Ɛksodɔs

38 I yuz akeshia wud fɔ mek di ɔlta fɔ di bɔn ɔfrin. Na bin skwaya, fayv kyubit* lɔng, fayv kyubit wayd, ɛn tri kyubit ay.+ 2 Dɔn i mek ɔn dɛn na di 4 kɔna dɛn. Di ɔn dɛn bin jɔyn to di ɔlta. Afta dat, i kɔba am wit kɔpa.+ 3 Dɔn, i mek ɔl di tin dɛn we dɛn fɔ yuz na di ɔlta, di bɔkɛt dɛn, di shɔvɛl dɛn, di bol dɛn, di fɔk dɛn, ɛn di tin dɛn fɔ put faya. I yuz kɔpa fɔ mek ɔl di tin dɛn fɔ di ɔlta. 4 I mek bak di mɛsh fɔ di ɔlta. I yuz kɔpa fɔ mek di mɛsh, ɛn i put am ɔnda di frem na di ɔlta ɛn di mɛsh go dɔŋ te i rich midul di ɔlta. 5 I mek 4 riŋ dɛn na di 4 kɔna dɛn nia di kɔpa mɛsh we de ol di pol dɛn. 6 Afta dat, i yuz akeshia wud fɔ mek di pol dɛn, dɔn i kɔba dɛn wit kɔpa. 7 I put di pol dɛn na di riŋ dɛn we de na di ɔlta in sayd dɛn we dɛn de yuz fɔ kɛr am go. I mek di ɔlta lɛk bɔks we nɔ gɛt natin ɔnda.

8 Dɔn i yuz kɔpa fɔ mek di besin+ ɛn in stand; i yuz di kɔpa mirɔ* dɛn we di uman dɛn we dɛn ɔganayz fɔ wok na di say fɔ ɛnta di mitin tɛnt bin gɛt fɔ mek dɛn.

9 Dɔn i mek di kɔmpawn.+ I yuz fayn linin we twis fɔ mek kɔtin dɛn we ɛng fɔ di lɛft say* na di kɔmpawn, di kɔtin na bin 100 kyubit.+ 10 Di kɔmpawn bin gɛt 20 pila dɛn ɛn 20 bes dɛn we dɛn yuz kɔpa fɔ mek, ɛn dɛn yuz silva fɔ mek di uk dɛn fɔ di pila dɛn ɛn di tin dɛn we de jɔyn dɛn. 11 Dɔn bak, na di rayt* sayd, i bin gɛt kɔtin dɛn we ɛng we na bin 100 kyubit. Dɔn i yuz kɔpa fɔ mek 20 pila dɛn ɛn 20 bes dɛn fɔ dɛn. I yuz silva fɔ mek di uk dɛn fɔ di pila dɛn ɛn di tin dɛn we de jɔyn dɛn. 12 Bɔt di biɛn* pat na di kɔmpawn bin gɛt kɔtin dɛn we ɛng we na bin 50 kyubit. I bin gɛt tɛn pila dɛn ɛn tɛn bes dɛn. Dɔn i yuz silva fɔ mek di uk dɛn fɔ di pila dɛn ɛn di tin dɛn we de jɔyn dɛn. 13 Di frɔnt* say na di kɔmpawn we de na di say usay di san de kɔmɔt, na bin 50 kyubit wayd. 14 I bin gɛt kɔtin dɛn we ɛng we na 15 kyubit na di wansay, wit tri pila dɛn ɛn tri bes dɛn. 15 Ɛn fɔ di ɔdasay fɔ ɛnta di kɔmpawn, i bin gɛt kɔtin we ɛng we na 15 kyubit, wit tri pila dɛn ɛn tri bes dɛn. 16 Na fayn linin dɛn yuz fɔ mek ɔl di kɔtin dɛn we ɛng rawnd di kɔmpawn. 17 Dɛn yuz kɔpa fɔ mek di pila dɛn ɛn dɛn bes dɛn, ɛn dɛn yuz silva fɔ mek di uk dɛn fɔ di pila dɛn ɛn di tin dɛn we de jɔyn dɛn. Dɛn kɔba di say we de ɔp wit silva, ɛn dɛn bin gɛt silva tin dɛn fɔ jɔyn fɔ ɔl di pila dɛn na di kɔmpawn.+

18 Dɛn yuz blu trɛd, pɔpul wul, rɛd matirial, ɛn fayn linin we dɛn twis ɛn we dɛn wiv togɛda fɔ mek di kɔtin we de na di say fɔ ɛnta di kɔmpawn. Na bin 20 kyubit lɔng ɛn fayv kyubit ay; na bin di sem ayt wit di ɔda kɔtin dɛn we ɛng na di kɔmpawn.+ 19 Dɛn yuz kɔpa fɔ mek dɛn 4 pila dɛn ɛn dɛn 4 bes dɛn. Dɛn yuz silva fɔ mek dɛn uk dɛn ɛn di tin dɛn we de jɔyn dɛn, ɛn dɛn kɔba di say dɛn we de ɔp wit silva. 20 Dɛn yuz kɔpa fɔ mek ɔl di tɛnt pin dɛn fɔ di tabanakul ɛn di wan dɛn we bin de rawnd di kɔmpawn.+

21 Dis na di tin dɛn we bin de na di tabanakul we dɛn kɔnt ɛn rayt, dat na, di tabanakul we gɛt di Lɔ,+ we Mozis bin gi kɔmand fɔ lɛ dɛn kɔnt ɛn rayt. Dis na di wok we di Livayt+ dɛn we Itama,+ we na Erɔn di prist in bɔypikin, bin de dayrɛkt. 22 Bɛzalɛl,+ we na Yuray in bɔypikin ɛn we na Ɔ in granpikin, we kɔmɔt na Juda in trayb du ɔl wetin Jiova dɔn kɔmand Mozis. 23 O-oliab+ we na Aisamak in bɔypikin we kɔmɔt na Dan in trayb bin de wit am. O-oliab na man we sabi wok wit in an, i sabi plant klos ɛn i sabi aw fɔ yuz blu trɛd, pɔpul wul, rɛd matirial, ɛn fayn linin fɔ wiv.

24 Ɔl di gold we dɛn bin yuz fɔ ɔl di wok na di oli ples bin ikwal to di gold fɔ di wev ɔfrin,+ dat na, 29 talɛnt* ɛn 730 shɛkɛl* akɔdin to di shɛkɛl we dɛn de yuz na di oli ples.* 25 Ɛn di silva fɔ di wan dɛn we bin dɔn rɛjista na bin 100 talɛnt ɛn 1,775 shɛkɛl akɔdin to di shɛkɛl we dɛn de yuz na di oli ples.* 26 Di af shɛkɛl fɔ ɔl di pipul dɛn na bin af shɛkɛl akɔdin to di shɛkɛl we dɛn de yuz na di oli ples.* So ɔl di man dɛn we bin de pan di wan dɛn we rɛjista frɔm 20 ia te go ɔp+ na bin 603,550.+

27 Di tin we dɛn bin yuz fɔ mek di bes fɔ di oli ples ɛn di bes fɔ di kɔtin dɛn na bin 100 talɛnt; 100 bes dɛn ikwal to 100 talɛnt, wan talɛnt fɔ ɛniwan pan di bes+ dɛn. 28 I mek uk dɛn fɔ di pila dɛn frɔm di 1,775 shɛkɛl dɛn, ɛn i kɔba di say we de ɔp ɛn jɔyn dɛn togɛda.

29 Di kɔpa fɔ di ɔfrin* na bin 70 talɛnt ɛn 2,400 shɛkɛl. 30 Na dɛn i yuz fɔ mek di bes dɛn na di say fɔ ɛnta di mitin tɛnt, di kɔpa ɔlta ɛn in kɔpa mɛsh, ɔl in tin dɛn we dɛn bin de yuz na di ɔlta, 31 di bes dɛn we bin de rawnd di kɔmpawn, di bes dɛn na di say fɔ ɛnta di kɔmpawn, ɛn ɔl di tɛnt pin dɛn fɔ di tabanakul ɛn ɔl di tɛnt pin+ dɛn we bin de rawnd di kɔmpawn.