Branch Office-ah Eng Hna Nge Thawh A Nih?

Bethel chhûngkaw zînga mite chuan department hrang hrangah rawngbâwlin, ram pakhat emaw, a aia tam emawa thu hrilh rawngbâwlna chu an enkawl a. Anni chuan ṭawng lehlinnaah te, magazine chhut chhuahnaah te, lehkhabu kâwm vuahnaah te, lehkhabu dahkhâwmna leh thawn chhuahna hmunah te, audio/video siam chhuahnaah te, leh chu ram bial chhûnga thil ṭûl dang enkawlnaahte an thawk a ni.

Branch Committee chuan rawngbâwlna zawng zawng a enkawl. Governing Body chuan branch tinte hna thawh dân chu upa tling tak pathum emaw, a aia tam emaw hmanga din Branch Committee kutah a dah ṭheuh va. Branch Committee chuan a enkawl ram chhûnga rawngbâwlnain hma a sâwn dân leh buaina lo chhuak engpawh chu Governing Body hnênah a hriattîr zêl a ni. Chutiang report-te chuan Governing Body chu nakina tihchhuah tûr thu leh hlate leh inkhâwm leh inkhâwmpuia sawi tûr thute hre thei tûrin a ṭanpui a ni. Governing Body aiawhtute chu Branch hrang hrangte tlawh a, Branch Committee-te’n an mawhphurhnate an enkawl dân chungchânga kaihhruaina pe tûra tirh chhuah an ni ṭhîn a. (Thufingte 11:14) Branch bial chhûnga chêngte tihchak nân headquaters representative thusawi pawh tiamin, a bîka inkhâwmna buatsaih a ni ṭhîn.

Tualchhûng kohhrante hnênah ṭanpuina a pe. Branch office-a mawhphurhna nei unaupate chuan kohhran thar din tûra rawtnate chu an lo pawmsak ṭhîn a. Chûng unaupate chuan branch bial chhûnga pioneer te, missionary te, leh bial kantute rawngbâwlna pawh an kaihruai bawk. Tin, inkhâwmpuite buatsaihin, Kingdom Hall thar sak chungchâng te an buaipui bâkah, kohhrante mamawh ang thu leh hlate an thawn chhuak bawk a ni. Branch-a thiltih rêng rêng chu fel taka thu hrilhna hlen chhuah a nih theih nâna ṭanpuitu vek a ni.—1 Korinth 14:33, 40.

• Engtin nge Branch Committee chuan Governing Body a ṭanpui?

• Eng hnate nge branch office-ah thawh a nih?