ເລື່ອງຊີວິດຈິງ
ຮັບໃຊ້ພະເຢໂຫວາປະມານ70 ປີຢູ່ກູບາ
ຂ້ອຍເກີດໃນປີ 1947 ຢູ່ເກາະກູບາທີ່ສວຍງາມໃນທະເລຄາເລບຽນ. ເກາະນີ້ຕັ້ງຢູ່ບ່ອນເຊື່ອມຕໍ່ກັນລະຫວ່າງທະເລຄາເລບຽນກັບມະຫາສະໝຸດອັດລັງຕິກ. ຂ້ອຍມີນ້ອງສາວ 2 ຄົນ. ຄອບຄົວຂອງເຮົາອາໄສຢູ່ບ້ານເອດສ໌ເມຣັນດາ.
ຂ້ອຍຈື່ໄດ້ວ່າຊີວິດຂອງພວກເຮົາມີຄວາມສະຫງົບສຸກຫຼາຍ. ພວກເຮົາຢູ່ໃກ້ກັບຍາດຕິພີ່ນ້ອງຫຼາຍຄົນ ເຊັ່ນ: ອາວ ອາ ແລະປູ່ຍ່າ. ພວກເຮົາມີອາຫານພຽງພໍແລະມີຊີວິດທີ່ມີຄວາມສຸກ.
ຕອນຂ້ອຍອາຍຸປະມານ 5 ປີ ພໍ່ແມ່ຂອງຂ້ອຍກໍເລີ່ມຮຽນຄຳພີໄບເບິນກັບວໍເທິ້ນ ຈອນສ໌. ລາວເປັນຜູ້ປະກາດຂ່າວດີທີ່ກະຕືລືລົ້ນຫຼາຍ. ລາວຍ່າງປະມານ 10 ຊົ່ວໂມງມາບ້ານຂອງພວກເຮົາ. ແຕ່ລະເທື່ອທີ່ລາວມາ ຫຼາຍຄົນໃນຄອບຄົວຂອງຂ້ອຍມັກຈະມາລວມກັນຢູ່ເຮືອນຂອງປູ່ຍ່າເພື່ອລົມເລື່ອງຄຳພີໄບເບິນກັບລາວຫຼາຍຊົ່ວໂມງ. ອາວເປໂດຣ ອາເອລາ ແລະພໍ່ແມ່ຂອງຂ້ອຍມັກສິ່ງທີ່ເຂົາເຈົ້າໄດ້ຮຽນຫຼາຍ ແລະບໍ່ດົນຫຼັງຈາກນັ້ນເຂົາເຈົ້າກໍຮັບບັບເຕມາເຂົ້າມາເປັນພະຍານພະເຢໂຫວາ. ຕອນນີ້ ອາເອລາອາຍຸເກືອບ 100 ປີແລ້ວແລະເພິ່ນຍັງຮັບໃຊ້ເປັນໄພໂອເນຍຢູ່ກູບາ.
ໃນຕອນນັ້ນ ພະຍານພະເຢໂຫວາຢູ່ກູບາຍັງສາມາດປະກາດໄດ້ຢ່າງເປີດເຜີຍແລະໄປປະຊຸມໄດ້. ຄົນຢູ່ກູບາຮູ້ຈັກພະຍານພະເຢໂຫວາດີຍ້ອນພວກເຮົາໄປປະກາດຕາມບ້ານເຮືອນ. ພວກເຮົາມັກຖືກະເປົາທີ່ເຕັມແຕ່ສິ່ງພິມກ່ຽວກັບຄຳພີໄບເບິນ ແລະພາກັນຍ່າງຫຼາຍອີ່ຫຼີ. ຂ້ອຍຍັງຈື່ໄດ້ບໍ່ລືມວ່າສະໄໝນັ້ນເຮົາມີຄວາມສຸກຫຼາຍສ່ຳໃດທີ່ໄດ້ຮັບໃຊ້ພະເຢໂຫວາໃນ “ຕອນທີ່ສະດວກ” ເຖິງວ່າຈະມີຄວາມ “ລຳບາກ” ລໍຖ້າຢູ່ຂ້າງໜ້າກໍຕາມ.—2ຕມ. 4:2
ຕອນທີ່ມີຄວາມລຳບາກ
ຕອນຂ້ອຍອາຍຸປະມານ 5 ປີ ພໍ່ກັບອາວເດີນທາງໄປອີກຟາກໜຶ່ງຂອງເກາະເພື່ອໄປປະຊຸມໃຫຍ່. ແຕ່ຕອນນັ້ນເຂົາເຈົ້າເປັນໄຂ້ທໍລະພິດ (typhoid fever) ຍ້ອນກິນນ້ຳທີ່ບໍ່ສະອາດ. ຂ້ອຍຈື່ໄດ້ວ່າຫຼັງຈາກທີ່ເຂົາເຈົ້າກັບມາ ອາວຂອງຂ້ອຍຜົມຫຼົ່ນໝົດຫົວແຕ່ລອດຊີວິດ. ແຕ່ຂ້ອຍເສຍໃຈຫຼາຍທີ່ພໍ່ຂອງຂ້ອຍບໍ່ລອດ. ຕອນນັ້ນລາວຫາກໍອາຍຸ 32 ປີໜຶ່ງ.
ຫຼັງຈາກທີ່ພໍ່ຕາຍ ແມ່ກໍຕັດສິນໃຈພາຄອບຄົວຍ້າຍໄປຢູ່ກັບອ້າຍຂອງແມ່ທີ່ຢູ່ບ້ານລອມບີໂຢ. ນີ້ໝາຍຄວາມວ່າເຮົາຕ້ອງຈາກຍາດຕິພີ່ນ້ອງລວມທັງປູ່ຍ່າທີ່ເຮົາຮັກຫຼາຍ. ແຕ່ຄອບຄົວຂອງເຮົາກໍຍັງນະມັດສະການພະເຢໂຫວານຳກັນຕໍ່ໄປ.
ໃນວັນທີ 26 ສິງຫາ 1957 ຂ້ອຍຮັບບັບເຕມາຢູ່ອ່າງເກັບນ້ຳໃກ້ໆລອມບີໂຢ. ຕອນນັ້ນ ຂ້ອຍອາຍຸ 10 ປີ. ແຕ່ຕໍ່ມາບໍ່ຮອດ 2 ປີກໍມີການປ່ຽນແປງທີ່ບໍ່ຄາດຄິດເກີດຂຶ້ນກັບພະຍານພະເຢໂຫວາໃນກູບາ. ໃນປີ 1959 ລັດຖະບານກູບາຖືກຍຶດອຳນາດແລະປ່ຽນການປົກຄອງເປັນລະບອບຄອມມູນິດ.
ລັດຖະບານຄອມມູນິດພະຍາຍາມເສີມສ້າງກຳລັງທາງການທະຫານໃຫ້ເຂັ້ມແຂງ. ນີ້ຈຶ່ງເຮັດໃຫ້ຄົນຂອງພະເຢໂຫວາໄດ້ຮັບຜົນກະທົບຫຼາຍ ຍ້ອນພວກເຮົາຮັກສາຄວາມເປັນກາງແລະບໍ່ຫຍຸ້ງກ່ຽວກັບການທະຫານ. ຜົນກໍຄື ພວກເຮົາເລີ່ມບໍ່ມີອິດສະຫຼະໃນການນະມັດສະການພະເຢໂຫວາໄດ້ຄືເກົ່າແລ້ວ. ໃນທີ່ສຸດ ລັດຖະບານກໍສັ່ງຫ້າມການປະກາດແລະການປະຊຸມ. ພີ່ນ້ອງຊາຍຫຼາຍຄົນກໍຖືກຈັບເຂົ້າຄຸກ. ເຂົາເຈົ້າບາງຄົນຖືກຕີເລື້ອຍໆແລະໄດ້ກິນເຂົ້າແຕ່ໜ້ອຍດຽວ. ບາງເທື່ອອາຫານທີ່ຜູ້ຄຸມຄຸກເອົາໃຫ້ກໍມີເລືອດເຊິ່ງເຂົາເຈົ້າກິນບໍ່ໄດ້.
ເຖິງວ່າຈະເຈິຂໍ້ທ້າທາຍຫຼາຍຢ່າງ ເຮົາກໍຍັງປະຊຸມກັນຕໍ່ໄປເພື່ອນະມັດສະການພະເຢໂຫວາ. (ຮຣ. 10:25) ເຮົາເຖິງຂັ້ນຈັດການປະຊຸມໃຫຍ່ຢູ່ຟາມຫຼືບ່ອນອື່ນໆທົ່ວປະເທດ. ຂ້ອຍຈື່ໄດ້ວ່າມີເທື່ອໜຶ່ງທີ່ພີ່ນ້ອງຊາຍຄົນໜຶ່ງໃຫ້ເຮົາໃຊ້ຟາມແກະຂອງລາວຈັດການປະຊຸມໃຫຍ່. ເຮົາເອົາແກະອອກຈາກຟາມບໍ່ທັນແລະອະນາໄມສະຖານທີ່ຍັງບໍ່ແລ້ວຊ້ຳ ແຕ່ເຮົາກໍຈັດການປະຊຸມໃຫຍ່ໄດ້ແລະແກະກໍປະຊຸມນຳກັນກັບເຮົາເລີຍ.—ມກ. 2:12
ເຮົາເຫັນຄ່າວຽກໜັກຂອງພີ່ນ້ອງທີ່ຊ່ວຍໃຫ້ເຮົາໄດ້ຮັບຄວາມຮູ້ທີ່ເສີມຄວາມເຊື່ອໃນສະໄໝນັ້ນ. ຕົວຢ່າງເຊັ່ນ: ມີການອັດຄຳບັນລະຍາຍການປະຊຸມໃຫຍ່ທັງໝົດໄວ້ໃນກະແຊັດເທັບ ແລະສົ່ງເທັບນັ້ນໄປທົ່ວປະເທດເພື່ອໃຫ້ພີ່ນ້ອງໃຊ້ໃນການປະຊຸມ. ໃນສະໄໝນັ້ນ ມີການມອບໝາຍໃຫ້ພີ່ນ້ອງຊາຍແຕ່ 2 ຄົນໃຫ້ກຽມ ເຮັດສ່ວນ ແລະອັດຄຳບັນລະຍາຍທຸກລາຍການ. ຍ້ອນພີ່ນ້ອງຕ້ອງອັດໃນບ່ອນລັບທີ່ບໍ່ໃຫ້ໃຜຮູ້ ບາງເທື່ອເຮົາເລີຍໄດ້ຍິນສຽງໄກ່ແລະສຽງແປກໆອື່ນໆແຊກເຂົ້າມານຳ. ຖ້າບ່ອນທີ່ຈັດການປະຊຸມໃຫຍ່ບໍ່ມີໄຟຟ້າ ກໍຈະມີພີ່ນ້ອງຊາຍຄົນໜຶ່ງປັ່ນລົດຖີບທີ່ຕິດກັບເຄື່ອງປັ່ນໄຟເພື່ອຜະລິດກະແສໄຟຟ້າໃຊ້ໃນການປະຊຸມ. ການເຮັດແບບນີ້ກໍເຮັດໃຫ້ເຮົາມີໄຟຟ້າເປີດເຄື່ອງບັນທຶກສຽງແລະຟັງລາຍການປະຊຸມໄດ້. ເຖິງວ່າເຮົາບໍ່ມີອິດສະຫຼະຫຼືບໍ່ມີປຶ້ມຕ່າງໆຫຼາຍຄືກັບພີ່ນ້ອງຢູ່ປະເທດອື່ນ ແຕ່ເຮົາບໍ່ເຄີຍຂາດຄວາມຮູ້ທີ່ເສີມຄວາມເຊື່ອ ແລະເຮົາກໍຍັງຮັບໃຊ້ພະເຢໂຫວາຢ່າງມີຄວາມສຸກນຳກັນກັບພີ່ນ້ອງ.—ນຮຢ. 8:10
ເປັນໄພໂອເນຍແລະເປັນພໍ່ແມ່
ຕອນຂ້ອຍອາຍຸ 18 ປີ ຂ້ອຍເລີ່ມເປັນໄພໂອເນຍປະຈຳຢູ່ເມືອງຟລໍຣິດາ. ປະມານ 1 ປີຫຼັງຈາກນັ້ນ ຂ້ອຍຖືກແຕ່ງຕັ້ງໃຫ້ເປັນໄພໂອເນຍພິເສດຮັບໃຊ້ຢູ່ເມືອງກາມັກເວເຊິ່ງເປັນເມືອງທີ່ສຳຄັນທີ່ສຸດເມືອງໜຶ່ງຂອງກູບາ. ຂ້ອຍເຈິກັບເອມີເລຍຢູ່ຫັ້ນ ລາວເປັນພີ່ນ້ອງຍິງຄົນໜຶ່ງທີ່ງາມແລະມາຈາກເມືອງຊານຕິອາໂກ ເດິ ກູບາ. ເຮົາເລີ່ມຄົບຫາກັນ ແລະປະມານ 1 ປີຕໍ່ມາເຮົາກໍແຕ່ງດອງກັນ.
(ຊ້າຍ) ໂຮງຮຽນພະລາຊະກິດສຳລັບຜູ້ເບິ່ງແຍງຢູ່ເມືອງກາມັກເວ ກູບາ ໃນປີ 1966
(ຂວາ) ມື້ແຕ່ງດອງຂອງເຮົາໃນປີ 1967
ຂ້ອຍເລີ່ມເຮັດວຽກເຕັມເວລາຢູ່ໂຮງງານນ້ຳຕານຂອງລັດຖະບານ. ຂ້ອຍກັບເອມີເລຍບໍ່ສາມາດຮັບໃຊ້ເປັນໄພໂອເນຍຕໍ່ໄດ້ ແຕ່ເຮົາກໍຍັງຢາກຮັບໃຊ້ພະເຢໂຫວາເຕັມທີເທົ່າທີ່ເປັນໄປໄດ້. ຂ້ອຍເລືອກເຮັດວຽກກະ 3 ໂມງເຊົ້າຫາ 11 ໂມງເຊົ້າຢູ່ໂຮງງານ. ຂ້ອຍບໍ່ມັກຕື່ນແຕ່ເຊົ້າໆແຕ່ການເລືອກເຮັດວຽກໂມງນີ້ເຮັດໃຫ້ຂ້ອຍສາມາດໄປປະກາດເປັນປະຈຳແລະສາມາດໄປປະຊຸມກັບເອມີເລຍທຸກລາຍການໄດ້.
ໃນປີ 1969 ເຮົາໄດ້ລູກຊາຍຄົນທຳອິດຊື່ກຸດສະຕາໂວ. ໃນຕອນນັ້ນ ພີ່ນ້ອງທີ່ນຳໜ້າຂໍໃຫ້ຂ້ອຍເລີ່ມຮັບໃຊ້ເປັນຜູ້ເບິ່ງແຍງໝວດ. ໃນສະໄໝນັ້ນ ເປັນເລື່ອງປົກກະຕິໃນກູບາທີ່ຜູ້ເບິ່ງແຍງໝວດຈະເຮັດວຽກຮັບໃຊ້ແລະເບິ່ງແຍງຄອບຄົວໄປນຳ. ຊ່ວງນັ້ນເປັນຊ່ວງທີ່ເຮົາມີຄວາມສຸກທີ່ສຸດ ແຕ່ກໍຫຍຸ້ງທີ່ສຸດໃນຊີວິດຂອງເຮົາ. ຂ້ອຍກັບເອມີເລຍຮູ້ສຶກວ່າເປັນສິດທິພິເສດຫຼາຍແທ້ໆທີ່ໄດ້ຮັບໃຊ້ພີ່ນ້ອງໃນການເຮັດວຽກເບິ່ງແຍງໝວດ. ຕໍ່ມາ ຕອນທີ່ເຮົາຍັງເຮັດວຽກນີ້ຢູ່ ເຮົາກໍມີລູກຊາຍຄົນທີສອງຊື່ໂອເບດ. ຫຼັງຈາກນັ້ນ ເຮົາກໍໄດ້ລູກຊາຍອີກຄົນໜຶ່ງຊື່ແອັບເນີ້ ແລະບໍ່ເທົ່າໃດປີຕໍ່ມາເຮົາກໍໄດ້ລູກສາວຊື່ມາເຮລີ.
ເມື່ອຂ້ອຍເບິ່ງຄືນຫຼັງໃນຫຼາຍປີທີ່ເຮັດວຽກເປັນຜູ້ເບິ່ງແຍງໝວດ ມັນເຮັດໃຫ້ຂ້ອຍມີຄວາມສຸກຫຼາຍທີ່ໄດ້ເຫັນວ່າພະເຢໂຫວາເບິ່ງແຍງຄົນຂອງເພິ່ນແນວໃດໃນກູບາ. ເພິ່ນຍັງໄດ້ອວຍພອນເຮົານຳທີ່ພະຍາຍາມສອນລູກໃຫ້ຮັກເພິ່ນ. ຕໍ່ໄປຂ້ອຍຈະເລົ່າໃຫ້ຟັງວ່າຊີວິດຂອງຂ້ອຍກັບເອມີເລຍເປັນແນວໃດຕອນທີ່ພວກເຮົາເຮັດວຽກເບິ່ງແຍງໝວດ.
ເປັນຜູ້ເບິ່ງແຍງໝວດໃນຊ່ວງທີ່ມີການສັ່ງຫ້າມ
ໃນຊຸມປີ 1960 ແລະ 1970 ເຮົາເຫັນໄດ້ເລີຍວ່າການສັ່ງຫ້າມມີຜົນຕໍ່ວຽກຂອງເຮົາຫຼາຍສ່ຳໃດ ເຊັ່ນ: ຫໍປະຊຸມຖືກສັ່ງປິດ ມິດຊັນນາຣີຖືກໄລ່ອອກຈາກປະເທດ ພີ່ນ້ອງໄວລຸ້ນຊາຍຫຼາຍຄົນຖືກຈັບເຂົ້າຄຸກ ແລະສຳນັກງານສາຂາຢູ່ເມືອງຮາວານາກໍຖືກປິດ.
ເຮັດວຽກເປັນຜູ້ເບິ່ງແຍງໝວດໃນຊຸມປີ 1990
ເນື່ອງຈາກຖືກສັ່ງຫ້າມ ເຮົາຈຶ່ງໄປຢາມປະຊາຄົມຕ່າງໆໄດ້ແຕ່ຕອນທ້າຍອາທິດເທົ່ານັ້ນ. ດັ່ງນັ້ນ ແຕ່ລະປະຊາຄົມຈະໄດ້ຮັບການຢ້ຽມຢາມໃນວັນເສົາວັນທິດຕິດຕໍ່ກັນ 2 ອາທິດ. ເຮົາເອົາເຄື່ອງໄປໜ້ອຍດຽວ ແລະເຮົາມັກຈະເດີນທາງດ້ວຍລົດຖີບ ຍ້ອນມັນເຮັດໃຫ້ບໍ່ເປັນຈຸດສົນໃຈຂອງຕຳຫຼວດຫຼືຄົນອື່ນໆ. ນອກຈາກນັ້ນ ຈະບໍ່ມີການປະກາດຢ່າງເປີດເຜີຍວ່າຈະມີການຢ້ຽມຢາມຂອງຜູ້ເບິ່ງແຍງໝວດ. ເຮົາຕ້ອງເຮັດຄືກັບວ່າເຮົາໄປຢາມຍາດຕິພີ່ນ້ອງ. ທີ່ຈິງ ການເຮັດແບບນັ້ນງ່າຍຫຼາຍ ເພາະເຮົາຮູ້ສຶກວ່າພີ່ນ້ອງເປັນຄືກັບຄອບຄົວຈົນບາງເທື່ອເຮົາເກືອບລືມໄປວ່າເຮົາມາຢາມພີ່ນ້ອງເພື່ອໃຫ້ກຳລັງໃຈແລະເສີມຄວາມເຊື່ອເຂົາເຈົ້າ. (ມຣກ. 10:29, 30) ແຕ່ເຮົາກໍຕ້ອງລະມັດລະວັງນຳ. ຫຼາຍເທື່ອຕຳຫຼວດຕິດຕາມເຮົາແລະສອບສວນເຮົາ. ຖ້າເຮົາຖືກຈັບໄດ້ ພີ່ນ້ອງທີ່ເຮົາພັກນຳກໍສ່ຽງທີ່ຈະຖືກຈັບຄືກັນ.—ຣມ. 16:4
ໃນຊ່ວງເວລານີ້ ພວກເຮົາໄດ້ເຈິກັບພີ່ນ້ອງຫຼາຍຄົນທີ່ສະແດງນ້ຳໃຈເອື້ອເຟື້ອເຖິງວ່າເຂົາເຈົ້າມີເງິນບໍ່ຫຼາຍ. ບາງເມືອງທີ່ພວກເຮົາໄປມີຍຸງຫຼາຍແທ້ຫຼາຍວ່າ ແຕ່ພີ່ນ້ອງກໍໃຈດີເອົາມຸ້ງທີ່ເຂົາເຈົ້າມີແຕ່ອັນດຽວໃຫ້ເຮົາໃຊ້ເພື່ອເຮົາຈະໄດ້ນອນຫຼັບສະບາຍ. ສ່ວນພີ່ນ້ອງບາງຄົນເຕັມໃຈໃຫ້ເຮົາພັກນຳທັງໆທີ່ເຂົາເຈົ້າມີອາຫານພຽງແຕ່ໜ້ອຍດຽວ. ສະນັ້ນ ບາງເທື່ອເຮົາກໍເລີຍເອົາອາຫານໄປນຳເພື່ອແບ່ງໃຫ້ເຈົ້າຂອງເຮືອນກິນ.
ເຮົາບໍ່ສາມາດພາລູກໆທຸກຄົນໄປຕອນທີ່ໄປຢາມແຕ່ລະປະຊາຄົມ. ສະນັ້ນ ເຮົາຈຶ່ງພາລູກໄປແຕ່ຄົນດຽວ ສ່ວນທີ່ເຫຼືອແມ່ນເຮົາຝາກໄວ້ກັບແມ່ແລະນ້ອງສາວເບິ່ງໃຫ້ຢູ່ບ້ານ. ທີ່ຈິງແລ້ວ ການມີແອນ້ອຍໄປນຳຕອນໄປຢາມປະຊາຄົມຕ່າງໆກໍຊ່ວຍໃຫ້ພວກເຮົາປອດໄພ. ມີບາງເທື່ອເຮົາຖືກຕຳຫຼວດກວດ ແຕ່ເຮົາເຊື່ອງປຶ້ມຂອງອົງການໄວ້ໃນຖົງຜ້າອ້ອມທີ່ໃຊ້ແລ້ວເຊິ່ງເປັນບ່ອນທີ່ຕຳຫຼວດຈະບໍ່ມີທາງກວດແນ່ນອນ.
ຂ້ອຍປະທັບໃຈແລະເຫັນຄ່າເອມີເລຍຫຼາຍທີ່ລາວເຮັດທຸກຢ່າງເພື່ອເບິ່ງແຍງລູກໆແລະສະໜັບສະໜູນຂ້ອຍໄປນຳໃນຊ່ວງທີ່ເຮົາຮັບໃຊ້ເຕັມເວລາ. ສຳລັບຂ້ອຍ ຂ້ອຍສາມາດບໍລິຫານເວລາໃຫ້ກັບວຽກທີ່ເຮັດຢູ່ໂຮງງານນ້ຳຕານແລະກໍເຮັດວຽກຮັບໃຊ້ເປັນຜູ້ເບິ່ງແຍງໝວດໄປນຳໄດ້. ຮູ້ບໍຂ້ອຍເຮັດໄດ້ແນວໃດ? ບາງເທື່ອຂ້ອຍເຮັດວຽກ 2 ກະລວດເທື່ອໜຶ່ງຫຼືສອງເທື່ອຕໍ່ອາທິດເພື່ອຂ້ອຍຈະໄດ້ພັກທ້າຍອາທິດ. ແຕ່ຕໍ່ມາ ວຽກທີ່ຂ້ອຍເຮັດກໍມີການປັບປ່ຽນ. ຂ້ອຍໄດ້ຂຶ້ນເປັນຫົວໜ້າທີມແລະຕ້ອງເຮັດວຽກ 7 ມື້ຕໍ່ອາທິດ. ຂ້ອຍບໍ່ສາມາດປະຕິເສດວຽກນີ້ໄດ້. ແຕ່ຂ້ອຍໄດ້ເຫັນວ່າ ຖ້າຂ້ອຍເອົາວຽກໃຫ້ທີມເຮັດຫຼາຍພໍທີ່ເຂົາເຈົ້າຈະຫຍຸ້ງໆໃນທ້າຍອາທິດ ເຂົາເຈົ້າກໍຈະເຮັດວຽກແທນຂ້ອຍຕອນທີ່ຂ້ອຍໄປຢາມປະຊາຄົມຕ່າງໆ. ຂ້ອຍຄິດວ່າຫົວໜ້າຂອງຂ້ອຍບໍ່ຮູ້ເລີຍວ່າຂ້ອຍບໍ່ເຄີຍມາວຽກໃນວັນເສົາວັນທິດ.
ມີຄວາມສຸກຢູ່ສະເໝີເຖິງວ່າຈະເຈິການປ່ຽນແປງ
ໃນປີ 1994 ກັບມາປະຊຸມພາກໄດ້ຢ່າງເປີດເຜີຍອີກເທື່ອໜຶ່ງຫຼັງຈາກລັດຖະບານສັ່ງຫ້າມວຽກຂອງພະຍານພະເຢໂຫວາ
ໃນປີ 1994 ມີມື້ໜຶ່ງທີ່ພີ່ນ້ອງຊາຍທີ່ນຳໜ້າໃນກູບາເອີ້ນຜູ້ເບິ່ງແຍງໝວດທັງໝົດ 80 ຄົນໃຫ້ມາປະຊຸມກັນຢູ່ເມືອງຮາວານາ. ພວກເຮົາດີໃຈຫຼາຍທີ່ໃນທີ່ສຸດພວກເຮົາກໍໄດ້ເຈິກັນຫຼັງຈາກຜ່ານມາຫຼາຍປີ. ໃນການປະຊຸມນັ້ນ ທຳອິດພວກເຮົາລົມກັນເລື່ອງການປັບປ່ຽນບາງຢ່າງໃນອົງການ. ຫຼັງຈາກນັ້ນ ກໍມີຄຳປະກາດໜຶ່ງທີ່ເຮັດໃຫ້ພວກເຮົາຕົກໃຈຫຼາຍ. ພີ່ນ້ອງຊາຍທີ່ນຳໜ້າບອກວ່າເຂົາເຈົ້າມີແຜນທີ່ຈະເອົາລາຍຊື່ຂອງພວກເຮົາໃຫ້ເຈົ້າໜ້າທີ່. ເປັນຫຍັງເຂົາເຈົ້າຈຶ່ງເຮັດແບບນັ້ນ?
ພີ່ນ້ອງຊາຍເຫຼົ່ານັ້ນອະທິບາຍວ່າເຂົາເຈົ້າໄດ້ປະຊຸມກັບເຈົ້າໜ້າທີ່ຂອງລັດຖະບານໂດຍມີເປົ້າໝາຍເພື່ອປັບປຸງຄວາມສຳພັນລະຫວ່າງລັດຖະບານກັບພະຍານພະເຢໂຫວາ. ເຈົ້າໜ້າທີ່ຈຶ່ງຂໍລາຍຊື່ຜູ້ເບິ່ງແຍງໝວດທຸກຄົນ. ພວກເຮົາທຸກຄົນກໍຍິນດີເຮັດຕາມ. ນັບຕັ້ງແຕ່ມື້ນັ້ນມາ ການເຈລະຈາກັບເຈົ້າໜ້າທີ່ລັດຖະບານໄດ້ຮັບຜົນດີຫຼາຍ.
ໃນທີ່ສຸດເຮົາກໍສາມາດປະຊຸມແລະປະກາດໄດ້ຢ່າງອິດສະຫຼະເຖິງວ່າພະຍານພະເຢໂຫວາຍັງບໍ່ທັນໄດ້ຖືກຈົດທະບຽນໃຫ້ເປັນສາສະໜາທີ່ຖືກຕ້ອງຕາມກົດໝາຍ. ເຮົາມາຮູ້ນຳຫຼັງວ່າທີ່ແທ້ແລ້ວເຈົ້າໜ້າທີ່ຮູ້ຊື່ຂອງຜູ້ເບິ່ງແຍງບາງຄົນແລ້ວ ແຕ່ເຂົາເຈົ້າຢາກໃຫ້ເຮົາຢືນຢັນສິ່ງທີ່ເຂົາເຈົ້າມີຊື່ໆ.
ໃນເດືອນກັນຍາ ປີ 1994 ລັດຖະບານກໍອະນຸຍາດໃຫ້ເຮົາກັບມາເປີດສຳນັກງານສາຂາອີກເທື່ອໜຶ່ງ. ເຮົາຈຶ່ງໄດ້ໃຊ້ຕຶກເກົ່າທີ່ເຮົາເຄີຍໃຊ້ 20 ປີກ່ອນ.
ຫຼັງຈາກນັ້ນ ໃນປີ 1996 ພີ່ນ້ອງຢູ່ເບເທນໂທມາເຊີນຂ້ອຍກັບເອມີເລຍໃຫ້ໄປຮັບໃຊ້ຢູ່ຫັ້ນ. ພວກເຮົາຕົກໃຈຫຼາຍ ແລ້ວຂ້ອຍກໍບອກພີ່ນ້ອງວ່າຂ້ອຍຍັງມີລູກອີກ 2 ຄົນທີ່ຕ້ອງເບິ່ງແຍງ. ແຕ່ພີ່ນ້ອງກໍຍິນດີພິຈາລະນາສະຖານະການຂອງຂ້ອຍຄືນອີກ ແລ້ວຢືນຢັນວ່າຍັງຢາກໃຫ້ເຮົາໄປຮັບໃຊ້ຢູ່ເບເທນ. ເຮົາກໍເລີຍຕອບຮັບຄຳເຊີນແລະເລີ່ມວາງແຜນຍ້າຍໄປເມືອງຮາວານາໝົດຄອບຄົວ.
(ຊ້າຍ) ເອມີເລຍເຮັດວຽກໃນພະແນກຫຍິບເຄື່ອງຢູ່ສຳນັກງານສາຂາກູບາໃນຊຸມປີ 2000
(ຂວາ) ການອຸທິດຫໍປະຊຸມໃຫຍ່ໃນປີ 2012
ເວົ້າແທ້ໆເດີ້ ທຳອິດຂ້ອຍບໍ່ມັກວຽກຢູ່ເບເທນປານໃດ. ຂ້ອຍເຮັດວຽກເປັນຜູ້ເບິ່ງແຍງໝວດມາຫຼາຍປີແລະໃຈຂ້ອຍກໍຢູ່ກັບເຂດ. ຂ້ອຍຮູ້ສຶກເປັນຫ່ວງພີ່ນ້ອງໃນເຂດຫຼາຍ ແລະຂ້ອຍກໍບໍ່ລຶ້ງທີ່ຕ້ອງມານັ່ງເຮັດວຽກຢູ່ຫ້ອງການ. ແຕ່ພີ່ນ້ອງໃນເບເທນຫຼາຍຄົນແລະໂດຍສະເພາະເອມີເລຍໄດ້ຊ່ວຍຂ້ອຍໃຫ້ປັບຄວາມຄິດຂອງໂຕເອງ. ໃນທີ່ສຸດ ຂ້ອຍກໍມີຄວາມສຸກອີກເທື່ອໜຶ່ງ ແລະຕອນນີ້ຂ້ອຍມັກວຽກຮັບໃຊ້ຢູ່ເບເທນ.
(ຊ້າຍ) ຮຽນຈົບໂຮງຮຽນພະຄຳພີສຳລັບຄູ່ສົມລົດໃນປີ 2013
(ຂວາ) ຄະນະກຳມະການສາຂາກູບາໃນປີ 2013
ຢູ່ການປະຊຸມໝວດກັບລູກສາວແລະລູກເຂີຍ
ຕອນນີ້ຂ້ອຍກັບເອມີເລຍອາຍຸຫຼາຍແລ້ວ ແຕ່ເມື່ອເຮົາຄິດເຖິງພີ່ນ້ອງທຸກຄົນທີ່ເຮົາໄດ້ມີໂອກາດຮູ້ຈັກແລະຮັບໃຊ້ນຳກັນມາຫຼາຍປີກໍເຮັດໃຫ້ເຮົາມີຄວາມສຸກ. ເຮົາຍັງມີຄວາມສຸກເປັນພິເສດທີ່ເຫັນລູກໆແລະຫຼານໆຂອງເຮົາຮັບໃຊ້ພະເຢໂຫວາ. ເຮົາຮູ້ສຶກຄືກັບອັກຄະສາວົກໂຢຮັນຕອນທີ່ອາຍຸຫຼາຍແລ້ວທີ່ເວົ້າວ່າ: “ສິ່ງທີ່ເຮັດໃຫ້ຂ້ອຍມີຄວາມສຸກຫຼາຍທີ່ສຸດແມ່ນໄດ້ຍິນວ່າພວກລູກຂອງຂ້ອຍຍັງໃຊ້ຊີວິດຕາມຄວາມຈິງ.”—3ຢຮ. 4
ຂ້ອຍກັບເອມີເລຍຮັບໃຊ້ຢູ່ເບເທນມາເກືອບ 30 ປີແລ້ວ. ພວກເຮົາພະຍາຍາມເຮັດວຽກທີ່ເຮົາໄດ້ຮັບມອບໝາຍໃຫ້ດີທີ່ສຸດເຖິງວ່າຈະຕ້ອງຕໍ່ສູ້ກັບມະເຮັງແລະອາຍຸທີ່ຫຼາຍຂຶ້ນ. ຫຼາຍປີທີ່ເຮົາຮັບໃຊ້ພະເຢໂຫວາ ເຮົາເຈິຂໍ້ທ້າທາຍຫຼາຍຢ່າງ. ແຕ່ພວກເຮົາມີຄວາມສຸກທີ່ສາມາດຮັບໃຊ້ “ພະເຈົ້າຜູ້ມີຄວາມສຸກ” ຢູ່ເກາະກູບາເກືອບ 70 ປີ.—1ຕມ. 1:11; ພສ. 97:1