10 RINCHHAN TLAKNA

A AWMZIA

Mi rinchhan tlâkte chuan an nu leh pa te, ṭhian te, leh hnathawhpuite rin an hlawh ṭhîn a. Anni chuan dânte an zâwm a, an thutiamte an vawng a, thu dik an sawi reng ṭhîn.

A PAWIMAWH CHHAN

Eng thilah pawh ni se, zalênna i neih tam lam chu rinchhan tlâk i nih dânah a innghat a ni.

“I nu leh pate rin i hlawh theih dân kawng ṭha ber chu an bula i awm hunah chauh ni lovin, i awm loh hunah pawh mi puitling leh mawhphurhna la thei i nihzia lantîr hi a ni.”—Sarahi-i.

BIBLE THU BUL: “Nangmahni ngei infiah ṭhîn rawh u.”—2 Korinth 13:5.

I TIH THEIHTE

Rinchhan tlâk lehzual nih i duh emaw, i hloh tawh avânga neih lêt leh i duh emaw pawh ni se, a hnuaia tih tûrte hian a ṭanpui thei che a ni.

Mi dik tak ni rawh. Dâwt i sawi chuan mite’n i chungah rinna an hloh thuai ang. A lêt zâwnga sawi chuan, a bîk takin, i thil tihsual chungchâng tlang tak leh dik taka i sawi chuan mite rin i hlawh thei a ni.

“Thilte a kal tluan lai chuan thu dik sawi chu a awlsam a. Mahse, i chhiatna tûr anga lang thilah pawh dik taka thu i sawi chuan, mite’n a ring lehzual ang che.”—Caiman-a.

BIBLE THU BUL: “Engkimah fel taka awm tumin.”—Hebrai 13:18.

Innghahna tlâk ni rawh. U.S.A. ram pakhat chauhva ngaih dân lâkkhâwmna chuan rinchhan tlâkna nihna chu “hna hmuh nâna pawimawh berte zînga pakhat” a ni tih human-resource professionals zînga zaa 78-te chuan an sawi a ni. Tûna rinchhan tlâk nihna chu i lo puitlin hunah i hlâwkpui ang.

“Ka nu leh pate chuan hrilh ngai lovin inchhûng sekrekte ka thawk ṭhîn tih an hria a. Chutianga ka tih nasat poh leh min ring lehzual a ni.”—Sarah-i.

BIBLE THU BUL: “Ka sawi aia nasa zâwk mahin i ti ang tih ka hriat avângin, i âwih ringin i hnênah ka ziak a nih hi.”—Philemona 21.

awhthei rawh. Mite’n awlsam taka an hriat theih tisa lam ṭhan lenna nêna inang lo takin, rilru lama mi puitling zâwk ni tûr chuan hun a duh fo ṭhîn a ni.

“Vawi khat thiltih ṭhatna mai chuan kan nu leh pate leh mi dangte rin min hlawhtîr nghâl lo. Mahse, mawhphurhna la tlâk i nihzia vawi tam tak i lantîr chuan, zawi zawiin an rin i hlawh thei ang.”—Brandon-a.

BIBLE THU BUL: “Dawhtheihna te chuan inthuam rawh u.”—Kolossa 3:12.