ຄຳຖາມຈາກຜູ້ອ່ານ
ໂປໂລເວົ້າເຖິງສັນຍາ 2 ເລື່ອງອັນໃດໃນຄາລາເຕຍ 4:24?
ອັກຄະສາວົກໂປໂລໄດ້ເວົ້າເຖິງຄວາມສຳພັນຂອງອັບຣາຮາມກັບຊາຣາແລະຮາກາ. ຫຼັງຈາກນັ້ນ ລາວບອກວ່າ: “ເລື່ອງນີ້ເປັນພາບປຽບທຽບ. ຜູ້ຍິງ 2 ຄົນນີ້ໝາຍເຖິງສັນຍາ 2 ເລື່ອງ.” (ຄລຕ. 4:22-24) ກ່ອນໜ້ານີ້ເຮົາເຄີຍເຂົ້າໃຈວ່າ ສັນຍາ 2 ເລື່ອງນີ້ແມ່ນສັນຍາກ່ຽວກັບກົດໝາຍແລະສັນຍາໃໝ່. ແຕ່ການຄົ້ນຄວ້າເພີ່ມເຕີມເຮັດໃຫ້ເຫັນວ່າຕ້ອງໄດ້ປັບຄວາມເຂົ້າໃຈໃໝ່ໃນເລື່ອງນີ້. ເບິ່ງຄືວ່າໂປໂລບໍ່ໄດ້ໝາຍເຖິງສັນຍາໃໝ່ ແຕ່ໝາຍເຖິງສັນຍາທີ່ເຮັດກັບອັບຣາຮາມ. ໃຫ້ເຮົາມາເບິ່ງລາຍລະອຽດນຳກັນວ່າເປັນຫຍັງຈຶ່ງເວົ້າແນວນັ້ນ.a
ໂປໂລເຊື່ອມໂຍງຄົນຮັບໃຊ້ທີ່ຊື່ຮາກາກັບພູຊີນາຍ. (ຄລຕ. 4:25) ຮາກາໝາຍເຖິງສັນຍາກ່ຽວກັບກົດໝາຍທີ່ເຮັດຢູ່ພູຊີນາຍໃນປີ 1513 ກ່ອນຄລິດຕະສັກກະຫຼາດ. (ອພຍ. 19:5, 6) ເນື່ອງຈາກບໍ່ມີມະນຸດທີ່ບໍ່ສົມບູນແບບຄົນໃດທີ່ສາມາດເຮັດຕາມກົດໝາຍນັ້ນໄດ້ຢ່າງຄົບຖ້ວນ ສະນັ້ນເລື່ອງນີ້ຈຶ່ງເຕືອນໃຈຄົນຢິວວ່າເຂົາເຈົ້າຍັງເປັນທາດຂອງບາບ. ສັນຍານີ້ຍັງຊ່ວຍຊາດອິດສະຣາເອນໃຫ້ຮູ້ວ່າໃຜເປັນເມຊີອາ ເພາະມີແຕ່ເມຊີອາເທົ່ານັ້ນທີ່ຈະເຮັດຕາມກົດໝາຍຂອງໂມເຊໄດ້ຢ່າງຄົບຖ້ວນ. ຕອນທີ່ເມຊີອາສະລະຊີວິດທີ່ສົມບູນແບບຂອງເພິ່ນ ເພິ່ນກໍເຮັດໃຫ້ເປັນໄປໄດ້ທີ່ມະນຸດບໍ່ສົມບູນແບບຈະຫຼຸດພົ້ນຈາກບາບແລະຄວາມຕາຍ. (ຄລຕ. 3:19, 24, 25) ຫຼັງຈາກເມຊີອາເຮັດໃຫ້ຄວາມຕ້ອງການຂອງພະເຈົ້າສຳເລັດ ກົດໝາຍຂອງໂມເຊກໍບໍ່ຈຳເປັນອີກຕໍ່ໄປ.—ຣມ. 10:4
ໂປໂລສົມທຽບຮາກາກັບຊາຣາ “ຜູ້ຍິງທີ່ມີອິດສະຫຼະ” ທີ່ລູກຂອງລາວເກີດ “ຕາມຄຳສັນຍາ.” (ຄລຕ. 4:23) ສັນຍານີ້ແມ່ນສັນຍາທີ່ເຮັດກັບອັບຣາຮາມ. (ຄລຕ. 3:29; 4:28, 30) ໃນປະຖົມມະການ 22:18 ພະເຢໂຫວາເວົ້າວ່າ: “ຍ້ອນເຈົ້າເຊື່ອຟັງເຮົາ ຄົນຈາກທຸກຊາດຈະໄດ້ຮັບພອນໂດຍທາງລູກຫຼານຂອງເຈົ້າ.”
ສັນຍາທີ່ເຮັດກັບອັບຣາຮາມຊ່ວຍເຮົາໃຫ້ເຂົ້າໃຈຫຼາຍຂຶ້ນກ່ຽວກັບຄຳສັນຍາຂອງພະເຢໂຫວາທີ່ເຮັດຢູ່ສວນເອເດັນ. (ປຖກ. 3:15) ສັນຍານີ້ເຮັດໃຫ້ເຮົາຮູ້ວ່າ “ເຊື້ອສາຍ” ທີ່ບອກໄວ້ລ່ວງໜ້າແມ່ນລູກຫຼານຜູ້ໜຶ່ງຂອງອັບຣາຮາມ. ໂປໂລອະທິບາຍວ່າ “ເຊື້ອສາຍ” ທີ່ເວົ້າເຖິງນີ້ໝາຍເຖິງພະເຢຊູຄລິດເຊິ່ງເປັນເຊື້ອສາຍຫຼັກ. ກຸ່ມຄົນທີ່ “ເປັນຄົນຂອງພະຄລິດ” ເຊິ່ງມີຈຳນວນ 144.000 ຄົນທີ່ຈະປົກຄອງຮ່ວມກັບພະເຢຊູໃນການປົກຄອງຂອງພະເຈົ້າກໍຢູ່ໃນເຊື້ອສາຍນີ້ນຳ. (ຄລຕ. 3:16, 29; ພນມ. 14:1-3) ທຸກຄົນທີ່ຍອມຮັບແລະເຊື່ອຟັງພະເຢຊູຈະໄດ້ຮັບສິ່ງດີໆຫຼາຍຢ່າງຈາກຄຳສັນຍາທີ່ພະເຈົ້າເຮັດກັບອັບຣາຮາມ.
ເປັນຫຍັງໂປໂລຈຶ່ງໃຊ້ “ພາບປຽບທຽບ” ນີ້? ລາວກຳລັງເຮັດໃຫ້ເຫັນວ່າຖ້າຄົນຢິວໃນສະໄໝຂອງລາວຍັງຢືນຢັນທີ່ຈະເຮັດຕາມກົດໝາຍຂອງໂມເຊຕໍ່ໄປ ເຂົາເຈົ້າກໍຈະເປັນຄືກັບຮາກາທີ່ຍັງຕ້ອງເປັນທາດຕໍ່ໄປ. ແຕ່ຖ້າເຂົາເຈົ້າຍອມຮັບພະເຢຊູທີ່ເປັນ “ເຊື້ອສາຍ” ຫຼັກຂອງອັບຣາຮາມ ເຂົາເຈົ້າກໍຈະເປັນຄືກັບຊາຣາທີ່ມີອິດສະຫຼະ. ເຂົາເຈົ້າຈະເປັນອິດສະຫຼະແທ້ຈາກບາບແລະຄວາມຕາຍ. (ຢຮ. 8:32-34) ຖ້າເຂົາເຈົ້າບໍ່ຍອມຮັບພະເຢຊູ ກໍສະແດງວ່າເຂົາເຈົ້າບໍ່ເຂົ້າໃຈຈຸດປະສົງຫຼັກທີ່ພະເຢໂຫວາໃຫ້ມີສັນຍາກ່ຽວກັບກົດໝາຍທີ່ຈະພາເຂົາເຈົ້າໃຫ້ໄປຫາພະຄລິດ.
ຄລິດສະຕຽນຫຼາຍຄົນໃນເມືອງຄາລາເຕຍທີ່ໂປໂລຂຽນຈົດໝາຍໄປຫາບໍ່ແມ່ນຄົນຢິວແລະບໍ່ເຄີຍເຮັດຕາມກົດໝາຍຂອງໂມເຊ. ແຕ່ຄລິດສະຕຽນບາງຄົນທີ່ເປັນຄົນຢິວກໍຍັງຢືນຢັນທີ່ຈະໃຫ້ຄລິດສະຕຽນທີ່ເປັນຄົນຕ່າງຊາດເຊື່ອຟັງກົດໝາຍຂອງໂມເຊເຊິ່ງລວມເຖິງການຮັບສິນຕັດນຳ. ໂປໂລຫາເຫດຜົນວ່າເປັນເລື່ອງທີ່ບໍ່ສະຫຼາດທີ່ຈະເຮັດແບບນັ້ນ ຍ້ອນເຂົາເຈົ້າບໍ່ຈຳເປັນທີ່ຈະຕ້ອງເປັນ “ຄືກັບທາດ” ຂອງກົດໝາຍຂອງໂມເຊອີກຕໍ່ໄປ. ເຂົາເຈົ້າ “ເປັນອິດສະຫຼະ” ແລ້ວ ຍ້ອນເຂົາເຈົ້າຍອມຮັບພະເຢຊູຄລິດ.—ຄລຕ. 5:1, 10-14
a ນີ້ເປັນການປັບປ່ຽນຄວາມເຂົ້າໃຈໃໝ່ຈາກແຕ່ກີ້ທີ່ມີການອະທິບາຍໃນຫໍສັງເກດການ 15 ມີນາ 2006 ໜ້າ 10-12.