Mwasa nlukulu ofuneya maningi wenuo mutu uliwethene unofuneela liye sakula, ngokuza dhivelela wa Yohova nokala mubanja laatu anom’lambela. Yohova unofuna ira mutu uliwethene airena vyevi. Mwasiwa ngwan’ni? Yohova unofuna ira atu takale vauxamwali na liye thitho tadhakaena ingumi yo-omala. (Dot. 30:19, 20; Agl. 6:7, 8) Mbwenye Yohova kanokhanyi-edha mutu uliwethene ira am’labelenga. Unofuna ira mutu uliwethene asakulenga ekhene vinofwanela liye irana. N’nga chini inoireya akala Kristau obadiziwa kavwenle lamulo la Nlungu amala liye irana yodawa ilukulu? Akala kanochinyuwa, unofwanela kumi-iwa pingoni. (1 Ak. 5:13) Mbwenye angalive ira vili e-no, Yohova unodedi-edhela ira mutu uirile yodauo awelele wa liye. Ngu mwasiwa atoovelela kuto ira atu odawa enao anochinyuwa, taleveleliwenga. Nlungwi-u waudhivela unovepa atu airile vyodawa vilukulu ira tachinyuwe.—Zka. 1:3; Aro. 2:4; Yak. 4:8. w24.08 14 ¶1-2

Muhora yalembile rumiwi Juwau kartalee laneraru, atu enango tatooroma mwadha milanyu yonama, vyevi vyatooiri-a ira atu pingoni ta-avwelanenga. Mbwenye atu enango tatoodhowanave “wenda muimbarimbarini.” Aliwa tanom’vwela Yohova thitho tatoodhowanave “a-rela malamulwee.” (2 Ju. 4, 6) Makristau ororomeleyala, tanom’sangalali-a Juwau na Yohova. (San. 27:11) N’nga ninofunjedhavo n’ni? Kala ororomeleya unoniiri-a kalanga osangalala. (1 Ju. 5:3) Mwaifwanafwani-o, ninokala osangalala naidhiwa ira ninom’sangalali-a Yohova. Liye unosangalala aniona nikhondanga vyowesedha no-arela makhundo aimbarimbari. Angelo naaliwene thitho anosangalala dhulu. (Luk. 15:10) I-yo thitho ninokala osangalala Makristau afwi-u takalangave ororomeleya. (2 At. 1:4) Ilambwila yadha nongiwa, ninodha sangalala idhiwa ira natookalave ororomeleya wa Yohova muilambo yotongiwa na Satanila. w24.11 12 ¶17-18

N’nga hora yoi mum’mwidhiwe mutuo inofwanela kala indendai moi a-vi? Mwambaranyedha m’mandela mutuo mathuulelwinyu, munodha oneya ninga otamanga rima. (San. 29:20) Mbwenye thitho mwadembuwa munodha oneya ninga ovwalavwali-a simbwasimbwa akala mutu unom’funa nyo utoidhiwa ira munom’funa. (Nam. 11:4) Thuulelani ira mwa-anadhowe mam’mwandela mutuo mathuulelwinyu, kamuthuulelenga ira basi unourumelani. Mukalenga osikimizela ira muli okozeya kala vabanjani thitho muonenga ira mutu unom’funa nyo ngoufwanelelani. N’nga munaire a-vi akala mutozindiyela ira mutu mwinango unoufunani? Akala kamunom’funa mutuo kamuirenga vyongo kalanga ninga munom’funa. Kai pama iri-a mutu mwinango onanga ninga munom’funa angalive ira kamunom’funa.—Aef. 4:25. w24.05 22-23 ¶9-10