Julho

Arumiwi enango a Yohova anorucheya namwasa wa marenda, ulula venango nyarwa dhinango dhokuza manungwiwa. Vyevi vinooda airi-a ira takaikelenga akala Yohova unowaonave ira mbapereso yavadhulu. Anooda dhifukanga ira, ‘N’nga Yohova unondionave ira ndili ofuneya?’ Mulimbo lemba Salimo 71 anookaikela akala Yohova anoom’mona ira ngofuneya. Liye atoolobela ira: “Kamundi-iye vahora ya-anokaana miyo kopolo.” (Sal. 71:9, 18) Mbwenye liye kaakaikela ira adhowanave m’lambela Nlungu mororomeleya, Yohova unodha m’sogolela thitho m’kami-a. Mulimbo lemba Salimula, atoozindiyela ira Yohova unosangalala naatu enao anodhowanave m’labela angalive ira katinooda irana vyongo vinjinji. (Sal. 37:23-25) Akala muli oulula, munofwanela thuulelanga mwemo Yohova munouonelani liye. Angalive ira kopolo dhinyu toyeva, liye unodha ukami-ani ira mukaena kopolo mwauzimu. (Sal. 92:12-15) Malo mothuulelanga vyongo vya-anaode nyo irana, muthuulelanga vyongo vinaode nyo irana. w24.10 28 ¶14-16

Kristau o-olimba mwauzimu, unorucheya vaireya yongo yofuneya thuulela makhundo a Bibilyani nowa-arela. Atu enango anothuulela ira akala kavali lamulo la Bibilyani vamwasa unangwee, pyoi anooda irana yongo iliyothene inofuna aliwa. Atu enango anofuna ira tairenga va-iwa malamulo vamwasa oi kavali lamulo. Mofwanafwani-a, vinooneya ira Makristau awu Koritiyo tafuna ira rumiwi Paulo aava-e malamulo vamwasa wa yodya yaveleliwa wu mafano. Malo moawandela vyoira, Paulo atoawandela ira mutu oliwethene utokaana “ufulu osakula” movwelana na ithuulela rimee. Liye atootapanya naaliwa likhundo lelo laakami-e ira ithuulela rima ya mutu uliwethene ya-am’ruchi-enga thitho ya-asukwali-enga atu enango. (1 Ak. 8:7-9) Voi ee-no Paulo atoowakami-a Makristau awu Koritiyo ira taulukule mwauzimu, naifunelo yoi ta-indi-edhenga basa dodoliso liwa lothuulela, malo monyindelanga atu enango venango funanga ira vamwasa uliwethene vakale lamulo. w24.04 5 ¶14

Muhora ya Yona, atu awu Ninive tatookana ngari yochinyuwa. Thitho muthuulelenga vyongo vyaongile Yesu vyokuza atu “anofuna dhavenyathi-iwa ira tatongiwe.” Anodha thangani-avo atu “ anoira vyongo vyothakala.” (Ju. 5:29) Ee-no vinooneya ira atu enango awu Sodoma na Gomora anodha venyathi-iwa. Vinooneya ira enango mwaatwao anodha venyathi-iwa thitho ninodha kaana ngari yowafunji-a vya Yohova na vya Yesu Kristu. Hora dhothene Yohova, “unosakasaka rima thitho unosakasaka mathuulelo amwari mwarima mwamutu.” Ee-no vamwasa ovenyathi-iwa waatu okwa, Yohova “unodha irela mutu uliwethene movwelana na vyoiravyee.” Unodha ira vyongo mwakopolo thitho mwatangaranga akala pyofuneeleya. Ee-no kanimbaranyedhelenga thuulela ira ngana kanave idedi-edho yodhavenyathi-iwa. Kumi-avo akala nitosikimizela ira Bibilya linoonga vyevyo. w24.05 5-6 ¶15-16

Romela walelene, madhu a Nlungu takadhi talimbi-anga arumiwee ira taode laba basa yorucha. Ifwanafwani-o vamwasula nja namaongela Jeremiya. Liye anoova maningi Nlungu angam’rumile ira amalaleele. Jeremiya aongile ira: “Miyo kandinooda onga namwasa oi ndili mwana.” (Jer. 1:6) N’nga chini yairile liye ira a-iye dhikaikela? Atoofwanya kopolo dhela m’madhu a Nlungu. Liye aongile ira: “Madhwee ali ninga mulo o-inda wenuo ufungeliwile makuvani mwanga, thitho ndatoochenyela nodhikondi-a ira nda-aonge.” (Jer. 20:8, 9) Angalive ira Jeremiya anoolaleela mumatatamo orucha, milanyu yalaleela liye yatom’va-a kopolo ira aode laba basiyo. Makristau anofwanya kopolo kumela m’madhu a Nlungu. Rumiwi Paulo atoonga ira idhiwa vyongo molinyali, unooda limbi-a abalao ira “takaena makalelo ovwelana na vinofuna Yohova,” thitho ira tadhowenave “va-a vyova-a vya basa iliyothene yapama.”—Ako 1: 9, 10. w24.04 14-15 ¶2-4

Zadoki atookalave ororomeleya wa Yohova angalive ira ndimuwa wa alimbo velela sembe Abiyatari atooirana vyongo mo-ororomeleya. Davide kaa-iidhe m’roromela Zadoki. Masaka-edho airile Adoniya oi am’mwaki-e babee umwene tangaidhiweile, Davide atom’sakula Zadoki, Natani na Benai ira tamam’zoze Solomu ira akale mwene. (1 Ma. 1:32-34) Kala vari vaarumiwi a Yohova ororomelaya ninga Natani na enango enao tali uikundu ya Davide, vinooneya ira vyatom’limbi-a maningi Zadoki. Solomu anga-eliwile kala mwene, atoom’sakula “mulimbo velela sembe Zadoki ira avolowele limburo la Abiyatari.” (1 Ma. 2:35) N’nga ninam’sazi-edhe a-vi Zadoki? Akala mutu unom’dhiveliwana nyo uto-iya m’lambela Yohova, nyo muthonyi-edhenga ira munofuna kalave ororomeleya. (Yos. 24:15) Yohova unodha uva-ani kopolo thitho ulimbi-ani. Mum’nyindelenga volobela wa liye thitho mudhowenganave kala vauxamwali olimba na Makristau afwinyu mororomeleya. Yohova unoona roromeleya winyu thitho unodha uva-ani yotuva.—2 Sa. 22:26. w24.07 6-7 ¶16-17

Lemba la Salimo 15:2, linoonga ira fwee wa Nlungu unofwanela “wenda mo-odawi-a vyongo, thitho airenga vyongo vyapama.” Madhu oi “wenda” thitho “irana” anothapulela irana vyongo vinangovyee mo-o-iyedhela. N’nga pyoodeya ‘wenda mo-odawi-a vyongo’? Ee. Imbarimbari choi, kavali mutu olongomana, mbwenye Yohova unoniona ira nili atu “o-odawi-a vyongo” akala ninovilimbi-edha m’vwela. Nadhivelela nobadiziwa, ninokala ira nitoroma wenda na Nlungu. Kathuulelani ira walelene, kala Muisraeli kwaairi-a ira mutu akale lendo wa Yohova. Vatookala atu enango enao ta-aira vyongo “kumela vathi varima thitho kataira vyongo vyofwanelela.” (Esa. 48:1) Muisraeli ororomeleya anoofuneela funjedha malamulo a Yohova nowa-arelanga. Malamboano thitho ira Nlungu asangalalenga na i-yo, vanofuneela vyongo vinjinji kwaranya badiziwa nogumanyeyanga na pingo. Ninofuneela dhowanave “irana vyongo vyapama.” w24.06 9 ¶4; 10 ¶6

N’nga Yohova athonyi-edhe mundila dhivi ira ngova-a? Dhoweni nitapanyeni myasa mingasi. Yohova unoniva-a vyongo vyofuneeleya vaingumii-u. Pyaimbarimbari ira kaninakaena vyongo vyothene vinofuna i-yo. Mbwenye Yohova unoniva-a vyongo vyofuneeleya vaingumii-u. Mwaifwanafwani-o, unoniva-a vyodya, vyowara na vogona. (Sal. 4:8; Mat. 6:31-33; 1 Ti. 6:6-8) N’nga Yohova unaaniva-a baa-i vyongo vyofuneya namwasa oi chiizoyee? Kabe. Kathuulelani madhu aongile Yesu anofwanyeya valemba la Mateu 6:25, 26. Yesu atoofunji-a vo-indi-edha basa vyopanduchiwa. Voonga vya mbalame Yesu aongile ira: “Aliwa kadhinodhala mbeu venango a-nda venango thitho lokota vyodya mathathani.” Adhamale atoonga okoka ira: “Mbwenye Babinyu wadhulu unodhidyi-a.” Voi e-no atoofuka ira: “N’nga nyo kamuli apareso yavadhulu kwaranya mbalamedho?” Akala Yohova unosamalela vinyama, kaninofwanela kaikelanga ira unodha nikami-a fwanya vyongo vyofuneya. Liye uli ninga baba waudhivela wenuo unodhilimbi-edha fwanyela banjalee vyongo vyofuneeleya namwasa waudhivela.—Sal. 145:16; Mat. 6:32. w24.09 26-27 ¶4-6

Rumiwi okami-a unokala bali obadiziwa unosakuliwa na andimuwa ira akami-enga mabasa enango pingoni. Arumiwi okami-a hora dhinjinji anolaba mabasa ninga enala, yoroma anofwanela kala atu anom’dhiveliwa Yohova thitho a-rela makhundwee olongomana. Aliwa anofwanela dhiveliwangana maningi abali na arongoliwa. (Mat. 22:37-39) N’nga bali obadiziwa unaire a-vi ira akale rumiwi okami-a? Bibilya linoonga makalelo anofwanela nyo kaana ira mukale rumiwi okami-a. (1 Ti. 3:8-10, 12) Ira mukale rumiwi okami-a, munofwanela funjedha makalelo enala nodhilimbi-edhanga athonyi-edha. Yoroma, munofwanela sakasaka yongo inouiri-ani funanga kala rumiwi okami-a. w24.11 15 ¶4-5

Atu enango anoonga ira atolerivo Bibilya fendo dhinjinjidhene. N’nga anororomela vinoonga aliwa? N’nga ano-indi-edha basa vinoleri aliwavyo norumeli-a ira vichinje ingumiiwa? Pyovwi-a tangaranga ira katinoirana vyevyo. Vyevi pyo-iyana maningi na vinoira atu a Yohova. Thitho ninodhilimbi-edha a-rela malangi-o a Yohova vaingumii-u. Kai vyokweya hora dhothene leringa Bibilya thitho indi-edhanga basa vyongo vinoleri i-yo mumadhu a Nlungu. Hora dhinango vinooda niruchanga ira nikaena hora yoleri. Akala kai ee-no ninooda leringa mombaranyi-a maningi noimwanananga kaana hora yothuulela vyongo vilerile i-yovyo. Venango munooda sukwala mwathuulela injiva wa vyongo vinofwanela nyo chinja. Akala munolimbanana yorucha yoi a-vi, idhiwani ira munooda imali-a. Yohova unoukami-ani. Ee-no dhoweni nikale ninga atu anoirana vinoonga madhu a Nlungu. Pyo-oira fuka ira naleringa thitho indi-edha basa madhu a Nlungu vaingumii-u, paevo vanakalenga i-yo osangalala maningi.—Yak. 1:25. w24.09 7 ¶15-16

Yohova uno-indi-edha basa zimwee ochena, vyongo vyothakala vyaniireela. Akala nyo thitho munolimbanana vyowesedha viiri-idhe ira muthweye rima, mum’mwandelenga Yohova mwemo munodhivwela nyo. Muirengana vyevi hora dhothene thitho wahora yolapela inofuna nyo. (Sal. 86:3; 88:1) Mum’vepenga Yohova moweli-edha weli-edha ira auva-eni zimwee ochena thitho hora dhothene unodha ukami-ani. N’nga mutofooka namwasa wa vyongo vinango vyothakala viuwireeleni? Zimu ochena unodha uva-ani kopolo ira mudhowenave m’labela Yohova mororomeleya. (Aef. 3:16) N’nga munaire a-vi ira muirenga vyongo movwelana na lobelo linyu lovepa zimu ochena? Muirenga vyongo vinairi-e ira zimu ochena wuukami-engani. Vyongo vyevi vinothangani-avo fwanyeya vamigumanoni nolaleela. Muleringa Bibilya dambo nlilothene ira muwendelenga mathuulelo a Yohova. (Afl. 4:8, 9) Mwaleringa, muonenga atu alembiwile Bibilyani enao aguman’nenavo vyorucha vyo-iyana i-yana thitho muthuulelenga mwemo Yohova mwaakami-edhele liye vilela. w24.10 9 ¶12-14

Mofwanafwana na Yohova na Mwanee, na-iyene thitho ninodhiveliwana atu. (San. 8:31) Ninoavwela tangaranga atu oi “katinom’mwidhiwa Nlungu” naatu oi “katina idedi-edho.” (Aef. 2:12) Aliwa anogumanana nyarwa dhinjinji thitho anodhivwa ninga ali lindini modi-a. Mbwenye milanyu yapama inolaleela i-yo ili ninga go-i wenuo unaaponyedhele i-yo ira naakumi-emo lindinimo, yeniyo ndi milanyu yapama ya Umwene wa Nlungu. Namwasa oi ninowadhiveliwana thitho avwela tangaranga, ninovilimbi-edha ira taidhiwe milanyu yapama. Milanyu ila inowava-a idedi-edho, inowakami-a ira takaena ingumi yapama va-eeni thitho inowava-a idedi-edho yodhawachela “ingumi yaimbarimbari,” yeniyo ndi ingumi yo-omala muilambo ipya ya Nlungu. (1 Ti. 6: 19) Dhiveliwana atu unoniiri-a ira naawenjeli-enga ira komoni wailambo yothakalila uli duzi. (Zak. 33:7, 8) Ninofuna ira aliwa taidhiwe vinofuna dhaireya vahora yotongiwa, vevo mareligiau othene onama anodha kumi-iwavo thitho maguverno othene anodha nongiwa va kondo ya Arumagedo.— Apk. 16:14, 16; 17:16, 17; 19:11, 19, 20. w24.05 16-17 ¶8-9

Rumiwi Paulo atoolimbi-a Makristau ira “ta-iyedhele mburo nyanyuwa wa Nlungu.” Nino-iyedhela mburo nyanyuwa wa Nlungu, narumela ira Yohova aire longomano vahora thitho mundhila yeniyo inoona liye ira njofwanelela. Bali mwinango dhinalee Juwau angaireliwile vyongo vyo-olongomana aongile ira: “Ndanoolimbanana rima ofuna ira ndisaka-edhe vyongo vandekhene. Mbwenye lemba la Aroma 12:19, latoondikami-a ira ndidedi-edhelenga Yohova.” Vyongo vinoniwendela pama nadedi-edhelanga Yohova ira asaka-edhe vyongo. Naira e-no, ninokala ninga nitorula tolo ofuna wesedha saka-edha vyongo okhene. Yohova ngokozeya nikami-a. Vinokala ninga unoonga ira, ‘Ndi-iyedheleni vyongo vyo-olongomanavyo. Ndinovimali-a.’ Navwelanga vyolanyedhayee vyoi “miyo ndinodha aweli-edha,” nino-iya mwasuo mandhanimwee thitho ninororomela ira unodha umali-a mundhila yapama maningi. w24.11 6 ¶14-15

Ninofwanela samala ira na-aonenga vyongo vyevi ninga vyofuneya maningi vaingumii-u. Paulo atoonga thitho pama likhundo leli vevo valembela liye Makristau a Iyuda. Liye atoonga vyongo vyaireele Aisraeli thangani-avo vyaireile vaduzi na mwango wa Sinai. Atoowenjeli-a Makristawao ira “katifunenga vyongo vyothakala ninga mwemo [Aisraeli] mwairela aliwa.” (1 Akor. 10:6, 7, 11) Aisraeli tatoorumela ira idyani yiwa yofuna vyodya iiri-e ira vyongo vyaava-a Yohova modabwi-a kala “vyongo vyothakala.” (Num. 11:4-6, 31-34) Thitho valambela aliwa mwana ng’ombe tatoothonyi-edha ira yongo yofuneya maningi waaliwa ndi udya, umwa nosangalala. (Eki. 32:4-6) Paulo atoonga vyevi vevo vawenjeli-a liye Aisraeli enao tadedi-edhela nongiwa wa Yerusalemu mu yawa ya 70 K.A.B. Na i-yene thitho ninokala muhora ya khomoni, ee-no ninooda ira pama thuulelanga malangi-o a Paulwala. w24.12 6 ¶13

Yohova ngu “Nlungu waimwerumweru,” liye unofuna ira na-iyene thitho nisangalalenga. (1 Ti. 1:11) Yohova utoniva-a vyotuva vinjinji vyonikami-a ira nisangalalenga. (Yak. 1:17) Imbo-i mwa vyotuva vyevi ndi banja. Lombwana na i-yana tathelana anolanyedhana ira anongodhivelana, lemezana nosamalelana. Aliwa tavwelananga anokala osangalala maningi. Mbwenye atu anjinji anodiwala vyongo vyalanyedhilena aliwa va dambo lakazamento. Vyo-arelavovyee pyoi katinokala osangalala. N’nga Yohova unodedi-edhela ira alombwana taasamalelenga a-vi a-iyaniwa? Yohova unowandela alombwana ira taalemezenga a-iyaniwa. Lemezo linothapulela mwemo munoirela i-yo vyongo na mutu unom’lemezecha i-yo. Lombwana unolemeza i-yanee unom’mwirela vyongo moriya rima thitho mwaudhivela.—1 Pe. 3:7. w25.01 8 ¶1-2; 9 ¶4-5

Kaninokaikela ira karta lalembile rumiwi Paulo lembela Makristau Aiebere, latookami-a Makristawao kozeela nyarwa yafuna udha. Paulo atoolimbi-a abaleao ira anofwanela funjedha malemba modi-a nowavwechecha. Irana vyevi ungaakami-idhe ira tazindiyele thitho rambela makhundo enao tadodomi-e iroromelo iwa. Atowalimbi-a thitho ira anofwanela limbi-a iroromelo iwa ira tadha a-relenga malangi-o a Yesu naatu anosogolela pingo. Liye atowakami-a Makristawao ira takaena mathuulelo ofwanelela vamwasa wa vyowesedha naifunelo yoi taonenga vyowesedhavyo ninga dhila inowafunji-edhelana Babiwa waudhivela. Dhoweni na-iyene thitho ni-arelenga malangi-o ovudheleliwala. Naira ee-no ninodha vilela fiyedha komoni.—Aeb. 3:14. w24.09 13 ¶17, 19

Movwelana na vinoonga Bibilya, kuto ndi yopagali iveleliwile vofuna kunela vyodawa thitho vwelani-a atu na Yohova. Yohova unoona ira kuto ngwakami-idhe weleli-edha vyaluzeile. Kathuulelani ira Adamu na Eva tatooluza ingumi yolongomana na ngari yokaana ingumi yo-omala. Ee-no kuto watoofwanela kala yopagali yofwanafwana na vyongo vyaluzeilevyo. (1 Ti. 2:6) Wafwanela veleliwa na ndimuwa wenuo (1) ali olongomana, (2) atokaana ngari yoi angaodile kaana ingumi vailambo yavathila modhowa nodhowa thitho (3) ali ofunechecha velela ingumiyee ninga sembe. Dhoweni nitapanyeni myasa miraru inoiri-a Yesu kala ofwanelela velela kuto. (1) Liye ali olongomana thitho “kaairile yodawa.” (1 Pe. 2:22) (2) Namwasa wa vyevi, liye angaodile kaana ingumi yokalao dhowa nodhowa vailambo yavathila. (3) Liye anoofunechecha wukwa novelela ingumiyee namwasa wa i-yo.—Aeb. 10:9. w25.02 4-5 ¶11-12

Kamukaikelenga ira Yohova unoudhiveliwanani thitho unofuna ira mukale mubanjalee. Vili ee-no akala ira munogumanana nyarwa ndhinauimwanani-eni badiziwa. Vahora inango Yesu atoowandela gurupu la anamafunjedhee ira: “Pyaimbarimbari ndinouwandelani ira mwakaana iroromelo yofwanafwana noyeva wa mbeu ya mostarda, monodha wandela mwangula ira “kumavo vano udhowe vale,” thitho unodha kumavodi. Kavali inofuna dhakala yorucha wanyo. (Mat. 17:20) Atu tavwide vyevi tali vambo-i na Yesu wavyawa vyoyeva baa-i, ee-no iroromelo iwa yali iulukulangave. Yesu atowasikimizela ira akala tanokaana iroromelo yokwakwanela, Yohova unodha akami-a limbanana vyorucha vinokala ninga myango. Thitho Yohova unodha ukami-ani irana vyongo vyevi. Akala mutozindiyela ira vatokala vyorucha vinango vinouimwanani-ani badiziwa, mudhilimbi-edhe vimali-a mombaranya. Mudhivelele wa Yohova thitho badiziwa. Mwairana vyevi munodha kala ira mutosakula vyongo vyapama maningi! w25.03 7 ¶18-20

I-yo thitho ninooda vilela vyowesedha akala ninothuulela ira Nlungu waingumi ngokozeya nikami-a. Ninooda roromelanga maningi vyevi nathuulela vyongo viirile Yohova ndulimu. (Esa. 37:17, 33-37) Muleringa thitho onela malipoti ava jw.org, othonyi-edha mwemo Yohova munokami-edhela liye abali naarongoli-u malamboano. Wenjedhela vevo, muthuulelenga thitho mwemo muukami-edheleni liye. Kavali yorucha akala kamunaonge nyarwa dhilukulu. Ninoonga ee-no namwasa oi Yohova ukadhi auirelangani vyongo vinjinji vaingumiinyu. Atouwitanani ira mukale vauxamwali na liye. (Ju. 6:44) Ee-no munooda ira pama m’vepa ira authuucheni vahora yawakunle liye malobelwinyu, ukami-ani vahora yofwanelela nousamalelani vahora yorucha. Thuulela vyongo vyevi, unooda ukami-ani ira muroromelenga maningi ira Yohova unodha dhowanave ukami-ani. w24.06 21 ¶8

Ninofunechecha ira na-aire yongo iliyothene inam’sukwali-e Yohova. Mbwenye namwasa oi kanili atu olongomana, ninooda wesedhiwa ira niirena vyongo vyothakala. (Aro. 7:21-23) Mo-odedi-edhela ninooda roma onanga vyongo vyothaka ninga vyongo vyapama. Ira nikaleve ororomeleya wa Yohova na Yesu, ninofwanela a-relanga malangi-o a Yesu oi nikale methove. I-yo othene ninowesedhiwa ira niirena vyongo vyothakala. Mbwenye mutu uliwethene utokaana vyofookavyee vyevyo vinairi-e ira aire vyodawa vilukulu, arome kaana makalelo othakala venango amangeye na go-i oromanga thuulela ninga moda unothuulela atu ailamboi. Venango unooda roma kaana naluveluve wakopolo ofunanga irana vyongo vyothakala ninga waredhi-a umandhave, onela vyongo vyaumandhave na vyongo vinango. Voi vahora yeniyo mutu mwinango unolimbanana nyarwa yoova atu, funanga wendela mathuulelwee baa-i, nyanyuwa mombaranya na vyongo vinango. w24.07 14 ¶3; 15 ¶5

Kathuulelani vyaireye aakale ira andimuwa avapingoni, tatookonda m’mwachela mutu ochinyuuo venango aakale ira vyawelenle liye pingoni Makristau afwee tatookonda m’thonyi-edha udhivela. Angakanle “watangaranga maningi mokwaranyi-a madile.” Thitho adhivwenga ira kaaode m’labela okoka Yohova. Vingam’ruchile ira adhowenave saka-edha uxamwalee na Nlungu. Yoophi-a maningi choi aakale ira abali naarongolao tatookonda m’levelela mutu ochinyuuo, tangadodomi-idhe uxamwaliwa na Yohova. Mwasiwa ngwan’ni ninoonga e-no? Namwasa oi, malo mom’sazi-edha Yohova unolevelela atu odawa anochinyuwa, tangam’sazi-edhenga Satana wenuo uli o-okhaana tangaranga thitho wauwalanga. Aliwa tangakanle ninga mafwaramento enao Namanami-a anoa-indi-edhela liye basa vofuna m’mwimwanani-a mutuo ira a-arome m’labela Yohova.—2 Ak. 2:10, 11; Aef. 4:27. w24.08 17 ¶7, 10-11

Yesu Kristu atoovelela andimuwa avapingoni enango ninga “yotuva” ira takami-enga mipingo mundhila inango. Mosogoleliwa na Yesu, andimuwa enango awu Yerusalemu tatoom’ruma Paulo, Baranaba na enango ninga anamaing’anela owendawenda. (May. 11:22) Tatoirana vyevi ira talimbi-enga mipingo ninga mwemo andimuwa avapingoni naarumiwi okami-a munoirela aliwa. (May. 15:40, 41) Hora dhinjinji anamaing’anela visa anokala tawendanga. Enango anowenda makilometro manjinji ira tamafiye wu mipingo inango. Sumana nlilothene namaing’anela isa unoonga myasa thitho unoira ulendo wa ubusa. Unoiri-a gumano waapainiya, waandimuwa avapingoni thitho gumano okozeela urumiwi. Unokami-ana naandimuwa avapingoni kozeela migumano yavakundu na yagawo thitho onga myasa vagumanuo. Anofunji-a xikola yaapainiya, nosaka-edha gumano wavakundu waapainiya aisa yiwa. Thitho hora dhinjinji anolaba mabasa avephiwile aliwa na ofesi ya tambi ira talabe. w24.10 21 ¶12-13

Rumiwi Jeremiya atoonga vyokhuza Yohova ninga munoongela madhu alemba la dambo lapenene. Rumiwi Paulo atoonga thitho vyolandana na vyevi vevo valembile liye ira: “Kandinodha thuulelave madawiwa.” (Aeb. 8:12) N’nga madhu enala anothapulelan’ni? Bibilyani madhu oi “thuulela,” kavinothapulela thuulela vyongo vyaireile baa-i. Mbwenye anothapulela irana vyongo vinango. Mofwanafwani-a, lipanga lathomeiwile vaduzi na Yesu latom’vepa ira: “Yesu, mumandithuulele mwadhavolowa mu Umweninyu.” (Luk. 23:42, 43) Liye kam’vepile Yesu ira am’thuulele vahora yeniyo. Mbwenye yowakula ya Yesu inothonyi-edha ira liye unodha iravo yongo vom’venyathi-a mutuo. Ee-no Yohova aniwandela ira kanothuulela madawi-u, vinothapulela ira kanodha niomba landu namwasa wa madawao. Thitho sogolou kanodha nilanga namwasa wa madawo anilevelele liye. w25.02 10-11 ¶14-15

Yoroma ninofwanela m’mwidhiwa pama Yohova. Ee-no ira mutu akale ovwechecha vyongo, unofwanela idhiwa pama makalelo a Yohova, ifunelwee thitho vyongo vinodhiveliwana liye na vyongo vinoidanana liye. Mudhifuke ira, ‘movwelana na vyongo vinoidhiwa miyo vyokuza Yohova, n’nga ndinasakule irana vyongo viivi vinam’sangalali-e?’ (Aef. 5:17) Ira nim’sangalali-e Yohova, hora dhinango ninofwanela sakula vyongo vinasukwali-e atu anowadhiveliwana i-yo. Mwaifwanafwani-o, anamabala anooda limbi-a mwaniwa ira atheliwe na lombwana okaana venango unoona aliwa ira unooda ava-a kobiri dhinjinji angalive ira lombwanuo kali vauxamwali wapama na Yohova. Pyaimbarimbari ira aliwa anofuna ira mwaniwa asamaleliwenga pama. N’nga mbaani unam’kami-e limbi-a uxamwalee na Yohova? N’nga Yohova unoona a-vi mwasula? Ninooda fwanya yowakula yei va lemba la Mateu 6:33. Va lembali, Makristau anolimbi-iwa ira “ta-elenga Umwene valimburo loroma vaingumiiwa.” Angalive ninolemeza anamabali-u, naatu atatamo li-u, yofuneya maningi wa i-yo kum’sangalali-a Yohova. w25.01 17 ¶9-10

Malamboano ninofuneela thitho Yohova ira anikami-e laleela mwathindhi angalive ira ninooni-iwa nyarwa. (Apk. 12:17) Mwasiwa ngwan’ni kaninofwanela kaikelanga ira Yohova unodha nikami-a? Kathuulelani lobelo la Yesu lelo linofwanyeya va lemba la Juwau kapitulo 17. Yesu atoovepha Yohova ira aing’anelenga arumiwee. Thitho Yohova atoowakhula lobelolo. Bukhu la Mayirelo linoonga mwemo Yohova munokami-edhela liye arumiwee ira talaleelenga mwathindhi masiki vahora inooni-iwa aliwa nyarwa. Mulobelolee, Yesu atoovepha Yohova ira: “Aing’anelenga atu enao anovuruwana milanyu inolaleela arumiwi. atu enala anothangani-avo nyo. Yohova ka-iidhe wakula lobelo la Yesu. Liye unodha ukami-ani ninga mwakami-edhele liye arumiwee. (Ju. 17:11, 15, 20) Vevo komoni vanowandamela aliwa, hora dhinango vinooda kala vyorucha laleela mwathindhi milanyu yapama. Angalive ira vinodha kala ee-no, ninodha fwanya kami-o linofuneela i-yo.—Luk. 21:12-15. w25.03 18 ¶13-14

Atu a Nlungu “anokuwa mosangalala” namwasa osimba vyongo vinowairela Yohova. Ninokaana “imwerumweru yarimani” namwasa wa makhundo olimbi-a iroromelo, vyolanyedha vyofwanyeya m’madhu a Nlungu na idedi-edho inoodeya namwasa wa sembe ya Kristu. Natapanyanga vyongo vyevi vinoniiri-a kala osangalala maningi! (Sal. 34:8; 133:1-3) Udhivela ndi vwelano wavari vaatu a Yohova namakalelo malukulu enao anofwanyeya mu Paradaizo wauzimu. “Vwelano wen’na” unothonyi-edha mwemo ingumi munofuna aliwa dhakalela muilambo ipya, vevo arumiwi a Yohova vanofuna aliwa dhadhivelananga maningi thitho vwelana kwaranya va-eeni. (Ako. 3:14) Mutu uliwethene unofuna kala osangalala na okwakwanana vyongo vina liye, unofwanela volowa paradaizoni wauzimula. Akala atu anothuulela vyongo vyoi a-vi vyokuza Amboni dha Yohova, aliwa tatokaana limbili lapama wa Yohovuo thitho waatu othene anom’lambela.—Esa. 65:15. w24.04 21 ¶7-8

N’nga i-yo othene pingoni ninakami-e a-vi Makristau anofuna kala vabanjani? Ndhila imbo-i inaakami-edhelena i-yo ndikala osamala na vyongo vinoonga i-yo. (Aef. 4:29) Ninooda dhifuka ira: ‘N’nga ndinodhiveliwechana singilila atu ta-ali vabanjani? N’nga ndaona bali na rongola enao ta-ali vabanjani tawaredhanga, ndinombaranyedhecha thuulela ira anaafunana?’ (1 Ti. 5:13) Wenjedhela vevo kai pama iri-anga Makristau enango thuulelanga ira mbo-alela namwasa oi katili vabanjani. Ninoira pama fwanya hora yoi nisimbenga Makristau enao ta-ali vabanjani! N’nga munaire a-vi akala munoona ira vingakanle pama bali na rongola mwinango tangathelan’ne? Bibilya linoniwandela ira nithuulelenga mwemo munovwela atu enango. (Aro. 15: 2) Atu anjinji enao ta-ali vabanjani katinofuna ira atu enango taawandelenga mutu ofuna m’thela venango theliwanee thitho ninofwanela lemezanga mathuulelwiwa. (2 At. 3:11) Voi atu enango anofuna kami-iwa, mbwenye kaninofwanela irana vyongo vyevyo akala katinivepile.—San. 3:27. w24.05 24-25 ¶14-15

Mwiilambwila nyarwa dho-odedi-edhela dhinooda dodomi-a venango chinja ingumi yi-u. Mbwenye rimi-u unooda kala malonimwee voidhiwa ira nili na Yohova Nlungu wenuo unanikami-e. Liye anikami-a vinonisikimizeli-a ira “Yohova ngwaingumi.” (Sal. 18:46) Mbwenye angaongile ira Yohova ngwaingumi, Davide atoom’monga Nlungu ira “lipandhe langa.” Mwasiwa ngwan’ni Davide atoom’fwanafwani-edha Yohova na lipandhe lo-okaana ingumi? Bibilya linom’fwanafwani-edhela Yohova na “lipandhe” vofuna nikami-a vwechecha makalelo ana liye. Hora dhinjinji madhwala anofwanyeya mumyasa yom’titimi-a Yohova yothonyi-edha ira kavali olandana na liye. Limburo loroma vevo Yohova vaongiwile liye ira “lipandhe,” ndi va Dotornomio 32:4. Mbwenye volobela, Ana atoonga ira “kavali lipandhe lofwanafwana na Nlungwi-u.” (1 Sa. 2:2) Thitho Abakuku atoom’monga Yohova ira “lipandhe langa.” (Aba. 1:12) Mulimbo lemba Salimo 73 atoom’monga Yohova ira “lipandhe la rimanga.” (Sal. 73:26) Thitho Yohova mwinyaa atoodhionga ira ngulipandhe.—Esa. 44:8. w24.06 26 ¶1, 3

Mamwene awu Israeli enao tam’sangalali-a Yohova tanoom’lambela Yohova na rimiwa othene. Voonga vya Yosiya, Bibilya linoonga ira: “Liye a-anakale mwene, kavali mwene awelenle wa Yohova na rimee othene.” (2 Ma. 23:25) N’nga a-vi voonga vya Solomu vasogolo voira vyongo vyothakala? Bibilya linoonga ira: “Kaam’labenle Yohova Nlungwee na rimee othene.” (1 Ma. 11:4) Ee-no voonga vya Abiyamu wenuo ali mwene o-ororomeleya, Bibilya linoonga ira: “Kaam’labenle Yohova Nlungwee na rimee othene.” (1 Ma. 15:3) N’nga m’labela Yohova na rima othene unothapulelan’ni? Mutu unom’labela Nlungu na rimee othene, kanom’lambela namwasa oi piyevyo vinofwanela liye irana. Mbwenye malomwee, unom’labela namwasa wa udhivela thitho na rima odhivelela waingumiyee yothene. w24.07 21 ¶4-5

Yohova uno-indi-edha basa ifwanafwanio inango voonga mwemo munofudhela liye madawo. Liye aongile ira: “Ndinodha fudha madawiwa thitho ndinodha kala ninga nditovikunela na rambo nlukulu vyodawa viwavyo.” (Esa. 44:22) Yohova anilevelela vinokala ninga utokunela madawi-u na rambo nlukulu moi kaninaode aonave. N’nga ninofunjedhavo n’ni va vifwanafwani-ovi? Yohova anilevelela madawi-u kaninofwanela viombanga landu vaingumii-u yothene. Sangiri ya Yesu Kristu, itoiri-a ira mangawi-u othene afudhiwe. Vali ninga valembiwile mangawao kavanaoneyave yongo iliyothene. Mu ndi mwemo Yohova munolevelela liye na rima othene nachinyuwa madawi-u. Yohova unonikami-a kala vauxamwali wapama naliye thitho unonikami-a rambela dhiombanga landu. w25.02 10 ¶11-14

Andimuwa avapingoni amukomisauni atokaana izo ilukulu wa Yohova vokami-a ira pingo ukale ochena. (1 Ak. 5:7) Anofuna thitho kami-a atu odawa ira tachinyuwe akala pyoodeya. Ira vyevi viodeye anofwanela kaana mathuulelo apama, nodedi-edhanga ira mutuo unooda chinja. Mwasiwa ngwan’ni? Mwasiwa ngoi, aliwa anofuna m’sazi-edha Yohova oi “ngwaudhivela ulukulu na watangaranga.” (Yak. 5:11) Rumiwi Juwau thitho anoodhiveliwana abali naarongolee. Liye alembile ira: “A-imanga odhiveliwiwa, ndinoulembelani vyongo vyevi ira mwa-aire yodawa. Mbwenye akala mutu utodawa, nitokaana namakami-a olongomana, Yesu Kristu, oi uli vambo-i na Baba.” (1 Ju. 2:1) Pyovwi-a tangaranga ira hora dhinango Makristau katinofuna chinyuwa. Vyaireya e-no anofwanela kumi-iwa pingoni. w24.08 25 ¶19-20

Hora dhinango munooda roma fwanafwani-edhelanga vyongo vinoira nyo na vinoira atu enango. Mwasiwa ngwan’ni ninofwanela rambela vyevyo? Mwasiwa ngoi Yohova kanonifwanafwani-edhela naatu enango. (Agl. 6:4) Mwaifwanafwani-o, Mariya atoom’va-a Yesu yotuva ya makura apereso yavadhulu. (Ju. 12:3-5) Mbwenye i-yana mwinango wamakwele atoovelela vixikobiri vinli vyoyeva kopolo kachisini. (Luk. 21:1-4) Yesu atoonga ira a-iyana ambilene enala, tatoothonyi-edha iroromelo. Thitho Babee Yohova unosimba vyongo vyothene vinoira nyo namwasa oi mwatoodhivelela wa liye thitho munom’dhiveliwana, masiki vikale vyongo vyoyeva moia-vi. I-yo othene hora dhinango ninokaikelecha vyongo vinango. Ninga mwemo muoni i-yo ira madhu a Nlungu anooda nikami-a ira ni-iye kaikela. Mu-iye kaikela thitho mwaira e-no riminyu unodha kala limburonimwee. Yohova unoona ira nyo va mwekene muli ofuneya maningi. Yohova unosimba vyongo vyothene vinoira nyo ira mum’labelenga thitho unodha uva-ani yotuva. Yohova unoudhiveliwanani thitho thuulela arumiwee othene ororomeleya. w24.10 25 ¶3; 29 ¶17-18