Dis tin we Sɔlɔmɔn rayt bɔt de sho wetin kin apin to ɛnibɔdi we de sav Jiova. Sɔntɛm pɔsin go kɔmit siriɔs sin ɛn leta fil se ɔltin jɔs apin “wantɛm wantɛm.” Ɔ sɔntɛm i go tɔk se, “i jɔs apin lɛk dat.” Bɔt, if i tink bɔt wetin dɔn apin, i go mɔs si se i bin dɔn de du sɔm tin dɛn we nɔ mek sɛns we mek i ɛnd-ɔp fɔ sin. Sɔntɛm sɔm pan dɛn tin dɛn de na bad padi dɛn, ɛnjɔymɛnt we nɔ fayn, ɔ i bin de go na wɛbsayt ɔ ples dɛn we Kristian nɔ fɔ go. Sɔntɛm i bin dɔn stɔp bak fɔ pre, rid di Baybul, atɛnd di mitin dɛn, ɔ fɔ de prich. Jɔs lɛk da yɔŋman we Prɔvabs tɔk bɔt, na di tin dɛn we i disayd fɔ du mek i sin, i nɔ jɔs apin wantɛm wantɛm. Wetin na di lɛsin fɔ wi? Wi nɔ jɔs nid fɔ avɔyd fɔ kɔmit sin, bɔt wi nid fɔ avɔyd bak di tin dɛn we go mek wi ɛnd-ɔp fɔ sin. Sɔlɔmɔn bin mek wi no dat klia wan afta i tɔk bɔt di yɔŋman.​—Mat. 5:29, 30. w24.07 16 ¶10-11

Wetin na dis valyu tin? Na di wok we wi de du fɔ prich di gud nyuz bɔt di Kiŋdɔm we go sev pipul dɛn layf. (2 Kɔr. 4:1) Wetin di kɔntri pɔt dɛn tinap fɔ? Dɛn tinap fɔ Gɔd in savant dɛn we de tɛl ɔda pipul dɛn bɔt di gud nyuz. Insay Pɔl in tɛm, pipul dɛn we bin de du biznɛs bin de yuz kɔntri pɔt dɛn fɔ put valyu tin dɛn lɛk it, wayn, ɛn mɔni fɔ go wit dɛn difrɛn say dɛn. Semweso, Jiova dɔn gi wi mɛsej we valyu we na di gud nyuz. Wit Jiova in ɛp, wi go gɛt di trɛnk we wi nid fɔ tɛl pipul dɛn di gud nyuz. Sɔntɛnde, wi kin fred mɔtalman ɔ fred se dɛn nɔ go lisin to wi mɛsej. Wetin go ɛp wi fɔ lɛf fɔ fred? Tink bɔt wetin di apɔsul dɛn bin pre fɔ afta dɛn tɛl dɛn fɔ stɔp fɔ prich. Bifo dɛn fred, dɛn pre to Jiova fɔ ɛp dɛn fɔ kɔntinyu fɔ gɛt maynd fɔ tɔk. Jiova bin ansa dɛn prea wantɛm wantɛm. (Akt 4:18, 29, 31) If sɔntɛnde yu kin fred mɔtalman, pre to Jiova fɔ mek i ɛp yu fɔ lɛf fɔ fred mɔtalman ɛn sho se yu lɛk pipul dɛn. w24.04 16 ¶8-9

Di lɛk we wi lɛk Jiova de mek wi want fɔ mek in nem oli. Wi want fɔ ɛp fɔ mek pipul dɛn no se di bad tin dɛn we Setan dɔn tɔk bɔt Jiova nɔto tru. (Jɛn. 3:1-5; Job 2:4; Jɔn 8:44) We wi de prich, wi rili want fɔ tɛl ɔlman we go lisin to wi di tru bɔt udat Jiova rili bi. Wi want mek ɔlman no se di kwaliti we pas ɔl we i gɛt na lɔv. Wi want mek dɛn no bak se i de rul di rayt we, i de du tin tret, ɛn i nɔ go te igen in Kiŋdɔm go mek wi lɛf fɔ sɔfa ɛn mek ɔlman gɛt pis ɛn gladi-at. (Sam 37:10, 11, 29; 1 Jɔn 4:8) We wi tɛl pipul dɛn bɔt dɛn tin dɛn ya we wi de prich, wi de ɛp fɔ mek Jiova in nem oli. Wi kin gladi bak fɔ no se wi de du wetin i tɛl wi fɔ du as Jiova Witnɛs dɛn. w24.05 18 ¶12