Maio

Angavulumuchile atwee udhaari wu Iguputu, Yohova atoosakula alimbo velela sembe ira talabenga vasasani. Alevi tatoova-iwa mabasa o-iyana i-yana opambuleya. N’nga atu talaba vasasani naatu takala duzi na sasuo, tanoosamaleliwa na Yohova kwaranya atu enango? Khabe. Ninoonga e-no namwasa oi Yohova kana sakulo. Muisraeli uliwethene atookaana ngari yokhala vauxamwali wapama na Yohova . Mofwanafwani-a, Yohova atoonechecha ira Aisraeli othene taodenga ona vyongo vyodabwi-a ninga ipilala ya rambo na ipilala ya mulo yeniyo yakhala vadhulu va sasa. (Eki. 40:38) Rambo waroma wenda, masiki atu tali undendai na sasa tanooda ona, mangi-a mitolwiwa thitho fudha matenda noroma wenda vambo-i na afwiwao. (Num. 9:15-23) Malamboano, akala nili wani Yohova unonidhiveliwana, nisamalela thitho nibarela. w24.06 4 ¶10-12

Ingumi ya Davide yali vangovini. Mwanee Abisalomu ali osikimizela ira am’mwaki-e umwene. (2 Sa. 15:12, 13) Veva Davide afuneela kuma wu Yerusalemu mombaranya. Vevo arumiwee vyakuma aliwa, Davide atoozindiyela ira vanoofuneela mutu mwinango ira a-ale am’mwandelenga Davide vyongo vinaire Abisalomu. Ee-no, atoom’ruma Zadoki naalimbo velela sembe enango sidadimo ira tamalabenga basa mwemo. (2 Sa. 15:27-29) Aliwa tafuneela irana vyongo mosamala maningi. Davide atom’vepa Zadoki nafwee ororomeleya dhinalee Husai ira tam’kami-e vamwasa wen’na. (2 Sa. 15:32-37) Vo-arela malangi-oao, Husai atooiri-a ira Abisalomu arome m’roromela. Liye atoovelela malangi-o amoda okomela khondo enao tam’va-idhe Davide hora ira akozeele. Voi ee-no, Husai atoom’mwandela Zadoki na Abiyatari vya masaka-edhwao. (2 Sa. 17:8-16) Voi ee-no alombwana ambilao, tatootumiza milanyu wa Davide. vyevyo vyatookami-a maningi barela ingumi ya Davide.—2 Sa. 17:21, 22. w24.07 4-5 ¶9-10

Arumiwi enango a Yohova anodhiombave landu namwasa wa vyongo vyadawi-idhe aliwa ndulimu, vyali aliwa ta-anabadiziwe venango vyamadhi aliwa badiziwa. Mbwenye vinokala pama roromelanga ira Yohova atoovelela kuto namwasa onidhiveliwana maningi. Ee-no pyooneelatu ira Yohova unofuna ira nisimbenga yotuvayo. Yohova unonisikimizela ira “anikami-a ira nikale vauxamwali wapama na liye,” kanoniomba landu va vyongo vyadawi-idhe i-yo ndulimu. Ninosimba ira Yohova kanothuulela vyongo vyadawi-idhe i-yo ndulimu. Vahora imbo-ive yeniyo unothuulela vyongo vyapama vinoira i-yo. (Sal. 103:9, 12; Aeb. 6:10) Akala munorucheya na mathuulelo odaweya namwasa wa vyongo vyadawi-idhe nyo ndulimu, mudhilimbi-edhe ira muthuulelenga vyongo vinoira nyo va-eeni thitho vyongo vinofuna nyo dhaira sogolou, malo mothuulelanga vyongo vyadawi-idhe nyo ndulimu. Kavali yongo inaire nyo ira muchinje vyongo vyaireile ndulimu. Mbwenye munooda m’lemeza Yohova movwelana na mwemo vyongo vili aliwa vaingumi inyu va-eeni, nodedi-edhelanga mwathindi vyongo viulanyedhileni Yohova sogolou. w24.10 8 ¶8-9

Hora dhinango mwaleringa Bibilya, munooda sukwala namwasa oona ira vatokala vyongo vinjinji vinofwanela nyo chinja. Nifwanafwani-edhe ira: Penene mutoleri Bibilya mbwenye mutofwanya malangi-o oonga rambela sakulo. (Yak. 2:1-8) Voi ee-no munothuulela moda munoirelecha nyo vyongo naatu enango, mwamala munoona ira munofwanela chinja. Thitho bebe-ini mwee nyo leri mwasa othonyi-edha funeya kala odhikondi-a voonga. Mbwenye nyo zindiyela ira hora dhinango kamunoongecha pama. (Yak. 3:1-12) Mwaira ee-no nyo thuulela ira muongenga molimbi-a hora dhothene. Dambo lo-arela munoleri Bibilyani malangi-o oi nirambelenga kala vauxamwali na ilambo. (Yak. 4:4-12) Voi ee-no mutozindiyela ira munofwanela sakula pama vyosangalali-a. Vofiya va dambo la 4, munooda sukwala mwathuulela injiva wa vyongo vinofwanela nyo chinja. Kamusukwale. Muthuulelenga thitho ira wara “umutu upya” kunomala. w24.09 5-6 ¶11-12

Yesu anooidhiwa ira Yohova anoona vyongo vyo-olongomana vyam’mwireela. Yesu anoororomela ira Yohova unodha mali-a vyongo vyo-olongomana va hora yofwanelela. Ninooda m’sazi-edha Yesu vodhilimbi-edha kala osamala na moda munaongele i-yo naireliwanga vyongo vyo-olongomana. Vyongo vinango vyo-olongomana, vinooda kala ving’ono vyoi ninooda vivwalavwali-anga. Venango ninooda thitho kala opwaseya vofuna rambela onga madhu anairi-e ira vyongo vifiye vothakala maningi. (Nam. 3:7; Yak. 1:19, 20) Hora dhinango ninooda funa ongavo yongo naona vyongo vyo-olongomana venango nafuna onga vinororomela i-yo. (May. 6:1, 2) Nafuna ongavo yongo, ninofwanela dhilimbi-edha irana vyevyo mopwaseya na mwalemezo. Ninooda m’sazi-edha Yesu vo-iya “vyothene mandhani mwa namatonga unotonga mwalongomano.”—1 Pe. 2:23. w24.11 5-6 ¶10-1

Pyosangalali-a maningi mutu odawa achinyuwa. (Luk. 15:7) N’nga vyaira e-no mbaani unofwanela lemeziwa? Mbaandimuwa avapingoni? Thuulelani vyalembile rumiwi Paulo vyokuza atu ochinyuwa. Liye aongile ira: “Venango Nlungu unodha arumeli-a ira tachinyuwe.” (2 Ti. 2:25) Mutu odawa achinja mathuulelwee na rimee, ofwanelela lemeziwa kai mutu, mbwenye Yohova namwasa oi ngu liye um’kami-idhe mutuo ira achinje. Paulo atoonga thitho vyongo vinango vyapama vinoireya mutuo achinyuwa. Atoonga ira mutu odauo aidhiwa imbarimbari molinyali, zelu dhinom’dhela thitho unovulumuwa wu migo-i ya namanami-a. (2 Ti. 2:26) Mutu odawa achinyuwa, andimuwa amukomisau yadhowile maonga na liye, anoira maulendo aubusa naifunelo yoi tadhowenave m’kami-a rambela migo-i ya Satana thitho ira asaka-edhe ndhiladhee.—Aeb. 12:12, 13. w24.08 23 ¶14-15

Mwinji waatu wadyi-idhe Yesu wathonyi-edha ira wafuna ukaengana vyodya. N’nga aliwa tairilen’ni? Tangaoni ira Yesu na arumiwe tanokhuma, tatoogwela barku yokhumela wu Tiberiya thitho tatoodhowa wu Kafarnau weo wali Yesu. (Ju. 6:22-24) N’nga aliwa tairile vyevi na ifunelo yoi tamavwe vinjinji vyokuza Umwene? Khabe. Aliwa tathuulela vyodya vyava-iwile aliwa. N’nga ninoidhiwa a-vi vyevi? Kathuulelani vyongo vyairile aliwa tangam’fwaidhe Yesu wu Kafarnau. Yesu atoawandela mo-ovira khundu ira aliwa tatodha namwasa oi tafuna vyodya. Liye atoawandela “ira angalive ira tatoodya mapau norumbala,” mbwenye yali “yodya yoi inonongeya.” (Ju. 6:26, 27) Ee-no atoalimbi-a ira tanofwanela dhilimbi-edha fwanya yodya yodhi-a ingumi yo-omala. w24.12 5 ¶8-9

Ira mukale namafunji-a o-inda rima, munofwanela indi-edha basa madhu a Nlungu vofunji-a novelela malangi-o. Munofwanela funjedhanga mwathidhi Bibilya na mabukhwi-u. (San. 15:28) Thitho mwafunji-anga, mudhilimbi-edhenga afiya atu varimani. Munooda wenjedhela dodoliso linyu lofunji-a, mwavepanga malangi-o wa andimuwa avapingoni enao ana dodoliso. (1 Ti. 5:17) Andimuwa avapingoni anofwanela kala oi anooda “limbi-a” abali naarongoliwa thitho “asumulula” vafuneya irana e-no. Mbwenye voirana vyongo vyevi, hora dhothene anofwanela kala oriya rima. Mwakala opwaseya na audhivela, nofunji-anga vo-indi-edha basa madhu a Nlungu, munodha kala namafunji-a wadodoliso namwasa oi munom’sazi-edha Yesu wenuo uli namafunji-a wadodoliso.—Mat. 11:28-30; 2 Ti. 2:24. w24.11 24 ¶16

Vyongo vinaonge i-yo vyokhuza Yohova, vinooda iri-a ira awachele titimi-o. ninolimbi-iwa ‘m’mombela Yohova nyumbo,’ ‘titimi-a dhinalee,’ ‘nolaleela milanyu yapama yaivulumucho.’ Thitho ‘ninolaleela titimi-olee vari vaatu amaziza enango.’ (Sal. 96:1-3) Dhedhi ndi ndhila dhedho dhinavelelena i-yo titimi-o wa Babi-u wa dhulu. (May. 4:29) Ninooda m’titimi-a Yohova na vyongo vina i-yo. Ninooda m’va-a Yohova titimi-o vovelela vyongo vi-u vya pereso yavadhulu. Romela walelene, arumiwi a Yohova takadhi tava-anga titimi-o mundhila yen’na. (San. 3:9) Mwaifwanafwani-o, Aisraeli tanoovelela vyongo viwa ira vikami-e va basa yomanga nosamalela kachisi. (2 Ma. 12:4, 5; 1 Li. 29:3-9) Anamafunjedha a Yesu, tanoo-indi-edha basa kobiridhiwa vokami-a liye na arumiwee. (Luk. 8:1-3) Makristau oroma tanoovelela ifwanafwani-o yapama waabali naarongoliwa. (May. 11:27-29) I-yo thitho malamboano ninooda lemeza Yohova vovelela vyongo vi-u. w25.01 4 ¶8; 5 ¶11

N’nga chini yam’kami-idhe Kornelio ira abadiziwe? Ninoleri ira liye “anoova Nlungu vambo-i na banjalee lothene.” Thitho Kornelio anoolobela mosembezela hora dhothene. (May. 10:2) Pedru angam’laleele Kornelio milanyu yapama, liye na banjalee tatoororomela Kristu thitho hora yeniyene tatoobadiziwa. (May. 10:47, 48) Kornelio kaavwalavwali-idhe chinja yongo iliothene naifunelo yoi alambelenga Yohova vambo-i na banjalee. (Yos. 24:15; May. 10:24, 33) Izo ya Kornelio ingaodile m’mwimanani-a ira akale Kristau. Mbwenye liye kaarumeli-idhe ira vyevi viireye. N’nga nyo thitho munofuneela chinja vyongo vinango vaingumiinyu ira mubadiziwe? Akala ndi ee-no, idhiwani ira Yohova unodha ukami-ani. Liye unodha raeli-a vyongo vinolimbi-edha nyo ira mu-arelanga makhundo a Bibilyani vaingumiinyu. w25.03 5 ¶12-13

Mwavwa myasa yothakala yokuza gulu venango abali enao anosogolela pingo, muthuulelenga mwemo amwidani a Nlungu mwaira liwa vyongo na Yesu thitho anamafunjedhee. Movwelana na vyaongile Yesu, malamboano atu a Yohova anooni-iwa nyarwa thitho ongeliwa vyongo vyonama. (Mat. 5:11, 12) Myasa yonama kinanidodomi-e akala nitozindiyela wenuo unoromi-a noiravo yongo mombaranya. N’nga ninofwanela iran’ni? Kamuvuruwanenga myasa yonama. Rumiwi Paulo atoonga movweya phama vyongo vinaire i-yo akala nitovwa myasa yonama. Liye atoom’mwandela Timoteo ira “awandelenga atu enango ira kativwelenga myasa yonama” thitho tarambelenga “myasa yonama yo-om’lemeza Nlungu.” (1 Ti. 1:3, 4) Ninokonda myasa yonama namwasa oi nitom’mwidhiwa unoromi-a. Mbwenye nino-indi-edha “basa madhu” olinyali.—2 Ti. 1:13. w24.04 11 ¶16; 13 ¶17

Dhowananive vwelana naatu ororomeleya wa Yohova. Nlungu unofuna ira nim’lambelenga movwelana na abali naarongoli-u. Ninooda dhowanave kala ovwelana akala nitoi-indedhela imbarimbari. Mutu uliwethene unoirana vyongo vyo-ovwelana na imbarimbari, unoromi-a ira atu pingoni ta-avwelanenga. Ngumwasee Nlungu unonilangi-a ira “naarambelenga.” Na-aire e-no nino-iya imbarimbari. (Aro. 16:17) Nazindiyela imbarimbari thitho i-indedhela, ninokala vauxamwali wapama na Yohova thitho ninokaana iroromelo yolimba. (Aef. 4:15, 16) Kaninodha nami-iwa na vyonama thitho migo-i ya Satana. Yohova unodha dhowanave nibarela va nyarwa ilukulu. Dhowananive i-indedhela imbarimbari, “thitho Nlungu warendele unodha kala nanyo.”—Afl. 4:8, 9. w24.07 13 ¶16-17

Yesu anokaana ifunelo maningi naatu enao tadhivwela tangaranga namwasa oi tali odawa thitho atowavepha ira takale anama-arelee. Liye anooidhiwa ira vyodawa ndi vyevyo vinoiri-a ira atu othene tagumanengana nyarwa. Ee-no liye atowakami-a alombwana naa-iyanene enao taidhiweya ira mbodawa. Vo-indi-edha basa ifwanafwani-o, liye atoonga ira: “Atu apama katinofuneela infrimero, mbwenye obulela mbanom’funa.” Atoowenjedhela onga ira: “Miyo kandidhele atu olongomana mbwenye odawa.” (Mat. 9:12, 13) Vyevi ndi vyevyo vyaira Yesu. Liye atoonga moriya rima thitho m’levelela m’ma mwinango a-uwile manyalwee na mi-odi. (Luk. 7:37-50) Liye atoofunji-a likhundo laimbarimbari wa i-yana mwinango wau Samariya vaisimeni angalive ira aidhiweya ira i-yanuo ali nyambi. (Ju. 4:7, 17-19, 25, 26) Nlungu atom’va-a Yesu kopolo yomali-a wukwa oi vyo-arelavovyee ndi vyodawa. N’nga ninoidhiwa a-vi vyevi? Yesu atoovenyathi-a atu okwa alombwana naa-iyana, a-ima naandimuwene.—Mat. 11:5. w24.08 4 ¶9-10

N’nga Yohova unodha lemeza a-vi dhinalee vachineeva? Vo-odembuwava Yohova unodha lemeza dhinalee votonga. Liye unodha nonga Babulo nlukhulu namwasa onyoza dhinalee lochena. (Apk. 17:5, 16; 19:1, 2) Atu enango anofuna ona Babulo nlukhulu anongiwanga, anodha roma lambela Nlungu vambo-i na i-yo. Thitho va Armagedo, Yohova unodha nonga ilambo yothene ya Satanila, naatu othene anoruni-a nonyoza dhinalee. Mbwenye unodha vulumucha atu othene enao anom’dhiveliwana, m’vwela thitho m’va-a titimi-o. (Mrk. 8:38; 2 At. 1:6-10) Vofiya khomoni va utongi wa Kristu wa vyawa 1.000, Yohova unodha kala angacheni-eletu dhinalee. (Apk. 20:7-10) Vahoriyo “ilambo yavathi inodha dhala naatu oidhiwa titimi-o wa Yohova, Ninga mwemo munodhalela ma-inje barani.” (Aeb. 2:14) Vinodha kala vyosangalali-a maningi vahoriyo, namwasa oi mutu uliothene unofuna dhakaana ingumi unodha velela titimi-o lofwanelela dhinalee. w25.01 7 ¶15-16

N’nga chini yaakami-idhe Makristau Aiebere vahora yaoni-iwa aliwa nyarwa? Paulo atooidhiwa ira aliwa tafuneela kaana mathuulelo ofwanelela vamwasa wa vyowesedha vya gumanana aliwa. Ee-no atoawandela ira Nlungu atoorumela ira tagumanena vyowesedha naifunelo yofuna afunji-a. Funji-iwa mundhila yen’na, unokami-a mutu ira akaena makalelo apama. thuulela vyongo vyafuna dhaireya vasogolo va vyowesedhavi, wangaakami-idhe Makristawao ira tavilele. (Aeb. 12:11) Paulo atoolimbi-a Makristau Aiebere ira katafwanela tatila rima vovilela vyowesedha. Vyali vyovweya ira Paulo aava-e malangi-o enala. Voi liye atooni-a nyarwa Makristau, anooidhiwa vyafuna gumanana Makristawao. Thitho ali angavilenle nyarwa namwasa oi angakanle Kristau, atooni-iwa nyarwa mundhila dhinjinji.—2 Ak. 11:23-25. w24.09 12-13 ¶16-17

Dambo nlilothene laviranga, mahora oi nilaleele anokala tayevanga maningi. Ninoonga ee-no namwasa oi hora yoi komoni wa ilambo ifiye, inokala iwandamelanga. Kathuulelani vyaongile Yesu vyokuza basa yolaleela mumalambo omari-ala, ninga vilembiwile va Marku 13:10. Movwelana na vyalembile Mateu, Yesu atoonga ira milanyu yapama inodha laleiwa vailambo yothene yavathi weo uli atu, “komoni” wailamboi wa-anafiye. (Mat. 24:14) Madhu enala anoonga vya komoni wailambo yothakala ya Satanila. Yohova utomala e-la “dambo na hora” inofuna dhaireya vyevi. (Mat. 24:36; May. 1:7) Dambo nlilothene laviranga ninokala nikwivelanga wu hora yen’na. (Aro. 13:11) Va-eeni ninofwanela dhowanave laleela fiyedha komoni wailamboi ufiye. Nathuulelanga vya urumiwi-u, vinokala pama dhifuka ira: Mwasiwa ngwan’ni ninolaleela milanyu yapama? Mogwandela ninooda onga ira udhivela ngunonilimbi-a ira nilaleelenga. Nalabanga basa yolaleela ninothonyi-edha ira ninodhiveliwana milanyu yapama, ninodhiveliwana atu thitho kwaranya vyongo vyothene ninom’dhiveliwana Yohova na dhinalee. w24.05 14-15 ¶2-3

Anamabala mulimbi-enga mwaninyu ira athuulelenga vyongo vyopanduchiwa. Mum’kami-enga mwaninyu ona vyopanduchiwa vyoiri-a ifunelo wavyongo vipanduchiwile. Mwasiwa ngwan’ni munofwanela irana vyevyo? Vyevyo vinom’kami-a zindiyela ira upanduchile vyothene vyevi ngwazelu. Mofwanafwani-a, wavyawa vinjinji masiyetista takadhi tafunjedhanga moda usakanyiwile vyopanduchiwa vyo-iyana i-yana. Siyetista mwinango dhinalee Nicola Fameli atoonga ira vyorungunuwa vyopanduchiwavi vinorungunuwa maulendo ofwanafwana. Rungunuwa weu unoongiwa ira Fibonacci. Ninoona rungunuwa weu wavyongo vinjinji vya vyopanduchiwa ninga likutho la ndhou, ligurugudhu la khono mathamba avyomela vinango thitho jiransoli. w24.12 16 ¶7

Mose, Davide na Juwau, tatookaana ingumi yo-iyana maningi na i-yo malamboano. Mbwenye ninofwanafwana naaliwa mu vyongo vinjinji. Mofwanafwani-a, aliwa tanom’labela Nlungu waimbarimbari ninga i-yo. Mofwanafwana na i-yo, ninovepa wa Yohova thitho m’nyindela ira unodha nikami-a noniva-a malangi-o. Ee-no mofwanafwana na aalombwanala, ninororomela ira Yohova unoraeli-a atwee anom’vwela. Dhoweni ni-arelengani malangi-o aalombwanala thitho nivwelenga malamulo a Yohova. Naira ee-no vyongo vyothene vinoira i-yo, vinodha niwendela pama. Ninodha kaana ingumi “wahora yolapela” venango nionge ira modhowa nodhowa. Ninodha sangalala voidhiwa ira ninom’sangalali-a Babi-u wadhulu wenuo unokwakwaneli-edha vyolanyedhavyee mundhila ya-adedi-edhela i-yo.—Aef. 3:20. w24.11 13 ¶20-21

Muhora yaarumiwi abali enango tanoo-eliwa kala arumiwi okami-a. (1 Ti. 3:8) Vinooneya ira abalala mbali “arumiwi okami-a” enao alembiwile na rumiwi Paulo. Vinooneya ira arumiwi okami-ala, anoolaba mabasa enango ofuneya naifunelo yoi andimuwa avapingoni ta-elenga mathuulelwiwa va basa yofuneya, yofunji-a atu nokumbiza mabila a Nlungu. Mofwanafwani-a, arumiwi okami-a tanookami-a volemba malemba venango gula mafwaramento olabi-edhana basila. N’nga ndi mabasa enango aavi arumiwi okami-a anolaba aliwa pingoni mwinyu? (1 Pe. 4:10) Arumiwi okami-a anosamalela kobiri dha pingo venango ing’anela isa, itani-a mabukhu ira anamalaleya tawachele, samalela mafwaramento ovwei-ana madhu na ooni-ana mavidiyo, wachela alendo vamigumanoni venango laba basa yosaka-edha Nyumba ya Umwene. Mabasa enala, anokami-a ira vyongo viwendenga pama pingoni.—1 Ak. 14:40. w24.10 19 ¶4-5

Ninooda vilela vyowesedha vilivyothene mo-obala akala ndi vilukulu venango ving’ono. Akala ninothuulela ira Yohova ngu Nlungu waingumi thitho ngofunechecha nikami-a. Yohova ndi Nlungu wakopolo dhothene thitho unodha niva-a kopolo ira nivilele vyowesedha. Ee-no nitokaana myasa yovweya yoniiri-a roromelanga ira ninooda vilela yorucha iliyothene inagumanena i-yo. Naona Yohova anikami-anga va nyarwa dhing’ono dhing’ono, kaninokaikela ira unodha nikami-a thitho vanyarwa dhilukulu. Kathuulelani vyongo vyaireile vaingumi yawene Davide, vyevyo vyairi-idhe ira am’roromelenga maningi Yohova. Davide angali zombwe, imbalangondo na kalamu tatoo-inda mabila ababee enao akumbiza liye. Vahora dhothene dhedhi, Davide atoolimba rima notamangi-a imbalangondo na kalamu novulumucha mabilao. Mbwenye Davide kaathuulela ira utoirana vyongo vyevi namwasa wa kopolodhee. Liye anooidhiwa ira Yohova ngwam’kami-idhe. (1 Sa. 17:34-37) Thuulela vyevi watom’kami-a Davide roromela ira Nlungu waingumi unodha m’kami-a sogolou. w24.06 21 ¶5-6

Nifwanafwani-edhele ira mutu mwinango utouitanani ira mumawaredhe. N’nga munofwanela dhowao? Akala mutuo kamunam’muidhiwe pama thitho kamunoidhiwa ira mawaredhelwee anakale oi a-vi, munooda m’fuka vyofuka vi: “N’nga mawaredhelwao anaireele wani? N’nga anaireye hora yan’ni? N’nga unakale atu oinjiva moi a-vi? N’nga mbaani unofuna ing’anela mawaredhelwao? N’nga mbaatu avi aitaniwile? N’nga unodha kala vyoi a-vi? N’nga unodha kala vyomwa vyolezeli-a?” Vyowakula vya vyofuka vyevi vinodha ukami-ani ira musakule pama vyoira. Mwaidhiwa makhundwao, munofwanela sakasaka pama ira muidhiwe mwasa othene. Mwaifwanafwani-o, n’nga munaire a-vi mwavwa ira unodha kala atu o-o-arela makhundo a Bibilyani? Venango atu anodha mwa vyomwa vyolezeli-a vo-okala mutu owaing’anela. N’nga mawaredhelo enala katinodha chinja nokala mawaredhelo oophi-a? (1 Pe. 4:3) Mwaidhiwa makhundo othene okuza mwasuo, munodha sakula pama vyoira. w25.01 15 ¶4-5

Yohova uno-indi-edha basa vifwanafwani-o vinango vofuna nikami-a vwechecha mwemo munofudhela liye madawo aatu achinyuwile vo-indi-edha basa sembe ya kuto. Vinokala vyorucha maningi kumi-avo vyongo vyofiila venango sangiri va yowara. Mbwenye vo-indi-edha basa ifwanafwani-oi Yohova atoonisikimizela ira madawi-u anodha chena maningi voi kaninodha aonave. Madawi-u anofwanafwani-edheliwa na mangawa. (Mat. 6:12; Luk. 11:4) Ee-no vahora iliyothene inodawa i-yo, ninokala ninga ninaawenjedhela madawi-u wa Yohova. Thitho madawi-ao anokala manjinji maningi. Mbwenye anilevelela vinokala ninga utofudha mangawa afuna i-yo weli-a. Liye kanodedi-edhela ira nipagali mangawa amadawi-u anilevelele liye. Ifwanafwani-oi inoonga movweya pama ira Yohova anilevelela ninokala osangalala maningi. w25.02 9-10 ¶9-10

Anamabala taululanga anofuneela kami-iwa naa-imiwa thitho a-ima anjinji anokala osangalala irana vyevyo. (1 Ti. 5:4) Mbwenye anamabala Aikristau anozindiyela ira angalive ira anokala osangalala maningi akala ira tatokaana a-ima nowakami-a ira takale arumiwi a Yohova a-kala naifunelo yoi tadhaakami-e sogolou. (3 Ju. 4) Mwaava-enga a-iminyu ifwanafwani-o yapama vamwasa om’nyindela Yohova. Mwaafunji-enga laba basa romela tangali a-ima. (San. 29:21; Aef. 4:28) Taulukhula mwaawandelenga ira talimbi-edhelenga xikola. Anamabala anofwanela sakasaka thitho indi-edha basa makhundo a Bibilyani vokami-a a-imiwa ira ta-indi-edhelenga basa pama funja naifunelo yoi tadhafwanye vyofuneeleya vaingumiiwa wu talabelanga Yohova. w25.03 30-31 ¶15-16.

Esaya kapitulo 65 Yohova unoonga moda munofuna dhakalela ingumi yaatu paradaizonimu. Ulosi we’na wali wangakwakwaneli-edhiwile romela yawa ya 537 K.A. vahora yeniyo, Ayuda enao tachinyuile tatoothathuliwa udhaari nowelela waniwa. Yohova atoaraeli-a atwee thitho atoakami-a vosaka-edha sidadi ya Yerusalemu ira ikale yobaleya nomanga kachisi wenuo wali limburo nlukulu lolambelelamo Nlungu waimbarimbari. (Esa. 51:11; Zka. 8:3) Kwakwaneli-edhiwa wanambili waulosi wa Esaya waromile muyawa ya 1919 K.A.B. vevo arumiwi a Yohova amalamboano vathathuliwile aliwa muudhaari wu Babulo nlukulu. Ee-no paradaizo wauzimu watooroma mwadheya vailambo yothene. Anamalaleya Aumwene athindhi tatookaathi-a mipingo minjinji thitho tanoothonyi-edha makalelo apama. Alombwana naa-iyana oi voromavene tali auwalanga thitho tanoothonyi-edha makalelo ninga avinyama, tatooroma “wara umutu upya waphanduchiwile movwelana na ifunelo ya Nlungu.” w24.04 20-21 ¶3-4

Muvilambo vinango, anamabala venango abali aandimuwa mbenao anosakela mutu lombwana venango i-yana ira tathelane. Voi muvilambo vinango, abali venango afwee amutuo mbenao anoira masaka-edho oi lombwa na-iyana tagumane noonana akala mbofwanelelana. Akala mutovepiwa ira mukami-e mutu mwinango ira akale vaimweendi venango tathelane, munofwanela thuulela vyongo vinofuna mutu uliwethene thitho vinodhiveliwana liye. Mwam’fwanya mutu unom’mona nyo ira ngofwanelela, mudhilimbi-edhenga m’mwidhiwa pama thitho idhiwa makalelwee. Mbwenye yofuneya maningi kuidhiwa akala unom’dhiveliwana Yohova. Kala vauxamwali wapama na Yohova kofuneya maningi kwaranya kaana kobiri, kala ofunjedha maningi venango kala ovweya. Mbwenye muthuulelenga ira abali venango arongola enao ta-ali vabanjani, mbaaliwa anofwanela sakula akala anofuna thelana. w24.05 23 ¶11

Vyongo vinasakule i-yo onga venango kabe, vinooda kami-a atu enao ali vaimweendi. Hora dhinango ninodha funeelanga dhikondi-a. (San. 12:18) Mofwanafwani-a, ninooda funanga wandela atu enango ira ngana na ngana ali vaimweendi. Mbwenye hora dhinango atu ali vaimweendao anodha funanga ira taonge okhene. Kaninofwanela onganga myasa yonama yokuza atu ali vaimweendi venango atonga vamyasa dhinofwanela aliwa sakula okhene dhiirana. (San. 20:19; Aro. 14:10; 1 At. 4:11) Mbwenye atu ali vaimweendao venango katinasangalalenga naonga vyongo venango afukanga vyofuka vyothonyi-edha ira anofwanela thelana. N’nga a-vi akala atosakula mali-a imweendi? Kaninofwanela volowelanga myasa yaanya venango uikhundu ya mutu m’mbo-i. (1 Pe. 4:15) Atu ali vaimweendi tasakula ira tamali-e imweendi, kaiira vinothapulela ira imweendiyo kiyakami-idhe. Hora dhinjinji vinokalecha ira vitokwakwaneli-edha vifunelo viwa namwasa oi vitowakami-a idhiwa vyofwanelela sakula. Mbwenye mala waimweendiwo unooda airi-a ira tavwenga upa rimani. Ee-no ninofwanela saka ndhila dhowakami-edhelana. w24.05 31 ¶15-16

Yongo imbo-i mwavyongo vinowesedha maningi iroromelo yi-u nonifooki-a, ndi vevo bali-u venango fwi-u a-iya m’labela Yohova. (Sal. 78:40) Akala ninom’dhiveliwana maningi mutuo, vinooda kala vyorucha maningi ira nirumele vyongo viireilevyo. Akala vyevi vitouireeni, ifwanafwani-o ya Zadoki vamwasa ororomeleya inooda ulimbi-ani. Liye atoosakula kalave ororomeleya wa Yohova voi fwee Abiyatari atoosakula irana vyongo mo-ororomeleya. Ninga mwemo mwaireile mwene Davide anga-adhi vang’ono funa wukwa, mwanee Adoniya anoofuna landa umwenee angalive ira Yohova ali angalanyedhile ira Solomu ngunofuna dhakala mwene. (1 Li. 22:9, 10) Abiyatari atoosakula kala uikundu ya Adoniya. (1 Ma. 1:5-8) Voirana vyongo vyevi, Abiyatari atookala o-ororomeleya wa Davide, na Zadoki thitho wa Yohova Wavyawa vyokwaranya 40, Zadoki na Abiyatari tali tangalabile basa vambo-i ninga alimbo velela sembe.—2 Sa. 8:17; 15:29; 19:11-14. w24.07 6 ¶14-15

Kanikaikelenga, kala methove unodha nikami-a hora dhothene. Vyodawa vinoiri-a ira mutu “asangalale wahora yoyeva” mbwenye a-rela makhundo a Yohova unoiri-a ira mutu akale osangalala modhowa nodhowa. (Aeb. 11:25; Sal. 19:8) Vili ee-no namwasa oi i-yo atu, nipanduchiwile ira ni-arelenga makhundo a Yohova. (Mar. 1:27) Nairanga vyongo vyevi, ninokaana ithuulela rima yapama thitho ninodedi-edhela ingumi yo-omala. (1 Ti. 6:12; 2 Ti. 1:3; Yud. 20, 21) Pyaimbarimbari ira “manungo mbofooka.” (Mat. 26:41) Mbwenye kavinothapulela ira baa-i kanina yoira kabe. Yohova ngokozeya niva-a kopolo. (2 Ak. 4:7) Muonenga ira Nlungu unovelela kopolo yokwaranya yobaliwana. Mbwenye yoroma, ninofwanela i-ndi-edhanga basa kopolo dhi-u dhobaliwana volimbanana vyowesedha dambo nlilothene. Yohova unodha wakula malobelwi-u voniva-a kopolo dhowenjedheleya dhinofuneela i-yo. (1 Ak. 10:13) Ee-no mokami-iwa na Yohova ninooda kala methove norambelanga vyowesedha. w24.07 19 ¶19-21

Enala ndi madhu arumiwi Paulo alemba la dambo la penene alembele liye Timoteo oi ali ndimuwa fwee om’mwandela vyofwanelela irana “naatu ana ilemeelo yoiranga vyongo vyodaweya.” N’nga veva Paulo athapulela n’ni? Liye kaathapulela ira “atu othene” pingoni anofwanela idhiwa vyokuza mwasuo. Mbwenye aonga vyaatu oyeva aidhi vyokuza mwasuo. Anooda kala atu aoni vahora yaira liye vyodawavyo venango mutu odauo aawandenle liye vyokuza mwasuo. Andimuwa avapingoni anooda awandelamo mwazelu ira mwasuo utosamaleliwa thitho mutu odauo utokami-iwa. Mbwenye hora dhinango vinokalecha ira yodawayo itoidhiweya pingoni mwethene venango inodha idhiweya. Vyaireya e-no, madhu oi “othene” anooda thapulela pingo wethene. Ee-no andimuwa anooda onga milanyu yoonga ira bali venango rongola utosumululiwa. Mwasiwa ngwan’ni vyevyo vinofwanela ireya? Paulo atoonga ira: “Ira atu enangwao taovenga” na ifunelo yoi ta-airenga vyodawa. w24.08 23-24 ¶16-17

Ninofwanela m’labela Yohova mwathindhi fiyedha khomoni. Ozoziwa tanofwanela kala methove naifunelo yoi “tadha tukuliwe” na Yesu ira tamawachele yotuva yiwa dhulu. (Mat. 24:40) Aliwa anodedi-edhela mwaifunelo hora yoi Yesu “adhaagumani-e” nowadhowana dhulu. Vasogolo va Armagedo, aliwa anodha kala anamatheliwa va kazamento ya mwana libila. (2 At. 2:1) Angalive ira dambo lotongiwa linodha mombaranya, kavali mwasa unaniiri-e ova. Akala ninokalave ororomeleya, Babi-u wadhulu unodha niva-a “kopolo yokwaranya yobaliwana” yoi “ninooda imela . . . vamethoni va Mwana mutu.” (2 Ak. 4:7; Luk. 21:36) Akala ninodedi-edhela dhowa dhulu venango dhakala vailambo yavathila, ninodha sangalala na Babi-u akala ninovwela vyowenjeli-a vinofwanyeya muvifwanafwani-o vya Yesu. Namwasa oriya rima ulukhulu wa Yohova, madhini-u “anodha lembiwa mu bukhu” laingumi.—Dan. 12:1; Apk. 3:5. w24.09 24-25 ¶19-20

N’nga madhu a Nlungu anaukami-eni a-vi ira riminyu ukale limburonimwee? Muthuulelenga vyongo vyapama vifwaidhe nyo. Mwaifwanafwani-o, mufwanafwani-edhe maraeli-o aulanyedhileni Yohova na vyongo vinauva-eni ilamboi va-eeni. Atu enango anooda nyindelanga vyongo viodile aliwa fwanya muilamboi namwasa oi katina idedi-edho iliyothene yasogolo. Mbwenye nyo, Yohova utoulanyedhani vyongo vyapama maningi kwaranya vyongo vinathuulele nyo. (Sal. 145:16) Kathuulelani yofuka ila: N’nga ninooda onga mosikimizela mwemo ingumii-u mwakalele aliwa aakale ira natoosakula vyongo vinango? Yongo imbo-i inofwanela nyo idhiwa choi, atu anosakula irana vyongo vinango namwasa odhiveliwana Nlungu naatu, hora dhothene anofwanya vyongo vyowakami-a kala osangalala. w24.10 27 ¶12-13