Junho

Vatokala maraeli-o anofwanya i-yo va-eeni namwasa wa sembe ya Kristu. Mwaifwanafwani-o, Yohova unonilevelela vyodawa vi-u namwasa wa kuto. I-yo kanili ofwanelela leveleliwa mbwenye liye unofuna irana vyevi. (Sal. 103:3, 10-13) Atu enango anodhiona ira mbo-ofwanelela leveleliwa na Yohova. Pyaimbarimbari ira i-yo othene kanili ofwanelela leveleliwa. Rumiwi Paulo atoozindiyela ira liye kaali “ofwanelela itaniwa rumiwi.” Mbwenye atoonga ira: “Namwasa oriya rima ulukulu wa Nlungu, ndili ninga mwemo muli miyomu.” (1 Ak. 15:9, 10) Nachinyuwa vyodawa vi-u, Yohova unonilevelela. Kaiira unoirana vyevyo namwasa oi nili ofwanelela leveleliwa, mbwenye namwasa oi unonidhiveliwana. Mwaroma dhiona ninga o-okaana basa, muthuulelenga ira Yohova atoovelela kuto ira ukami-e atu odawa enao achinyuwile, a-kala atu o-odawa.—Luk. 5:32; 1 Ti. 1:15. w25.01 26-27 ¶3-4

Kaninaode tonga vinaonge atu enango venango irana. Mbwenye ninooda dhitonga moda unairele i-yo vyongo. Thitho ndhila yapama kulevelela. Mwasiwa ngwan’ni ninoonga e-no? Namwasa oi ninom’dhiveliwana Yohova thitho liye unofuna ira nilevelelenga. Hora dhinjinji ninooda irana vyongo mo-othuulela pama thitho vyevyo vinooda khuza manungwi-u. (San. 14:17, 29, 30) Na-iya lokota vya rimani, ninobarela rimi-u ira na-anyanyuwenga voira vyongo naatu enango. Naira e-no ninokala niviirelanga yongo yapama maningi, ndi-iya thuulela vyongo viireilevyo noroma okoka sangalala. N’nga munaire a-vi ira mwa-adhowenave nyanyuwa? Ndhila imbo-i kudhiva-a hora yokwakwanela ira riminyu ukale limburonimwee. Mutu opeya ava-iwa mirombwe, vanofuneela hora yokwakwanela ira ilondayo iile. I-yo thitho ninooda funeela hora yokwakwanela ira niode levelela mutu kumela vathi va rima. (Nam. 3:3; 1 Pe. 1:22) Mum’vepenga Yohova ira aukami-eni levelelanga atu enango. w25.02 16-17 ¶8-11

Ifwanafwani-o yamakhundo oromala, mbamafunji-edho okuza chinyuwa, iroromelo, ubadizo na venyathi-iwa muukwani. (Aeb. 6:1, 2) Enala mbenango mwamakhundo oroma enao Makristau anororomela aliwa. Ngumwasiwa rumiwi Pedru atoonga makhundo enala vevo valaleela liye mwinji wagumanyeile va petekoste. (May. 2:32-35, 38) Ninofwanela rumela makhundo oromala ira nikale anamafunjedha a Kristu. Mofwanafwani-a, rumiwi Paulo atoowenjeli-a ira mutu uliwethene unokonda ifunji-edho yoonga venyathi-iwa waatu okwa, utokonda vyongo vyothene vinororomela Makristau. (1 Ak. 15:12-14) Mbwenye kaninofwanela kala okwakwanana makhundo oroma aimbarimbarala baa-i. Mo-iyana na makhundo oroma, yodya yothakuna inothangani-avo malamulo a Yohova namakhundwee enao anonikami-a vwechecha mathuulelwee. Ira ninganyalinga maningi na yodya yothakunila, ninofwanela funjedhanga madhu a Nlungu noathuulelanga modi-a thitho a-indi-edhanga basa vaingumii-u. Nairangana vyongo vyevi, ninodha funjedha sakula vyongo vinam’sangalali-e Yohova. w24.04 5 ¶12-13

Nlungu atom’thuucha ira atu awu Ninive “kataidhiwa i-yani-a vyongo vyofwanelela na vyodaweya.” (Yon. 1:1, 2; 3:10; 4:9-11) Vasogolovee, Yesu atoo-indi-edha basa ifwanafwani-o yei vofunji-a atu vyokuza longomano na tangaranga dha Yohova. N’nga atu awu Ninive “anodha venyathi-iwa votongiwa” uvi? Yesu anoofunji-a ira atu enango “anodha venyathi-iwa ira tatongiwe.” (Ju. 5:29) Yesu aonga vya utongee wavyawa 1.000, vevo atu “olongomana na o-olongomana vanofuna aliwa dhavenyathi-iwa.” (May. 24:15) Waatu o-olongomana, weo unodha kala “venyathi-iwa ira tatongiwe.” Vyevi vinothapulela ira Yohova na Yesu anodha onanga akala atwao anovwela thitho a-rela vyongo vinofunji-iwa aliwa. Mofwanafwani-a, akala atu enango awu Ninive anodha konda lambela Yohova, anodha tongiwa ira ta-akaenave ingumi modhowa nodhowa. (Esa. 65:20) Mbwenye atu othene enao anofuna dhasakula m’lambela Yohova mororomeleya, anodha tongiwa ira takaena ingumi yokalao modhowa nodhowa!—Dan. 12:2. w24.05 5 ¶13-14

Yesu anowasimba namwasa om’roromela. Vyevi vinothonyi-edha pama ira Babee ngwatangaranga. (Ju. 14:9) Vyevyo vyaonga Yesu thitho irana, vyatoothonyi-edha ira Babee wenuo uli watangaranga thitho oriya rima, unodhiveliwana atu thitho unofuna akami-a ira tam’vwelenga nom’labela angalive ira mbodawa. Yesu unofuna ira atu odawa tachinyuwe noroma m’a-rela. (Luk. 5:27, 28) Yesu anoidhiwa ira unodha velela ingumiyee ninga sembe. Moweli-edha weli-edha anoowandela anama-arelee ira unodha veleliwa mandhani mwa amwidanee nothomeiwa vaimurini yoonelavo nyarwa. (Mat. 17:22; 20:18, 19) Yesu anoidhiwa ira sembee inodha kumi-a madawo ailambo. Yesu atoofunji-a thitho ira adhavelela ingumiyee, unodha aitana atu o-iyana i-yana ira tadhe wa liye. (Ju. 12:32) Atu odawa anooda m’sangalali-a Yohova akala anorumela Yesu kala mbwiiwa thitho sazi-edha ifwanafwani-oyee. Tairangana vyevi, vasogolovee “anodha thathuliwa wu vyodawa.” (Aro. 6:14, 18, 22; Ju. 8:32) Ee-no mofunechecha thitho molimba rima, Yesu atoorumela wukwa opha maningi ira anivulumuche.—Ju. 10:17, 18. w24.08 5 ¶11-12

Kathuulelani mwemo mwadhivwele nyo mungavwide fendo yoroma imbarimbari ya m’madhu a Nlungu. Mwatoofunjedha ira Babinyu wadhulu Yohova unoudhiveliwanani maningi, unofuna ira mukale mubanja laatu anom’lambela, unodha mali-a nyarwa na vyopha vyothene, munooda kaana idedi-edho yodhaonana okokha na odhiveliwiwinyu enao takwide na vyongo vinango vinjinji. (Mrk. 10:29, 30; Ju. 5:28, 29; Aro. 8:38, 39; Apk. 21:3, 4) Makhundo aimbarimbari afunjedhile nyoala tatoufiyani varimani. (Luk. 24:32) Mwanoodhiveliwana maningi vyongo vyafunjedha nyo voi mwanoofunechecha wandela mutu uliwethene! (Mufwanafwani-edhele na lemba la Jeremiya 20:9.) Nadhiveliwangana makhundo a Bibilyani na rimi-u othene, ninofunechecha wandela atu enango vyongo vifunjedhile i-yo. (Luk. 6:45) Ninodhivwa ninga anamafunjedha a Yesu enao taongile ira: “Kanino-iya onga vyongo vyaoni i-yo nauvwa.” (May. 4:20) Ninodhiveliwana maningi imbarimbari voi ninofunechecha wandela atu enango vya imbarimbari ninga mwemo munaodele i-yo. w24.05 15 ¶5; 16 ¶7

Ninga atu a Yohova, ninolaleela namwasa om’dhiveliwana Babi-u wa dhulu thitho nili ofunechecha kami-a afwi-u ira tam’muidhiwe Nlungu. Mbwenye anamalaleya enango katinosangalala talabanga basa yolaleela. Mwasiwa ngwan’ni ninoonga ee-no? Namwasa oi anamalaleya enango mbamanyadho thitho anovikaikela akala anooda laba pama basa yolaleela. Voi anamalaleya enango vinowarucha dhowa vandhe va mutu mwinango o-oitaniwene. Mbwenye anamalaleya enango anoova a-wacheliwa tafiya vandhe va mutu ta-anaitaniwe thitho enango anoova ira venango vyongo vinofuna aliwa maongavyo vinodha sukwali-a afwiwa. Vinowarucha roma onga naatu vyokuza milanyu yapama ya Umwene wa Nlungu. N’nga nyo thitho hora dhinango mwalabanga basa yolaleela kamunosangalalecha? Akala ndi e-no kamutatile rima. Akala munovikaikela, nguumboni oi muli odhiyevi-a voi kamunofuna ira atu tathuulelenga maningi vya nyo thitho pyooneelatu ira kamunofuna kangana naatu enango. Mwaimbarimbari kavali mutu unofuna sukwali-a atu enango simbwasimbwa vanodhilimbi-edha liye airela vyongo vyapama. Babinyu wadhulu Yohova, unoidhiwa pama nyarwa dhinogumanana nyo thitho ngofunechecha ukami-ani.—Esa. 41:13. w24.04 14 ¶1-2

Mwaleringa Bibilya malo modhilimbi-edha chinja vyongo vyothene va hora imbo-ive, musakulenga vifunelo vingasi vinaode nyo vikwakwaneli-edha. Munooda roma irana vyongo vi: Mulembenga vyongo vinofuna nyo chinja, mwamala musakulenga imbo-i venango vinli vinaode nyo roma vi-iya, ira vinangovyo mudha vi-iye vahora inango. N’nga munarome na vifunelo viivi? Munooda roma naifunelo yoi njo-orucha ikwakwaneli-edha. Venango munooda roma na vyongo vinoona nyo ira munofuneela vichinja maningi. Mwafwanya ifunelo inofuneela nyo chinja, musakenga mumabukwi-u. Mulobelelenga ifunelwinyu thitho mum’vepenga Yohova ira auva-eni “rima ofuna irana vyongo vinodhiveliwana liye na kopolo dhoirela vyongovyo.” (Afl. 2:13) Mwamala mu-indi-edhelenga basa vyongo vifunjedhile nyoovyo. Mwadhilimbi-edhanga kwakwaneli-edha ifunelo inyu yoroma, vinodha ulimbi-ani ira murome chinja vyongo vinango. Mwaroma chinja kalelo n’nangolee, vinodha kala vyo-orucha ira muchinje vyongo vinango. w24.09 6 ¶13-14

Venango munosukwala na vyongo vyairile nyo ndulimu vyevyo vyasukwali-idhe atu enango. N’nga chini inaukami-eni? Muirenga vyongo vyothene vinaode nyo nopepesa kumela vathi va rima. Mum’vepenga Yohova ira akami-e atu othene akuzeile na vyongo vyairile nyo. Yohova unodha ukami-ani thitho kami-a atu aasukwali-idhe nyo ira tavilele nokala okoka varendele naaliwa. Mufunjedhengavo yongo va vyongo vyadawi-idhe nyo thitho murumelenga ira Yohova au-indi-edheni basa ninga mwemo munofunela liye. Kathuulelani ifwanafwani-o ya namaongela Yona. Malo modhowa Ninive weo wam’rumile Nlungu, Yona adhowile unango. Yohova atoom’sumulula thitho Yona atoofunjedhavo yongo va vyongo vyadawi-idhe liye. (Yon. 1:1-4, 15-17; 2:7-10) Yohova kaa-iidhe m’indi-edha basa Yona. Angava-iwile okoka basa yodhowa Ninive, hora yeniyene Yona atoorumela. Yona kaarumenle ira dhivwela tangaranga va vyongo vyadawi-idhe liye, um’mwimwanani-e irana vyongo vyam’mwandenle Nlungu.—Yon. 3:1-3. w24.10 8-9 ¶10-11

Yohova anilevelela madawi-u, kaiira unaakwacha baa-i mbwenye unaafudha. Mangawa takwachiwa, atu anokwacha valembiwilevo mbwenye vilembiwilevyo vinooda oneyangave. Fudha ko-iyana maningi na vyevi. Ira nivwecheche vyevi ninofwanela thuulela ira matita awale tasaka-edhiwa na vyongo vyo-orucha fudheya. Mutu anooda tukula nguwo inyeti-a nofudha vyongo vilembile liyevyo. Ee-no mangawao tafudhiwa, kataoneyave. Mutu kaaoda ona vyongo vyalembiwile. Vakala ninga kavali mangawa. Pyolimbi-a maningi idhiwa ira Yohova kanaakwacha baa-i madawi-u, mbwenye unaafudha.—Sal. 51:9. w25.02 10 ¶11

Atu enango taniirela vyongo vyo-olongomana, ninoidhiwa ira Yohova unoidhiwa imbarimbari ya mwasuo. Idhiwa ira Yohova unodha saka-edha vyongo, unooda nikami-a ira nivilele vyongo vyo-olongomana viniireele. I-ya mwasuo mandhani mwa Yohova, unooda nikami-a ira na-adhowenganave kala othakaleliwa. Thakaleliwa unooda niiri-a ira niire vyongo mo-othuulela pama, na-akalenga osangalala thitho dodomi-a uxamwali-u na Yohova. Pyaimbarimbari ira kaninaonde m’sazi-edha Yesu sasaawa ninga mwairela liye. Hora dhinango ninooda onga venango irana vyongo vyoi vasogolovee ninooda dhiombana landu. (Yak. 3:2) Thitho vyongo vinango vyo-olongomana vinooda niphei-a venango nikumbanyi-anga vaingumii-u yothene. Akala vyevi vitoroma uireelanivo, idhiwani ira Yohova unoidhiwa moda munodhivwela nyo. Thitho Yesu, wenuo aireliwilevo vyongo vyo-olongomana, unovwechecha moda munodhivwela nyo. (Aeb. 4:15, 16) Nili osangalala namwasa oi Yohova utoniva-a malangi-o ananikami-e akala nitoireliwa vyongo vyo-olongomana. w24.11 6 ¶12-13

Thonyi-edha iroromelo wa Yesu kofuneya ira mutu afwanye “ingumi yo-omala. (Ju. 3:16-18, 36; 17:3) Anjinji mwa Ayudao katarumenle likhundo lipya lafunji-idhe Yesu lokhuza “vyongo vyafuna Nlungu ira aliwa tairenga.” Aliwa tatom’fuka ira: “N’nga nyo munaire izindiyelo iivi ira i-yo nione nouroromelani?” (Ju. 6:30) Aliwa tatoonga ira muhora ya Mose, anamabaliwa tanoowachela mana yeniyo yali yodya yiwa ya dambo na dambo. (Nee. 9:15; Sal. 78:24, 25) Pyooneelatu ira aliwa tathuulela vyofwanya yodya baa-i. Aliwa katafukile Yesu ira aawandele vyathapulela “yodya yaimbarimbari yokhumela dhulu” ninga mana, yeniyo yaakami-e kaana ingumi. (Ju. 6:32) Aliwa tanoothuulela maningi moi tatoopwaza imbarimbari yeniyo Yesu yafuna liye afunji-a. w24.12 5-6 ¶10-11

Mwaninyu afunjedhanga vya siyetista xikolani, unodha zindiyela ira vyopanduchiwavi mutokala malamulo enao anoiri-a ira vyongo vioneyenga mo-iyana i-yana. Mofwanafwani-a, miri minjinji inooneya mofwanafwana. Vanokala tundu, vitambi venango mathakuru. Oneya weu unofwanyeya thitho muvyongo vinango vyopanduchiwa. N’nga mbaani a-edhi malamulo oi vyongo vioneenga vyobaleya e-ni? N’nga uvipanduchile mbaani? Vevo mwaninyu vanothuulela liye vyowakula vya vyofuka vyevi, paevo thitho vanoroma liye roromela maningi ira Nlungu ngupanduchile vyongo vyothene. Vahora inango munooda m’fuka ira, “Akala ngu Nlungu unipanduchile, kavinakale vyovweya ira liye aniva-e malangi-o onikami-a ira nikalenga osangalala?” Ee-no munooda m’mwandela ira malangi-o enala anofwanyeya Bibilyani. w24.12 16 ¶8

Movudheleliwa, rumiwi Paulo atoolemba karta thitho atoovelela malangi-o oi mutu odauo akumi-iwe pingoni. (1 Ak. 5:13) N’nga Makristau ororomeleya tafwanela iran’ni na mutuo? Paulo atoawandela ira, “ta-iye vwelana” na liye. N’nga veva Paulo athapulela n’ni? Liye atoonga ira lamulo leli, lathangani-avo ira “masiki udya vambo-i na mutu oi e-no” ko-ofwanelela. (1 Ak. 5:11) Udya vambo-i na mutuo unooda niiri-a ira nirome waredha na liye. Veva pyooneelatu ira Paulo athapulela ira Makristau, katafwanela waredha na mutuo. Vyevi vingabarenle atu pingonimo ira ta-adodomi-eye na makalelwee othakalao. (1 Ak. 5:5-7) Wenjedhela vevo, i-ya waredha na mutuo ungam’kami-idhe zindiyela ira utolapelana maningi na Yohova, thitho kaana manyadho nochinyuwa. w24.08 15 ¶4-5

Yawa iliyothene Aisraeli tanookaana dambo lokunela vyodawa. Va dambo leli, ndimuwa waalimbo velela sembe anoovelela sembe dha vinyama malo mwaatu othene. Mbwenye sembe dha vinyamavyo kavyakunelelatu vyodawa viwa namwasa oi vinyama vyali vyothitha pereso vofwanafwani-edha naatu. Mbwenye Aisraeli tachinyuwa novelela sembe dhafuna Nlungudhi, liye anowalevelela vyodawa viwa. (Aeb. 10:1-4) Thitho sembe dhavelela aliwadho dhanowathuucha Aisraeli ira aliwa tali odawa. N’nga Yohova airile a-vi ira akunele vyodawa vyaatu? Liye atooira masaka-edho oi Mwanee “aveleliwe sembe fendo imbo-i baa-i ira akunele vyodawa vyaatu anjinji.” (Aeb. 9:28) Yesu atoovelela “ingumiyee ninga kuto ira aombole atu anjinji.”—Mat. 20:28. w25.02 4 ¶9-10

Yesu atoonga ira: “Zimu ngofunechecha mbwenye manungo mbofooka.” (Mat. 26:41b) Voonga vyongo vyevi, Yesu anoovwechecha ira i-yo atu kanili olongomana. Mbwenye madhweyala chowenjeli-a yoi nirambelenga dhinyindela. Ma-iyu umbo-ive wenuo a-anaonge madhu enala, anamafunjedhee tali tathonyi-edhelanga dhinyindela voonga ira katinodha m’tawa Mbwiiwa nom’i-ya ekhene. (Mat. 26:35) Aliwa tatokaana vifunelo vyapama mbwenye kataidhiwa ira vingakanle vyorucha maningi irana vyevyo. Voi e-no Yesu atoawenjeli-a ira: Madhu anofwanyeya mulemba ladambo lapenene pyovwi-a tangaranga ira anamafunjedhao katadhowilenave kala methove. Yesu angamangiwile tatoova nom’tawa aliwa m’i-ya ekhene. Namwasa oi anamafunjedhao katali methove, tatooirana vyovwelana na vyongo vyaongile aliwa ira katinodha viirana, thapulela ira katinodha m’tawa Yesu nom’i-ya ekhene.—Mat. 26:56. w24.07 14 ¶1-2

Adamu na Eva tatooluza ngari yokala vauxamwali na Babiwa Yohova. Voroma vene, Adamu na Eva tali mu banja la Nlungu. (Luk. 3:38) Mbwenye namwasa oi katam’vwele Yohova, aliwa tatootamangi-iwa mu banjali, vahoriyo tali ta-anabale a-ima. (Mar. 3:23, 24; 4:1) Voi i-yo nili a-imee, ninofwanela vwelani-iwa okoka na Yohova. (Aro. 5:10, 11) Onga unango, ninofwanela kala vauxamwali wapama na Yohova. Movwelana na vinoonga bukhu n’nango, madhu Aigiriki athapuleliwile ira “vwelani-a,” anothapulela “vwelana na mutu wenuo ali mwidanaa kala okoka fwaa.” Mbwenye pyova-a ifunelo ira Yohova ngwaromile iravo yongo ira vyevi viodeye. N’nga airile a-vi? Vwelani-a ndi ndhila yeniyo yasaka-edhe Yohova ira i-yo atu odawa nikale okoka vauxamwali wapama na liye. Irana vyevi vanoofuneela chinji-ana yongo inango yofwanafwana na yeyo. Vyevi vinokami-a ira yongo iluzeile venango inongeile iweleli-edhiwe okhoka. w25.02 3-4 ¶7-8

Paulo atoonga ira, “sumululiwa naatu anjinji wali okwakwanela wa mutu wen’na.” (2 Ak. 2:5-8) Mumadhu enango ninooda onga ira, langiwao watom’kami-a. (1 Ak. 5:1) N’nga wam’kami-dhe a-vi? Wam’kami-dhe ira achinyuwe. (Aeb. 12:11) Paulo atoolangi-a pinguo ira: “Mum’levelele na rima othene nom’didili-a.” Thitho “mum’sikimizele ira munom’dhiveliwana.” Veva vanooni-a ira Paulo afuna ira pinguo, wiirena vyongo vinjinji a-kala m’rumeli-a ira awelele mugulu la Yohova baa-i. Paulo afuna ira vyoonga na vyoira viwa, vim’sikimizeli-e mutuo ira atom’levelela thitho anom’dhiveliwana. Vyevi vyathonyi-edha ira atom’mwachela pingoni na mandha menli. w24.08 15 ¶4; 16-17 ¶6-8

Paulo atoolimbi-a Makristau Aiebere ira katafwanela tatila rima vovilela vyowesedha. Vyali vyovweya ira Paulo aava-e malangi-o enala. Voi liye atooni-a nyarwa Makristau, anooidhiwa vyafuna gumanana Makristawao. Thitho ali angavilenle nyarwa namwasa oi angakanle Kristau, atooni-iwa nyarwa mundhila dhinjinji. Ee-no Paulo atoonga mosikimiza namwasa oi atooidhiwa vyevyo vyafuneeleya ira mutu avilele. Atoothuucha Makristawao ira tavilelanga vyowesedha, katinofwanela vinyindelanga okene mbwenye tam’nyindelenga Yohova. Paulo atoonga molimba rima ira: “Yohova ngunamakami-anga kandinodha ova.” (Aeb. 13:6) Va-eeni abali-u enango anaaoni-iwa nyarwa. Ninooda akami-a vowalobelela, thitho hora dhinango ava-a vyongo vinofuneela aliwa. Mbwenye Bibilya linoonga movweya pama ira “atu othene ofuna kaana ingumi yodhivelela wa Nlungu, movwelana na Kristu Yesu, naaliwene thitho anodha oni-iwa nyarwa.” (2 Ti. 3:12) Ee-no i-yo otheene ninofwanela kozeela vyongo vinagumanena i-yo sogolou. Dhoweni nidhowenanive m’roromela Yohova thitho kanikaikelenga ira unodha nikami-a va vyowesedha vili vyothene vinagumanena i-yo. Vahoree, Yohova unodha mali-a nyarwa dhothene dhinogumanana arumiwee.—2 At. 1:7, 8. w24.09 13 ¶17-18

N’nga chini yakami-idhe atu awu Koritito ira abadiziwe? (2 Ak. 10:4, 5) Madhu a Nlungu thitho zimu ochena wenuo ndi wakopolo, watoowakami-a ira tachinje maningi vyongo vaingumiiwa. (Aeb. 4:12) Tatoo-iya makalelwiwa othakala ninga lezela, uba thitho gonana vari vaalombwana waa-iyanave. (1 Ak. 6:9-11) Angalive ira atu enango awu Koritiyo tatoovolowela makalelo othakala, aliwa kataoni ira pyorucha chinja kala kristau. Aliwa tanodhilimbi-edha kaana thindhi ira tadhowenave wenda ndhila yopaparedha yodhowa wu ingumi yo-omala. (Mat. 7:13, 14) N’nga nyo munolimbanana makalelo othakala enao anawuimwanani-eni badiziwa? Idhiwani ira kamunofwanela ngonja. Muvephenga Yohova ira auva-eni zimwee ochena ira uukami-eni ira mwa-alavelenga vyongo vyothakala. w25.03 6 ¶15-17.

Yohova unoniwandela ira unodha niva-a zelu dhedho dhinanikami-e idhiwa Akala ninofuna irana vyongo vinanisangalali-e. Liye unovelela zelu dhedhi “modhala mandha waatu othene thitho unovelela mo-oumeleliwa.” Mwalobelanga wa Yohova ira aukami-eni, mukaengana ifunelo ira muone moda muwakunle liye lobelo linyu. Mufwanafwani-edhele ira muli va ulendo. Thitho mutodimela mbwenye munofuka mutu watatamonimo ira aukami-eni. N’nga munovenyathi liye a-anauwakuleni? Kabe kamunaire vyevyo. Munodha m’vuruwana pama auwandelangani mwemo munawendele nyo. Molandana na vyevi, mwalobelanga wa Yohova ira auva-eni zelu musakesakenga yowakulayee vosakasaka malamulo na makhundo a Bibilyani enao anovwelana na mwasuo. Mwaifwanafwani-o, vothuulela akala ira munodhowa umawarendhelwao, munooda thuulela vinoonga Bibilya vyokuza mapwando othakala, vwelana naatu othakala thitho funeya o-ela Umwene va limburo loroma malo mwa vyofuna vi-u.—Mat. 6:33; Aro. 13:13; 1 Ak. 15:33. w25.01 16 ¶6-7

Ulosi wa Esaya unothonyi-edha ira vatokala i-yana maningi vari vaatu ali Paradaizoni wauzimu naatu ta-ali Paradaizonimu. Yohova unova-a modhala mandha arumiwee othene vyongo vinofuneela aliwa ira tadhowenave kala vauxamwali na liye. Unoniva-a zimu ochena, madhwee na yodya yauzimu yoinjiva naifunelo yoi “nidyenga, . . . nimwenga, . . . [thitho] nikalenga osangalala.” (Mufwanafwani-edhele na lemba la Apokalipse 22:17.) Mbwenye atu anokala undhe wa paradaizuo “anokaana ndhala, . . . anokaana tona, . . . [thitho] anokaana manyadho.” Aliwa katinofwanya vyongo vinofuneela aliwa vyevyo vinaakami-e kala vauxamwali na Nlungu. (Amo. 8:11) Yohova unova-a modhala mandha atwee vyongo vinofuneela aliwa thangani-avo yodya yauzimu. (Joe. 2:21-24) Yohova unoirana vyevi dhela Bibilyani, mabukhu oonga vya Bibilya, saiti-u ya jw.org, migumano ya pingo, migumano yaisa na yagawo. Nadyanga yodya yauzimu ila dambo nlilothene ninokaana manungo apama thitho ninodidili-iwa. w24.04 21 ¶5-6

Akala munofuna roma imweendi na mutu, munooda ira masaka-edho ira mutapanye na mutuo wu limburo n’nangolee weo unofwanyeya atu anjinji venango ira m’ligarela vatelefonini. Munofwanela m’mwandelamo pama ira munom’funa thitho munooda dhiveliwa m’mwidhiwa pama. (1 Ak. 14:9) Akala pyoodeya, mum’va-enga hora yokwakwanela yoi athuulele pama a-anawakule. (San. 15:28) Thitho akala mutuo kanofuna kala vaimweendi na nyo, mulemezenga mathuulelwee. N’nga munaire a-vi akala mutu mwinango utouwandelani ira unoufunani? Idhiwani ira mutuo afwanela kala olimba rima ira aonge mathuulelwee. Ee-no munofwanela m’mwakula moriya rima thitho mwalemezo. Mum’mwandele akala munoona ira munofuneela hora yothuulela mwasuo. Mbwenye mudhilimbi-edhe ira mum’mwakule mombaranya. (San. 13:12) Akala kamunom’funa, mum’mwandele moriya rima thitho movweya pama. Mbwenye akala munofuna kala vaimweendi na mutuo, munofwanela m’mwandela mathuulelwinyu thitho vyongo vinodedi-edhela nyo vaimweendiyo. Vyongo vinodedi-edhela nyo vinooda kala vyo-iyana na fwinyuo. w24.05 23-24 ¶12-13

Vangavirile hora Davide angali zombwe, atoodhowa sasani wa Aisraeli. Angadhowile atoofwanya anyakondwao taovanga namwasa wa nyakondo wakopolo wa Afilisiti dhinalee Goliyati “anyozanga anyakondo Aisraeli.” (1 Sa. 17:10, 11) Anyakondwao tanoova namwasa oi tathuulela maningi maoneelo amutuo na madhu onyoza aonga liye. (1 Sa. 17:24, 25) Mbwenye Davide aona vyongo mo-iyana, liye aona ira Goliyati kaanyoza anyakondo Aisraeli baa-i mbwenye “anyoza anyakondo a Nlungu waingumi.” (1 Sa. 17:26) Davide athuulela maningi vya Yohova. Liye anoororomela ira Nlungu wenuo am’kami-idhe vahora yakumbiza liye vifuwo, unodha m’kami-a thitho vahora yeniyo. Voi Davide anoororomela ira Nlungu unodha m’kami-a, atoodhowa mawana na Goliyati thitho atooganyali.—1 Sa. 17:45-51. w24.06 21 ¶7

Nithuulelenga mwemo ingumii-u mwakalele aliwa aakale ira kaninom’labela Yohova. Thuulela vyevi, unooda nikami-a ira nikaleve ororomeleya noonga ninga mwaongele mulimbo lemba masalimula ira: “Wamiyo, m’mwandamela Nlungu ndi yongo yapama maningi.” (Sal. 73:28) Ninooda vilela nyarwa dhinogumanana i-yo malambo omari-ala namwasa oi “ninom’labela Nlungu waingumi na waimbarimbari.” (1 At. 1:9) Nlungwi-u unonidhiveliwana thitho hora dhothene unonikami-a. Liye atookami-a arumiwee ndulimu, thitho unongo nikami-a malamboano. Vachineneeva ninodedi-edhela ira vailambo yavathila, vanoireya nyarwa ilukulu. Mbwenye imbarimbari choi kaninodha kala okene Yohova unodha nikami-a va nyarwa ilukulu. Ee-no dhoweni i-yo othene “nikale olimba rima thitho nionge ira: ‘Yohova ndi namakami-anga; Kandinodha ova yongo iliyothene.’”—Aeb. 13:5, 6. w24.06 25 ¶17-18

Bibilya linoniwandela vya alombwana 40 enao tali mamwene Aisraeli. Mamwene enango apama tatooira vyongo vinango vyothakala. Ifwanafwani-o nja Mwene Davide wenuo ali mwene wa pama. Yohova atoonga ira: “Rumiwanga Davide . . . atoolokhota malamulwanga nondi-arela na rimee othene thitho atooira vyongo vyofwanelela vamethoni vanga.” (1 Ma. 14:8) Mbwenye liye atooira unyambi na i-yana wa mwinyaa thitho atooira masaka-edho oi lombwana wa i-yanuo aphiwe kondoni. (2 Sa. 11:4, 14, 15) Bibilya linoniwandela thitho vya mamwene anjinji o-ororomeleya enao tairile vyongo vyapama. Ifwanafwani-o nja mwene Rehobowamu. Wa Yohova “liye atooira vyongo vyothakala.” (2 Li. 12:14) Mbwenye Rehobowamu atoovwela lamulo la Nlungu loi arumeli-e ira umwene wa maziza 10 waisraeli uimele vaokene. Atooira thitho vyongo vyokami-a zizalee vomanga masidadi na panda olimba maningi. (1 Ma. 12:21-24; 2 Li. 11:5-12) N’nga chini yam’mwiri-idhe Yohova ona mamwene enango kala ororomeleya? Liye aing’ana mirimiwa, chinyuwa wiwa thitho vyongo vyaira aliwa vodhowanave m’lambela mundhila yolinyali. w24.07 20 ¶1-3

N’nga andimuwa avapingoni anakami-e a-vi a-ima obadiziwa o-o-okwakwani-a vyawa 18 airile yodawa ilukulu? Gulu la andimuwa linoira masaka-edho oi andimuwa ambili tamagumane na mwanuo vambo-i na anamabalee akala ndi Makristau. Aliwa thitho anosaka idhiwa viirile anamabaliwa vofuna m’kami-a mwaniuo. Akala ira mwanuo utokaana makalelo apama thitho akala ira anamabaleao anave m’kami-a vamwasuo, andimuwa avapingoni ambilao anooda sakula ira mwasuo umalele vevo. Thitho Nlungu atoava-a izo anamabala ira talangi-enga a-imiwa mwaudhivela. (Dot. 6:6, 7; San. 6:20; 22:6; Aef. 6:2-4) Hora dhinango andimuwa avapingoni anooda fukanga anamabala ira taidhiwe akala mwanuo utokami-iwa mofwanelela. N’nga a-vi akala ira mwanuo unodhowanave iranga vyongo vyothakala, angalive ira utomakami-iwa naandimuwa avapingoni ambili na anamabalee venango Kristau unom’mwimelela? Vyakala e-no, komisau yaandimuwa inodhowa magumanana okoka mwanuo, vambo-i naanamabalee akala ndi makristau. w24.08 24 ¶18

I-yo othene ninoidhiwa moda munosangalalela i-yo nawachela yotuva. Mbwenye, ninosangalala maningi nava-a atu enango vyongo. Thitho Yohova atoonipanducha mundhila yen’na ira inikami-enga. Ndhila inipanduchele Yohova, inonikami-a ira niodenga wenjedhela imwerumweru yi-u. Ninooda wenjedhela imwerumweru yi-u nakaangana hora yoi niva-enga atu enango vyongo. Onga imbarimbari, ndhila yanipanduchele Yohovila njapama maningi. (Sal. 139:14) Malemba anosikimizela ira va-a unonikami-a kala osangalala, ee-no pyo-odabwi-a ira anoonga thitho ira Yohova ndi “Nlungu waimwerumweru.” (1 Ti. 1:11) Liye ngunamava-a lukulu thitho ngwaromi-idhe va-a. Rumiwi Paulo atoonga ira namwasa wa liye, “nitokaana ingumi, ninowenda thitho nitokalao. (May. 17:28) “Vyotuva vyothene vyapama na vyolongomana,” vinokumela wa Yohova. (Yak. 1:17) I-yo othene ninofuna kala osangalala maningi namwasa ova-a. Ira vyevi viodeye ninofwanela m’sazi-edhanga Yohova vamwasa ova-a.—Aef. 5:1. w24.09 26 ¶1-4

Vasogolo voona makalelo ofuneya ira mutu akale ndimuwa wavapingoni, arumiwi okami-a enango anooda onanga ira katinaode kala ndimuwa wavapingoni. Mbwenye muthuulelenga ira Yohova na gululee, katinodedi-edhela ira muthonyi-edhenga makalelwala, mo-odawi-a yongo iliyothene. (1 Pe. 2:21) Thitho zimu wa Yohova wenuo uli wakopolo ngwenuo unaukami-eni ira mukaena makalelwala. (Afl. 2:13) N’nga vatokala kalelo n’nangolee lelo linofuna nyo ira mulithonyi-edhenga maningi? Mum’vepenga Yohova ira aukami-eni. Mufunjedhenga maningi vyokuza kalelolo nofuka andimuwa avapingoni enango ira taukami-eni. Mum’vepenga Yohova ira aufunji-eni naifunelo yoi muirenga vyongo vinjinji vom’labela thitho labela abali naarongolinyu. (Esa. 64:8) Yohova auraeli-eni vevo vanodhilimbi-edha nyo ira mukale ndimuwa wavapingoni. w24.11 25 ¶17-18

Kavali mutu uliwethene unofwanela dhiona ira ngofwanelela vweliwa tangaranga na Yohova masiki am’labelenga wa vyawa vinjinji. Angalive ira vili ee-no, Yohova unosimba roromelaya wi-u. Liye atoovelela Mwanee ninga yotuva yapezi yavadhulu a-kala ninga yopagali ya vyongo vinoira i-yo vom’labela. Nathuulelanga ira nili ofwanelela vweliwa tangaranga venango ira nili ofwanelela thuuleliwa mwavakundu, vinodha kala ninga ninoonga ira Kristu kaafwanela nikwela. (Mufwanafwani-edhele na madhu alemba Agalatiya 2:21) Rumiwi Paulo atooidhiwa ira liye kaali ofwanelela vweliwa tangaranga na Nlungu. N’nga mwasiwa ngwan’ni atokaana thindhi vom’labela Yohova? Anooirana vyevi vofuna thonyi-edha ira anoosimba riya rima ulukulu wa Yohova, a-kala namwasa oi afwanela vweliwa thangaranga. (Aef. 3:7) Molandana na Paulo, ninodhowanave m’labela Yohova mwathindhi vofuna thonyi-edha m’simba, a-kala thonyi-edha ira nili ofwanelela vweliwa tangaranga. w25.01 27 ¶5-6