In Khawtlâng Tâna Chanchin Ṭha Ṭangkaina

TÛN LAI khawvêlah hian: “Kristianna thu bulte hi a chhawr tlâk loh. Tûn lai khawtlâng buai nuai nuai kârah hian eng a ni thlâwt lo vang e,” tia an ngaih dân sawite kan hre fo va. Nimahsela, Mohandas K. Gandhi-a leh tûn hmaa British Aiawha India Ram Awptu lo ni ṭhîn, Lord Irwin-a te inbiakna hian ngaih dân dang lam tak mai a târ lang thung. Chutah chuan Lord Irwin-a chuan Gandhi-a chu Great Britain leh India ram inkâra buaina chingfel thei tûr nia a rin chu a zâwt a ni âwm a. Gandhi-a chuan Bible lain, Matthaia bung 5-na a keu hnuah: “I ram leh ka ramin Krista’n Tlâng chunga a Thusawi hi kan zawm hunah chuan, kan rama buaina chang ni lovin, khawvêl pum buaina pawh hi kan tifel thei ang,” tiin a hrilh a ni.

Chu thusawiah chuan thlarau lam thil zawn leh thuhnuairawlh nih te, remna siamtu nih te, mi khawngaih thei nih te, leh felna hmangaihtu nih te a tel vek a. Tual thah chu a dem mai ni lovin, mi dangte chunga thinrim pawh a dem a; uirê mai ni lovin, ngaihtuahna bawlhhlawh pawh a dem bawk. Chhûngkua tidarha naupangte tiretheitu, thuhnudâwn lova nupa inṭhennate pawh a sawichhe bawk a ni. Hetiang hian min hrilh bawk: ‘Nangmah hawtu che pawh hmangaih la, mamawhte hnênah pe la, mi dangte chungthu râwng takin rêl suh, miin cheibâwl che se i duh tûr angin mi dangte pawh cheibâwl rawh’ tiin. Hêng zirtîrna zawng zawngte hi nunpui a nih phawt chuan, hlâwkna nasa tak a rah chhuak ngei dâwn a ni. In khawtlângah hêng zirtîrnate nunpuitu an tam poh leh in khua hian a ṭhatpui ting mai dâwn a ni!

Jehova Thuhretute chu chutiang ṭhatna lam pan tûra mi dangte rilru hneh thei tak an ni a. Bible chuan inneihna zah tûrin anni chu a zirtîr a ni. An fate chu thu bul dik leh ṭhate zirtîr an ni a. Chhûngkaw pawimawhna an sawi uar a. Chhûngkaw lungrual tak chu in khawtlâng atân malsâwmna a ni a, ram tân pawh a ni bawk. Mihring chanchin chu chhûngkaw inzawmna a ṭhat loh hunah leh nungchang ṭhat lohna a pun hunah chuan khawvêla ram chak tak pawh a tlûkchhiat ṭhinzia târ langtu entîrna tam takin a khat a ni. Jehova Thuhretute’n mi tam zâwk leh chhûngkaw tam zâwk chu Kristian thu bulte nunpui tûra an rilru an hneh tam poh leh in khawtlângah vêng chhûng hma ngai lo mi te, nungchang bawlhhlawhna te, leh dân bawhchhiatnate chu a tlêm ting mai dâwn a ni.

Khawtlângte leh hnamte harsatna tawn lian tham tak takte zînga pakhat chu chi inthliarna hi a ni. Chu mi nêna inpersan takin, tirhkoh Petera chuan: “Pathianin mi duhsak bîk a nei lo tih dik takin ka hria e; nimahsela hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” a ti. Tin, Paula pawhin heti hian a ziak bawk: “Chutah chuan Juda mi a awm theih loh va, Grik mi pawh a awm theih hek loh, chutah chuan bâwih a awm theih loh va, bâwih lo pawh a awm theih hek loh, chutah chuan mipa leh hmeichhia pawh a awm theih loh; Krista Isuaah chuan in zain pumkhat in ni si a,” tiin. (Tirhkohte 10:​34, 35; Galatia 3:28) Jehova Thuhretute chuan he thu hi an pawm a. Hnam tin leh vun rawng chi tinte chuan an headquater-ah te, branch-ah te, leh kohhranah te rawng an bâwl tlâng vek a ni.

Africa rama tlâng mi hnam ṭhenkhat chu an inpawlh thei lo hrim hrim mai a. Nimahsela, chu mi rama Jehova Thuhretute inkhâwmpui neihah chuan, hnam chi hrang hrangte chuan inngeih tak leh inrem takin an eiho va, an muho va, Pathian chibai an bûk ho a ni. Chu mi an hmuh chuan sawrkâr hotute chuan mak an ti hle. Kristianna dikin inlungrualna a rah chhuahzia entîrna pakhat chu August 2, 1958, New York-a chhuak chanchinbu Amsterdam News chuan a sawi hial a. Chutianga a sawi chhuah chhan chu a hmaa kan sawi tâk, Thuhretu nuai hnih sîng nga chuangte kalkhâwmna New York Khawpuia neih khawvêl pum huap inkhâwmpui an hmuh vâng a ni.

“Hmun tinah hian dinhmun chi hrang hrang leh khawvêl hmun hrang hrang aṭanga lo kal Negro-te, mi ngote leh Khawchhak mite chu hlim tak leh zalên takin an inpawlh vek mai a. . . . Ram 120 aṭanga lo kal Thuhretute chu inrem taka chênghovin, Pathian chibai an bûk ho va, chutianga awm chu thil awlsam tak a nihzia America mipuite an entîr a ni. . . . He inkhâwmpui hi mite chu lungrual taka hna thawhho thei leh chêngho thei an nihzia târ langtu ṭha tak a ni.”

Mi tam tak chuan Kristianna thu bulte chu tûn lai khawvêlah hian chhawr tlâk lovah an ngai mai thei. Mahse, eng dang nge chhawr tlâk chuang ang? Kristian thu bulte chu in khawtlânga hman ṭan a nih chuan a ṭangkai hle thei a, chûng thu bulte chu mihringte awptu tûr Pathian Ram hnuaia khawvêla ‘hnamte, chite, leh mite’ suihkhâwmtu bul ber a ni ang.​—⁠Thu Puan 7:​9, 10.

[Phêk 23-naa thu lâk chhuah]

Hnam tin leh vun rawng chi tinte’n rawng an bâwl tlâng

[Phêk 24-naa thu lâk chhuah]

Kristianna a chhawr tlâk. Eng dang nge chhawr tlâk chuang?