April

Isua tisa leh thisen hlâwkpui tûr chuan tlanna chunga rinna kan lantîr a ngai a. (Eph. 1:7) “Berâm dang” tia a sawite chuan, kum tina neih ṭhin Lalpa Zanriah inkhâwmnaah chhang leh uain chu an eiin an in lo va, an eiin an in tûr a ni lo bawk. (Joh. 10:16) Mahse, anni chuan a inthawina hlutna chungah rinna lantîrin Isua tisa leh thisen chu an hlâwkpui a ni. (Joh. 6:53) Chutiang ang lo takin, chhang leh uain eia intute chuan thuthlung tharah an tel tih leh vân lam Lalramah rorêl tûrin beiseina an nei tih an târ lang. Chuvângin, hriak thih emaw, berâm dang emaw pawh ni ila, Johana bung 6-a thuziakte chuan kan tân awmze pawimawh tak a nei a. Chatuan nunna kan neih theih nân rinna kan lantîr a pawimawhzia a târ lang a ni. w24.12 13 ¶14, 16

Lalpa Zanriah an kîl laia Isua’n a tirhkohte hnêna chhang dawidim telh loh a pêk khân, chu chuan a taksa a entîr tih a hrilh a. Tichuan, uain chu pein, a “thuthlunna thisen” a nih thu a sawi bawk a ni. (Mk. 14:22-25 NWT; Lk. 22:20; 1 Kor. 11:24) Thuthlung thar chu “Pathian Rama” awm tûr “[thlarau lam] Israel chhûngte” nêna thlun a ni. (Heb. 8:6, 10; 9:15) Lalpa Zanriah an kîl laia Isua thusawi chu “pâwl tlêmte” tân chauh tân a ni. Chu pâwl tlêm tê chu, chu pindan chhûnga a bula awm a tirhkoh rinawmte aṭangin a inṭan a ni. Anni chu vânah Isua hnênah an awm ang. w24.12 11 ¶9-10

Isua chuan phatsan te, man te, na taka ṭawng khum te, sawichhiat te, mi sual anga puhna te leh, nghaisaknate pawh a tâwk a. A tâwpah, sipaite chuan an tihhlumna tûr hmuna hruaiin banah an khêng bet a ni. Chûng hrehawmnate chu rinawm taka a tawrh lai chuan hrehawm ti taka lo thlîrtu Mi Pakhat a awm a. Chu chu Pathian Jehova a ni. A Fapa tawrhna chu tihtâwpsak tûrin thiltihtheihna nei mah se, a tihtâwpsak lo. Engvângin nge? Hmangaihna vâng a ni. Isua inthawina chu Jehova’n a hmangaihzia che a nem nghet a ni. Sual leh thihna ata chhan chhuak tûr chein hrehawm tam tak tuarin a neih ṭhat ber a pe che a. (1 Joh. 4:9, 10) Chuvângin, sual do hneh tûra min ṭanpui a duh tih a chiang a ni! w24.08 6 ¶13-14

Tlanna pe tûra Jehova’n a chân nasatzia kan ngaihtuah hian min hmangaihzia chu kan hre thiam lehzual thei a. Dinhmun khirh tak hnuaiah tu mah Pathian chungah an rinawm reng thei lo vang tih Setana’n a sawi a. Chumi dik lohzia finfiah nân Jehova’n Isua chu na tuara, a thih a phal a ni. (Job. 2:1-5) Isua chu amah dodâltu sakhaw hruaitute’n an diriam a. Sipaite’n hruihruala vuaa bana an khen beh lai chu Jehova’n a hmu a. Hrehawm taka a thi lai chu a thlîr bawk a ni. (Mt. 27:28-31, 39) A duh chuan chûng thilthlengte chu a titâwp thei a. (Mt. 27:42, 43) Mahse, chutiang chuan Pathianin ti ta se tlanna chu pêk a ni lo vang a, beisei tûr kan nei hek lo vang. Chuvângin, Jehova chuan a Fapa chu a thih thlengin na taka a tawrh a phal a ni. w25.01 22 ¶7

C.E. 33 Nisan 16 a ni a. Isua zirtîrte chu lungchhe tak leh thlabâr takin an awm a ni. Zirtîr pahnih chuan Jerusalem aṭangin Emmau khua chu an pan a. Pa pakhat chuan anni chu rawn panin an rualin a kal ve a. Zirtîrte chuan Isua chunga thilthleng chungchânga an lungawi lohna thute chu an lo hrilh a. Chu veleh, an kalpui chuan an nun thlâk danglamtu thu a sawipui ta a. Ani chuan Messia’n hrehawm a tawrh a, a thih a ngaih chhante chu “Mosia leh Zâwlnei zawng zawngte thu aṭanga ṭanin” a hrilhfiah a ni. Emmau khua an thlenin an kalpui chuan a nihna dik tak, tholeh Isua a ni tih chu a hrilh ta a! (Lk. 24:13-35) Isua chu leia a nun tâwp lam ni 40 chhûngin a zirtîrte hnênah vawi tam tak a inlâr a. Chutih hun chhûng chuan, a zirtîr lungchhia leh thlabâr takte chu Lalram chanchin puangtu leh zirtîrtu hlim tak, inrintâwkna nei tak leh huaisen takte an rawn ni ta a ni. w24.10 12 ¶1-3

Hunte a liam zêl rualin tisa lamah kan puitling chho zêl a; mahse, thlarau lama puitlinna chu amaha lo awm thei a ni lo. Entîr nân, Korinth khuaa unaute chuan chanchin ṭha an pawm a, baptisma changin thlarau thianghlim an dawn bâkah, tirhkoh Paula ngei pawhin anni chu thil tam tak a zirtîr a ni. (Tirh. 18:8-11) Mahse, baptisma an chan aṭanga kum eng emaw zât hnuah pawh, an zînga tam tak chuan puitlin lam an la pan lo va. (1 Kor. 3:2) A hmasa berin, puitling chho tûr chuan puitlin duhna kan neih a ngai a. Thlarau lama nausên nih reng duh, ‘mâwlna ngainatute’ chuan thlarau lamah puitlin lam an pan thei lo vang. (Thuf. 1:22) Tisa lama puitlin tawh hnu pawha thu tlûkna siam tûra an nu leh pate rinchhan rengtute ang nih chu kan duh lo va. Chu aiin, thlarau lama kan puitlin theih nân mahni ngeiin mawhphurhna lâk kan duh a ni. Thlarau lama puitlin lam pan tûra i la bei mêk a nih chuan, ‘tih tum tûr leh beih’ duhna pe tûr chein Jehova hnênah ṭawngṭai ang che.—Phil. 2:13. w24.04 4 ¶9-10

Jehova chuan mihringte chunga a rorêl dân chungchânga a rilru awm dân chu min hrilh a. (Ezek. 33:11) Ani chu zahngaihnaa khat a ni a, a theih phawt chuan mite chungah zahngaihna a lantîr ṭhîn a ni. Thawhlehna chang lo tûrte chungchângah eng nge kan hriat? Bible chuan entîrna tlêm tê chauh a târ lang a. Isua chuan Juda Iskariota chu a tho tawh lo vang tih a sawi a ni. (Mk. 14:21; Joh. 17:12) Juda chuan Pathian Jehova leh A Fapa chu hre reng chunga dodâlin thil a ti a. (Mk. 3:29 leh w07 8/1 p. 13 en rawh.) Chutiang bawkin, Isua chuan amah dodâltu sakhaw hruaitu ṭhenkhat chuan thawhlehna beiseina an nei lo tih a sawi a ni. (Mt. 23:33) Chu bâkah, tirhkoh Paula pawhin inchhîrna nei lo kalpêngte chu kaihthawh an ni lo vang tih a vaukhân bawk.—Heb. 6:4-8; 10:29. w24.05 4 ¶10-11

Jehova kan hnaih reng chuan, Setana’n kan chhiat hlenna tûrin engmah a ti thei lo vang a. (1 Joh. 3:8) Khawvêl tharah chuan, Jehova’n a ṭhian rinawmte chu thlarau lam dinhmun hlauhawma awmtîr theitu chauh ni lovin, thihna ata pawh a vênghim zawm zêl ang. (Thup. 21:4) Jehova nêna mi mal taka inlaichînna ṭha neia a puan ina mikhual kan ni thei chu chawimawina ropui tak a ni a. (Ezek. 37:27) A mikhualte nih zawm zêl kan duh chuan engtin nge kan nun ang? Tu emawin a ina kal tûra a sâwm che chuan, mikhual ṭha tak nih i duh ngei ang. Chutiang bawkin, Jehova chuan a puan ina mikhual anga thlen zawm zêl duhtute tâna ti tûra a duhte chu hriat i duh ngei ang a. Pathian kan hmangaihna chuan theih tâwp chhuaha “kawng tinrênga amah tilungawi tûrin” min chêttîr a ni. (Kol. 1:10-12) Ani chu kan zah phu tak kan Pathian leh Pa a ni tih hre rengin, engtik lai pawha ṭih tûr a ni tih kan theihnghilh ngai lo. Chutianga zahna thûk tak kan neihna chuan a huat zâwng nungchangte pumpelh tûrin min ṭanpui ang a. Kan Pathian nêna “thuhnuairawlh taka lên dun” chu kan duh reng bawk ang.—Mik. 6:8. w24.06 4 ¶8-9

Jehova’n mi rinawm Abrahama chu A fapa Isaaka chu a hnêna hlân tûrin a ti a ni. Abrahama tân chu chu a tih tawh azawnga thil huphurhawm ber a ni ngei ang. Chuti chung chuan, Jehova sawi angin a ti a. Mahse, a fapa a tihhlum hma lawkin Pathianin ani chu a dang a, a rilru a zâng ta huai a ni. Chu thilthleng chuan mi rinawm zawng zawngte tân thutak pawimawh tak a târ lang a: Jehova’n a fapa duh tak chu inthawina atâna pêk a inhuam ang tih chu. Mihringte hi min va hmangaih tak êm. (Gen. 22:1-18) Kum zabi tam tak hnuah, Pathian hnam thlan Israelte hnêna Dân pêk chuan an sual ngaihdam a nih theih nân hâlral thilhlan hlân tûrin a phût a. (Lev. 4:27-29; 17:11) Chûng inthawinate chuan mihringte sual laka chhandam hlen an nih theih nân inthawina ropui zâwk hlan a la ni dâwn tih a târ lang a ni. Thutiam thlah Pathian Fapa hlu tak chu hrehawm tuarin berâm no hlan tûr angin tihhlum a ni dâwn tih hrilhfiah tûrin Pathian zâwlneite chu thlarauva hriattîr an ni.—Is. 53:1-12. w24.08 4 ¶7-8

Bible i chhiar hun emaw, i chhiar rei zâwng emaw chu eng pawh ni se, i thu chhiarte nunpui dân kawng zawng la. Pathian Thua eng emaw lai i chhiar hunah, ‘Engtin nge he thu hi tûnah, a nih loh leh nakinah ka nunpui theih ang?’ tiin inzâwt ang che. Entîr nân, 1 Thessalonika 5:17, 18 chu chhiar angin han inmitthla teh. Chûng châng hnihte i chhiar zawh hnuah châwlin, i ṭawngṭai ngun dân leh thûk dân chu ngaihtuah ang che. Chu bâkah, i thil ngaihhlutte chu i ngaihtuah thei bawk a. Chûng zînga thil pathum atân Jehova hnênah lâwmthu sawi i duh pawh a ni thei a ni. Chutianga hun rei lo te chhûng rilru pe taka ngaihtuahna chuan, Pathian Thu ngaithlaa zâwmtu a nihtîr ang che. Nî tina Bible châng dang i chhiar hunah pawh chutianga tihna i hlâwkpui dân tûr chu han ngaihtuah teh. Ni e, Pathian Thu zâwmtu ṭha lehzual i rawn ni ang. w24.09 4-5 ¶9-10

Jehova chuan theihna danglam tak neiin min siam a. Thilpêk dawn chu nuam ti mah ila, mi dangte hnêna thil pêkna aṭangin hlimna nasa zâwk kan nei a ni. Kan unaute kan ṭanpui theih hian nuam kan ti a. An lâwmzia an lantîr hian kan hlim a ni. Chutih rualin, mite’n lâwmna an lantîr emaw, lantîr lo emaw pawh ni se, thil dik kan tih avângin kan lâwm thei a. Thil i pêk eng pawh “LALPA chuan chu aia tam tak chu a pe thei che,” tih hre reng ang che. (2 Chro. 25:9) Thil pêk kawngah Jehova chu kan khûm thei ngai lo vang! Chu bâkah, Jehova ngeiin min rulh lêt aia hlimna nasa zâwk a awm lo. Chuvângin, kan Pa vâna mi thilphal tak chu entawn i tum tlat ang u. w24.09 31 ¶20-21

Pathian Jehova chu zahngaihna leh khawngaihnain a khat a. (Sâm 103:13; Is. 49:15) Mi a hre thiamin rilru naa kan awmin min tawrhpui a ni. (Zak. 2:8) Amah hre tûr leh a ṭhiante ni tûrin min ṭanpui a. (Sâm 25:14; Tirh. 17:27) Ani chu a inngaitlâwm a; ‘vâna thil awmte leh leia thil awmte en tûra intihnuaiin rethei chu vaivut ata a kai tho ṭhîn a ni.’ (Sâm 113:5-7) Kan Pathian ropui tak chu tuin nge chawimawi lo thei teh lul ang? Jehova chungchâng mi dangte hre tûra kan duh avângin kan chawimawi. Mi tam tak chuan a chungchânga thutak an hre lo a ni. Engvângin nge? Satana chuan a chungchânga dâwt thu tenawm tak takte theh darhin mite rilru a tihdelsak vâng a ni. (2 Kor. 4:4) Pathian Jehova chu phuba lâk hmang, mihringte ngaihsak lo leh, khawvêla hrehawmna tam tak thlentu angin mite chu a rintîr a ni. Mahse, kan Pathian chungchânga thutak chu kan hria! Chuvângin, mite hnêna thu dik chu hrilhin amah chawimawi theihna hun remchâng kan nei a ni.—Is. 43:10. w25.01 3 ¶6-7

Kum zabi khatnaah khân, Setana thlâwptute chuan mi ṭha famkim Pathian Fapa leh a thilmak tihte chungchângah dâwt thu an theh darh a. Entîr nân, sakhaw hruaitute chuan Isua’n “Ramhuai lal” hnên aṭanga thiltihtheihna a dawn avânga ramhuaite hnawt chhuak thei niin an sawi a ni. (Mk. 3:22) Isua chung thu rêl a nih pawh khân, sakhaw hruaitute chuan Pathian hming sawichhetu anga puhin, mipuite chu tihhlumtîr tûra dîl tûrin an fuih a. (Mt. 27:20) A hnua Krista hnungzuitute’n chanchin ṭha an hril chuan dodâltute’n Kristiante tiduhdah tûrin mite chu ‘an fuihpawrhin an huattîr’ a ni. (Tirh. 14:2, 19) Tirhkohte 14:2-na nêna inkûngkaihin Vênnainsâng, December 1, 1998 chhuak chuan heti hian a hrilhfiah a ni: “Juda mi dodâltute chuan anmahniin thuchah an hnâwl chu duh tâwk mai lovin, Jentail mipuite chu Kristiante hua a, do tûrin an fuih a ni,” tiin. Setana chuan tûn laiah pawh ‘khawvêl zawng zawng a la bum’ reng a ni. w24.04 11 ¶15-16

Tu emaw a chatuan hma lam hun tûr chu a thih huna innghat a ni lo. Jehova chuan Rorêltu ṭha famkim a nih angin, dik tak leh fel takin ro a rêl ang. (Sâm 33:4, 5) Chuvângin, “lei chung zawng zawng Rorêltu” chuan dik takin a ti ang tih kan ring nghet tlat thei a ni. Tu emaw chatuan hma lam hun tûr chu a awmna hmuna innghat a ni lo tia thu tâwp siam chu thil inâwm tak a ni bawk. Jehova chuan Lalram thuchah chhân lêt theih lohna hmuna chêng mi maktaduai tam tak chu “kêl” angin ro a rêlsak mai lo vang. (Mt. 25:46) Lei chung zawng zawng Rorêltu dik chuan mi tinte chu keini aia nasain a ngaihsak lehzual a ni. Jehova’n hrehawm nasa tak chhûnga thil a thlentîr dân tûr chu kan hre lo va. Hnam zawng zawng hmaa a hming a tihthianghlim hunah chûng mite chuan Jehova chungchâng zirin, amah ringa a lama ṭan theihna hun remchâng an nei pawh a ni thei a ni.—Ezek. 38:16. w24.05 12 ¶14-15

Jehova mite chu an inṭanpui tawn ṭhîn a. (2 Kor. 8:4) Mahse, chutianga inṭanpui tawn tûr chuan huaisenna neih a ngaih châng pawh a awm a ni. Entîr nân, indona a thlen hian tualchhûng kohhran upate chuan an unaute’n tihchak, thlâwp leh, thlarau lam leh tisa lamah ṭanpuina an mamawh tih an hria a. Kohhran upate chuan an berâmte chu an hmangaih êm avângin an nunna atâna dinhmun hlauhawm takah pawh an mamawhte an pe a. Chutiang dinhmuna kan inpumkhat tlat chu thil pawimawh tak a ni. Chuvângin, in tualchhûng branch aṭanga kaihhruaina in dawnte chu zâwm ang che. (Heb. 13:17) Kohhran upate chuan chhiatna thleng theite atâna inbuatsaih dân leh chhiatna a thlen huna tih tûrte chungchânga inawpna pâwlin a pêk kaihhruainate chu an ennawn ṭhîn tûr a ni. (1 Kor. 14:33, 40) Huaisen la; mahse, fîmkhur rawh. (Thuf. 22:3) Thil i tih hmain ngaihtuah hmasa rawh. Ṭûl lo takin i nun hlauhthâwnawmah dah suh. Jehova rinchhan rawh. Jehova chuan nangmah leh i unaute ṭhatna tûr a ngaihsak tak zet tih hre reng ang che. w24.07 4 ¶8; 5 ¶11

Lal Davida chuan Jehova chu a hriain a rinchhan a. Lal Saula pawh telin a hmêlmate’n an ûm khân, Jehova ṭanpuina dîlin a ṭawngṭai a ni. Pathianin a ṭawngṭaina chhânga a chhanhim hnuah Davida chuan: “Lalpa chu a nung reng e,” tiin a sawi a. (Sâm 18:46) Hêng thute hian Pathian a awm tih a hriatna mai aia tam a kâwk a ni. Zir chianna pakhat chuan Davida’n Jehova chu “a mite ṭanpui tûra inpeih reng Pathian nung a ni” tih a rinnghehzia a târ lanna a nih thu a sawi a. A thiltawn aṭangin a Pathian chu a nung tih a hria a, chu chuan Jehova rawngbâwl tûr leh fak chhunzawm zêl tûrin a ṭanpui a ni. (Sâm 18:28, 29, 49) Jehova chu Pathian nung a ni tih kan rinnghehna chuan ṭhahnemngai taka a rawngbâwl tûrin min ṭanpui thei a ni. Harsatnate tâwk chung pawha Pathian rawngbâwlnaa chhel taka thawk chhunzawm zêl tûrin chakna kan nei thei a. Jehova hnaih reng kan tum bawk ang. w24.06 20-21 ¶3-4

Thessalonika khuaa mite hnêna Paula thusawi aṭangin eng nge kan zir theih? Bible aṭanga kan thu zir tawhte nêna inmil lo emaw, chanchin danglam tak kan hriat hunah emaw hriatthiam theihna kan hmang tûr a ni. Soviet Union hun laiin, kan hmêlmate chuan unaute hnênah world headquarters aṭanga lo kal ni âwm tak lehkha hi an pe a. Lehkhathawnah chuan unaute chu inkaihhruaina pâwl dang din tûra fuihna a chuang a. Lehkhathawn chu dik ni âwm takin a lang a ni. Mahse, unau rinawmte chu bumin an awm lo. Lehkhathawna thu inziakte leh tûn hmaa an thu lo zir tawhte chu a inmil lo tih an hre chhuak a. Tûn laiah pawh thutak dodâltute chuan, tûn lai thiamnate hmangin inhmuh thiam lohna awmtîrin ṭhen hran min tum a. Chuvângin, kan thu hriatte leh kan thu chhiarte chu thutak kan zir tawhte nêna a inmil leh mil loh ngaihtuahna hmangin, “[kan] rilru a nghîn thuai lohna” tûrin kan invêng thei a ni.—2 Thes. 2:2; 1 Joh. 4:1. w24.07 12 ¶14-15

Kan thu tlûkna siam theih azawnga pawimawh ber chu Jehova hnêna inpumpêk a, amah betu chhûngkaw zînga tel tûra thu tlûkna siam hi a ni. Mi tinte chu chutianga thu tlûkna siam tûrin Jehova’n a duh a. Engvângin nge? Mite chu a hmangaihin an tâna ṭha ber tûr a duhsak vâng a ni a. Amah nêna inṭhian ṭhatna neia chatuana nung tûrin a duh a ni. (Deut. 30:19, 20; Gal. 6:7, 8) Chutih rualin, Jehova chuan a rawngbâwl tûrin tu mah a tilui lo va. Mi tinte chu zalên takin duh a thlantîr a ni. A nih chuan, baptisma chang tawh Kristianin Pathian dân bawhchhiain, sual pawi tak ti ta se, engtin nge ni ang? A sim loh chuan, kohhran aṭanga chhuahtîr a ni ang. (1 Kor. 5: 13) Chutichung chuan, thil sual titu chu a hnêna kîr leh tûrin Jehova’n a duh tak zet a ni. Chu chu an simzia lantîrtute ngaihdam an nih theih nâna tlanna a buatsaih chhan ber pawh a ni a. Chuvângin, hmangaihna nei tak kan Pathian chuan sual pawi tak titute chu sima, a hnêna kîr leh tûrin a sâwm a ni.—Zak. 1:3; Rom 2:4; Jak. 4:8. w24.08 14 ¶1-2

Tirhkoh Johana’n lehkhathawn pathumna a ziah lai chuan mi ṭhenkhatin zirtîrna dik lote theh darhin inṭhen hranna an awmtîr a. Chutih rualin, mi dangte chu ‘thutakah an awm reng a.’ Jehova thu an âwihin ‘a thupêk ang zêlin an awm a.’ (2 Joh. 4, 6) Chûng Kristian mi rinawmte chuan Johana bâkah Jehova pawh an tilâwm a ni. (Thuf. 27:11) Kan tân zir tûr eng nge awm? Rinawmnain hlimna a thlen. (1 Joh. 5:3) Entîr nân, Jehova kan tilâwm tih kan hriat avângin kan hlim a. He khawvêl thlêmnate hnâwl a, thutak kan pawm tih a hmuh hian Jehova pawh a lâwm tak zet a. (Thuf. 23:15) Vântirhkohte pawh an lâwm a ni. (Lk. 15:10) Keini pawh kan unaute’n harsatna leh thlêmna kâra rinawmna an vawng tlat kan hmuh hian kan hlim a. (2 Thes. 1:4) Chu bâkah, Setana khawvêl a tâwp hunah, a thununna hnuaia awm khawvêla awm chungin Jehova chungah rinawmna kan lantîr tih kan hriat avângin lungawina kan nei bawk ang. w24.11 12 ¶17-18

Tu emaw chunga ngaihvenna i lantîr hmain engtia rei nge amah hre chiang tûra hun i pêk ang? Ngaihvenna i lantîr hma lutuk a nih chuan, ngaihtuah chiang lova hma la angin a ngai thei che a. (Thuf. 29:20) Kawng leh lamah chuan, hun i la rei lutuk a nih chuan rilru nghet tak pu lo angin i lang thei a, a bîk takin amah i ngaihven tih a hriat hian a ni lehzual a ni. (Thur. 11:4) Chutih rualin, tu emaw chunga ngaihvenna i lantîr hmain amah chu i nei ngei ang tihna ani lo tih hre reng ang che. Mahse, innei tûrin i inpeih tawh tih leh ani chu i kawppui âwm mi a ni tih chian ang che. Mahse, tu emawin a ngaihven che tih hre ta la, engtin nge ni ang? A rilru put hmang ang i pu ve lo a nih chuan, i thiltih hmangin chiang takin lantîr ang che. Ani chu inlaichînna siampui i duh lo a nih chuan beiseina nei tûr zâwngin thil ti suh.—Eph. 4:25. w24.05 22-23 ¶9-10

Hriak thih dik tak leh rinawmte chauh Isua vân lam Lalramah “lâk” an ni ang. Hriak thih tu pawh thlarau lama harhvâng taka awm lo chu “thlante” ruala lâk khâwm an ni lo vang. (Mt. 24:31) Hriak thihte chauh ni lovin, Pathian mi zawng zawngte chuan an beiseina chu eng pawh ni se, Isua thusawite chu inring reng leh rinawm taka awm tlat tûra vaukhânna angin an thlîr tûr a n. Jehova kan hriat chian avângin, a thiltih zawng zawng chu a felin a dik tih kan ring nghet a. Chuvângin, tûn hnaiah mi rinawm tu emaw chu hriak a thih pawhin mak kan ti lo. Grape huan entîrnaa tlai lam dâr 5 vêla hnathawkte chungchâng Isua sawi kha kan ngaihtuah thei a. (Mt. 20:1-16) Grape huana tlai lama thawk ṭante hlawh leh zîng lama thawk ṭante hlawh chu a inang a. Chutiang chiah chuan, hriak thih hmasate leh a hnua hriak thihte chuan rinawm taka an awm tlat chuan an vân lam lâwmman chu an dawng dâwn a ni. w24.09 24 ¶15-17

Isua chuan rorêl dik lohna hmachhawn dân chungchângah entawn tûr ṭha famkim a siam a. A chhûngte leh mi dangte’n dik lo taka an cheibâwl dân hi han ngaihtuah teh. A chhûngte chuan a â niin an puh a, sakhaw hruaitute chuan ramhuaite a thawhpui niin an puh bawk a. Chu bâkah, Rom sipaite chuan an diriamin an sawisa a, a tâwpah an tihlum hial a ni. (Mk. 3:21, 22; 14:55; 15:16-20, 35-37) Mahse, chûng rorêl dik lohna zawng zawng a hmachhawn chung pawhin, a thungrûl lo a ni. Isua hnên aṭangin eng nge kan zir theih? (1 Pet. 2:21-23) Isua chuan rorêl dik lohna kan tawh huna kan chhân lêt dân tûr chungchângah entawn tûr ṭha famkim a hnutchhiah a. Ngawih hun leh ṭawng hun a hria a ni. (Mt. 26:62-64) Mite’n dik lo taka an puhna apiang chu a chhâng lêt lo va. (Mt. 11:19) Amah tiduhdahtute a chhân lêt hunah pawh a sawichhiain a vau lo. w24.11 4-5 ¶9-10

I hmangaih tak tu emaw hnênah thilpêk mawi tak leh ṭangkai tak pe angin han inmitthla teh. Ani chuan pawhdawh chhûnga dahin ngaihsak chhunzawm lo ta se, i lâwm lo ngei ang! Kawng leh lamah chuan, i thilpêk chu a hman ṭangkaia, a lawmzia a lantîr chuan i lâwm hle dâwn a ni. Heta ṭang hian eng nge kan hriat? Jehova chuan kan tân a Fapa a pe a. Chuvângin, chu thilpêk hlu tak leh tlanna pe tûra chêttîrtu a hmangaihna chungah kan lâwmzia kan lantîr chuan a va hlim dâwn êm! (Joh. 3:16; Rom 5:7, 8) Hunte a liam zêl rualin, tlanna kan ngaihhlutna chu a kiam thei a. Chutiang a nih chuan, Pathian thilpêk hlu tak kan hmuh phâk lova pawhdawha dah bo ang kan ni dâwn a ni. Chuvângin, chutiang thleng lo tûr chuan, Pathian leh Krista’n min tihsak tawhte chunga lâwmna chu kan tihthar zêl a ngai a ni. w25.01 26 ¶1-2

Kohhran upate chu ‘ring thar an ni tûr a ni lo va.’ Kristian mi puitling ni tûrin baptisma i channa chu kum tam tak a nih tawh kher ngai lo mah se, hun eng emaw chen i mamawh a ni. Upa i nih hma pawhin Isua anga inngaitlâwmin, eng chanvo pawh dawng tûrin Jehova i nghâk tih i lantîr tûr a ni. (Mt. 20:23; Phil. 2:5-8) Jehova tehna fel takte chu zâwm a, a inawpna pâwl aṭanga kan dawn kaihhruainate chu zuiin i “rinawm [NWT]” tih i lantîr thei a ni. Bible chuan kohhrana hotute chu mite “zirtîr thiam” an ni tûr a ni tih chiang takin a sawi a. Chu chu vântlâng hmaa thusawi thiam tak i nih a ngai tihna a ni em? Upa tam tak chu vântlâng hmaa thusawi thiam tak ni lo mah se, rawngbâwlnaah leh berâm tlawhnaah mite chu Bible hmangin thiam taka zirtîrin an fuih a ni. w24.11 23-24 ¶14-15

I Bible chhiarah hriatthiam loh lai i neih chuan zirbingna nei la. I thu zir chhuahte leh chumiin Jehova, a Fapa leh, i tâna an hmangaihna chungchâng a zirtîr che chu nilêngin chhût ngun ang che. (Sâm 119:97) Bible i chhiar emaw, zirbingna i neih emaw hun apianga thu thar, a nih loh leh thu phûrawm tak i hmu lo a nih pawhin lunghnual suh. Kawng khata sawi chuan rangkachak laitu ang i ni a. Rangkachak laitute chuan rangkachak them te tak tê hmu tûr pawhin a dârkâr têl, a nih loh leh a ni têlin dawhthei takin hna an thawk ṭhîn a. Mahse, rangkachak them tinte chu a hlut êm avângin ṭhahnemngai takin an thawk chhunzawm zêl a ni. Bible thutak lunghlu tinte chu chûngte ai chuan a hlu zâwk daih si a! (Thuf. 8:10) Chuvângin, dawh thei la, i Bible chhiarna hun duan chu vawng tlat ang che.—Sâm 1:2. w25.01 25 ¶14-15

Jehova chuan min ti natu mi dangte chu ngaihdam tûrin min duh a. (Sâm 86:5; Lk. 17:4; Eph. 4:32) Tu emaw thiltih leh thusawite chuan rilru na takin min siam thei a; a bîk takin, kan ṭhian ṭha tak emaw, kan chhungkaw zînga mi emaw a nih hian a ni lehzual a ni. (Sâm 55:12-14) A châng chuan, kan rilru chu chema vih ang maia nain a awm thei a. (Thuf. 12:18) Chu chu ngaihthah kan tum lui pawh a ni thei. Mahse, chutianga tihna chu kan hliama chem te hnutchhiah ang a ni. Chutiang bawkin, kan rilru natnate chu kan ngaihthah avâng maia lo ṭha chho tûrin kan beisei thei lo. Tu emawin kan rilru a tihnat hian kan thinrim nghâl mai thei a. Bible chuan thinrim châng kan nei thei tih hre mah se, chumiin min thununna tûr lakah min vaukhân a ni. (Sâm 4:4; Eph. 4:26) Engvângin nge? Kan rilru awm dânte chuan a taka thil ti tûra min chêttîr ṭhin vâng a ni. Chu bâkah, thinrimna chuan nghawng ṭha lo a nei fo va. (Jak. 1:20) Thinrimna chu chhân lêt dân kawng khat a ni a; mahse, thinrim renga awm chu duh thlanna a ni tih hre reng ang che. w25.02 15 ¶4-6

Isua chuan ‘Pathian lama hausa si lo va,’ sum leh pai lama inkhâwl khâwm chu thil âtthlâk a nihzia a sawi a. (Lk. 12:16-21, NWT) A tûka thleng tûr tu mahin kan hre lâwk thei lo. (Thuf. 23:4, 5; Jak. 4:13-15) Chu bâkah, Isua chuan a hnungzui ni tûr chuan kan thil neihte chu “kalsan” kan inhuam tûr a ni tih a sawi a ni. (Lk. 14:33, NWT) Kum zabi khatnaa Judai rama Kristiante chuan an thil neihte chu inhuam takin an kalsan a. (Heb. 10:34) Tûn laiah pawh, kan unau tam takte chuan politics lama an inhnamhnawih duh loh avângin, sum leh pai lama chânna nasa tak an nei a ni. (Thup. 13:16, 17) Chutianga tih inhuam tûrin anni chu engin nge ṭanpui? “Engtikah mah ka thlahthlam tawp lo vang chia, kal pawh ka kalsan tawp lo vang che,” tia Jehova thutiam chu an rin ngheh tlat vâng a ni. (Heb. 13:5) Theih tâwp chhuaha hma lam hun atâna ruahmannate kan siam hunah, beisei loh thilte kan chungah a lo thleng a nih pawhin, Jehova ṭanpuina kan rinchhan tlat a ni. w25.03 29 ¶13-14

Jehova chuan mahnia puitlin lam pan tûrin min beisei lo va. Kristian kohhranah thlarau lama “puitling” kan nih a, “Krista famkimna lenzia tluka kan zaa kan lo awm” theihna tûra mi mal tinte min ṭanpui tûrin berâm vêngtute leh zirtîrtute min pe a ni. (Eph. 4:11-13) Ani chuan “Krista rilru” pu tûra min ṭanpui tûrin a thlarau thianghlim min pe bawk a. (1 Kor. 2:14-16) Chu bâkah, leia Isua rawngbâwl laia a ngaihtuah dân te, a thusawi te leh, a thiltihte chu kan hriat theih nân Chanchin Ṭha Ziak palite ziak tûrin a thâwk khum bawk. Isua ngaihtuah dân leh thiltihte chu entawnin, Kristian mi puitling kan ni thei a ni. Mahse, puitlin lam pan tûr chuan, Bible zirtîrna bulpui “Krista thu bul” aia tam kan zir a ngai a ni. w24.04 4-5 ¶11-12

Ni tin thu tlûknate kan siam a ngai a. A ṭhen chu tûkṭhuan ei tûr, a nih loh leh zân mut hun tûr ang chi thu tlûkna awlsam takte a ni a. Chutih rualin, kan hrisêlna, kan hlimna, kan hmangaih takte, a nih loh leh kan biakna chunga nghawng nei thei thu tlûknate erawh siam a harsa thei a ni. Keimahni leh kan chhûngte chunga hlâwkna thlentu thu tlûknate siam kan duh a. A pawimawh berah chuan, Pathian Jehova tilâwmtu thu tlûknate siam kan duh a ni. (Rom 12:1, 2) Thu tlûkna ṭha tak siam tûra rahbî pawimawh tak pakhat chu thil a nihna dik tak hriat hi a ni. Engvângin nge chu chu a pawimawh? Dam lo na tak pakhat chuan a natna chungchângah doctor a râwn a. Doctor chuan dam lo chu en fiah a, zawhnate zâwt hmasa lovin, a enkawl nghâl mai ang em? Nghâl mai lo vang. Chutiang bâwkin, i dinhmun tawh mêk nêna inkûngkaiha thil a nihna dik tak i hriat hmasak chauhvin thu tlûkna ṭha tak i siam thei dâwn a ni. w25.01 14 ¶1-3

Jehova zahngaihna chungchâng eng nge kan hriat? Engtin nge ani chuan ‘tu ma boral a duh lo,’ tih a lantîr? (2 Pet. 3:9) Sual lian tak titu mi ṭhenkhat chunga zahngaihna a lantîr dân hi han ngaihtuah teh. Lal Davida chuan uirêna leh tualthahna ang chi sual pawi tak a ti a. Mahse, ani chu a inchhîr avângin Jehova chuan zahngaihna nei takin a ngaidam a ni. (2 Sam. 12:1-12) Lal Manasea chuan a dam chhûng hun tam zâwk chu thil sual râpthlâk tak takte tih nân a hmang a. Mahse, chutiang dinhmunah pawh a inchhîr avângin Jehova chuan a ngaidamin, a chungah zahngaihna a lantîr a ni. (2 Chro. 33:9-16) Chûng entîrnate chuan Jehova’n zahngaihna lantîrna tûr chhan ṭha a hmuh apiangin zahngaihna a lantîr ṭhîn tih min hriatnawntîr a. Ani chuan chutiang mite chu an sualnate pawm a, sima an inchhîr tih a hriat avângin a kai tho leh ang. w24.05 4 ¶12