Kohhran Remna leh Thianghlimna Vawng Rawh

KUM TIN hian Bible hrilh lâwknate thleng famkimin, mi sâng tam takte chu Jehova biakna thianghlimah an lût nguah nguah a. (Mik. 4:1, 2) “Pathian kohhranho” zînga lo lawm luh chu nuam kan va ti êm! (Tirh. 20:28) Anni chuan kan ruala Jehova rawngbâwl theihna leh kan thlarau lam paradis muanawm taka awm theihna chu an ngaihlu a. Pathian thlarau thianghlim leh a Thu-a fuihna fing takte chuan remna awmtîr tûr leh kohhran vawng thianghlim tûrin min ṭanpui a ni.—Sâm 119:105; Zak. 4:6.

² Bible tehnate zâwmin, ‘mihring tharin’ kan inthuam a. (Kol. 3:10) Inhnialna leh mi mal inrem lohna tênaute chu kan dah ṭha a. Jehova thlîr dân anga thil thlîrin, inṭhen hranna awmtîrtu khawvêl thununnate chu ngamin, khawvêl pumah unau anga inpumkhatin kan thawkho a ni.—Tirh. 10:34, 35.

³ Chuti chung pawhin, kohhran remna leh inpumkhatna tichhe thei harsatna a thlen châng a awm ṭhîn. Eng nge a chhan? A tam zâwkah chuan, Bible fuihnate zawm loh vâng a ni tlângpui ṭhîn. Kan mihring ṭhat famkim lohna kan la chai reng a. Tumah hi sual nei lo kan awm si lo. (1 Joh. 1:10) Tuemaw chuan nungchang bawlhhlawhna, a nih loh leh thlarau lama thianghlim lohna kohhran chhûngah thlen thei kawng sual a zawh ṭan thei a. Ngaihtuah chiang lova kan thusawi emaw, kan thiltih emaw chuan mi rilru a tina thei a, a nih loh leh mi dang ṭawngkam leh thiltih chu tlûk phah nân kan hmang pawh a ni thei. (Rom 3:23) Hetiang hunah hian, siam ṭha tûrin eng nge kan tih theih?

⁴ Jehova chuan hmangaih takin hêng thilthleng theite hi a ngaihtuah tel vek a. A Thu chuan harsatna a lo chhuah huna chinfel dân tûr min hrilh a ni. Hmangaihna ngah tak thlarau lam berâm vêngtu, kohhran upate hnên aṭangin mi mala ṭanpuina kan dawng thei a. Bible aṭanga fuihna min pêkte zawmna aṭangin, mi dangte nêna inlaichînna ṭha kan nei leh thei a, Jehova hmaah dinhmun ṭha kan nei zêl thei a ni. Thil sual kan tih avânga thunun leh zilh kan nih chuan, chutiang siam ṭhatna chu kan Pa vâna mi’n min hmangaih vâng a ni tih kan chiang thei a ni.—Thuf. 3:11, 12; Heb. 12:6.

INREM LOHNA TE THAMTE CHINFEL DAN

⁵ Kohhran mite inkârah inhnialna emaw, harsatna tê tham emaw a lo chhuah châng a awm thei a. Chûng chu unau inhmangaihna nei chunga a rang thei ang bera chinfel tûr a ni. (Eph. 4:26; Phil. 2:2-4; Kol. 3:12-14) Kristian unaute inkâra harsatna awmte chu tirhkoh Petera fuihna: “Inhmangaih tawn uar rawh u; hmangaihnain sual tam tak a khuh si ṭhîn,” tih nunpuina aṭanga chinfel theih a ni tih i hmuh ngei a rinawm. (1 Pet. 4:8) Bible chuan: “Thil tam tak kan tisual fo ṭhîn,” tiin a sawi a. (Jak. 3:2) Dân Rangkachak kan zâwm a, miin kan chunga an tih atâna kan duh anga an chunga kan tih chuan, lungnih lohna tê thamte chu kan ngaidamin, kan theihnghilh thei tlângpui ṭhîn.—Mt. 6:14, 15; 7:12.   

⁶ I thusawi emaw, thiltih emawin tuemaw a tilungawi lo tih i hriat chuan, vuaicha lovin remna siam tûrin hma i la nghâl tûr a ni. Chutah chuan, Jehova nêna in inlaichînna pawh a tel tih hre reng rawh. Isua chuan a zirtîrte chu: “Chutichuan, maichâm bula i thilpek i hlan lai ngeia i unauvin i chungah lungnih lohna a nei tih i hriat chhuah leh chuan, chuta maichâm hmaah chuan i thilpêk chu hnutchhiah la, kal langin i unau rem zet la, chu mi hnuah chuan i thilpêk chu rawn hlân rawh,” tiin a hrilh a ni. (Mt. 5:23, 24) Inhriat sualna a awm pawh a ni thei a. Chutiang a nih chuan, inbiak pawhna kawng hawng rawh. Kohhrana mi tinte nêna inbiak pawhna ṭha neihna chuan inhriat sualna awm tûr a vêng a, mihring ṭhat famkim loh vânga lo awm harsatnate chingfel tûrin a ṭanpui a ni.

BIBLE ṬANCHHAN ZILHNATE PEK DAN

⁷ Upate chuan tuemaw rilru put hmang chu siam ṭha tûra zilhna pêk ngai an tih châng a awm thei a. Chutianga zilhna pêk chu a awlsam reng lo mai thei. Galatia rama Kristiante hnênah tirhkoh Paula chuan: “Unaute u, mi, sual engpawh a tih lai phâwkin awm sela, . . . chutiang mi chu thuhnuairawlh takin tungding leh rawh u,” tiin a ziak a ni.—Gal. 6:1.

⁸ Berâmte vêngin upate chuan thlarau lama thil hlauhawm tam tak lakah kohhran chu an vênghim thei a, buaina lian tham takte thleng lo tûrin an vêng thei bawk. Upate chuan kohhrana an rawngbâwlnaah Isaia hmanga Jehova thusawi: “Thlipui laka bîkna hmun ang leh thlihrâng laka inhumhimna ang a ni ang; thlalêra lui luang ang leh ramrova lungpui lian tak hlim ang mai chu,” tih chu tlin an tum a ni.—Is. 32:2.

DAN LO ANGA AWMTE CHHINCHHIAH DAN

⁹ Tirhkoh Paula chuan kohhran chunga thununna ṭha lo nei thei mi ṭhenkhat chungchângah vaukhânna thu a sawi a. Ani chuan: “Unaute u, kan hnên ata thurochhiah an hmuh anga awm lova, dân lo anga awm unau tinrêngte lakah chuan inthiarfihlîm tûrin . . . thu kan pe a che u,” tiin a sawi a. Chu a thusawi chu: “Tu pawhin he lehkha thawna kan thu hi a zawm loh chuan chu mi chu in pâwl hauh loh nân chhinchhiah rawh u, a zah theihna tûrin. Nimahsela hmêlma angah zawng ruat suh ula, unau angin zilh zâwk rawh u,” tia ziakin a hrilhfiah a ni.—2 Thes. 3:6, 14, 15.

¹⁰ A châng chuan, kohhran aṭanga hnawh chhuahna khawp thil sual ni si lovin, Kristiante nunpui tûr Pathian tehnate a lang a pauva zah lohna lantîrtu a awm thei a. Chutah chuan a lutuka thatchhiatna, mi dang sawichhiatna, a nih loh leh thianghlim lohnate a tel thei. Ani chu ‘mi dang thilah a inrawlh buai chhên ṭhîn’ pawh a ni thei. (2 Thes. 3:11, Mizo King James Version) Mi dangte hnên aṭanga sum leh pai lama hlâwkna hmuh a tum emaw, intihhlimna ṭha lo tih chiang takahte a telin, a en emaw pawh a ni thei. He dân lo anga awmna hian kohhran chungah nghawng ṭha lo a nei theiin, Kristian dangte pawh a kângkai hial thei a ni.

¹¹ Chutiang mi chu upate’n Bible aṭanga fuihna pein, ṭanpui an tum phawt ang. Mahse, zilhna vawi tam tak pêk a nih hnuah pawh Bible thu bulte chu a zah lo zawm zêl a nih chuan, upate chuan kohhranah vaukhânna thusawi neih an rêlthlu thei a. Upate chuan dinhmun pakhat chu vaukhânna thusawi neih ngai khawp leh mi dangte tibuai thei khawpa ṭha lo a ni tih nemngheh nân hriat thiamna an hmang ang. Thusawitu chuan nungchang ṭha lo chungchângah zilhna inâwm tak a sawi ang a; mahse, dân lo anga awmtu hming chu a sawi lang lo vang. Tichuan, thusawia târ lan nungchang neitu chu tu nge a nih hretute chuan chumi chu an kâwm tawh lo vang a, thlarau lam thiltihahte erawh chuan kâwmin, ‘unau angin an zilh zâwk ang.’

¹² Kristian rinawmte dinnghehna chuan dân lo anga awma chu a nun dân avânga zak tûr leh inthlâk danglam tûrin a chêttîr ang. Kawng dik lo a zawh tawh lo tih chiang taka hriat a nih hnuah chuan, ani chu chhinchhiah anga en a ngai tawh lo vang.

SUAL PAWI TAK ṬHENKHAT CHINGFEL DAN

¹³ Lungnih lohnate ngaihthaha kan ngaihdam hian, thil sual chu kan ngai pawimawh lo emaw, kan pawm emaw tihna a ni lo. Thil tihsual zawng zawng chu kan rochun ṭhat famkim lohna vâng niin kan puh reng thei lo va; lungnih lohna tê tham lote ngaihthah chu a dik hek lo. (Lev. 19:17; Sâm 141:5) Dân thuthlung chuan Sual ṭhenkhat chu a dang aiin a pawi zual tih a sawi a, Kristian inrêlbâwlnaah pawh chutiang tho chu a ni.—1 Joh. 5:16, 17.

¹⁴ Isua chuan Kristiante inkâra harsatna lian tham thleng theite chinfel dân a târ lang a. A chinfel dân a sawi hi lo chhinchhiah ang che: “I unauvin i chungah thil tisual sela, [1] kal la, amah leh nangmah chauhva hriatah a sualnaah chuan zilh ang che; a ngaihthlâk che chuan i unau chu i hneh [a nih loh leh, i hmin] a ni tawh ang. A ngaihthlâk loh che erawh chuan, [2] mi dang pakhat emaw pahnih emaw i hnênah hruai ang che, chutichuan thu tinrêng chu hretu pahnih emaw, pathum emaw kaa tihngheha a awm theih nân. Tin, anni pawh chu a ngaihthlâk duh loh chuan, [3] kohhranho hnênah thlen ang che; tin, kohhranho pawh a ngaihthlâk duh loh chuan, ani chu i tân Jentail leh chhiahkhawntu ang ni rawh se.”—Mt. 18:15-17.

¹⁵ A dawta Isua tehkhin thu sawi, Matthaia 18:23-35-a chhinchhiah ngaihtuah chuan, Matthaia 18:15-17-a thil sual chungchâng a sawi chu, sum pûk rulh lohna emaw, inbumna emaw ang chi, sum leh pai lam leh in hmun lo ram lam chungchâng niin a lang a. A nih loh leh, mi tuemaw hming nasa taka tichhe thei insawi chhiatna ang chi a ni thei bawk.

¹⁶ Kohhrana tuin emaw chutiang thil sual chu i chungah a ti tih finfiahna i nei a nih chuan, i tâna inrawlh tûrin upate ṭanpuina dîl chu hmanhmawh suh. Isua sawi angin, i chunga thil dik lo titu nia i ngaiha chu be hmasa rawh. Mi dang tel lovin in pahnih inkârah chauh chinfel tum phawt rawh. Isua chuan ‘vawi khat chauh kal la, a sualnaah chuan zilh rawh,’ a ti lo tih hria ang che. Chuvângin, a thil sual tih chu a pawm duh loh va, ngaihdam a dîl duh loh chuan, ni danga biak leh dân ngaihtuah chu a ṭha mai thei. Chutiang zâwnga chinfel theih a nih chuan, mi dang i hrilh loh vâng leh kohhrana a hming i tihchhiatsak loh avângin thil sual titu chu a lâwm ngei ang a. ‘I unaupa chu i hmin a ni ang.’

¹⁷ Thil tisualtu chuan a mawhphurhnate a pawm a, ngaihdam a dîl a, thil sual chu siam ṭha tûra hma a lâk chuan, thu buai kalpui zawm zêl a ngai lo. A thiltih chu sual pawi tak ni mah se, hetiang chi chu mi pahnih inkâra chinfel theih a ni.

¹⁸ I unau chu “amah leh nangmah chauhva hriatah” a thil sual tih a sawi chhuah hnua hneh theih a nih loh chuan, Isua sawi angin ‘mi dang pakhat emaw pahnih emaw i hnênah hruaiin,’ i unaupa chu be leh rawh. I mi hruaite pawh chuan i unaupa hmin chu an tum tûr a ni. I mi hruaite chu a thil tihsual hmutute ni thei se a ṭha ber a; mahse, mita hmutu an awm lo a nih pawhin, in thu sawidun lai lo hriatpuitu tur mi pahnih khat dang hruai chu i thlang thei ang. Chûng mite chu chutiang thu buai lo hmachhawn tawh emaw, thilthleng chu a dik leh dik loh hre theitu emaw an ni tûr a ni. Hriatpuitu atâna thlan upate chu kohhrana upate ruat an nih loh avângin anni chuan kohhran ai an awh lo.

¹⁹ Amah chauhva vawi tam tak i biak tawh a, mi dang pahnih khat hruaia tâwk fang i biak tawh hnu pawha buaina in chinfel theih loh va, i ngawih bopui theih si loh chuan, kohhran upate hnênah thil awm dân chu i hrilh tûr a ni. Upate thiltum chu kohhrana remna leh thianghlimna vawn a ni tih hre reng ang che. Upate hnêna i thlen tawh chuan Jehova rinchhanin an chinfelah dah ang che. Mi tuemaw nungchang chuan a tihtlûk che emaw, Jehova rawngbâwlnaa i hlimna a lâksak che emaw chu i phal ngai tûr a ni lo.—Sâm 119:165.

²⁰ Berâm vêngtute chuan thil awm dân chu an chhui chiang ang a. Thil sual tia puh chuan i chungah thil pawi tak a tihsual a, a inchhîr duh lo va, a âwm tâwk anga siamṭhat nâna hma a la duh lo tih finfiah a nih chuan, kohhran hruaitute chuan thilsual titu chu kohhran aṭanga an hnawhchhuah a ngai pawh a ni thei. Chutiang chuan, an berâmte chu an vênghimin, kohhran thianghlimna an vawng a ni.—Mt. 18:17.

SUAL PAWI TAKTE TIHVEN DAN

²¹ Inngaihna, uirêna, mawngkawhurna, Pathian sawichhiatna, kal pênna, milem biakna, leh chutiang chi sual pawi takahte chuan a tuartu mi malin a ngaihdam mai aia tam a ngai a. (1 Kor. 6:9, 10; Gal. 5:19-21) Thlarau lam leh nungchang lama kohhran thianghlimna tihchhiat a hlauhawm avângin, chutiang thil sual pawi takte chu upate hnêna hrilh ngei tûr a ni a, anni’n an lo tiveng ang. (1 Kor. 5:6; Jak. 5:14, 15) Mi ṭhenkhat chuan an thil sual tih emaw, mi dangte thil sual tih an hriatte hrilh tûr emawin upate an pan pawh a ni thei. (Lev. 5:1; Jak. 5:16) Baptisma chang tawh Thuhretu thil sual tih chungchâng an hriat dân chu eng pawh nise, upa pahnih chuan thil awm dân chu an chhui hmasa ang a. Thil sual pawi tak tih a ni ngei tih a chian a, finfiahna a awm chuan, kohhran upate chuan chingfel tûrin upa pathum tal awmna judicial committee chu an din ang.

²² Kohhran upate chuan ngun takin berâmte an vêng a, thlarau lama chhiatna thlen thei rêng rêng lakah vênhim an tum ṭhîn. Thil sual titu apiang siam ṭha a, thlarau lama hrisêl ṭha leh tûra ṭanpui nân Pathian Thu thiam taka hman an tum a ni. (Jud. 21-23) Hei hi tirhkoh Paula’n Timothea hnêna kaihhruaina a pêk: “Pathian mithmuh leh mi nung leh mitthi ngaihtuahtu tûr Krista Isua mithmuhah chuan . . . ṭhahnemngai takin ka hriattîr a che: . . . dawh thei taka zirtîr chungin an thiam loh hriattîr la, zilh la, fuih rawh,” tih nên a inrem a. (2 Tim. 4:1, 2) Chutianga ti tûr chuan hun tam tak pêk a ngai mai thei; mahse, hei hi upate thawhrimna tûr zînga pakhat a ni. Kohhran chuan an thawhrimna chu a ngaihlu a, anni chu “chawimawi tlâkah” an ruat a ni.—1 Tim. 5:17.   

²³ Thil sual tihna a awm tih chian a nih apiangin, kohhran upate thiltum ber chu thil sual titu thlarau lam hrisêlna ṭha nei leh tûra ṭanpui hi a ni a. Inchhîrna tak tak a neih a, upate’n an ṭanpui theih chuan a fâlin emaw, thu buai ngaihtuah laia thuhretu anga ṭangte hmaah emaw zilhhauna an pê ang. Chu chuan a lo hmutute thinlungah hlauhna ṭha a tuh ang. (2 Sam. 12:13; 1 Tim. 5:20) Chutianga zilhna tâwk apiangte chu khuahkhirh an ni ṭhîn a. Chutiang chuan thil sual titu chu a kête tân “kawng ngîlte” siam tûra ṭanpui a ni thei a ni. (Heb. 12:13) Nakinah, thlarau lamah a ṭha chho tawh tih a lan chuan khuahkhirhnate chu hlihsak a ni ang.

ZILHNA PEK CHUNGCHANGA THU PUANCHHUAHNA

²⁴ Mi chu a inlamlêt tih judicial committee chuan hre mah se, thilthleng chu kohhranah emaw, tualchhûngah emaw tlâng hriat a nih ngei dâwn emaw, a nih loh leh thil sual ti inlamlêttu chungchângah kohhran chu vaukhân a ngai emaw a nih chuan Nun leh Rawngbâwlna Inkhâwm neih hunah thu puanchhuahna tawi tê neih a ni ang. “[A hming] chu zilhna pêk a ni,” tiin.

HNAWT CHHUAK TURA THU TLUKNA SIAM A NIH CHUAN

²⁵ A châng chuan, thil sual titu chuan a thilsual tih chu ti zawm zêlin, ṭanpui an tumna chu a lo hnâwl thei a. Upate’n an kawm laiin ‘sim hming pu tlâka thil a tihna’ a lang tâwk lo pawh a ni thei. (Tirh. 26:20) Engtin nge ni ta ang? Chutiang a nih chuan, thil sual ti inlamlêt duh lotuin Jehova mi thianghlimte a kawm theih loh nân, kohhran aṭanga hnawhchhuah a ngai a ni. Kohhran chunga thil sual titu nghawng ṭha lo neih chu tihbona hmangin nungchang lam leh thlarau lama kohhran thianghlimna chu vawn ṭhat a ni a, a hming ṭha pawh vênhim a ni bawk. (Deut. 21:20, 21; 22:23, 24) Tirhkoh Paula chuan Korinth kohhrana mi pakhat nungchang zahpuiawm tak chungchâng a lo hriatin, kohhran upate chu ‘mi chutiang chu, [kohhran] thlarau chhandamin a awm theih nân Setana hnêna pe’ tûrin a zilh a ni. (1 Kor. 5:5, 11-13) Paula chuan kum zabi khatnaa thutak laka hel, hnawhchhuaha awm mi dangte chungchâng a sawi bawk.—1 Tim. 1:20.

²⁶ Inlamlêt duh lo thil sual titu chu hnawt chhuak tûra thu tlûkna siam a nih tawh chuan, Judicial committee chuan amah chu an hrilh tûr a ni a, hnawh chhuah a nih chhan chu Bible aṭangin chiang takin an hrilh tûr a ni. Chutianga an hrilh hunah judicial committee chuan an rorêl dânah dik lohna nasa tak awm nia a hriat a, ngaihtuah ṭha tûra dîl a duh chuan, a chhan chiang taka ziakin a thehlût tûr a ni tih an hrilh tûr a ni. Chumi atân judicial committee thu tlûkna hrilh a nih aṭanga chhiar ṭanin, ni sarih chhûng hun pêk a ni ang. A chung thu ngaihtuah ṭha tûra dîlna chu dawn a nih chuan, kohhran upate chuan bial kantu an bia ang a, ani chuan upa tling takte chu ngaihtuah nawn tûrin a ruat ang. Ngaihtuah ṭha tûra ziaka dîlna dawn a nih hnu chawlhkâr khat chhûnga ngaihtuah ngei an tum ang. Chutianga dîlna a awm chuan, hnawh chhuah chungchânga thu puanchhuahna chu la puan hrih loh tûr a ni. Chutih chhûng chuan, thil sual ti nia puh chu inkhâwmnaa chhânna a pêk te, inkhâwmnaa ṭawngṭaite, chanvo hlu dang a neihte chu phalsak a ni lo vang.

²⁷ Ngaihtuah ṭha tûra dîlna chu thil sual ti nia puh chunga ngilneihna lantîr nâna pawmsak a ni a, a thil vei zâwngte ngaihthlâk zawmsak a ni. Mahse, an ngaihtuah ṭhat hunah thil sual titu chu a inlan duh lo lui a nih chuan, a âwm tâwka biak pawh tum a nih hnuah hnawh chhuah a nih thu puan tûr a ni.

²⁸ Thil sual titu chuan ngaihtuah ṭha tûra dîl a duh loh chuan, inlamlêt a ngaihzia leh a hnua lâkluh leh a nih theih nâna hma a lâk theih dânte chu judicial committee chuan a hrilhfiah ang a. Hei hi, a nun kawng a thlâk ang a, Jehova inawpna pâwlah a lo kîr leh ang tih beiseina nei chunga hrilh tûr a ni.—2 Kor. 2:6, 7.

HNAWHCHHUAH CHUNGCHANGA THU PUANCHHUAHNA

²⁹ Inlamlêt duh lo thil sual titu chu kohhran aṭanga hnawhchhuah a ngaih hunah: “[A hming] chu Jehova Thuhretute zînga mi a ni tawh lo,” tia sawiin thu puanchhuahna tawi tê neih a ni ṭhîn a. Chu chuan hnawhchhuaha chu kâwm tawh lo tûrin kohhrana mi rinawmte chu a hriattîr ang.—1 Kor. 5:11.

KAWMSERH

³⁰ “Kawmserh” tih thu mal hi Thuhretu baptisma chang tawhin, Jehova Thuhretute zînga mi nih leh an zînga mi anga hriat a duh tawh loh thu sawia a, duhrêng vânga Kristian nihna hnâwltu hmalâkna a ni. A nih loh leh, ani chuan Bible zirtîrna nêna inkalh thiltum a neih avânga Pathian rorêlna tâwk tûr khawvêl inawpna pâwl a engemaw bera telin, a thiltih hmangin Kristian kohhran a hnâwl pawh a ni thei bawk.—Is. 2:4; Thup. 19:17-21.

³¹ Tirhkoh Johana chuan a hun laia an Kristian rinna hnâwltute chungchângah heti hian a ziak a ni: “Anni chu kan zîng aṭangin an chhuak a, nimahsela keimahni mi tak an ni lo ve; keimahni mi tak ni sela kan hnênah an awm ve zêl tûr a ni si a,” tiin.—1 Joh. 2:19.

³² Mi chu kawmserha a insiam hian, Jehova hmaa a dinhmun chu rawngbâwlnaa tel tawh lo Kristian nên chuan a inang lo hle. Pathian Thu a zir ziah tawh loh avângin mi chu rawngbâwlnaah a tel tawh lo pawh a ni thei a. A nih loh leh, mi mal harsatna emaw, tihduhdahna emaw a tuar a, Jehova rawngbâwlnaah phûrna a hloh pawh a ni thei. Chutiang rawngbâwlnaa tel tawh lote hnênah upate leh kohhrana mi dangte chuan thlarau lama ṭanpuina inâwm tak an pe zawm zêl ang.—Rom 15:1; 1 Thes. 5:14; Heb. 12:12.

³³ Chumi nêna inkalh takin, Kristian pakhatin kawmserh nih a thlang a nih chuan: “[A hming] chu Jehova Thuhretute zînga mi a ni tawh lo,” tia sawiin, kohhran hriattîr nân thu puanchhuahna tawi tê neih a ni ṭhîn. Chutiang mi chu kohhran aṭanga hnawhchhuah nên inang khata thlîr a ni.

LAK LUH LEHNA

³⁴ Kohhran aṭanga hnawhchhuah emaw, kawmserh nih thlangtu emaw chuan a inlamlêt tih chiang taka a târ lan a, hun engemaw chen a kawng sual zawh a bânsan tawh tih a târ lan chuan lâk luh a ni leh thei a. Jehova nêna inlaichînna ṭha neih a duhzia a târ lang a. A inlamlêt tak zet a ni tih finfiah nân upate chuan fîmkhur takin hun tam tâwk—dinhmun azirin thla tam tak, kum khat, a nih loh leh chu aia tam pawh—an liamtîr a. Kohhrana upate chuan lâk luh leh ni tûra ziaka ngenna an dawn hnuah, lâk luh lehna ngaihtuahtu reinstatement committee chuan ani chu an bia ang. Chu committee chuan “sim hmingpu tlâka thil” a tihzia finfiahna chu an bûk ang a, pawm chi a nih leh nih loh thu tlûkna an siam ang.—Tirh. 26:20.

³⁵ Kohhrana lâk luh leh dîltu chu kohhran dang aṭanga hnawhchhuah a nih chuan, tualchhûnga reinstatement committee chuan a dîltu chu kâwmin, a dîlna chu an ngaihtuah ang. Chu reinstatement committee chuan lâk luh leh a ṭha nia a hriat chuan, amah hnawtchhuaktu kohhrana upate hnênah lâk luh leh ṭha an tih thu an hriattîr ang a. Chûng committee-te chuan thu tlûkna dik tak siam nâna mamawh thu dik tak an neih theih nân an thawkho vang. Mahse, la lût leh tûra thu tlûkna chu atîra thu buai ngaihtuahtu kohhrana reinstatement committee siam tûr a ni.

LAK LUH LEH CHUNGCHANGA THU PUANCHHUAHNA

³⁶ Hnawhchhuaha emaw, kawmserha emaw chu a inlamlêt tak zet a, lawm luh leh tûr a ni tih reinstatement committee-in a rin ngheh chuan, thu buai chinfel a nihna kohhranah chuan lâk luh leh a nih thu chu puan tûr a ni. Kohhran danga a awm tawh chuan, chutah pawh chuan puan tûr a ni bawk. “[A hming] chu Jehova Thuhretute zînga pakhat anga lâk luh leh a ni,” tia puan mai tûr a ni.

BAPTISMA CHANG TAWH KUM TLING LONAUPANGTE THU BUAI

³⁷ Baptisma chang tawh kum tling lo naupangte’n thil sual pawi tak an tih chu upate hnêna thlen tûr a ni. Upate’n kum tling lote thil sual tih pawi tak an chinfel hunah chuan baptisma chang tawh a nu leh pate an awm ve chu duhthusâm a ni. Anni chuan judicial committee thawhpui ang a, a ṭûl anga zilhna a dawnna tûr lakah an fa chu hum an tum lo vang. Puitling thil sual titu ang thovin, judicial committee chuan thil sual titu chu zilh a, siamṭhat a tum a. Amaherawhchu, naupang chu a inlamlêt duh loh chuan hnawhchhuah a ni ṭhîn.

THIL SUAL TITU CHU BAPTISMA LA CHANG LO THUCHHUAHTU A NIHIN

³⁸ Baptisma la chang lo thuchhuahtu chu thil sual pawi tak tihnaa a tel huna tih tûr chu eng nge ni? Anni chuan baptisma an la chan loh avângin, hnawhchhuah theih an ni lo va. Mahse, Bible tehnate an hriat thiam vek loh vâng a ni thei a, ngilnei taka zilhna chuan an kete atâna “kawng ngîlte” siam tûrin a ṭanpui thei ang.—Heb. 12:13.

³⁹ Chu baptisma la chang lo thil sual titu chu upa pahnihin an biak hnuah pawh a inlamlêt lo a nih chuan, kohhran hriattîr a ngai a ni. “[A hming] chu baptisma chang lo thuchhuahtu a ni tawh lo,” tia sawiin tawi têa puan chhuah a ni ang. Chutiang chuan, kohhran chuan khawvêl mi angin a thlîr ang a. Hnawhchhuah ni lo mah se, Kristiante chu eng kawng maha kâwm lo tûrin an fîmkhur ang. (1 Kor. 15:33) Thlawhhma rawngbâwlna report pawh pawmsak a ni lo vang.

⁴⁰ A hnuah, thuchhuahtu aṭanga bântîr baptisma chang lo chuan thuchhuahtu nih leh a duh thei a. Chutiang dinhmunah chuan, upa pahnihin an kâwm ang a, thlarau lama hma a sâwn dân chu an en ang a. A tling a nih chuan: “[A hming] chu baptisma la chang lo thuchhuahtu anga pawm a ni leh tawh e,” tia tawi têa puan a ni ang.

JEHOVA CHUAN INREM LEH THIANGHLIM TAKABIAKNA MAL A SAWM

⁴¹ Tûn laia Pathian kohhrana awm zawng zawngte chuan Jehova’n a mite hnêna a pêk thlarau lam hausakna chu an chên thei a. Kan thlarau lam hlobet chu a hring nuam hle a, mi tihahdam thei tak thutak tui in tûr tam tak kan nei a ni. Krista kaihhruaina hnuaia theocratic ruahmanna hmangin Jehova vênhimna kan dawng bawk. (Sâm 23; Is. 32:1, 2) Hun hnuhnûng buaithlâk taka thlarau lam paradis-a kan awmna hian him nia inhriatna min pe a ni.

⁴² Kohhranah remna leh thianghlimna vawngin, kan Lalram thutak êng chu kan êntîr zawm zêl a. (Mt. 5:16; Jak. 3:18) Pathian malsâwmna nên, mi tam lehzualte’n Jehova an lo hriat a, a duh zâwng min tihpui kan hmuh avânga hlimna chu kan nei ngei ang.