Unau Inpumkhat Tak

PATHIAN JEHOVA chuan Israel mite chu kum 1,500 vêl chhûng a mite angin a dâwr a. Tichuan, Jehova chuan “ama hming pu atân an zîng ata mite la chhuak tûrin Jentailte a kan ṭan” a. (Tirh. 15:14) Jehova hming putu a mite chu a thuhretute an ni ang a, khawi hmunah pawh awm mah se, ngaihtuahna leh thiltihah an inpumkhat ang. Pathian hming tâna inpumkhatna chu Isua’n amah zuitute hnêna: “Chutichuan kal ula, hnam tina mi zirtîrahte siam ula, Pa leh Fapa leh Thlarau Thianghlim hmingah chuan baptis ula, thu ka pêk zawng zawng che u pawm tûrin zirtîr rawh u. Tin, ngai teh u, kei kumkhuain, khawvêl tâwp thleng pawhin, in hnênah ka awm zêl ang,” tia mawhphurhna a pêk an thawhna rah chhuah a ni ang.—Mt. 28:19, 20.

² Jehova hnêna inpumpêka baptisma changin, Isua Krista zirtîr i lo ni ta a. Hnam te, sum leh pai dinhmun te avânga intihhranna awm lo, khawvêl puma Kristian inpumkhat tak zîngah i tel ta. (Sâm 133:1) Chuvângin, kohhran chhûnga i Kristian ṭhiante chu i hmangaihin i zah ta a. An zînga ṭhenkhat chu hnam hrang, ram dang mi, a nih loh leh lehkha thiam lo tak leh tûn hmaa hêng inan lohnate avânga i kawm duh lohte pawh an ni thei. Mahse, tûnah chuan khawtlâng, sakhua, leh chhûngkaw inlaichînna eng dang zawng aia nghet zâwk unau inhmangaih tak zîngah i tel tawh a ni.—Mk. 10:29, 30; Kol. 3:14; 1 Pet. 1:22.

NGAIHTUAHNA LAM SIAMREMNA

³ Tute emaw chuan hnam te, politics pâwl te, khawtlâng te, a nih loh leh thil dangte avânga inpâwng huatna zung kaih nghet tak chu paih bo harsa an tih chuan, hnam dang zawng zawngte sakhaw lama pâwng huatna an neihte paih bo ngai Juda Kristian hmasate chanchin chu an ngaihtuah thei a ni. Petera chu sipai za hotu Rom mi Kornelia hnêna kal tûra hrilh a nih khân, Jehova chuan ngilnei takin a thiltih tûr atân hian a buatsaih a ni.—Tirhkohte, bung 10.

⁴ Inlârnaah, Petera chu Judate tâna sa thianghlim lo ṭhenkhat talh tûr leh ei tûra hrilh a ni a. Petera’n a hnial chuan, vân aṭanga aw chuan: “Pathianin a tihthianghlim tawh chu nangin thiang lo ti suh,” tiin a hrilh a. (Tirh. 10:15) Hnam dang mi ina lût tûra a mawhphurhna dawn tûr pawm thei tûra Petera rilru buatsaih nân, Pathian a rawn inrawlh a ngai hial a ni. Jehova kaihhruaina chu zâwmin, pung khâwmho hnênah chuan heti hian a sawi a ni: “Juda miin hnam dang pâwl leh an hnêna kal a thian lohzia nangnin in hria a ni; nimahsela tu mah thiang lo leh bawlhhlawh ka ti tûr a ni lo tih Pathianin mi hriattîr a ni. Chuvângin mi rawn koh veleh khân hnial lovin ka lo kal ta a nih hi,” tiin. (Tirh. 10:28, 29) Chumi hnuah chuan, Petera chuan Jehova’n Kornelia leh a chhûngte a pawmzia chu a hmu ta a ni.

⁵ Pharisai lehkha zir sâng tak, Tarsa khuaa mi Saula tân pawh inngaihtlâwmna lantîr a, tûn hmaa a kawm duh lohte kawm chu a ngai a. An hnên aṭanga kaihhruaina a lâk pawh a ngai hial a ni. (Tirh. 4:13; Gal. 1:13-20; Phil. 3:4-11) Serjia-Paula te, Dionusia te, Damari te, Philemona te, Onesima te, leh mi dangte’n chanchin ṭha an pawm a, Isua Krista zuitu an lo nih huna inthlâk danglamna an neih nasat dân tûr chu kan ngaihruat thei a ni.—Tirh. 13:6-12; 17:22, 33, 34; Philm. 8-20.

KHAWVEL PUMA KAN INPUMKHATNA VAWNGIN

⁶ Kohhrana unaute hmangaihna chuan Jehova leh a inawpna pâwl lamah a hîp che tih rinhlelh rual a ni lo. Isua Krista ngeiin: “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” tia a sawi, zirtîr dik takte chhinchhiahna chu hmangaihna chu hai rual lohvin i hmu ta ngei a. (Joh. 13:34, 35) Tichuan, kohhran chhûnga i hmuh hmangaihna chu khawvêl puma unaute kâra awm hmangaihna hlimthla mai a ni tih i hriat chuan Jehova leh a inawpna pâwl chu i ngaihlu zual sauh bawk. Ni hnuhnûnga inrem tak leh inpumkhata Jehova be tûra mite lâkkhâwmna chungchâng Bible hrilh lâwkna thlen famkimna chu i tawng mêk a ni.—Mik. 4:1-5.

⁷ Tûn laiah inṭhenna thlentu thil tam tak a awm laiin, “hnam tin zînga mi te, chi tin zînga mi te, mi tin zînga mi te, ṭawng tin zînga mi te” inpumkhata awm chu a theih ang tih tuin nge ngaihtuah ngai tehlul ang? (Thup. 7:9) Tûn lai thiamna a sânna hmun leh hmân lai hnam dânte an la hman rengna hmuna mite inan lohna chu han ngaihtuah teh. Hnam khat leh ram khat chhûnga chêngte zînga sakhaw lama inelna pawh hi han en teh. Mahni hnam hmangaihna chawisân a nih avângin, tûn hma zawng aiin mite chu politics lamah an inṭhen hrang lehzual tawh a. Chu bâkah, hausa rethei inthlauhna leh inṭhen hranna thlentu thil dang tam takte i ngaihtuah chuan, hnam tin, ṭawng tin, pâwl tin, leh dinhmun hrang hranga mite tihchhiat rual lohva nghet hmangaihna leh remnaa phûarkhâwm hi Pathian Engkimtitheia chauhvin a thlentîr theih thilmak a ni.—Zak. 4:6.

⁸ Chutiang inpumkhatna chu a awm tak tak a, inpumpêka baptisma chang tawh Jehova Thuhretu i rawn nih hian an zînga mi i lo ni ta a ni. Chu inpumkhatna chu hlâwkpuiin, inpumkhattîr chho zêl tûrin mawhphurhna i nei a. Chu mawhphurhna chu Galatia 6:10-a tirhkoh Paula thu: “Chutichuan hun remchâng kan neihzia ang zêlin mi zawng zawng chungah thil ṭha i ti ang u, rinna chhûngte zînga mi chungah i ti deuh ber ang u,” tih zawmna hmanga hlen a ni. Chu bâkah: “Elrel leh inngaihhlut avânga eng mah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se; mahni ta ta mai en lovin, mi dang ta pawh en ṭheuh zâwk rawh u,” tih thu hi kan zâwm bawk a ni. (Phil. 2:3, 4) An pâwn lam lan dân ang ni lo va, Jehova hmuh anga kan unaute hmuh kan tum chhûng chuan anmahni nêna inlaichînna muanawm leh hlimawm tak kan nei zawm zêl ang.—Eph. 4:23, 24.

INNGAIHTUAH TAWNIN

⁹ Tirhkoh Paula entîrna angin, kohhran chu ṭhen hran a ni lo va, a chhûnga mi tinte chu an inngaihsak tawn zâwk a ni. (1 Kor. 12:14-26) Khawvêl puma kan unaute zînga ṭhenkhat nên hian hmun inhlat takah awm mah ila, anni chu kan ngaihsak nêp chuang lo. Kan unau ṭhenkhat tihduhdah an nih chuan, a dang zawngte pawhin nasa takin kan tawrhpui a. Ṭhenkhatin mamawh an tlâk chham a, a nih loh leh leilung chhiatna emaw, indona emaw, tualchhûng indona emaw an tawrh chuan mi dang zawngte chuan thlarau lam leh tisa lama ṭanpuina pêk theih dân kawng kan zawng ṭhîn.—2 Kor. 1:8-11.

¹⁰ Kan vai hian kan unaute tân nî tin kan ṭawngṭai tûr a ni. Ṭhenkhat chuan thil sual ti tûra thlêmna an tâwk a. Mi dangte chuan tlâng hriat harsatna an tawrh laiin, a dangte erawh chuan mi dang hriatpui lêm lohvin an hnathawhpuite leh an rinna ṭâwmpui lo chhûngte hnên aṭangin dodâlna an tâwk a ni. (Mt. 10:35, 36; 1 Thes. 2:14) Khawvêl pum huapa unau kan nih avângin, hêngte hi kan ngaihven a ni. (1 Pet. 5:9) Kan zîngah hian Jehova rawngbâwlnaa thawk rim tak, thu hrilh rawngbâwlna leh kohhrana thawk rim takte an awm a. Khawvêl puma rawngbâwlna enkawl tûra ruatte pawh an awm bawk. An zain ṭawngṭaisak an ngai a, hetiang hian anmahni ṭanpui tûra tih theih dang kan neih loh hunah pawh kan hmangaihna leh kan ngaihsakna kan lantîr thei a ni.—Eph. 1:16; 1 Thes. 1:2, 3; 5:25.

¹¹ Hêng ni hnuhnûng chhûnga buaina tinrêng kan tawh lai hian, Jehova mite chu inṭanpui tawn tûrin an inpeih reng tûr a ni. Lîrnghîng leh tui lian ang chi chhiatnate a lo thlen hian, chhan chhuahna hna nasa taka thawh leh sum leh pai hmanga ṭanpuina lian tham tak pêk ngaih châng a awm ṭhîn. Hemi chungchângah hian kum zabi khatnaa Kristiante chuan entawn tûr ṭha tak an siam a ni. Isua fuihna chu hre rengin, Antiokei khuaa zirtîrte chuan Judai rama an unaute hnênah chuan thilpêkte chu lâwm takin an thawn a. (Tirh. 11:27-30; 20:35) A hnuah, tirhkoh Paula chuan fel taka ruahman chhawmdâwl rawngbâwlna thlâwp tûrin Korinth khuaa mite chu a fuih a ni. (2 Kor. 9:1-15) Tûn hunah hian, dinhmun chi hrang hrang avânga kan unaute’n harsatna an tawrha ṭanpui an ngaih hian, inawpna pâwl leh Kristian mi malte chuan rang taka ṭanpuiin, an thil mamawhte chu an pe ṭhîn a ni.

JEHOVA DUHZAWNG TI TURA DAH HRAN

¹² Khawvêl puma kan unau inpumkhat takte hi Jehova duh zâwng ti tûrin an inrêlbâwl a. Tûn hun atâna a duh zâwng chu, Ram chanchin ṭha hi hnam zawng zawng hriattîrna tûra khawvêl zawng zawnga hrilh hi a ni. (Mt. 24:14) He hna kan thawh lai hian, nungchang lama a tehna sâng takte mila kan nun hi Jehova duh zâwng a ni. (1 Pet. 1:14-16) Mi dangte hnuaia intukluh leh chanchin ṭha hrilh zêl chu kan inhuam tûr a ni a. (Eph. 5:21) Tûn hma zawng aiin, tûn hi mahni hlâwkna tûr ni lovin, Pathian Ram kan nuna kan dah hmasak ber hun a ni. (Mt. 6:33) Chanchin ṭha atâna rawng kan bâwlho laia he thu rilrua kan dah reng chuan, tûna lungawina hlimawm tak bâkah chatuan malsâwmnaah min hruai ang.

¹³ Jehova Thuhretute kan nih angin kan danglam bîk a, mi thianghlimte angin mi dangte lakah lâk hran leh kan Pathian rawngbâwlnaah ṭhahnemngai takte kan ni. (Tit. 2:14) Pathian Jehova kan biakna chuan min tidanglam a. Khawvêl puma unaute nên thu khat vuanin kan thawkho mai a ni lo va, thutak ṭawng pakhat kan hmang a, chumi mil chuan kan nung bawk a ni. Hemi chungchâng hi Jehova’n a zâwlnei Zephania hmangin a sawi lâwk a ni: “Chutih hunah chuan mipuite chu hmui thianghlim ka puttîr leh ang, LALPA hming chu an zaa an lama, thu khat vuaa a rawng an bâwl tlân theih nân,” tiin.—Zep. 3:9.

¹⁴ Tichuan, Jehova chuan tûn laia a taka thleng mêk, khawvêl pum huap inunauna chungchâng sawi tûrin Zephania chu a thâwk khum a ni: “Israel mi la awm chhunte chuan khawlohna an ti lo vang a, dâwt an sawi hek lo vang; an kâah pawh bumna ṭawng a awm hek lo vang; an eiin an mu ang a, tu mahin an tihlau tawh lo vang,” tiin. (Zep. 3:13) Jehova Thutak Thu hriat thiamna kan neih a, kan rilru a thara siamin, Jehova tehnate mila kan nun avângin, inpumkhatin kan thawkho thei a ni. Mihring thlîrna aṭanga thlîrtute tâna thil tih theih loh anga langte chu kan ti thei a ni. Ni e, mi danglam, Pathian mi, khawvêl puma amah chawimawitute chu kan ni ngei a ni.—Mik. 2:12.