12 THILTUMTE

A AWMZIA

Thiltum chu duhthusâm mai a ni lo. Thiltum dik takahte chuan ruahmanna te, insiamremna te, leh thawhrimnate a tel a ni.

Thiltumahte chuan thiltum tênau (nî eng emaw, a nih loh leh chawlkâr eng emaw chhûng), thiltum laihâwl (thla eng emaw zât), leh thiltum lian thamte (kum khat emaw, chu aia rei emaw chhûnga hlen tûr) a tel thei a. Thiltum lian thamte chu thiltum tênau leh thiltum laihâwlte hlen chhuahna hmanga hlen theih a ni.

A PAWIMAWH CHHAN

Thiltumte hlenna chuan inrintâwkna min neihtîrin, inṭhian ṭhatna a tinghetin, hlimna a tipung thei a ni.

Mahni inrintâwkna: Thiltum tênaute insiam leh hlenna chuan thiltum lian zâwkte siam tûrin inrintâwkna a neihtîr ang che. Ṭhiante nêksâwrna ang chi nî tina i hmachhawn harsatnate pal tlang thei tûrin inrintâwkna i nei lehzual bawk ang.

Inṭhianna: Mite chuan mahni thiltum hria a, chumi hlen tûra inhuam taka bei fan fantute zînga awm chu nuam an ti ṭhîn a. Chu bâkah, inṭhianna tihngheh theih dân kawng ṭha ber zînga pakhat chu kan thiltum ang neite nêna thawhho hi a ni.

Hlimna: Thiltumte insiam a, i hlen hunah, hlawhtling nia inhriatna i nei ngei ang.

“Thiltumte neih hi nuam ka ti. Chu chuan hna thawk reng duhna leh hlawhtlin duhna min neihtîr a. Thiltum pakhat kan tihhlawhtlin hnua, kan thil hlen chhuahte han thlîr lêt a, ‘Ka lo thawk nasa hle mai! Ka thiltum ka hlen ta,’ tia sawi chu a nuam khawp mai.”—Christopher-a.

BIBLE THU BUL: “Thli pawisatu’n chi a tuh lâwng, chhûm enthlatu’n a seng hek lo vang.”—Thuhriltu 11:4.

I TIH THEIHTE

Hêng rahbite hi rapin, i thiltumte chu hlen rawh.

Thliar hrang rawh. Thiltuma i neih theihte chu ziak chhuak la, a pawimawh dân indawtin hlen rawh—i hlen chhuah duh hmasak ber chu thlang ang che.

Ruahmanna siam rawh. Thiltum tin atân, hêng a hnuaia tih tûrte hi ti rawh:

• Tih zawh hun tûr bituk rawh.

• Hmalâk dân tûr ruahman rawh.

• Harsatnate a awm thei tih hriain, a chinfel theih dân tûr ngaihtuah rawh.

Bawhzui rawh. Thil engkim a fel hun thleng chu nghâk suh. Heti hian inzâwt rawh, ‘Ka thiltum hlen tûra ka tih theih hmasak ber chu eng nge ni?’ tiin. Tichuan, thawk nghâl ang che. Hma i lâknaa i hmasâwnnate chu chhinchhiah zêl ang che.

BIBLE THU BUL: “Mi taima thiltum chu a hlawhtling ṭhîn.”—Thufingte 21:5, C.L. Re-edited.