Jɔjis

18 Dɛn tɛm dɛn de, kiŋ nɔ bin de na Izrɛl.+ Ɛn di Danayt+ dɛn bin de luk fɔ say fɔ de bikɔs te da tɛm de, dɛn nɔ bin dɔn gɛt say fɔ de wit di trayb dɛn na Izrɛl.+

2 Di Danayt dɛn sɛn fayv man dɛn frɔm dɛn famili. Di man dɛn kɔmɔt na Zora ɛn Ɛshteɔl+ ɛn na man dɛn we dɛn bin abop pan. Dɛn sɛn dɛn fɔ go wach aw di land tan ɛn fɔ chɛk am fayn fayn wan. Dɛn tɛl dɛn se: “Una go chɛk di land fayn fayn wan.” We dɛn rich na di eria usay mawntin dɛn de na Ifrem, dɛn go na Mayka in os+ ɛn dɛn slip de. 3 We dɛn bin de nia Mayka in os, dɛn yɛri wan vɔys we dɛn sabi, dat na, di yɔŋ Livayt man in vɔys, so dɛn go mit am ɛn aks am se: “Udat briŋ yu kam na ya? Wetin yu de du na dis ples? Wetin mek yu de na ya?” 4 I tɛl dɛn se: “Na so-ɛn-so Mayka du fɔ mi, ɛn i pe mi fɔ mek a bi prist fɔ am.”+ 5 Dɔn dɛn tɛl am se: “Duya aks Gɔd if bɛtɛ go fala wi pan wi patrol.” 6 Nain di prist tɛl dɛn se: “Una go, una nɔ wɔri. Jiova de wit una we una de go pan dis patrol.”

7 So di fayv man dɛn kɔntinyu fɔ travul ɛn dɛn rich na Leish.+ Dɛn si se di pipul dɛn we bin de de nɔ bin abop pan ɛni ɔda neshɔn, jɔs lɛk di Saydonian dɛn. Dɛn bin de liv kwayɛt wan, dɛn nɔ bin de fred se dɛn go kam fɛt dɛn+ ɛn no wikɛd pɔsin nɔ bin de we de atak dɛn land fɔ mɔna dɛn. Dɛn bin de fa frɔm di Saydonian dɛn, ɛn dɛn nɔ bin gɛt biznɛs wit ɔda pipul dɛn.

8 We dɛn kam bak to dɛn brɔda dɛn na Zora ɛn Ɛshteɔl,+ dɛn brɔda dɛn aks dɛn se: “Aw bin di patrol?” 9 Dɛn ansa se: “Lɛ wi go fɛt dɛn, bikɔs wi dɔn si se di land rili fayn. Wetin mek una de westɛm? Lɛ wi nɔ dile fɔ go tek di land. 10 We una rich de, una go si se di pipul dɛn nɔ de fred se dɛn go kam fɛt dɛn+ ɛn di land big. Gɔd dɔn gi am to una, ɛn na ples we ɔltin de.”+

11 Na de 600 man dɛn frɔm di Danayt dɛn famili kɔmɔt frɔm Zora ɛn Ɛshteɔl,+ ɛn dɛn bin rɛdi fɔ go fɛt. 12 Dɛn go ɔp ɛn kamp na Kiriat-jiarim+ na Juda. Na dat mek dɛn kɔl da ples de we de na di wɛst pat na Kiriat-jiarim, Meanɛ-dan*+ te tide. 13 We dɛn kɔmɔt de, dɛn go na di eria usay mawntin dɛn de na Ifrem, ɛn dɛn go na Mayka in os.+

14 Dɔn di fayv man dɛn we bin dɔn go luk aw Leish+ tan, tɛl dɛn brɔda dɛn se: “Una no se ɛfɔd, tɛrafim statyu* dɛn, imej we dɛn kav, ɛn mɛtal imej+ de insay dɛn os dɛn ya? Una tink bɔt wetin una fɔ du.” 15 So dɛn stɔp ɛn go na di yɔŋ Livayt man in os+ we de nia Mayka in os ɛn dɛn aks am aw i de du. 16 Da tɛm de, di 600 Danayt man+ dɛn we bin dɔn rɛdi fɔ go fɛt, tinap na di get. 17 Di fayv man dɛn we bin dɔn go wach di land+ go insay fɔ tek di kav imej, di ɛfɔd,+ di tɛrafim statyu*+ dɛn, ɛn di mɛtal imej.+ (Di prist+ bin tinap na di get wit di 600 man dɛn we rɛdi fɔ fɛt.) 18 Dɛn go insay Mayka in os ɛn tek di kav imej, di ɛfɔd, di tɛrafim statyu* dɛn, ɛn di mɛtal imej. Di prist aks dɛn se: “Wetin una de du?” 19 Bɔt dɛn tɛl am se: “Sɛt yu mɔt. Lɛf fɔ tɔk, ɛn kam wit wi fɔ kam bi papa* ɛn prist fɔ wi. Uswan bɛtɛ, fɔ lɛ yu bi prist fɔ wan man+ in famili ɔ fɔ lɛ yu bi prist fɔ wan trayb ɛn famili na Izrɛl?”+ 20 So di prist gladi, ɛn i tek di ɛfɔd, di tɛrafim statyu* dɛn, ɛn di kav imej+ ɛn i go wit di pipul dɛn.

21 We dɛn lɛf fɔ go, dɛn put di pikin dɛn, di animal dɛn, ɛn dɛn valyu tin dɛn bifo dɛn. 22 We dɛn dɔn go fa smɔl frɔm Mayka in os, di man dɛn we de nia Mayka in os gɛda togɛda ɛn go mit di Danayt dɛn. 23 We dɛn kɔl di Danayt dɛn, dɛn tɔn to dɛn ɛn aks Mayka se: “Wetin apin? Wetin mek una gɛda?” 24 So i ansa dɛn se: “Una dɔn tek mi gɔd dɛn we a mek, ɛn una dɔn tek di prist bak. Wetin lɛf fɔ mi igen? So, aw una go aks mi se, ‘Wetin apin wit yu?’” 25 Di Danayt dɛn se: “Nɔ tɔk to wi so; if nɔto dat, pipul dɛn we gɛt wamat go du una bad, ɛn dat go mek yu ɛn yu famili lɔs una layf.” 26 So di Danayt dɛn go dɛn we; ɛn we Mayka si se dɛn bɔku pas am, i tɔn bak nain os.

27 We dɛn tek wetin Mayka mek ɛn in prist, dɛn go na Leish,+ usay di pipul dɛn we de de bin de liv kwayɛt wan ɛn dɛn nɔ bin de fred se dɛn go kam fɛt dɛn.+ Dɛn kil dɛn wit sɔd ɛn dɛn bɔn di siti. 28 Nɔbɔdi nɔ bin de fɔ sev dɛn, bikɔs dɛn bin de fa frɔm Saydɔn ɛn dɛn nɔ bin gɛt biznɛs wit ɔda pipul dɛn, ɛn dɛn bin de na di vali na Bɛt-riɔb.+ Afta dat, dɛn bil di siti bak ɛn dɛn de de. 29 Pantap dat, dɛn gi di siti dɛn papa in nem we na Dan,+ dat na, di Dan we Izrɛl bɔn.+ Bɔt fɔs di siti in nem+ na bin Leish. 30 Afta dat, di Danayt dɛn fiks di kav imej+ fɔ dɛnsɛf, ɛn Jonɛtan+ we kɔmɔt na Gashɔm+ in famili, we in granpa na Mozis, ɛn in bɔypikin dɛn bi prist fɔ di Danayt dɛn te di de we dɛn kam kapchɔ di pipul dɛn na di land ɛn kɛr dɛn go ɔdasay. 31 Ɛn dɛn fiks di kav imej we Mayka bin dɔn mek, ɛn i kɔntinyu fɔ de de ɔl di tɛm we di tru Gɔd in os bin de na Shaylɔ.+