Jehova Inawpna Pâwl Bêl Tlat Rawh

TIRHKOH Jakoba chuan: “Pathian hnaih rawh u, tichuan anin a hnaih ang che,” tiin a ziak a. (Jak. 4:8) Ni e, kan ṭha famkim lo chung pawhin, a hnêna kan thu sawite ngaithla thei lo tûr khawpin Jehova chu a sâng lutuk lo va, min hlat lutuk hek lo. (Tirh. 17:27) Engtin nge Pathian kan hnaih theih ang? Jehova nêna mi mala inlaichînna ṭha tak siamin kan hnaih thei a, chutah chuan tih tak zeta ṭawngṭaina a tel a ni. (Sâm 39:12) A Thu, Bible zir ziahna hmangin Pathian nêna inlaichînna hnai tak kan nei thei bawk. Hetiang kawng hian Pathian Jehova, a thiltum, leh kan tâna a duh zâwngte kan hria a ni. (2 Tim. 3:16, 17) Chutiang chuan, amah hmangaih dân kan zir a, tihlâwm loh hlauhna ṭha kan nei bawk.—Sâm 25:14.

² Amaherawhchu, Jehova chu a Fapa Isua hmang chauhvin kan hnaih thei a. (Joh. 17:3; Rom 5:10) Isua aia Jehova rilru min hriat fiahtîr thei zâwktu mihring tu mah an awm lo. A Pa nêna an inhriat chian êm avângin: “Fapa chu tu nge a nih, Pa lo chuan tu mân an hre lo; Pa pawh chu tu nge a nih, Fapa leh an hnêna Fapain a puan duhnate chauh lo chuan tu mân an hre lo,” tiin a sawi thei a ni. (Lk. 10:22) Chuvângin, Isua ngaihtuahna leh rilru vei zâwngte hre tûra Chanchin Ṭha ziakte kan zir hian, Jehova ngaihtuahna leh rilru vei zâwngte kan zir tihna a ni. Chutiang hriatna chuan Pathian min hnaih zualtîr thei a ni.

³ Pathian Fapa lû nihna hnuaiah Pathian duh zâwng tih dân zir tûra min ṭanpuitu, mita hmuh theih a inawpna pâwl chu bêl tlatin Jehova nêna inlaichînna hnai tak kan nei chho va. Matthaia 24:45-47-a sawi lâwk angin, Pu ber, Isua Krista chuan “bawih rinawm, fing tak” chu rinnaa a chhûngkua hnêna “a hun apianga an chaw chan tûr” petu atân a ruat a. Tûn laiah, bâwih rinawm chuan thlarau lam chaw hnianghnâr tak min pe a. He inawpna pâwl hmang hian, Jehova chuan a Thu nî tina chhiar tûr te, Kristian inkhâwma tel ziah tûr te, leh “Ram chanchin ṭha” hrilhnaa awmze nei taka tel tûrtein min fuih a ni. (Mt. 24:14; 28:19, 20; Jos. 1:8; Sâm 1:1-3) Bâwih rinawm chu tisa lam taka thlîr kan duh ngai lo vang. Jehova inawpna pâwl hnaih taka awm tlat kan tumin, a kaihhruaina chu kan zawm tlat tûr a ni. Chu chuan kan Pathian, Jehova min hnaih zualtîr ang a, fiahnate kan tâwk chung pawhin min tichakin, min vênghim ang.

FIAHNATE A PUN CHHAN

⁴ Thutakah kum tam tak i awm reng tawh pawh a ni thei a. Chutiang a nih chuan rinawmna fiahnate tawrh chhuah awmzia chu i hre ngei ang. Mahse, Jehova i hriatna la rei lo pawh ni se, Jehova lal chungnunna hnuaia intulût apiang chu Diabol-Setana’n a dodâl tih i hria a ni. (2 Tim. 3:12) Chuvângin, i tawrh chu a tlêm emaw, a tam emaw pawh ni se, hlauh chhan tûr emaw, lunghnual chhan tûr emaw i nei lo. Jehova chuan ṭanpuina bâkah, chhan chhuah leh nakina nun pêk chu a tiam che.—Heb. 13:5, 6; Thup. 2:10.

⁵ Kan vai hian, Setana khawvêl hun tlêm tê la awm chhûngah hian fiahnate kan la tuar mai thei a. Kum 1914-a Pathian Ram din a nih aṭang khân, Setana chu Jehova vânahte kal phal a ni tawh lo. Leiah paih thlâk a ni a, chutah chuan amah leh a vântirhkoh suaksualte chu an tâng a ni. Jehova chhiahhlawh inpumpêk tawhte tihduhdahna pung zêl pawh tiamin, leia chungpikna pung zêl hi Setana thinur vâng a ni a, mihringte chunga a rorêlna suaksual tâwpna hunah kan awm tawh tih a finfiah a ni.—Thup. 12:1-12.

⁶ A dinhmun chhe tak avânga thinur tak Setana chuan hun a nei tlêm tawh hle tih a hria a. A ramhuaiho nên chuan Lalram thu hrilhnaa inrawlh a, Jehova mite inpumkhatna tihchhiat chu a tum nasa hle a. Hei hian “kan buante hi tisa leh thisen an ni si lo, lalnate leh, thuneihnate leh, he thim chunga khawvêl rorêltute leh, vân hmunahte thlarau sualho awmte an ni zâwk e,” tia sawi thlarau lama indona hmatâwngah min awmtîr a ni. Jehova lama ṭanga hnehna chang tûr chuan, kan do zawm zêl a, kan thlarau lam râlthuama kan inthuam tlat a ngai a. Diabola ‘ngamthlêmnate chu kan do’ a ngai bawk a. (Eph. 6:10-17) Chumi atân chuan chhelna kan neih a ngai bawk a ni.

CHHELNA NEI RAWH

⁷ Chhelna tih chu “harsatna tawrh chhuah theihna” a ni a. Thlarau lamah chuan chhelna tih chuan harsatna, dodâlna, tihduhdahna, a nih loh leh Pathian laka kan rinawmna min hlohtîr tûra thil ruahman dangte kan tawn huna ngheh tlatna mizia a kâwk a ni. Kristian chhelna chu neih ngei ngei tûr a ni a. Hun erawh a duh rei a ni. Thlarau lama hma kan sâwn hian kan chhel lehzual ṭhîn. Kristian nun kawng kan zawh ṭan laia kan rinna fiahna ho tê tê kan tawrh chhuah hian kan chak zual sauh va, kan hmaa lo thleng ngei ngei tûr fiahna khirh zâwkte chu kan tuar chhuak thei a ni. (Lk. 16:10) Rinna fiahna lian tham tak takte a lo thlen hunah chauh din ngheh kan tum tûr a ni lo. Fiahna a lo thlen hmain thu tlûkna nghet tak kan siam ngei tûr a ni. Chhelna hi Pathian neih ang mize dangte ruala neih tûr a nihzia târ langin, tirhkoh Petera chuan heti hian a ziak a ni: “Chu mi avâng tak chuan taimâk rêng rêng chhuahin, in rinnaah chuan ṭhatna telh ula, in ṭhatnaah chuan hriatna telh ula, inhriatnaah chuan insûmna telh ula, in insûmnaah chuan chhelna telh ula, in chhelnaah chuan Pathian ngaihsakna telh ula, in Pathian ngaihsaknaah chuan unaute hmangaihna telh ula, in unaute hmangaihnaah chuan hmangaihna telh rawh u,” tiin.—2 Pet. 1:5-7; 1 Tim. 6:11.

⁸ Chhelna neih a pawimawhzia min hriattîrin, Jakoba chuan a lehkha thawnah: “Ka unaute u, in rinna fiahna chuan chhelna a siam tih hriain, thlêmna tinrêng in tawh hunin lâwmna hlîrah ngai rawh u. Tin, engmah tlachham lova in famkim a, in puma in him theih nân chhelna chuan thawk famkim rawh se,” tiin a ziak a. (Jak. 1:2-4) Kristiante chuan thlêmna, a nih loh leh fiahnate chuan chhelna min neihtîr avângin tawrh kan inhuam tûr a ni a, kan tawrh avângin kan hlim tûr a ni tih Jakoba chuan a sawi. Chutiang chuan i thlîr ve em? Tichuan, chhelna chuan kan Kristian miziate a tifamkim zual a, Pathian pawm tlâkah min siam a ni tih Jakoba chuan a târ lang. Ni e, fiahnate kan tawh a, kan tawrh chhuah hian nî tinin kan chhel zual deuh deuh va. Chu chhelna chuan kan mamawh mize duhawm dangte a siam lehchhâwng a ni.

⁹ Kan chhelna chuan Jehova a tilâwm a; chatuana nunna min pe tûrin a chêttîr ang. Jakoba chuan heti hian a sawi belh a ni: “Thlêmna tuar hrâm hrâmtu chu a eng a thâwl e; fiaha a awm hnuin nunna lallukhum, Lalpan amah hmangaihtute hnêna a tiam chu a hmu dâwn si a,” tiin. (Jak. 1:12) Ni e, nunna hmuh tumin chhel takin kan awm a ni. Chhelna tel lo chuan, thutakah kan awm reng thei lo vang. Khawvêl nêksâwrnate avânga kan tlûk chuan, khawvêl lamah loh theih lohvin kan kîr leh ang. Chhelna tel lo chuan, Jehova thlarau kan nei thei lo vang a, a thlarau rah chu kan nunah kan lan chhuahtîr thei lo vang.

¹⁰ Hêng hun khirh takte chhel taka tuar chhuak thei tûr chuan, Kristiante anga hrehawm tawrhna chungchâng thlîr dân dik kan neih a ngai a ni. Jakoba chuan: “Lâwmna hlîrah ngai rawh u,” tiin a ziak tih hre chhuak leh rawh u. Tisa lam leh rilru lama hrehawm tawrhna a tel theih avângin chu chu a awlsam lo thei. Mahse kan nakin hun nun tûr chu dinhmun hlauhawmah a awm tih hre reng ang che u. Tirhkohte thiltawn chuan hrehawm kan tawrh lai pawha hlim theih dân hmu thiam tûrin min ṭanpui a. Chu mi chanchin chu Tirhkohte buah a chuang a, heti hian kan chhiar a ni: “Tirhkohte chu an ko va, an vêl a; an velh zawhin, Isua hminga thu sawi loh tûr ti tlatin an thlah ta a. Chutichuan rorêltute zîng ata an kal chhuak a, chu hming avâng chuan mualpho tuar tlâka ruat an nih avângin an lâwm hle a,” tiin. (Tirh. 5:40, 41) Tirhkohte chuan an hrehawm tawrhnate chu Isua thupêk an âwih tih leh Jehova pawm an hlawh tih târ langtu a nihzia an hre thiam a. Kum tam tak hnua Pathian thâwk khum a lehkha thawn hmasa zâwk a ziah laiin, Petera chuan felna avânga chutiang tawrhnate hlutna chu a sawi a ni.—1 Pet. 4:12-16.

¹¹ Paula leh Sila telna thiltawn dang a awm a. Philippi khuaa missionary hna an thawh laiin, man an ni a, an khua tibuai ang leh dân zawm thiang lote hril angin an puh a ni. Chuvângin, an vuak hrep hnuah an tântîr a ni. Bible chuan, an hliam tuam lohte nêna tân ina an awm laiin, “zan laiah Paula leh Sila chu Pathian hnênah an ṭawngṭai a, hla an sa a, mi tângten an ngaithla” tih a sawi. (Tirh. 16:16-25) Paula leh a ṭhianpa chuan Krista tâna an tawrhna chu Pathian leh mihring hmaa an rinawmna târ langtu anga an ngaih bâkah, chanchin ṭha ngaihthlâk duhna neite hnêna thu hrilhna zau zâwk neihna angin an thlîr a ni. Mi dangte nunna pawh a tel a. Chumi zânah ngei chuan tâng vêngtu leh a chhûngte chuan an ngaithla a, zirtîrte an lo ni ta a ni. (Tirh. 16:26-34) Paula leh Sila chuan Jehova an ring tlat a, a thiltihtheihna leh an hrehawm tawrha chhawmdâwl a duhnate chu an ring tlat a. Tihbeidawn an ni lo.

¹² Tûn laiah pawh hian Jehova chuan fiahnate kan tawh huna kan mamawh zawng zawng ṭanpuina chu min pe a. Chhel tûrin min duh a. A thiltum chungchânga hriatna dik nei tûrin a thâwk khum Thu min pe bawk. Chu chuan kan rinna a tichak a ni. Kan rinpui unaute nêna inkawmhona leh rawngbâwlna thianghlima telho theihna hun ṭha kan nei a ni. Ṭawngṭaina hmangin amah Pathian Jehova nêna inṭhian ṭhatna kan nei bawk. Chuan, amah kan fakna leh a hmaa dinhmun thianghlima kan din nâna tih tak zeta ṭanpui kan dîlnate chu a ngaithla bawk a. (Phil. 4:13) Chu bâkah, kan hmaa beiseina min pêk ngaihtuahna aṭanga kan neih theih chakna pawh kan hmuh hmaih tûr a ni lo bawk.—Mt. 24:13; Heb. 6:18; Thup. 21:1-4.

FIAHNA HRANG HRANGTE TUAR CHHUAKIN

¹³ Tûn laia fiahna kan tawhte hi Isua Krista zirtîr hmasate tawn nên a inang hle a. Tûn laia Jehova Thuhretute chuan thu dik lo an hriat avânga min dodâltute ṭawngkam leh tharum hmanga tihduhdahna chu an tuar a ni. Tirhkohte hun lai ang bawkin, tûn laia dodâlna tam tak chu an zirtîrna leh thiltihte Pathian Thuin a hailansak, sakhaw âtchilhhote tihchhuah a ni fo ṭhîn. (Tirh. 17:5-9, 13) A châng chuan, Jehova mite chuan politics sawrkârte’n an khua leh tuite hnêna an tiam dân ang taka dikna an neihte hmang ṭangkaiin, hahdamna an hmu ṭhîn bawk. (Tirh. 22:25; 25:11) Mahse, rorêltute chuan kan Kristian rawngbâwlna tihtâwp tumin an khap bet ṭhîn bawk. (Sâm 2:1-3) Chutiang dinhmunah chuan: “Mihring thu aiin Pathian thu kan zâwm zâwk tûr a ni,” tia sawitu tirhkoh rinawmte entawn tûr siam chu huaisen takin kan zui a ni.—Tirh. 5:29.

¹⁴ Khawvêl puma hnam hmangaihna a hluar chhoh zêl hian, chanchin ṭha hriltute tân Pathian pêk an rawngbâwlna bânsan tûra nawrna chu a nasa zual a. Pathian chhiahhlawh zawng zawngte chuan Thu Puan 14:9-12-a “sakawlh leh a lem” chibai bûk chungchânga vaukhânna chu an hre thiam lehzual a. Johana thusawi: “Mi thianghlim, Pathian thupêk âwihtute leh Isua zuitu rinawmte tân hetah hian chhel a ṭûlzia a lang,” tih a pawimawhna kan hre thiam a ni.

¹⁵ Indonate, helnate, a nih loh leh hmaichhana tihduhdahnate leh thu hrilh khapnate avânga fiahna lo awmte chuan kan tân Kristiante anga a lang a pauva Pathian biak chu a tiharsa thei a. A kohhran angin kan inhmukhâwm thei lo pawh a ni thei. Branch office nên kan inbe pawh thei lo pawh a ni thei. Bial kantuin min tlawh thei lovin, thu leh hla chhuahte a lo thleng lo pawh a ni thei bawk. Hêngte zînga a engemaw ber hi lo thleng ta se, eng nge i tih ang?

¹⁶ A chhânna chu, chutiang dinhmun hnuaia i tih theih apiang chu a theih anga tamin ti rawh, tih hi a ni. Mahnia inzirna chu neih theih a ni ang a. Group tê têa mi mal ina inhmuhkhâwm theih a ni bawk ang. Thu leh hla chhuah zir tawh hnute leh Bible ngei pawh chu inkhâwmnaah hman theih a ni ang. Lungngai lo ula, hlau lutuk suh u. Governing Body chuan rei rial lovin mawhphurtu unaupate nên engtin emaw taka inbiak pawhna a ruahman thei tlângpui ṭhîn.

¹⁷ I Kristian unau zawng zawngte nên inbe pawh thei lova i awm pawhin, Jehova leh a Fapa, Isua Krista’n an hlat lo che tih hre reng ang che. I beiseina chu a nghet reng thei a. Jehova chuan i ṭawngṭaina a la ngaithla theiin, a thlarau hmangin a la tichak thei reng che a ni. A kaihhruaina dîl rawh. Jehova chhiahhlawh leh Isua Krista zirtîr i ni tih hre reng rawh. Chuvângin, thu hrilh theihna hun remchâng chu ṭha takin hmang rawh. Chutianga i tih chuan, Jehova chuan i ṭan lâknate chu mal a sâwm ang a, mi dangte pawhin biakna dikah an rawn fin ve thuai ang che.—Tirh. 4:13-31; 5:27-42; Phil. 1:27-30; 4:6, 7; 2 Tim. 4:16-18.

¹⁸ Mahse, tirhkohte leh mi dangte angin thih mai hlauhawm dinhmunah i ding a nih pawhin, “Pathian, mitthi kai thotu” chu ring tlat rawh. (2 Kor. 1:8-10) A ruahmanna siam thawhlehna i rinna chuan dodâlna nasa ber pawh tuar chhuak tûrin a ṭanpui ang che. (Lk. 21:19) Krista Isua chuan entawn tûr a siam a; fiahna hnuaia a rinawmna chuan mi dangte pawh chhel tûrin a tichak ang tih a hria a. Chutiang bawkin, nang ngei pawh i unaute tichaktu i ni thei a ni.—Joh. 16:33; Heb. 12:2, 3; 1 Pet. 2:21.

¹⁹ Tihduhdahna leh dodâlna bâkah, dinhmun harsa dangte pawh i tawrh chhuah a ngai thei a. Entîr nân, ṭhenkhat chu an thu hrilhna bial chhûnga mite’n an ngaihsak loh avângin an lunghnual a. Mi dangte chuan anmahni tisa lam emaw, rilru lam emaw dam lohna an tawrh a ngai a, a nih loh leh mihring ṭhat famkim loh avânga tlin lohnate chu an tawrh a ngai a ni. Chutiang chuan tirhkoh Paula pawhin a rawngbâwlna tibuaitu, a nih loh leh a chânga tiharsatu fiahna chi khat a tawrh chhuah a ngai a ni. (2 Kor. 12:7) Chu bâkah, Philippi khuaa mi kum zabi khatnaa Kristian Epaphrodita chu ‘a nâ tih [a ṭhiante’n] an lo hriat avângin nasa takin a lungngai a.’ (Phil. 2:25-27) Keimahni leh mi dangte ṭhat famkim lohna chuan tawrh chhuah harsa tak buaina a tichhuak thei a. Kan Kristian unaute emaw, chhûngkaw zînga mite emaw nên ngei pawh mize inmil lohna kan nei thei. Chûngte chu Jehova Thua fuihna zâwmtute chuan hlawhtling taka tuar chhuakin, an ngam thei a ni.—Ezek. 2:3-5; 1 Kor. 9:27; 13:8; Kol. 3:12-14; 1 Pet. 4:8.

RINAWM TUM TLAT RAWH

²⁰ Jehova’n Kohhranho Lû atâna a ruat, Isua Krista chu kan chelh tlat tûr a ni a. (Kol. 2:18, 19) “Bâwih, rinawm fing tak” leh kohhran upaa ruatte chu kan thlâwp tlat tûr a ni. (Heb. 13:7, 17) Theocratic ruahmannate kan zawm tlat a, hmahruaitute thuâwihna hmangin Jehova duh zâwng ti tûrin kan inrêlbâwl ang. Ṭawngṭai theihna chanvo hlu kan neih hi a kima kan hman ṭangkai a ngai a. Hei hi hre rawh, tân in bangte emaw, inkhung hranna emaw pawhin kan Pa vâna mi nêna kan inbiakna chu a tichat thei lo va, kan unaute nêna kan inpumkhatna lah a tichhe thei hek lo.

²¹ Tho leh Isua Krista’n a hnungzuitute hnêna: “Chutichuan kal ula, hnam tina mi zirtîrahte siam ula, Pa leh Fapa leh thlarau thianghlim hmingah chuan baptis ula, thu ka pêk zawng zawng che u pawm tûrin zirtîr rawh u,” tia mawhphurhna a pêk thu hrilh leh zirtîr siam rawngbâwlnaah tum ruhna leh chhelna nên theih tâwp chhuahin i thawk zêl ang u. (Mt. 28:19, 20) Isua angin i chhel ang u. Lalram beiseina leh chatuana nun beiseina chu kan hmaah fiah takin i dah reng bawk ang u. (Heb. 12:1, 2) Krista zirtîr baptisma chang tawh kan nih angin, “khawvêl tâwpna” chungchânga Isua hrilh lâwkna thlen famkimnaah chuan tel theihna chanvo hlu kan nei a ni. Ani chuan: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tiin a sawi. (Mt. 24:3, 14) He hun chhûnga thinlung taka chu rawngbâwlnaa kan thawh chuan, Jehova felna khawvêl tharah chuan chatuana nunna hlimawm tak chu kan chên thei ang!