Ɛksodɔs

35 Leta, Mozis gɛda ɔl di Izrɛlayt dɛn togɛda ɛn tɛl dɛn se: “Na dɛn tin dɛn ya Jiova dɔn kɔmand wi fɔ du, i se:+ 2 Una fɔ wok fɔ siks dez, bɔt di de we mek sɛvin go bi sɔntin we oli to una, na Sabat de we una fɔ rili rɛst we oli to Jiova.+ Una fɔ kil ɛnibɔdi we wok da de de.+ 3 Una nɔ fɔ layt faya na ɔl di say dɛn usay una de, di de fɔ di Sabat.”

4 Na de Mozis tɛl ɔl di Izrɛlayt dɛn se: “Na dis Jiova dɔn kɔmand, i se: 5 ‘Una mek kɔntribyushɔn fɔ mi, Jiova.+ Lɛ ɛnibɔdi we want fɔ gi wit ɔl in at+ briŋ kɔntribyushɔn fɔ mi, Jiova. I fɔ kam wit: gold, silva, kɔpa, 6 blu trɛd, pɔpul wul, rɛd matirial, fayn linin, got ia,+ 7 ship kanda we dɛn day wit rɛd kɔlɔ, sɔft lɛda,* akeshia wud, 8 ɔyl fɔ di lamp dɛn, balsam* we dɛn de yuz fɔ di ɔyl we dɛn de yuz fɔ anɔynt ɛn fɔ di pafyum insɛns,+ 9 ɔniks ston dɛn, ɛn ɔda ston dɛn we dɛn fɔ yuz fɔ mek di ɛfɔd+ ɛn di tin we di ay prist fɔ wɛr nain chɛst.+

10 “‘Lɛ ɔlman we de wit una we sabi wok wit in an,+ kam ɛn mek ɔl wetin Jiova dɔn kɔmand, 11 dat na, di tabanakul wit in tɛnt ɛn di tin we de kɔba am, in uk dɛn wit in frem dɛn, in ba dɛn, in pila dɛn, ɛn in bes dɛn; 12 di Bɔks*+ ɛn in pol+ dɛn, di kɔba+ ɛn di kɔtin+ we de bifo di Bɔks;* 13 di tebul+ ɛn in pol dɛn ɛn ɔl di tin dɛn we dɛn de yuz na di tebul, ɛn di shobred;*+ 14 di lampstand+ fɔ layt ɛn di tin dɛn we dɛn de yuz fɔ am ɛn in lamp dɛn ɛn di ɔyl we dɛn de yuz fɔ layt dɛn;+ 15 di ɔlta fɔ di insɛns+ ɛn in pol dɛn, di ɔyl we dɛn de yuz fɔ anɔynt ɛn di pafyum insɛns;+ di kɔtin fɔ di say fɔ ɛnta di tabanakul; 16 di ɔlta usay dɛn de mek bɔn ɔfrin+ ɛn in kɔpa mɛsh, in pol dɛn ɛn ɔl in tin dɛn we dɛn de yuz fɔ am, di besin ɛn in stand;+ 17 di kɔtin dɛn we ɛng fɔ di kɔmpawn,+ in pila dɛn ɛn in bes dɛn; di kɔtin fɔ di say fɔ ɛnta di kɔmpawn; 18 di tɛnt pin dɛn fɔ di tabanakul ɛn di tɛnt pin dɛn fɔ di kɔmpawn ɛn dɛn rop+ dɛn; 19 di klos dɛn we dɛn wiv fayn wan+ fɔ wok na di oli ples, di oli klos dɛn fɔ Erɔn+ di prist, ɛn di klos dɛn fɔ in bɔypikin dɛn we de wok as prist dɛn.’”

20 So ɔl di Izrɛlayt dɛn go na dɛn tɛnt dɛn. 21 Dɔn ɔl di wan dɛn we want fɔ gi wit ɔl dɛn at+ ɛn ɔl di wan dɛn we dɛn maynd tɛl dɛn fɔ gi, kam ɛn dɛn briŋ dɛn kɔntribyushɔn fɔ Jiova fɔ yuz na di mitin tɛnt, fɔ ɔl di wok dɛn we dɛn go du de, ɛn fɔ di oli klos dɛn. 22 Dɛn kɔntinyu fɔ kam, man ɛn uman dɛn, ɔlman we want fɔ gi wit ɔl in at. Dɛn briŋ kam broch dɛn, yerin dɛn, riŋ dɛn ɛn ɔda juɛlri dɛn. Dɛn gi bak ɔlkayn tin we dɛn mek wit gold. Dɛn gi dɛn as gold ɔfrin* dɛn to Jiova.+ 23 Ɔl di wan dɛn we bin gɛt blu trɛd, pɔpul wul, rɛd matirial, fayn linin, got ia, ship kanda we dɛn day wit rɛd kɔlɔ, ɛn sɔft lɛda* bin briŋ dɛn. 24 Ɔl di wan dɛn we gi silva ɛn kɔpa briŋ Jiova in kɔntribyushɔn, ɛn ɔl di wan dɛn we gɛt akeshia wud briŋ am kam fɔ ɛni pat pan di wok we dɛn go yuz wud.

25 Ɔl di uman dɛn we sabi wok wit dɛn an+ mek blu trɛd, pɔpul wul, rɛd matirial, ɛn fayn linin, dɔn dɛn briŋ dɛn kam. 26 Ɛn ɔl di uman dɛn we sabi wok wit dɛn an ɛn we want fɔ du am wit ɔl dɛn at mek di got ia dɛn.

27 Ɛn di chif* dɛn briŋ ɔniks ston dɛn ɛn ɔda ston dɛn fɔ put na di ɛfɔd ɛn di tin we di ay prist de wɛr nain chɛst,+ 28 ɛn dɛn briŋ bak balsam* ɛn di ɔyl we dɛn de yuz fɔ di lamp dɛn ɛn fɔ di ɔyl we dɛn de yuz fɔ anɔynt+ ɛn fɔ di pafyum insɛns.+ 29 Ɔl di man dɛn ɛn uman dɛn we want fɔ gi wit ɔl dɛn at briŋ sɔntin fɔ di wok we Jiova dɔn kɔmand Mozis fɔ lɛ dɛn du. Di Izrɛlayt dɛn briŋ am kam as ɔfrin we dɛnsɛf sɛf disayd fɔ gi to Jiova.+

30 Na de Mozis tɛl di Izrɛlayt dɛn se: “Una luk, Jiova dɔn pik Bɛzalɛl we na Yuray in bɔypikin, we kɔmɔt na Juda in trayb.+ Yuray na Ɔ in bɔypikin. 31 Gɔd dɔn gi am in spirit, in sɛns, ɔndastandin, ɛn i dɔn mek i no aw fɔ du ɛnikayn wok we pɔsin de du wit in an, 32 so dat i go ebul fɔ tink ɛn mek dizayn dɛn, fɔ mek i go ebul fɔ wok wit gold, silva, ɛn kɔpa, 33 fɔ mek i go sabi fɔ kɔt ɛn wok wit ston dɛn, ɛn fɔ ebul tink ɛn yuz bod fɔ mek ɔlkayn tin. 34 I dɔn mek in ɛn O-oliab,+ we na Aisamak in bɔypikin we kɔmɔt na Dan in trayb, rili sabi fɔ tich ɔda pipul dɛn. 35 I dɔn mek dɛn sabi fɔ du ɔlkayn wok wit dɛn an,+ fɔ plant klos, fɔ yuz blu trɛd, pɔpul wul, rɛd matirial ɛn fayn linin fɔ wiv ɛn fɔ mek ɔda kayn matirial dɛn we dɛn wiv. Dɛn man dɛn ya go du ɔlkayn wok ɛn mek ɔlkayn dizayn.