Fevereiro

Abali anothonyi-edha makalelo apama anokami-a maningi pingo. Mutu “ololela” unolimbi-a rendele. Ira mukale ololela, munofwanela vuruwananga atu enango taonganga thitho kala okozeya wendela mathuulelwiwa. Akala muli vari votapanya, n’nga munokala okozeya wendela makhundo enao abali anjinji anowaona aliwa ira mbofwanelela akala katino-iyana na makhundo a Bibilyani? Yohova kanokanyi-edha ira atu enango tairengana vyongo vinoona liye ira pyofwanelela. Unozindiyela upama okaana anamalangi-a anjinji. (Mar. 13:8, 9; San. 15:22) Malo mokala wauwalanga venango odhiveliwana kangana, munofwanela kala opwaseya na oira vyongo mosamala. Mutu odhiveliwana rendele ngunoroma irana vyongo mwarendele masiki vyongo viruche maningi. (Yak. 3:17, 18) Mwaonganga moriya rima, munooda didili-a mirima yaatu enango masiki atu oruni-a.—Ana. 8:1-3; San. 25:15; Mat. 5:23, 24. w24.11 23 ¶13

Angalive ira Kristu atoonikwela “fendo imbo-i baa-i,” vatokala vyongo vinjinji vinoira liye vonikami-a. (Aro. 6:10) N’nga ndi vyongo viivi vinoira Yesu? Liye unave laba basa ira aniva-e vyongo vyapama vyevyo vinoodeya namwasa wa kuto. Mofwanafwani-a, liye unolaba basa mwathindhi ninga Mwene, ndimuwa waalimbo velela sembe thitho muru wapingo. (1 Ak. 15:25; Aef. 5:23; Aeb. 2:17) Liye unolaba basa yogumani-a ozoziwa amwinji lukhulu thitho unomari-a irana vyevi nyarwa ilukhulu ya-anamale. (Mat. 25:32) Yesu unoonechecha ira arumiwee ororomeleya anowachela yodya yauzimu yokwakwanela malambo omari-ala. (Mat. 24:45) Thitho muutongee wa vyawa 1.000, unodha dhowanave nikami-a. Yohova unodha velela Mwanee na rima othene ira anikami-e. w25.01 24 ¶12

Yohova unonilevelela na rima othene thitho mwasuo unomalela vevo. Vyevi vinonikami-a kala vauxamwali wapama na Babi-u wadhulu. Ninothuulela ira levelela wa Yohova chotuva. Liye unoniva-a yotuvai namwasa waudhivelee thitho riya wee rima ulukhulu. Kanonilevelela namwasa oi ngu ufulwi-u ira anilevelele. Ninosimba maningi Yohova namwasa oi liye ngu Nlungu ‘unolevelela na rima othene.’ (Sal. 130:4; Aro. 4:8) Mbwenye Yohova anilevelela ninofwanela irana yongo inango yofuneya maningi. Yesu atoonga ira: “Mbwenye akala kamunolevelela atu vyodawa viwa, Babinyu wadhulu thitho kanodha ulevelelani.” (Mat. 6:14, 15) Ee-no ninofwanela m’sazi-edhanga Yohova volevelela atu enango. w25.02 13 ¶18-19

Kathuulelani vyaatu awu Sodoma na Gomora, Loti ali mutu olongomana ali vari viwa. N’nga ninoidhiwa akala Loti atoolaleela waatu othene enao? Kabe. Pyaimbarimbari ira aliwa tali atu amakalelo othakala, n’nga atu othene enao tanooidhiwa ira vi pyapama venango vi pyothakala? Kathuulelani ira gurupu laalombwana asidadimo lanoofuna i-ndela alendo a Loti. Bibilya linoonga ira vagurupunivo, vatookala “azombwe naandimuwa.” (Mar. 19:4; 2 Pe. 2:7) N’nga ninooda sikimizela ira Yohova Nlungu wenuo uli watangaranga atootonga ira atu othene enao takwe thitho katidha venyathi-iwe? Yohova atoom’sikimizeli-a Abrahamu ira musidadimo kamwali atu olongomana okwakwana 10. (Mar. 18:32) Aliwa tali o-olongomana ee-no Yohova atowatonga mwalongomano vowanonga namwasa wa vyongo vyaira aliwa. N’nga ninooda onga mosikimizela ira kavali mutu uliwethene mwaatwao, unofuna dhakala mugurupu “laatu . . . o-olongomana enao anofuna dhavenyathi-iwa”? Kabe, kaninaonge mosikimizela! w24.05 2 ¶3; 3 ¶8

Namwasa wa nyarwa dha fuma, atu enango tatoodhowa malaba basa undendai na banjaliwa, mbwenye vyo-arelavovyee kavyali vyapama. Mwasakanga basa, kamuthuulelenga kobiri dhinafwanye nyo. Mbwenye muthuulelenga mwemo munakhuzele aliwa uxamwalinyu na Yohova. (Luk. 14:28) Munooda dhifuka ira: ‘Chini inaireele banja li-u akala ira nditodhowa olapela? N’nga ndinongooda fwanyeya vamigumanoni, na muurumiwini?’ Akala mutokaana a-ima munofwanela dhifuka yofuka yofuneila: ‘Akala nditokhumavo, ndinaodenga a-vi samalela a-imanga “vowava-a malangi-o nowafunji-a movwelana na vyaongile Yohova?’”(Aef. 6:4) Muwendelenga mathuulelo a Nlungu a-kala abali venango afwinyu enao ta-anolemeza makhundo a malemba. w25.03 29 ¶12

Mutu o-oulukula mwauzimu, unooda roromelanga mo-orucha “vyongo vyainyengo” “vinomwadhiwa na vyongo vinango vyonama” thitho unooda pupwi-iwa naatu opanduwa. Liye unooda irelanga sanje atu enango, kangana naaliwa, venango nyanyuwanga mombaranya thitho hora dhinjinji unooda iranga vyongo vyothakala akala utowesedhiwa. (1 Ak. 3:3) Malemba anofwanafwani-edha ulukula mwauzimu na moda munoulukulela mwana nokala ndimuwa. (Aef. 4:15) Mwana kanoidhiwa vyongo vinjinji, ee-no unofuneela sogoleliwa thitho kami-iwa. Mofwanafwani-a, m’ma unooda m’inda mwanee wono ira alupe rapa. Mbwenye mwanuo aulukulanga, m’mee unooda m’rumeli-a ira alupe ekene rapanimo. Mbwenye unom’thuucha ira aromenga ing’ana wu na wu a-analupe rapalo. Ee-no mwanuo aulukulanga unooda rambela vyongo ninga vyevi vaekene. Mbwenye mo-iyana na vyevi, Kristau olimba mwauzimu afunanga sakula vyoira, unothuulela makhundo a Bibilyani ira aidhiwe mathuulelo a Yohova va mwasuo thitho unoirana vyongo vyofwanelela. w24.04 3 ¶5-6

Wa vyawa vinjinji, afwee a Yohova tali dhulu baa-i weo unokhala liye. Vasogolovee, atoopanducha atu vailambo yavathi enao tali mutendalee. Enango mwa alendwala ali Inoki, Nowa, Abrahamu na Yobo. Arumiwi ororomeleyala, anoongiwa ira tali afwee a Nlungu venango atu enao tawenda na “Nlungu waimbarimbari.” (Mar. 5:24; 6:9; Yob. 29:4; Esa. 41:8) Wa vyawa vinjinji, Yohova ukadhi aitananga afwee ira takhale alendwee. (Zak. 37:26, 27) Ulosi wa Zakieli unothonyi-edha ira Nlungu unofunechecha ira arumiwee ororomeleya, takhale vauxamwali wapama na liye. Yohova unolanyedha ira unodha ira “vwelano warendele.” Ulosula unoonga vya hora yeniyo atu ana idedi-edho yodhowa dhulu na yodhakala vailamboi, munofuna aliwa vwelananga nokhala “gurupu limbo-i” la mabila mutendalee lopipirisa. (Ju. 10:16) Hora yeniyo njen’na! w24.06 2 ¶2, 4; 3 ¶5

I-yo atu a Yohova, ninodhilimbi-edha kala uikhundu ya Umwene wa Nlungu. Mbwenye irana vyevi unofuneela ira nikale olimba rima. (Mat. 6:33) Mwaifwanafwani-o, muilambo yothakalai ninofuneela kala olimba rima ira ni-arelenga makhundo amakalelo apama a Yohova thitho laleela milanyu yapama ya Umwene. Ninofwanela kala olimba rima ira na-avolowele vyandale dhailamboi, mwemo atwee mbo-ovwelana. (Ju. 18:36) Arumiwi anjinji a Yohova anogumanana nyarwa dhafuma, anooni-iwa nyarwa thitho enango ano-eliwa perozoni namwasa okonda volowela vyandale venango kala nyakondo. Ninolimbi-iwa thitho kaana kopolo nathuulelanga vifwanafwani-o vyaatu oi molimba rima tatoosikimizela kala uikundu ya utongi wa Yohova. Maifwanafwani-o, Mweni-u Yesu Kristu, atookonda volowela ndale dhailambo ya Satanila. (Mat. 4:8-11; Ju. 6:14, 15) Hora dhothene anoom’nyindela Yohova ira am’va-e kopolo. w24.07 3 ¶4; 4 ¶7

Yohova atooiri-a ira mwasula ulembiwe naifunelo yoi unikami-enga. Unonikami-a vwechecha mwasee Yohova unoidanana maningi vyodawa. Vyodawa vinoiri-a ira nilapelane na Babi-u thitho vinodhi-a wukwa. (Esa. 59:2) Ngumwasee Satana wenuo aromi-idhe nyarwadhi, unodhiveliwana vyodawa thitho limbi-anga atu ira tadawenga. Vinooneya ira Satana athuulela ira m’dawi-a Adamu na Eva, ungadodomi-idhe ifunelo ya Nlungu waatu. Mbwenye kaaidhiwa ulukula waudhivela wa Yohova. Nlungu kachinjile ifunelo yana liye yokhuza a-ima a Adamu na Eva. Yohova unodhiveliwana maningi atu, ee-no mombaranya atowava-a idedi-edho. (Aro. 8:20, 21) Yohova atooidhiwa ira enango mwa a-ima a Adamu, anodha sakula m’dhiveliwana thitho m’vwela. Ee-no vokala Baba na Namapanduchiwa, Yohova unodha athathula wu vyodawa thitho akami-a ira takale vauxamwali wapama na liye. w24.08 3 ¶3-4

Atu a Yohova anokalecha opingeya maningi. Aliwa tanolaba mabasa naifunelo yoi tafwanye vyongo vyofuneela vaingumi yiwa na yava banjani viwa. (1 Ti. 5:8) Makristau anjinji anosamalela abaliwa oulula venango ale anobulela. Thitho i-yo othene ninofuneela hora injinji yosamalela manungwi-u. Wenjedhela va vyongo vyothene vyevi, ninova-iwecha thitho basa pingoni. Basa n’nango linofuneela i-yo laba ndi laleela. Leri Bibilya ndi imbo-i mwa “vyongo vyofuneya maningi” wa Makristau. Ee-no ninofwanela dhilimbi-edha maningi ira nilileringa. Voonga vya mutu osangalala, salimo loroma linoonga ira: “Unodhiveliwana maningi ilamulo ya Yohova, thitho unoleri nothuulela modi-a ilamulwiyo thana nama-iyu.” (Sal. 1:1, 2) Vyevi vinothapulela ira ninofwanela kaangana hora yoleri Bibilya. N’nga hora yapama yoleri Bibilya njivi? Mutu uliwethene unooda sakula ekhene hora yapama wa liye. Mogwandela ninooda onga ira, ndi hora inaodenga nyo leri Bibilya dambo nlilothene. w24.09 3 ¶5-6

N’nga Kristau olimba mwauzimu unofuneela kami-iwa na mutu uliwethene? Ee. Hora dhinango Kristau olimba mwauzimu unofuneela thitho kami-iwa. Kuongela ira Kristau o-olimba mwauzimu, unodedi-edhela ira Makristau enango tam’mwandelenga vyoira venango m’sakulela vyoira vamwasa unofuneela liye sakula ekene. Voi Kristau olimba mwauzimu avepa Makristau enanga azelu venango oidhiwa vyongo vinjinji ira tam’kami-e, unoidhiwa ira izo yosakula vyoira njee namwasa oi uliwethene unofwanela “tukula tolwee.” Andimuwa anooneya mo-iyana, molandana na vyevi, Makristau olimba mwauzimu ano-iyana thitho vamyasa ya makalelo auzimu ninga zelu, limba rima, va-a modhala mandha nothuulela atu enango. Wenjedhela vevo Makristau ambili olimba mwauzimu tagumanana vyongo vyolandana, anooda sakula vyongo vyo-iyana mbwenye vyothene pyovwelana namakhundo a Bibilyani. Vyevyo vinoireya simbwasimbwa vamwasa wa ithuulela rima. Namwasa ozindiela likhundo leli, aliwa katinotonga atu enango taona ira tatosakula mo-iyana. Yongo inofuna aliwa maningi kukalave ovwelana.—Aro. 14:10; 1 Ak. 1: 10. w24.04 4 ¶7-8

N’nga munaire a-vi akala munodhowanave dhiona ninga muli mutu o-ofuneya? Muleringa nothuulela malemba anothonyi-edha ira Yohova unouonani ira muli apereso yavadhulu. Akala mutoimwanana kwakwaneli-edha ifunelo inango venango sukwala namwasa oi kamunoira vyongo vinjinji ninga atu enango, kamudhitongenga mokwaranyi-a madile. Yohova kanodedi-edhela ira muirenga vyongo vya-anaodenyo. (Sal. 103:13, 14) Akala mwatooireliwa vyongo vyothakala ndulimu, kamudhiombenga landu ira ngunyo airi-idhe. Kamunofwanela ireliwa vyongo ninga vyevyo! Muthuulelenga ira Yohova, unodha tonga atu anoira vyongo vyothakala, a-kala atu anoireliwa vyongo vyothakala. (1 Pe. 3:12) Kamukaikelenga ira Yohova unooda u-indi-edhani basa vokami-a atu enango. Yohova utouva-ani ngari yolaba vambo-i na liye basa yolaleela. (1 Ak. 3:9) Vyongo vyaireile vaingumi inyu, vinooda ukami-ani ira muthonyi-edhenga tangaranga waatu enango thitho vwechecha mwemo munodhivwela aliwa. Ee-no munooda ira vyongo vinjinji vowakami-a. w24.10 7-8 ¶6-7

Voi “Yohova unodhiveliwana longomano,” vinom’kuza maningi atu enango tairelanga arumiwee vyongo vyo-olongomana. (Sal. 37:28) Yesu atoonisikimizeli-a ira Yohova, “unodha onechecha ira longomano litoireya . . . mombaranya” thitho va hora yofwanelela. Vachineneeva, Yohova unodha mali-a nyarwa dhothene na vyongo vyo-olongomana vya tundu uliwethene. (Sal. 72:1, 2) Vahora inodedi-edhela i-yo ira Yohova adhena longomano, liye unonikami-a vilela nagumanana vyongo vyo-olongomana. (2 Pe. 3:13) Yohova unonifunji-a moda munairele i-yo vyongo mwazelu. Dhela mwa Mwanee, Yohova utoniva-a ifwanafwani-o ya moda unairele i-yo nagumanana vyongo vyoi e-ni. Thitho unoniva-a malangi-o onikami-a ana-arele i-yo. w24.11 2-3 ¶3-4

Vyavepile Yesu ira mwinji waatu udyi-iwe vyali vyorucha namwasa oi vali alombwana okwakwana 5.000. Nathangani-avo a-iyana na a-ima, vinooneya ira vali atu okwakwana 15.000 oi taava-e yodya. (Mat. 14:21) Andreya atoonga ira: “Vatokala zombwe una mapau a sevada na visisomba vinli. N’nga vyevi vinokwakwana mwinji wethene wen’na?” (Ju. 6:9) Mapau a sevada mbenao atu anjinji adya aliwa thitho sombadho dhinooneya ira dhali dhouma dho-eliwa mwinyu. Mbwenye yodya yana zombula yali yo-okwakwana wa mwinji othene wenuo. Vofuna akami-a atwao, Yesu atoawandela ira takaathi vamalachini m’magurupu. (Mrk. 6:39, 40; Ju. 6:11-13) Ee-no ninoleri ira Yesu atoolobela wa Babee nom’simba namwasa wa yodyiyo. Vyali vyovweya ira Yesu am’simbe Nlungu namwasa oi nguliye am’va-a yodya. Veva Yesu atoovelela ifwanafwani-o yaphama wa i-yo othene ira niromenga lobela na-anadye. Ee-no Yesu atoovelela yodyiyo wanamafunjedhee ira taava-e atwao. w24.12 2-3 ¶3-4

Yesu angali vailambwila, anoovelela titimi-o wa Babee vothonyi-edha ira ngu liye am’va-a kopolo ira airenga vyongo vyodabwi-a. (Mrk. 5:18-20) Vyongo vyaonga Yesu vyokhuza Babee thitho mwemo mwairela liye vyongo naatu enango, vyanoovelela titimi-o wa Yohova. Vahora dhinango Yesu anoofunji-a Sinagogani. Mwinji waatu aafunji-a liyao vatookala m’ma mwinango aoni-iwa nyarwa na viwanda wa vyawa 18. Iwadayo yatooiri-a ira arangale thana voi kaaodave inuwa. Vyali vyovwi-a tangaranga maningi. Yesu atoom’vwela tangaranga thitho atom’kwivela noonga moriya rima ira: “M’ma, mutothathuwa wu marendinyu.” Ee-no angam’indile m’muo atooimela modhongowa “noroma m’titimi-a Nlungu.” M’muo atookaana okoka kopolo. (Luk. 13:10-13) Mofwanafwana na m’mula nitokaana myasa yovweya yom’va-edhelana Yohova titimi-o. w25.01 2-3 ¶3-4

N’nga pyoodeya fwanya okoka vyongo vyothene vyaluzile Adamu na Eva? Vinoodeya mbwenye a-kala vaokhene. (Sal. 49:7-9) Aakale ira kanikhami-iwile na Yohova kanaode kaana idedi-edho yodhakaana okoka ingumi venango venyathi-iwa. Mbwenye nairenga wukwa baa-i a-kaana idedi-edho iliyothene ninga vinyama. (Nam. 3:19; 2 Pe. 2:12.) Babi-u waudhivela Yohova utoniva-a yotuva ipaganlena liye mangawa atukulele i-yo wa Adamu. Voonga vyevi Yesu aongile ira: “Nlungu atoodhiveliwana maningi ilambo moi atoovelela Mwanee obaliwa ekhene ira, mutu uliwethene om’roromela a-anongiwe mbwenye akaena ingumi yo-omala.” (Ju. 3:16) Wenjedhela veva, yotuvila inonikami-a ira nikale vauxamwali wapama na Yohova. Ninooda ganyali na yotuva yodabwi-ila noleveleliwa vyodawa vi-u, venango “mangawi-u.” w25.02 3 ¶3-6

N’nga chini yam’kami-idhe Saulo ira abadiziwe? Yesu angaongile na Saulo khumela dhulu, Saulo atoo-iya ona. (May. 9:3-9) Wa malambo mararu liye kaadya thitho vinooneya ira athuulela vyongo vyam’mwireelevyo. Veva Saulo ali angasikimizele ira Yesu ndi Mesiya thitho ira anama-arelee mbenao tali mureligiau laimbarimbari. Ninooda funjedha vyongo vinjinji khumela wa Saulo. Liye angaodile rumela ira gaya venango ova atu um’mwimwanani-e badiziwa. Mbwenye kaarumeli-idhe ira vyevi viireye. Saulo anoofunechecha kala kristau angalive ira anooidhiwa ira unodha oni-iwa nyarwa. (May. 9:15, 16; 20:22, 23) Angabadiziwile, atoodhowanave m’nyindela Yohova ira am’kami-enga vilela vyowesedha vyo-iyana i-yana. (2 Ak. 4:7-10) Nyo thitho mwabadiziwa nokala wa Mboni dha Yohova, munodha gumanana vyowesedha vinawesedhe iroromelwinyu. Mbwenye Yohova na Kristu anooda ukami-ani ira mudhowenave kala ororomeleya.—Afl. 4:13. w25.03 4 ¶8-9

Leri Bibilya ndi pama. Mbwenye ninofwanela kaana vifunelo novilimbi-edhanga vikwakwaneli-edha ira niganyalinga na leringa madhu a Nlungu. Kathuulelani ifwanafwani-o ila: Vyomela vinjinji vinofuneela dhongwe. Mbwenye akala dhongwe m’njinji utorumbwa vahora yoyeva, mateya katinonyeta pama. Vyaireya ee-no dhongwe m’njinjuo unokala o-okami-a. Vanofuneela hora injinji ira dhongwe unyeti-e mateya fiya vathi ira vyomela virome i-ndi-edha basa. I-yo thitho ninofwanela rambela leringa Bibilya mombaranya maningi fiyedha imwanana thuulela vinoleri i-yovyo novi-indi-edhanga basa vaingumii-u. (Yak. 1:24) N’nga hora dhinango munoonecha ira munoleri Bibilya mombaranya? Akala ndi ee-no, munofwanela iran’ni? Munofwanela leringa mo-ombaranyi-a. Mudhilimbi-edhenga thuulela vyongo vinoleri nyoovyo venango vimadhi nyo leri. w24.09 4 ¶7-9

Andimuwa avapingoni tawachela malangi-o, anofwanela aleri mosamala nodhilimbi-edha mwemo munaodele aliwa ira taode a-arela. wenjedhela vova-iwa malangi-o amwemo munairi-edhenga aliwa migumano yapingo thitho lobela, anova-iwecha malangi-o amwemo munasamalelenga aliwa mabila a Kristu. Andimuwa avapingoni enao ano-arela malangi-o agulu, anokami-a atu anowaing’anela aliwa dhivwanga ira mbobareleya thitho anodhiveliwiwa. Nawachela malangi-o okumela waandimuwa avapingoni, ninofwanela a-arelanga na rimi-u othene. Naira ee-no ninokami-a andimuwa avapingoni ira talabenga pama basa liwa. Bibilya linonilimbi-a ira nivwelenga thitho gonjela enao anonisogolela. (Aeb. 13:7, 17) Mwasiwa ngwan’ni vyevi vinokalecha vyorucha hora dhinango? Namwasa oi aliwa kai atu olongomana. Mbwenye nathuulelanga maningi vyongo vinodawi-a aliwa a-kala vinoirana aliwa pama, ninokala nikami-anga amwidani-u. N’nga ninoakami-a a-vi? Ninoroma kaikelanga gulu la Nlungu. w24.04 10 ¶11-12

N’nga atu othene anofuna dhakwa va nyarwa ilukulu katinodha kaana idedi-edho yodha venyathi-iwa? Malemba anoonga movweya pama ira atu oruni-a anofuna dhaphiwa na Yohova na gurupulee lakondo va Arumagedo, katinodha venyathi-iwa. (2 At. 1:6-10) N’nga a-vi vyaatu anofuna dhakwa namwasa oulula, marenda, ngovi venango phiwa naatu afwiwa? (Nam. 9:11; Zka. 14:13) N’nga enango mwaatwala anodha kala mugurupu “laatu o-olongomana” anofuna dhavenyathi-iwa muilambo ipya? (May. 24:15) Kaninoidhiwa. Mbwenye nitoidhiwa vyongo vinjinji vinofuna dhaireya sogolou. Mofwanafwani-a, ninoidhiwa ira va Arumagedo, atu anodha tongiwa votukulela mwemo mwairela aliwa vyongo na abalee a Kristu. (Mat. 25:40) Atu othene anofuna dhatongiwa ira ndi mabila, mbenao akami-a ozoziwa thitho Kristu.—Apk. 12:17. w24.05 10-11 ¶9-11

“Bibilya linoonga ira hora inokala i-yoi, “njavakundu thitho yorucha.” (2 Ti. 3:1) Wenjedhela va nyarwa dhinogumanana mutu uliwethene muilamboi, atu a Yohova anoruni-iwa thitho oni-iwa nyarwa. Chini inanikami-e ira nim’labelengave Yohova masiki vahora inogumanana i-yo nyarwa? Yongo imbo-i inanikami-e, ndi idhiwa ira Yohova ngu “Nlungu waingumi.” (Jer. 10:10; 2 Ti. 1:12) Yohova unoona nyarwa dhinogumanana i-yo thitho hora dhothene ngofunechecha nikami-a. (2 Li. 16:9; Sal. 23:4) Thuulela ira Nlungu ngwaingumi, unooda nikami-a limbanana nyarwa iliyothene inagumanena i-yo. w24.06 20 ¶1-2

Ninofwanela dhowanave roromela gulu la Yohova. Vakala machinjo avyongo vinororomela i-yo vamakhundo enango a Bibilyani venango ndhila inango yeniyo ino-indi-edha i-yo va basa ya umwene, atu anonisogolela katinokaikela chinja. Aliwa anoirana vyevi namwasa oi anofunechecha m’sangalali-a Yohova. Thitho aliwa anovilimbi-edha sakula vyoira vo-indi-edha basa madhu a Nlungu, namwasa oi ndi Bibilyani muli makhundo enao makristau othene ano-arela aliwa. Rumiwi Paulo atoonga ira: “Mu-indedheleve ifwanafwani-o ya madhu olinyali.” (2 Ti. 1:13) Madhu oi “ifwanafwani-o ya madhu olinyali,” anothapulela makhundo a Bibilyani enao makristau anororomela aliwa. (Ju. 17:17) Yongo iliyothene inororomela i-yo inokumela mumakhundo enala. Gulu la Yohova litonifunji-a ira ni-indi-edhenga basa makhundo enala. Nairanga vyevi, ninodha raeli-iwa. w24.07 11-12 ¶12-13

Voi atoidhiwa moda mutu munovwela liye achinyuwa noleveleliwa, rumiwi Pedru angaodile funji-a atu enango vyokuza mwasula. Vahora inango vasogolo vapwando la petekoste, Pedru atoonga mwasa va guluni la Ayuda oonga ira aliwa tatoom’pha Mesiya. Mbwenye mwaudhivela Pedru atowalimbi-a ira: “Muchinyuwe nodhimbinuwa ira vyodawa vinyu vivu-eleliwe, hora yosisimula idhe kumela wa Yohova.” (May. 3:14, 15, 17, 19) Veva Pedru atoothonyi-edha ira chinyuwa unokami-a mutu odawa ira adhimbinuwe, thapulela ira a-iye vyothakala vyathuulela liye venango vyairana liye, noroma iranga vyongo vyapama vinam’sangalali-e Nlungu. Rumiula atoothonyi-edha ira Yohova unolevelela, vyevi vinokala ninga utofudha vyodawa viwa. Pyolimbi-adi idhiwa ira nachinyuwa vyodawa vi-u, masiki vikale vilukulu, Yohova unonilevelela! w24.08 12 ¶14

Ninooda rambela rima odhiveliwana fuma, akala ninororomela maningi ira komoni wa ilamboi uli duzi. Atu “anodha tatila siliviwa ndhila” namwasa oi anodha zindiyela ira “siliviwa venango orwiwa kunodha avulumucha vadambo linofuna dhaoni-a Yohova nyanyuwawee ulukulu.” (Zak. 7:19) Malo mofunanga kaana kobiri, niirenga vyongo vinanikami-e ira nifwanyenga vyongo vyofuneela maningi wu nim’labelanga Yohova. Vyevi vinothangani-avo rambela mangawa o-ofuneeleya venango pingeyanga nosamalela vyongo vina i-yo. Nirambelenga thitho dhiveliwana maningi vyongo vina i-yo. (Mat. 6:19, 24) Vevo komoni wa ilamboi vanowandamela aliwa komoni, iroromelo yi-u inodha wesedhiwa vamwasa wa fuma venango vyongo vinango. w24.09 11 ¶13-14

I-yo atu ninooda i-yelatu makalelo enango othakala. Mbwenye hora dhinango ninooda rucheyanga na rima ofuna irana vyongo vyothakala. Ifwanafwani-o vamwasula nja rumiwi Pedru. Namwasa oova atu atoom’konda Yesu fendo taaru. (Mat. 26:69-75) Mbwenye vahora yaongile liye molimba rima vamethoni va tribunale nlukulu la Ayuda, vyaoneya ninga atoo-iya ova. (May. 5:27-29) Vahora inango vangavirile vyawa vingasi, atoo-iya udya na Makristau amaziza enango “namwasa oova atu oineliwa.” (Agl. 2:11, 12) Veva ninooda onga ira atooroma okoka ova atu. Pyooneelatu ira ovawee wali wa-anamale. Ninooda limbanananga yorucha inangoyee moweli-edha weli-edha. Yongo imbo-i inanikami-e ku-arela malangi-o a Yesu vamwasa wa vyowesedha. Liye aongile ira: “Mukale methove.” Masiki vahora inoona nyo ira muli olimba mwauzimu, mudhowenave rambela vyongo vinairi-e ira muwesedhiwe. Mudhowenave iranga vyongo vinaukaimi-eni ira mugonji-e nyarwa dhinogumanana nyo.—2 Pe. 3:14. w24.07 18-19 ¶17-19

Yesu ngova-a modhala mandha kwaranya mutu uliwethene. Angali vailambo yavathila, atoo-indi-edha basa kopolodhee vokami-a atu. (Luk. 9:12-17) Yesu atooniva-a yotuva ilukulu maningi vonikwela. (Ju. 15:13) Yesu ukanle aniva-anga vyongo vinjinji kumela vevo vavenyathi-iwile liye dhowa dhulu. Yesu atoonilanyedha ira unodha vepa Babee ira aniva-e zimu ochena ira udhanifunji-enga nonilimbi-a thitho ndi vyevyo viirile liye. (Ju. 14:16, 17; 16:13) Unonikami-a thitho va basa yofunji-a atu Bibilya yeniyo inoireya vailambo yothene yavathi vo-indi-edha basa migumano yapingo. (Mat. 28:18-20) Rumiwi Paulo atoolemba ira Yesu angadhowile dhulu, “atoovelela alombwana ira takale vyotuva.” (Aef. 4:7, 8) Paulo atoonga ira Yesu atoovelela alombwana enala ira takami-enga pingo. (Aef. 1:22, 23; 4:11-13) Alombwanala kai olongomana, ee-no anodawi-echa vyongo vinango. (Yak. 3:2) Mbwenye Mbwii-u Yesu Kristu unowa-indi-edhave basa ira tanikami-enga thitho ali ninga yotuva iniva-idhe liye. w24.10 18 ¶1-2

Davide atom’mwandela mwanee Solomo ira adham’vwela Yohova Nlungu, vyongo vinodha m’mwendela pama. Pyovi-a tangaranga ira, Solomu atooroma lambela milungu yonama. Yohova atoo-iya m’dhiveliwana thitho atoo-iyachi m’va-a zelu dhoi aode tongana atu molongomana. (1 Ma. 11:9, 10; 12:4) N’nga ninofunjedhavo n’ni? Vyongo vinoniwendela pama nakala ovwela. (Sal. 1:1-3) Pyaimbarimbari ira Yohova kanilanyedhe niva-a fuma na titimi-o ninga Solomu. Mbwenye nam’vwela, unodha niva-a zelu dhedho dhinanikami-e ira nisakulenga pama vyoira. (San. 2:6, 7; Yak. 1:5) Makhundwee anooda nikami-a vamwasa wa basa, mafunjedho, vyosangalali-a thitho kobiri. Na-arelanga malangi-o a Yohova ninodha kala vauxamwali na liye thitho ninodha kaana ingumi yo-omala. (San. 2:10, 11) Ninooda kaana afwi-u apama. Thitho ninooda fwanya malangi-o enao ananikami-e kaana banja losangalala. w24.11 10-11 ¶11-12

Anamabala munofwanela i-ndi-edha basa ngari ili yothene ira mutapanye na mwaninyu vyokhuza roromela Nlungu venango Bibilya. Unooda irana vyevi adhowa unolokothela atu vyongo vyawale, vokami-a mwaninyu ona ira Bibilya tolinyali. N’nga mwaninyu utoidhiwa ira dhina la Nlungu linofwanyeya valibwe n’nango wu mowabo vyawa vaduzi duzi 3.000? Venango thitho nyo na mwaninyu munooda ona vyongo vyawale va internetini venango mabukhwi-u. Munooda thitho ona libwe la Mowabu mofwanafwani-edha na sede li-u la ilambo yothene ya amboni dha Yohova nli wu Warwick, New York. Libwe leli linothonyi-edha ira mwene Mesa, ali wu Mowabu ngwadhimbinuwele Aisraeli. Vyevi vinovwelana na vinoonga Bibilya. (2 Ma. 3:4, 5) Akala mwaninyu utoona umboni oi Bibilya tolinyali iroromeloyee inooda kala yolimba. w24.12 14 ¶4; 15 ¶6