11 TAIHMAKNA

A AWMZIA

Mi taimate chuan hnathawh chu a zak lo va. Chu aiin, an mi mal mamawhte phuhhrûk nân leh mi dang ṭanpui nân mite ngaihsân loh hna an thawk a nih pawhin, ṭhahnemngai takin an thawk a ni.

A PAWIMAWH CHHAN

I duh emaw, duh lo emaw pawh ni se, nun hi mawhphurhnain a khat a. Mi tam takin ṭhahnemngai taka hnathawh an peih lohna khawvêlah hian, taihmâkna chuan hlâwkna a thlen thei che a ni.—Thuhriltu 3:13.

“Taima taka hnathawhna chuan inchhuan rûkna leh chhûngrila lungawina min thlen tih ka hria. Chutianga chhûngrila lungawina chuan hnathawh nuam ti tûrin min ṭanpui a ni. Taima taka hnathawhna chuan hming ṭha nei tûrin min ṭanpui bawk ang.”—Reyon-a.

BIBLE THU BUL: “Thawhrimna zawng zawngah hian hlâwkna a awm.”—Thufingte 14:23.

I TIH THEIHTE

A hnuaia târ lante hi zâwmin, hnathawh chungchângah thlîr dân dik nei rawh.

Ṭha taka hnathawh dân i zir avângin inchhuang rawh. In chhûng sekrek i thawk emaw, school homework i ti emaw, a nih loh leh chhûngkaw châwm nân hna i thawk emaw pawh ni se, hnaah i rilru pe ang che. Ṭha taka hna pakhat i thawh zawh chuan hmasâwn dân kawng—rang zâwk leh ṭha zâwka thawh dân zawng ang che. Hnathawh dân i thiam poh leh nuam i ti lehzual ang.

BIBLE THU BUL: “Mi a hnathawha taima chu i hmu ṭhîn em? Lal hmaahte a awm ang a, mi narân hmaah chuan a awm lo vang.”—Thufingte 22:29.

Hlâwkna dangte chu hmu rawh. Eng thilah pawh ni se, i mawhphurhna ṭha taka i hlen chuan, hlâwkna dangte pawh i hmu ang. Entîr nân, in chhûng sekrekte chu taima taka i thawh chuan, i chhûngte tân phurrit i tizâng sawt ang.

BIBLE THU BUL: “Englo lâk aiin pêkin lukhâwng a nei zâwk.”—Tirhkohte 20:35.

Thawh belh rawh. A rûn dâl chauhva thawh aiin, an phût aia tama thawh tum ang che. Chutiang chuan, phût i nih vâng chauh ni lovin, i duh rêng vânga thawk belh zâwkin, i nun chu nangman i thunun a ni ang.—Matthaia 5:41.

BIBLE THU BUL: “I khawngaihna chu khawngaih luihtîr ang ni lovin, i thu thu ang a nih theih zâwkna tûrin,”—Philemona 14.

Inbûk tâwk tak ni rawh. Mi taimate chu mi thatchhia an ni lo va, hna âtchilh mi lah an ni hek lo. Anni chuan inbûk tâwk taka thawh tum tlatin, taihmâk chhuahnaah leh chawlh hahdamnaah lâwmna an hmu a ni.

BIBLE THU BUL: “A dik thei e, hahdama vei khat neih pawh hi buai phîlîa thawka vei hnih neih ai chuan a ṭha.”—Thuhriltu 4:6.