N’nga chini inothapulela ubadizo, n’nga ngofuneya moi a-vi?

1. N’nga chini inothonyi-edha ira ubadizo ndi mafunji-edho ofuneya maningi a Bibilyani?

MUTU abadiziwa, ninokala osangalala maningi! N’nga munoidhiwa ira Makristau oroma thitho tanoodhivwa ee-no? Vagumano oroma wa pingoni wai Kristau, va petekoste yawa ya 33 K.A.B. (Kristu Angamadhi Baliwa) Aliwa tatoona atu anjinji tabadiziwanga. Vahora yeniyo, rumiwi Pedru atoonga mwasa ovwei-a funeya obadiziwa. (May. 2:38, 40, 41) Vasogolovee, rumiwi Paulo atoolemba ira: “Ifunji-edho yokhuza ubadizo” inoira ikhundu ‘yamafunji-edho oroma okhuza Kristu.’ (Aeb. 6:1, 2) Ee-no, ubadizo ndi imbo-i mwamafunji-edho malukhulu Abibilyani thitho ninofwanela vwechecha phama thapulelawee. N’nga mwasiwa ngwan’ni?

2. Mwasiwa ngwan’ni ninofwanela vwechecha inothapulela ubadizo?

² Ninga mwemo sapato yolimba munokami-edha aliwa nyumba ira ikaleve yoimela, vwechecha phama thapulela wa ubadizo unooda nikami-a ira nikaena iroromelo yolimba. Mo-obala akala ira ninodhowa vasogolo naifunelo yofuna badiziwa venango akala ira nibadiziwile wale, i-yo othene ninofwanela vwechecha makhundo enala. Ngumwasee muyofunjedha yei, ninowakhula vyofuka vyo-arelavi: N’nga chini inothapulela ubadizo, n’nga ngofuneya moi a-vi? N’nga ubadizo unothangani-avon’ni? N’nga mwasiwa ngwan’ni ninobadiziwa mudhina la Baba, la Mwana na la zimu ochena?

N’NGA CHINI INOTHAPULELA UBADIZO, N’NGA NGOFUNEYA MOI A-VI?

3. N’nga ubadizo unothonyi-edhan’ni?

³ Ubadizo unothonyi-edha ira mutovwechecha imbarimbari yokhuza Yohova Nlungu, Yesu Kristu thitho ira mutochinyuwa vyodawa vinyu noira machinjo vaingumiinyu ira mum’labelenga Yohova. Thitho unoimelela ira nyo mutovwecha ira Nlungu uno-indi-edha basa Yesu vonivulumucha wu madao na ukwa. I-yavo vyevyo, munothonyi-edha ira mutodhivelela wa Yohova venango ira mutoira lobelo lom’lanyedha ira munongo m’labela vambo-i na gululee. Dhivelela no badiziwa kuroma ulendo owenda na Yohova oi unokalavo modhowa no dhowa.

4. N’nga bwini-iwa manungo othene ma-injeni unothapulelan’ni? (Muone thitho iruthiruthi.)

⁴ Vobadiziwa, mutu unobwini-iwa ma-injeni amala unothavuliwamo.a Vinokala ninga utovu-eleliwa amala ongovenyathi-iwa. (Mufwanafwani-edhe Akolose 2:12) Ubadizo unoimelela ira mutoira machinjo malukhulu vaingumiinyu. Moi a-vi? Nyo mwabwini-iwa ma-injeni, munothonyi-edha ira muto-iya umutwinyu wawale. Mwathavuliwa ma-injeni, munoroma ingumi ipya yofunechecha irana ifunelo ya Nlungu.

5. Mwasiwa ngwan’ni ninooda onga ira dhilimbi-edha ira mutu abadiziwe unofwanafwana nodhilimbi-edha wairile Nowa vosakanya mwadiya? (1 Pedru 3:18-21)

⁵ Muleri 1 Pedru 3:18-21. Mwandhila inango ninooda fwanafwani-edha dhilimbi-edha unoira mutu vokozeela ubadizo na dhilimbi-edha wairile Nowa vosakanya mwadiya. Akala muromile chineneeva funjedha Bibilya, vinooda oneya kala vyorucha maningi ira muchinje vyongo vyothene ira mubadiziwe. Venango munooda ona ira vyali vyorucha maningi ira Nowa asakanye mwadiya. N’nga pyofuneyadi dhilimbi-edha maningi? Pyaimbarimbari, ninga mwakalele aliwa na Nowa, Nlungu atoom’mwandela ira asakanye mwadiya ira adhavulumuwelemo va igumula. Nowa afwanela a-rela malangi-o othene ava-iwile liye. Mwairoromelo thitho mokami-iwa na Yohova, Nowa atoovwela no sakanya mwadiya. Liye “atooirana vyothene vyam’mwandenle Nlungu.” Na nyoene thitho munooda irana vimbo-ive.—Mar. 6:22.

6. N’nga ubadizo unonivulumucha moi a-vi?

⁶ Va versu 21, rumiwi Pedru atoolemba ira: “Ubadizo unovulumucha nyo thitho.” Pyovweya ira bwini-iwa ma-injeni baa-i khunodhi-a ivulumucho, venango cheni-a vyodawa vinyu. Ndi sangiri ya Yesu baa-i inaode irana vyevi. (1 Ju. 1:7) Angalive ee-no, badiziwa kofuneya maningi namwasa oi Yohova unoonga ira niirengana ee-no. Badiziwa ndi ndhila yom’vepha “Nlungu ira auva-eni ithuulela rima yaphama.” Yohova unokala osangalala wakhula yovepha inyu thitho levelela vyodawa vinyu dhela mu kuto wa Yesu. Mwemu ndimoda munovulumuchela ubadizo venango uiri-ani ira mudhafwanye ingumi yo-omala.

N’NGA UBADIZO UNOTHANGANI-AVON’NI?

7. N’nga ubadizo unoireya moi a-vi?

⁷ Ninga muoni i-yo, bwini-iwa ma-injeni ndiyongo yofuneya maningi. I-yavo vyeyvo, Bibilya kalinoonga vinjinji vya moda munofwanela ireela ubadizo. Bwenye vatokala makhundo manjinji ananikami-e idhiwa vyofuna irana vahora yaubadizo. Mwaifwanafwani-o, anonikami-a idhiwa moda munofuna warela atu anofuna dhowa mabadiziwa thitho makalelo anofuna thonyi-edha atu anofuna badiziwao. (1 Ak. 14:40; 1 Ti. 2:9) Wiliwili anobadiza mbaandimuwa avapingoni mbwenye i-yo kaninofwanela atitimi-a tava-iwa ngari yen’na. (1 Ak. 1:14, 15) Wa Yohova ubadizo ngorumeleya mo-obala ira atu anobadiziwao mboinjiva venango mboyeva.—May. 8:36.

8. N’nga ndivyofuka vivi vinofukiwa atu anofuna badiziwa, n’nga mwasiwa gwan’ni? (Mayirelo 2:38-42) (Muone thitho iruthiruthi.)

⁸ Bibilya linothonyi-edha ira ninofwanela ‘Laleela vakwecha vyairoromelwi-u ira nidhavulumuwe’ venango onga vyairoromelwi-u. (Aro. 10:9, 10) irana vyevi va dambo li-u laubadizo pyofwanelela namwasa oi ubadizo ndimaromelo ofuneya aivulumucho yi-u. Ngumwasee atu anofuna badiziwa tanofukiwecha vyofuka vinli. Yoroma choi: “Nyo mutochinyuwa vyodawa vinyu, dhivelela wa Yohova norumela ndhila yovulumuwela dhela mwa Yesu Kristu?” Yofuka yen’na inonithuucha vamwasa waongile Pedru va Petekoste thitho ifunelwee kuidhiwa viirile mutu ira abadiziwe. Yofuka yanambili: “Nyo munovwechecha ira badiziwa winyu unouva-ani izindiyelo yooni-a ira muli mutu m’mbo-i wa Mboni dha Yohova movwelana na gulu la Yohova?” Ifunelo ya yofuka yen’na, ndi idhiwi-a atu tanofuna badiziwao vinofuna aliwa iranga. Aliwa tanolanyedha ira anongo-arela malangi-o a Yohova na gululee thitho ira anongom’labela Yohova vambo-i naabali naarongola. Phievyo vyairile atu othene va petekoste angamadhi badiziwa. (Muleri Mayirelo 2:38-42.) Atu othene anowakhula ira ee khumela vathi varima va vyofuka vinlivi tanooda badiziwa.

9. N’nga i-yo othene ninofwanela iran’ni ira nim’sangalali-enga Nlungu?

⁹ Hora dhinango vinooda kala ira mwa-anafunjedhe imbarimbari, mwali mutu wapama thitho mwali mwa-anaire yodawa ilukhulu iliyothene. Venango mubaliwile mu banja la mboni dha Yohova loi latooukami-ani ira mum’dhiveliwengana Yohova. N’nga nyo munofuneela chinyuwa venango badiziwa ira mum’dhiveliwi-e Nlungu? Ee. Mo-obala moda muli vyongo vaingumii-u, i-yo othene ninofwanela zindiyela ira nibaliwile mu madao thitho vinoniimwanani-a kala afwee a Nlungu. (Sal. 51:5) Ee-no nam’mwidhiwa Yohova, ninofwanela e-la ifunelwee vasogolo a-kala ifunelwi-u. Thitho ninofwanela chinja makalelo an’na i-yo voroma thitho dhimbinuwa venango kaana ingumi yom’sangalali-a Babi-u wadhulu. Naira ee-no ninooda badiziwa.—May. 3:19.

10. N’nga munofwanela iran’ni akala mwatoobadiziwa wu religiau yali nyo?

¹⁰ Akala mwatoobadiziwa mungali religiau linyu, munofwanela badiziwa okoka ira mukale wa Mboni dha Yohova. N’nga mwasiwa ngwan’ni? Vahora yeniyo, mwali mwa-anaidhiwe mokwakwanela imbarimbari yokhuza Yohova Nlungu na Yesu. Angalive ira mwatooira lobelo lodhivelela wa Nlungu, vyalanyedhile nyo mulobelolo kavyathonyi-edha ira mutoidhiwa ifunelo ya Nlungu molinyali. Wu Efeso, rumiwi Paulo atoogumanana alombwana enango oi tatoobadiziwa mbwenye kataidhi molinyali makhundo ofwanelela Aikristau. Ee-no atu enao tanoofwanela badiziwa okoka.b (May. 19:1-5) Mofanafana na vyevi, malamboano thitho Yohova unorumeli-a mutu badiziwa akala utoidhiwa mokwakwanela ifunelwee.

“MUDHINA LA BABA, LA MWANA NA LAZIMU OCHENA”

11. N’nga chini inothapulela badiziwa “mudhina la Baba, la Mwana na la zimu ochena”? (Mateu 28:18-20)

¹¹ Yesu atoonga ira anamafunjedhee tanofwanela badiziwa mu “dhina la Baba, la Mwana na lazimu ochena” (Muleri Mateu 28:18-20.) N’nga liye athapulelan’ni? Bibilyani, madhu oi “dhina” hora dhinjinji anothapulela limbili la mutu. Anooda thapulela thitho utongi venango izo inoimelela mutuo. (Mufwanafwani-edhe na Mateu 10:41) Ee-no nabadiziwa mu dhina la Yohova na Yesu, ninozindiyela ira aliwa tatokaana izo thitho utongi oniwandela vinofwanela i-yo irana. Thitho nabadiziwa Mudhina la zimu ochena, ninozindiyela izo ina Yohova vonisogolela. Dhoweni nioneni moda munaidhiwele i-yo vyevi.

12. N’nga badiziwa mudhina la Baba unothangani-avon’ni? (Apokalipse 4:11) (Muone thitho iruthiruthi.)

¹² Mudhina la Baba. I-yo ninosikimizela ira Yohova ndi Babi-u wa dhulu wenuo univaidhe ingumi. Liye ngwakopolo dhothene apanduchile vyongo vyothene. (Muleri Apokalipse 4:11) I-yo ninoidhiwa ira liye unovwa malobelwi-u, nino-indi-edha basa dhinalee nalobelanga thitho nawandelanga atu enango vyokhuza liye. (Sal. 65:2) Mbwenye badiziwa Mudhina la Baba unothangani-avo vyongo vinango. Atu othene tavuruwan’ne mwasa wa Pedru va petekoste tatoom’mwidhiwa Yohova. Romela va hora yeniyo, aliwa tanoofwanela zindiyela ira ndi Yohova baa-i unofuna niva-a ingumi yo-omala dhela mwa Yesu Kristu.—Aro. 5:8.

13. N’nga badiziwa mudhina la Mwana unothangani-avon’ni? (Muone thitho iruthiruthi.)

¹³ Mudhina la Mwana. I-yo ninororomela ira Yesu ndi mwana obaliwa ekene wa Nlungu. Liye “ndi ndhila” thitho dhela mwa liye ninooda kala vauxamwali na Yohova. (Ju. 14:6) Yesu thitho ngu namavulumuchi-u. Liye atoonikwela ira nidhafwanye ingumi yo-omala. Idhiwa vyevi, unonikami-a ira ni-arelenga ifwanafwani-oyee hora dhothene a-kala nabadiziwa baa-i. (1 Ju. 2:6) Ninga mwairile Yesu, i-yo ninolaleela mwathindhi thitho kaninorumeli-a yongo iliyothene niimwanani-a irana vyevi. (Luk. 4:43) I-yo nili okozeya gumanana vyowesedha na ifunelo yoi nim’labelenga Yohova mororomeleya. (2 Ti. 3:12) I-yo ninolemeza Yesu ninga “muru wa pingo.” (Aef. 5:23) Ngumwasee ninokala osangalala a-rela malangi-o anovelela atu asakunle Yesu ira tasogolelenga pingo thitho samalela anama-arelee.—Aef. 4:8, 11, 12.

14. (a) N’nga badiziwa mwazimu ochena unothangani-avon’ni? (Muone thitho iruthiruthi.) (b) N’nga ndimaubadizo enango aavi anoira atu ozoziwa? (Muone thitho kwadru loi “Maubadizo enango anoira atu ozoziwa.”)

¹⁴ Mudhina la zimu ochena. I-yo ninoidhiwa imbarimbari yokhuza zimu ochena. Ninoidhiwa ira liye kai mutu venango ikhundu ya Utatu, mbwenye ndi kopolo ya Nlungu ino-indi-edha liye basa. Ninovwechecha ira zimu ochena watoosogolela anamaongela thitho atu alembile Bibilya. Ngumwasee i-yo ninoleri madhu a Nlungu hora dhothene thitho a-rela vinonifunji-a aliwa. (2 Pe. 1:20, 21) I-yo ninodhilimbi-edha irana vilivyothene ira na-airena vyodawa vilukhulu namwasa oi ninoidhiwa ira vinoniimwanani-a i-yo venango pingo wachela zimu ochena.—Aef. 4:30.

15. N’nga ninofwanela kala osikimiza iranan’ni?

¹⁵ Akala mutobadiziwa, mukale ofunechecha ira muidhiwe “mafunji-edho okhuza badiziwa”c thitho kaana ingumi yovwelana na vyalanyedhile nyo vahora yadhivelela nyo ira mubadiziwe. Akala nyo kamunabadiziwe, n’nga chini inouimwanani-ani? Muyofunjedha yo-arela ninodha tapanya vinaire nyo ira mudhowenave dhowa vasogolo nofiya vobadiziwa.