Ɛksodɔs

37 Afta dat, Bɛzalɛl+ yuz akeshia wud fɔ mek di Agrimɛnt Bɔks.*+ Na bin tu ɛn af kyubit* lɔng, wan ɛn af kyubit wayd, ɛn wan ɛn af kyubit ay.+ 2 I kɔba am wit piɔ gold insay ɛn na do, dɔn i yuz gold fɔ dizayn am rayt rawnd.+ 3 Afta dat, i yuz gold fɔ mek 4 riŋ dɛn fɔ am, we fɔ de pantap di 4 fut dɛn; tu riŋ dɛn fɔ de na di wansay ɛn tu riŋ dɛn fɔ de na di ɔdasay. 4 Dɔn i yuz akeshia wud fɔ mek pol dɛn ɛn kɔba dɛn wit gold.+ 5 Dɔn i put di pol dɛn na di riŋ dɛn we de na di Agrimɛnt Bɔks* in sayd so dat dɛn go ebul fɔ kɛr di Agrimɛnt Bɔks*+ go we dɛn de go.

6 I yuz piɔ gold fɔ mek di kɔba.+ Na bin tu ɛn af kyubit lɔng ɛn wan ɛn af kyubit wayd.+ 7 Dɔn i yuz gold we dɛn nak nak wit ama fɔ mek di tu chɛrɔb+ dɛn fɔ di tu ɛj dɛn na di kɔba.+ 8 Wan chɛrɔb bin de na wan ɛj, ɛn di ɔda chɛrɔb bin de na di ɔda ɛj. I mek di chɛrɔb dɛn fɔ de na ɔl tu di ɛj dɛn na di kɔba. 9 Di tu chɛrɔb dɛn prɛd dɛn wiŋ dɛn go ɔp, dɛn wiŋ dɛn bin de oba di kɔba+ ɛn dɛn bin fesin dɛnsɛf. Di chɛrɔb dɛn fes dɛn bin tɔn to di kɔba.+

10 Dɔn i yuz akeshia wud fɔ mek di tebul.+ Na bin tu kyubit lɔng, wan kyubit wayd, ɛn wan ɛn af kyubit ay.+ 11 I kɔba am wit piɔ gold, dɔn i yuz gold fɔ dizayn am rayt rawnd. 12 Afta dat, i mek fayn frem we na wan anbrɛt* wayd rawnd am, ɛn i yuz gold fɔ mek dizayn rayt rawnd di frem. 13 Dɔn bak, i yuz gold fɔ mek 4 riŋ dɛn fɔ am, ɛn i put di riŋ dɛn na di 4 kɔna dɛn usay di 4 fut dɛn fiks. 14 Di riŋ dɛn bin de nia di frem we de ol di pol dɛn we dɛn de yuz fɔ kɛr go di tebul. 15 Dɔn i yuz akeshia wud fɔ mek pol dɛn ɛn kɔba dɛn wit gold ɛn dɛn fɔ yuz dɛn fɔ kɛr go di tebul. 16 Afta dat, i yuz piɔ gold fɔ mek di tin dɛn we fɔ de na di tebul, dat na, in plet dɛn, in kɔp dɛn, in bol dɛn, ɛn in jɔg dɛn we dɛn go yuz fɔ tɔn drink ɔfrin+ dɛn.

17 Afta dat, i yuz piɔ gold fɔ mek di lampstand.+ I yuz gold we dɛn nak nak wit ama fɔ mek di lampstand. Di pat we de dɔŋ, di midul pat, di kɔp dɛn, di nɔb* dɛn, ɛn di flawa dɛn, dɛn ɔl na bin wan.+ 18 Siks branch dɛn bin de na di midul pat; tri branch dɛn na di lampstand bin de na wan sayd ɛn tri branch dɛn bin de na di ɔda sayd. 19 Tri kɔp dɛn we dɛn shep lɛk almɔn flawa dɛn bin de na di tri branch dɛn we de na di wan sayd; i put wan nɔb,* wan flawa, wan nɔb,* wan flawa. Dɔn tri kɔp dɛn we dɛn shep lɛk almɔn flawa dɛn bin de na di tri branch dɛn we de na di ɔda sayd; i put wan nɔb,* wan flawa, wan nɔb,* wan flawa. Na so di siks branch dɛn bin de na di midul pat na di lampstand. 20 Ɛn 4 kɔp dɛn we dɛn shep lɛk almɔn flawa dɛn bin de na di midul pat na di lampstand, i put wan nɔb,* wan flawa, wan nɔb,* wan flawa. 21 I put wan nɔb* ɔnda di fɔs tu branch dɛn we de na di midul pat ɛn wan nɔb* ɔnda di ɔda tu branch dɛn ɛn wan nɔb* ɔnda di ɔda tu branch dɛn, fɔ di siks branch dɛn we de na di midul pat. 22 I mek di nɔb* dɛn, di branch dɛn, ɛn di wan ol lampstand bi wan piɔ gold we dɛn nak nak wit ama. 23 Dɔn i yuz piɔ gold fɔ mek in sɛvin lamp+ dɛn, di tin dɛn fɔ ol di wik, ɛn di wan dɛn fɔ put faya. 24 I yuz wan talɛnt* piɔ gold fɔ mek am togɛda wit di tin dɛn we dɛn go yuz fɔ am.

25 Dɔn i yuz akeshia wud fɔ mek ɔlta usay dɛn de bɔn insɛns.+ Na bin skwaya, wan kyubit lɔng, wan kyubit wayd, ɛn tu kyubit ay. In ɔn dɛn bin jɔyn pan am.+ 26 I kɔba am wit piɔ gold pantap, in sayd dɛn rayt rawnd, ɛn in ɔn dɛn, dɔn i yuz gold fɔ dizayn am rayt rawnd. 27 I mek tu gold riŋ dɛn fɔ am dɔŋ in frem na di tu ɔpozit say dɛn fɔ put di pol dɛn we dɛn de yuz fɔ kɛr am go. 28 Afta dat, i yuz akeshia wud fɔ mek di pol dɛn, ɛn i kɔba dɛn wit gold. 29 Dɔn i mek bak di oli ɔyl fɔ anɔynt+ ɛn di piɔ pafyum insɛns.+ I tek tɛm miks dɛn fayn.*