Ɛksodɔs

31 Jiova kɔntinyu fɔ tɔk to Mozis se: 2 “Luk, a dɔn pik Bɛzalɛl+ we na Yuray in bɔypikin. Yuray na Ɔ in bɔypikin we kɔmɔt na Juda in trayb.+ 3 A go gi am mi spirit,* a go gi am sɛns, ɔndastandin, ɛn a go mek i no aw fɔ du ɛnikayn wok we pɔsin de du wit in an, 4 so dat i go ebul fɔ tink ɛn mek dizayn dɛn, fɔ mek i go ebul fɔ wok wit gold, silva, ɛn kɔpa, 5 fɔ mek i go sabi fɔ kɔt ɛn wok wit ston+ dɛn, ɛn fɔ yuz bod fɔ mek ɔlkayn tin.+ 6 Dɔn a dɔn pik O-oliab+ we na Aisamak in bɔypikin we kɔmɔt na Dan in trayb fɔ ɛp am. A de gi sɛns to ɔl di wan dɛn we sabi wok wit dɛn an so dat dɛn go du ɔl wetin a dɔn kɔmand yu.+ 7 Dat na: di mitin tɛnt,+ di bɔks* we gɛt di tablɛt dɛn we gɛt di lɔ+ ɛn di kɔba+ we fɔ de pan am, ɔl di tin dɛn we dɛn fɔ yuz na di tɛnt, 8 di tebul+ ɛn di tin dɛn we dɛn de yuz na di tebul, di lampstand we dɛn yuz piɔ gold fɔ mek ɛn ɔl di tin dɛn we dɛn de yuz fɔ am,+ di ɔlta usay dɛn de bɔn insɛns,+ 9 di ɔlta we dɛn de yuz fɔ mek bɔn ɔfrin+ ɛn ɔl di tin dɛn we dɛn de yuz pan am, di besin ɛn in stand,+ 10 di klos dɛn we dɛn wiv fayn wan, Erɔn we na prist in oli klos dɛn, in bɔypikin dɛn we de wok as prist dɛn klos+ dɛn, 11 di ɔyl fɔ anɔynt, ɛn di pafyum insɛns fɔ di oli ples.+ Dɛn go du ɔl wetin a dɔn kɔmand yu.”

12 Jiova kɔntinyu fɔ tɔk to Mozis, i se: 13 “Tɔk to di Izrɛlayt dɛn ɛn tɛl dɛn se, ‘Di tin mɔ we una fɔ du na fɔ kip mi sabat+ dɛn, bikɔs na sayn bitwin mi ɛn una fɔ ɔl una jɛnɛreshɔn dɛn, so dat una go no se na mi, Jiova, de mek una oli. 14 Una fɔ kip di Sabat, bikɔs na sɔntin we oli fɔ una.+ Una fɔ kil ɛnibɔdi we mek di Sabat nɔ oli. If ɛnibɔdi wok da de de, una fɔ kil am.+ 15 Una fɔ wok fɔ siks dez, bɔt di de we mek sɛvin na Sabat de we una fɔ rili rɛst.+ Na sɔntin we oli to Jiova. Una fɔ kil ɛnibɔdi we wok di Sabat de. 16 Di Izrɛlayt dɛn fɔ kip di Sabat; dɛn fɔ ol di Sabat fɔ ɔl dɛn jɛnɛreshɔn dɛn. Na agrimɛnt we fɔ de sote go. 17 Na sayn we go de sote go bitwin mi ɛn di pipul dɛn na Izrɛl,+ bikɔs Jiova yuz siks dez fɔ mek di ɛvin ɛn di wɔl, dɔn di de we mek sɛvin i rɛst ɛn i bin gladi.’”+

18 As Gɔd dɔn fɔ tɔk to Mozis so na Mawnt Saynay, i gi Mozis tu tablɛt dɛn we gɛt di Lɔ,+ we Gɔd insɛf sɛf rayt pan wit in finga.+