Ɛksodɔs

39 Dɛn yuz blu trɛd, pɔpul wul, ɛn rɛd matirial+ fɔ wiv fayn klos dɛn we dɛn go yuz fɔ wok na di oli ples. Dɛn mek oli klos dɛn fɔ Erɔn,+ jɔs lɛk aw Jiova dɔn kɔmand Mozis.

2 I yuz gold, blu trɛd, pɔpul wul, rɛd matirial, ɛn fayn linin we dɛn twis fɔ mek di ɛfɔd.+ 3 Dɛn yuz ama fɔ nak nak di gold te i layt, dɔn i kɔt kɔt am fɔ mek trɛd so dat i go yuz am fɔ wok wit di blu trɛd, di pɔpul wul, di rɛd matirial, ɛn di fayn linin; dɔn i plant am. 4 Dɛn mek di ɛfɔd lɛk eprɔn we gɛt bifosay ɛn biɛnsay ɛn dɛn jɔyn am na di sholda. 5 Dɔn di bɛlt we dɛn wiv we jɔyn to di ɛfɔd ɛn we dɛn yuz fɔ tay am fayn fayn wan+ na bin di sem matirial, dat na, gold, blu trɛd, pɔpul wul, rɛd matirial, ɛn fayn linin we dɛn twis, jɔs lɛk aw Jiova dɔn kɔmand Mozis.

6 Dɔn dɛn put di ɔniks ston dɛn pan gold frem dɛn, ɛn dɛn yuz ston fɔ rayt Izrɛl in bɔypikin dɛn nem dɛn pan dɛn, jɔs lɛk aw dɛn kin mek sil.*+ 7 I put dɛn usay di ɛfɔd jɔyn na di sholda as ston dɛn fɔ mɛmba Izrɛl in bɔypikin+ dɛn jɔs lɛk aw Jiova dɔn kɔmand Mozis. 8 Dɔn i mek pɔsin we de plant klos mek di tin we di ay prist de wɛr nain chɛst+ jɔs lɛk aw dɛn yuz gold, blu trɛd, pɔpul wul, rɛd matirial, ɛn fayn linin we dɛn twis+ fɔ mek di ɛfɔd. 9 Na bin skwaya we dɛn dɔbul am. We dɛn dɔbul di tin we dɛn mek we di ay prist fɔ wɛr nain chɛst, na bin wan span* lɔng ɛn wan span wayd. 10 Dɛn fiks ston dɛn pan am ɛn na bin 4 ro. Di fɔs ro na bin rubi, topaz, ɛn ɛmirald. 11 Di sɛkɔn ro na bin tɔkɔys, safaya, ɛn jaspa. 12 Di tɔd ro na bin lishɛm ston,* aget, ɛn amitist. 13 Ɛn di nɔmba 4 ro, na bin krisolayt, ɔniks, ɛn jed. Dɛn bin fiks dɛn pan gold frem dɛn. 14 Di ston dɛn bin ikwal to Izrɛl in 12 bɔypikin dɛn nem dɛn, ɛn dɛn rayt dɛn nem dɛn lɛk aw dɛn de mek sil;* ɛniwan pan di nem dɛn tinap fɔ wan pan di 12 trayb dɛn.

15 Dɔn dɛn yuz piɔ gold fɔ mek chen dɛn we rap rap pan dɛnsɛf ɛn put am pan di tin we di ay prist fɔ wɛr nain chɛst.+ 16 Dɔn dɛn mek tu gold frem dɛn ɛn tu gold riŋ dɛn ɛn dɛn fiks di tu riŋ dɛn na di tu ɛj dɛn pan di tin we di ay prist fɔ wɛr nain chɛst. 17 Afta dat, dɛn put di tu gold rop dɛn insay di tu riŋ dɛn we de na di ɛj dɛn pan di tin we di ay prist fɔ wɛr nain chɛst. 18 Dɔn dɛn put di tu ɛj dɛn na di tu rop dɛn pan di tu frem dɛn ɛn dɛn fiks dɛn na di ɛfɔd in sholda ɛn dɛn bin de bifo. 19 Afta dat, dɛn mek tu riŋ dɛn ɛn put dɛn na di tu ɛj dɛn we de biɛn di tin we di ay prist fɔ wɛr nain chɛst, ɛn dɛn fesin di ɛfɔd.+ 20 Dɔn dɛn mek ɔda tu gold riŋ dɛn ɛn put dɛn bifo di ɛfɔd, nia usay di ɛfɔd jɔyn ɛn oba usay di bɛlt we dɛn wiv fɔ di ɛfɔd de. 21 Faynali, dɛn yuz blu rop fɔ ol di tin we di ay prist fɔ wɛr nain chɛst ɛn dɛn tay in riŋ dɛn to di riŋ dɛn we de pan di ɛfɔd. Dɛn du dis so dat di tin we di ay prist fɔ wɛr nain chɛst go kɔntinyu fɔ de pan di ɛfɔd, we de oba di bɛlt we dɛn wiv, jɔs lɛk aw Jiova bin dɔn kɔmand Mozis.

22 Na blu trɛd nɔmɔ i yuz fɔ mek di kot we nɔ gɛt sliv fɔ di ɛfɔd, ɛn na pɔsin we de wiv klos mek am.+ 23 Say we opin bin de midul di klos we nɔ gɛt sliv jɔs lɛk di klos we sojaman dɛn de wɛr pantap dɛn klos. Dɛn fɔ wiv rawnd di say we opin so dat i nɔ go chɛr. 24 Afta dat, dɛn yuz blu trɛd, pɔpul wul, ɛn rɛd matirial we dɛn twis togɛda fɔ mek pomegranet dɛn rawnd di ɛj pan di klos we nɔ gɛt sliv. 25 Ɛn dɛn yuz piɔ gold fɔ mek bɛl dɛn ɛn put di bɛl dɛn bitwin di pomegranet dɛn rawnd di ɛj pat pan di klos we nɔ gɛt sliv, bitwin di pomegranet dɛn; 26 dɛn put wan bɛl, wan pomegranet, wan bɛl, wan pomegranet, rayt rawnd di ɛj pat pan di klos we nɔ gɛt sliv we dɛn bin de yuz fɔ wok, jɔs lɛk aw Jiova dɔn kɔmand Mozis.

27 Dɔn pɔsin we de wiv klos yuz fayn linin fɔ mek klos dɛn fɔ Erɔn ɛn in bɔypikin+ dɛn. 28 Ɛn i yuz fayn linin fɔ mek di tɔban,*+ di fayn tin we dɛn de rap na dɛn ed,+ di shɔt trɔsis+ dɛn we dɛn yuz fayn linin we dɛn twis fɔ mek, 29 ɛn di bɛlt we dɛn mek wit fayn linin we dɛn twis, blu trɛd, pɔpul wul, ɛn rɛd matirial we dɛn wiv togɛda, jɔs lɛk aw Jiova bin dɔn kɔmand Mozis.

30 Faynali, dɛn yuz piɔ gold fɔ mek flat tin we de shayn, dat na, di oli sayn we sho se Erɔn dɔn gi in layf to Gɔd ɛn dɛn rayt pan am lɛk we pɔsin de mek sil.* Dɛn rayt se: “Jiova Oli.”+ 31 Dɛn yuz blu trɛd fɔ mek rop we dɛn tay pan am so dat dɛn go put am pan di tɔban,* jɔs lɛk aw Jiova bin dɔn kɔmand Mozis.

32 So dɛn dɔn ɔl di wok fɔ di tabanakul, dat na, di mitin tɛnt, ɛn di Izrɛlayt dɛn du ɔl wetin Jiova bin dɔn kɔmand Mozis.+ Dɛn du ɔltin.

33 Dɔn dɛn briŋ di tabanakul+ to Mozis, di tɛnt+ ɛn ɔl di tin dɛn we dɛn de yuz insay de: in uk+ dɛn, in frem+ dɛn, in ba+ dɛn, in pila dɛn, ɛn in bes+ dɛn; 34 di ship kanda we dɛn day wit rɛd kɔlɔ fɔ kɔba am,+ di sɔft lɛda* fɔ kɔba am, di kɔtin+ we fɔ de bifo di Agrimɛnt Bɔks;* 35 di bɔks* we gɛt di tablɛt dɛn we gɛt di lɔ ɛn in pol+ dɛn, ɛn di kɔba;+ 36 di tebul ɛn ɔl di tin dɛn we dɛn de yuz na di tebul+ ɛn di shobred;* 37 di lampstand we dɛn yuz piɔ gold fɔ mek, wit in lamp+ dɛn we dɛn put bay ro, ɔl di tin dɛn we dɛn de yuz fɔ am,+ ɛn di ɔyl fɔ layt di lamp+ dɛn; 38 di gold ɔlta,+ di ɔyl fɔ anɔynt,+ di pafyum insɛns,+ di kɔtin+ we fɔ de na di say fɔ ɛnta di tɛnt; 39 di kɔpa ɔlta+ ɛn in kɔpa mɛsh, in pol+ dɛn, ɛn ɔl di tin dɛn we i de yuz pan am,+ di besin ɛn in stand;+ 40 di kɔtin dɛn we fɔ ɛng na di kɔmpawn, in pila dɛn ɛn in bes+ dɛn, di kɔtin+ we de na di say fɔ ɛnta di kɔmpawn, in tɛnt rop dɛn ɛn in tɛnt pin+ dɛn, ɛn ɔl di tin dɛn we dɛn fɔ yuz fɔ wok na di tabanakul, dat na, di mitin tɛnt; 41 di klos dɛn we dɛn wiv fayn wan fɔ wok na di oli ples, Erɔn we na prist in oli klos+ dɛn, ɛn in bɔypikin dɛn we de wok as prist dɛn klos dɛn.

42 Di Izrɛlayt dɛn du ɔl di wok dɛn jɔs lɛk aw Jiova bin dɔn kɔmand Mozis.+ 43 We Mozis chɛk ɔl di wok we dɛn dɔn du, i si se dɛn du am jɔs lɛk aw Jiova bin dɔn kɔmand. Dɔn Mozis blɛs dɛn.