ເລື່ອງເສີມ
ປະມານ 17 ສ່ວນຮ້ອຍຂອງນັກຮຽນຊາວເບຣຊີນເຊິ່ງອາຍຸລະຫວ່າງ 10 ຫາ 13 ປີ ມັກຂົ່ມເຫງຄົນອື່ນຫຼືບໍ່ກໍຖືກຂົ່ມເຫງ.—O ESTADO DE SÃO PAULO, ປະເທດເບຣຊີນ.
ໃນທຸກມື້ນີ້ ແພດກວດພົບວ່າເດັກນ້ອຍທີ່ອາຍຸຕ່ຳກວ່າ 12 ປີ ເປັນໜິ້ວໝາກໄຂ່ຫຼັງ ມີຄວາມດັນເລືອດສູງ ມີໄຂມັນສູງ ແລະມີບັນຫາກັບຕັບ. ອັນໃດຄືສາເຫດຫຼັກ? ຮູບແບບຊີວິດທີ່ມີແຕ່ນັ່ງກັບນອນ ກິນອາຫານທີ່ບໍ່ມີປະໂຫຍດຫຼາຍໂພດ ແລະຕຸ້ຍໂພດ.—ABC, ປະເທດແອດສະປາຍ.
ລືມວິທີຫຼິ້ນກັບລູກ
ອີງຕາມການສຳຫຼວດໃນມໍ່ໆນີ້ ໜຶ່ງໃນຫ້າຂອງພໍ່ແມ່ທີ່ຢູ່ໃນປະເທດອັງກິດບອກວ່າເຂົາເຈົ້າລືມ “ວິທີຫຼິ້ນກັບລູກ.” ໜຶ່ງໃນສາມຍອມຮັບວ່າເຂົາເຈົ້າຮູ້ສຶກເບື່ອທີ່ຈະຫຼິ້ນກັບລູກ ໃນຂະນະທີ່ບາງຄົນບໍ່ມີເວລາແລະບໍ່ຮູ້ວ່າຈະຫຼິ້ນຫຍັງກັບລູກ. ສາດສະດາຈານທ່ານນາງ ທັນຍາ ໄບຣອນ ນັກຈິດຕະວິທະຍາດ້ານການປິ່ນປົວກ່າວວ່າ: “ມີປັດໄຈສີ່ຢ່າງທີ່ຈະເຮັດໃຫ້ການຫຼິ້ນກັບລູກປະສົບຜົນສຳເລັດນັ້ນຄື ການໃຫ້ຄວາມຮູ້ ການໃຫ້ແຮງບັນດານໃຈ ການເຂົ້າກັບຄົນອື່ນແລະການເວົ້າລົມກັນ.” ເຖິງວ່າໜຶ່ງໃນສາມຂອງພໍ່ແມ່ເລືອກທີ່ຈະຫຼິ້ນເກມຄອມພິວເຕີກັບລູກ ແຕ່ວ່າເດັກນ້ອຍສ່ວນຫຼາຍມັກຫຼິ້ນເກມຄົນດຽວ. ສ່ວນຫຼາຍແລ້ວເດັກອາຍຸ 5 ເຖິງ 15 ປີມັກເຮັດກິດຈະກຳກາງແຈ້ງຫຼືຫຼິ້ນເກມທີ່ເຮັດຈາກເຈ້ຍແຂງກັບພໍ່ແມ່.
ອ່ານນິທານໃຫ້ລູກຟັງກ່ອນນອນ
ມີການບໍລິການທາງອິນເຕີເນັດເພື່ອຊ່ວຍຜູ້ເປັນພໍ່ທີ່ບໍ່ມີເວລາອ່ານນິທານໃຫ້ລູກຟັງກ່ອນນອນ. ໜັງສືພິມ Daily Telegraph ຂອງຊິດນີ ບອກວ່າ “ໂປຣແກຣມຄອມພິວເຕີທີ່ທັນສະໄໝຈະບັນທຶກສຽງຂອງພໍ່ທີ່ອ່ານນິທານໃຫ້ລູກຟັງກ່ອນນອນ ໃສ່ສຽງດົນຕີແລະສຽງປະກອບ ແລ້ວສົ່ງບັນທຶກສຽງນັ້ນໄປໃຫ້ລູກທາງອີເມວ.” ແນວໃດກໍຕາມ ຜູ້ຊ່ຽວຊານດ້ານສາຍສຳພັນບໍ່ແນ່ໃຈວ່າວິທີນີ້ຈະເປັນປະໂຫຍດ. ດຣ. ຣິຊາດ ເຟັດເຊີ ທີ່ເຮັດວຽກຢູ່ໂຄງການຄົ້ນຄວ້າເລື່ອງຄອບຄົວໃນມະຫາວິທະຍາໄລນິວຄາໂຊ ປະເທດອົດສະຕຣາລີ ກ່າວວ່າ: ການອ່ານນິທານໃຫ້ລູກຟັງເປັນການສ້າງສາຍສຳພັນທີ່ດີກັບລູກ. ມັນກ່ຽວຂ້ອງກັບການລົມກັບລູກ ກອດລູກ ແລະຫົວກັບລູກ. ດຣ. ຣິຊາດ ກ່າວວ່າ ອີເມວບໍ່ໄດ້ເກີດຜົນດີຄືກັບການນັ່ງອ່ານໃຫ້ລູກຟັງ.