Agosto

Ninolobela ira atu anjinji tarumele milanyu yowenjeli-a nokala gulunimwi-u noroma lambela ochena va ee-ni. N’nga a-vi vyaatu anokonda milanyu yowenjeli-a va ee-ni? Pyoodeya ira Yohova unodha vulumucha atu enao anachinje mirimiwa vasogolo voona nongiwa wa Babulo Nlukulu. Akala ndi ee-no, kuongela ira pyofuneya maningi va-eeni dhowanave wenjeli-a atu. Vyongo vinoawandela i-yo va-eeni, anodha vithuulelanga vahora yeniyo. (Mufwanafwani-edhe na lemba la Zakiyeli 33:33.) Venango anodha thuulelanga vyongo vinoawandela i-yo nosakula roma m’labela Nlungu hora ya-anamale. Mofwanafwana na namaing’anela perezo wau Filipi wenuo achinjile mathuulelo vasogolo va “indharandhara ya kopolo,” pyooneelatu ira atu enao ta-anovwela milanyu inolaleela i-yo va-eeni, anodha chinja mirimiwa vasogolo voona nongiwa wa Babulo Nlukulu.—May. 16:25-34. w24.05 17 ¶9-10

Ninofunjedhavo thitho likhundo n’nango lofuneya maningi vamadhu alembile rumiwi Paulo lembela Makristau awu Iyeberi. Enango mwamakristau ala, katadhowilenave ulukula mwauzimu. Aliwa “tatooroma funafuna kaka a-kala yodya yauzimu yothakuna.” (Aeb. 5:12) Aliwa katafunjedhile thitho rumela makhundo mapya enao Yohova aafunji-a liye dhela pingoni. (San. 4:18) Mofwanafwani-a, Makristau anjinji awu Yuda tanoolimbi-ave ilamulo yava-iwile Mose na Nlungu angalive ira ilamulwiyo yali ingamali-iwile wavyawa vyokwaranya 30 ndulimu, namwasa wa sembe ya Kristu. (Tit. 1:10) Mutu uliwethene wenuo unaleri karta lalimbile Paulo lembela Makristau awu Iyeberi, unooda rumela ira mubukhuli mutokala yodya yauzimu yothakuna. Makhundo enala mbenao afuneela aliwa ira taaroromelenga ira ndhila yolambelela ya Makristau njavakhundu. Vyangaakami-idhe thitho ira talaleelenga molimba rima.—Aeb. 10:19-23. w24.04 6 ¶15

Kumela vahora Adamu na Eva vyakanle aliwa uikhundu ya Satana nom’dhimbinuela Yohova Nlungu, atu mamiliyau manjinji takadhi takwanga. N’nga sogolo laatu othene enala linodha kala loi a-vi? Atu oyeva okwakwana 144.000 enao ali anama-arela ororomeleya a Kristu, anodha venyathi-iwa nova-iwa ingumi yo-okwa dhulu. (Apk. 14:1) Alombwana naa-iyana ororomeleya enao anom’dhiveliwana Yohova, anodha kala mugurupu laatu “olongomana enao anofuna . . . dhavenyathi-iwa” thitho anodha va-iwa ingumi yo-omala vailambo yavathi, akala anodha dhowanave kala ororomeleya muutongi wa vyawa 1.000 wa Kristu na vahora yowesedhiwa omari-a. Vahora yeniyo, atu o-olongomana thangani-avo enao ta-am’lambela Yohova, venango tairana vyongo vyothakala, anodha va-iwa ngari yoi tadhafunjedhe vyoonga Yohova. (Dan. 12:13; Aeb. 12:1) Thitho wari mwavywa 1.000, “atu o-olongomana” thangani-avo atu ta-am’lambenlevo Yohova, venango enao “tairana vyongo vyothakala,” anodha kaana ngari yoi tachinje ndhila dhiwa nokala ororomeleya. (Ju. 5:29; Luk. 23:42, 43) Mbwenye vatokala atu aasakunle Yohova ira katinodha venyathi-iwa navang’onovene, atu enala tali othakala maningi.—Luk. 12:4, 5. w24.05 2 ¶3; 5 ¶15; 6 ¶17

Ira mutu arumeli-iwe kala lendo tendani mwa Yohova, unofwanela “onganga vyongo vyaimbarimbari kumela rimani.” (Sal. 15:2) Veva kaiira anothapulela rambela nama baa-i. Yohova unofuna ira hora dhothene nikalenga oona rima. (Aeb. 13:18) Vyevi ndi vyofuneya maningi, “namwasa oi Yohova unothakaleliwa na mutu wainyengo mbwenye atu amirima yapama, anokala vauxamwali olimba na Yohova.” (San. 3:32) Atu anoonga ‘vyongo vyaimbarimbari kumela rimanimwiwa,’ katinodedi-edhela kala ovwela takala vamwinjini baa-i, mbwenye takala vaokene aliwa ano-arela malamulo a Nlungu. Anorambela vyongo vyainyengo. Mutu wainyengo unoroma kaikela akala malamulo a Yohova mbazelu. (Yak. 1:5-8) Mutu oi ee-no kanom’vwela Yohova va vyongo vinoona liye ira ndi ving’ono. Aona ira kanagumanenavo nyarwa namwasa o-ovwelao, unokalave olimba rima nodhowanganave a-arela malamulo a Nlungu thitho lambelawee unokala wainyengo. (Nam. 8:11) Mbwenye i-yo ninofwanela kala oona rima vavyongo vyothene. w24.06 10 ¶7-8

Atu a Yohova anodhiveliwana imbarimbari yofwanyeya m’madhu a Nlungu. Vyongo vinoleri i-yo mumadhwee vinolimbi-a iroromelwi-u. (Aro. 10:17) Ninororomela ira Yohova utokaathi-a pingo waikritau ira “unilimbi-enga nobarela imbarimbari.” (1 Ti. 3:15) Satana unofunechecha ira ni-iye roromela Bibilya thitho malangi-o anowachela i-yo kumela wu gulu la Nlungu. (Aef. 4:14) Vachineneeva, Namanami-a unodha indi-edha basa vyonama vofuna dodomi-a atu amaziza othene ira tam’runi-enga Yohova. (Apk. 16:13, 14) Ninoidhiwa thitho ira Satana unodha dhilimbi-edha maningi ira adodomi-e atu a Yohova. (Apk. 12:9) Ee-no ninooda ira pama funjedha i-yani-a imbarimbari na makhundo onama novwelanga imbarimbari. (Aro. 6:17; 1 Pe. 1:22) Irana vyevi unooda nikami-a ira nidhavulumuwe va nyarwa ilukulu. w24.07 8 ¶1-3

Yohova atoosakula Aisraeli ira takale tundwee. Atooira vwelano naaliwa thitho tatoolanyedha ira anongo m’vwela. Tavwelanga malamulwee, Yohova anowabarela nowaraeli-a. (Dot. 30:11, 16) Mbwenye ta-avwele, venango tasakula lambela milungu inango, Yohova anoo-iya araeli-a thitho tanoogumanana nyarwa. Angalive ira vyali e-no, vyali vyoodeya ira Nlungu arome okoka adhiveliwana. Aliwa tanooda “welela wa Yohova Nlungwiwa thitho vwela madhwee.” (Dot. 30:1-3, 17-20) Mumadhu enango ninooda onga ira tachinyuwa, Yohova anooda kala okoka vauxamwali naaliwa noroma araeli-a. Atu a Yohova tanom’dawela moweli-edha weli-edha. Vyevi vyatooiri-a ira tagumanengana nyarwa. Mbwenye Yohova kaachenyenle naatu o-ovwelala. Moweli-edha weli-edha, Yohova anowaruma anamaongelee ira tamaakami-e naifunelo yoi tachinyuwe nowelela wa liye.—2 Ma. 17:13, 14. w24.08 9 ¶4-5

Makristau awu Iebere enao takala wu Yerusalemu na wu Yudeya, tatoogumanana nyarwa dhilukulu vasogolo voi Yesu utopiwa. Pingo wa Ikristau ungakaathei-iwile, Makristawao, tanooni-iwa nyarwa maningi. Ee-no vangavirile vyawa 20, anama-arela a Kristu tatoogumanana nyarwa dhafuma, venango namwasa wa ndhala yali muilambonimo. (May. 11:27-30) Mbwenye mu yawa ya 61 K.A.B., Makristawao kataoni-iwa nyarwa maningi vofwanafwani-edha na vyafuna aliwa dhagumanana sogolo. Vahora yeniyo aliwa tatoowachela karta yovudheleliwa ya rumiwi Paulo yeniyo yali yavahoree. Karta yodhowa wa Aeberila yali yavahoree namwasa oi rendele wana Makristawao wali o-odimbela. Paulo atoovelela malangi-o aakami-e Makristawao vilela vyowesedha, vyafuna aliwa dhagumanana sogolo. w24.09 8 ¶1-2

Nagumanangana nyarwa, abali naarongoli-u anonilimbi-a maningi. Vyongo vinoira abali naarongoli-u vinothonyi-edha ira Yohova unonidhiveliwana. Aliwa anonilimbi-a vonivwela tangaranga venango kala vambo-i na i-yo vahora inogumanana i-yo nyarwa. Anooda nilerela maversu enangwee olimbi-a venango lobela vambo-i na i-yo. (Aro. 15:4) Hora dhinango bali venango rongola unooda nithuucha mathuulelo a Yohova, enao ananikami-e ira rimi-u ukale limburoni mwee. Makristau afwi-u anooda nikami-a mundhila dhinango ninga niva-a yodya vahora inodhikumbanyedha i-yo. Ira atu enango tanikami-e ninofwanela awandela nyarwa dhinogumanana i-yo. (San. 17:17) Aliwa vaokene katinaidhiwe mwemo munodhivwela i-yo thitho vyongo vinofuneela i-yo. (San. 14:10) Ee-no mukalenga okozeya wandela afwinyu oi munowanyindela. Mwaawandelenga vyongo vinaukami-eni aliwa. Munooda wandela ndimuwa wavapingoni mbo-i venango ambili enao aalemenle nyo. Arongola enango anoona ira vinowarucha wandela rongola mwinango olimba mwauzimu. w24.10 10 ¶15-16

Atu anjinji anokala osamala na vinodya aliwa thitho anoira mawaredhelo olimbi-a manungo vaduzi na vaduzi ira takaena manungo apama. Mbwenye aliwa anoidhiwa ira irana vyevi kunaode akami-a ira ta-aulule venango wukwa. Ee-no aliwa anothuulela ira pyo-oodeya kaana ingumi modhowa nodhowa. Angalive ira vili e-no, Yesu atoonga ira pyoodeya kaana “ingumi yo-omala.” Ifwanafwani-o ndi vyaongile liye va lemba la Juwau 3:16 na 5:24. Dambo n’nango Yesu atooira vyodabwi-a vodyi-a mwinji waatu pau na somba. Vyevi vyali vyodabwi-a, mbwenye vyodabwi-a maningi ndi vyaongile liye vadambo lo-arela. Mwinji waatu watoom’ara wu Kafarnau thitho weo liye atoawandela ira atu okwa anodha venyathi-iwa thitho anodha kaana ingumi yo-omala. (Ju. 6:39, 40) Madhu a Yeswala anothapulela ira atu anjinji takwide anodha venyathi-iwa thitho nyo vambo-i naatu aadhiveliwana nyo anodha kaana ingumi modhowa nodhowa. w24.12 8 ¶1-2

Lipoti lachineneeva la Gulu loona vyaingumi vailambo yothene, linothonyi-edha ira alombwana anjinji anokhoma a-iyaniwa, aongela madhu aiburutu venango aoni-a nyarwa mundhila dhinango. Anolemeza a-iyaniwa takala vamwinjini mbwenye anoaoni-a nyarwa tadhowa mudhi. Mwasiwa ngwan’ni alombwana enango tanooni-a nyarwa a-iyaniwa? Venango tasamaleliwa na anamabala auwalanga e-no anothuulela ira kavali yorucha irela atu enango vyauwalanga. Atu enango anowendela ikalelo yothakala yoi lombwana waimbarimbari unofwanela thonyi-edha kopolo ira alemeziwenga. Voi alombwana enango katifunji-iwile dhikhondi-a. Alombwana enango anokaana mathuulelo odaweya okhuza a-iyana thitho gonana namwasa oonela vyaumandhave. Wenjedhela veva, malipoti tatoothonyi-edha ira sau wa COVID-19 utowenjedhela nyarwa dhedhi, mbwenye vyevi kai myasa yovweya yoiri-a ira alombwana tairelenga vyauwalanga a-iyaniwa. w25.01 8 ¶2-3

“Mum’dhiveliwena Yohova Nlungu na riminyu othene, ingumiinyu yothene, kopolo dhinyu dhothene namathuulelwinyu othene.” (Luk. 10:27) Veva Yesu athonyi-edha ira leli tilamulo loroma lofuneya maningi muilamulo yava-iwile Mose na Nlungu. Muone ira m’dhiveliwana Yohova unothangani-avo rimi-u, wenuo unoimelela vyongo vinodhiveliwana i-yo, mwemo munovivwela i-yo thitho mwemo munothuulela i-yo. Unothangani-avo thitho dhivelela wa Yohova na rimi-u othene na kopolodhi-u dhothene. M’dhiveliwana Yohova unothangani-avo mathuulelwi-u enao anoimelela moda munoonela i-yo myasa yo-iyanana i-yana. Pyaimbarimbari ira kaninavwecheche mokwakwanela mwemo Yohova munothuulela liye. Mbwenye ninooda vwechecha mwemo Nlungu munothuulela liye vofunjedha “mathuulelo a Kristu,” namwasa oi Yesu unothuulela ninga munothuulela Babee.—1 Ak. 2:16; 2:16. w25.03 8 ¶1

Voi Yesu ali olongomana, anoofwanafwana na mwemo Adamu mwali liye a-anadawe. (1 Ak. 15:45) Wukwa wa Yesu watookunela vyodawa vya Adamu, thitho atooweleli-edha vyongo vyaluzile Adamu. (Aro. 5:19) Ee-no Yesu atookala “Adamu ogomi-edha.” Kavanofuneela okoka mutu mwinango olongomana ira apagali vyongo vyaluzile Adamu. Yesu atookwa “fendo imbo-i baa-i ira avelele sembe yokami-a atu modhowa nodhowa.” (Aeb. 7:27; 10:12) N’nga kunela vyodawa uno-iyana a-vi na kuto? Kunela vyodawa ndi vyevyo vyairile Nlungu ira atu takale vauxamwali wapama na liye. Voi kuto njopagali iveleliwile ira madawo aatu takuneliwe. Yopagali yei inoimelela sangiri ya pereso yavadhulu ya Yesu yachuchi-iwile namwasa wa i-yo.—Aeb. 9:14. w25.02 5 ¶12-13

Roromela ira Yohova utokalaodi, unooda nikami-a ira nionenga mofwanelela vyowesedha vinogumanana i-yo. Mwasiwa ngwani ninoonga ee-no? Namwasa oi ninoroma ona nyarwa dhinogumanana i-yo, ninga ikundo vamwasa nlukulu wenuo ulivo vari va Yohova na Satana. Namanami-a unoonga ira nagumanana nyarwa, ninooda i-ya m’labela Yohova. (Yob. 1:10, 11; San. 27:11) Mbwenye naoda vilela nyarwadho, ninothonyi-edha ira ninom’dhiveliwana Yohova thitho ninoruni-a vyonama vya namanami-a. N’nga nyo munoruni-iwa naandimuwa andimuwa amaguverno, munogumanana nyarwa dhafuma, thitho atu katinovuruwana milanyu inolaleela nyo venango munogumanana vyowesedha vinango? Muthuulelenga ira vinogumana nyoovyo vinodha uva-ani ngari yoi musangalali-e rima wa Yohova. Muthuulelenga ira Nlungu kanodha rumeli-a ira muwesedhiwe fiyedha voi kamunaode vilela. Yohova unodha uva-ani kopolo ira muvilele. w24.06 22 ¶9

N’nga mutoviidhiwa vyongo vinauwesedheni mo-orucha? Kamunofwanela vinami-anga nopwazanga vyofooka vinyu thuulelanga ira muli olimba maningi mwauzimu voi kamunodha irana vyongo vyothakala. (1 Ju. 1:8) Paulo Thitho atoonga ira masiki atu “ali ofwanelela mwauzimu,” anooda wesedhiwa akala katinodhowanave kala methove. (Agl. 6:1) Ee-no ninofwanela kala oona rima nozindiyelanga vyofooka vi-u. (2 Ak. 13:5) N’nga ninofwanela iran’ni nazindiyela vyongo vinairi-e ira niwesedhiwe mo-orucha? Nikaengana thindhi ira nirambelenga vyongo vyevyo. Mofwanafwani-a, masidadi awalelene enao tana mipanda, tanoobareliwa maningi simbwasimbwa valango, namwasa oi ndi vevo amwidani vaode aliwa volowa mo-orucha nowadhimbinuela. Molandana na vyevi, ninofwanela idhiwa pama vyofooka vi-u na vyevyo vinairi-e ira niire vyongo vyothakala, naifunelo yoi niodenga rambela vyowesedha.—1 Ak. 9:27. w24.07 15 ¶5-7

Basa yapama iongiwile mulemba la penene, inothangani-avo laleela milanyu yapama. Ee-no naleringa madhu a Nlungu nowathuulela modi-a, ninoroma m’roromela maningi Yohova thitho ninoroma ona ira wandela atu enango milanyu yapama kofuneya maningi. Ira niganyalinga maningi na madhu a Nlungu, ninofwanela rambela leri mobaranyi-a vofunjedha thitho thuulela vinoleri i-yovyo. Nikaengana hora yokwakwanela. Nafwanya lemba la-anolivwechecha i-yo pama, kaniirenga likwaranya. Malo molikwaranya, ni-indi-edhelenga basa Índice das Publicações da Torre de Vigia venango Buku la Mboni za Yehova Lofufuzira Nkhani ira niidhiwe moda uthapulele aliwa lembalo. Nakaangana hora yokwakwanela yofunjedha vaokene, ninodha roma roromela maningi ira madhu a Nlungu mbolinyali. (1 At. 5:21) Thitho naroromelanga maningi madhu a Nlungu, paevo vanokala i-yo osangalala wandela atu enango vyongo vifunjedhile i-yo. w24.04 15 ¶4-5

Liye “ngwapama thitho ngokozeya levelela.” (Sal. 86:5) Mika aongile ira: “N’nga vatokala Nlungu mwinango, olandana nanyo unolevelela vyodawa vyaatu?” (Mik. 7:18) Esaya atoonga ira: “Mutu wa makalelo othakala, a-iye ndhiladhee thitho ophei-a afwee a-iye mathuulelwee. Awelele wa Yohova voi unodha m’vwela tangaranga. Awelele wa Nlungwi-u, namwasa oi unodha m’levelela na rima othene.” (Esa. 5:7) Ira atu awu Koritiyo tam’sazi-edhe Yohova, tatooawandela ira tafuneela m’mwachela mutu odawa achinyuwiluo nom’sikimizela ira tanom’dhiveliwana. Vo-arela malangi-o a Paulo pingo watoothonyi-edha ira “wali ovwela va vyongo vyothene.” Angalive ira vavirile myedi yoyeva kumela vevo vakumi-wile liye pingoni, mutuo atoochinyuwa. Ee-no, kavalive mwasa odembuwela m’mweleli-edha pingoni. w24.08 17-18 ¶12-13

Ninokala muhora yeniyo inodedi-edhela i-yo ira vyongo vinodha chinja maningi. Vo-odembuwava Yesu unodha tonga atu othene anokala muilamboi. Liye atoonga vinofuna dhaireya dambo lotonga la-anafiye. Atoova-a anamafunjedhee “izindiyelo yokalavowee na yakhomoni wahora ino.” (Mat. 24:3) Ulosi wen’na, unofwanyeya va kapitulo 24 na 25 mu bukhu la Mateu, Marku 13 na Luka 21 Yesu atoonga vifwanafwani-o viraru vyokami-a thitho vyowenjeli-a: Vifwanafwani-ovi ndi yamabila na mbudi, yaanamwali owenjela na opupwa na matalento. Ifwanafwani-o iliyothene inonikami-a vwechecha mwemo vyoira vya mutu uliwethene vinofuna aliwa dhakuzela tongiwa unofuna liye dhawachela. w24.09 20 ¶1-2.

Yesu ndi ifwanafwani-o yapama maningi. Liye anooira vyongo namwasa om’dhiveliwana Babee na atu. Udhivela wen’na wanom’limbi-a ira alabenga basa mwathindhi, angalive ira laoneya ninga tonyozeya. (Mat. 20:28; Ju. 13:5, 14, 15) Abali akala nyo thitho munoira vyongo mwaudhivela, Yohova unodha uraeli-ani ira mukwakwaneli-edhe ifunelwinyu yauzimu yofuna kala rumiwi okami-a. (1 Pe. 5:5) Muilamboi atu anosilila atu anofuna kaana izo yavadhulu. Mbwenye vyevyo pyo-iyana maningi na vili mugulu la Yohova. Bali unoira vyongo mwaudhivela ninga Yesu, kanolavela limburo lavadhulu, kopolo venango izo. Namwasa oi mutu ninga wenuo akaana izo pingoni, kanarumelenga laba mabasa ooneya ninga onyozeya vokami-a atu a Yohova. unooda onanga ira mabasa ninga enao kai ofwanelela wa liye.—Ju. 10:12. w24.11 15 ¶6-7

Vailambo yothene vanofuneela abali oi talabe mu vizo vyo-iyana i-yana. (Aef. 4:8) Akala muli bali obadiziwa, n’nga “munooda kami-a” abali na arongolinyu? (San. 3:27) N’nga munodhilimbi-edha ira mukale rumiwi okami-a? N’nga munodhilimbi-edha ira mukale ndimuwa wavapingoni? N’nga munooda chinja vyongo vinango naifunelo yoi mudhowe mafunja xikola yaanamalaleya vya Umwene? Xikola yen’na, inooda ukami-ani ira Yesu au-indi-edheleni basa maningi. Akala munothuulela ira muli o-ofwanelela, munofwanela ulobelela mwasula wa Yohova. Mum’vepenga ira auva-eni zimu ochena ira mulabe basa iliyothene inava-iwe nyo. (Luk. 11:13) Vyairile Yesu vosakula “alombwana” enango ira talabenga mipingoni, ngu umboni oi unonisogolela malambo omari-ala. (Mat. 28:20) Ninosimba ira nitokaana Mwene waudhivela, ova-a thitho onithuulela. Mwenula utoniva-a atu ofwanelela ira tanikami-enga. w24.10 23 ¶16-17

N’nga a-vi vyongo vyothene vyevyo vinoiri-a ira atu a Nlungu tavwenga upa venango rucheya? Vachineneeva “vinodha diwaliwa thitho vinodha lokoteya ira [Nlungu] a-avioneve okhoka.” (Esa. 65:16) Yohova unodha kumi-avo nyarwa dhothene thitho vavira hora kaninodha thuulelave upa wavwa i-yo namwasa wa nyarwadho. Masiki va-eeni mirimi-u inokala malonimwee nafwanyeya vamigumanoni weo unodiwala i-yo nyarwa dhinogumanana i-yo muilamboi. Ninokami-a atu othene pingoni ira takalenga o-otekenyeya, nathonyi-edhanga makalelo ninga udhivela, imwerumweru, rendele, riya rima thitho kala opyaseya, enao ndi makalelo anokaana i-yo mokami-iwa na zimu wa Nlungu. (Agl. 5:22, 23) Ndingari ilukulu kala mugulu la Nlulngu. Atu othene anodhowanave kala mu paradaizo wauzimu, anodha ona kwakwaneli-edhiwa wa vyolanyedha vya Nlungu vyokuza “dhulu upya na ilambo yavathi ipya.” w24.04 22 ¶9-10

Ninga muonele i-yo, hora yeniyo atu inokala aliwa vaimweendi inooda kala yosangalali-a. Mbwenye wenjedhela vevo, ndi hora yofuneya maningi yoi inodha kami-a atu ona ira akala anodha thelana. Vadambo lothelana wiwa, atu othelanao anolumbela vamethoni va Yohova ira anodha dhivelangana thitho lemezana vaingumiiwa yothene. Na-analumbele vamwasa uliwethene, ninofwanela roma thuulela mopwaseya. Ndi saasawa thitho vamwasa olumbela vakazametoni. Kala vaimweendi unodha kami-a atu ambilao ira taidhiwane pama thitho tasakule vyongo mwazelu. Tanooda sakula thelana venango mali-a imweendiyo. Akala tatosakula mali-a imweendi, kavinothapulela ira imweendiyo chaakami-idhe. Malomwee, yatookwakwaneli-edha ifunelwiwa namwasa oi itowakami-a ira taidhiwe vyofwanelela sakula. Mbwenye mwasa okala vaimweendi ninofwanela uonanga mofwanelela. Mwasiwa ngwan’ni ninoonga ee-no? Akala mutu a-ali vabanjani utokaana mathuulelo ofwanelela, kanakale vaimweendi na mutu wenuo unom’mwidhiwelatu liye ira kanam’thelananee. w24.05 26-27 ¶3-4

Hora dhinango Makristau aazombwe anoova wandela atu enango vyongo vinororomela aliwa. Venango anooda ovanga atu salani mwiwa taroma onga ira vyongo vinango vyate chinja. Venango anooda ova namwasa oi purusoriwa unooda onganga ira vyongo vyate chinjadi. Akala muli anamabala munaire a-vi ira mukami-e mwaninyu ira a-aovenga wandela atu enango vyongo vinororomela liye? Musimikizele waninyu ira kanofwanela kaana manyadho namwasa oi unororomela ira vyongo vyate panduchiwa. Mwasiwa ngwan’ni ninoonga e-no? Namwasa vatokala masiyetista anjinji enao anororomela ira vyaingumi kavyate chinja. Vatokala umboni oi vatokala mutu mwinango wazelu wenuo apanduchile vyongo vyothene vyodabwi-a na vyopanduchiwa. Ee-no aliwa katinororomela ira vyaingumi vyate chinja. Mwaninyu unooda limbi-a iroromeloyee athuulela myasa yeniyo iiri-idhe abali naarongola enango roromela ira vyaingumi vyate panduchiwa. w24.12 18 ¶14-15

Yesu kaakaikela ira atu enango tanodha vuruwana milanyu yapama. Vyevi vyatom’kami-a ira asangalalenga na urumiwee. Mwaifwanafwani-o, komoni wa 30 K.A.B, Yesu anoona atu anjinji tavuruwananga milanyu yapama thitho atooafwanafwani-edhela na munda oi mbeudhe dhitomala warala. (Ju. 4:35) Vangavirile yawa imbo-i Yesu atoawandela anamafunjedhee ira: “Vatokala vyongo vinjinji vinofuna a-ndiwa.” (Mat. 9:37, 38) Va-anavire hora indendai atooweli-edha onga ira: “Vatokala vyongo vinjinji vinofuna a-ndiwa . . . mum’vephe mwinyaa munda ira atumize anamalaba o-anda.” (Luk. 10:2) Yesu kaa-iidhe roromela ira atu anovuruwana milanyu yapama thitho anoosangalala aliwa maningi. Yesu atoofunji-a anamafunjedhee ira taonenga milanyu yalaleela aliwa kala yofuneya. Vyevi vyatowalimbi-a ira tadhowenganave kaana thindhi. w25.03 18-19 ¶15-16

Yohova ndi limburo lotawelao. Molandana na lipandhe linavitalemo mutu vahora ya lipevo nlukulu, Yohova unonibarela vahora inogumanana i-yo nyarwa. Liye unonibarela ira nyarwadho dha-anonge uxamwali-u na liye. Unonilanyedha thitho ira unodha mali-a yongo iliyothene inonisukwali-a thitho nyarwa dhothene. (Zak. 34:25, 26) Ndhila imbo-i inadhowena i-yo wa Yohova ninga lipandhe li-u, ndi lobela wa liye. Nalobela, Yohova unoniva-a rendelee wenuo unobarela mathuulelo na rimi-u. (Afl. 4:6, 7) Yohova hora dhothene unokala okozeya nikami-a. Ninofwanela m’nyindelanga namwasa oi liye “ndi lipandhe lokalao dhowa nodhowa.” (Esa. 26:3, 4) Liye unodha kalavo hora dhothene ira akwakwaneli-edhe yolanyedhayee, wakula malobelwi-u thitho nikami-a. Ninooda m’nyindela Yohova namwasa oi liye unokala ororomeleya waatu ale anom’labela. (2 Sa. 22:26) Yohova kanodha diwala vinoira i-yo thitho unodha niva-a yotuva.—Aeb. 6:10; 11:6. w24.06 27 ¶4-6

Ninooda irana vyevi vorambela vyongo vinaniiri-e ira nikale o-ororomeleya vosangala na vyongo vyo-ofwanelela, vwelana naatu amakalelo othakala thitho dhiveliwana fuma, unoniiri-a ira na-am’lambelenga Nlungu na rimi-u wethene. Nazindiyela ira vatokala vyongo vinango vinaniiri-e ira udhiveli-u na Yohova urome yeva, ninofwanela iravo yongo mombaranya. (Mat. 5:29, 30) Kanirumeli-e ira rimi-u ukale ogawaneya. Ninooda dhinami-a noonanga ira ninoira vyongo vinjinji vom’labela Yohova voi kavali yongo inairi-e ira niire yongo yothakala. Mufwanafwani-edhe ira undhe utokala liphevo thitho tumbulu. Mwaira e-no nyo saka-edha pama m’mba mwinyu. N’nga muno-iya majanela odhulene ira tumbulu livolowenga m’mba mwinyumo? Kabe. Molandana na vyevyo, ninofwanela iranga vyongo vinjinji a-kala udya yodya yauzimu baa-i yeniyo inonikami-a ira nikale vauxamwali wapama na Yohova. Mbwenye ninofwanela thitho funga majanela, ninoonga e-no namwasa oi “tumbulu” lailamboi venango vyongo vinoidanana Nlungu vya-avolowe rimani mwi-u nonigawani-a.—Aef. 2:2. w24.07 21 ¶6-7

Onga mwaimbarimbari Yesu atooireliwa vyongo vyova-a manyadho thitho vyauwalanga maningi vyoi kaninaode vwechecha upha wavwa liye. Mbwenye liye kaagonjile namwasa wa vyo-olongomana vyaireliwa liye. Malo motembelela anyakondwao tam’komenle vaimirini yoonelavo nyarwa, liye atoolobela ira: “Baba, mwaalevelele namwasa oi katinoidhiwa vinoira aliwa.” (Luk. 23:34) Nalobelelanga atu anidawele, vinonikami-a ira ni-iye lokota vyarimani venango nyanyuwa. Thitho vinonikami-a ira naaonenga mofwanelela. Muilambo yothakalila, ninongo gumananave vyongo vyo-olongomana. Ee-no akala ninogumanana vyongo vyoi a-vi, dhoweni na-a-iyeni lobela wa Yohova ira anikami-e. nisazi-edhenga mwemo Yesu mwairele liye vyongo angaireliwile vyongo vyo-olongomana thitho nidhowenganave a-rela makundo a Bibilyani. Nairangana vyevi, Yohova unodha niraeli-a.—1 Pe. 3:8, 9. w24.11 6 ¶16; 7 ¶17, 19

Yohova Nlungu kanolema vyodawa. (Sal. 5:4-6) Liye unofuna ira nivwelenga makhundwee olongomana enao anofwanyeya Bibilyani. Pyaimbarimbari ira Yohova kanodedi-edhela ira atu o-olongomana tairengana vyongo mo-odawi-a yongo iliyothene. (Sal. 130:3, 4) Vahora imbo-ive yeniyo, liye kanolema ‘atu o-oova Nlungu enao anotukula riyawee rima ulukhulu kala mwasa oirelana kalelo lova-a manyadho.’ (Yud. 4) Thitho Bibilya linoonga vya “nongiwa waatu o-oova Nlungu” vakondwee ya Armagedo. (2 Pe. 3:7; Apk. 16:16) Mbwenye Yohova kanofuna ira mutu uliwethene adhanongiwe Bibilya linoonga movweya pama ira Nlungu “unofuna ira atu othene tachinyuwe.” (2 Pe. 3:9) Andimuwa avapingoni anom’sazi-edha Yohova takami-anga moleva rima atu enao airile yodawa ira tachinje ndhiladhiwa, nokala okoka vauxamwali na liye. w24.08 26 ¶1-2

Molandana na Yohova, i-yo thitho ninooda ava-a atu enango vyongo namwasa owadhiveliwana. Mwaifwanafwani-o, n’nga mutom’muidhiwa Kristau mwinango wenuo unofuneela vyodya venango vyowara? Yohova unooda u-indi-edhani basa ira mum’kami-e fwanya vyongo vyofuneeleya. Atu a Yohova anoidhiweyana ira anokami-ana vaireya masoka avilengo. Mwaifwanafwani-o, vahora ya sau wa COVID-19, abali naarongola tanoovelela vyodya vyowara na vyongo vinango waatu enao tarucheya. Thitho atu anjinji tanoovelela kobiri dhokami-ana vabasa yavailambo yothene. Vyevi vyatookami-a ira gulu livelelenga kami-o vailambo yothene. Abali naarongola tatooira vyongo movwelana na lemba la Aebere 13:16 lelo linoonga ira: “Kamudiwale irana vyongo vyapama nogawela atu enango vyongo vinanyo, namwasa oi Nlungu unosangalala na sembe dhoi e-no.” w24.09 27 ¶6-7

Kathuulelani ifwanafwani-o ila. Munosakasaka basa linaukami-eni ira musamalelenga pama banja linyu. Mbwenye vatofwanyeya mabasa menli. Munothuulela makhundo othene ninga tundu wabasa, hora inalabenga nyo thitho lapela wa ulendo na vyongo vinango. Mbwenye nyo munodhiveliwana basa imbo-i namwasa oi ulendwee ngoyeva thitho mwemo munapagaleliwenga nyo. Angalive ira vili e-no vatokala makhundo enango anofwanela nyo athuulela mwa-ana sakule vyoira. Mwaifwanafwani-o, n’nga munodha labanga basalo fiyedha hora yamigumano? N’nga linodha umalelani mahora anofuna nyo waredhanga na banja linyu thitho lilimbi-a ira likale vauxamwali wapama na Yohova? Idhiwa vyofuka vyevi unodha ukami-ani ira “vyongo vyevi ndi vyofuneya maningi,” thitho ndi vyokuza lambela winyu nosamalela banja linyu kwaranya kaana kobiri dhinjinji. Mwaira ee-no munodha sakula vyoira vinairi-e ira Yohova auraeli-engani. w25.01 17 ¶11-13

Masiki atu enango tauwirelengani vyongo vyo-olongomana, kamukaikelenga ira Yohova unoudhiveliwanani thitho unouonani ira muli apereso yavadhulu. Akala “munodhivwela tangaranga rimani mwinyu,” muthuulelenga ira Yohova atoona vyongo vyapama rimani mwinyu thitho atoouitanelani wa liye. (Ju. 6:44) Hora dhothene Yohova ngokozeya ukami-ani namwasa oi unoudhiveliwanani maningi. Ifwanafwani-o ya Yesu, inonikami-a idhiwa moda munodhivwela Yohova. Angali vailambo yavathila, Yesu anooriyela atu rima thitho avwela tangaranga atu enao taoneya ninga mbo-ofuneya. (Mat. 9:9-12) Mwaifwanafwani-o, m’ma mwinango abulela marenda malukulu anga-indile yowarayee vom’roromela ira unoila, Yesu atoom’limbi-a nom’simba namwasa wa iroromeloyee. (Mrk. 5:25-34) Yesu atootukulela makalelo a Babee. (Ju. 14:9) Ee-no kamukaikelenga, Yohova unouonani ira muli apereso yavadhulu. Thitho unoona makalelwinyu apama thangani-avo iroromelo, na udhivela unanyo wa liye. w24.10 7 ¶4-5

Vaingumiye, Davide atoogumanana nyarwa dho-iyana i-yana dhedho dhamuiri-idhe ira alenga. Atu enango tanom’mwidanane thitho atu enango aaroromela liye tatom’sukwali-a. (1 Sa. 19:10, 11; 2 Sa. 15:10-14, 30) Vahora inango liye alembile ira: “Nditofooka namwasa orucheya wa ingumi yanga. Ma-iyu othene ndinonyeti-a kamanga na mi-odi, ndinola thitho mi-odi inodhala vakamani vanga.” (Sal. 6:6) Angalive ira Davide anoogumanana nyarwa dhinjinji, kaakaikela ira Yohova unom’dhiveliwana. Liye alembile ira: “Namwasa oi Yohova unodha uvwa madhu ola wanga.” (Sal. 6:8) Madhu alemba la dambo la penene, anothonyi-edha pama moda munonidhiveliwana Yohova. Davide avivwa ninga Yohova unaalokhota mi-odee mubudu la tembe venango unailemba bukhuni. Davide kaakaikela ira Yohova unoona thitho thuulela nyarwadhee. Anororomela ira Babee waudhivela unoidhiwa vyongo vinogumanana liye thitho mwemo munom’khuzela aliwa. w24.12 22 ¶11-12