Moda munakami-edhe i-yo abali-u oi kai amboni dha Yohova

1-2. N’nga chini yafuna dodomi-a uxamwalinyu naabalinyu vahora yaromile nyo funjedha Bibilya?

YESU atoowandela mutu mwinango afuna kala nama-arelee ira: “Udhowe nyumbani waabalaa thitho umaawandele viuwirele Yohova.” (Mrk. 5:19) Voonga vyevi, Yesu atoorumelela ira mutuo utokaana kalelo—lofuna wandela abalee milanyu yapama.

² N’nga munothuulela moda mwadhivwenle nyo fendo yoroma mungavwide milanyu yapama? Venango mwatoodhilimbi-edha ira mulaleele milanyu yapamiyo waabalinyu mbwenye aliwa katavuruwan’ne milanyu yapamiyo. Venango ndhila ya-indi-edhe nyo basa voawandela imbarimbari, yatooromi-a kangana na aliwa. Akala ndi ee-no, n’nga munaire a-vi ira mudhowenave kala vauxamwali wapama naabalinyu vo-ododomi-a makhundo Aikristau?

3. N’nga muyofunjedha yei ninotapanyan’ni?

³ Muyofunjedha yei ninoona: (1) Mwemo tangaranga munanikami-edhe aliwa kaana ifunelo naabali-u oi kai Amboni a angalive ira aliwa katinobala; (2) kala wazelu volimbanana madhu na vyoireya vyothakala; (3) leva rima na idedi-edho munakami-edhe aliwa abali-u zindiyela imbarimbari thitho (4) moda munaathonyi-edhe i-yo ira ninoadhiveliwana.

MUKALENGA ATANGARANGA

4. N’nga Yesu airechana a-vi atu oi katathonyi-edha ifunelo namilanywee?

⁴ Yesu kaa-iidhe mombaranya atu oi katana ifunelo na milanywee. Liye atoodhifwanafwani-edha na mutu alaba basa mundani mwa mauva oi atooira vyothene ira afwanye mwiri wa masavu utomala kaana vyova-a. (Luk. 13:6-9) Vahora yaonga Yesu ifwanafwani-o yen’na, ali adhilimbi-edhanga limbi-a iroromelo ya Ayuda afwee wa vyawa viraru na meya. Mwasiwa ngwan’ni Yesu anoodhilimbi-edha ira aakami-e? Yesu anooavwela tangaranga atu thitho vyevi vyanoom’kami-a ira aalevelenga rima.

5. Mwasiwa ngwan’ni Yesu anoavwela tangaranga Ayuda?

⁵ Yesu anooavwela tangaranga Ayuda namwasa oi anamasogolela amareligiau tatooimwanana akami-a ira tam’roromelenga Nlungu. Yesu atoonga ira atwao tali ninga “mabila o-okaana namakumbiza.” (Mrk. 6:34) Anga-adhi vang’ono ira apiwe, Yesu atoolela Yerusalemu namwasa oi atooidhiwa ira atu anjinji mu Yerusalemu anodha luza vingumi viwa namwasa o-okaana iroromelo. (Luk. 19:41-44) Nathuulelanga maningi abali-u, vinonilimbi-a ira naakami-enga.

6. Mwasiwa ngwan’ni ninofwanela kala oleva rima naabali-u oi kai Makristau? (Agalatiya 6:9)

⁶ Muleri Agalatiya 6:9. Angalive ira abali-u katinokaana ifunelo va vyongo vinororomela i-yo, ninofwanela dhowanave kala oleva rima thitho dhowanave “irana vyapama.” Ninoidhiwa ira vanovira hora indendai ira mutu amali-e mathuulelwee odaweya noroma kaana iroromelo. N’nga vahora inango mwali mutu oi “kamwana idedi-edho venango ira kamwali mu religiau iliyothene?” (Aef. 2:12) Akala ndi ee-no pyo-okaikeli-a ira mutu mwinango atooukami-ani. N’nga nyo kamunodhilimbi-edha ira mukami-e abalinyu va vyorambulela viwa vyauzimu?

KALA WAZELU VOLIMBANANA MADHU NA VYOIREYA VYOTHAKALA

7. N’nga chini yaimwanani-a abalee a Yesu ira takale anamafunjedhee?

⁷ Vinooneya ira abalee a Yesu tatoovwa vyodabwi-a vyairile liye wu Galileya. (Luk. 4:14, 22-24) Mbwenye voroma, katam’roromela. (Ju. 7:5) Mwasiwa ngwan’ni? Bibilya kalinoonga. Mbwenye linothonyi-edha vyongo vinli vyaimwanani-a Ayuda ira takale anamafunjedha a Yesu. Enango taova atu. (Ju. 9:18-22) Atu enango tam’moni Yesu romela angali mwana, vyali vyorucha roromela ira liye ndi mwana Nlungu. (Mrk. 6:1-4) Pyo-okaikeli-a ira abalee a Yesu, tatookaana mathuulelo enala. N’nga vyevi vinooda ireya thitho waabali-u?

8. N’nga chini inairi-e abali-u thuulelanga vyodaweya vyokhuza Mboni dha Yohova?

⁸ Kathuulelani vyaairi-a abalee a Yesu ira taonge vyongo vyevi. Vinooneya ira abalee a Yesu tali mu gulu laatu laonga ira liye “utokaana mi-ala.” (Mrk. 3:21) Mwasiwa ngwan’ni tatoofiya voonga ee-no? Muyofunjedha yei, vinooni-a ira Yesu akalecha opingeya maningi na basa yolaleela noili-a atu thitho vinooneya ira kaakana hora yoi adye. (Mrk. 3:20) N’nga abalee taona ira Yesu ali o-othuulela pama? Venango aliwa tathuulela ee-no. Abali-u anooda thuulela ira ninoona religiau li-u kala lofuneya maningi. Akala aliwa anoona ee-no, vinokala pama athonyi-edha mu vyoira vi-u ira nili atu ololela.

9. N’nga chini inaakami-e abali-u chinja mathuulelo a moda munonionela aliwa? (1 Pedru 3:1, 2) (Muone thitho viruthiruthi.)

⁹ Mudhowenave kala oriya rima thitho opwaseya. Vyoonga vi-u venango vyoira vi-u vinooda chinja abali-u moda munoaonela aliwa Amboni dha Yohova. (Muleri 1 Pedru 3:1, 2.) Pyoidhiweya maningi ira lombwana o-ororomela, unooda dhivwa ira ngo-obaliwa nothakaleliwanga maningi venango sukwala i-yanee adhowanga migumanoni thitho muurumiwini. I-yana Waikristau kanafune ira manee adhivwenga ee-no. Liye unofwanela chinja thandha wa vyongo vyauzimu ira akaengana hora injinji yowaredha na manee. Mwaifwanafwani-o, liye unooda dhowa muurumiwini vahora yoi manee utopingeya venango utokumavo. Namwasa okala othuulela pama, liye unooda m’kami-a manee kaana mathuulelo apama okhuza Mboni dha Yohova.

10. N’nga ninasazi-edhe a-vi Yesu naruni-iwanga?

¹⁰ Kamudhikanyi-edhenga wakhula iliyothene tauruni-angani. Hora inango atu tatoom’monga Yesu ira ngodya maningi thitho omwa maningi. mbwenye liye kadhi-elele nduli. Malomwee liye atoonga ira “zelu inosimikizela ira njolongomana namwasa wamabasee.” (Mat. 11:19) Liye atoothonyi-edha mu vyoiravyee ira ali mutu othuulela pama thitho anosangalala na vyongo vyapama vaingumiyee. (Mufwanafwani-edhe na Ju. 2:2, 6-10.) Ee-no mofwanafwana na Yesu, kamubalenga vyongo vyothene vinouruni-ani abalinyu. Malomwee, mwaathonyi-edhenga abalinyu mu vyoira vinyu ira muli mutu othuulela pama thitho osangalala. Ifwanafwani-o inyu inodha akami-a aliwa vwechecha ira vyongo vyothakala vyavwa aliwa vyokhuza i-yo, kai vyaimbarimbari.

MUKALENGA OLEVA RIMA NA AIDEDI-EDHO

11. N’nga Yesu aira a-vi vyongo naabalee?

¹¹ Milanyu yapama inothonyi-edha ira Yesu ali oleva rima waabalee. Mwaifwanafwani-o, vinooneya ira aliwa tatookalavo vahora yaira Yesu yodabwi-ayee yoroma wu Kana. (Ju. 2:11, 12) Ninga muongile i-yo ndulimu, abalee a Yesu katam’roromela. Vingalive ee-no, Yesu kaa-iidhe vwelana naaliwa. Bibilya linothonyi-edha ira vangavirile vyawa viraru khumela vahora yairile Yesu yodabwi-a wu Kana, Yesu atoodhowanave airela vyapama abaleao.—Ju. 7:5-8.

12. N’nga chini inanikami-e ira na-afooke nodedi-edhelanga ira dambo n’nango abali-u anodha m’labela Yohova?

¹² I-yo nitoidhiwa ira Yohova ngwatangaranga maningi. Liye unooda nikami-a ira na-aluze idedi-edho yoi dambo n’nango abali-u anodha kala Amboni dha Yohova. Mareligiau onama tadha nongiwanga, abali-u tanodha roromela ira vyaonga i-yo vyali vyaimbarimbari.b (Apk. 17:16) Venango aliwa tanodha sakula m’labela Yohova vambo-i na i-yo nyarwa ilukhulu yadharoma! Mulimothene munakalele aliwa, munofwanela kami-a abalinyu vahora inogumanana aliwa nyarwa. Taonanga moda munoadhiveliwana nyo, munooda airi-a ira tarome funjedha Bibilya.

MWAATHONYI-EDHENGA IRA MUNOADHIVELIWANA

13. Angalive ira ninokala opingeya na mabasa a Yohova, n’nga kaninofwanela airi-a abali-u thuulelangan’ni?

¹³ Angalive ira ninokala opingeya na mabasa a Yohova, kaninofwanela iri-a abali-u kaana mathuulelo oi kanina hora yowaredha naaliwa venango kaninoadhiveliwana. (Mat. 7:12) N’nga ninathonyi-edhe a-vi ira ninoathuulela? Dhoweni nioneni ndhila dhinango.

14-15. N’nga ninathonyi-edhe a-vi ira ninodhiveliwana abali-u oi kai Amboni dha Yohova? Muonge ifwanafwani-o.

¹⁴ Mukalenga ovwelana thitho audhivela. Ndhila imbo-i inathonyi-edhe i-yo ira ninoadhiveliwana maningi abali-u ndi awandela moda muli vyongo vaingumi yi-u. Mwaifanafwani-o, ninooda tumiza mesage vambo-i na mafoto akomile i-yo ningali naafwi-u venango ningali vaulendo. Ava-a vyongo masiki vingali vyoyeva, noalembela karta vinodha iri-a ira nilimbi-e uxamwali-u naaliwa. Nairanga vyothene vinaode i-yo ira nikale vauxamwali naabali-u, aliwa anongodhivwa ira ninoadhiveliwana.

¹⁵ Kaonani ifwanafwani-o ya rongola mwinango wau Armenia dhinalee Ana. Liye vambo-i naabalee, tanooirela vyongo vambo-i simbwasimbwa vahora yothuulela baliwa wa mwana na yamaferiya. Ana angafunjedhile imbarimbari, abalee tatooroma khumbanyedha ira vyevi vinooda dodomi-a uxamwaliwa. Thitho tanoova ira kala wamboni dha Yohova unom’mwiri-a ira akale orucha. N’nga Ana airilen’ni ira abalee takale omasuwa? Liye aongile ira: “Ndadhowa mawaredhela abalanga,” miyo “ndinoawandelecha moda muli vyongo vaingumi yanga na vyothene vinoirecha miyo. Ndinoaitanelecha nyumbani wanga noaidhiwi-a abali naarongola apingoni. Ee-no aliwa atoaidhiwa atu anokala na miyo thitho anokala othathuwa naaliwa.” Liye atoonga thitho ira: “Abalanga anjinji atofiya vondiwandela ira nitoidhiwa mwasee unokala osangalala thitho katinokhumbanyedha vyamiyo.”

16. N’nga Yesu athonyi-edhe a-vi ira anoom’thuulela balee Yakobo? (Muone thitho madhu achindo.)

¹⁶ Muthonyi-edhenga ira munoabala. Vasogolo vovenyathi-iwa, Yesu atooira masaka-edho ira agumane na Yakobo thitho atootapanya na liye. (1 Ak. 15:7) Kathuulelani moda mwadhivenle Yakobo angazindiyele ira Yesu kaa-iidhe. Mo-okaikela Yakobo atoosikimizela ira Yesu ndi Mesiya. Vasogolovee, Yakobo atookami-a atu enango abanjanimwee m’roromela Yesu.c—May. 1:14.

17. N’nga nina-indi-edhe a-vi basa lemba la Aroma 12:15? (Muone thitho iruthiruthi.)

¹⁷ Muleri Aroma 12:15. Nakalanga vambo-i naabali-u vahora ya rendele na vahora inogumanana aliwa nyarwa, ninodha akami-a kaana mathuulelo apama okhuza i-yo Mboni dha Yohova. Mwaifwanafwani-o, bali-u akaana mwana ninooda m’simba thitho m’va-a vyotuva vothonyi-edha ira ninosangalala naaliwa. Akala bali-u utokweliwa, ninooda onga venango lemba madhu om’didili-a thitho m’kami-a vamabasa enango.d Pyaimbarimbari ira kaninofwanela diwala aligarela, alembela mesage venango awaredhela simbwasimbwa vahora inogumanana aliwa nyarwa.

18. N’nga ninasazi-edhe a-vi namafunjedha Andreya?

¹⁸ Mwaathonyi-edhenga abalinyu afwinyu apingoni. Namafunjedha Andreya angazindiyele ira Yesu ndi Mesiya, atoodhowa mawandela balee Pedro vyokhuza Yesu. (Ju. 1:40-42) N’nga nyo munooda irana vyongo vyofwanafwana na vyevi? Mwaifwanafwani-o, N’nga munoona a-vi m’mwitanela balinyu migumano ya pingo venango dhowa mawaredha vambo-i na afwinyu apingoni? Abali-u taidhiwa afwi-u a pingoni, Aliwa anodha idhiwa ira Amboni dha Yohova mbaatu amakalelo apama.

19. Angalive ira abali-u katinovwechecha vinororomela i-yo, n’nga ninofwanela aona moi a-vi? (1 Pedru 3:15)

¹⁹ Muleri 1 Pedru 3:15. Abali-u, katinavwecheche mwasee unokondela i-yo irana vyongo vinango. Mbwenye hora dhothene anongothuulela ira i-yo ninoairela vyongo moriya rima thitho mwalemezo. Voi kaninoirana mafesta venango sangalala na maferiya, aliwa tanosangalala nairanga vyongo vambo-i thitho nakaangana hora yowaredha naaliwa. Mwaifwanafwani-o, munooda awaredhela thitho aitana ira nidhadyele vambo-i naafwi-u apingoni, noava-a vyotuva hora dhinango.

KAMUFOOKE

20. Mwasiwa ngwan’ni ifwanafwani-o ya Yakobo inonilimbi-a?

²⁰ Yakobo atookonda kala namafunjedha wa Yesu vaurumiwee angali vailambo yavathi. Mbwenye vira wahora, liye atookala namafunjedha thitho atoofiya vosimba vyongo vyafunji-a Yesu. (Agl. 1:18, 19; 2:9) Mwaifwanafwani-o, Yakobo atookaana ngari yolembela karta Makristau yoi yatokaana vyongo vinjinji vyolandana na vyafunji-idhe Yesu vaulalikee wavamwangoni.e

21. Mwasiwa ngwan’ni kaninofwanela fooka akala abali-u oi kai Amboni katinovwechecha vinororomela i-yo?

²¹ Angalive ira ninodhilimbi-edha ira naasangalali-e abali-u, aliwa anooda dhowanave kaana mathuulelo odaweya venango aliwa a-funanga funjedha vyokhuza Yohova. N’nga mwasiwa ngwan’ni kaninofwanela fooka? Mwasiwa ngoi nadhilimbi-edhanga kala oriya rima waabali-u oi kai Amboni, ninokala nisazi-edhanga Babi-u watangaranga Yohova na mwanee Yesu. (Luk. 6:33, 36) Vira wahora, makalelwi-u apama anooda kami-a abali-u chinja mathuulelwiwa moda munoonela aliwa Amboni dha Yohova. Thitho anodha roma a-rela vyongo vinororomela i-yo kwaranya moda mwathuulela i-yo. Na-afooke, ninodha sangalala ona enango mwaabali-u tam’labelanga Yohova!