Setembro

Kaiira nivilimbi-edhenga ira niulukule mwauzimu baa-i, mbwenye nivilimbi-edhenga thitho ira nikaleve oulukula mwauzimu. Ira vyevi viodeye, ninofwanela rambela vinyindela. (1 Ak. 10:12) Ninofuneela “dhowanave dhiwesedha” ira nione akala ninave dhowa vasogolo. Karta lalembile rumiwi Paulo lembela Makristau awu Kolose, atoogogomedha funeya okalave olimba mwauzimu. Angalive ira aliwa tali oulukula mwauzimu, Paulo atoawenjeli-a ira katinami-iwe na zelu dhaatu. (Ako. 2:6-10) Epafura, wenuo unooneya ira anowaidhiwa pama atu apingonimo, anowalobelela hora dhothene ira “tadhowenave kala olimba mwauzimu.” (Ako. 4:12) N’nga ninofunjedhavon’ni? Paulo na Epafura, tatooidhiwa ira vanofuneela thindhi thitho kami-iwa na Nlungu ira mutu akaleve olimba mwauzimu. Aliwa tafuna ira Makristau awu Kolose, takaleve olimba mwauzimu angalive ira tanoogumanana nyarwa. w24.04 6-7 ¶16-17

Ova Yohova mofwanelela unonikami-a ira nim’dhiveliwengana maningi, moi kaninaire yongo iliyothene inam’sukwali-e. Ninofwanela funjedha ira niode i-yani-a vari va vyongo vyofwanelela na vyo-ofwanela thitho vari va makhundo aimbarimbari na makhundo onama, naifunelo yoi nim’sangalali-enga Yohova. (San. 2:3-6; Aeb. 5:14) Naovanga maningi atu kwaranya Nlungu, vinooda niiri-a ira ni-iye imbarimbari. Ifwanafwani-o va mwasula ndi anamasogolela amaziza 12 enao tadhowile mazondela ilambo yalanyedhile Nlungu ira unodha ivelela wa Israeli. Anamasogolela 10 tanoova maningi Akanani kwaranya mwemo mwadhiveliwana aliwa Yohova. Aliwa tatooawandela Aisraeli afwiwa ira: “Kaninooda limbana naaliwa namwasa oi aliwa mba kopolo kwaranya i-yo.” (Num. 13:27-31) Mbwenye voonga ira Aisraeli khataode gonji-a amwidaniwa, kuongela ira katathuulela vya Yohova. w24.07 9 ¶5-6

N’nga ninooda kala osikimizela ira hora dhothene Yohova unotonga atu molongomana? Ee! Abrahamu atooidhiwa ira Yohova ngu “namatonga wailambo yothene yavathi” liye ngolongomana, wazelu thitho watangaranga. Yohova utom’funji-a Mwanee thitho utom’va-a izo yothene yotonga. (Ju. 5:22) Yohova vambo-i na Mwaneula, anoidiwa vyongo vili mirimani mwaatu. (Mat. 9:4) Ee-no tatonganga mutu uliwethene anodha ira vyongo “molongomana.” Dhoweni na-akaikelengani ira Yohova unoidhiwa vyongo vyothene. Ninoidhiwa ira liye ngofwanelela thonga a-kala i-yo. (Esa. 55:8, 9) Ee-no mwasa othene otonga ninou-iya mandhani mwee na mwa Mwanee. Thitho Mwaneula ngu Mwene wenuo unom’sazi-edha Babee vothonyi-edha longomano na tangaranga.—Esa. 11:3, 4. w24.05 7 ¶18-19

Ninooda ona upama okala oona rima, nathuulela vyongo vyaireile Yesu angagumanena Natanieli fendo yoroma. Filipi angam’dhidhena Natanieli wa Yesu, vatooireya yongo inango yodabwi-a. Angalive ira Yesu ali a-anagumanevo na Natanieli, liye atoonga ira: “Kaing’anani mwiisraeli waimbarimbari, oi mwa liye kamuli inyengo.” (Ju. 1:47) Atoonga ira Natanieli ali oona rima maningi. Moladana na i-yo othene, Natanieli kaali olongomana mbwenye anoovilimbi-edha rambela inyengo. Yesu atoodabwa na vyevi thitho atoom’simba Natanieli. Vatokala vyongo vinjinji vinofuneeleya ira nim’dhiveliwi-e Yohova. Madhu ali va Salimo 15, anokuza vyongo vinoira i-yo naafwi-u. Salimo 15:3 linoonga ira lendo wa tendani mwa Yohova, “kanoirela afwee vyongo vyothakala, thitho kanonyoza afwee.” Kaninofwanela i-ndi-edha basa madhwi-u modaweya.—Yak. 1:26. w24.06 10 ¶7, 9; 11 ¶10

Nakozeelanga pama urumiwi, vinokala vyo-orucha ira niwandelenga atu enango milanyu yapama. Yesu atowakami-a anamafunjedhee a-anaarume ira tadhowe malaleela. (Luk. 10:1-11) Voi tatoo-indi-edha basa vyongo vyaafunji-idhe Yesu, anamafunjedhao tatoosangalala maningi namwasa wa vyongo vyaodile aliwa irana. N’nga ninakozeele a-vi urumiwi? Ninofwanela thuulela mwemo munaongele i-yo makhundo aimbarimbari mo-inda rima mumadhwi-ene. Vinooda kala pama thuulela vyongo vinli venango viraru, vyevyo atu aisa yi-u vinodhiveliwana aliwa vionga wiliwili, nokozeela moda unaawakulele i-yo. Naira e-no, naroma onga naatu rimi-u unokala opwaseyene, ninokala osangalala thitho auxamwali. w24.04 16 ¶6-7

Mwasa nlukulu unoniiri-a laleelanga milanyu yapama, ngoi ninom’dhiveliwana Nlungu na dhinalee lochena. Ninoona ira laleela ndi ndhila yom’titimi-edhelana Nlungwi-u wenuo unonidhiveliwana. Ninovwelana na vyevyo vyaongile angelo ira: “Yohova Nlungu ngofwanelela wachela titimi-o, lemezo na kopolo yokumela waarumiwee enao anom’lambela mororomeleya.” Ninom’va-a Yohova titimi-o na lemezo nawandelanga atu enango umboni o-oruni-eya oi liye “ngupanduchile vyongo vyothene” thitho nitokaana ingumi namwasa wa liye. Ninom’va-a kopolo dhi-u na-indi-edhanga basa hora thitho vyongo vi-u volaleela ninga mwemo munaodele i-yo movwelana namwemo mukalenle vyongo vaingumii-u. (Mat. 6:33; Luk. 13:24; Ako. 3:23) Mogwandela, ninodhiveliwana wandela atu enango vyoonga Nlungwi-u wenuo unom’dhiveliwana i-yo. Ninolimbi-iwa ira niwandelenga atu enango vya dhinalee na vinothapulela aliwa. w24.05 17 ¶11

Yohova unovelela yotuva waatu anom’lambela. Va-eeni liye unoniva-a rendele, unonikami-a kala osangalala thitho unodha niva-a ingumi yo-omala sogolou. Ninororomela maningi ira ngofunechecha niva-a yotuva thitho liye utokaana kopolo dhoirana vyevyo. Nam’roromelanga maningi, ninodhowanave m’labela na rimi-u othene ninga mwemo mwairelecha arumiwee awalelene. Vyevi ndi vyairile Timoteo. (Aeb. 6:10-12) Timoteo anoororomela maningi ira Nlungu waingumi unodha m’va-a yotuva. (1 Ti. 4:10) Ngumwasiwa liye atokaana thindhi vom’labela Nlungu. N’nga aodile a-vi irana vyevi? Rumiwi Paulo atoom’limbi-a ira adhilimbi-edhe kala namafunji-a wapama vabasa yolaleela thitho pingoni. Timoteo afuneela thitho kala ifwanafwani-o yapama wa Makristau afwee, aazombwe naandimuwa oulula. Atoova-iwa basa yorucha thangani-avo velela malangi-o akopolo, mbwenye audhivela waatu enao tafuneela malangi-oao. (1 Ti. 4:11-16; 2 Ti. 4:1-5) Timoteo kaakaikela ira Yohova unodha m’va-a yotuva.—Aro. 2:6, 7. w24.06 22-23 ¶10-11

Hora dhothene Yohova anoo-indi-edha basa anamaongela vofuna wenjeli-a thitho kami-a atwee ira tachinje. Mofwanafwani-a, dhela wa Jeremiya Nlungu aongile ira: “Welela Israeli opanduwawe . . . kandinodha uing’ana mothakaleliwa namwasa oi miyo ndili olevelela . . . kandinodha nyanyuwa modhowa nodhowa. Mbwenye murumele ira muli odawa namwasa opanduwela Yohova.” (Jer. 3:12, 13) Dhela wa Joeli, Yohova aongile ira: “Muwelele wamiyo na riminyu othene.” (Joe. 2:12, 13) Atoom’mwandela Esaya onga ira: “Mudhicheni-e. Mukumi-e vyoira vinyu vyothakala vamethoni vanga thitho mu-iye irana vyongo vyothakala.” (Esa. 1:16-19) Dhela wa Zakiyeli Yohova atoofuka ira: “N’nga miyo ndinosangalala na wukwa wa mutu odawa? . . . N’nga vinofuna miyo kai vyoi mutu odauo achinyuwe nodhowanave kaana ingumi? Miyo kandinosangalala na wukwa wa mutu uliwethene, . . . ee-no i-yani irana vyongo vyothakala ira mudhowenave kaana ingumi.” (Zak. 18:23, 32) Yohova unosangalala aona ira atu atochinyuwa namwasa oi liye unofuna ira tadhowenave kaana ingumi modhowa nodhowa. w24.08 9 ¶5-6

Atu othene tali uikundo ya Nlungu tanowachela yodya yauzimu, malangi-o thitho bareliwa ninga munofuneeleya aliwa. Ifwanafwani-o yothonyi-edha ira Yohova kana sakulo malamboano, choi unokami-a atu availambo yothene yavathi ira takaena Bibilya. Malemba opambuleya talembiwile muviongelo viraru: Ieberi, Iaramu na Igiriki. N’nga atu anoonga pama viongelo vyoromavi, mbenao baa-i anokhala vauxamwali wapama na Yohova kwaranya atu enango? Khabe kai e-no. (Mat. 11:25) Yohova kanoniitana ira nikale alendwee namwasa oi nitofunjedha maningi venango ninoidhiwa onga viongelo vyoroma vya Bibilyani. Ee-no Yohova unorumeli-a ira atu availambo yothene taidhiwe zeludhee, akala ngofunjedha venango khabe. Bibilya lelo nli mandhwee litothapuleliwa muviongelo vinjinji thitho atu availambo yothene anooda nganyali na vinofunji-a aliwa noidhiwa vinaire aliwa ira takale afwee.—2 Ti. 3:16, 17. w24.06 6-7 ¶13-15

Nongiwa wa sidade ya Yerusalemu waongile Yesu, wali unga-adhi vang’ono funa ireya. Mbwenye Paulo venango Makristau awu Yudeyao, kataidhiwa hora yaimbarimbari yafuna nongiwa sidadilo. Angalive ira vyali ee-no, Makristawao tangaodile indi-edha basa hora yeniyo vodhikozeeli-edha thitho dhilimbi-edha ira takaena makalelo ninga iroromelo novilela. (Aeb. 10:25; 12:1, 2) Vachineneeva ninogumanana nyarwa ilukulu maningi kwaranya nyarwa yadedi-edhela Aebere. (Mat. 24:21; Apk. 16:14, 16) Nitapanyeni malangi-o avelenle Yohova wa Makristawao enao ananikami-e malamboano, Rumiwi Paulo atoolimbi-a Makristau afwee ira tafunjedhenga nothuulela modi-a madhu a Nlungu. (Aeb. 5:14–6:1) Vo-indi-edha basa malemba Aiebere, Paulo atoawandela abaleyao ira ndhila yolambelela ya Makristau yali yavadhulu kwaranya ya Ayuda. Paulo atooidhiwa ira idhiwa pama thitho vwechecha makhundo aimbarimbari, wangaakami-idhe Makristawao ira tazindiyele norambela nami-iwa na makhundo onama. w24.09 8-9 ¶2-3; 10 ¶6

Mwasiwa ngwan’ni anamafunjedha a Yesu tanoofuneela limbi-iwa? Enango mwaaliwa tatoo-iya nyumba, mabanja thitho magoswiwa naifunelo yoi ta-arelenga Yesu. (Mat. 19:27) Tanooni-iwa nyarwa namwasa okala anamafunjedhee. (Ju. 9:22) Aliwa tatoorumela chinja vingumi viwa thitho rucheya namwasa ororomela ira Yesu ndi Mesiya olanyedhiwa. (Mat. 16:16) Mbwenye Yesu angaphiwile, aliwa tatoosukwala namwasa ona ira vyongo vyadedi-edhela aliwa vitoimwananeya. Yesu atoona ira vyali vyovweya ira anamafunjedhee takaena tangaranga thitho kwaali umboni oi tali ofooka mwauzimu. Ee-no dambo lavenyathi-iwile liye, atooroma limbi-a afweao. Mofwanafwani-a, liye atooneela wa Mariya Madalena oi ala vamasiyenivee. (Ju. 20:11, 16) Atooneela thitho waarumiwee ambili enao ta-anle wu Emau. Adhamale atooneela wa rumiwee Pedru. w24.10 13 ¶5-6

Anamabala mukami-enga mwaninyu ira aondenga wandhela atu enango mwasee unororomelela liye ira utokala namapanducha. Vinooda kala vyokami-a funji-a mwaninyuo mwasa ofwanyeya vya jw.org oi, “Zimene Achinyamata Amadzifunsa—Kodi Zinthu Zinachita Kulengedwa?” Ee-no munooda roma tapanya na mwanuo mwasee unoonela liye ira unooda kami-a atu enango idhiwa ira vyongo vyate panduchiwa. M’limbi-eni ira a-indi-edhenga basa makhundo mo-orucha wandela atu enango anofuna ira tatapanye na liye. Mofwanafwani-a, fwee wa xikolani unooda m’mwandela ira: “Ndinororomela vyevyo baa-i vioni miyo thitho kandinam’monevo Nlungu.” Kristau wazobuo unooda m’mwakula ira: “Nifwanafwani-edhele ira unowenda kokolani ulimburo loi kauli atu thitho mutofwanya isime yapama. N’nga unathuulelen’ni? Akala isimiyo inouva-a umboni oi vatokala mutu mwinango wazelu wai-umbile, n’nga a-vi vyongo vyopanduchiwa?” w24.12 18 ¶16

I-yo othene ninofuneela malangi-o ira nisakulenga vyongo mwazelu. Ninooda fwanya malangi-o enala wa andimuwa avapingoni thitho wa Makristau olimba mwauzimu. Akala malangi-oao univa-idhe ngu ndimuwa oulula, kaninofwanela thuulela ira malangi-oala mbawale. Yohova unofuna ira nifunjedhenga vyongo khumela wa andimuwao. Aliwa tatokaana ingumi yolapela kwaranya i-yo, vyevyo piiri-idhe ira taidhiwenga vyongo vinjinji, tavwechechenga vyongo thitho takaena zelu.Walelene, Yohova anoo-indi-edha basa alombwana oulula ororomeleya vofuna limbi-a thitho sogolela atwee. Mofwanafwani-a, atoo-indi-edha basa atu ninga Mose, Davide na rumiwi Juwau. Aliwa tatokaana ingumi vahora yo-iyana i-yana thitho vyongo vyaireile vaigumiiwa, vyali vyo-iyana maningi. Vevo ingumiiwa vyadhowa aliwa komoni, aliwa tatoovelela malangi-o azelu waazombwe. Uliwethene wa alombwana ororomeleyala, tatoogogomedha funeya okala ovwela Nlungu. Akala nili azombwe venango andimuwa, funjedha malangi-oala unonikami-a.—Aro. 15:4; 2 Ti. 3:16. w24.11 8 ¶1-2

Wale mu hora ya Nowa, Nlungu atookhondi-a atu ira katidyenga sangiri. (Mar. 9:3, 4) Yohova atooweli-edha okoka lamulo leli lelo lavelenle liye waa-ima Aisraeli. Ira uliwethene odya sangiri unofwanela “phiwa.” (Lev. 7:27, madhu achindo.) Yesu thitho anoovwela malamulo avelenle Nlungu muilamulo. (Mat. 5:17-19) Ee-no vyali vyo-ovweya ira Ayudao tadye nokhu venango umwa sangiree. Yesu, anoo-indi-edha basa madhu opipirisa ninga mwemo mwairile liye voonga na m’ma mwinango wau Samariya. Voi aongile ira: “Ma-inje anofuna miyo dham’va-a . . . anofuna dham’va-a ingumi yo-omala.”(Ju. 4:7, 14) Yesu kaathapulela ira m’muo unodha kaana ingumi yo-omala amwa ma-injene baa-i. Mofwanafwana na vyevi, liye kaathapulela ira atu aongana liye wu Kafarnau tangakanle na ingumi aakale ira tatoodya nokwee waimbarimbari noumwa sangiree. w24.12 9 ¶4-6

Makristau anofwanela rambela mathuulelo odaweya okhuza a-iyana. Mwasiwa ngwan’ni? Ninoonga e-no namwasa oi vyongo vinoira mutu unoroma vithuulela. Rumiwi Paulo atoowenjeli-a Makristau ozoziwa awu Roma ira “katitukhulele zelu dhahora ino.” (Aro. 12:1, 2) Vevo Paulo vyalembela liye karta pingo wau Roma wali ungalivo wahora indendai. Mbwenye madhu a Paulwala, anothonyi-edha ira atu enango pingonimo tanoowendela mathuulelo na makalelo ailamboi. Ngumwasee atowalimbi-a ira tachinje mathuulelo na makalelwiwa. Malangi-o enala mbokami-a thitho waalombwana Aikristau malamboano. Pyovwi-a tangaranga ira tanootukhulela mathuulelo ailamboi thitho tanowairela uwalanga a-iyaniwa. w25.01 9 ¶4

Andimuwa avapingoni anokala opingeya maningi malamboano. Aliwa anolaba basa yolaleela. (2 Ti. 4:5) Andimuwa avapingoni anosogolela basila mwathindhi, onechecha ira basila inolabiwa mu isa ya pingwiwa thitho nifunji-a ira nilabenga pama basila. Aliwa anolaba ninga anamatonga atangaranga thitho katina sakulo. Kristau aira yodawa ilukulu, andimuwa avapingoni anom’kami ira asaka-edhe okokha uxamwalee na Yohova noonechecha ira pingo ukale ochena. (1 Ak. 5:12, 13; Agl. 6:1) Andimuwa avapingoni anoidhiweya ira ndi anamakumbiza. (1 Pe. 5:1-3) Anokozeela thitho onga myasa vamigumanoni, idhiwa pama mutu uliwethene pingoni thitho ira maulendo aubusa. Wenjedhela va mabasa enango, andimuwa avapingo enango anokami-a va mabasa avyomangamanga nosaka-edha Nyumba dha Umwene, kozeela migumano milukulu, kala mumakomisau oongi-ana na ximitari thitho mumagurupu owendela atu obulela. Andimuwa avapingoni anolaba basa mwathindhi ira tanikami-e. w24.10 20 ¶9

Bibilyani, madhu oi “ombola,” anothapulela thathula venango levelela namwasa oi kuto utoveleliwa. Rumiwi Pedru atoonga vyevi voonga ira: “Nyo munoidhiwa ira vyongo vyauthathunleni [muiongelo yoroma, “vyatouombolani”] wu ingumi yo-okaana basa yalandenle nyo anamabalinyu, kavyali vyongo vyooda nongeya ninga fero venango oro. Mbwenye mwathathuliwile na sangiri yapereso yavadhulu ya Kristu, yoi njofwanafwana na sangiri la libila lo-okaana damba thitho lo-okaana matoto.” (1 Pe. 1:18, 19; madhu achindo.) Namwasa wa sembe ya kuto, ninooda thathuliwa udhaari wa vyodawa na wukwa. (Aro. 5:21) Ee-no ninofwanela simbanga maningi Yohova na Yesu namwasa o-indi-edha basa sangiri ya pereso yavadhulu venango onga ira ingumi ya Yesu. w25.02 5 ¶15-16

N’nga ninaire a-vi ira nirambelenga vyowesedha? Dhoweni nioneni vyongo vinafunjedhevo i-yo wa zombwe unoongiwa va Sanganiko kapitulu 7. Liye atoogonathi na i-yana wa nyambi. Va versu 22 vanoniwandela ira “mo-odedi-edhela,” zombuo atooroma m’a-ra i-yanuo. Mbwenye maversu andulimu anothonyi-edha ira zombuo atooirana vyongo vinangovyee vyoi mwavang’ono navang’ono vyatom’mwiri-a ira aire vyodawa. N’nga ndi vyongo vivi vyam’mwiri-idhe ira aire vyodawa? Yoroma, liye “avirilena ndhila yavaduzi na vamakakanoni” andhila yodhowa wa i-yana wa nyambi. Adhaire e-no atooroma dhowa nyumbani wa i-yanuo. (San. 7:8, 9) Angam’moni i-yanuo, kaadhimbinuwile nowelela nduli. Malo mowelela nduli liye atoorumela ira i-yanuo am’bejari. Thitho zombuo anoovuruwana vevo i-yana wa nyambio vyaonga liye ira adhowile mavelela sembe ya vwelano. Venango anom’mwandela zumbula vyongo vyevi, vofuna m’mwiri-a ira a-athuulelenga ira i-yanuo ngu mutu othakala venango wa makalelo othakala. (San. 7:13, 14, 21) Zombula angaodile rambela vyongo vyevi avibarele thitho kaaire vyodawa. w24.07 16 ¶8-9; 19 ¶19

Yohova kanolema mutu oirana vyodawa vilukulu vari vaatwee. Liye kanoona ira atu odawa enao ta-anochinyuwa anofwanela vweliwa tangaranga ira tadhowenave kala pingoni vambo-i naarumiwee ororomeleya. Yohova ngwatangaranga mbwenye kanolema mutu unoirana vyodawa vilukulu thitho makhundwee katinochinja. (Yud. 4) Levelela mutu o-ochinyuwa kai thonyi-edha tangaranga, namwasa oi unooda phei-a atu othene pingonimo. (San. 13:20; 1 Ak. 15:33) Angalive ira vili e-no, ninoidhiwa ira Yohova kanofuna ira mutu uliothene adhanongiwe. Liye unofuna vulumucha atu akala pyoodeya. Yohova unothonyi-edha tangaranga waatu anochinyuwa thitho unofuna ira takale okoka vauxamwali na liye. (Zak. 33:11; 2 Pe. 3:9) Ee-no mutu wau Koritiyo vyachinyuwile liye, no-iya ndhiladhee dhothakala, Yohova atom’indi-edha basa rumiwi Paulo vowandela pinguo ira um’levelele nom’mwachela okoka pingoni. w24.08 17 ¶7; 18-19 ¶14-15

Muifwanafwani-o yamabila na mbudi, Yesu atoonga ira unodha tonga atu votukulela mwemo munoirela aliwa vyongo vokami-a abalee ozoziwa. (Mat. 25:31-46) Vahora ya “nyarwa ilukhulu,” Yesu unodha atonga atu Armagedo wa-anaireye. (Mat. 24:21) Mofwanafwana na mwemo namakumbiza muno-iyani-a liye mabila na mbuzi, Yesu unodha i-yani-a atu anokami-a mororomeleya anama-arelee ozoziwa naatu akhondile aa-kami-a. Ulosi wa Bibilyani unothonyi-edha ira, ninga namatonga osakuliwa na Yohova, Yesu unodha tonga molongomana. (Esa. 11:3, 4) Yesu unodha ing’anechechanga vyoira, vyothuulela na vyoonga vyaatu thangani-avo moda munoirela aliwa vyongo naabalee ozoziwa. (Mat. 12:36, 37) Yesu unodha idhiwa atu takami-a abalee ozoziwa thitho talaba vambo-i naaliwa va basa yolaleela. Ndhila ilukhulu yeniyo amabila enango munokami-edhela aliwa abalee a Kristu, kulaba vambo-i naaliwa va basa yolaleela. w24.09 20-21 ¶3-4

Ninofwanela sikimizela ira vinororomela i-yo ndi vyongo vyaimbarimbari, vofwanafwani-edha na vinoonga Bibilya. mwaifwanafwani-o, nifwanafwani-edhe ira zombwe mwinango unokaikela vyoi Yohova unom’dhiveliwana. N’nga liye unofwanela roromelanga ira baa-i Yohova kanom’dhiveliwana? Kabe! Malomwee unofwanela sakasaka mathuulelo a Yohova vamwasuo ira asikimizele. Naleringa madhu a Nlungu, vinokala ninga “ninom’vwa” Yohova aonganga na i-yo. Mbwenye ninofuneela kaana thindhi ira nifwanye mathuulelo a Yohova va yofuka ina i-yo. Naleringa, ninofwanela thuulela maningi vyongo vinonisukwali-a. Ninooda sakasaka vyongo vinjinji va mwasuo vo-indi-edha basa vyongo vyokami-a vofunjedha vyevyo gulu la Yohova viniva-idhe aliwa. (San. 2:3-6) Ninooda m’vepha Yohova ira anikami-e va hora inosakasaka i-yo ira niidhiwe mathuulelwee. Naira ee-no nisakesake makundo a Bibilyani enao ananikami-e va mwasi-uo. w24.10 25 ¶4-5

Yohova kanodha raeli-a mutu uliwethene unoira vyongo namwasa ogaya. (1 Ak. 10:24, 33; 13:4) Hora dhinango masiki anamafunjedha a Yesu tanoofuna vizo va myasa yodaweya. Ifwanafwani-o va mwasula ngu Yakobo na Juwau. Aliwa tatoovepha Yesu ira adhaava-e limburu lavadhulu Muumwenee. Mbwenye Yesu kaasimbile ira tatooira pama vepa vyongo vyevyo. Malomwee Yesu atoawandela anamafunjedhee othene 12 ira: “Mbwenye mutu uliwethene unofuna kala ndimuwa vari vinyu, unofwanela kala rumiwinyu, thitho mutu unofuna ira akale oroma vari vinyu, unofwanela kala dhaari wa othene.” (Mrk. 10:35-37, 43, 44) Abali anokaana rima ofuna labela atu enango, anokami-a maningi pingo.—1 At. 2:8. w24.11 15-16 ¶7-8

Nafunanga sakula vyoira, dhiveliwana atu enango unodha nilimbi-a ira nithuulelenga “vyoganyali-a atu enango” thitho nikalenga odhiyevi-a. (1 Ak. 10:23, 24, 32; 1 Ti. 2:9, 10) Naira ee-no ninodha sakula vyongo vinothonyi-edha ira ninodhiveliwana thitho lemeza atu enango. Mwasakulanga vyoira vamwasa ofuneya maningi, muthuulelenga moda munavikwakwaneli-edhe nyo. Yesu atoonifunji-a ira “nithuulelenga pereswee.” (Luk. 14:28) Ee-no muthuulelenga injiva wahora thitho vinofuneela ira vyongo visakunle nyo viodeye. Hora dhinango munodha funeelanga tapanya na banja linyu ira muidhiwe mwemo mutu uliwethene munakami-edhele liye va vyongo visakunle nyo. Mwasiwa ngwan’ni irana vyevi kofuneya? Vinodha ukami-ani idhiwa akala vyongo visakunle nyo visaka-edha ndi vyofineya venango akala vatokala ndhila dhinago dhapama maningi. Mbwenye mwatapanyanga naatu abanjani mwinyu mwaavuruwanenga, aliwa tanokala okozeya ukami-ani ira vyongo visakunle nyo viwende pama. w25.01 18-19 ¶14-15

Esaya atoodhowanave onga mwasee unofwanela i-yo “dhiveliwa thitho kala osangalala” na paradaizo wauzimu. Yohova ngusaka-edhile Paradaizula. (Esa 65:18, 19) Ngumwasee unoni-indi-edha basa ira nikami-e atu kuma mumagulu ailamboi enao ta-anokami-a atu ira takale vauxamwali na liye, novolowa paradaizo wauzimu obaleula. Ninosangalala na maraeli-o afwaidhe i-yo namwasa okala muimbarimbarini thitho liye unonilimbi-a ira niwandelenga atu enango vyokuza maraeli-o ala. (Jer. 31:12) Ninosimba idedi-edho ina i-yo namwasa okala vauxamwali wapama na Yohova thitho ninokala osangalala. Bibilya linonilanyedha ira: “Ninodha manga nyumba nokalamo, dhala mauva noudya vyova-avyee.” Atu “katinodha laba basa mwathindhi mwapezi” namwasa oi “anodha raeli-iwa na Yohova.” Liye unonilanyedha ira, ninodha kaana ingumi yapama thitho ninodha kala obareleya. Yohova unodha idhiwa vinofuneela mutu uliwethene thitho “unodha kwakwaneli-edha vyofuna vyaingumi iliyothene.”—Esa. 65:20-24; Sal. 145:16. w24.04 22-23 ¶11-12

Yohova unokala lipandhe li-u nam’nyindelanga na rimi-u othene. Ninororomela ira vyongo vinodha niwendela pama nam’vwelanga masiki vahora yorucha. (Esa. 48:17, 18) Naona anikami-anga paevo vanom’roromela i-yo maningi. Ninororomela ira Yohova ekene ngwenuo unanikami-e vilela nyarwa masiki dhikale dhilukulu maningi. Molandana na lipandhe nlukulu, Yohova unokala saasawa hora dhothene. Yohova kanochinja makalelwee na ifunelwee. (Mak. 3:6) Adamu na Eva tangakondile m’vwela mundani mwa Edeni, Yohova kaachinjile ifunelwee. Movwelana na vyalembile rumiwi Paulo, Yohova “kanadhikonde ekene.” (2 Ti. 2:13) Vyevi vinothapulela ira masiki vaireye vyongo vyoi a-vi, venango atu enango taire vyongo vyoi a-vi, Yohova kanodha chinja makalelwee, ifunelwee na makhundwee. Voi Yohova kanochinja, ninoidhiwa ira liye unodha nikami-a vahora yorucha, thitho unodha kwakwaneli-edha vyolanyedhavyee sogolou.—Sal. 62:6, 7. w24.06 27-28 ¶7-8

N’nga akala muli vaimweendi, chini inaukami-eni sakula ira muthelane na mutuo venango kabe? Mudhilimbi-edhe ira Muidhiwane pama. Munofwanela idhiwa vyongo vinango vyokuza mutuo mwa-anarome imweendi. Mbwenye vahora yen’na munokaana ngari yoi muidhiwe “mutu olokoteya rimani.” Vyevi vinothangani-avo idhiwa vyokuza uxamwalee na Yohova, makalelwee na mwemo munothuulela liye. Vavira hora, munofwanela fwanya vyowakula vya vyofuka ninga vi: ‘N’nga mutu wen’na ngofwanelela ira ndidham’thelananee?’ (San. 31:26, 27, 30; Aef. 5:33; 1 Ti. 5:8) ‘N’nga ninooda dhivelanadi thitho va-ana yongo inofuna mutu uliwethene? N’nga ndinooda vwalavwali-a vyongo vinodawi-a liye?’ (Aro. 3:23) Vevo vanovilimbi-edha nyo m’muidhiwa pama, muthuulelenga ira yofuneya maningi kai landana vayongo iliyothene, mbwenye yofuneya maningi kuona akala munooda kalave na mutuo masiki mu-iyane va vyongo vinango. w24.05 27 ¶5

Mwene Davide atooira yodawa ilukulu mbwenye namaongela Natani atoom’sumulula namwasa wa yodawa ilukulu yairile liye. Modhiyevi-a Davide atoochinyuwa. (Sal. 51:3, 4, 17, madhu avadhulu) Mwene Ezekiya na liyene thitho atoom’dawela Yohova. (2 Li. 32:25) Mofwanafwana na Davide, Ezekiya atoodhiyevi-a nochinyuwa. (2 Li. 32:26) Vyo-arelavovyee vyali vyoi Yohova anoom’mona kala mwene ororomeleya wenuo “aira vyongo vyofwanelela.” (2 Ma. 18:3) N’nga ninofunjedhavon’ni? Ninofwanela chinyuwa madawi-u nodhilimbi-edhanga ira na-aviweleleve. N’nga ninaire a-vi andimuwa avapingoni taniva-a malangi-o vavyongo vinooneya ninga ving’ono? Kanionenga ninga andimuwa avapingonao thitho Yohova katinonidhiveliwana. Masiki mamwene apama awu Israeli, tafuneela va-iwa malangi-o nosumululiwa. (Aeb. 12:6) Ee-no nava-iwa malangi-o, ninofwanela (1) awachela modhiyevi-a, (2) chinja vyongo vinofuneela i-yo chinja, (3) dhowanave m’lambela Yohova na rimi-u wethene. Nachinyuwa madawi-u, Yohova unodha nilevelela.—2 Ak. 7:9, 11. w24.07 21 ¶8; 22 ¶9, 11

Mutu odawa unokhumi-iwa pingoni akala kanochinja angalive ira andimuwa avapingoni tatoom’kami-a moweli-edha weli-edha ira achinyuwe. (2 Ma. 17:12-15) Vyoira vyee vinothonyi-edha ira utosakula konda a-rela makhundo a Yohova. (Dot. 30:19, 20) Milanyu inoongiwa pingoni yoonga ira liye kai wa Mboni dha Yohova. Ifunelo ya milanywila kai m’va-a manyadho mutuo. Mbwenye milanywila inoongiwa naifunelo yoi atu pingonimo ta-arele malangi-o a Malembani oi “ta-iye vwelana” na mutuo “masiki udya vambo-i na liye.” (1 Ak. 5:9-11) Vatokala myasa yapama yeniyo Nlungu yavelelenle liye malangi-o ala. Rumiwi Paulo alembile ira: “Rombwe oyeva otupi-ana mapau unooda tupi-a utu othene omunyiwa.” (1 Ak. 5:6) Akala mutu o-ochinyuuo kanokhumi-iwa pingoni, vyoiravyee vinooda fooki-a atu enango enao anodhilimbi-edha a-rela makhundo olongomana a Yohova.—San. 13:20; 1 Ak. 15:33. w24.08 27 ¶3-4

Pyaimbarimbari ira kaninaode va-a mutu kopolo, mbwenye ninooda indi-edha basa kopolo dhi-u ira naakami-e. Mwaifwanafwani-o, akala vatokala Kristau oulula venango unobulela, ninooda m’kami-a mabasa avandhe venango m’gulela vyongo. Ninooda laba basa vambo-i naaliwa yocheni-a va Nyumbani ya Umwene. Na-indi-edhanga basa kopolo dhi-u mundhila dhedhi, ninokami-a atu enango enao anom’lambela Yohova. Muthuulelenga ira madhu mbakopolo. N’nga vatokala mutu mwinango unom’mwidhiwa nyo ira unooda dhivwa pama mwam’simba kumela vathi varima? N’nga munom’mwidhiwa mutu mwinango wenuo unofuneela limbi-iwa? Akala ndi e-no, munooda ira pama onga na mutuo. Munooda irana vyevyo voira dhowa maongana liye, m’ligarela, m’lembela karta venango m’tumizela mamesage. Kaiira munofuneela onga mwadodoliso maningi. Madhu oyeva thitho okumela vathi varima, anooda m’kami-a Kristau fwinyuo ira akaleve ororomeleya venango ira arome dhivwa pama vanyarwa dhinogumanana liye.—San. 12:25; Aef. 4:29. w24.09 28 ¶8-10

Akala mukadhi mulabanga ninga rumiwi okami-a wa hora indendai, munofwanela dhilimbi-edha ira mukaena makalelo apama anofuneela ira mutu akale ndimuwa wavapingoni. N’nga munodhilimbi-edha ira mulabenga naaliwa “basa yapama,” yolabela abali naarongolinyu ninga ndimuwa wavapingoni? N’nga andimuwa avapingoni anolaba basa ivi? Anosogolela va basa yolaleela, anokaana thindhi vofunji-a, anoira maulendo aubusa, anolimbi-a pingo namadhu apama na vyoira viwa. Ngumwasee Bibilya linoonga ira alombwana athidhala ndi “yotuva.” (Aef. 4:8) N’nga bali unaire a-vi ira akale ndimuwa wavapingoni? Vyongo vinofuneela ira mutu akale ndimuwa wavapingoni, ‘pyo-iyana maningi na vinofuneela ira mutu alembiwe basa. Muilambwila, mutu unooda lembiwa basa akala utokaana dodoliso yolaba basiyo. Mo-iyana na vyevi, ira mutu akale ndimuwa wavapingoni vanofuneela vyongo vinjinji, a-kala kaana dodoliso lofunji-a venango laleela baa-i. Unofuneela kaana makalelo anoongiwa va 1 Timoteo 3:1-7 na Titu 1:5-9. w24.11 20 ¶1-3