Abril

Ira niganyali na manungo thitho sangiri ya Yesu, yoongiwa va Juwau 6:53, ninofwanela roromela khuto. Ngari yen’na itoveleliwa waatu anjinji. (Aef. 1:7) Atu a “mabila enango” katinofwanela udya venango umwa vinyu va ithuulelo venango yodya ya namaulo ya Mbwiye. (Ju. 10:16) Angalive ira vili e-no, aliwa anoganyali na manungo na sangiri ya Yesu Kristu. Aliwa anodya yodya yei mopipirisa taroromelanga ira sembe ya Yesu inodha avulumucha. (Ju. 6:53) Mbwenye atu enango anodya pau thitho umwa vinyu anothonyi-edha ira ali mu vwelano lipya thitho anodha tonga vambo-i na Yesu dhulu. Ee-no akala nili ozoziwa venango amabila enango, ninofwanela thonyi-edha iroromelo ira nidhakaena ingumi yo-omala. w24.12 13 ¶14, 16

Mwambo wa yodya yanamaulo ya Mbwiye, Yesu atoovelela pau yo-okaana yotupi-a waarumiwee thitho atoawandela ira unoimelela manungwee. Ee-no atowava-a vinyu noawandhela ira “vwelano wa sangiree.” (Mrk. 14:22-25; Luk. 22:20; 1 Ak. 11:24) Vyongo vyaongile liyevi pyofuneya maningi. Vwelano lipyali kalinokhuza atu othene mbwenye ndi vari va liye na “nyumba [yauzimu] ya Aisraeli,” yeniyo ndi atu enao anofuna datonga vambo-i na liye “mu Umwene wa Nlungu.” (Aeb. 8:6, 10; 9:15) Idhiwani ira vayodya ya namaulo ya Mbwiye, Yesu atoonga vya, “isiimwinji ya mabila” yeyo ili yoyeva. Gurupu leli latooroma na arumiwi ororomeleya enao talivo. Arumiwao tatoodya pau thitho tatoomwa vinyu wenuo Yesu waava-idhe liye maulo enao. Enango thitho tali tangavolowile gurupuli tatoodedi-edhela dhadya izindiyelwila. Enala mbenao anofuna dhatonga na liye dhulu. w24.12 11 ¶9-10

Yesu atooveleliwa na m’mbo-i mwa afwee avarimani, atoomangiwa, nyoziwa, ongeliwa vyongo vyonama, tongiwa ira aphiwe thitho atooni-iwa nyarwa. Vasogolovee anyakondo tatom’tukulela wu limburo weo wam’phele aliwa nom’thomeya vaimurini. Yesu atoovilela mororomeleya upha na nyarwa dhothene dhagumanena liye. Mbwenye Yohova Nlungu ngwenuo avwide upha maningi voona mwanee arucheyanga. Angalive ira Yohova utokaana kopolo dho-okaana madile, kaavolowelevo nomali-a nyarwa dhedho mwanee dhagumanana liye. Mwasiwa ngwan’ni? Chini inairi-e ira Baba waudhivela aire vyongo mundhila yen’na? Mogwandela ninooda onga ira ndi udhivela. Sembe ya Yesu ndi umboni ulukulu oi Yohova unodhiveliwana a-ima a Adamu na Eva. Sembila inothonyi-edha ira Yohova unoudhiveliwanani maningi. Liye atoirana vyongo vilukulu vorumeli-a ira avwe upha oophi-a naifunelo yoi auvulumucheni wu vyodawa na wukwa. (1 Ju. 4:9, 10) Ee-no, liye unofuna kami-a mutu uliwethene wa i-yo ira aganyali vakhondo yolimbanana vyodawa. w24.08 6 ¶13-14

Ninooda vwechecha pama ira Yohova unonidhiveliwana, nathuulela mwemo mwavwela liye upha ira avelele kuto. Satana unoonga ira kavali rumiwi wa Yohova unakaleve ororomeleya akala utogumanana nyarwa ilukhulu. Vofuna runi-a yonamila, Yohova atoorumela ira Yesu arucheye a-anakwe. (Yob. 2:1-5) Yohova anoona Yesu vyanyoziwa liye naamwidanee, khomiwa naanyakhondo thitho khomeliwa vaimurini. Yohova anoona Mwanee odhiveliwiula arucheyanga namwasa ovwa upha fiyedha wukwa. (Mat. 27:28-31, 39) Yohova atookaana kopolo dhokhondi-a vyothene vyevi ira vya-aireye. Mofwanafwani-a, atu oruni-a vyaonga aliwa ira: “Nlunguwo am’vulumuche akala unom’funadi,” liye angaodile irana vyevi. (Mat. 27:42, 43) Mbwenye aakale ira Nlungu atooirana vyevi, kuto kwaaveleliwe thitho kanakaena idedi-edho. Ee-no Yohova atoorumela ira Mwanee arucheye fiyedha wukwa. w25.01 22 ¶7

Vanisani 16, 33 K.A., anamafunjedha a Yesu tatokaana tangaranga thitho ova. Anamafunjedhee ambili takuma wu Yerusalemu dhowanga wu Emau, Alombwanao tali osukwala maningi namwasa oi Yesu wa-arela aliwa ali angaphiwile wene. Mutu mwinango atooroma wenda vambo-i naaliwa. Aliwa tatoom’mwandela mutuo vyongo vyodabwi-a vyam’mwireele Yesu. Mutuo atootapanya naaliwa vyongo vyoi kataode vidiwala. Liye atoawandela mwasee Yesu afwanela rucheya noukwa vo-indi-edha basa “vyalembile Mose na vyalembile Anamaongela.” Angafiile wu Emau, mutuo atoodhioneeli-edha ira ali Yesu thitho atoovenyathi-iwa. (Luk. 24:13-35) Va malambo 40 omari-a aingumiyee yavailambo-i, Yesu atooneela fendo dhingasi wa anamafunjedhee. Vahora yen’na, anamafunjedha a Yesu enao ali atangaranga thitho ova, tatoochinja roma sangalala nokala olimba rima volaleela nofunji-a atu vyokuza Umwene wa Nlungu. w24.10 12 ¶1-3

Vavira hora, mwana unoulukula kala ndimuwa, mbwenye ulukula mwauzimu kunoireya vaokene. Ifwanafwani-o ndi vyaireele abali awu Koritiyo. Aliwa tatoowachela milanyu yapama, tatoobadiziwa, tatoowachela zimu ochena thitho tatoofunjedha vyongo vinjinji kumela mumalangi-o a rumiwi Paulo. (May. 18:8-11) Mbwenye angalive ira vatoovira hora indendai venango vyawa vinjinji kumela vahora yabadiziwile aliwa, anjinji mwaaliwa tali o-olimba mwauzimu. (1 Ak. 3:2) Ira nifiye voulukula mwauzimu, yoroma ninofwanela kaana rima ofuna kala olimba mwauzimu. Atu enao anosakula kala “o-oidhiwa vyongo,” nodhowanganave kala a-ima mwauzimu, katinodhowa vasogolo. (San. 1:22) Kaninofwanela kala ninga andimuwa enao anonyindela anamabaliwa ira taasakulelenga vyoira. Malomwee ninofwanela onechecha ira ninaadhowanave ulukula mwauzimu. Akala munaadhilimbi-edha ira muulukule mwauzimu, mum’vepenga Yohova ira auva-eni “rima ofuna irana vyongo vinodhiveliwana liye thitho kopolo dhoirela vyongovyo.”—Afl. 2: 13. w24.04 4 ¶9-10

Yohova unoniwandela mwemo munovwela liye vamwasa otonga atu. (Zak. 33:11) Yohova kanombaranya tonga atu. Liye ngwatangaranga dhilukulu thitho unothonyi-edha tangarangadho akala pyofuneeleya. N’nga ninoidhiwa vyongo vivi vyokuza atu enao a-anofuna dhavenyathi-iwa? Bibilya linoonga vifwanafwani-o vyoyeva. Yesu atoonga ira Yudasi Sikarioti kanodha venyathi-iwa. (Mrk. 14:21; muone thitho lemba la Juwau 17:12 na madhu akomoni.) Yudasi, moidhiwa thitho mwakomove, atooira vyongo moruni-ana na Yohova Nlungu thitho Mwanee. (Muone Marku 3:29 na madhu akomoni.) Molandana na vyevi, Yesu atoonga thitho ira anamasogolela amareligiau enao tam’runi-a, katina idedi-edho yodhavenyathi-iwa. (Mat. 23:33; muone lemba la Juwau 19:11 na madhu akomoni “lombwana.”) Rumiwi Pedru atoowenjeli-a thitho ira atu opanduwa o-ochinyuwa katinodha venyathi-iwa.—Aeb. 6:4-8; 10:29. w24.05 4 ¶10-11

Navolowa tendani mwa Yohova ninobareleya uvyongo vinanonge thitho uxamwali-u na liye unonikhami-a kaana idedi-edho. Nadhowanave khala vauxamwali na Yohova, Satana kanaode irana yongo iliyothene inaniphei-e modhowa nodhowa. (1 Ju. 3:8) Yohova unodha dhowanave barela afwee ororomeleya wu vyongo vinaaphei-e mwauzimu masiki wukwa. (Apk. 21:4) Onga mwaimbarimbari, ndi ngari ilukulu khala alendo tendani mwa Yohova thitho ninosangalala khala vauxamwali na liye modhowa nodhowa. (Zak. 37:27) N’nga ninofwanela iranan’ni ira nidhowenave khala alendwee? Akala mutoitaniwa na fwinyu, munooda funanga idhiwa vyongo vinodhiveliwana liye ira muviirena. Molandana na vyevi, i-yo thitho ninofuneela idhiwa vyongo vinadhiveliwena Yohova ira atu anofuna khala alendo tendanimwee taviirengana. M’dhiveliwana Yohova unonilimbi-a ira niirenga vyongo vyothene vinaode i-yo ira “nim’sangalali-enga va yongo iliyothene.” (Ako. 1:10) Kanidiwalenga irana vyongo vyevi thitho hora dhothene nim’va-enga lemezo nlukulu. Vyevi vinodha nikami-a rambela vyongo vinam’sukwali-e. Ee-no nili ofunechecha ira “niwendenga modhiyevi-a na Nlungwi-u.”—Mik. 6:8. w24.06 4 ¶8-9

Yohova atom’vepha Abarahamu ira avelela mwanee Isaki ninga sembe. Vyevi vyali vyorucha maningi wa Abrahamu. Mbwenye angalive ira vyali e-no, liye ali okozeya vwela. Anga-adhi vang’ono ira am’phe mwanee, Nlungu atom’kondi-a. Ifwanafwani-o yei inofunji-a atu othene anororomela Nlungu likhundo laimbarimbari lofuneya maningi. Likhundo lee toi, Yohova ali ofunechecha velela mwanee odhiveliwiwa ninga sembe. Vyevi vinothonyi-edha ira Yohova unodhiveliwana maningi atu. (Mar. 22:1-18) Vangavirile vyawa vinjinji, Nlungu atoovelela ilamulo wa Israeli yothonyi-edha ira atu a Nlungu tanoofuneela velela sembe dhinjinji ira madawiwa taleveleliwe. (Lev. 4:27-29; 17:11) Sembe dhedhi dhaimelela sembe ilukulu yeniyo yafuna dhavulumucha atu wu vyodawa na wukwa. Anamaongela a Nlungu tatoowandeliwa ira talembe vyokuza ziza lolanyedhiwa, wenuo ngu mwana wavakhundu wa Nlungu, ira unodha oni-iwa nyarwa nophiwa. na ifunelo yoi avulumuche atu thangani-avo nyo wu vyodawa na wukwa!—Esa. 53:1-12. w24.08 4 ¶7-8

Akala munolerecha Bibilya muonechechenga ira mutofwanya ndhila yo-indi-edha basa vinoleri nyoovyo. Mwaleringa ikhundu inango ya madhu a Nlungu, mudhifukenga ira, ‘N’nga ndina-indi-edhe a-vi basa vyongo vyevi va-eeni venango sogolou?’ Mwaifwanafwani-o, nifwanafwani-edhe ira munoleri Bibilya va lemba la 1 Atezalonika 5:17, 18. Vasogolo voleri maversu melala, munooda roma imela nothuulela akala munolobelecha vaduzi navaduzi mokumela vathi va rima. Munooda thuulela thitho vyongo vinosimba nyo venango munooda thuulela vyongo viraru viuwireleni Yohova nom’simba. Akala munoirechana vyongo vyevi munodha kala mutu unovwa madhu a Nlungu noa-arelanga. Munodha ganyali maningi mwairangana vyongo vyevi dambo nlilothene va maversu a Bibilyani anoleri nyo. Mwaira ee-no munodha kala mutu unoirana vyongo vinoonga madhu a Nlungu. w24.09 4-5 ¶9-10

Yohova anipanduchile mundhila yavakhundu. Angalive ira ninosangalala nawachela, ninosangalala maningi nava-a atu enango vyongo. Ninodhivwa pama nakami-anga Makristau afwi-u thitho ninosangalala tanisimbanga. Mbwenye akala mutu utonisimba venango kabe, i-yo ninosangalala namwasa oira vyongo vyofwanelela. Kamudiwale ira mwava-anga vyongo, “Yohova unodha uva-ani vyongo vinjinji kwaranya vyevyo.” (2 Li. 25:9) Kaninava-e vyongo kwaranya moda munaniva-e Yohova. Kavali yongo yosangalali-a ninga weli-edhiwa na Yohova. Ee-no dhoweni nidhowenanive m’sazi-edha Babi-u wadhulu wenuo uli ova-a. w24.09 31 ¶20-21

Yohova ngwatangaranga. (Sal. 103:13; Esa. 49:15) Yohova unothuulela atu enango navwanga upha naliye thitho unovwa upha. (Zka. 2:8) Liye unofunechecha ira nikale afwee. (Sal. 25:14; May. 17:27) Yohova ngodhiyevi-a, “unothitha chindo ira aone dhulu na ilambo yavathi. Unovenyathi-a mutu onyozeya nom’khumi-a tumbuluni.” (Sal. 113:6, 7) N’nga i-yo othene ninofuna velela titimi-o wa Nlungwi-u lukhulu? Ninovelela titimi-o wa Yohova namwasa oi ninofuna ira atu enango tam’mwidhiwe. Atu anjinji katinom’mwidhiwa pama Yohova. Vili e-no namwasa oi Satana utowairi-a aona voonga vyonama vyokhuza Nlungu. (2 Ak. 4:4) Satana utoiri-a atu roromela ira Yohova ngwauwalanga, kanobala vyaatu thitho ngwenuo unoiri-a nyarwa dhinjinji vailamboi. Mbwenye i-yo ninoidhiwa vyaimbarimbari vyokhuza Nlungwi-u. Nitokaana ngari yokami-a atu enango idhiwa vyokhuza Yohova thitho m’va-a titimi-o.—Esa. 43:10. w25.01 3 ¶6-7

Muhora ya Yesu, atu oruni-a tanoonga vyongo vyonama vyokuza mwana Nlungu walongomano wenuo airana vyongo vyodabwi-a. Mofwanafwani-a, anamasogolela amareligiau tanoowandela atu ira kopolo ya-indi-edha basa Yesu vokumi-a viwanda, ava-iwile na “namatonga wa viwanda.” (Mrk. 3:22) Vahora yaombiwa Yesu landu, anamasogolela amareligiau taonga ira Yesu ngonyoza Nlungu thitho tatoolimbi-a atu ira liye aphiwe. (Mat. 27:20) Vasogolovee, anamafunjedha a Kristu vyalaleela aliwa milanyu, atu oruni-a “tatoowandela atu amaziza enango vyongo vyothakala noadodomi-a mathuulelo” ira taoni-enga nyarwa Makristau. (May. 14:2, 19) Voonga vya lemba la Mayirelo 14:2, Nsanja ya Olonda ya 1 wa Dezembro wa 1998, yaongile ira: “Malo mokonda milanyu ila, Ayuda aruni-ao tatooroma kopa atu amaziza enango ira taidanenga na Makristau.” Malamboano, liye “unaadimeli-a ilambo yothene weo uli atu.” w24.04 11 ¶15-16

Venyathi-iwa waatu kunonyindela ira ukwide hora iivi. Yohova ngunamatonga olongomana thitho hora dhothene unotonga molongomana. (Sal. 33:4, 5) Ee-no ninooda kala osikimizela ira “Namatonga wa ilambo yothene yavathi” unodha irana vyongo mofwanelela. Pyovweya thitho onga ira venyathi-iwa wa mutu ira akaena ingumi yo-omala, kavinonyindela weo unokala liye. Pyo-ovweya ira Yohova unodha tonga atu anjinji ira ndi “mbudi” namwasa oi takalecha muilambo yoi katana ngari yovwa milanyu yapama ya Umwene wa Nlungu. (Mat. 25:46) Namatonga olongomana wa ilambo yothene, unowathuulela maningi atu enala kwaranya i-yo. Kaninoidhiwa mwemo Yohova munairele liye vyongo vahora ya nyarwa ilukulu. Pyooneelatu ira enango mwaatu enala anodha kaana ngari yofunjedha vyoonga Yohova, m’roromela thitho roma m’labela vahora inofuna liye dhacheni-anga dhinalee.—Zak. 38:16. w24.05 12 ¶14-15

Hora dhothene atu a Yohova anokami-ana. (2 Ak. 8:4) Mbwenye hora dhinango aliwa anofuneela kala olimba rima ira tairena vyevyo. Mwaifwanafwani-o, wakala khondo andimuwa avapingoni anozindiyela ira abali naarongoliwa, anofuneela limbi-iwa, va-iwa vyongo vinofuneela aliwa vaingumiiwa thitho yodya yauzimu. Namwasa odhiveliwana mabila, aliwa anorumela e-la ingumiiwa vangovini ira tavelele kami-o lofuneela wa abaliwao. Akala mutovepiwa ira mukami-e abalinyu vahora yorucha, n’nga munathonyi-edhe a-vi limba rima ninga Zadoki? (1) Mu-arelenga malangi-o. Vahora ninga yen’na munofuneela ira vyongo movwelana. Munofwanela a-rela malangi-o okumela wu ofesi ya tambi. (Aeb. 13:17) Hora dhinango, andimuwa anofwanela onanga masaka-edho airile aliwa vamwasa okozeela ngovi thitho a-rela malangi-o agulu vahora ya ngoviyo. (1 Ak. 14:33, 40) (2) Mukalenga olimba rima thitho muirenga vyongo mosamala. (San. 22:3) Muromenga thuulela mwa-anaire vyongo vinangovyee. Mudhilimbi-edhenga ira mukale obareleya. (3) Mum’nyindelenga Yohova. w24.07 4 ¶8; 5 ¶11

Mwene Davide anoom’mwidhiwa Yohova thitho m’nyindela. Vevo Davide vyafuna liye phiwa naamwidanee, atoolobela wa Yohova ira am’kami-e. (Nlungu angawakunle lobelolee nom’vulumucha, Davide atoonga ira: “Yohova ndiingumi yanga!” (Sal. 18:46) Voonga madhu enala, Davide kaathapulela ira ate idhiwa baa-i ira Nlungu utokalao. Bukhu n’nango laongile ira Davide anoororomela ira Yohova ndi “Nlungu waingumi wenuo unokami-a atwee hora dhothene.” Vyongo vyaireile vaingumi ya Davide, vyatoom’sikimizeli-a ira Yohova ngwaingumi thitho vyatoom’limbi-a ira adhowenave m’labela nom’titimi-a. (Sal. 18:28, 29,49) Roromela ira Yohova ngu Nlungu waingumi, unooda nikami-a ira nim’labelenga na rimi-u wethene. Ninooda fwanya kopolo ira nivilele vyowesedha thitho niirenga vyongo vinjinji vom’labela. Ninooda thitho kala ofunechecha dhowanave kala vauxamwali na Yohova. w24.06 20-21 ¶3-4

N’nga ninofunjedhavon’ni va madhu a rumiwi Paulo odhowa wa Atezalonika? Navwanga vyongo vyoi kavinovwelana na vyongo vinofunjedha i-yo Bibilyani venango vyongo vyonama, ninofwanela ira vyongo mwazelu. Muilambo yeniyo voroma yaromoliwa ira União Sovietica, amwidani-u tatoomwadha karta yooneya ninga ikumele wu Gulu li-u Lotonga. Kartalo latoolimbi-a abali enango ira taire masaka-edho okaana ixigulu inango yoviimelela vaokene. Kartalo laoneyadi ninga lakumele wu Gulu li-u Lotonga. Mbwenye abali ororomeleya katanami-iwile. Aliwa tatoozindiyela ira milanyu ya kartalo, kayavwelana na vyafunji-iwa aliwa. Malamboano amwidani-u tano-indi-edha basa ndhila dhipya ninga matelefoni na makoputadore vofuna ira tanidodomi-e venango niiri-a ira na-avwelanenga. Malo morumeli-a ira mutu uliwethene “achinje mathuulelolwi-u” enao ali olinyali, ninooda vibarela vothuulela mwapolepole vyongo vivwide i-yo venango leri akala ira vinovwelana namakhundo aimbarimbari anowaidhiwa i-yo.—2 At. 2:2; 1 Ju. 4:1. w24.07 12 ¶14-15

Mwasa nlukulu ofuneya maningi wenuo mutu uliwethene unofuneela liye sakula, ngokuza dhivelela wa Yohova nokala mubanja laatu anom’lambela. Yohova unofuna ira mutu uliwethene airena vyevi. Mwasiwa ngwan’ni? Yohova unofuna ira atu takale vauxamwali na liye thitho tadhakaena ingumi yo-omala. (Dot. 30:19, 20; Agl. 6:7, 8) Mbwenye Yohova kanokhanyi-edha mutu uliwethene ira am’labelenga. Unofuna ira mutu uliwethene asakulenga ekhene vinofwanela liye irana. N’nga chini inoireya akala Kristau obadiziwa kavwenle lamulo la Nlungu amala liye irana yodawa ilukulu? Akala kanochinyuwa, unofwanela kumi-iwa pingoni. (1 Ak. 5:13) Mbwenye angalive ira vili e-no, Yohova unodedi-edhela ira mutu uirile yodauo awelele wa liye. Ngu mwasiwa atoovelela kuto ira atu odawa enao anochinyuwa, taleveleliwenga. Nlungwi-u waudhivela unovepa atu airile vyodawa vilukulu ira tachinyuwe.—Zka. 1:3; Aro. 2:4; Yak. 4:8. w24.08 14 ¶1-2

Muhora yalembile rumiwi Juwau kartalee laneraru, atu enango tatooroma mwadha milanyu yonama, vyevi vyatooiri-a ira atu pingoni ta-avwelanenga. Mbwenye atu enango tatoodhowanave “wenda muimbarimbarini.” Aliwa tanom’vwela Yohova thitho tatoodhowanave “a-rela malamulwee.” (2 Ju. 4, 6) Makristau ororomeleyala, tanom’sangalali-a Juwau na Yohova. (San. 27:11) N’nga ninofunjedhavo n’ni? Kala ororomeleya unoniiri-a kalanga osangalala. (1 Ju. 5:3) Mwaifwanafwani-o, ninokala osangalala naidhiwa ira ninom’sangalali-a Yohova. Liye unosangalala aniona nikhondanga vyowesedha no-arela makhundo aimbarimbari. Angelo naaliwene thitho anosangalala dhulu. (Luk. 15:10) I-yo thitho ninokala osangalala Makristau afwi-u takalangave ororomeleya. (2 At. 1:4) Ilambwila yadha nongiwa, ninodha sangalala idhiwa ira natookalave ororomeleya wa Yohova muilambo yotongiwa na Satanila. w24.11 12 ¶17-18

N’nga hora yoi mum’mwidhiwe mutuo inofwanela kala indendai moi a-vi? Mwambaranyedha m’mandela mutuo mathuulelwinyu, munodha oneya ninga otamanga rima. (San. 29:20) Mbwenye thitho mwadembuwa munodha oneya ninga ovwalavwali-a simbwasimbwa akala mutu unom’funa nyo utoidhiwa ira munom’funa. (Nam. 11:4) Thuulelani ira mwa-anadhowe mam’mwandela mutuo mathuulelwinyu, kamuthuulelenga ira basi unourumelani. Mukalenga osikimizela ira muli okozeya kala vabanjani thitho muonenga ira mutu unom’funa nyo ngoufwanelelani. N’nga munaire a-vi akala mutozindiyela ira mutu mwinango unoufunani? Akala kamunom’funa mutuo kamuirenga vyongo kalanga ninga munom’funa. Kai pama iri-a mutu mwinango onanga ninga munom’funa angalive ira kamunom’funa.—Aef. 4:25. w24.05 22-23 ¶9-10

Ninoonga e-no namwasa oi ozoziwa ororomeleya baa-i mbanofuna tukuliwa venango ira wacheliwa na Yesu mu Umwene wa dhulu. Ozoziwa uliwethene a-adhowenave kala methove, kanodha tukuliwa vambo-i na “osakuliwee.” (Mat. 24:31) Mbwenye atu othene a Nlungu, akala atokaana idedi-edho yoi a-vi, anofwanela onanga madhu a Yesu ninga yowenjeli-a yowakami-a dhowanave kala methove thitho kala ororomeleya. Fiyedha va-eeni nitom’mwidhiwa pama Nlungwi-u. Kaninokaikela vyongo vinosakula liye. Kaninasukwale akala ira Yohova utosakula zoza atu enango ororomeleya malamboano. Ninothuulela ifwanafwani-o ya Yesu yoonga vyaatu enao tadhidhe dhalaba basa 5 hora yanamaulo. (Mat. 20:1-16) Atu enao aitaniwile ira tadhalabe mundani wa mauva namaulo, anodha wachela kobiri saasawa ninga atu enao tadhidhe dhalaba namaebe-i. Molandana na vyevi, akala ozoziwa tatosakuliwa vahora iivi, aliwa anodha wachela yotuva yiwa yadhulu akala atodhowanave kala ororomeleya. w24.09 24 ¶15-17

Yesu atooniva-a ifwanafwani-o yapama maningi ya moda munaire i-yo vyongo naireliwanga vyongo vyo-olongomana. Kathuulelani vyevyo vyaireliwile liye naabalee thitho atu enango. Abalee taonga ira utokaana mi-ala. Anamasogolela amareligiau taonga ira, anooira vyongo movwelana na viwanda thitho anyakondo awu Roma tanoom’nyoza, m’mwirela vyauwalanga thitho fiyedha m’pha. (Mrk. 3:21, 22; 14:55; 15:16-20, 35-37) Mbwenye Yesu atoovilela vyongo vyothene vyevi thitho kaaweli-edhe. N’nga ninofunjedhavon’ni vaifwanafwani-o yei? (1 Pe. 2:21-23) Yesu atoo-indi-edha basa ifwanafwani-o yothonyi-edha moda munofwanela i-yo iranga vyongo atu enango taniirelanga vyongo vyo-olongomana. Liye anooidhiwa hora yofwanelela kala opwaseya na yofwanelela onga. (Mat. 26:62-64) Liye kaaongavo yongo va yonama iliyothene yam’nukedha aliwa. (Mat. 11:19) Aonganga kaanyoza venango tucha atu tam’momba landwao. w24.11 4-5 ¶9-10

Nifwanafwani-edhele ira mutom’va-a mutu unom’dhiveliwana nyo yotuva yobaleya thitho inam’kami-e. N’nga munavivwe a-vi akala ute i-iya wene aithuulelave? Onga mwaimbarimbari, munodha sangalala akala ira unoi-indhi-edha basa thitho thonyi-edha simba. Molandana na vyevi, Yohova unosangalala nathonyi-edhanga ira ninosimba yotuva ya kuto thitho udhivela unonithonyi-edha liye voniva-a yotuva ya pereso yavadhulu! (Ju. 3:16; Aro. 5:7, 8) Mbwenye hora yaviranga, ninooda roma ona movevuwa yotuvila. Vinodha kala ninga nitukunle yotuva ya Nlungu noiponyedha venangovee. Vinokala ninga ninoisangalalana mbwenye kaninofuna ira ikalenga vooneya. Ira vyevi vya-aireye ninofwanela thuulelanga hora dhothene viniirele Nlungu na Kristu. w25.01 26 ¶1-2

Ira bali akale ndimuwa wavapingoni, “kakale obadiziwa wene.” Angalive ira kavinonyindela ira mutuo ubadiziwile walelene venango wa vyawa vinjinji ndulimu, vanofuneela hora ira aulukule mwauzimu. Mofwanafwana na Yesu, munofwanela kala odhiyevi-a thitho kala okozeya laba basa iliyothene inauva-eni Yohova. (Mat. 20:23; Afl. 2:5-8) Munooda thonyi-edha ira muli “ororomeleya” vo-arela makhundo olongomana a Yohova thitho malangi-o anoniva-a gulu. Malemba anoonga movweya pama ira namaing’anela unofwanela kala “oidhiwa funji-a.” N’nga vyevi vinothapulela ira munofwanela kala wadodoliso maningi voonga mwasa? Kabe. Andimuwa avapingoni anjinji ofwanelela, kai adodoliso maningi vofunji-a. Mbwenye anofunji-a mo-inda rima takala muurumiwini thitho va maulendo aubusa. w24.11 23-24 ¶14-15

Mwafwanya mwasa Bibilyani oi kamunouvwechecha pama, musakesakenga. Dambo nlilothene muthuulelenga vyongo vifunjedhile nyo vyokhuza Yohova, Mwanee thitho moda munoudhiveliwanani aliwa. (Sal. 119:97) Kamukaengana pwadho akala hora dhinango kamunofwanya makhundo mapya venango ova-a ifunelo vahora inoleri nyo nosakasaka. Vahoriyo munokala ninga mutu unosakasaka oro. Atu anosakasaka oro anomala mahora manjinji venango malambo ta-anafwanye na pedaswene ya oro. Aliwa anokala oleva rima namwasa oi anoidhiwa ira pedaso iliyothene ya oro chapereso yavadhulu. Mofwanafwana na vyevi, likhundo nlilothene la Bibilyani linafwanye nyo tapereso yavadhulu! (San. 8:10) Ee-no mulevenga rima thitho mudhowenganave leri Bibilya hora dhothene.—Sal. 1:2. w25.01 25 ¶14-15

Yohova unofuna ira nilevelelenga atu anonidawela. (Sal. 86:5; Luk. 17:4; Aef. 4:32) Ninooda sukwala maningi namwasa wa vyongo viongile mutu mwinango venango viniirele liye simbwasimbwa akala ira mutuo ngu fwi-u wavarimani venango bali-u. (Sal. 55:12-14) Hora dhinango upha unovwa i-yo unofwanafwani-edheliwa nolathiwa na mbene. (San. 12:18) Ninooda dhilimbi-edha vwalavwali-anga moda unodhivwela i-yo mbwenye irana vyevi unofwanafwana no-iyachi mbene vailondanivo. Moladana na vyevi, kaninofwanela dhivwa pama vovwalavwali-a moda unodhivwela i-yo. Hora dhinjinji yongo yoroma inoirecha i-yo, nasukwali-iwa kunyanyuwa. Bibilya linorumeli-a ira ninooda nyanyuwa. Mbwenye linoniwenjeli-a ira kanirumele ira nyanyuwao unitongenga. (Sal. 4:4; Aef. 4:26) Mwasiwa ngwan’ni? Namawasa oi nyanyuwa kaunokaana vyo-arelavo vyapama. (Yak. 1:20) Kathuulelani, nyanyuwa unoireya okhene, mbwenye ninaasakula ira nikaleve onyanyuwene. w25.02 15 ¶4-6

Yesu atoothonyi-edha ira kai zelu kaana kobiri mbwenye a-kala “ofuma wa Nlungu.” (Luk. 12:16-21) Vale aongile ira vyabebe-i kavinoidhiweya. (San. 23:4, 5; Yak. 4:13-15) I-yo Makristau ninogumanana nyarwa dhinango. Yesu atoonga ira ninofwanela kala okhozeya i-ya fumi-u ira nikale namafunjedhee. (Luk. 14:33, na madhu achindo.) Makristau awu Yudeya tatoorumela i-ya vyongo viwa thitho katadungunya. (Aeb. 10:34) Malamboano thitho abali naarongola anorumela i-ya vyongo viwa venango mabasiwa naifunelo yoi ta-avolowele vyandale. (Apk. 13:16, 17) N’nga chini yaakami-idhe irana vyevi? Aliwa taroromela maningi yolanyedha ya Yohova yoi: “Kandinodha u-iyani venango utawani navang’onovene.” (Aeb. 13:5) Ninodhilimbi-edha khozeela vyasogolo, mbwenye nagumanana nyarwa mo-odedi-edhela ninororomela ira unodha nikami-a. w25.03 29 ¶13-14

Yohova kanodedi-edhela ira niulukulenga okene mwauzimu. Ee-no utoniva-a anamakumbiza na anamafunji-a pingoni enao afunji-iwile pama ira takami-enga mutu uliwethene naifunelo yoi takale “andimuwa” mwauzimu nofiya “kala owarala mwauzimu ninga mwemo mwakalele Kristu.” (Aef. 4:11-13) Yohova unoniva-a thitho zimu ochena ira unikami-enga kaana “mathuulelo a Kristu.” (1 Ak. 2:14-16) Mbwenye Yohova atoowandela atu ira talembe mabukhu 4 amilanyu yapama ira tanithonyi-edhe mwemo Yesu mwairela liye vyongo angali vailambo yavathivano, mwathuulela liye na mwaongela liye. Nasazi-edhanga mathuulelo a Yesu namwemo mwairela liye vyongo, ninooda kala Makristau olimba mwauzimu. Mbwenye ira niulukule mwauzimu, “ninofwanela funjedha vyongo vinjinji a-kala makhundo oroma oonga vya Kristu baa-i.” w24.04 4-5 ¶11-12

Dambo nlilothene ninofuneela sakula vyoira. Vinango mwavyongovi vinokala vyo-orucha ninga sakula vyongo vinadye i-yo bebe-i, na vinadye i-yo vahora inofuna i-yo gona. Mbwenye vatokala vyongo vinango vyorucha namwasa oi vinokuza tutuli-u, atu anowadhiveliwana i-yo, lambela wi-u thitho akala ninodha kala osangalala venango kabe. Ninofuneela sakula vyongo vinanikami-e thitho kami-a banja li-u. Mbwenye yofuneya maningi choi ninofuna ira vyongo visakhunle i-yovyo, vim’sangalali-enga Yohova. (Aro. 12:1, 2) Yongo yofuneya ira mutu asakule pama vyoira, kuidhiwa makhundo othene. Mwasiwa ngwan’ni vyongo vyevi pyofuneya? Nifwanafwani-edhele ira mutu utokaana yorucha ilukulu thitho utogumanana ifirimero. N’nga ifirimero unodha m’va-a mirombwe a-anam’fuke mulimbo buleluo? Kabe. Nyo thitho munodha sakula vyoira mwaidhiwa makhundo othene okuza mwasuo. w25.01 14 ¶1-3

N’nga ndi vyongo viivi vinoidhiwa i-yo vyokuza tangaranga dha Yohova? N’nga Yohova uthonyi-edhe a-vi ira “kanofuna ira mutu uliwethene adhanongiwe”? (2 Pe. 3:9) Kathuulelani mwemo mwathonyi-edhele liye tangaranga waatu enango enao tairile vyodawa vilukulu. Mwene Davide atooira vyodhawa vilukulu ninga unyambi thitho upha mutu. Mbwenye Davide atoochinyuwa thitho Yohova atoom’vwela tangaranga nom’levelela. (2 Sa. 12:1-12) Mwene Manase atooira vyongo vyothakala maningi wahora indedai vaingumiyee. Angalive ira vyali e-no, Yohova atoom’vwela tangaranga nom’levela namwasa oi atoochinyuwa. (2 Li. 33:9-16) Vifwanafwani-ovi vinonithuucha ira Yohova unothonyi-edha tangaranga akala vatokala mwasa othonyi-edhela tangarangadho. Liye unodha venyathi-a atu ninga enala namwasa ozindiyela ira atoira vyodawa vilukulu nochinyuwa. w24.05 4 ¶12