ລາຄາເຄື່ອງແພງຂຶ້ນຈະເຮັດແນວໃດ?
ວາງແຜນໃຊ້ເງິນຢ່າງສະຫຼາດ
ລາຄາເຄື່ອງທີ່ແພງຂຶ້ນເປັນບັນຫາສຳລັບເຮົາທຸກຄົນ ແຕ່ເຈົ້າບໍ່ຕ້ອງຮູ້ສຶກວ່າເລື່ອງນີ້ເປັນບັນຫາທີ່ຮັບມືບໍ່ໄດ້ ເພາະອາດມີບາງຢ່າງທີ່ເຈົ້າເຮັດໄດ້ເພື່ອຊ່ວຍໃຫ້ສະຖານະການດີຂຶ້ນ.
ເປັນຫຍັງຈຶ່ງສຳຄັນ?
ຖ້າເຈົ້າບໍ່ພະຍາຍາມວາງແຜນໃຊ້ເງິນຢ່າງສະຫຼາດກໍອາດເຮັດໃຫ້ເຈົ້າມີບັນຫາທາງການເງິນໄດ້ງ່າຍໆ ແລະແຮ່ງຈະເຮັດໃຫ້ເຈົ້າອຸກໃຈແລະເຄັ່ງຕຶງຫຼາຍຂຶ້ນ. ເຖິງວ່າເຈົ້າບໍ່ມີເງິນຫຼາຍ ແຕ່ກໍມີຫຼາຍຢ່າງທີ່ເຈົ້າເຮັດໄດ້ເພື່ອຊ່ວຍເຈົ້າໃຫ້ວາງແຜນໃຊ້ເງິນຢ່າງສະຫຼາດ.
ສິ່ງທີ່ເຈົ້າເຮັດໄດ້
ໃຊ້ເງິນຕາມທີ່ມີ. ການເຮັດແບບນີ້ຈະຊ່ວຍເຈົ້າໃຫ້ຮູ້ສຶກວ່າສາມາດຄວບຄຸມເງິນທີ່ມີໄດ້ ແລະໝັ້ນໃຈວ່າຈະມີເງິນພໍໃຊ້ເມື່ອເຈິເຫດການທີ່ບໍ່ຄາດຄິດ.
ຖ້າເຈົ້າວາງແຜນເຮັດລາຍຮັບລາຍຈ່າຍກໍຈະຊ່ວຍເຈົ້າໃຫ້ໃຊ້ເງິນຕາມທີ່ມີໄດ້. ຕອນທີ່ວາງແຜນ ໃຫ້ຄິດຢ່າງຮອບຄອບວ່າອັນໃດແມ່ນສິ່ງທີ່ຈຳເປັນແທ້ໆ ຈາກນັ້ນກໍໃຫ້ພະຍາຍາມເຮັດຕາມແຜນ. ຖ້າລາຄາເຄື່ອງກັບລາຍຮັບຂອງເຈົ້າມີການປ່ຽນແປງກໍໃຫ້ພ້ອມທີ່ຈະປັບປ່ຽນແຜນການໃຊ້ເງິນ. ຖ້າເຈົ້າແຕ່ງດອງແລ້ວກໍໃຫ້ປຶກສາຜົວຫຼືເມຍຂອງເຈົ້າ.
ລອງວິທີນີ້: ຖ້າເຮັດໄດ້ ຕອນທີ່ຊື້ເຄື່ອງໃຫ້ຈ່າຍສົດບາດດຽວ. ຢ່າໃຊ້ບັດເຄຣດິດຫຼືຈ່າຍຜ່ອນ. ບາງຄົນຮູ້ສຶກວ່າການໃຊ້ວິທີນີ້ຈະຊ່ວຍໃຫ້ຄວບຄຸມຄ່າໃຊ້ຈ່າຍໄດ້ດີກວ່າແລະບໍ່ເປັນໜີ້. ນອກຈາກນັ້ນ ໃຫ້ກວດເບິ່ງການເຄື່ອນໄຫວຂອງເງິນໃນບັນຊີ ຫຼືຈົດສິ່ງທີ່ເຈົ້າໃຊ້ຈ່າຍໃນແຕ່ລະມື້ແລະໃນແຕ່ລະເດືອນ. ການເຮັດແບບນີ້ຈະຊ່ວຍເຈົ້າໃຫ້ຮູ້ວ່າເຈົ້າມີເງິນທັງໝົດເທົ່າໃດແທ້ໆ ແລ້ວເຈົ້າກໍຊິບໍ່ກັງວົນຫຼາຍ.
ການໃຊ້ເງິນຕາມທີ່ມີອາດຈະບໍ່ງ່າຍ ແຕ່ການວາງແຜນຢ່າງດີຈະຊ່ວຍເຈົ້າໄດ້ ແລະເຈົ້າກໍຈະກັງວົນກ່ຽວກັບເລື່ອງເງິນໜ້ອຍລົງນຳ.
ໃຫ້ເປັນຄົນດຸໝັ່ນເພື່ອຈະບໍ່ຕົກວຽກ. ເຈົ້າຈະເຮັດຫຍັງໄດ້ແດ່ເພື່ອຈະບໍ່ຕົກວຽກ? ລອງເຮັດຕາມຄຳແນະນຳເຫຼົ່ານີ້: ເຂົ້າວຽກໃຫ້ກົງເວລາ ເບິ່ງວຽກທີ່ເຮັດໃນແງ່ບວກ ພ້ອມຊ່ວຍເຫຼືອຄົນອື່ນ ດຸໝັ່ນເຮັດວຽກ ສະແດງຄວາມນັບຖື ເຮັດຕາມກົດລະບຽບ ແລະພະຍາຍາມຝຶກທັກສະໃນການເຮັດວຽກ.
ຢ່າໃຊ້ເງິນໄປກັບສິ່ງທີ່ບໍ່ຈຳເປັນ. ໃຫ້ຖາມໂຕເອງວ່າ: ‘ຂ້ອຍມັກໃຊ້ເງິນໄປກັບສິ່ງທີ່ບໍ່ຈຳເປັນຫຼືສິ່ງທີ່ສົ່ງຜົນເສຍຕໍ່ຂ້ອຍບໍ?’ ຫຼາຍຄົນເສຍເງິນທີ່ຫາມາດ້ວຍຄວາມຍາກລຳບາກໄປກັບຢາເສບຕິດ ການພະນັນ ຢາສູບ ແລະການກິນເຫຼົ້າກິນເບຍຫຼາຍໂພດ. ສິ່ງເຫຼົ່ານີ້ຍັງເຮັດໃຫ້ເສຍສຸຂະພາບແລະອາດເຮັດໃຫ້ຕົກວຽກນຳ.
ເກັບເງິນໄວ້ໃຊ້ໃນຍາມສຸກເສີນ. ຖ້າເຮັດໄດ້ ໃຫ້ເກັບເງິນໄວ້ບາງສ່ວນເພື່ອໃຊ້ຈ່າຍສຳລັບເຫດການສຸກເສີນ. ການເຮັດແບບນີ້ຈະຊ່ວຍບໍ່ໃຫ້ກັງວົນ ຖ້າຢູ່ບໍ່ຢູ່ເຈົ້າຫຼືຄົນໃນຄອບຄົວຂອງເຈົ້າເຈັບປ່ວຍ ຕົກວຽກ ຫຼືມີເຫດການທີ່ບໍ່ຄາດຄິດເກີດຂຶ້ນ.