Khawvêl Puma An Inawpna Pâwl leh An Rawngbâwlna
RAM 235-a thuhrilh rawngbâwlna kaihhruai nân hmanraw chi hrang engemaw zât hman a ni a. A tlângpui thuin inkaihhruaina chu hmun pui ber Brooklyn, New York-a Governing Body aṭanga lo kal a ni. Governing Body chuan kum tinin khawvêl hmun hrang hranga branch aiawhtute hmu tûrin palai a tîr a. Branch office tinah chuan a ram chhûnga rawngbâwlna enkawl tûrin Branch Committee member an awm a, mi pathum aṭanga pasarih an ni tlângpui. Branch ṭhenkhat chuan lehkha chhutna khâwl a nei a, ṭhenkhat chuan lehkha chhutna khâwl chak chi (high-speed rotary press) a hmang a ni. Branch tinin a enkawl ram emaw, hmun emaw chu district-a ṭhen darh a ni a; tin, district chhûng chu circuit anga ṭhen darh a a ni leh bawk. Tin, circuit tinah chuan kohhran 20 vêl ṭheuh a awm a. District overseer chuan a bial huam chhûnga circuit te chu a tlawh kual ṭhîn. Circuit tinah chuan kum tin inkhâwmpui pahnih neih ṭhin a ni a. Tin, circuit overseer a awm leh a, chu chuan a bial chu kum khatah vawihnih a tlawh chhuak ṭhîn a, chu a thlawhna kohhrana Thuhretute chu an biala thuhrilh rawngbâwlna huaihawtpuiin a thawhpui bawk ṭhîn.
Tualchhûng kohhran leh a Kingdom Hall chu in vênga chanchin ṭha hrilhna hmunpui ber a ni a. Kohhran tinte bial chan chu chu mâp te tak tê tê siama ṭhen hran a ni. Chûng chu a mi chêngte an ina va tlawh a, thu hrilh tum ṭâng ṭâng Thuhretu mi malte hnêna pêk a ni a. Thuhretu tlêm tê aṭanga 200 vêl awmna kohhran tinah chuan hna chi hrang hrang enkawltu upate an awm a. Jehova Thuhretute inawpna pâwlah chuan chanchin ṭha puangtute chu an pawimawh hle a ni. Headquater-a thawk an ni emaw, branch-a thawk an ni emaw, a nih loh leh kohhrana awm an ni emaw pawh ni se, Thuhretu zawng zawngte chuan he thlawhhma rawngbâwlna, mi mala Pathian Lalram chungchâng mi dangte hrilhna hi an thawk ṭheuh a ni.
Chûng an rawngbâwlna chanchin zawng zawng chu a tâwpah headquarter a thleng vek a; tichuan, Yearbook buatsaih a, chhuah a ni ṭhîn a ni. Chu bâkah, kum tinin January 1, chhuak Vênnainsâng-ah târ lan ziah a ni bawk. Hêng thu leh hla chhuah pahnihahte hian Jehova chanchin leh Isua Krista hnuaia a Lalram chanchin hrilhnaa thawh chhuahte chu kimchang taka târ lan a ni. Tûn hnai kumahte chuan Thuhretute leh tuina nei mite belhkhâwmin mi 15,000,000 chu kum tina Isua thih Hriatrengnaah chuan an tel a. Jehova Thuhretute chuan kum tinin chanchin ṭha hrilhnaah dârkâr 1,100,000,000 chuang an hmang a, mi thar 250,000 aia tamin baptisma an chang bawk. Thu leh hla sem chhuah zât belhkhâwm chu maktaduai za tam tak a ni bawk.