Jɔjis
17 Wan man we nem Mayka bin de na di eria usay mawntin dɛn de na Ifrem.+ 2 I tɛl in mama se: “A bin yɛri yu de swɛ di pɔsin we tif yu 1,100 silva mɔni. Di silva de wit mi, na mi bin tek am.” Na de in mama se: “Mek Jiova blɛs mi bɔypikin.” 3 So i gi di 1,100 silva mɔni bak to in mama, bɔt in mama tɛl am se: “A go mek shɔ se a mek di silva oli na Jiova in yay so dat mi pikin go yuz am fɔ mek imej we dɛn kav ɛn mɛtal imej.+ Naw a de gi yu bak.”
4 Afta i gi di silva mɔni to in mama, in mama tek 200 silva mɔni ɛn gi dɛn to di silvasmit. Di silvasmit mek kav imej ɛn mɛtal imej; ɛn dɛn put dɛn na Mayka in os. 5 Dis man Mayka bin gɛt os we gɛt aydɔl dɛn, i mek wan ɛfɔd+ ɛn tɛrafim statyu*+ dɛn, ɛn i mek wan pan in bɔypikin dɛn bi prist fɔ am.+ 6 Dɛn tɛm dɛn de, kiŋ nɔ bin de na Izrɛl.+ Ɔlman bin de du wetin fayn nain yon yay.*+
7 Wan yɔŋman bin de na Bɛtliɛm+ na Juda we kɔmɔt na Juda in famili. In na Livayt+ we bin dɔn liv de fɔ sɔm tɛm. 8 Di man kɔmɔt na Bɛtliɛm na Juda fɔ fɛn ples fɔ liv. We i de go, i rich na di eria usay mawntin dɛn de na Ifrem, na Mayka in os.+ 9 Dɔn Mayka aks am se: “Usay yu kɔmɔt?” I ansa se: “Mi na Livayt frɔm Bɛtliɛm na Juda, ɛn a de travul fɔ fɛn ples fɔ de.” 10 So Mayka tɛl am se: “Kam de wit mi ɛn bi papa* ɛn prist fɔ mi. A go gi yu tɛn silva mɔni ɛni ia wit klos dɛn ɛn fud.” Na de di Livayt go insay to am. 11 So di Livayt gri fɔ de wit am, ɛn i bin de trit dis yɔŋman lɛk wan pan in bɔypikin dɛn. 12 Pantap dat, Mayka mek di Livayt bi prist fɔ am,+ ɛn i bin de nain os. 13 Dɔn Mayka se: “Naw a no se Jiova go du mi gud, bikɔs di Livayt dɔn bi mi prist.”