Theocratic Intukluhna Chu Hlâwkpui Rawh

JEHOVA duh zâwng ti tûra inrêlbâwl tûr chuan Lei leh Vâna Lalber, Pathian laka intukluh chu a pawimawh a. Kristian kohhrana a Fapa lû nihna kan pawm a, kan nun pêng dangah pawh lû nihna thu bul chu kan zâwm a ni. Chutianga theocratic intukluhna chu kan hlâwkpui ṭheuh a ni.

² Thuneitu hnuaia intukluhna chu Eden huanah khân mihringte hnênah hmêlhriattîr ṭan a ni a. Chu chu Genesis 1:28 leh 2:16, 17-a Pathian thupêkah a tel a ni. Thil siam hnuaihnung zâwkte chu mihringte hnuaiah an intulût tûr a ni a, Adama leh Evi chu Pathian duh zâwng leh thuneihna hnuaiah an intulût tûr a ni bawk. He Pathian thuneihna hnuaia intukluhna hian remna leh engkim fel taka tihna a awmtîr ang. Lû nihna thu bul chu a hnuah 1 Korinth 11:3-ah târ lan a ni a. Tirhkoh Paula chuan: “Mipa tawh phawt lû chu Krista a ni, hmeichhe lû chu mipa a ni, Krista lû chu Pathian a ni tih in hriat ka duh,” tiin a ziak a. Hei hian he ruahmannaah hian Jehova tih loh mi dang zawng chu lû nihna hnuaiah an awm vek tih a târ lang.

³ Tûn laia mi tam zâwkte hian lû nihna thu bul chu an hre lo va, an zâwm hek lo. Engvângin nge? He buaina hi Eden huana kan nu leh pa hmasa berte’n duh rêng vânga Pathian lalchungnunna leh lû nihna aṭanga an inlâk hran khân a inṭan a ni. (Gen. 3:4, 5) Mahse, zalênna tam zâwk an neih phah chuang lo. Thlarau suaksual Diabol-Setana hnuaiah an awm phah zâwk a. Helna hmasa ber khân mihringte chu Pathian lak ata a la hrang a ni. (Kol. 1:21-22) Chuvângin, tûn laia mi a tam zâwkte hi mi sual kut hnuaiah an la awm reng a ni.—1 Joh. 5:19.

⁴ Pathian Thu Bible zir a, a thute zâwmin Setana thununna hnuai aṭangin kan chhuak tawh a. Inpumpêka baptisma chang tawh Thuhretu kan nih angin, Jehova chu kan nuna Lalchungnungberah kan pawm a ni. Jehova chu “mi zawng zawnga chungnung ber” a ni tih pawmtu Lal Davida ngaih dân chu kan pawmpui a ni. (1 Chro. 29:11) Ni e, “LALPA chu Pathian a ni tih hre rawh u: min siamtu chu amah chu a ni a, ama ta kan ni; a mite leh a ran tlatna hmuna berâmhote chu kan ni,” tih inngaitlâwm takin kan pawm a ni. (Sâm 100:3) Jehova chu a ropui a, engkim hi a siam a nih avângin kan intukluhna pumhlûm a phu tih kan pawm a. (Thup. 4:10, 11) Pathian dik rawngbâwltu kan nih angin, Pathian laka intukluhna kawnga entawn tûr ṭha famkim siamtu Isua Krista hnung chu kan zui a ni.

⁵ Isua chuan leia a awm laia a hrehawm tawrh aṭangin eng nge a zir? Hebrai 5:8 chuan: “Fapa meuh pawh ni mah sela, a thil tuarahte chuan thu âwih a zîr ta a ni,” tiin a chhâng a ni. Ni e, harsatna a tawh lai pawhin a Pa vâna mi hnuaiah Isua chu rinawm takin a intulût zêl a. Chu bâkah, ama thuin engmah a ti lo. Ama phuahchawpin a sawi lo va, mahni mawina tûr a zawng hek lo. (Joh. 5:19, 30; 6:38; 7:16-18) Rawng a bâwl chhûngin, mite dodâl leh tihduhdah ni mah se, a Pa duh zâwng tih chu nuam a ti hle. (Joh. 15:20) A Pa hnuaiah a intulût a. “Nghaisakna bana thi” khawp hialin, “a inngaitlâwm” a ni. Jehova laka a intukluh pumhlûmna chuan kawng tam takin rah ṭha a chhuah a; mihringte tâna chatuan chhandamna a pe a, ama tân chawisânna a ni a, a Pa ropuina a ni bawk.—Phil. 2:5-11, NW; Heb. 5:9.

THEOCRATIC INTUKLUHNALANTIRNA TUR HMUNTE

⁶ A duh zâwng tihna hmanga Pathian hnuaia kan intukluh hian, Jehova lalchungnunna hnuaia intulût duh lote tawh ṭhin rilru hahna leh beidawnna tam tak kan pumpelh a ni. Kan hmêlma, Diabola chuan min ei a tum reng a. Diabola chu kan dodâl a, duhrêng vânga Jehova laka inngaitlâwm taka kan intukluh chuan, chu mi sual lak ata chu chhan chhuah kan ni ang.—Mt. 6:10, 13; 1 Pet. 5:6-9.

⁷ Kristian kohhran chhûngah hian Krista lû nihna kan pawm a, “bâwih rinawm, fing tak” hnêna a pêk thuneihna pawh kan pawm a. Chu chuan mi dangte laka kan rilru put hmang leh nungchang a nghawng a ni. Kohhran chhûnga Pathian duh zâwng intukluhna chuan kan biakna pêng tinrênga Pathian Thu âwih tûrin min chêttîr ang. He thu âwihnaah hian kan rawngbâwlna te, inkhâwma kan telna leh zawhna kan chhânna te, upate nêna kan inlaichînnate, leh inawpna pâwl ruahmanna kan thlâwpnate a tel a ni.—Mt. 24:45-47; 28:19, 20; Heb. 10:24, 25; 13:7, 17.

⁸ Pathian laka kan intukluhna chuan Kristian kohhranah remna, muanna, leh engkim fel taka tihna a thlen a. Jehova miziate chu a hnêna intulût a khua leh tuite lakah a lang chhuak a ni. (1 Kor. 14:33, 40) Jehova inawpna pâwla kan thiltawnte chuan Lal Davida rilru ang min neihtîr a. Jehova chhiahhlawhte leh mi suaksualte inan lohna a hmuh hnuah, Davida chuan hlim takin: “LALPA Pathiana nei mite chu lâwm takin an awm ṭhîn,” tiin a sawi chhuak a ni.—Sâm 144:15.

⁹ Inneihna leh chhûngkuaah chuan “hmeichhe lû chu mipa a ni.” Chutih rualin, mipate chu Krista hnuaiah an intulût ang a, Krista lû chu Pathian a ni chhâwng a ni. (1 Kor. 11:3) Nupuite chu an pasalte hnuaiah an intulût ang a, naupangte pawh an nu leh pate hnuaiah an intulût bawk ang. (Eph. 5:22-24; 6:1) Chhûngkuaa mi tinte’n lû nihna thu bul an zawm hian remna a awm ṭhîn.

¹⁰ Pasal chuan Krista entawnin lû nihna chu hmangaihna nei takin a kengkawh tûr a ni a. (Eph. 5:25-29) Lû a nihna a hman sual loh va, kengkawh lo pawha a awm loh hian, a nupui leh a fate chuan a hnuaia intukluh chu nuam an ti ṭhîn. Nupui chanvo chu ṭanpuitu, a nih loh leh tikimtu a ni. (Gen. 2:18) A pasal chu dawhthei taka a ṭanpuina leh a zahna hmangin, a pasal duhsak a hlawh ang a, Pathian a chawimawi ang. (1 Pet. 3:1-4) Pasalte leh nupuite’n lû nihna chungchânga Bible fuihnate an zawm hian, Pathian laka intukluhna kawngah an fate tân entawn tûr an siam a ni.

¹¹ Pathian laka kan intukluhna hian “Pathian ruat” anga sawi theih kan “chunga rorêltute” kan thlîr dân pawh a nghawng a. (Rom 13:1-7) Khua leh tui dân zâwmtu Kristiante kan nih angin, chhiahte pein, ‘Kaisara thilte chu Kaisara hnênah kan pe a, Pathian thilte chu Pathian hnênah kan pe’ a ni. (Mt. 22:21) Chu bâkah, thu hrilhna bial hrût chhuak tûra ruahmannate pawh, mi mal chanchin kawl ṭhatna dân nêna inremin kan siam a. Jehova dân felte a kalh loh chinah chuan thuneitute lakah kan intulût a, chuvângin thu hrilh rawngbâwlnaah kan chakna leh theihnate chu kan hmang thei a ni.—Mk. 13:10; Tirh. 5:29.

¹² Theocratic intukluhna chuan kan nun kawng tinrêng a nghawng a. Rinna mitin mi zawng zawngte Pathian Jehova hnuaia an intukluh hun chu kan hmu a ni. (1 Kor. 15:27, 28) Hlim taka Jehova lalchungnunna pawm a, chatuana a laka intulût rengte chuan Pathian malsâwmna leh duhsakna an va dawng tak êm!