ລາຄາເຄື່ອງແພງຂຶ້ນຈະເຮັດແນວໃດ?
ຍອມຮັບຄວາມເປັນຈິງ
ຖ້າລາຄາເຄື່ອງແພງຂຶ້ນເລື້ອຍໆ ແລ້ວລາຍໄດ້ຂອງເຮົາກໍເພີ່ມຂຶ້ນນຳ ເຮົາກໍຄືຊິບໍ່ຮູ້ສຶກຫຍັງ. ແຕ່ຖ້າຢູ່ບໍ່ຢູ່ລາຄາເຄື່ອງແພງຂຶ້ນ ແລ້ວລາຍໄດ້ພັດສ່ຳເກົ່າ ເຮົາກໍຄືຊິອຸກໃຈແລະເຄັ່ງຕຶງຫຼາຍ ແລະຖ້າຕ້ອງໄດ້ເບິ່ງແຍງຄອບຄົວອີກກໍຄືຊິແຮ່ງອຸກໃຈແລະເຄັ່ງຕຶງຫຼາຍກວ່າເກົ່າ.
ເຮົາບໍ່ສາມາດຄວບຄຸມລາຄາເຄື່ອງທີ່ຈະຊື້ໄດ້ ແຕ່ຖ້າເຮົາຍອມຮັບຄວາມຈິງໃນເລື່ອງນີ້ມັນກໍຈະເປັນປະໂຫຍດກັບເຮົາຫຼາຍ.
ເປັນຫຍັງຈຶ່ງສຳຄັນ?
ຖ້າເຮົາຍອມຮັບຄວາມຈິງວ່າເຮົາບໍ່ສາມາດຄວບຄຸມລາຄາເຄື່ອງໄດ້ ມັນກໍງ່າຍຂຶ້ນທີ່ເຮົາຈະ . . .
ບໍ່ອຸກໃຈຫຼາຍໂພດ. ຖ້າເຮົາບໍ່ອຸກໃຈຫຼາຍເກີນໄປ ເຮົາກໍຈະຄິດແລະຕັດສິນໃຈໄດ້ດີຂຶ້ນ.
ຫຼີກລ່ຽງນິດໄສທີ່ບໍ່ດີ ເຊັ່ນ: ບໍ່ຈ່າຍຄ່ານ້ຳ ຄ່າໄຟ ຫຼືໃຊ້ເງິນຟຸມເຟືອຍ.
ບໍ່ຜິດກັບຄົນໃນຄອບຄົວເລື່ອງເງິນ.
ຮູ້ວ່າຕ້ອງເຮັດຫຍັງແດ່ ເຊັ່ນ: ອາດຕ້ອງຈັດລຳດັບຄວາມສຳຄັນໃນຊີວິດ ແລະປ່ຽນວິທີໃຊ້ເງິນ.
ສິ່ງທີ່ເຈົ້າເຮັດໄດ້
ພ້ອມທີ່ຈະປັບປ່ຽນ. ຖ້າເຮັດໄດ້ ໃຫ້ໃຊ້ເງິນໜ້ອຍລົງໃນຊ່ວງທີ່ລາຄາເຄື່ອງແພງຂຶ້ນໄວຫຼາຍ. ບາງຄົນໃຊ້ເງິນເກີນໂຕ ເຊິ່ງເປັນຄືກັບການລອຍນ້ຳຕ້ານກະແສນ້ຳ ແລະໃນທີ່ສຸດເຂົາເຈົ້າກໍຈະໝົດແຮງ. ນອກຈາກນັ້ນ ຖ້າເຈົ້າຕ້ອງເບິ່ງແຍງຄອບຄົວໃຫ້ມີສິ່ງຈຳເປັນ ເຈົ້າຕ້ອງຈື່ໄວ້ວ່າຄອບຄົວຕ້ອງການຄວາມຮັກ ເວລາ ແລະການເອົາໃຈໃສ່ຈາກເຈົ້າຫຼາຍກວ່າທຸກສິ່ງ.
ການໃຊ້ເງິນເກີນໂຕກໍເປັນຄືກັບການລອຍນ້ຳຕ້ານກະແສນ້ຳ