Outubro

Hora dhinjinji ninowachelecha malangi-o okhuza lambela wi-u okhumela waandimuwa avapingoni, anamaing’anela isa, ofesi yatambi venango okhumela wu Gulu Lotonga. Mbwenye hora dhinango kaninavwecheche mwasee uva-iwile i-yo malangi-o naandimuwa avapingoni. Naira ee-no, ninooda ona nyarwa dhedho dhinodha namwasa wa malangi-oao. Ninooda thitho thuulelanga vinodawi-a abali anoniva-a malangi-oao. Nakaana iroromelo, kaninokaikela ira Yohova unosogolela gululee thitho unoidhiwa vyongo moda muli aliwa. Ee-no ninokala okozeya vwela mo-okaikela. (Aeb. 13:17) Ninozindiyela ira vwela wi-u unokami-a ira pingo ukalenga ovwelana. (Aef. 4:2, 3) Angalive ira abali anonisigolela kai olongomana, ninororomela ira Yohova unoniraeli-a nakalanga ovwela. (1 Sa. 15:22) Akala vatokala yorucha ninoidhiwa ira unodha isaka-edha vahoree. w25.03 23-24 ¶13-14

Ninokala muhora yosangalali-a maningi. Dambo nlilothene ninoona maulosi a Bibilyani takwakwaneli-edhiwanga. Mofwanafwani-a, ninoona “mwene wa norte” na “mwene wa suli” takanganelanga utongi. (Dan. 11:40) Ninoona milanyu yapama ilaleeliwanga vailambo yothene yavathi thitho atu mamiliyau manjinji tasakulanga m’labela Nlungu. (Esa. 60:22; Mat. 24:14) Ninowachela thitho yodya yauzimu yoinjiva “vahora yofwanelela.” (Mat. 24:45-47) Yohova unaadhowanave nikami-a ira nivwecheche pama vyongo vyofuneeleya vyevyo vinofuna dhaireya vo-odembuwava. (San. 4:18) Kaninokaikela ira nyarwa ilukulu yadharoma, ninodha kala ningamadhi idhiwa vyongo vyothene vyofuneeleya ira nidhakaleve ororomeleya vahora yoruchila. Mbwenye ninofwanela zindiyela ira vatokala vyongo vinango vyoonga vyasogolo vyevyo vya-anoviidhiwa i-yo. w24.05 8 ¶1-2

Olemba masalimo atoonga thitho vyokuza mafyeda. N’nga fyeda chini? Mogwandela ndi onga vyongo vyonama thitho vyothakala vinanonge limbili la mutu mwinango. Salimo 15:3 linonithuucha thitho ira lendo wa tendani mwa Yohova, kanoirela afwee vyongo vyothakala thitho kanonyoza atu enango. (Sal. 15:1) N’nga mutu unairele a-vi atu enango vyongo vyothakala? Ninooda irela atu enango vyongo vyothakala vomwadha vyongo vyonama vyokuza aliwa. Mwaifwanafwani-o: (1) rongola uto-iya urumiwi wahora dhothene, (2) banja n’nango kalinolabave va Beteli venango (3) bali uto-ii-iwa laba ninga ndimuwa wavapingoni venango rumiwi okami-a. N’nga ndi pama thuulelanga viiri-idhe chinjao, nowandelanga atu enango vyongo vinothuulela i-yo? Vanooda kala myasa dhiiri-idhe ira ta-iye dhedho dha-aidhi i-yo. Muthuulelenga ira lendo wa tendani mwa Yohova, “kanoirela afwee vyongo vyothakala thitho kanonyoza afwee.” w24.06 11 ¶11-13

Ira niovenga maningi Yohova, ninofwanela kala ofunechecha ira nim’sangalali-enga va yongo iliyothene inosakula i-yo irana. Mwaleringa myasa ya Bibilyani mudhifukenga ira, ‘N’nga miyo ndaakalevo ndasakule irana n’ni?’ Mofwanafwani-a, kafwanafwani-edhelani ira munovwa anamasogolela amaziza 10 Aisraeli taonganga vyongo vyo-olimbi-a tangadhowile maona ilambo yenio Yohova yaalanyedhile liye ira unoava-a. N’nga mwaroromele vyongo vyaonga aliwavyo noroma ova atu? Venango dhiveliwana winyu Yohova wangauwiri-idheni irana vyom’sangalali-a? Aisraeli othene kataroromenle imbarimbari yaawandenle Yoswa na Kalebe. Vyo-arelavovyee vyali vyoi atu othene tatooluza ngari yovolowa muilambo yolanyedhiwa.—Num. 14:10, 22, 23. w24.07 10 ¶7

Muone mwemo Yohova mwafunji-idhe liye atwee vo-indi-edha basa ifwanafwani-o ya namaongela Oseya na iyanee Gomeri. Gomeri atooira unyambi thitho atoom’iya Oseya nodhowa wa lombwana mwinango. N’nga Nlungu atom’mona ira kanaode chinja? Yohova wenuo unoidhiwa vili rimani mwa mutu, atoom’mwandela Oseya ira: “Dhowa umarome okoka dhiveliwana i-yanaa wenuo unodhiveliwiwa na lombwana mwinango thitho unoira unyambi. Umam’dhiveliwena ninga moda Yohova munodhiveliwana liye Aisraeli, angalive ira anolambela milungu inango.” (Ose. 3:1; San. 16:2) Idhiwani ira i-yana wa Oseya ali a-ana-iye irana yodawa ilukulwila. Mbwenye Yohova atom’mwandela Oseya ira adhowe wa i-yaneuo, manlevelela nom’thukula ninga i-yanee. Mofwanafwana na vyevi, Yohova kaa-iidhe adhiveliwana atwee tali o-ovwela. Angalive ira aliwa tanooira vyodawa vilukulu, Yohova anowadhiveliwanave. Thitho atoodhowanave akami-a ira tachinyuwe nochinja vyoira viwa. Vyevi vinothapulela ira Yohova wenuo unoidhiwa vyarimani unooda kami-a mutu wenuo unodhowanave irana vyodawa vilukulu ira achinyuwe? w24.08 10 ¶7

Makristau oroma Aiyuda, tatoogumanana nyarwa dhilukulu. Vahora inango aliwa tali ziza losakuliwa na Nlungu. Sidade ya Yerusalemu yali sede ya Umwene wa Nlungu thitho kachisi ali sede olambela ochena. Ayuda othene ororomeleya tanoo-arela ilamulo yava-iwile Mose na Nlungu yeniyo anamasogolela areligiau liwa yafunji-a aliwa. Vyafunji-a aliwavyo vyanookuza vamwasa wa vyodya, ineliwa thitho moda wafwanela aliwa iranga vyongo naatu enango. Mbwenye Yesu angakwide, Yohova kaarumelave thitho sembe dhavelela Ayuda. Vyevi vyali vyorucha maningi wa Makristau Aiyuda enao voromavene ta-arela ilamulo. (Aeb. 10:1, 4, 10) Masiki Makristau olimba mwauzimu ninga rumiwi Pedru, atoorucheya chinja vyongo vinango. (May. 10:9-14; Agl. 2:11-14) Namwasa oi tanoororomela makhundo mapya, Makristawao tanooni-iwa nyarwa naanamasogolela areligiau la Iyuda. w24.09 9 ¶4

Hora iliyothene Yohova unovelela basa waatu anodedi-edhela ira talilabe mwapama. (1 Ak. 14:33) Mofwanafwani-a, Nlungu unofuna ira milanyu yapama ilaleeliwe vailambo yothene yavathi weo uli atu. (Mat. 24:14) Yohova atom’sakula Yesu ira asogolelenga basa leli. Thitho Yesu unaaonechecha ira basila ilabiwenga mwapama. Muhora yaarumiwi vevo mipingo yakaathi-iwile aliwa, andimuwa tatoo-eliwa ira tavelelenga malangi-o thitho tasogolelenga. (May. 14:23) Wu Yerusalemu watookala gulu lasaka-edhiwile naarumiwi naandimuwa thitho tanoovelela malangi-o ira mipingo yothene i-arelenga. (May. 15:2; 16:4) Namwasa ovwela malangi-o ava-iwa aliwa, “atu mipingoni tatoodhowanave kaana iroromelo yolimba thitho numero yaatu yanoowenjedheleya dambo na dambo.”—May. 16:5. w24.04 8 ¶1

Namaebe-i Nisani 16, am’ma enango ororomeleya tatoodhowa masiyeni wa Yesu. (Luk. 24:1, 10) Dhoweni nioneni vyaireele mbo-i mwa m’ma mwinango dhinalee Mariya Madalena. Mariya angafiile afwaidhe masiyenimo ira kamwali mutu. Liye atootamanga mawandela Pedru na Juwau. Thitho tatoodhowa vambo-i naaliwa masiyenio. Pedru na Juwau tangasikimizele ira masiyenimo kamuli mutu, tatoowelela mudhi mbwenye Mariya a-adhi masiyenio alanga. Mariya kaaidhiwa ira Yesu unaam’mona. Yesu atookuzeya maningi rimani angaoni m’ma ororomeleula alanga. Ee-no atooneela wa Mariya thitho atooira yongo inango yam’limbi-idhe maningi. Yesu atoonga na liye thitho atoom’ruma ira amawandele abalee ira Yesu utovenyathi-iwa.—Ju. 20:17, 18. w24.10 13 ¶7

Mose atoolaba ninga namaongela, namatonga, osogolela thitho olemba istoriya. Liye atoosogolela Aisraeli okumela wu Iguputu thitho atoona Yohova airanga vyongo vyodabwi-a. Yohova atom’indi-edha basa volemba mabukhu 5 oroma a Bibilyani. Salimo 90, na Salimo 91. Vinooneya thitho ira ngu liye alembile bukhu la Yobo. Anga-anle vang’ono wukwa, ana vyawa 120, Mose atoogumani-a Aisraeli othene nowathuucha vyongo vyothene vyaone aliwa Yohova aairelanga. Aliwa tatoona vizindiyelo vinjinji vyodabwi-a vyevyo Yohova vyairile liye thitho moda mwatongele liye a Iguputu. (Eki. 7:4) Aliwa tatoowenda vabara yofiila ma-inje tangagawaneile thitho tatoona Yohova anonganga magurupu anyakondo a Farao. (Eki. 14:29-31) Yohova atoabarela noasamalela tangali kokolani. (Dot. 8:3, 4) Ee-no anga-adhi vang’ono volowa ilambo yolanyedhiwa, Mose atoona ira yen’ne yali ngari yomari-a ira aalimbi-e Aisraeli. w24.11 8-9 ¶3-4

Vyaongile Yesu wa rumiwee vahora ya yodya yanamaulo ya Mbwiye, vyali vyo-iyana na vyawandenle liye guli laatu awu Galileya. Vyaongile liye wu Galileya duzi nau Kafarnau. Vahora yali Yesu wu Galileya mu 32 K.A.B., atoonga na Ayuda enao tafuna ira taava-e yodya mbwenye liye atoawandhela vyongo vinango vyofuneya maningi kwaranya yodya. Atoawandhela vyongo vyoi vingaakami-idhe dhakaana ingumi yo-omala. Yesu atoawandhela atwao ira atu enao takwide anodha venyathi-iwa thitho anodha kaana ingumi yo-omala. Va kaaonga vya atu oyeva ninga mwairile liye vahora yodya ya namaulo ya Mbwiye. Wu Galileya liye atoonga vya maraeli-o anofuna dhakaana atu othene. w24.12 11 ¶10-11

Yohova unoidanana mutu uliothene wauwalanga. (Sal. 11:5) Liye unoidanana maningi na lombwana unooni-a i-yanee nyarwa. (Mak. 2:16) Akala lombwana unooni-a i-yanee nyarwa unododomi-a uxamwalee na Nlungu. Yohova kanawakhule malobelwee. (1 Pe. 3:7) Alombwana enango tanooni-a nyarwa a-iyaniwa voonga madhu aiburutu thitho voonga mwauwali. Mbwenye Yohova “unoidanana, nyanyuwa rimani, lalata na madhu aiburutu.” (Aef. 4:31, 32) Lombwana unoonga mwaiburutu na i-yanee unododomi-a banjalee thitho uxamwalee na Nlungu. (Yak. 1:26) Ee-no lombwana unoonela vyaumandhave unododomi-a uxamwalee na Yohova thitho kanolemeza i-yanee. Yohova unodedi-edhela ira vyoira thitho mathulelo alombwana athonyi-edhenga ira ngororomeleya wa i-yanee. Yesu atoonga ira lombwana unoing’anechecha i-yana fiyedha m’silila, “utom’raruwanee rimanimwee.”—Mat. 5:28, 29. w25.01 9 ¶6-8

Oniwa ira ngolongomana unothapulela ira landwaa utomali-iwa, thitho vidawi-idhewee vitofudhiwa. Yohova airana vyevi, unokala a-arelanga makundwee olongomana. Kaiira unoniona ira nili olongomana namwasa oi nitoira vyongo vyofwanelela oniwana e-no. Kaiira unokala alevelelanga vyodawa vi-u baa-i. Mbwenye namwasa oi ninororomela vyairile liye vokunela vyodawa vi-u thitho velela kuto, Yohova unonilevelela. (Aro. 3:24) N’nga ninoganyali a-vi Yohova anionanga ira nili olongomana? Atu enao tasakuliwile ira tamatongenga na Yesu dhulu, tatooniwa wale ira mbolongomana ninga a-ima a Nlungu. (Tit. 3:7; 1 Ju. 3:1) Vyodawa viwa vyatooleveleliwa. Aliwa katina limbili nlilothene loi tatoothathamula landu thitho mbofwanelela volowa mu Umwene wa Nlungu. (Aro. 8:1, 2, 30) Atu anodedi-edhela dhakala vailambo yavathila, anooniwa ninga olongomana afwee a Nlungu thitho vyodawa viwa vinoleveleliwa.—Yak. 2:21-23. w25.02 5 ¶17; 7 ¶18

Kathuulelani moda vyaireile vahora inango vevo rumiwi Pedru vakhondile liye akhaana mathuulelo a Yohova. Yesu atoawandela arumiwee ira unofwanela dhowa wu Yerusalemu thitho unodha veleliwa mandhani mwaanamasogolela amareligiau, unodha oni-iwa nyarwa thitho vasogolovee unodha phiwa. (Mat. 16:21) Vinooneya ira vyatoorucha maningi Pedru roromela ira Yohova unodha rumela ira Yesu, wenuo ali idedi-edho ya Aisraeli thitho Mesiya olanyedhiwa, aphiwe. (Mat. 16:16) Moi e-no Pedru atom’tukhula Yesu nom’dhowana vakhundu mam’sumulula ira: “Mbwiyeni mudhivwele tangaranga mwekhene kamurumeli-e navang’onovene ira vyevi viuireeleni.” (Mat. 16:22) Voi Pedru kaathuulela ninga Yohova, khaana mathuulelo ofwanafwana na a Yesu. Vinooneya ira Pedru atookaana vifunelo vyapama, mbwenye Yesu atookhonda a-rela malangi-oee. Kaali ifunelo ya Yohova ira Yesu adhakaena ingumi vo-ogumanana nyarwa iliothene. Vahoriyo Pedru atoofunjedha likhundo lofuneya maningi loi afwanela khaana mathuulelo a Yohova. w25.03 9 ¶5-6

N’nga rima unouphani namwasa oi mutu wenuo unom’nyindela nyo utousukwali-ani venango ira vyongo mo-ororomeleya? (Akala mutu utonisukwali-a moi a-vi, Babi-u wadhulu unonidhiveliwanave. Akala atu enango tatoira vyongo mo-ororomeleya ninooda limbi-iwa na madhu a Davide anofwanyeya va lemba la dambo la penene. Bukhu n’nango linoonga ira atu enao “anovivwela tangaranga rimani mwiwa” anodha kala thitho atu enao “anoona ira sogolo liwa kalina basa.” N’nga Yohova unokami-a a-vi atu enao anovivwa e-no? Molandana na namabala waudhivela wenuo unodidili-a mwanee akaana vyokhumbanya, Yohova unokala vaduzi na i-yo. Liye unonithonyi-edha tangaranga thitho unokala okozeya nikami-a nasukwala namwasa o-ororomeleya wa atu enango. Liye ngokozeya limbi-a atu ana rima othweya thitho enao anodhivwela tangaranga rimani mwiwa.—Esa. 65:17. w24.12 23 ¶13-14

Malamboano, andimuwa avapingoni anoidhiwa ira Yohova unoona thitho simba mabasa apama anolaba aliwa. Wenjedhela vosamalela mabila a Nlungu, funji-a nolaleela, andimuwa anjinji anokami-a mabasa omangamanga, novelela kami-o vaireya masoka avilengo. Andimuwa enango ali mugurupu yowendela atu obulela venango makomisau oongi-ana ximitari. Andimuwa avapingoni anovivelela laba mabasa enala, anoidhiwa ira Yohova ndi mwinyaa pingo. Aliwa anolaba mabasiwa modhivelela thitho anororomela ira Nlungu unodha ava-a yotuva namwasa wa mabasa anolaba aliwa. (Ako. 3:23, 24) Pyo-oodeya ira mutu uliwethene akale ndimuwa wavapingoni. Mbwenye i-yo othene ninooda m’va-a yongo inangoyee Yohova. Nlungwi-u unosimba maningi nadhilimbi-edhanga ira nim’labelenga mwathindhi. Liye unoona navelelanga vyongo vi-u vokami-a basa yavailambo yothene yavathi, masiki vikale vyoyeva. Thitho unosangalala aniona nivwalavwali-anga vyodawa vyaatu enango nowalevelela. Roromelani ira Yohova unosimba vyongo vyothene vinoira nyo. Yohova unoudhiveliwanani namwasa wa vyongo vinoira nyoovyo thitho unodha uva-ani yotuva.—Luk. 21:1-4. w24.06 23 ¶12-13

Mwasa walembile Solomula, unothonyi-edha vinaireele rumiwi uliwethene wa Yohova. Liye unooda irana yodawa ilukulu noonanga ira viireile “mo-odedi-edhela.” Venango unooda onganga ira “ndi vyongo vyo-odedi-edhela vite ireya wene baa-i.” Mbwenye athuulela pama viireilevyo, unooda fwanya ira vatokala vyongo vinango vyairile liye mo-othuulela pama viiri-idhe ira aire vyodawavyo. Vyongovi vinooda thangani-avo vyosangalali-a vyo-ofwanelela, waredha naatu amakalelo othakala, fwanyeya mumamburo okaikeli-a ninga avaiternetini na mamburo enango owaredhela. Pyooneelatu thitho ira venango atoo-iya lobela, leri Bibilya, fwanyeya vamigumanoni yapingo venango laba basa yolaleela. Ee-no molandana na zombwe uongiwile mu bukhu la Sanganiko, yodawayee kinakale yoi vite ireya mo-odedi-edhela. N’nga ninofunjedhavo n’ni? Ninofunjedhavo ira kaninofwanela rambelanga yodawa baa-i, mbwenye ninofwanela rambelanga thitho vyongo vinairi-e ira niire vyodawavyo. Solomu atoovwei-a pama likhundo leli.—Mat. 5:29, 30. w24.07 16 ¶10-11

N’nga fuma yen’na chini? Ndi basa yolaleela vya Umwene yeniyo ili yovulumucha vingumi. (2 Ak. 4:1) N’nga viya vyaulongo chini? Vinoimelela arumiwi a Nlungu enao anowandela atu enango milanyu yapama. Muhora ya Paulo, alimbo ira goso tanoo-indi-edha basa mino ya ulongo votukulelamo vyongo vyofuneya ninga vyodya, vinyu na kobiri. Molandana na vyevi, Yohova utoniva-a milanyu yapama yapereso yavadhulu. Mokami-iwa na Yohova ninooda fwanya kopolo dhinofuneela i-yo ira nidhowenave laleela milanyu yapama mororomeleya. Hora dhinango ninooda ovanga atu venango ova ira anokonda milanyu inolaleela i-yo. N’nga ninalimbanena a-vi yorucha yei? Kathuulelani lobelo laongile arumiwi tangawandeliwile ira ta-iyachi laleela. Malo moova no-iyachi laleela, aliwa tatoolobela wa Yohova ira aakami-e dhowanave onga molimba rima. Yohova atoowakula lobelolo vahora yeniyo. (May. 4:18, 29, 31) Mum’vepenga Yohova ira aukami-eni dhowanave dhiveliwana maningi atu thitho ira mwa-aovenga awandela milanyu yapama. w24.04 16 ¶8-9

M’dhiveliwana Yohova unonilimbi-a ira nicheni-enga dhinalee. Vyevi vinothapulela ira ninofunechecha wandela atu enango ira vyongo vyothakala vinoonga Satana vyokuza Yohova kai vyaimbarimbari. (Mar. 3:1-5; Yob. 2:4; Ju. 8:44) Nalaleelanga ninofunechecha wandela atu othene enao anavuruwane imbarimbari yoonga vya Yohova. Ninofuna ira mutu uliwethene aidhiwe ira kalelolee nlukulu ndi udhivela, unotonga molongomana thitho ira vachineneeva Umwenee unodha mali-a nyarwa dhothene nodhi-a rendele na imwerumweru waatu. (Sal. 37:10, 11, 29; 1 Ju. 4:8) Nawandelanga atu vyokuza Yohova, ninokala nicheni-anga dhinalee. Ninokala osangalala namwasa oi ninoidhiwa ira ninoira vyongo movwelana na dhina li-u. w24.05 18 ¶12

Abali munooda thonyi-edha ira muli “owachela alendo,” mwairelanga atu enango vyapama thangani-avo atu oi kai afwinyu avarimani. (1 Pe. 4:9) Voonga vya mutu owachela alendo, bukhu n’nango laongile ira: “Lango wanyumbee thitho warimee, unokala odhuleyene masiki waatu oi kanowaidhiwa.” Munooda ira pama dhifuka ira: “N’nga limbili langa vamwasa owachela alendo ndi loi a-vi? (Aeb. 13:2, 16) Mutu owachela alendo unogawana vyongo vina liye naalendwao thangani-avo osauwa thitho atu enao anom’labela Yohova mororomeleya ninga anamaing’anela isa, naatu enao adhidhe dhaonga mwasa kumela mupingo unango.—Mar. 18:2-8; San. 3:27; May. 16:15; Aro. 12:13. w24.11 21 ¶6

Yesu atoonga ifwanafwani-o ya anamwali 10 enao tadhowile madedi-edha namathela. (Mat. 25:1-4) Aliwa tafuneela velela namatheluo wu pwandoni ya kazamentwee. Yesu atoonga ira anamwali 5 tali “owenjela” voi 5 tali “opupwa.” Anamwali owenjelao tali opwaseya thitho okozeya. dedi-edhela namathela masiki fiyedha nama-iyu. Aliwa tatootukula nyale thitho ira ta-akale isini tatootukula makura owenjedhela ira venango mulimbo thela unodha dembuwa. Ee-no aliwa tatookozeela ira nyale dhiwa dha-atime. (Mat. 25:6-10) Namathela angafiile anamwali owenjelao tatoovolowa vambo-i na liye m’mba mwali pwandomo. Molandana na vyevi, Makristau ozoziwa enao athonyi-edhe ira mbokozeya, ali opwaseyene thitho ororomeleya fiyedha udha wa Kristu, anodha oniwa ira mbofwanelela volowa na namathela wenuo ngu Yesu, mu Umwene wa dhulu. Apk. 7:1-3. w24.09 21 ¶6

Ninolimbi-iwa laba mwathindhi basa lolaleela naona mwemo munokami-edhela aliwa atu vailambo yothene. Yawa iliothene atu mamiliyau tanodhecha wu ithuuleloni thitho tanoroma funjedha Bibilya. Atu mamiliyau anjinji tanobadiziwa noroma laba vambo-i na i-yo basa lolaleela. Kaninoidhiwa ira mbaatu oinjiva moi a-vi enao anovuruwana milanywi-u, mbwenye ninoidhiwa ira Yohova unodhowanave gumani-a gulu nlukhulu lelo inofuna dhavulumuwa va nyarwa ilukhulu. (Apk. 7:9, 14) Mwinyaa munda unoonave ira vatokala vyo-anda vinjinji ee-no nitokaana myasa yapama inoniiri-a dhowanave laleela. (Luk. 10:2) Hora dhothene anamafunjedha a Yesu tanoidhiweya namwasa wa thindhi liwa lolaleela. Atu taona limba rima waarumiwi volaleela, tanoozindiyela ira tawenda na Yesu. (May. 4:13) I-yo thitho atu taonanga limba rima wi-u volaleela tanozindiyela ira ninom’sazi-edha Yesu. w25.03 18 ¶15; 19 ¶17-18

Bibilya linothonyi-edha ira Yohova unothuulela atu enao anooneya ninga mbo-ofuya waatu enango. Mofwanafwani-a, Yohova atom’ruma namaongela Samueli ira amazoze m’mbo-i mwaa-ima a Jesse ira akale mwene wa Aisraeli. Jesse atooitana a-imee 7 ira tamagumane na Samueli mbwenye kaam’mwitan’ne Davide wenuo ali mwanee wa ng’ono. Mbwenye Davide, ngwenuo asakuliwile na Yohova. (1 Sa. 16:6, 7, 10-12) Yohova atoona vyali rimani mwa Davide thitho atoozindiyela ira ali mutu am’dhiveliwana Nlungu. Yohova utothonyi-edha wale ira unouthuulelani. Mwaifwanafwani-o, unouva-ani malangi-o ovwelana na vinofuneela nyo. (Sal. 32:8) Vyevi kavyaodeye aakale ira kanouwidhiwani pama. (Sal. 139:1) Mwaroma i-ndi-edha basa malangi-o a Yohova noona moda munoukami-edhelani aliwa, kamunokaikela ira Yohova unoudhiveliwanani. (1 Li. 28:9; May. 17:26, 27) Yohova unoona vyongo vyothene vinoira nyo ira mum’labelenga, unoona makalelo apama enao ana nyo thitho unofuna ira mukale fwee.—Jer. 17:10. w24.10 25-26 ¶7-9

Pyo-oira fuka ira munom’dhiveliwa Yohova thitho munofuna labela atu enango. N’nga munaire a-vi ira mukaena rima ofuna labela atu enango? Muthuulelenga imwerumweru inakaena nyo namwasa olabela abali na arongolinyu. Yesu aongile ira: “Va-a unosangalali-a maningi kwaranya wachela.” (May. 20:35) Thitho vyevi pyairana Yesu. Liye anoosangalala namwasa olabela atu enango. Dhoweni nioneni ifwanafwani-o yava lemba la Marku 6:31-34 Vahora inango Yesu na anamafunjedhee, tatoochenyela thitho tadhowa wu limburo laokene ira tamavume. Mbwenye mwinji waatu watoodhowa weo nodedi-edhanga ira Yesu aafunji-e. Yesu angaodile konda afunji-a. Namwasa oi Yesu na anamafunjedhee “katana hora yoi tavume venango ira tadye.” Yesu angaodile sakula afunji-a vyongo vyoyeva noawandela ira tadhowenga. Mbwenye namwasa odhiveliwana atu, Yesu “atooroma afunji-a vyongo fiyedha hora ingamadhi.”—Mrk. 6:35. w24.11 16 ¶9-10

Anamabala mulimbi-enga mwaninyu ira akaengana hora yowandela atu enango imbarimbari ya Bibilyani. (Aro. 10:10) Munooda m’fwanafwani-edhela thindhi lelo mwaninyu linokaana liye lowandela atu enango vyongo vinororomela liye na thindhi lelo linofuneya ira mutu afunjedhe vo-indi-edha basa mafaramento othene oombana nyumbo. Voroma unooda omba nyumbo yo-orucha. Vavira hora unooda roma omba nyumbo mo-orucha. Mofwanafwana na vyevi, Kristau wa zombwe unodha roma namwasa o-orucha vowandela atu enango vyongo vinororomela liye. Mofwanafwani-a, liye unoda fuka fwee waxikolani ira: “N’nga unoidhiwa ira siyetista osaka-edha vyongo atukulele vyongo vyopanduchiwa? Funa ndiuoni-e vidiyo ila yoi njosangalali-a.” Vasogolo vom’moni-a vidiyo imbo-i yoi Kodi Zinangochitika Zokha? Unooda onga ira: “N’nga mbaani unofwanela lemeziwa vari va masiyetista enao anosaka-edha vyongo votukulela vyongo vyopanduchiwa na mwinyaa wenuo upanduchile vyongovyo?” I-ndi-edha basa ndhila yo-oruchila unooda kami-a fwee waxikolanio kaana ifunelo yofuna funjedha vyongo vinjinji. w24.12 19 ¶17-18

Ira anivulumuche wu vyodawa na wukwa, Yohova atooira masaka-edho oi Yesu avelele kuto. N’nga sembe ya mutu mbo-i olongomana yavulumuche a-vi atu mamiliyau anjinji? Rumiwi Paulo atoonga ira: “Voi a-vwela wa mutu mbo-iuo [Adamu] watooiri-a ira atu anjinji takale odawa, vwela wa mutu mbo-iuo [Yesu] watooiri-a ira atu anjinji takale olongomana.” (Aro. 5:19; 1 Ti. 2:6) Ninooda onga ira a-vwela wa mutu mbo-i oi ali olongomana, watoniiri-a ira nikale adhaari avyodawa na wukwa. Ee-no vanoofuneya mutu mbo-i ovwela na olongomana ira nivulumuchiwe. N’nga Yohova kaaode fiyari a-ima ovwela a Adamu ira takaena ingumi yo-omala? I-yo aatu ningathuulele ira yen’na yali ndhila yapama yomari-edhana nyarwila. Mbwenye vyevi kai vyovwelana na longomano la Nlungu. Voi Yohova ngolongomana, kaalevelele a-vwela mwakhomove wa Adamu. w25.01 21 ¶3-4

Vahora inango rumiwi Paulo atooidhiwa ira a-adhina hora yoyeva ira aphiwe. Mbwenye atoosangalala voidhiwa ira utoirana yongo iliyothene yafuneela liye irana vaingumiyee. Vothuulela vyevi aongile ira: “Nditothamanga va pikisanula fiyedha komoni. Nditokaanave iroromelo.” (2 Ti. 4:6-8) Paulo anoosakula vyoira mwazelu va urumiwee thitho kaakaikela ira Yohova unosangalala na liye. Na-iyene thitho ninofwanela sakhulanga vyongo mwazelu ira Yohova asangalalenga na i-yo. N’nga ninaire a-vi vyevi? Voonga vya liye na vya Makristau enango ororomeleya, Paulo aongile ira: “Ninowenda mosogolelowa na iroromelo, a-kala mosogoleliwa na vyooneya na metho.” Bibilya, hora dhinango madhu oi “wenda” anothapulela vyongo vinosakhula mutu irana vaingumiyee. Mutu unowenda mosogoleliwa nairoromelo, unom’nyindela Yohova thitho unosakhula vyongo movwelana na mwemo munofuna Yohova. Vyongo vinoira liye vinothonyi-edha ira Nlungu unodha m’raeli-a thitho ira vyongo vinodha m’mwendela pama a-arelanga malangi-o a Yohova ofwanyeya mumadhwee.—Sal. 119:66; Aeb. 11:6. w25.03 20 ¶1-2

Zimu wa Nlungu watookami-a atu anjinji oi voromavene tana makalelo ninga avinyama nochinja. (Esa. 65:25) Aliwa tatodhilimbi-edha i-yachi makalelo othakala ana aliwa ndulimu. (Aef. 4:22-24) Mbwenye atu a Nlungu kai olongomana, ee-no anoodangave dawi-a vyongo vinango. Angalive ira vili e-no, Yohova unaakami-a “atu amaziza othene” ira takale ovwelana thitho vyo-arelavovyee vikale vyoi tadhivelanenga nokala varendele. (Tit. 2:11) Vyevi pyodabwi-a viirile Nlungu ekene wenuo uli wakopolo dhothene. Vyevi vinothonyi-edha ira madhwee anokwakwaneli-edhiwa hora dhothene. (Esa. 55:10, 11) Va-eeni Paradaizo wauzimu utokalavo wale. Yohova utosaka-edha ubali wavakundu maningi. Atwee anokala mwarendele thitho mbobareleya angalive ira muilamboi mutodhala atu auwalanga. (Sal. 72:7) Ngumwasiwa ninofuna kami-a atu anjinji ninga mwemo munaodele i-yo ira tavolowe mubanja lauzimuli. Ninooda irana vyevi volaba basa yofunji-a atu.—Mat. 28:19, 20. w24.04 23 ¶13, 15

Yesu anoodhiveliwana Yohova na rimee othene. Liye anooidhiwa vyongo vyafuna Nlungu ira airena thitho ali okozeya irana vyongo movwelana na vyevyo angalive ira vingairi-idhe ira agumanena nyarwa. Voi liye anoothuulela maningi vyom’sangalali-a Babee, Yesu kaarumeli-idhe ira iliyothene yim’mwimwanani-e kwakwaneli-edha ifunelwee. Pedru naarumiwi afwee tatookaana ngari yokhaati vambo-i na Yesu thitho tatoofunjedha mwemo Yesu mwathuulela liye. Pedru vyalemba liye kartalee lovudheleliwa atoolimbi-a Makristau ira tavikozeeli-edhenga kaana mathuulelo ninga ana Kristu. (1 Pe. 4:1) Vahora Pedru vyaonga liye ira nanyeene thitho “mukhozeele,” atoo-indi-edha basa madhu ailamulo yoroma oi taonga vya nyakhondo wenuo utukunle fwarametwee yakhondo vokhozeela khondo. Ee-no Makristau tasazi-edha mwemo mwathuulela Yesu takhala ira tatotukhula mafwaramento akopolo enao taakhami-e limbanana madawo thitho ilambo yotongiwa na Satanila.—2 Ak. 10:3-5; Aef. 6:12. w25.03 8-9 ¶1-3

N’nga munofwanela idhiwa thitho vyongo viivi vyokuza mutu una nyo vaimweendi? Mwa-anafiye vofunana maningi, munodha funeela tapanya vyongo vinango vyofuneya ninga vifunelo vina fwinyuo. N’nga munaire a-vi ira mum’mwidhiwe pama fwinyuo? Munooda irana vyongo vyevi vom’monganee mothathuwa, moona rima, m’fuka vyofuka thitho m’vuruwana. (Yak. 1:19) Ira vyevi viodeye, venango munooda ira masaka-edho oirela vyongo vambo-i venango udya vambo-i, wenda mumamburo ofwanyeya atu anjinji thitho laleela vambo-i. Wenjedhela vevo, munooda ira vyongo vyevyo vinaukami-eni idhiwa mwemo munoirela liye vyongo mo-iyana-iyana thitho akala vambo-i naatu o-iyana-iyana ninga afwinyu na abalinyu. w24.05 27-28 ¶6-7

Sogolou unodha ireya vyowesedha vinairi-e ira nim’nyindelenga Yohova kwaranya walelene. Myasa ya Bibilyani thitho yokuza arumiwi a Yohova amalamboano, inonikami-a ona mwemo Nlungu mwathonyi-edhele liye ira ali lipandhe vokami-a arumiwee. Nithuulelenga modi-a myasa dhedhi. Naira e-no nionenga ira Yohova ndi lipandhe li-u. Nadhilimbi-edhanga sazi-edha makalelwee, ninodha limbi-a maningi abali naarongoli-u. Mofwanafwani-a, Yesu atom’va-a Simoni dhina loi Kefa (loi thapuleliwawee ndi “Pedru”) thitho linothapulela ira “libwe.” (Ju. 1:42) Vyevi vinothonyi-edha ira unodha limbi-a atu enango pingoni thitho akami-a ira takaena iroromelo yolimba. Andimuwa avapingoni anofwanafwani-edhiwa na “ruthi wa lipandhe nlukulu.” Madhu enala anothonyi-edha mwemo munobarelela aliwa atu pingoni. (Esa. 32:2) I-yo othene akala nili abali venango arongola, ninooda limbi-a atu pingoni nasazi-edhanga makalelo a Yohova. w24.06 28 ¶10-11

Yohova anoona mamwene awu Israeli enao tam’lambela mundhila yofwanelela na mororomeleya. Yohova atootonga mamwene anjinji enao tali o-ororomeleya atoo-iya a-rela malamulo noroma lambela mafwano. (1 Ma. 21:25, 26; 2 Li. 12:1) Mwasiwa ngwan’ni Yohova anoona ira mwasa olambela ngofuneya maningi? Mwasa mbo-i ngoi mamwenala tatookaana izo ilukulu yosogolela atu a Nlungu ira tam’lambelenga mundhila yofwanelela. Ee-no lambela mafwano unoiri-a atu enango ira tairenga madawo malukulu thitho vyo-olongomana. (Ose. 4:1, 2) Wenjedhela vevo, mamwene naatwao tali ziza lodhivelela wa Yohova. Ngu mwasee Bibilya linofwanafwani-edhela lambela wiwa mafwano na mararuo. (Jer. 3:8, 9) Mutu wenuo uirile mararuo, unokala adawelanga maningi man’nee venango i-yanee. Mofwanafwana na rumiwi odhiyevi-a wa Yohova wenuo unolambela mafwano, unom’dawela maningi Yohova.—Dot. 4:23. w24.07 22-23 ¶12-15