Março

Mbwenye Bibilyani ninolerimo vyaatu olongomana enao tadhidhe kala atu o-olongomana. Ifwanafwani-o nja mwene Solomu. Liye atoofunji-iwa pama ndhila dha Nlungu thitho Yohova atom’raeli-a maningi, mbwenye vasogolovee atooroma lambela milungu yonama. Vyodawavyee vyatom’thakalelui-a maningi Yohova thitho Aisraeli tatoorucheya na vyo-arelavovyee wa vyawa vinjinji. Pyaimbarimbari ira malemba anoonga ira Solomu “atoolokotiwa masiyeni,” vambo-i na anamabalee thangani-avo Davide wenuo ali ororomeleya. (1 Ma. 11:5-9, 43; 2 Ma. 23:13) Vyevi kavinothapulela ira atu othene enao akwide anodha venyathi-iwa, kalanga ninga mutu akwa pyoi baa-i utokaana ufulu odhakaana okoka ingumi. Venyathi-iwa chotuva inovelela Nlungu mwaudhivela. Thitho unoivelela waatu anofuna liye dhaava-a ngari yodham’labelanga modhowa nodhowa. (Yob. 14:13, 14; Ju. 6:44) N’nga solomu unodha wachela yotuva yei? Yohova ekene ngunoidhiwa, i-yo kaniidhi. Mbwenye yongo inoidhiwa i-yo choi Yohova unodha irana vyongo mwalongomano. w24.05 4 ¶9

Nadhivelela nokhala vauxamwali na Yohova, ninokhala alendo mutendanimwee lopipirisa, ninofwanya yodya yauzimu yokwakwanela thitho ninokhala vauxamwali wapama naatu enao ali alendo a Yohova. Tenda la Yohova kalinofwanyeya uikhundu imbo-i baa-i. Tenda la Yohova linofwanyeya uliothene weo uli arumiwee ororomeleya. (Apk. 21:3) N’nga a-vi vyaatu ororomeleya enao akwide? N’nga pyovweya onga ira aliwa mbaalendo mutenda la Yohova? Ee. Mwasiwa ngwan’ni ninoonga e-no? Namwasa oi Yohova unowathuulelave, wa liye mbaingumi. Yesu atoonga ira: “Vyoi atu okwa anodha venyathi-iwa masiki Mose atoonga vamwasa wa thakuru la minga vaongile liye ira, ‘Yohova ndi ‘Nlungu wa Abrahamu, Nlungu wa Izaki na Nlungu wa Yakobo.’ Liye ngu Nlungu waatu aingumi, a-kala okwa, namwasa oi wa liye othene enala mbaingumi.”—Luk. 20:37, 38. w24.06 3 ¶6-7

Zadoki atoodhowa wu Heburoni angatukunle mafarametwee akhondo thitho ali okozeya koma khondo. (1 Li. 12:38) Zadoki ali ofunechecha m’kami-a Davide vakondo yolimbanana amwidani Aisraeli. Angalive ira venango Zadoki kaana dodoliso lokoma khondo, mbwenye ali olimba rima. N’nga Zadoki wenuo ali mulimbo velela sembe, afunjedhile uvi kala olimba rima? Liye akalecha vambo-i naatu enao tali akopolo thitho olimba rima. Vifwanafwani-o viwa, vyatom’kami-a maningi. Mwaifwanafwani-o, limba rima wa Davide vevo “vasogolela liye Aisraeli dhowa makoma khondo,” watoolimbi-a Aisraeli othene ira takale uikunduyee. (1 Li. 11:1, 2) Hora dhothene Davide anom’nyindela Yohova ira am’kami-e volimbanana amwidanee. (Sal. 138:3) Vatookala thitho alombwana enango enao tam’kami-edhe Zadoki kala olimba rima. Mwaifwanafwani-o, vatookala Yehoyada na mwanee Benaya enao tali anyakhondo akopolo, thitho anamasogolela 22 enao tali uikhundu ya Davide. 1 Li. 11:22-25; 12:26-28. w24.07 3 ¶5-6

Saulo wau Tarso atooira vyothakala maningi thitho anofuneela chinyuwa ira aleveleliwe. Liye anooni-a nyarwa mwauwalanga anama-arela a Kristu. Vinooneeya ira Makristau anjinji tathuulela ira kanaode chinyuwa nochinja. Mbwenye Yesu anoidhiwa ira Saulo unooda chinja. Yesu na Babee tanoona makalelo apama enao Saulo ana liye. Yesu aongile ira: “Mutu wen’na ndiiya yanga yosakuliwa.” (May. 9:15) Yesu atoofiya voirana vyodabwi-a vofuna m’kami-a Saulo ira achinyuwe. (May. 7:58–8:3; 9:1-9, 17-20) Angakanle Kristau, hora dhinjinji Saulo, oi vasogolovee aidhiweyana dhina loi rumiwi Paulo, anoosimba vyairile Yohova na Yesu vothonyi-edha tangaranga nom’riyela rima. N’nga Paulo airilen’ni angavwide yodawa inango vamwasa waunyambi waireile wu Koritiyo? Liye atoosamalela mwasula mundhila yeniyo inonifunji-a thonyi-edha tangaranga thitho ira Yohova unonilangi-a mwaudhivela nadawa. w24.08 13 ¶15-16

Wa vyawa vinjinji, Yohova ukadhi aonganga movweya pama vyongo vinakami-e atu odawa ira takale okoka vauxamwali na liye. Abeli wenuo ali mwana wa nambili wa Adamu na Eva, ali mutu oroma m’roromela Yohova, vasogolo voi anamabalee tatoodawa. Namwasa oi Abeli anom’dhiveliwana Yohova thitho anoofuna m’sangalali-a nokala vauxamwali na liye, atoovelela sembe. Abeli ali namakumbiza, ee-no atootukula enango mwaa-ima amabilee nowavelela sembe wa Yohova. Liye “atoosangalala na Abeli thitho sembee.” (Mar. 4:4) Yohova atoothonyi-edha ira anoosangalala na sembe dhavelela atu enango tam’dhiveliwana nom’roromela ninga Nowa. (Mar. 8:20, 21) Vorumela sembe dhedhi, Yohova atoothonyi-edha ira atu odawa, anooda kala okoka vauxamwali na liye thitho ira unooda sangalalanga naaliwa. w24.08 3 ¶5-6

Vinokala vyopa maningi thitho ninooda sukwala akala atu enango atoniirela vyongo vyo-olongomana. (Nam. 7:7) Arumiwi ororomeleya ninga Yobo na Abakuku, tatoovivwa thitho e-no. (Yob. 6:2, 3; Aba. 1:1-3) Angalive ira hora dhinango ninothakaleliwecha, ninofwanela kala osamala ira na-aire vyongo mo-okaana zelumbwenye irana vyevyo unooda iri-a ira vyongo vifiye vothakala maningi. Naona atu anoira vyongo vyo-olongomana vyongo vyaawendelanga pama, ninooda roma thuulelanga ira irana vyongo vyofwanelela ko-okami-a. Ifwanafwani-o nja mulimbo lemba Salimo mwinango wenuo aona ninga atu othakala vyongo vyanoawendela pama i-yani-a naatu olongomana. Liye aongile ira: “Vyevi ndivinoira atu othakala, anokala o-otekenyeya hora dhothene.” (Sal. 73:12) Liye atoosukwala maningi na vyongo vyo-olongomana vyaoni liye, moi atooroma kaikela akala m’labela Yohova wali okami-a. Liye aongile ira: “Ndangawesedhile ira ndivwecheche vyevi, vyali vyopei-a wa miyo.”—Sal. 73:14, 16. w24.11 3 ¶5-7

Ninovelela titimi-o wa Yohova namwasa oi ninom’lemeza maningi. Nitokaana myasa injinji ira nim’lemezenga. Yohova ngwakopolo dhothene, thapulela ira kopolodhee kadhina madile. (Sal. 96:4-7) Ninoona zeludhee mu vyongo vipanduchile liye. Yohova ngwenuo univa-idhe ingumi na vyongo vyothene vinonikami-a ira nikaenave ingumi. (Apk. 4:11) Yohova ngororomeleya. (Apk. 15:4) Yongo iliyothene inoira liye inowenda pama thitho hora dhothene unokwakwaneli-edha vyolanyedha vyee. (Yos. 23:14) Pyovweya ira namaongela Jeremiya atoonga vya Yohova ira: “Vari vaatu azelu othene amaziza aatu thitho vari va mamweniwa othene, kavali mutu uliothene olandana nanyo.” (Jer. 10:6, 7) Ee-no nitokaana myasa yapama yom’titimi-edhelana Babi-u wa dhulu. Kaiira ninam’lemeza wene Yohova baa-i, mbwenye ninom’dhiveliwana maningi. Kwaranya vyongo vyothene, ninom’lemeza Yohova namwasa oi ninom’dhiveliwana maningi. w25.01 3 ¶5-6

Amwidani a Nlungu anofuna ira vyongo vyapama vinoira atu a Nlungu, vioneyenga ninga vyongo vyothakala. Mofwanafwani-a, ninofunjedha kumela malembani ira Yohova unofuna ira atu anom’lambela takalenga auyesa, amakalelo apama thitho tam’lambelenga mundhila yorumeleya. Yohova unofuna ira mutu unoira vyongo vyothakala liye a-chinyuwa, akumi-iwenga pingoni. (1 Ak. 5:11, 12; 6:9, 10) I-yo ninovilimbi-edha a-rela lamulo la malemba enala. Mbwenye amwidani-u ano-indi-edha basa vyevi vofuna nionga ira kanili ololela, ninotonga afwi-u thitho kanina udhivela. Ninofwanela zindiela ira unoniruni-a ngu Satana. Satana Namanami-a, ngwaromi-idhe myasa yonama. Liye ngu “baba onama.” (Ju. 8:44; Mar. 3:1-5) Ee-no kanidabwe ira Satana uno-indi-edha basa atwee vomwadha myasa yonama yokuza gulu la Yohova. w24.04 10-11 ¶13-14

Nyarwa ilukulu yadharoma, pyooneelatu ira atu enango anofuna dhaona nongiwa wa “Babulo Nlukulu,” anodha thuulelanga ira Amboni dha Yohova tatoonganga vyongo vyevi. N’nga atu anofuna dhaona vyongo vyevi anodha chinja mirimiwa? (Apk. 17:5) Vyevi vinodha kala vyolandana na vyaireile wu Iguputu muhora ya Mose. Muthuulele ira “gurupu laatu amaziza o-iyana i-yana” tatookuma wu Iguputu vambo-i na Aisraeli. Pyooneelatu ira enango mwaatu enala tatooroma m’roromela Yohova tangaoni vyongo vyawenjeli-idhe Mose vyoonga misau 10 viireyanga. (Eki. 12:38) N’nga vyongo vyevi vyadhaireyanga Babulo Nlukulu angamadhi nongiwa, ninodha sukwala voona ira atu atoroma m’labela Nlungu unga-adhi hora yoyeva ira komoni ufiye? Kabe. Ninofuna m’sazi-edha Babi-u wadhulu wenuo “uli watangaranga na oriya rima, o-onyanyuwa mombaranya, waudhivela ulukulu, ororomeleya na waimbarimbari.”—Eki. 34:6. w24.05 11 ¶12-13

N’nga chini inaireye akala nito-iya a-rela “ifwanafwani-o ya madhu olinyali”? Muhora ya arumiwi Makristau enango tanoonga myasa yonama yoi dambo la Yohova lali lingamadhi fiya. Vinooneya ira vatookala karta yaonga vyongo vyevi thitho atu tathuulela ira alembile ali Paulo. Makristau enango awu Tezalonika tatooroma roromela mwadha ta-anafuke atu enango. Aliwa katanami-iwe aakale ira tatoothuulela vyongo vyaafunji-idhe Paulo vahora yali aliwa vambo-i. (2 At. 2:1-5) Liye atowalangi-a abaleao ira katiroromelenga vyongo vyothene vinovwa aliwa. Vofuna akami-a ira vyevi vya-aireyeve okhoka sogolou, Paulo atoomari-a lemba kartalee lanambili lodhowa wu Atezalonika na madhu oi: “Muwachele mwenyula wanga ulembile ngu miyo Paulo na dhandha langa. Hora dhothene ndinolembecha ee-ni mumakartanga othene ira muidhiwe ira ngu miyo ulembile. Mwemo pumunolembelecha miyo.”—2 At. 3:17. w24.07 12 ¶13-14

Makristau Aiebere, tafuneela vilela vyowesedha vahora vyongo vyadhowanave aliwa thakala wu Yudeya. Angalive ira Makristau enango tatooni-iwavo nyarwa ndulimu, anjinji tatookala Makristau vahora wali aliwa rendele. Rumiwi Paulo atoonga ira angalive aliwa tatoovilela vyorucha, katavilenle ninga Yesu wenuo afiyedhile piwa. (Aeb. 12:4) Namwasa oi atu anjinji tanookala Makristau, Ayuda oruni-a tatooroma nyanyuwa maningi thitho aoni-a nyarwa. Vyawa vyoyeva ndulimu, Ayuda okwaranya 40 “tatoolumbela voira dhitembelela ira katinodya venango umwa yomwa iliyothene fiyedha tangam’phide Paulo.” (May. 22:22; 23:12-14) Angalive ira tanooidiwa nooni-iwa nyarwa, Makristau ala tafuneela gumaneyanga, laleela milanyu yapama thitho limbi-anga iroromelo iwa. w24.09 12 ¶15

Juwau ali rumiwi wenuo Yesu wam’dhiveliwana liye maningi. (Mat. 10:2) Liye atoowenda na Yesu muurumiwee thitho atoona vyodabwi-a vyaira liye angali vambo-i vahora yorucha maninigi. Vahora yaphiwa liye atookalavo thitho atoom’mona aveyathi-iwanga. Juwau atoona pingo wa Ikristu uulukhulanga fiyedha vevo milanyu yapama “vyalaleeliwa aliwa vailambo yothene yavathi.” (Ako. 1:23) Komoni wa ingumiyee, Juwau atokaana ngari yolemba madhu ovudheleliwa na Nlungu. Liye atoolemba vyongo vyova-a ifunelo vyofwanyeya va “Apokalipse vyevyo vyavelenle Yesu.” (Apk. 1:1) Atoolemba thitho bukhu la milanyu yapama loidhiweya na dhinalee. Juwau atoolemba thitho makarta mararu ovudheleliwa. Karta laneraru ladhowa wa Kristau mwinango ororomeleya dhinalee Gayo wenuo wam’mona liye ninga mwanee. (3 Ju. 1) Vyongo vyalembile ndimuwa oululula, vikadhi vilimbi-anga anama-arela a Yesu amalamboano. w24.11 12 ¶15-16

Lombwana unodhiveliwana i-yanee, unom’mona ira ngwapereso yavadhulu. Unom’mona ira ndi yotuva yapereso yavadhulu yokhumela wa Yohova. (San. 18:22; 31:10) Unoira vyongo na liye moriya rima thitho mwalemezo masiki va myasa yokhuza gonana. Liye kanom’khanyi-edha i-yanee ira tagonanenga mundhila inairi-e ira i-yanuo a-avivwenga pama, avionenga ira ngo-okaana basa thitho ithuulela rimee im’ruchi-enga. Lombwanuo unodhililmbi-edha ira airengana vyongo vinam’kami-e kaana ithuulela rima yapama vamethoni va Yohova. (May. 24:16) Alombwana, idhiwani ira Yohova unoona thitho simba vyongo vinoira nyo volemeza a-iyaninyu. Dhowananive lemeza i-yaninyu vorambela kalelo lothakala thitho dhowanave irangana vyongo moriya rima, mwalemezo na mwaudhivela. Mwairangana vyevyo munodha thonyi-edha ira munom’dhiveliwana i-yaninyu thitho munom’mona ira gwapereso yavadhulu. Mwalemezanga i-yaninyu, munobarela yongo yofuneya maningi vaingumiinyu, yeniyo ndi uxamwalinyu na Yohova.—Sal. 25:14. w25.01 13 ¶17-18

Yongo imbo-i ino-iyani-a atu a Yohova naatu anoonga ira ndi Makristau, ndi thindhi linokaana aliwa volaba basa yolaleela. N’nga chini inonikami-a ira nidhowenave dhiveliwana basa yolaleela thitho ilabanga mwathindhi? Thuulela ifwanafwani-o ya Yesu, unooda nikami-a ira nilabenga basa yolaleela mwathindhi. Yesu angali vailambwila kaa-iidhe laba basila mwathindhi. Liye atoodhowanave kaana thindhi fiyedha komoni waurumiwee. Yesu ali ninga mutu asamalela munda wamauva wenuo asamalela thitho muri wasavu wa vyawa 3. Mbwenye muree kwaava-idhe vyova-a. Yesu atoolaleela wa Ayuda wa vyawa 3 thitho anjinji mwaaliwa katavuruwana milanywee. Mbwenye Yesu kaa-iidhe alaleela. Liye atooira molandana na mulimbo samalela mundule moi kaa-iidhe samalela muri nodedi-edhanga ira unodha va-a. (Luk. 13:6-9) Tapanya vyongo vyafunji-a Yesu thitho vyaira liye, unodha nikami-a ira nidhowenave kaana thindhi malamboano. w25.03 14-15 ¶1-4

N’nga munaire a-vi akala mutom’mona mutu mwinango oufwanelelani? N’nga ndi pama m’mwandela hora yeniyeni mwemo munodhivwela nyo? Bibilya linoonga movweya pama ira mutu wazelu unoroma idhiwa pama vyongo vinofuna liye irana. Ee-no ndi pama kaana hora yokwakwanela ira mum’mwidhiwe pama liye a-anaidhiwe ira munom’funa thitho mwa-anam’mwandele mathuulelwinyu. N’nga munaire a-vi vyongo mopwaseya akala munofuna m’mwidhiwa pama mutu mwinango? Vamigumano yapingo venango mwawaredhanga vamwinjini, munooda idhiwa mwemo mutuo munom’dhiveliwana liye Yohova, kalelolee thitho munoirela liye vyongo. N’nga unowaredha naatu avi? N’nga unodhiveliwana onga myasa yoi a-vi? (Luk. 6:45) N’nga vifunelo vyee pyolandana na vinyu? Munooda thitho fuka andimuwa apingoniwee venango Makristau enango olimba mwauzimu enao anom’mwidhiwa pama. (San. 20:18) Munooda afuka vya limbililee na makalelwee. (Rut 2:11) Vevo vanofuna nyo m’mwidhiwa mutu munofwanela ira polepole ira mwa-akalenga ninga munam’londa. Mulemezenga mathuulelwee, kamum’kanyi-edhenga thitho kamudhilimbi-edhenga sakasaka yongo iliyothene yokuza liye. w24.05 22 ¶7-8

Vom’sazi-edha Yesu, andimuwa avapingoni katinombaranyedha thuulela ira mutu uirile yodauo kanodha chinyuwave. Atu enango anooda thonyi-edha rima ofuna chinyuwa tagumanana komisau fendo yoromene, mbwenye waatu enango vanovira hora. Ee-no andimuwa avapingonao, anooda ira masaka-edho oi tamagumane okoka na mutu odauo fendo dhingasi. Pyoodeya ira vasogolo vogumana na liye fendo yoroma, Kristau odauo unooda thuulela viwandeliwile liye. Unooda lobela wa Yohova modhiyevi-a. (Sal. 38:18) Vaulendo o-arela unooda kaana mathuulelo o-iyana na ana liye vaulendo oroma. Andimuwa avapingoni anothonyi-edha tangaranga nooma rima vom’kami-a mutu odauo ira achinyuwe. Aliwa anolobela wa Yohova thitho anokaana idedi-edho yoi Yohova unoraeli-a thindhi liwa vom’kami-a Kristauo ira azindiyele vyongo vidawi-idhe liyevyo nochinyuwa.—2 Ti. 2:25, 26. w24.08 22-23 ¶12-13

Yohova kanofuna ira mutu uliwethene adhanongiwe. Mbwenye unofuna ira atu ochinyuwa tawelele wa liye. (2 Ak. 5:20) Ngumwasee wahora indendai thitho moweli-edha weli-edha, Yohova ukadhi awandelanga atwee ninga gulu na mutu uliwethene vaekene ira achinyuwe nowelele wa liye. Andimuwa avapingoni anolaba basa vambo-i na Yohova, vokami-a atu enao airile yodawa ira tachinyuwe. (Aro. 2:4; 1 Ak. 3:9) Dhulu unokala sangalala maningi mutu odawa achinyuwa. Babi-u wadhulu Yohova unosangalala thitho maningi libila lo-olowa lawelela pingoni. Ninom’dhiveliwana maningi Yohova nathuulela tangarangadhee noriya rimawee ulukulu.—Luk. 1:78. w24.08 31 ¶16-17

Aakale ira atoorumela vyevi angavolowele ndale dha Ayuda enao tatongiwa na Aroma. Ee-no liye kaarumenle. Bibilya linoonga ira liye ‘atookhumavo nodhowa mwangoni.’ Yesu kaaromile volowela ndale masiki ira atu enango tanom’kanyi-edha. Veva liye atoovelela ifwanafwani-o yapama wa i-yo. Pyoneelatu ira atu enango katinaniwandele ira niinjivi-e yodya venango ili-a atu modabwi-a. Katinaniwandele thitho ira nikale mwene venango namatonga. Mbwenye anooda nilimbi-a ira nivote venango kami-a mutu mwinango wenuo unom’mona i-yo ira unooda chinja vyongo. Yesu nguifwanafwani-o yapama vamwasula. Liye atookhonda volowela vyandale thitho vahora inango atoonga ira, “Umwenee kai wailambwila.” (Ju. 17:14; 18:36) Malamboano, Makristau anofwanela m’sazi-edha Yesu. Mofwanafwana na Yesu, ninokala ororomeleya wu Umwene wa Nlungu, ninowandela atu enango vya Umwenuo thitho ninoulobelela.—Mat. 6:10. w24.12 4 ¶5-6

Mwafunjedhenga, muthuulelenga moda muna-indi-edhe nyo basa vinofunjedha nyoovyo. Mofwanafwani-a, Mu-arelenga longomano la Nlungu voira vyongo mo-okaana sakulo naatu enango. Musazi-edhenga moda Yesu munodhiveliwana liye Babee naatu vokala ofunechecha irana vyongo vinofuna Yohova vokami-a atu enango angalive irana vyevyo korucha. Musazi-edhenga Yesu volaleela waatu enango naifunelo yoi naaliwene thitho takaena ngari yowachela yotuva yavadhulu yokhumela wa Yohova. Navilimbi-edhanga vwechecha no simba kuto, paevo vanom’dhiveliwana i-yo maningi Yohova na Mwanee. Vyo-arelavovyee pyoi naaliwene thitho anodha roma nidhiveliwana maningi. (Yak. 4:8) Ee-no nidhowenave laba mabasa othene aniva-idhe Yohova ira nifunjedhe vyokhuza kuto. w25.01 25 ¶16-17

Lemba la peneneli linooda thapulela ira: “Mutofudha madawanga othene ira mwa-aaoneve okoka.” Madhwala anothonyi-edha ira Yohova unofudha madawo amutu uchinyuwile noa-ela ulimburo loi kanaode aona okoka. Madhwala anoonga thitho ira: “Mutoiri-a ira [madawanga] akale ninga katiireileve.” Bibilya linosikimizela likhundo leli na madhu enango aifwanafwani-o yofwanyeya va lemba la Mika 7:18, 19. Maverswala anoonga ninga Yohova unaaponya madawi-u barani valimburo lodi-a. Walelene vyongo vyaponyedhiwa va barani valimburo lodi-a, kavyaodeya ira mutu amavikumi-emo. Vifwanafwani-ovi vinonikami-a ona ira Yohova anilevelela, ninoluluveliwa madawi-u. Ninga mwemo mwaongele Davide ira, “osangalala mbaatu oi atoleveleliwa vyoira viwa vyo-ovwela malamulo thitho madawiwa atoleveleliwa.” (Aro. 4:7) Weu kulevelela na rima othene! w25.02 9 ¶7-8

Malamboano vailamboi, vatokala paradaizo mwemo muli atu anjinji anokala opingeya voirana vyongo vyapama. Paradaizonimu mutokala atu mamilyau manjinji enao ali varendele waimbarimbari. Atu ali paradaizonimu, katinofuna kumamo. Aliwa anofuna ira atu anjinji tavolowemo. Wen’na ngu paradaizo wauzimu! Pyodabwi-a ira Yohova utosaka-edha paradaizo opwaseula muilambo yoi Satana utoiri-a ira mukale umwidani thitho atu amakalelo othakala na oophi-a. (1 Ju. 5:19; Apk. 12:12) Nlungwi-u waudhivela utoidhiwa nyarwa dhinogumanana i-yo muilamboi thitho unonibarela ira nidhowenganave m’labela mosangalala. Madhwee anoonga ira paradaizo wauzimula ndi “limburo lotawelamo” lobareleya thitho nli ninga “dimba lamathamba o-eleliwa pama ma-inje.” (Esa. 4:6; 58:11) Mokami-iwa na Yohova, atu ali paradaizonimu anokala osangalala thitho anovivwa ira mbobareleya mumalambo omari-a oruchala.—Esa. 54:14; 2 Ti. 3:1. w24.04 20 ¶1-2

Akala munofuna kala vabanjani, pyo-oira fuka ira mutolobela ira Yohova aukami-eni fwanya mutu ofwanelela. Imbarimbari choi Yohova kanolanyedha ira unodha m’va-a mutu uliwethene fwee om’fwanelela. Mbwenye Yohova unothuulela vyongo vinofuna nyo na mwemo munovivwela nyo thitho unooda ukami-ani vahora inosakasaka nyo mutu ofwanelela m’thela venango m’theliwanee. Ee-no dhowananive m’mwandela Yohova vyongo vinofuna nyo thitho mwemo munodhivwela nyo rimani mwinu. (Sal. 62:8) Mum’vepenga Yohova ira aukami-eni kala oleva rima thitho auva-eni zelu. (Yak. 1:5) Masiki vevo lombwana venango i-yana ofwanelela va-anofwanyeya liye mombaranya, Yohova utolanyedha ira unodha dhowanave udhiveliwanani thitho usamalelani. (Sal. 55:22) Mbwenye munofwanela ira polepole ira mwasa osaka i-yana venango lombwana wa-akale ofuneya maningi vaingumi inyu. (Afl. 1:10) Kala vauxamwali wapama na Yohova unooda ukami-a maningi kala osangalala a-kala kala vabanjani. (Mat. 5:3) Vahora ya-ali nyo vabanjani munooda kaana ufulu oira vyongo vinjini muurumiwini. (1 Ak. 7:32, 33) Mu-indi-dhelenga basa pama hora yen’na. w24.05 21 ¶4; 22 ¶6

N’nga munofwanela kala vaimweendi wahora yolapela moi a-vi? Ira vyongo motamanga rima hora dhinjinji unodhi-echa nyarwa. (San. 21:5) Ee-no munofwanela kala vaimweendi wahora yokwakwanela ira mum’mwidhiwe pama fwinyuo. Mbwenye kai pama kala vaimweendi hora indendai va-alive mwasa ovweya pama. Bibilya linoonga ira: “Yongo inodedi-edhelawee yaimwananeya rima unopha.” (San. 13:12) N’nga atu enango tanaire a-vi akala vatokala atu tali vaimweendi? Naaitanenga ira tadhadye yodya vambo-i na i-yo, taire vambo-i na i-yo lambela wavabanjani venango tadhaire vyongo vinango vyosangalali-a vambo-i na i-yo. (Aro. 12:13) N’nga vanofuneela mutu mwinango avelela, akami-a vamyasa ya mawendelo venango mamburo apama weo unatapanye aliwa vyongo vinango? N’nga akala ndi ee-no ninaakami-e a-vi vavyongo vyevi? (Agl. 6:10) Akala mutovepiwa ira muvelele atu ali vaimweendi, muonenga ira yeniyo ndingari yoi mwaakami-e afwinyuao. Muonechechenga ira kamwaa-iye okhene thitho mwaava-enga hora yoi taongenga myasiwa. w24.05 30 ¶13-14

Andimuwa avapingoni anosakasaka ira taidhiwe vyongo vyairi-idhe ira mutuo adawe. Mofwanafwani-a, n’nga Kristauo atofooka namwasa oi atoo-iya funjedha Bibilya vaekene venango no-iya dhowa muurumiwini? N’nga liye, anoolobelecha wiliwili venango alobela ninga mwailemeelo baa-i? N’nga liye, unolandeecha na vyongo vinolavela liye? N’nga unosakulecha modaweya atu owaredhana venango vyongo vyosangalali-a? N’nga vyongo vinasakula liyevyo, vikuzile a-vi rimee? N’nga liye unoidhiwa vyoira vyee, moda munom’kuzela aliwa Babee Yohova? Andimuwa avapingoni tafukanga vyofuka mwazelu, anom’kami-a mutu odauo ira akale othathuwa, thitho athuulele vyongo vinoirecha liye. (San. 20:5) Aliwa anooda i-ndi-edha basa vifwanafwani-o vofuna m’kami-a mutu odauo ira athuulele vyongo vyadawi-idhe liye Venango vaulendo oroma mutuo unooda roma dhivwela tangaranga na vyongo vinoirecha liye thitho unooda chinyuwa. w24.08 22 ¶9-11

Yesu anoolaleela mwathindhi milanyu yapama ya Umwene namwasa oi anooidhiwa ira vyevyo ndi vyafuna Nlungu ira liye airena. Yesu aona ira basa yolaleela yali yofuneya maningi wa liye. Masiki komoni wa urumiwee, liye anoowenda “masidadi na masidadi, thitho mamidhi na mamidhi” nofunji-anga atu. (Luk. 13:22) Yesu atoofunji-a thitho anamafunjedhee enango ira talabenga vambo-i na liye basa yolaleela. (Luk. 10:1) Malamboano laleela milanyu yapama ndi basa nlukhulu lelo Yohova na Yesu linofuna aliwa ira nililabenga. (Mat. 24:14; 28:19, 20) Ninodha dhowanave kaana thindhi va urumiwi-u naonanga atu ninga mwemo munowaonela Yohova. Liye unofuna ira atu anjinji tavwe milanyu yapama nokala arumiwee. (1 Ti. 2:3, 4) Ee-no unonifunji-a basa inalabenga i-yo yovulumucha ingumila. Masiki atu ta-avuruwane va-eeni, venango tanodha kaana ngari yofunjedha vya Yohova wari mwanyarwa ilukhulu komoni wa-anafiye. w25.03 15-16 ¶5-7

Kristau uliwethene unooda ira vyongo movwela na ithuulela rimayee yofunji-iwa pama Bibilya. Enango anooda sakula m’va-a mandha nom’mwenyula venango m’mwachela vagumanoni. Mbwenye kaninaode onga na liye wahora injinji venango waredhanga na liye. Enango anooda fukanga ira, ‘N’nga Bibilya kalinoonga ira mutu amwenyulanga mutu okumi-iwa pingoni unokala airangana vambo-i mabasee othakalao?’ (2 Ju. 9-11) Mwasa othene wava lembali, unothonyi-edha ira malangi-o ala taonga vyaatu opanduwa venango enao anolimbi-a makalelo othakala. (Apk. 2:20) Ee-no akala mutuo unolimbi-a makalelo opanduwa, andimuwa avapingoni katinoira masaka-edho oi tam’mwendele. Mbwenye vanokala idedi-edho yoi unodha chinja mathuulelwee. Vodedi-edhela hora yoi achinje, mutu oi ee-no kaninom’mwenyula venango m’mwitanela migumanoni. w24.08 30-31 ¶14-15

Yesu angadyi-idhe mwinji waatu, atoowandela anamafunjedhee ira tawelele Kafarnau va barkuni thitho liye atoodhowa mwangoni vofuna rambela mwinji waatu enao tafuna m’mva-a umwene. (Ju. 6:16-20) Arumiwao tangali vabarani liphevo latooroma thitho vatookala mabimbi malukhulu. Ee-no Yesu atoodha nowenda vadhulu va ma-inje. Adhamale atoom’mwitana Pedru ira awendenga vambo-i na liye vadhulu vama-inje. (Mat. 14:22-31) Yesu angafiile liphevolo latooparari. Vidhaire ee-no anamafunjedhao tatoodabwa maningi noonga ira: “Nyo muli Mwana Nlungu.” (Mat. 14:33) Pyova-a ifunelo ira aliwa tatoonga vyevi vasogolo voi Yesu atoowenda vadhulu va ma-inje angalive ira ali angairile yodabwi-a inango vodyi-a mwinji waatu. Marku atowenjedhela likhundo loi: “[Anamafunjedhao] tatoodabwa maningi. Namwasa oi katavwechechile thapulela wamapau ale.” (Mrk. 6:50-52) Aliwa tali ta-anazindiyeleve ira Yohova ali angam’va-idhe Yesu kopolo dhoirelana vyodabwi-a vinjinji. w24.12 5 ¶7

Vatokala yongo inango inaire i-yo vothonyi-edha simba udhivela wa Yohova. Yongoyee ku laba pama basa vahora ya ithuulelo. Vowenjedhela vokozeela ira nimafwanyeevo, ninooda itanela atu enango. Voitanela atwao ninooda ira pama awandela vyongo vinofuna dhaireya va mwambuo. Munooda ira pama aoni-a mavidiyo ava jw.org ninga oi Mwasiwa ngwan’ni Yesu utokwa? Thitho na vidiyo yoi Thuulela wukwa wa Yesu. Andimuwa avapingoni anofwanela itanela atu afookile. Dhulu unodha kala sangalala ulukhulu maningi libila limbo-i lodhimela akala litowelela guluni. (Luk. 15:4-7) Va dambo la ithuulelo, nidhilimbi-edhe mwenyula abali naarongola, simbwasimbwa achineneeva na enao ta-iidhe gumaneya vambo-i na i-yo. Dhoweni nidhairi-e ira takale othathuwa!—Aro. 12:13. w25.01 29 ¶15

Pyaimbarimbari ira kuto unonikami-a vwechecha ira Yohova ngwalongomano, mbwenye unonikami-a thitho idhiwa ira liye unonidhiveliwana maningi. (Ju. 3:16; 1 Ju. 4:9) Vyongo vinofunjedha i-yo vyokhuza kuto, vinothonyi-edha ira Yohova kanofuna ira nikaena ingumi yo-omala baa-i, mbwenye unofuna thitho ira nikale mu banjanimwee. Kathuulelani vi: Adamu angadawile, Yohova kaarumenle okoka ira akhale banjanimwee. Ee-no i-yo othene ninobaliwa wundhe wa banja la Nlungu. Mbwenye namwasa wa kuto, Yohova unolevelela vyodawa vi-u thitho vahoree unodha weli-edha atu othene anom’roromela nom’vwela mubanjalee. Masiki va-eeni ninooda kala vauxamwali wapama na Yohova na Makristau afwi-u. Onga mwaimbarimbari, Yohova unonidhiveliwana maningi.—Aro. 5:10, 11. w25.01 21 ¶6

Munooda rumela ira kuto ndi yotuva yapereso yavadhulu maningi. (2 Ak. 9:15) Namwasa oi Yesu atoovelela ingumiyee. Munooda kala vauxamwali wapama na Yohova Nlungu. Munodha kaana thitho idedi-edho yodha kaana ingumi yo-omala. Ninofwanela m’simba Yohova, voniva-a kuto namwasa oi unonidhiveliwana. (Aro. 5:8) Vofuna nikhami-a ira nisimbenga kuto thitho ira na-auonenga movevuwa, Yesu atooromi-a mwambo othuulela wukwawee. (Luk. 22:19, 20) Manene, mwambo othuulela wukwa wa Yesu unodha ireya Xinai va 2 wa Abril wa 2026. Mo-okaikela, othene ninoira masaka-edho ira nidhafwanyeyevo. Vahora ya ithuulelwila, ninodha ganyali maningi nathuulela viniirele Yohova na Yesu. Muyofunjedha yei ninotapanya vinofunji-a kuto vyokhuza Yohova na Mwanee. w25.01 20 ¶1-2

Munooda funjedha vyongo vinjinji vyokhuza udhivela wa Yohova Nlungu na Kristu Yesu, mwadhowanave thuulela vyongo viuireleni aliwa. Venango vahora ya ithuulelo ya manene munodha leri mosamala bukhu limbo-i venango mangasi a milanyu yapama. Munooda leri makapitulu manjinji vahora imbo-i. Mbwenye mwaleringa vang’ono navang’ono thitho musakesakenga myasa inango inauiri-eni ira mum’dhiveliwengana Yohova na Yesu. Mbwenye mudhilimbi-edhenga thitho wandela atu enango vyongo vinofunjedha nyo. Akala muli muimbarimbarini wa vyawa vinjinji, venango munooda onanga ira kamunaode fwanya makhundo enango mapya okhuza longomano la Nlungu, udhivelee, thitho kuto. Mbwenye imbarimbari choi kaninaode mari-a funjedha vyokhuza myasa dhedhi venango dhinango. N’nga munofwanela iranan’ni? Muleringa thitho funjedha myasa dhinango dha Bibilyani dhedho dhinofwanyeya mu mabukhwi-u. w25.01 24-25 ¶13-15