Ɛksodɔs

36 “Bɛzalɛl go wok wit O-oliab ɛn ɔl di man dɛn we sabi wok wit dɛn an we Jiova dɔn gi sɛns ɛn ɔndastandin so dat dɛn go no aw fɔ du ɔl di oli wok jɔs lɛk aw Jiova dɔn kɔmand.”+

2 Na de Mozis kɔl Bɛzalɛl ɛn O-oliab ɛn ɔl di man dɛn we sabi wok wit dɛn an we Jiova dɔn mek dɛn gɛt sɛns,+ ɛn ɔl di wan dɛn we dɛn at gi dɛn fɔ gri fɔ du di wok.+ 3 Dɔn dɛn tek ɔl di kɔntribyushɔn+ we di Izrɛlayt dɛn bin dɔn kam wit fɔ di oli wok na Mozis in an. Bɔt ɛvri mɔnin, di pipul dɛn kɔntinyu fɔ briŋ kam dɛn ɔfrin dɛn we dɛn dɔn disayd fɔ gi.

4 Dɔn afta dɛn stat di oli wok, ɔl di wan dɛn we sabi wok wit dɛn an bin de kam wan bay wan, 5 ɛn dɛn bin de tɛl Mozis se: “Di tin dɛn we di pipul dɛn de briŋ kam bɔku pas wetin wi nid fɔ du di wok we Jiova dɔn kɔmand wi fɔ du.” 6 So Mozis gi kɔmand fɔ lɛ dɛn anawns ɔlsay na di kamp se: “Man ɛn uman dɛn, una nɔ kam wit mɔ tin dɛn igen fɔ di oli kɔntribyushɔn.” Na de dɛn stɔp di pipul dɛn fɔ lɛ dɛn nɔ briŋ kam natin igen. 7 Di tin dɛn we di pipul dɛn bin kam wit bin du fɔ ɔl di wok we dɛn bin nid fɔ du, ɛn i bin ivin bɔku pas wetin dɛn bin nid.

8 So ɔl di wan dɛn we sabi wok wit dɛn an+ mek di tabanakul+ wit tɛn tɛnt klos dɛn we dɛn mek wit fayn linin we dɛn twis, blu trɛd, pɔpul wul, ɛn rɛd matirial; i* mek dɛn wit chɛrɔb dizayn dɛn pan dɛn.+ 9 Ɛniwan pan di tɛnt klos dɛn na bin 28 kyubit* lɔng ɛn 4 kyubit wayd. Ɔl di tɛnt klos dɛn na bin di sem sayz. 10 Dɔn i jɔyn fayv tɛnt klos dɛn togɛda, ɛn i jɔyn di ɔda fayv tɛnt klos dɛn togɛda. 11 Afta dat, i yuz blu trɛd fɔ mek lup* dɛn na di ɛj pat pan wan tɛnt klos usay dɛn go jɔyn am. I du di sem na di ɔda ɛj fɔ di las wan na di sem say usay i go jɔyn. 12 I mek 50 lup* dɛn pan wan tɛnt klos ɛn 50 lup* dɛn na di ɛj pat na di ɔda tɛnt klos na di say usay i go jɔyn so dat di lup* dɛn go de ɔpozit dɛnsɛf. 13 Faynali, i mek 50 gold uk dɛn ɛn jɔyn di tɛnt klos dɛn togɛda wit di uk dɛn ɛn dat mek di tabanakul bi wan.

14 Dɔn i yuz got ia fɔ mek klos dɛn fɔ di tɛnt we go de oba di tabanakul. I mek 11 tɛnt klos+ dɛn. 15 Ɛniwan pan di tɛnt klos dɛn na bin 30 kyubit lɔng ɛn 4 kyubit wayd. Di 11 tɛnt klos dɛn na bin di sem sayz. 16 Dɔn i jɔyn fayv pan di tɛnt klos dɛn togɛda, ɛn i jɔyn di ɔda siks tɛnt klos dɛn togɛda. 17 Afta dat, i mek 50 lup* dɛn na di ɛj pat pan di las tɛnt klos usay i jɔyn, ɛn i mek 50 lup* dɛn na di ɛj pat na di ɔda tɛnt klos we jɔyn to am. 18 Dɔn i mek 50 kɔpa uk dɛn fɔ jɔyn di tɛnt togɛda so dat i go bi wan.

19 I yuz ship kanda we dɛn day wit rɛd kɔlɔ fɔ mek kɔba fɔ di tɛnt, ɛn i yuz sɔft lɛda* fɔ kɔba am.+

20 Dɔn i yuz akeshia wud+ fɔ mek frem dɛn fɔ di say dɛn na di tabanakul; dɛn tinap stret.+ 21 Ɛniwan pan di frem dɛn na bin tɛn kyubit ay ɛn wan ɛn af kyubit wayd. 22 Ɛniwan pan di frem dɛn fɔ gɛt tu pol dɛn we jɔyn. Na so yu fɔ mek ɔl di frem dɛn na di tabanakul. 23 So i mek frem dɛn fɔ di sawt sayd na di tabanakul, 20 frem dɛn fɔ fesin di sawt. 24 Dɔn i mek 40 silva bes dɛn we fɔ de ɔnda di 20 frem dɛn, tu bes dɛn fɔ de ɔnda wan frem fɔ in tu pol dɛn ɛn tu bes dɛn fɔ de ɔnda ɛniwan pan di frem dɛn fɔ in tu pol+ dɛn. 25 Fɔ di ɔdasay we de na di tabanakul, dat na, di say we de na di nɔt, i mek 20 frem dɛn 26 ɛn dɛn 40 silva bes dɛn, tu bes dɛn fɔ de ɔnda wan frem ɛn tu bes dɛn ɔnda di ɔda frem dɛn.

27 Fɔ di biɛnsay na di tabanakul we de bay di wɛst, i mek siks frem+ dɛn. 28 I mek tu frem dɛn fɔ di tu pol dɛn we de biɛnsay na di tabanakul. 29 I dɔbul di pol dɛn frɔm dɔŋ te go ɔp, te to di fɔs riŋ. Na dat i du to di tu pila dɛn we de na di kɔna. 30 So ɔl na bin et frem dɛn ɛn 16 silva bes dɛn, tu bes dɛn bin de ɔnda ɛniwan pan di frem dɛn.

31 Dɔn i yuz akeshia wud fɔ mek ba dɛn, fayv ba dɛn fɔ di frem dɛn we go de na wan sayd na di tabanakul+ 32 ɛn fayv ba dɛn fɔ di frem dɛn we de na di ɔda sayd na di tabanakul ɛn fayv ba dɛn fɔ di frem dɛn na di tabanakul na di say we de biɛn bay di wɛst. 33 I mek ba fɔ di midul frem dɛn fɔ de na wansay na di tabanakul te to di ɔdasay na di tabanakul. 34 I yuz gold fɔ kɔba di frem dɛn, ɛn i yuz gold fɔ mek di riŋ dɛn we go ol di ba dɛn, ɛn i kɔba di ba dɛn wit gold.+

35 Dɔn i yuz blu trɛd, pɔpul wul, rɛd matirial, ɛn fayn linin we dɛn twis fɔ mek kɔtin.+ I mek am wit chɛrɔb+ dizayn dɛn pan am.+ 36 Dɔn i yuz akeshia wud fɔ mek 4 pila dɛn fɔ am ɛn kɔba dɛn wit gold, togɛda wit uk dɛn we i yuz gold fɔ mek, ɛn i mek 4 silva bes dɛn fɔ dɛn. 37 Afta dat, i yuz blu trɛd, pɔpul wul, rɛd matirial, ɛn fayn linin we dɛn twis ɛn wiv togɛda fɔ mek di kɔtin we fɔ de na di say fɔ ɛnta di tɛnt,+ 38 wit dɛn fayv pila dɛn ɛn dɛn uk dɛn. I kɔba di say we de ɔp ɛn di tin dɛn we jɔyn dɛn wit gold, bɔt i yuz kɔpa fɔ mek dɛn fayv bes dɛn.