9 NIHNA

A AWMZIA

I nihnaah chuan i hming leh i lan dân aia tam a tel a. Chutah chuan i thil ngaihhlut te, i thurin te, leh i nungchangte a tel a ni. Dik tak chuan, i nihna chu chhûng lam leh pâwn lam pawh tiamin, nangmah nihtîrtu che a ni.

A PAWIMAWH CHHAN

I nihna i hriat chian chuan, i ṭhiante thununa awm aiin, i thurinte atân i ding ngam ang.

“Mi tam tak chu dâwra an târ chhuah milem ang an ni a. An thawmhnaw hâk chu mahnia thlang lovin, mi dangin an thlansak a ni.”—Adrian-a.

“A harsat hunah pawh dikna atâna din ngam dân ka zir a. An thiltih dân leh an zînga ka tel huna ka awm dân aṭangin ka ṭhian dik tak tûrte chu ka hre thei a ni.”—Courtney-i.

BIBLE THU BUL: “He khawvêl dân ang hian awm suh ula; . . . in rilru a thara awmin lo danglam zâwk tawh rawh u.”—Rom 12:2.

I TIH THEIHTE

I chakna te, i chak lohna te, leh i rinnate inenfiahin tûnah hian eng ang mi nge i nih tih leh nakinah eng ang mi nge nih i duh tih hriat tum rawh. Hma lâk ṭan dân ṭha chu a hnuaia zawhnate chhân hi a ni.

Chaknate: Eng thiamnate nge ka neih? Ka chakna laite chu eng nge ni? (Entîr nân: Hun ka vawng dik em? Insûmtheihna ka nei em? Ka taima em? Ka thilphal em?) Thil ṭha engte nge ka tih?

THURAWNTE: I ṭhatna lai hmuh chu harsa i ti em? I nu leh pate emaw, i ṭhian ṭha emaw hnênah i chakna lai an hmuhte leh chutianga an hmuh theih chhante zâwt ang che.

BIBLE THU BUL: “Mi tinin mahni thiltih fiah ṭheuh zâwk rawh se, chumi hunah chuan mi dang chung ni lovin, mahni chung chauhvah chhuan tûr a nei ang.”—Galatia 6:4.

Chak lohnate: Ka miziaah hian eng ang hmasâwnnate nge ka mamawh? Eng hunah hian nge thlêm awlsam tak ka nih lehzual? Eng thilahte nge insûmtheihna ka neih lehzual a ngaih?

BIBLE THU BUL: “‘Sual ka nei lo,’ kan tih chuan mahni leh mahni kan inbum a.”—1 Johana 1:8.

Rinnghehna: Nungchang lamah eng tehna nge ka zawm a, engvângin nge? Pathian ka ring em? Eng finfiahnate avângin nge Pathian a awm tih ka rin? Eng nungchangte hi nge dik lo nia ka ngaih a, engvângin nge? Nakin hun chungchânga ka rinna chu eng nge ni?

BIBLE THU BUL: “Remhriatnain a vêng ang chia, hriatthiamnain a enkawl ang che.”—Thufingte 2:11.