Ngaihventute Zawh Ṭhin Zawhnate

Pathian chu hmangaihna a nih chuan, engvângin nge suahsualna awm a phal?

PATHIANIN suahsualna awm chu a phal ngei a; chuvângin, leia mi maktaduai tam takte hian sual rawng an bâwl tlat rêng a ni. Entîr nân, indo te an puang a, naupangte chûngah bomb an thlâk a, leilung hi an tichhe bawk a, ṭâm te an tlâktîr bawk a ni. Mi maktaduai tam takte chuan meizial an zûk avângin chuap cancer te an vei a, an uirê avângin nungchang ṭhat lohna avânga inkai theih natna te an vei bawk a, zu a lutuka an in avângin thin natna te, leh a dang dang te an tuar a ni. Chûng mite chuan suahsualna zawng zawng a tâwp chu an duh tak tak lo. An duh zâwka chu an suahsualna rah chhuahte tih bo chauh chu a ni. An tuhrah an seng hunah chuan, “Engah nge ka chungah kher?” an ti ṭhîn. Tichuan, Thufingte 19:​3-nain: “Mi a âtnain a kawng a tihchhiatsak ṭhîn a, a rilru LALPA chungah a vui ṭhîn,” a tih angin, Pathian chu an dem leh lawi si ṭhîn. Tin, Pathianin an suahsual rawngbâwlna chu tihtâwpsak se chuan, zalenna an hloh chu an sawisêl leh âwm si!

Jehova’n sualna awm a phal chhan bul ber chu Setana puhna a chhân lêt duh vâng a ni. Diabol-Setana chuan Pathianin fiahna hnuaia A chunga rinawm tûr mihring chu he leiah awmtîr thei lo angin a sawi a. (Joba 1:​6-12; 2:​1-10) Chu Setana puhna chu a finfiah theih nân Jehova chuan suahsualna a awm zêl chu a phal ta a ni. (Exodus 9:16) Tûnah pawh hian Setana chuan a puhna dikzia târ lan tumin, mihringte Pathian laka lapêng tûrin chungpikna a la thlentîr ta zêl a. (Thu Puan 12:12) Nimahsela, Joba chu a rinawm tlat a. Chutiang bawk chuan Isua pawh a rinawm tlat a ni. Tin, tûn laia Kristian dikte pawh an rinawm ve bawk a ni.​—⁠Joba 27:5; Matthaia 4:​1-11; 1 Petera 1:​6, 7.

Mite chatuana an nunna tûr lei paradis chu rin ve ka duh a; mahse, chu chu rin phâk bâk thil a ni lo maw?

Bible sawi ang chuan chutiang a ni lo. Rin phâk bâk thil nia a lan chhan chu mihringte hian kum zabi tam tak chhûng suahsualna hlîr an lo hriat tawh vâng a ni. Jehova chuan leilung a siam a, mihringte hnênah chuan leilung hi tichhe lova, a chhûnga thlai leh nungcha zawng zawngte humhalha cheimawitu tûr mi fel a hmei a paa tikhat tûrin a hrilh a ni. (Phêk 12-na leh phêk 17-na en rawh.) Chu thutiam Paradis chu rin phâk bâk thil a ni lo; chutiang nih ahnêkin, tûna dinhmun lungngaihthlâk tak hi awm chhunzawm zêl tlâk a ni lo zâwk a, Paradis chuan a thlâkthleng dâwn a ni.

Bible chu thawnthu mai a ni a, science lam thil nên a inmil lo tia hmusittute chu engtin nge ka chhân ang?

Chûng thutiamte rin chu bum awlsam nihna a ni lo. “Rinna chu hriatna avângin a lo awm ṭhîn.” Pathian Thu zirna aṭangin, a Thu finzia chu a lo lang a, rinna a lo ṭhang ṭhîn a ni.​—⁠Rom 10:17; Hebrai 11:⁠1.

Bible lama hmasâng chanchin chhuina chuan Bible-a thilthleng chanchin ziak tam takte dikzia a nemnghet a. Science dik tak chu Bible nên a inmil a ni. A hnuaia thute hi khawvêl mi thiamte hmuh chhuah hma kum tam takah Bible-in a lo sawi tawh a ni: leilung siam chhoh dân indawt te, khawvêl mûm thu te, engmah lova a inkhai thu te, hunbi neia sava pêm thu te chu.​—⁠Genesis, bung 1; Isaia 40:22; Joba 26:7; Jeremia 8:⁠7.

Bible hi Pathian thâwk khum a nihzia chu hrilh lâwkna thleng famkim tawhte hian a târ lang a ni. Daniela chuan khawvêl thuneihna kai sân tûr leh tlâk tûr te, Messia lo lan hun tûr leh a thih hun tûr te chu a sawi lâwk a. (Daniela, bung 2, 8, 9:24-27) Tûn laiah pawh, hrilh lâwkna dangte chu a thleng famkim mêk a, tûn hi ‘ni hnuhnûngte’ a nihzia a târ lang a ni. (2 Timothea 3:​1-5; Matthaia, bung 24) Chutianga thil hriat lâwk theihna chu mihringte theihna piah lam thil a ni. (Isaia 41:23) A nemnghet lehzualtu atân, The Bible​—⁠God’s Word or Man’s? leh Is There a Creator Who Cares About You? tih lehkhabu, Jehova Thuhretute chhuah chu en rawh.

Engtin nge Bible chungchâng zawhnate ka chhân theih ang?

Bible chu i zir ngei tûr a ni a, chîk takin i ngaihtuah bawk tûr a ni; chu mi rualin, Pathian thlarau kaihhruaina i dîl tûr a ni bawk. (Thufingte 15:​28; Luka 11:​9-13) Bible chuan heti hian a ti: “In zîngah tupawhin finna a tlâkchham chuan mi zawng zawng hnêna hau lo leh ui lova pe ṭhîntu Pathian chu dîl rawh se, chutichuan a hnênah pêk a ni ang,” tiin. (Jakoba 1:⁠5) Chu bâkah, Bible zirna ṭanpuitu lehkhabu râwn tlâk tak takte a awm a. Philipa’n Ethiopia mi a zirpui ang khân, mi dangte ṭanpuina a ngai tlângpui bawk a ni. (Tirhkohte 8:​26-35) Jehova Thuhretute chuan a ngaihventute chu an in lamah a thlâwna Bible zirna an neihpui a. He rawngbâwlna hi dîl hreh hauh suh ang che.

Engvângin nge mi tam takin Jehova Thuhretute chu an kalh a, anni nêna Bible zir lo tûra mi an hrilh hlawm?

Isua thuhrilhna chuan dodâlna a tâwk a, a zirtîrte pawh dodâl an nih tûr thu a sawi bawk a ni. Isua zirtîrna chu mi ṭhenkhatin an duh hle laiin, sakhaw lama amah kalhtute chuan heti hian an chhâng a ni: “Nangni pawh bumin in awm ve ta elo? Hotute leh Pharisaite zînga mi rêng rêng amah ring an awm tawh em ni?” tiin. (Johana 7:​46-48; 15:20) Mi tam takin Thuhretute nêna Bible zir lo tûra an fuih chhan che chu thu dik an hriat loh vâng emaw, Thuhretute an pâwnghuat vâng emaw a ni a. Thuhretute nên Bible zir la, Bible i hriatthiamna a pun leh pun loh nangmah ngeiin fiah ang che.​—⁠Matthaia 7:​17-20.

Engvângin nge Thuhretute chuan sakhaw vawn lai neite an va tlawh ṭhin?

Chutianga tlawhna hmangin Isua entawn tûr siam chu an zui a ni. Ani chu Judate hnênah a kal a. Judate chu sakhaw vawn lai nei an ni a; mahse, an sakhua chu Pathian Thu nên kawng tam takin a inkalh a ni. (Matthaia 15:​1-9) Kristian an ni emaw, ni lo emaw hnam tin hian sakhua engemaw tak chu an vuan ṭheuh va. Mite’n Pathian Thu nêna inmil thurin an vawn chu thil pawimawh tak a ni a, chutianga ti tûra Thuhretute’n ṭanpuina an pêk chu ṭhenawmte hmangaihna lantîrna a ni.

Thuhretute hian an sakhua chauh hi dik tûrah an ngai em?

Mahni sakhua la urhsûntu apiang chuan a sakhua chu a dik tûrah a ngai tûr a ni. A nih loh chuan, engvângin nge chu sakhua chu a vawn ang? Kristiante chu hetianga fuih an ni: “Engkim fiah zâwk ula: a ṭha apiang pawm tlat ula,” tiin. (1 Thessalonika 5:21) Rinna dik pakhat chauh a awm avângin, mi chuan a thurin chu Bible-in a thlâwp leh thlâwp loh a fiah tûr a ni. Ephesi 4:5 chuan, heti hian a nemnghet a ni, “Lalpa pakhat, rinna hmunkhat, baptisma hmunkhat,” tiin. Isua chuan, tûn laia ngaih dân hahdamthlâk tak, sakhuana chi hrang hrangte leh kawng chi hrang hrangte chuan chhandamnaah min hruai vek thei tih chu a pawm lo. Ani chuan, “Nunnaa kalna kawngka chu a zîm a, a kawng pawh a chêp bawk a, a hmutute pawh tlêmtê an ni,” tiin a sawi zâwk mah a. Jehova Thuhretute chuan chu kawng chu hmu fuhah an inngai a ni. Ni lo se chuan, sakhaw dang an la zawng zêl ngei ang.​—⁠Matthaia 7:14.

An mahni chauh hi chhandam ni tûrin an ring em?

Ring lo ve. Kum zabi tam tak liamtaa awm Jehova Thuhretu ni lo mi maktaduai tam takte chu an lo tho leh ang a, nun theihna hun remchâng an nei ang a. Tûna la damte zînga mi tam takte hian “hrehawm nasa tak” a lo thlen hmain thutak leh felna lamah ṭan hmun an la khuar mai thei a, anni chuan chhandamna an la chang ang. Chu bâkah, Isua chuan insawisêl a, ro inrêlsak lo tûrin min hrilh a. Keini mihringte chuan pâwn lam lan dân kan en a; Pathian chuan thinlung a en thung a ni. Ani chuan dik takin a hmu a, lainatnain ro a rêl ang. Rorêlna chu kan hnênah ni lovin, Isua hnênah a hlân tawh zâwk a ni.​—⁠Matthaia 7:​1-5; 24:21; 25:31.

Jehova Thuhretute inkhâwmnaa inkhâwmte hnênah eng ang thawhlâwm nge beisei a nih?

Pawisa lam thawhlâwm chungchângah chuan, tirhkoh Paula’n heti hian a sawi: “Mi tinin ui chunga pe lovin, pêk loh theih loh anga ngaia pe hek lovin, an thinlunga an tum ang zêlin pe ṭheuh rawh se; Pathian chuan hlim taka petu a ni a hmangaih ni,” tiin. (2 Korinth 9:⁠7) Jehova Thuhretute Kingdam Hall-ah leh inkhâwmpuina hmunah te chuan, thawhlâwm khawn a ni ngai lo va. A thawh duhte tâna thawh a remchân nân, thawhlâwm bâwmte dah a ni. Tumahin mi dangte pêk emaw, an pêk leh pêk loh emaw chu an hre lo. A ṭhen chuan mi dangte aiin an pe tam zâwk thei a; a ṭhen chuan engmah an pe thei lo a ni. Isua chuan Jerusalem biak ina thawhlâwm bâwm leh a thawhtute chungchâng a sawi khân, ngaih dân dik a târ lang a ni: A pawimawh chu a pawisa thawh zât lam ni lovin, mahni thawh theih zât zât thawh leh pêk duhna rilru neih hi a ni, tih hi.​—⁠Luka 21:​1-4.

Jehova Thuhretu ni ve ta ila, an tih dân anga thu hril tûra beisei ka ni ang em?

Krista Lalram hnuaia thutiam lei paradis chungchâng hriatna miin a neih chuan, mi dangte pawh hrilh ve a duh ṭhîn a. Nang pawhin i duh ve ngei ang. Chu chu chanchin ṭha a ni si a!​—⁠Tirhkohte 5:​41, 42.

He hnathawh hi Isua zirtîr i nihzia lantîrna pawimawh tak a ni. Bible chuan, Isua chu “thu hretu rinawm leh dik taka” tiin a ko va. Leia a awm lai khân: “Sim rawh u! vân ram a hnai tawh e” tiin thu a hril a, a zirtîrte pawh chutianga hril ve tûrin a tir chhuak a ni. (Thu Puan 3:14; Matthaia 4:17; 10:⁠7) Chu mi hnu chuan, a hnungzuite hnênah: “Kal ula, hnam tina mi zirtîrahte siam ula, . . . zirtîr rawh u” tiin thu a pe a. Tin, tâwpna a lo thlen hmain “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang,” tih a sawi lâwk bawk.​—⁠Matthaia 24:14; 28:​19, 20.

He chanchin ṭha puan chhuah dân hi kawng chi hrang hrang a awm a. Ṭhiante leh hmêlhriatte nêna titina chuan thuhrilhna kawng a hawng fo va. A ṭhen chuan lehkha ziakin emaw, telephone hmangin emaw thu an hril bawk. Mi dangte chuan an hmêlhriatte ngaihven zâwng tûr nia an rin thu leh hla chhuahte chu an thawn a. Tumah hmaih an duh loh avângin, Thuhretute chu chanchin ṭha kengin in tinah an kal bawk a ni.

Bible-ah chuan he sâwmna duhawm tak: “Thlarau leh mo chuan, ‘Lo kal rawh,’ an ti a. A hria apiangin ‘Lo kal rawh,’ ti rawh se. Tuihâl apiang lo kal rawh se; a duh a piangin nunna tui hi athlâwnin la rawh se” tih a chuang a. (Thu Puan 22:17) Mi dangte hnêna lei Paradise chungchâng hrilh hi phûr tak leh he chanchin ṭha hrilh duhnaa khat thinlung taka thawh tûr a ni.

Jehova Thuhretute chungchâng leh an thurin chungchângah zawh belh duh i nei ngei ang tih kan hria a. I hriat duh thu ṭhenkhatte chu ngaih dân chi hrang hrang nei thu buaithlâk tak pawh a ni mai thei. Chûng i zawhnate chu chhân kan châk hle a ni. He brochure-ah mai hi chuan engkim ziah lan vek sên a nih loh avângin, tualchhûng Thuhretute zâwt tûrin kan sâwm a che. Kingdom Hall-a an inkhâwmnaah emaw, i ina an lo lên hunah emaw, i lo zâwt thei ang. A nih loh leh, i zawhnate chu Jehova Thuhretute hnênah a hnuaia târ lan address remchâng ber hmang hian i thawn dâwn nia.