Janeiro

Baliwa wa mwana ndiyongo imbo-i mwavyongo vyosangalali-a maningi wa anamabalee. Angalive ira anamabala anodhiveliwana maningi mwana akala kombwani, kaiira anofuna ira akalengave kombwani modhowa nodhowa. Thitho anooda dhikumbanyedhanga maningi akala mwanuo kanoulukula. Molandana na vyevi, Yohova unosangalala naroma m’a-rela Yesu, mbwenye liye kanofuna ira nikalengave a-ima mwauzimu. (1 Ak. 3:1) Malomwee Yohova unofuna ira nikale Makristau “oulukula mwauzimu.” Bibilyani madhu athapuleliwile ira “andimuwa,” anotapulela thitho “atu owarala” venango “olimba mwauzimu.” (1 Ak. 2:6) Molandana na mwana wenuo unodhowanave ulukula fiyedha kala ndimuwa, na-iyene thitho ninofwanela dhowanave ulukula mwauzimu fiyedha kala Makristau olimba mwauzimu. Masiki nifiye vokala Kristau olimba mwauzimu, kaninofwanela i-yachi dhowa vasogolo.—1 Ti. 4:15. w24.04 2 ¶1, 3

N’nga Yohova uli ninga aani wa nyo? Venango munooda wakhula ira, ‘Yohova ngu Babanga, Nlungwanga na fwanga.’ Vatokala madhina enango aizo ana-indi-edhe nyo basa voonga vya Yohova. N’nga mwatooroma thuulelavo ira munooda kala alendwee? Mwene Davide atoofwanafwani-edhela uxamwali unokalavo vari va Yohova na arumiwee ororomeleya, na uxamwali unokalavo vari va mutu naalendwee. Davide atoofuka ira: “Nyo Yohova, n’nga mbaani unakale lendo tendani mwinyu? Mbaani unakale mwangoni mwinyu opambuleya?” (Sal. 15:1) Madhu ovudheleliwala, anothonyi-edha ira ninooda kala alendo a Yehova venango afwee. Yohova a-anarome panducha yongo iliyothene, akalecha ekhene. Mbwenye vahora inango, Yohova atom’mwachela Mwanee obaliwa ekhene mutendalee lopipirisa. Yohova atoosangalala maningi wachela lendweula. Bibilya linoonga ira Yohova “atoosangalala maningi” na Mwanee. Na liyene thitho lenduo, “akalecha osangalala vamethonivee hora dhothene.”—San. 8:30. w24.06 2 ¶1-3

Mufwanafwani-edhele ira munoona mwinji waatu okwaranya 340.000, ungagumaneile vambo-ive ira tam-ele Davide kala mwene wa Aisraeli. Wa malambo mararu, tatamo la myango vaduzi na Heburoni unovweya onga waatu, thitho nyumbo dhotitimi-a. (1 Li. 12:39) Vamwinjinivo vatookala zombwe mwinango dhinalee Zadoki wenuo ali oidhiweya waatu anjinji. Mbwenye Yohova afuna ira niidhiwe ira liye ali vamwinjinivo. (1 Li. 12:22, 26-28) Zadoki ali mulimbo velela sembe alaba basa vambo-i na Abiyatari wenuo ali ndimuwa waalimbo velela sembe. Zadoki ali oro-edha anooda zindiyela vyongo vinofuna Nlungu thitho atoova-iwa zelu dhavakhundu maningi. (2 Sa. 15:27) Liye ali mutu olimba rima. Malambo omari-ala, Satana unaadhimbinuela maningi atu a Nlungu. (1 Pe. 5:8) Ee-no ninofwanela kala olimba rima vevo vanodedi-edhela i-yo ira Yohova anonge Satana na ilambo yothakalai. (Sal. 31:24) Moirana vyevi ninooda thonyi-edha mwemo munasazi-edhele i-yo limba rima wa Zadoki. w24.07 2 ¶1-3

Yohova angapanduchile lombwana na i-yana oroma, afuna ira tasangalalenga. Atowava-a limburo loi takalengamo, yotuva ya banja na basa yosangalali-a yoi tailabenga. Aliwa tafuneela bala a-ima nodhali-a ilambo yothene yavathi thitho isaka-edha ira ikale yobaleya ninga munda wa Edeni. Mbwenye aava-idhe lamulo limbo-i baa-i. Thitho mwaudhivela atoawenjeli-a ira, akala katinovwela lamulolo mwakhomove, anodhakwa. Ninoidhiwa vyongo vyaireile vasogolovee. Ngelo wenuo a-aadhiveliwana thitho a-am’dhiveliwana Nlungu, atooanyengelela ira tadawe. Adamu na Eva tatooirana vyongo vyaongile ngelo othakaluo. Namwasa oi kataodile m’roromela Babiwa waudhivela, aliwa tatoodawa. Ninga munoidhiwela i-yo, vyaongile Yohova vyatooireya. Kumela va dambo lelo tatoogumanana vyo-arelavo vyee vyoi ndi ulula na wukwa.—Mar. 1:28, 29; 2:8, 9, 16-18; 3:1-6, 17-19, 24. w24.08 3 ¶3

Yohova na mwanee odhiveliwiwa anofuna ira nisangalalenga. Salimo 119:2 linoonga ira: “Osangalala mbaatu ale anolokota vyothuucha vyee na ale anom’sakasaka na rimiwa wethene.” Yesu atoonga thitho ira: “Osangalala mbaatu ale anovwa madhu a Nlungu noa-arela.” (Luk. 11:28) Atu anom’labela Nlungu anokala osangalala. Naleringa madhu a Nlungu hora dhothene ninodhilimbi-edha a-rela vinofunjedha i-yo. (Yak. 1:22-25) ninom’sangalali-a Yohova. Thitho naidhiwa ira ninom’sangalali-a Yohova ninokala osangalala maningi rimani mwi-u. (Nam. 12:13) Na-indi-edhanga basa vyongo vinofunjedha i-yo m’madhu a Nlungu, ninokaana banja lapama thitho ninokala ovwelana maningi na Makristau afwi-u. Wenjedhela vevo ninorambela nyarwa dhinogumanana atu a-ano-arela makundo a Yohova. Ninovwelana na vyaongile Mwene Davide. Angaongile malamulo na ndhila dha Yohova, atoomari-a nyumbwee na madhu oi: “Mutu olokota ndhiladho unodha fwanya yotuva ilukulu.”—Sal. 19:7-11. w24.09 2 ¶1-3.

N’nga Yohova unoona vyongo vinoireela arumiwee vailamboi? Ee! Yohova unoidhiwa nasangalalanga venango nasukwala. (Sal. 37:18) Yohova unosangalala aona ira ninovilimbi-edha mwemo munaodele i-yo ira nim’labelenga masiki vahora inovikumbanyedha i-yo. Wenjedhela vevo, Yohova unokala okozeya nikami-a thitho nilimbi-a. Salimo 147:3 linoonga ira, Yohova ‘unomanga vilonda,’ vyaatu othweya rima. Veva lembali linoonga moda Yohova munosamalela liye mwaudhivela atu anovikumbanyedha. N’nga ninaire a-vi ira niganyalinga na mwemo Yohova munoirela liye vyongo vonisamalela? Kathuulelani ifwanafwani-o ila. Ifirimero wadodoliso unooda ira vyongo vinjinji vokami-a mutu upeile ira aile. Mbwenye ira mutuo aile, unofwanela a-rela malangi-o aifirimeruo. Yohova unowandela atu anovikumbanyedha vyongo vinaire aliwa ira ta-arelenga malangi-oee audhivela. w24.10 6 ¶1-2

Ndulimu, mabukhwi-u takadhi taonganga vyongo vinofuna dhaireela atu atongiwile na Yohova ira mbo-olongomana. Naongecha ira kavali idedi-edho yoi atu anongiwile na Yohova anodha venyathi-iwa. Bibilya linoonga myasa dhingasi dhokuza mwemo Yohova mwatongele liye atu o-olongomana. Mofwanafwani-a, atu anjinji takwide vahora ya igumula, Yohova atootonga atwee thitho ira tamanonge maziza 7 aatu amuilambo yolanyedhiwa thitho vahora inango, ngelo wa Yohova atoopha anyakodho Aasuri okwakwana 185.000 ma-iyu umbo-ive. (Dot. 7:1-3; Esa. 37:36, 37) Vamyasa dhothene dhedhi, Bibilya kalinoonga vyongo vinjinji vyevyo vinaniiri-e thuulela ira Yohova atootonga ira atu tanongiwe thitho kativenyathi-iwe. Kaninoidhiwa mwemo Yohova mwatongele liye mutu uliwethene vaekene thitho akala atu taphiwilao tatokaana ngari yofunjedha vyoonga Nlungu nochinyuwa. w24.05 3 ¶5-7

Yesu atoonga ifwanafwani-o ya i-yana mwinango wamakwele wenuo am’vepha namatonga ira am’kami-e mwalongomano. Vinooneya ira mwasa wen’na watowafiya varimani anamafunjedha a Yesu, namwasa oi vahora yeniyo atu o-okaana izo kataireliwa vyongo vyolongomana. (Luk. 18:1-5) Yofunjedha yei inonikami-a namwasa oi i-yo othene nitoroma ireliwavo vyongo vyo-olongomana. Malamboano vyongo vyo-olongomana, sakulana tundu nonyingalelana vili vali vothene. Ee-no kaninodabwa atu enango taniirelanga vyongo vyo-olongomana. (Nam. 5:8) Kaninodedi-edhela ira bali venango rongola aniirele vyevi, mbwenye vyevi vinooda niireela. Mo-iyana naatu anonioni-a nyarwa venango runi-a imbarimbari inororomela i-yo, abali naarongoli-u katinofuna niirela vyongo vyo-olongomana. Voi aliwa kai olongomana. Mbwenye ninooda funjedhavo vyongo vinjinji va vyevyo Yesu naatu enango vyairile aliwa tangaireliwile vyongo vyo-olongomana naatu oruni-a. Akala ninoleva rima naatu oruni-a anoniirela vyongo vyo-olongomana, ninofwanela thitho levanga rima na Makristau afwi-u. w24.11 2 ¶1-2

Walelene, mapau ali yodya ya atu anjinji. (Mar. 14:18; Luk. 4:4) Mapau ali ofuneya maningi voi hora dhinango Bibilya lino-indi-edha basa madhu oi “mapau” voonga vyodya. (Mat. 6:11; May. 20:7) Yesu angairile vyodabwi-a fendo mbili, atoo-indi-edha basa mapau. (Mat. 16:9, 10) M’mbo-i mwa mwasula unofwanyeya va lemba la Juwau kapitulu 6. Arumiwi tangamari-idhe laleela, tatoogwela barkuni vambo-i na Yesu dhowa kombela n’nango la Galileya ira tamavume. (Mrk. 6:7, 30-32; Luk. 9:10) Aliwa tatoodhowa tatamo n’nango o-okala atu wu Betisaida. Mbwenye va-anavire hora indendai gulu laatu latoofiya weo. Yesu kaapwazile. Malomwee liye atooroma afunji-a vyokhuza Umwene thitho ili-a atu obulela. Dhuwa liviranga, aliwa tatooroma thuulela mwemo atwao munafwanyele aliwa yodya. Vinooneya ira atu enango tatokaana yodya yoyeva, mbwenye atu anjinji tanoofuneela masaka vyodya.—Mat. 14:15. w24.12 2 ¶1-2

Anamabali-u oroma, Adamu na Eva, tali olongomana thitho takala paradaizoni. (Mar. 1:27; 2:7-9) Aliwa tangaodile kaana ingumi yosangalala modhowa nodhowa mbwenye vasogolovee vyongo vyatoochinja. Aliwa tatootamangi-iwa mundani mwa Edeni thitho tatooluza ngari yokaana ingumi modhowa nodhowa. N’nga Adamu a-iyedhen’ni a-imee? Bibilya linoonga ira: “Vyodawa vyatoovolowa muilambo dhela mwa mutu m’mbo-i [Adamu] thitho vyodawavyo vyatoodhi-a wukwa. Ee-no wukwao watoomwadheya waatu othene namwasa oi othene tatoodawa.” (Aro. 5:12) Yotuva yani-iyedhele Adamu ndi yodawa, yeniyo inodhi-a wukwa. Vyodawavyo vili ninga mangawa oi mutu kanaode apagali. (Sal. 49:8) Yesu atoofwanafwani-edha vyodawa na “mangawa.” (Mat. 6:12; Luk. 11:4) Nadawa ninokala ninga nitokaana mangawa wa Yohova. Ninofwanela pagali mangawa a vyodawa vi-u. Akala kanipaganle mangawao, anooda mali-iwa nakwa.—Aro. 6:7. w25.02 2-3 ¶2-3

Ninoona ira ndingari ilukulu wandela atu enango imbarimbari yoonga vya Umwene wa Nlungu. Mbwenye kaiira ngu mutu uliwethene una ngari yolaba basa leli. Mofwanafwani-a, Yesu angali vailambo yavathi, kaarumeli-idhe ira mizimu yothakala ilaleelenga vyokuza liye. (Luk. 4:41) Malaboano, mutu oi kanarome laleela na Amboni dha Yohova, unofwanela kwakwaneli-edha vyongo vyofuneeleya. Ninothonyi-edha ira ninosimba ngari yen’na nalaleelanga wu limburo nlilothene thitho vahora iliyothene. Molandana na Yesu, ifunelwi-u ndi dhala no-elela mbeu dhaimbarimbari mirimani mwaatu. (Mat. 13:3, 23; 1 Ak. 3:6) Vosazi-edha ifwanafwani-o ya Yesu, gulu la Yohova linoira vyongo vyothene vinaode aliwa vokami-a atu ira taidhiwe dhina la Yohova. Bibilya la Ilambo ipya la Malemba opambuleya litokami-a maningi vaikhundu yen’na, voweli-edha dhina la Nlungu mulimburonimwee. Bibilya liphumbula venango ikhunduyee, linofwanyeya muviongelo vyokwaranya 270. w24.04 9 ¶8-9

Alombwana anosangalala na mabanjiwa, anodhilimbi-edha ira dambo nlilothene tairenga vyongo vinathonyi-edhe ira anodhiveliwana a-iyaniwa. (1 Ju. 3:18) Lombwana unooda thonyi-edha ira unom’dhiveliwana i-yanee mundhila ndhing’ono ninga m’inda dhandha venango m’khumbarela. Unooda m’tumizela mesage yoonga ira “nditousowa” venango m’fuka ira “vinaawenda?” Hora dhinango thitho unooda m’lembela madhu osakhuliwa pama vakartani. Lombwana airangana vyongo ninga vyevi, unolemeza i-yanee thitho banja liwa linokala lolimba. Lombwana unolemeza i-yanee unom’limbi-a. Ndhila inango yom’limbi-edhelana i-yanee kum’simba va vyongo vyothene vinoira liye. (Ako. 3:15) Lombwana asimbanga i-yanee khumela vathi varimani, i-yana unovwivwa pama. Unovwivwa ira ngobareleya, odhiveliwiwa thitho olemeziwa. w25.01 11 ¶15; 13 ¶16

Salimo 15 linomari-a na madhu oi: “Mutu uliwethene unoirana vyongo vyevi, kanodha tekenyeya.” Veva mulimbo lemba masalimo, atoonga mwasee Yohova unofunela liye ira niirenga vyongo viongiwile musalimoli. Yohova unofuna ira nisangalalenga. Ee-no unoniva-a malangi-o ananikami-e fwanya maraeli-o thitho kala obareleya. Alendo a Yohova anodedi-edhela vyongo vyapama maningi. Ozoziwa anjinji ororomeleya, anodha wachela “mamburo manjinji okalamo” enao Yesu aasaka-edhele liye dhulu. (Ju. 14:2) Atu ana idedi-edho yodhakala vailambo yavathila, anodedi-edhela dhaona kwakwaneli-edhiwa wa vyolanyedha vili va lemba la Apokalipse 21:3. Onga mwaimbarimbari, ninoona ira ndi ngari ilukulu kala afwee a Yohova thitho alendo mutendanimwee modhowa nodhowa!—Sal. 15:1-5. w24.06 13 ¶19-20

Bibilyani, madhu oi “titimi-o” anooda thapulela yongo iliyothene inairi-e mutu mwinango ira akale oiri-a ifunelo. Yohova atoothonyi-edha titimi-o Aisraeli modabwi-a tangakhumi-iwile wene uudhaari wu Iguputu. Kafwanafwani-edhelani ira munoona Aisraeli anjinji tangagumaneile chindo mwa mwango wa Sinai ira tamagumanena Nlungwiwa. Rambo lukhulu watookhunela mwanguo. Ee-no mo-odedi-edhela indharandhara yakopolo, yali ninga mwango yatooroma thweya notekenyeya vali aliwavo. Vatookala vyerima noula ogadha baruni wa lipenga. (Eki. 19:16-18; 24:17; Sal. 68:8) Aisraeli vinooneya ira tatookaana ifunelo na mwemo Yohova mwaathonyi-edhele liye titimi-olee. Malamboano, ninom’va-a Yohova titimi-o nawandelanga atu enango kopolodhee dhodabwi-a, makalelwee apama, thitho ninom’va-a titimi-o namwasa wa vyongo vinoira i-yo mokami-iwa na kopolodhee.—Esa. 26:12. w25.01 2 ¶2-3

Vahora inango Aisraeli vyali aliwa va ulendo odhowa ilambo yolanyedhiwa, alombwana enango ovweya tatoom’runi-a Mose na izo yava-iwile liye na Yohova. Aliwa tatoonga ira: “Gulu lothene leli [a-kala Mose baa-i] tochena thitho Yohova uli vari viwa.” (Num. 16:1-3) Pyaimbarimbari ira Nlungu anoona ira “gulu lothene lelo,” lali lochena mbwenye Yohova ali angamadhi sakula Mose ira asogolelenga atwee. Vom’runi-a Mose, atu odhimbinuwelao tam’runi-a Yohova. Malo mothuulela vyongo vyafuna Yohova aliwa tathuulela maningi vyongo vyafuna aliwa. Tafuna ira takaena kopolo dhinjinji nokala ovweya. Nlungu atoopha atu taromi-idhe dhimbinuwelao naatu mamiliyao anjinji enao tali uikhundu yaatu odhimbinuwelao. (Num. 16:30-35, 41, 49) Malamboano thitho nitoidhiwa ira Yohova kanosangalala naatu anokonda lemeza malangi-o okumela gulunimwee. w24.07 11 ¶11

Ninokala muhora yoi atu anjinji anokonda nonyozanga vinowenjeli-a Bibilya vyoonga komoni wa ilambo yothakalila. (2 Pe. 3:3, 4) Angalive ira vatokala vyongo vinjinji vya-anoidhiwa i-yo, ninofwanela roromelanga maningi ira komoni unodha fiya vahora yofwanelela thitho Yohova unodha nisamalela. Ninofwanela roromelanga maningi “dhaari ororomeleya na wazelu,” Yohova unom’indi-edha liye basa voniva-a malangi-o malamboano. (Mat. 24:45) Nyarwa ilukulu yadharoma ninodha wachela malangi-o ira nivulumuwe . Va-eeni paevo vanofuneela i-yo roromelanga maningi malangi-o anova-iwa i-yo naatu anosogolela gulu la Yohova. Akala va-eeni vinonirucha avwela, kanidedi-edhele ira ninodha aroromela noavwela va nyarwa ilukulu. w24.09 11 ¶11-12

Anamabala Aikristau anozindiyela ira roromela Nlungu kai ira mwana unoirecha baliwana. Vavira hora indendai, liye unooda dhifukanga vyofuka ninga vi: “N’nga ndinaidhiwe a-vi ira utokala Nlungu? N’nga vinoonga Bibilya pyaimbarimbari?” Thitho Bibilya linolimbi-a ira “ni-indi-edhenga pama dodoliso lothuulela pama,” thitho “nisakesakenga vyongo vyothene novisikimizela.” (Aro. 12:1; 1 At. 5:21) N’nga munakami-e a-vi mwaninyu ira akaena iroromelo yolimba? Mukami-enga mwaninyu fwanya umboni osikimizela ira vinofunji-a Bibilya pyaimbaimbari. Mwaninyu afukanga vyofuka mufwanyelevo ngari yom’kami-a moda muna-indi-edhele liye basa vyongo vyosakasakana ninga Watch Tower Publications Index thitho na Bukhu losakasakela myasa la Mboni dha Yohova. Mu bukhu yosakasakela myasila, vathi va muru oi “Bibilya” munooda maona va muru oi “vudheleliwa na Nlungu” ira amafwanye umboni oi Bibilya ndi “madhu a Nlungu” a-kala bukhu lapama lolembiwa naatu.—1 At. 2:13. w24.12 14-15 ¶4-5

N’nga andimuwa avapingoni anofunjedhavon’ni wa Yesu? Aliwa anofwanela funji-a alombwana thangani-avo azombwe, ira takaena vizo vilukulu. Andimuwa avapingoni katinodedi-edhela ira anowafunji-a aliwao katidawi-enga yongo iliyothene. Andimuwa avapingoni anofwanela velela malangi-o waazombwe ira taidhiwe vyongo vinjinji, takale odhiyevi-a, ororomeleya thitho ofunechecha labela atu enango. (1 Ti. 3:1; 1 Pe. 5:5) Yesu atoova-a anamafunjedhee basa yolaleela nofunji-a atu. Vinooneya ira anamafunjedhao taona ira katinaode laba basila. Yesu kaakaikela ira aliwa anooda laba. Mbwenye pyooneelatu ira Yesu kaakaikela ira anooda laba thitho anoawandela vyevyo. Yesu athonyi-edha ira anowaroromela maningi voawandela ira: “Mofwanafwana na mwemo Baba mundirumile liye, miyo thitho ndinourumani.”—Ju. 20:21. w24.10 16 ¶15; 17 ¶17

Davide ali mwene wapama thitho ororomeleya wa Yohova. Liye ali oomba, wavichitwa, nyakhondo na namaongela. Davide atoogumanana vyowesedha vinjinji. Wa vyawa vinjinji ingumiyee yali yotawatawa vevo mwene Saul vyafuna liye m’pha. Anga-eliwile kala mwene, Davide atootawa thitho vevo mwanee Abisalomu vyafuna liye m’mwakha umwene. Angalive ira atoogumanana nyarwa dhedhi thitho anoodawi-a vyongo vinango, Davide atookalave ororomeleya wa Nlungu vaingumiyee yothene. Yohova atoonga ira Davide ali “mutu wavarimani [vee].” Ee-no malangi-o a Davide mbokami-a maningi. (1 Ma. 15:5) Kathuulelani malangi-o enao Davide am’va-idhe liye Solomu wenuo ali mwene malo mwa liye. Yohova atom’sakula Solomu ira adhowenave limbi-a lambela ochena thitho ira amange kachisi om’titimi-a Nlungu. (1 Li. 22:5) Volaba basali, Solomu atoogumanana nyarwa. N’nga Davide am’va-idhe malangi-o oi a-vi? Davide atom’mwandela mwanee ira adham’vwela Yohova, vyongo vinodha m’mwendela pama.—1 Ma. 2:2, 3. w24.11 10 ¶9-11

Lombwana unooni-a nyarwa venango ongela i-yanee mwaiburutu, unofwanela ira vyongo vinango ira asaka-edhe uxamwalee na Yohova thitho na i-yaneuo. N’nga ndi vyongo viivi vinofwanela liye irana? Yoroma, unofwanela zindiyela ira utokaana nyarwa ilukhulu. Kavali yongo iliyothene yolokhotheya wa Yohova. (Sal. 44:21; Nam. 12:14; Aeb. 4:13) Yanambili, unofwanela i-ya m’moni-a nyarwa i-yanee thitho m’vepha Yohova ira am’levelele. (San. 28:13) Yaneraru, unofwanela pepesa i-yanee thitho m’vepha Yohova ira am’levelele. (May. 3:19) Unofwanela thitho vepha ira Yohova am’kami-e kaana rima ofuna chinja ira akale odhikhondi-a va vyongo vinothuulela liye, onga thitho irana. (Sal. 51:10-12; 2 Ak. 10:5; Afl. 2:13) Yanenai, unofwanela irana vyongo movwelana na malobelwee voidanana vyauwalanga vili vyothene na madhu aiburutu. (Sal. 97:10) Yanethanu, unofwanela vepha kami-o waandimuwa audhivela pingoni. (Yak. 5:14-16) Yana 6, unofwanela kaana masaka-edho okami-a ira a-arome okoka kalelo lothakalalo. w25.01 11 ¶14

N’nga munom’dhiveliwana Yohova Nlungu wenuo unouva-ani yotuva iliyothene yapama, thangani-avo ingumi? N’nga munofuna m’thonyi-edha ira munom’dhiveliwana? Ndhila yapama yeniyo inairelana nyo vyevi, khudhivelela wa Yohova nothonyi-edha waatu enango ira mwatoodhivelela nobadiziwa. Mwairana vyongo vyevi munothonyi-edha ira mutovolowa mubanja la Yohova. Vyo-arelavovyee pyoi Yohova oi ndi Babinyu thitho fwinyu, unodha usogolelani nousamalelani namwasa oi muli wee. (Sal. 73:24; Esa. 43:1, 2) Dhivelela nobadiziwa unodha uva-ani ngari yokaana idedi-edho yodha kaana ingumi yo-omala. (1 Pe. 3:21) N’nga vatokala yongo inango inouimwanani-ani badiziwa? Akala ndi ee-no, idhiwani ira kamuli mwekhene. Vatokala atu anjinji enao tafwanela chinja makalelwiwa na mathuulelwiwa ira tafwanelele badiziwa. Va-eeni tanom’labela Yohova mwathindhi thitho mosangalala. w25.03 2 ¶1-2

Bibilya linofwanafwani-edhela madawo na tolo onyemela. Voonga madawee Mwene Davide aongile ira: “Vyodawa vyanga vitolapa maningi kwaranya imoyanga. Kandinaode vipwathela namwasa oi vinonyemela maningi ninga tolo ulukhulu.” (Sal. 38:4) Mbwenye Yohova unolevelela madawo aatu enao tachinyuwile. (Sal. 25:18; 32:5) Madhu Aieberi athapuleliwe ira “levelela,” anothapulela “fudha” venango “tukula.” Yohova uli ninga mutu wakopolo wenuo mopipirisa unotukula madawo anonyemela mafudini mwi-u. Ifwanafwani-o inango inothonyi-edha mwemo Yohova munotukulela liye madawi-u nowatatila olapela na i-yo. Lemba la Salimo 103:12 linoniwandela ira: “Mofwanafwana na mwemo makumelo adhuwa mulapelena aliwa na mavirelo adhuwa, Nlungu uto-ela thitho vyodawa vi-u olapela na i-yo.” Makumelo adhuwa kolapelana maningi na mavirelo adhuwa. Mamburo melala katinogumana. Vyevi vinothapulela ira Yohova uto-ela madawi-u olapela maningi na i-yo. Thitho vinosikimizela ira Yohova unonilevelela na rima othene. w25.02 9 ¶5-6

Yesu angawelenle dhulu, rumiwi Pedru atooira yodabwi-a voili-a mutu oi abaliwile angali orangala. (May. 1:8, 9; 3:2, 6-8) Vyongo vyairile liyevi vyatooiri-a ira atu anjinji tagumaneye valimburoniva. (May. 3:11) N’nga Pedru atoosakhula ira titimi-o lidhowe wa liye vothuulela ira aulukhulile muikhalelo yoi inoona ira vweya na izo pyofuneya maningi? Khabe, modhiyevi-a Pedru kaarumenle ira atitimi-iwe, malomwee atoovelela titimi-o wa Yohova na wa Yesu voonga ira: “Dhina la [Yesu] thitho namwasa oi ninororomela dhina lelo, mutu unom’mona nyoola thitho mutu um’mwidhi nyoola utoila.” (May. 3:12-16) Ninooda tukhulela ifwanafwani-o ya Pedru vokala odhiyevi-a. Ninoirela atu enango vyongo vyapama namwasa oi ninom’dhiveliwana Yohova naatu, a-kala namwasa oi atu enango tanione. Ninothonyi-edha ira nili odhiyevi-a akala ninosangalala vom’labela Yohova naabali-u, masiki atu enango ta-aonenga vyongo vinoira i-yo.—Mat. 6:1-4. w25.03 10-11 ¶11-12

M’dhiveliwana maningi Yohova thitho afwi-u, unooda niiri-a ira nidhiveliwengana basa yolaleela. (Mat. 22:37-39) Kathuulelani mwemo Yohova munosangalalela liye aniona nilabanga basa yolaleela milanyu yapama thitho mwemo munosangalalela atu taroma funjedha Bibilya. Muthuulelenga ira atu tavuruwan’ne milanyu yalaleela i-yo noroma m’labela Yohova, anodha vulumuwa. (Ju. 6:40) N’nga kamunooda kuma vandhe vamyasa inango? Akala ndi e-no muthuulelenga vyongo vinaire nyo ira muthonyi-edhe ira munom’dhiveliwana Yohova thitho atu. Vahora ya sau wa COVID-19, Samueli na Dania katakuma vandhe. Vahora yoruchila aliwa tanoolaleela vo-indi-edha basa telefoni, makarta thitho tanooiri-a funjedha wa Bibilya va Zoom. Angalive ira Samueli na Dania kataoda irana vyongo vinjinji ninga walelene, aliwa tanoodhilimbi-edha irana vyongo vyaoda aliwa thitho tanoosangalala. w24.04 18 ¶15-16

Angalive ira kai banja linoiri-a ira mutu akale osangalala, Makristau anjinji enao ta-ali vabanjani, andimuwa na azombwene anofuna dhafwanya mutu ofuna m’thela venango m’theliwanee. Mbwenye mwa-anarome imweendi munofwanela roma kala vauxamwali wapama na Yohova, m’mwidhiwa pama mutuo thitho kala okozeya samalela banja linyu. (1 Ak. 7:36) Ndi pama idhiwa makalelo a mutu unom’funa nyo mwa-anarome imweendi. Mwa-aire ee-no munooda i-ya mutu wenuo uli ofwanelela noroma imweendi na mutu oi kai ofwanelela. Pyaimbarimbari ira mutu uliwethene unofuna nyo m’thela venango m’theliwanee, unofwanela kala Kristau obadiziwa. (1 Ak. 7:39) Mbwenye kai Kirstau uliwethene obadiziwa unakale ofwanelela. Ee-no ndi pama dhifuka ira: ‘N’nga vifunelo vyanga pivi? N’nga ndi makalelo aavi anoona miyo ira mbofuneya maningi mwamutu unom’funa miyo m’thela venango m’theliwanee? N’nga vinodedi-edhela miyovi pyoodeya?’ w24.05 20 ¶1; 21 ¶3

Munaire a-vi akala imweendiinyu vatokala yorucha thitho kamunovwelana hora dhinjinji? N’nga vyevyo vinothonyi-edha ira kamuli ofwanelela? Kai maningi. Atu othene ali vaimweendi venango vabanjani, hora dhinango ano-iyana mathuulelo. Mbwenye akala anololelana thitho lemezana, anooda dhowanave kaana banja lolimba. Ee-no vyongo vinoira nyo vomali-a nyarwa va-eeni, vinooda ukami-ani idhiwa akala munodha kaana banja lapama venango kabe. Mudhifukenga ira: ‘N’nga vakala yorucha ninotapanyecha mokhurudheya thitho mwalemezo? N’nga ninorumelecha mo-orucha vyongo vya-anoira i-yo pama nodhilimbi-edha visaka-edha? N’nga ndinombaranyedhelecha pepesa, lolela thitho levelela?’ (Aef. 4:31) Mbwenye akala vili nyo vaimweendi hora dhinjinji kamunovwelanecha thitho munokalelecha kangana, pyo-okaikela ira vyongo kavinodha wenda pama mwadhathelana. Akala mutozindiyela ira lombwanuo venango i-yanuo kai ofwanelela, mali-a imweendiyo unooda kala okami-a maningi wanyo ambinlene. w24.05 29 ¶12

Ninooda kala ifwanafwani-o yapama waatu enango akala kaninochinja voirana vyongo vyofwanelela thitho a-rela makhundo a Bibilyani vosakula vyoira mwazelu. Nadhilimbi-edhanga limbi-a iroromelwi-u thitho idhiwa vyongo vinjinji, ninokaatheya Muimbarimbarini. Kaninorucheya sakula vyoira thitho kaninakopeye mo-orucha na vifunji-edho vyonama namathuulelo ailamboi. (Aef. 4:14; Yak. 1:6-8) Ninooda thitho kami-a atu enao anogumanana vyowesedha. (1 At. 3:2, 3) Andimuwa avapingoni anofwanela kala oira vyongo mo-okwaranyi-a madile, othuulela pama, oira vyongo mwamasaka-edho thitho ololela. Alombwana enala anom’roromela maningi Yohova “vo-inda mwakopolo madhu ororomeleya.” (Tit. 1:9; 1 Ti. 3:1-3) Ifwanafwani-o yaandimuwa avapingoni thitho maulendwiwa aubusa, anokami-a anamalaleya ira tafwanyeyenga vamigumanoni, tadhowenga muurumiwini thitho tafunjedhenga vaokene. Abali naarongola tagumanana nyarwa dhinowakumbanyi-a, andimuwa avapingoni anoira vyongo vinjinji vowakami-a e-la mathuulelwiwa wa Yohova na vifunelovyee. w24.06 31 ¶16-18

Angali vailambo yavathi, Yesu atoofunji-a atu ira Babee ngokozeya nilevelela nadawa. Ifwanafwanio vamwasula nja mwana asakunle kuma vandhe vaanamabalee mairanga vyothakala. Mbwenye vasogolovee “zelu dhingam’dhele,” atoowelela waniwa. N’nga babee airile a-vi? Yesu atoonga ira mwanuo “angali undendai, babeuo atoom’mona adhamale atoom’tamangela nom’kumbarela thitho atoom’bejari mwaudhivela.” Mwanuo atoovepa babeuo ira am’tukule ninga nyabasee, mbwenye babeuo atoonga ira “mwanangula,” thonyi-edha ira am’mona ninga mwanee. Babeuo aongile ira: “Ali odimela mbwenye utofwanyeya.” (Luk. 15:11-32) Mo-okaikela, Yesu a-anadhe vailamboi, anoona Babee athonyi-edhanga tangaranga waatu ochinyuwa wiliwili. Ifwanafwani-o ya Yeswila, inonilimbi-a thitho inonisikimizela ira Babi-u Yohova ngwatangaranga. w24.08 11 ¶11-12

Kristau othuulela pama unodhilimbi-edha irana vyongo votukhulela mathuulelo a Yohova. Kristau wen’na unoidhiwa ira kala vauxamwali na Yohova kofuneya maningi kwaranya yongo iliyothene. Liye kanofwanela vithuulelenga kwaranya mwemo munofwanela liye vithuulela, namwasa oi unoidhiwa ira kanoidhiwa vyongo vyothene. Thitho unothonyi-edha ira unom’nyindela Nlungu volobela wa liye hora dhothene. Ninozindiyela ira ninofwanela lobela wa Yohova ira anikami-e, masiki nikaena madodoliso enangwee avakhundu. Ninolobela wa Yohova ira anisogolele nororomelanga ira Yohova unoidhiwa vyongo vyapama maningi wa i-yo. Ninosimba maningi Yohova namwasa onipanducha mundhila yoi niodenga a-rela makhalelwee. (Mar. 1:26) Pyaimbarimbari ira kaninaode m’sazi-edha mu vyongo vyothene.—Esa. 55:9 w25.03 11 ¶13; 13 ¶17-18

Nirambelenga kaikela vifunelo vyaatu enango. Akala mutu mwinango kathonyi-edhe simba vavyongo vim’mwirele i-yo, ninooda dhifuka ira: ‘N’nga mutula ngo-osimbadi, venango ute diwala simba?’ Pyoodeya ira vatokala vyongo viiri-idhe ira a-asimbe mundhila dhathuulela i-yo. Atu enango anokala tasimbanga na rimani mbwenye imwanananga thonyi-edha simbao. Atu enango anooda kaangana manyadho takami-iwanga simbwasimbwa akala ndulimu aliwa mbakami-a atu enango. Akala vyongo vili a-vi, udhivela ngunanikami-e ira na-akaikelenga vifunelo vya Makristau afwi-u nodhowanave kala osangalala. (Aef. 4:2) Mukalenga oleva rima. Vamwasa ova-a modhala mandha, Mwene Solomu atoolemba ira: “Ponya pawaa vama-injeni namwasa oi vavira malambo manjinji unodha ifwanya.” (Nam. 11:1) Lembali linothonyi-edha ira atu enango anooda simba vyongo vyaairele i-yo vavira hora injinji, venango “malambo manjinji.” w24.09 30 ¶18-19

Hora dhinango milanyu yaongiwa pingoni ira mutuo utosumululiwa, ninodhowanave irela vyongo vambo-i naliye voidhiwa ira atoochinyuwa thitho uto-iya vyothakala vyairana liye. Liye unokalave uikhundu ya pingo thitho unofuneela limbi-iwa vowaredha na Makristau afwee. (Aeb. 10:24, 25) Mbwenye kai mwemo munokalela aliwa na mutu akumi-iwa pingoni. Mutu akumi-iwa pingoni nino-iya vwelana naliye “masiki udya na mutu oi e-no.” (1 Ak. 5:11) N’nga vinothapulela ira nim’pwazenga mutu ukhumi-iwile pingoni? Kabe. Pyaimbarimbari ira kaninawaredhenga na liye. Mbwenye akala ukumi-iwile pingonuo ngu bali venango ali fwi-u, ninooda m’mwitanela migumanoni. w24.08 30 ¶13-14