a hun” a ruat tawh a. (Mt. 24:36; Tirh. 1:7) Chumi nî chu nî tin hian kan hnaih tawlh tawlh a ni. (Rom 13:11) Chutih rualin, tâwpna a thlen hma loh chu thu kan hrilh zawm zêl a ngai a ni. Kan rawngbâwlna chungchâng kan ngaihtuah hian, zawhna pawimawh tak lo chhuak chu: Engvângin nge chanchin ṭha kan hril? A awlsam zâwnga sawi chuan, hmangaihnain thu hril tûra min chêttîr vâng a ni. Thu hrilh rawngbâwlnaa kan telna hian kan hmangaihna a târ lang a—chanchin ṭha kan ngainatna te, mite kan hmangaihna te leh, a pawimawh ber Jehova leh a hming kan hmangaihna te hi a ni. w24.05 14-15 ¶2-3

I fate chu thil siam chungchâng ngaihtuah tûrin fuih rawh. Lova in kal hunahte, huan in enkawl hunahte thil siamtea hmuh theih pianzia ngaihven awm takte chu hmuh ang che. Engvângin nge? Chûng pianziate chuan duangtu fing leh thiam tak a awm tih a finfiah vâng a ni. Entîr nân, scientist-te chuan thil siamtea awmze nei taka thil inzem kual dân pianzia (spiral) chu an lo zir chiang tawh a. Biophysicist Nicola Fameli-a chuan thil siam ṭhenkhata awmze nei taka thil inzem kual awm zât i chhiar chuan awmze nei takin a lian chho zêl tih i hmu ang tih a sawi a. Chu chu Fibonacci sequence tiha koh a ni. Chutiang pianzia chu galaxy ṭhenkhatah te, nautilus chêngkawl kâwrah te, hnahthelah te leh, nihawi pâr laimu-ahte hmuh theih a ni. w24.12 16 ¶7

Mosia, Davida leh, Johana te hun lai chu kan hun lai lakah danglam hle mah se, inanna tam tak kan nei a. Anmahni ang bawkin Pathian dik rawng kan bâwl a. A hnêna ṭawngṭaiin kan rinchhan a, a kaihhruaina kan zawng bawk. Chu bâkah, chûng mi rinawmte ang bawkin, Jehova’n a thuawihtute chu nasa takin mal a sâwm ṭhîn tih kan ring nghet tlat bawk a ni. Tichuan, kan thiltihna kawng engkimah kan hmuingîl ang a. Pathian thuawihna chu kan tân “dam reina” a ni a, chatuanin kan nung dâwn a ni. A thusawi zawng zawngte kan beisei leh rin phâk bâka ropuia thlen famkimtîrtu, hmangaihna ngah tak kan Pa vâna mi tihlâwmna aṭanga lo awm hlimna chu kan nei dâwn a ni.—Eph. 3:20. w24.11 13 ¶20-21

Kum zabi pakhatnaah khân, unaupa ṭhenkhat chu kohhranho rawngbâwltua ruat an ni a. (1 Tim. 3:8) Anni chu Paula’n “ṭanpui theihna thilpêkte” dawngtu nia a târ lante an nih a rinawm. Kohhranho rawngbâwltute chuan upate’n mi dangte zirtîrna leh berâm tlawhnate ṭha taka an neih theih nân a ṭûl ang apiang an lo ṭanpui ṭhîn a. Entîr nân, Pathian Lehkha Thu ziah chhâwnnaah te, a nih loh leh ziah chhâwn nâna mamawh hmanraw leinaah te an ṭanpui a rinawm a ni. In kohhrana kohhranho rawngbâwltute rawngbâwl dân ṭhenkhat hi han ngaihtuah teh. (1 Pet. 4:10) Kohhran sum, a nih loh leh rawngbâwlna bial enkawl tûr te, thuchhuahtute hnêna thu leh hla chhuahte thleng thei tûra chah tûr te, audio video hmanruate enkawl tûr te, attendant hna thawk tûr te leh, Kingdom Hall thawm ṭhatnaa ṭanpui tûrtea mawhphurhna pêk an ni thei. Hêng thiltih zawng zawngte hi kohhrana ruahmannate ṭha taka a kal tluan theih nâna thil pawimawh tak a ni.—1 Kor. 14:40. w24.10 19 ¶4-5

Jehova chu a nung tih leh min ṭanpui tûrin a inpeih reng tih kan hriat reng chuan kan harsatna tawh chu a lian emaw, a tê emaw pawh ni se kan tuar chhuak thei ang. A nihna takah chuan, ani chu Engkimtitheia a ni a, tuar chhuak tûra kan mamawh chakna min pe thei a ni. Chuvângin, kan harsatnate chu huaisen takin kan hmachhawn thei a. Harsatna tê tham zâwkte kan hmachhawn laia Jehova’n min ṭanpui tih kan hriatna chuan, harsatna lian zâwkte kan hmachhawn hunah pawh min ṭanpui ang tih rinnghehna min pe a ni. Davida thiltawn pahnihin Jehova chunga a rinna a tihngheh dân hi lo ngaihtuah ta ila. A tleirâwl laia a pa berâm a vên laiin savawm pakhat chuan berâm rual zînga pakhat chu a rawn la a; chutiang bâwkin, sakeibaknei pakhat pawhin a la bawk. Chûng dinhmunahte chuan Davida chuan huaisen takin chûng ramsate chu ûmin a bei a, berâmte chu a chhanchhuak a ni. Mahse, chu chu ama theihna angin a ngai lo. Ani chuan Jehova ṭanpuina vâng a ni tih a hria a ni. (1 Sam. 17:34 37) Chûng a thiltawnte chu a theihnghilh ngai lo va. Chûngte a chhût ngunna chuan nakin hunah pawh Pathian nung chuan a tichak zêl ang tih rinnghehna a neihtîr a ni. w24.06 21 ¶5-6

Intihhlimna pakhata tel tûra sâwm ni ta la, eng mah zâwt fiah hmasa lovin i tel mai ang em? A huaihawttu, a nih loh leh intihhlimna ruahman a nih dân chu i hre chiang lo a nih chuan, hêng zawhnate hi i zawh a ngai ang: “Intihhlimna chu khawiah nge neih a nih ang a, eng hunah nge ni ang? Mi eng zât nge tel ang? Tuin nge mawhphurhna la ang? Tute nge lo tel ve dâwn? Eng thiltihte nge tel dâwn? Zu lampang chi hlui a ni dâwn em?” tihte hi. Chûng zawhnate ngaihtuah lâwkna chuan thu tlûkna fing tak siam tûrin a ṭanpui ang che. Thil a nihna dik tak i hriat hnuah, thil awm dân tûr chu kim takin chhût ang che. Entîr nân, Bible thu bul zâwm lotute an tel ve dâwn, a nih loh leh zu lampang chite chu mawhphurhna latu tel lova hlui a ni dâwn tih hre ta la, engtin nge ni ang? Intihhlimna chu thunun theih lova awmin, zu hmun hlimnaah a chang thei ang em? (1 Pet. 4:3) Kimchang taka thil i hriat tawh chuan, thu tlûkna ṭha tak i siam thei tawh dâwn a ni. w25.01 15 ¶4-5

Jehova chuan tlanna ṭanchhana inlamlêtte sual a nuai reh dân ngaihlu tûra min ṭanpui tûrin entîr nei ṭawngkam dang a hmang a. Ani chuan chûng kan sualte chu silfai a, tlêngfai angin entîr neia târ lan a ni a. Thawmhnawa rawng sen a kai hian nuai reh a harsa êm êm a. Mahse, he entîr nei ṭawngkam hmang hian Jehova chuan kan sualna zawng zawng chu fai var khawpa tlenfai theih a ni tih min tiam a ni. sual chu “leibâ” nêna tehkhin a ni a. (Mt. 6:12, NWT; Lk. 11:4) Chuvângin, Jehova chunga thil kan tihsual apiang hian a laka ba neih belh zêl ang kan ni. Kan bat chu a va tam tak êm! Mahse, Jehova’n min ngaihdam hian kan bâ chu min ngaihdamsak ang a ni a. Rûl leh tûrin min phût lo. Jehova ngaihdamnain min chhâwk zângkhai dân entîrna ṭha tak a va ni êm! w25.02 9-10 ¶9-10

Nu leh pate chuan an upat hunah enkawl an mamawh thei ngei mai. An fate pawhin chutianga tih chu an inhuam a ni. (1 Tim. 5:4) Mahse, Kristian nu leh pate hlim nachhan ber chu sum leh pai lama anmahni ṭanpui thei tûra an fate an enkawl vâng ni lovin, Jehova rawngbâwltu rawn ni thei tûra an ṭanpui vâng zâwk a ni. (3 Joh. 4) I fate chu mahni kêa ding thei tûra i zirtîr rualin, i entawn tûr siam hmangin Jehova rinchhan tûrin zirtîr ang che. An naupan têt aṭangin thawh rim hlutna hre thiam tûrin zirtîr la. (Thuf. 29:21; Eph. 4:28) An rawn upat chhoh chuan, an school zirnaa theih tâwp chhuah tûrin ṭanpui ang che. Kristian nu leh pate chuan Bible thu bulte chu zir chianga nunpuiin, an fate’n an zir chhuahte chu fing taka an hman ṭangkai theih nân an ṭanpui thei a. Chu chuan an fate chu mahni kêa ding tûr leh rawngbâwlnaa tam lehzuala inhmang thei tûrin a ṭanpui ang. w25.03 30-31 ¶15-16

Isaia bung 65-ah Jehova’n zâwlnei Isaia hmangin, thlarau lam paradis-a chêngte nun awm dân tûr chu a târ lang a. Chu hrilh lâwkna thlen famkimna hmasa zâwk chu B.C.E. 537-a Juda mite Babulon sala an tânna aṭanga an kîr leh khân a ni. Chutih hun lai chuan, Juda inlamlêtte chu Babulon sal tânna aṭanga chhuah zalên niin anmahni ramah an kîr leh a. Jehova chuan a mite chu malsâwmin, Jerusalem chhe tawh tak chu tungding leh a, Israel rama biakna dik hmunpuia hman tûr biak in sa ṭha leh tûrin a ṭanpui a ni. (Is. 51:11; Zak. 8:3) Isaia hrilh lâwkna thlen famkimna pahnihna chu Babulon khaw ropui sal tânna aṭanga tûn laia Jehova betute chhuah zalen an nih kum, C.E. 1919-ah khân a inṭan a. A hnuah thlarau lam paradis chu khawvêl pumah a darh chho ta a ni. Lalram thuchah puangtu ṭhahnemngai takte chuan kohhran tam tak dinin, Kristian miziate an lantîr a. Tûn hmaa nun râwng tak leh nungchang bawlhhlawhnaa lo inhnamhnawih ṭhîn a hmei a pate chu ‘mihring thar, Pathian duh zâwng anga siam khân’ an awm tawh a ni. w24.04 20-21 ¶3-4

Ram ṭhenkhatah chuan nu leh pate emaw, puitling dang tu emaw ber chu kawppui nei lo an chhûngte tân kawppui tûr zawnsak tûra beisei an ni thei a. Ram dang lehah chuan an chhûngte, a nih loh leh an ṭhiante’n an kawppui tûrte chu zawnsakin an induh dâwn leh dâwn loh hriat nâna inhmu tûrin ruahmanna an siamsak ṭhîn bawk. Chutianga ti tûra beisei i nih chuan an pahnih duh dân leh mamawhte chu ngaihtuah ang che. A tâna kawppui tûr âwm mi i hmu a nih chuan, a miziate leh a bîk takin a thlarau lam dinhmunte chu a tam thei ang bera hriat tum ang che. Jehova nêna inlaichînna neih chu sum te, zirna te leh, khawtlânga nihnate aiin a pawimawh zâwk a ni. Chutih rualin, anmahni ngeiin an inneih dâwn leh dâwn loh chungchângah thu tlûkna an siam tûr a ni tih hre reng ang che. w24.05 23 ¶11

Kan sawi tûrte leh sawi loh tûrte thliar thiamin inngaizâwngte chu kan ṭanpui thei a. Insûm theihna kan neih a ngaih châng pawh a awm thei a ni. (Thuf. 12:18) Entîr nân, an inngaihzâwnna chungchâng chu mite hnêna hrilh kan châk hle thei a; mahse, anmahni ngeiin mi dangte hrilh chu an duh thei a ni. Anni chu kan rêlin an mi mal thil chungchângah kan sawisêl tûr a ni lo. (Thuf. 20:19; Rom 14:10; 1 Thes. 4:11) Chu bâkah, innei tûra nawr luih nia inhriatna neihtîr thei thute sawi emaw, zawhnate zawh emaw chu kan pumpelh tûr a ni. Inngaizâwngte an inṭhen a nih chuan engtin nge ni ang? Lo dîlchhût chiam emaw, ṭan lam lo neih emaw chu kan pumpelh tûr a ni. (1 Pet. 4:15) Inngaizâwngte an inṭhen hian an hlawhchham tihna a ni lo. Inngaihzâwnnain a tum chu inngaizâwngte’n thu tlûkna fing an siam hi a ni. Chutih rualin, inṭhenna chuan rilru na a neihtîr thei a. Chuvângin, anmahni ṭanpui theih dân kawng kan zawng thei a ni. w24.05 31 ¶15-16

Kan chhûngkaw zînga mi emaw, kan ṭhian ṭha takin emaw Jehova a kalsan hian, chu chu kan tân tawrh hrehawm tak a ni thei a. (Sâm 78:40) Kan hmangaih takte an nih avângin, chu chu kan tân pawm a harsa hle thei a ni. Chutiang thiltawn hrehawm tak i tawng a nih chuan rinawmna kawnga Zadoka entawn tûr siam chuan a tichak thei che a ni. A ṭhian ṭha tak Abiathara’n a rinawm lohsan hnuah pawh Zadoka chu Jehova chungah a la rinawm reng a. Chu chu Davida rorêl tâwp dawn lama thilthleng a ni. Davida chu a lo upat a, a thih dâwn hnaihah Pathian Jehova’n Solomona tâna a thutiam lal ṭhutthlêng chu a fapa Adonija chuan chuh a tum ta a. (1 Chro. 22:9, 10) Abiathara’n Adonija chu a thlâwp ta a ni. (1 Lal. 1:5-8) Chutianga Abiathara thiltih chu Davida chungah chauh ni lovin, Pathian Jehova chunga rinawm lohna pawh a ni! Zadoka chuan Abiathara nên kum sawmli aia tam puithiam niin rawng an lo bâwl dûn tawh a ni.—2 Sam. 8:17; 15:29; 19:11-14. w24.07 6 ¶14-15

Thlêmna laka invên tlat chu kan tâna thil ṭha ber a ni tih kan chiang thei a. Sual tihna chuan “rei lo tê atân sual nawmna” min pe thei mah se, Jehova tehnate nunpuina chuan hlimna nasa tak min pe thei a ni. (Heb. 11:25; Sâm 19:8) A chhan chu a kawngte mila nung tûra siam kan nih vâng a ni. (Gen. 1:27) Chutianga kan tih chuan chhia leh ṭha hriatna thiang tak neiin, chatuana nunna kan chang thei dâwn a ni. (1 Tim. 6:12; 2 Tim. 1:3; Jud. 20, 21) “Tisa erawh chu a chak lo a ni,” tih chu a dik ngei mai. (Mt. 26:41) Mahse, chu chu kan chak lohna chungchângah eng mah tih theih kan nei lo tihna a ni lo. Jehova chu kan mamawh chakna min pe tûrin a inpeih reng a. (2 Kor. 4:7) Mahse, kan chakna pângngai aia thiltithei zâwk Pathianin min pe tih hre reng ang che. Kan chakna pângngai, nî tina thlêmna laka theih tâwp chhuaha invên chu kan mawhphurhna a ni a. Kan tih tûr chin kan tih chuan, Jehova’n kan ṭawngṭainate chhângin, kan mamawh hunah chakna min pêk belh ang tih kan ring nghet tlat thei a ni. (1 Kor. 10:13) Ni e, Pathian Jehova ṭanpuinain thlêmna lakah kan invêng tlat thei a ni. w24.07 19 ¶19-21

Tirhkoh Paula chuan upa dang, Timothea hnênah thil sual titute chu vawiin ni chânga târ lang angin zilh tûrin a hrilh a. Eng a tihna nge? “Mi zawng zawng” a tih khân, kohhrana mi zawng zawngte a tihna a ni kher lo va. A thil sual tih chungchâng hriatpuitu mi tlêm tête a tihna mai a ni. Chûng mite chu mita hmutute, a nih loh leh a thil sual tih chungchânga a inpuanna te an ni thei a. Upate chuan chûng mite hnênah chauh chuan thil sual titu chu an kawm tawh thu an hrilh dâwn a ni. Dinhmun ṭhenkhatah chuan kohhrana mi tam takin a thiltih chu an hre tawh pawh a ni thei a, an hre thuai dâwn pawh a ni thei bawk. Chutiang dinhmunah chuan, “mi zawng zawng” tih chu kohhran pum sawina a ni thei a. Chuvângin, upate chuan kohhran pum hmaah chu unau chu zilh a ni tih an puang dâwn a ni. Engvângin nge? Paula chuan, “mi dangte pawhin an hlauh ve theih nân,” a nih loh leh suala an tlûk ve lohna tûra an fîmkhur theih nân tiin a sawi a ni. w24.08 23-24 ¶16-17

Tâwpna a lo thlen thlengin Jehova rawngbâwlnaah kan buai reng tûr a ni a. Hriak thihte’n an vân lam lâwmman dawng tûra Isua “lâk” ni thei tûr chuan inring renga an awm tlat a ngai a. (Mt. 24:40) Anni chuan vâna Isua hnêna ‘lâk khâwm’ an nih hun tûr chu an nghâkhlel êm êm a. Armageddon indona zawhah Berâm No nupui neihnaah Isua mo an ni dâwn a ni. (2 Thes. 2:1) Isua rorêl hun tûr chu a lo thleng thuai dâwn a. Mahse, kan hlauh a ngai lo. Rinawm taka kan awm tlat chuan “mihring Fapa hmaa ding tlâka ruat” kan nih theihna tûrin hmangaihna nei tak kan Pa vâna mi chuan ‘thiltihtheihna nasa tak’ min pe dâwn a ni. (2 Kor. 4:7; Lk. 21:36) Kan beiseina chu vân lam emaw, lei lam emaw pawh ni se, Isua tehkhin thu aṭanga vaukhânnate chu kan ngaihven a nih chuan kan Pa kan tilâwm ang a. Pathian Jehova khawngaihna nasa tak avângin kan hming chu nunna ‘lehkhabuah a chuang’ dâwn a ni.—Dan. 12:1; Thup. 3:5. w24.09 24-25 ¶19-20

Pathian Thu ṭanpuina hmangin chutiang rilru muanna chu kan nei ve thei a ni. Eng nge kan tih ngai? Pathian Jehova pawm hlawhna pawh tiamin, tûna i malsâwmna dawnte hlutna chu chhût ngun la; he khawvêlin lâwmman a pêk theihte chauh beiseitute dinhmun nên khaikhin ang che. Hma lam hun beiseina an neih loh avângin tûn huna an hlawhtlinnate chauh chu an rinchhan a ni thei a. Mahse, Jehova’n i mitthla theih aia ropui zâwk malsâwmnate pe tûr chein a tiam che a ni. (Sâm 145:16) Hei hi han ngaihtuah bawk teh: Duh thlanna dang lo siam teh rêng pawh ni i la, chumiin tûn thlenga kan nun a nghawng dân tûr chu chiang takin kan sawi thei em? Thil chiang tak chu: Pathian leh mite hmangaihna ṭanchhana thu tlûkna siamtute chuan thil ṭha eng mah an chân ngai lo tih hi a ni. w24.10 27 ¶12-13